而家 講 喺 野豬林 裏 便 啊 ，董超 、薛霸 嗰 兩個 嘢 綁住 林沖 要 害死 佢 。
薛霸 舉起 條 水火棍 ，對 正 林沖 個 頭殼 就 劈落去 ！
嗨呀 ，說時遲 就 那時快 喎 。
薛霸 條 棍 就 啱啱 舉起 唧 ，只 聽見 喺 松樹 後 便 ，好似 行 雷 噉 喝 咗 一 聲 。
跟住 一條 鐵禪杖 飛出嚟 ，將 嗰條 水火棍 一格 ，啪聲 ，打到 呀 去 九霄 雲外 咁 遠 。
只見 一個 又肥又大 嘅 和尚 跳出嚟 大喝 話 ：
我 喺 樹林 裏 便 聽住 你哋 好耐 喇 ！
嗰 兩個 差人 睇 下 嗰個 和尚 ，只見 佢 着住 一件 黑布 和尚袍 ，掛住 一把 戒刀 ，舞起 支 禪杖 凶神惡煞 要 打過嚟 。
林沖 啱啱 擘返 開 雙眼 睇下 ，認得 呢個 係 魯智深 ，就 連忙 嗌住 佢 話 ：師兄 啊 ，唔好 逳手 ！我 有 說話 講 。
智深 聽見 噉 先至 收住 支 禪杖 。
嗰 兩個 差人 ，嘿 已經 嚇到 傻晒 逳 都 唔會 逳 。
林沖 話 ：唔關 佢 兩個 事 嘅 ，都係 高太尉 叫 陸虞侯 吩咐 佢哋 要 害 我 條命 。
噉 佢哋 兩個 點 敢 話 唔聽 呢 ？
你 如果 打死 佢哋 兩個 ，亦都係 冤枉 嘅 啫 。
魯智深 就 用 嗰把 戒刀 ，割斷 晒 嗰啲 繩 扶起 林沖 。
佢 話 ：兄弟 ，自從 你 買 刀 嗰 日 ，我 同 你 分別 之後 ，我 都 唔知 幾咁 憂心 你 。
你 吃咗 官司 ，我 又 冇 埞 去 救 你 。
收尾 ，探聽到 話 要 將 你 充軍 去 滄州 ，我 去 到 開封府 前 便 又 搵 你 唔 到 。
聽人講 ，話 你 韞 喺 使臣房 嚟 ，又 見 酒保 嚟 請 兩個 差人 ，話 酒店 裏 便 有 個 官人 請 佢哋 去 有 說話 講 啊 噉 。
我 就 疑心 喇 ，放心 唔 落 你 啊 。
我 怕 嗰班 傢伙 喺 路上 要害 你 ，所以 我 特登 跟住 你哋 。
見到 呢 兩個 衰公 帶咗 你 入 客店 ，我 亦 住埋 嗰度 。
夜晚 ，聽見 嗰 兩個 嘢 喺度 整鬼作怪 ，用 啲 滾水 嚟 淥傷 你 對 腳 。
當時 ，我 就 想 殺咗 呢 兩個 衰公 㗎喇 ，只見到 客店 裏頭 人 多 ，怕 畀 人 救咗 所以 就 冇 逳唧 。
我 見到 呢 兩個 嘢 不 懷 好 意 ，就 越發 擔心 你 喇 。
你 五更 出門口 個 時候 ，我 就 走嚟 呢座 樹林 裏 便 先 ，等住 嚟 殺 呢 兩 個 衰公 。
呢 ，佢哋 真係 嚟 呢度 害 你 ，等 我 去 殺咗 呢兩個 嘢 就 啱喇 ！
既然 師兄 救 咗 我 喇 ， 噉 你 就 唔 好 殺 佢 哋 。
嗯 ，喂 ！你 兩個 衰公 聽住 啊 ，如果 我 唔係 睇在 兄弟 嘅 面子 ，就要 將 你 兩個 剁成 肉醬 ！
而家 畀面 過 我 兄弟 ，唔 殺 你哋 兩個 喇 。
智深 插返 好 把 戒刀 ，又 對 嗰 兩個 嘢 話 ：
你 呢 兩個 衰公 吖 ，快啲 扶住 我 兄弟 ，跟住 我 嚟 ！
講完 ，揸住 支 禪杖 就 行先 嘞 。
呢 個 時候 嗰 兩位 差人 仲 邊度 敢 講 乜嘢 吖 ，只 係 一味 話 誒 林教頭 啊 ，好心 救下 我 哋 兩個 啊 好心 救下 我 哋 兩個 啊 。
快快脆脆 孭起 個 包裹 ，揸住 水火棍 ，扶住 林沖 ，又 幫 佢 攞埋 包裹 ，一齊 跟住 智深 行出咗 個 樹林 。
行咗 三四里 路 ，見到 前面 村口 有 一 間 小小 嘅 酒店 ，四 個 人 就 入去 坐落 。
叫 酒保 買 六七斤 肉 ，打 兩角 酒 嚟 飲 ，另外 要 一啲 麵粉 整 啲 餅 嚟 食 。
個 酒保 一便 整嘢 ，一便就 斟酒 嚟 嘞 。
嗰 兩位 差人 就 問 魯智深 話 ：誒 ，請問 師父 喺 邊間 寺 裏 便 住持 啊 ？
哈哈 ，你 兩個 衰公 問 我 住址 做 乜嘢 啊 ？
莫非 想 去 叫 高俅 搞 啲 乜嘢 嚟 整 鬼 我 係 嘛 ？哼 ！
人哋 怕 佢 ，我 係 唔 怕 佢 嘅 。
我 如果 遇到 佢 呀 ，我 要 佢 捱 三百 禪杖 至 走 ！
誒 ， 誒 嘿嘿 ， 誒 ， 誒 誒 。
兩個 差人 唔 敢 再 開口 嘞 。
食 完 嘢 ，收拾 好 行李 ，找 咗 數 就 離開 間 酒店 。
林沖 問 ：師兄 ，你 而家 去 邊度 ？
開講 有 話 ：殺人 須 見血 ，救人 須 救徹 。
我 放心 你 唔 落 啊 ，我 要 一直 送 兄弟 你 去到 滄州 。
嗰 兩個 差人 一 聽 ，個 心 就 諗 ：弊 晒 喇 呢 勻 ，噉 唔係 搞 𢰸 晒 我哋 嗰 鑊 ？
返去 嘅 時候 點 回覆 好 啊 ？
嚱冇 法子 啦 ，只有 跟住 佢 一齊 行 係 啦 。
呢 ，呢處 有 詩 為 證 ：
最 恨 奸謀 欺 白日 ，獨 持 義氣 薄 黃金 。迢遙 不畏 千程 路 ，辛苦 惟 存 一片 心 。
呢首 詩 ，就係 讚 魯智深 喺 野豬林 救 林沖 㗎 。
從此之後 呢 ，一路上 ，魯智深 話 要 行 就 行 要 歇 就 歇 ，邊個 敢 唔順住 佢 啊 ？
嘿嘿 ，好就鬧 ，唔好就打 。
嗰 兩個 差人 呀 大聲啲 講嘢 都 唔敢 喇 ，事關 啊 最怕 個 和尚 發火 㗎 嘛 。
行咗 兩 站 ，租咗 架 車 ，就 叫 林沖 坐車 ，三個 就 跟住 架車 行 。
兩個 差人 就 懷住 鬼胎 ，都 想 保住 自己 條命 㗎 ，只有 小心翼翼 啊 百依百順 嘞 。
魯智深 一路 買酒 買肉 嚟 保養 林沖 ，噉 啊 嗰 兩個 差人 都有 份 食 嘅 。
遇到 客店 ，都 係 早早 就 休息 ，晏晏至 起行 。
透 火 煮 飯 呢啲嘢 就 唔使 問 喇 梗係 嗰 兩個 差人 做 㗎 定啦 ，邊個 敢 話 唔聽話 啊 ？
佢 兩個 喺度 暗中 商量 ：喂 ，我哋 畀 呢個 和尚 捻到 實㗎 喇 。
第日 返去 呀 ，高太尉 實唔 肯 過 我哋 㗎 。
薛霸話 ：係喇 ，我 聽講 大相國寺 嗰個 菜園 啊 ，新新 嚟咗 個 和尚 叫做 魯智深 ，我 諗呀 ，實係 佢啫 。
我哋 返到去 就 照實 講 ，話 我哋 要 喺 野豬林 整死 林沖 㗎喇 ，點知 畀 呢個 和尚 救咗 ，一路 護送 佢 去到 滄州 ，所以 就 冇 辦法 落手 。
至多 畀返 嗰 十兩 金 過 佢 啫 ，唔係 等 陸謙 自己 去 搵 呢個 和尚 咯 。
我 同 你 呀 ，只要 洗得 乾乾淨淨 就 好喇 。
哦 ，誒噉 講 係啊 。
嗰 兩個 嘢 暗暗 商量 妥當 咯 ，呢啲 呢 就 唔 講 佢 。
自從 畀 智深 寸步 不離 噉 監視住 之後 ，行咗 十七八日 ，離開 滄州 就 只有 七十 零里 咁上下 嘅 路程 。
由 呢 處 一路 去 呢 ，沿路 都 有 人家 ，再 冇 咩 嘢 僻靜 險惡 個 地方 。
魯智深 探聽 得 確實 之後 ，呢日 行到 一座 叢林 休息 嘅 時候 呢 就 同 林沖 話 ：
兄弟 ，呢處 離開 滄州 冇 幾 遠 。
前 便 一路 都 有 人家 ，再 冇 咩 嘢 僻靜 嘅 地方 ，我 已經 探聽 清楚 㗎 喇 。
而家 ，我 要 同 你 分手 ，將來 我哋 再 相見 啦 。
師兄 返到去 ，唔該 同我 講聲 畀 外父 聽 。
防護之恩 ，我 唔死 一定 厚報 ！
魯智深 就 攞出 十幾 廿 兩 銀 嚟 畀 林沖 ，又 畀咗 二三 兩 過 呢 兩 個 差人 。
佢 話 ：你 兩個 衰公 ，本應 就 斬咗 你 兩個 頭 㗎喇 ，睇在 兄弟 嘅 面 上 ，留返 你 兩個 條命 係 啦 。
而家 冇 幾遠 路 喇 ，唔好 再 起 壞心 喇吓 。
誒 誒 嚱 ，誒 嚱 誒 嚱 ，誒 點 敢 吖 ，誒 點 敢 吖 ，誒 ，誒 呢 啲 都 係 太尉 差遣 嘅 啫 。
收咗 啲 銀 ，大家 要 分手 ，魯智深 望實 嗰 兩個 差人 話 ：
喂 ，你 兩個 衰公 個 頭殼 ，有冇 呢 樖 松樹 咁 硬 啊 ？
誒 ，呵呵 ，嘿嘿嘿 ，哎呀 ，誒 小人 嘅 頭殼 ，不過 係 父母 嘅 皮肉 包住 啲 骨頭 啫 ，嚱 邊度 有 樖 松樹 咁 硬 吖 嚱 。
智深 舉起 支 禪杖 ，對住 松樹 只係 打咗 一下 ，喇 一聲 ，嗰 樖 樹 齊輯輯 斷咗 。
你哋 睇 ，你 兩個 衰公 如果 仲 居心不良 ，我 就 叫 你 同 呢 樖 樹 一樣 ！
智深 擺 一 擺 手 ，拖住 支 禪杖 講 一 聲 ：兄弟 保重 啊 ！噉 就 走咗 嘞 。
董超 、薛霸 見到 ，嚇到 伸出 條 脷 半日 都 縮 唔 返 入口 。
林沖 就 話 ：兩位 ，我哋 都 起行 喇 。
嗰 兩個 差人 話 ：嘩 ，誒 乜 嗰 和尚 乜 真係 咁 犀利 嘅 喂 ，一下 就 打斷 咗 一樖 樹 㗎 喇 。
林沖 話 ：噉 算得 乜嘢 啊 ，相國寺 有 一樖 楊樹 ，佢 連根 將 佢 拔起 。
兩個 嘢 一味 咁 擰頭 ，而家 先至 知道 冇錯 就係 佢 喇 。
林沖 佢哋 離開咗 叢林 ，一直 行 到 下晝 ，見到 喺 官道 嘅 旁邊 有 一間 酒店 就 行入去 咯 喎 。
林沖 就 讓 兩個 差人 喺 上首 坐 ，即係 讓 佢哋 坐 大位 。
嗰 兩個 嘢 ，坐咗 好 耐 先至 慢慢 自然 返 。
誒 梗 係 啦 ，因為 呢 十幾廿日 ，畀 魯智深 治到 服晒 ，好耐 冇 噉 坐過 㗎 啦 嘛 。
呢間 酒店 裏 便 ，有 唔少 座位 ，好幾個 酒保 行 嚟 行 去 又 搬 東 搬 西 ，忙 到 唔 氹氹 轉 。
之林沖 同 兩個 差人 入到嚟 坐咗 成 半個 時辰 嘞 ，一個 酒保 都 冇 過嚟 問 一聲 。
林沖 等得 唔 耐煩 ，咯咯聲 噉 敲住 張 枱 話 ：
你 呢個 店主人 真係 會 欺負 人客 ，見 我 係 個 犯人 就 唔 理 我 係 嘛 ？
我 唔 係 白食 你嘅 噃 ，你 係 咩嘢 意思 啊 ？
店主人 就 過嚟 話 ：你 唔知 喇 ，呢啲 係 我 嘅 好意 啊 。
酒肉 都 唔 賣 畀 我 ，有 咩 嘢 好意 啊 ？
你 唔 知 喇 ，我哋 呢條 村裏便 有 個 大財主 ，姓 柴名 進 ，呢處 稱呼 佢 做 柴大官人 ，江湖上 都 叫 佢 做 小旋風 。
佢 係 大周 柴世忠 嘅 子孫 嚟 。
自從 陳橋讓位 之後 ，太祖 武德 皇帝 呢 ，就 賜咗 誓書 鐵券 畀 佢 ，放 喺 屋企 嚟 ，你 話 邊個 敢 欺負 佢 吖 ？
呢 位 柴大官人 啊 ，專門 招接 天下 往來 嘅 好漢 嘅 ，周時 都 養住 三二十個 喺 屋企 裏 便 。
佢 時常 囑咐 我哋 酒店 話 嘞 ，如果 有 流配 嚟 嘅 犯人 呢 ，就 叫 佢 嚟 我 間 莊處 啦 ，我 會 資助 佢 嘅 噉 話 。
你 話 喇 ，我 而家 賣 咗 酒肉 畀 你 ，你 又 食到 面 紅紅 ，佢 見 咗 啊 以為 你 自己 有錢 㗎 啦 ，就 唔 幫 你 㗎 啦 嘛 。
你 話 喇 ，我 唔 賣 嘢 畀 你 係 唔係 好意 吖 ？
林沖 聽咗 就 同 嗰 兩個 差人 話 ：
我 喺 東京 做 教頭 嘅 時候 ，時時 都 聽見 軍隊 裏 便 啲 人 講起 話 柴 大官人 嘅 名 㗎 喇 。
原來 就 喺 呢處 ，我哋 不如 去 投奔 佢 。
董超 、 薛霸 喺 度 諗 ： 噉 既然 係 噉 ， 我 哋 有 咩 嘢 蝕 抵 嘅 嚱 。
於是就 同 林沖 話 ：好啊 ，去啦 。
林沖 又 問 個 店 主人 話 ：
主人家 ，柴大官人 嘅 莊 喺 邊度 嚟 㗎 ？我哋 正係 想 搵 佢 啊 。
呢 就 喺 前面 啫 ，約莫 行 三兩里 路 添 啦 ，有 一道 大 石橋 ，喺 橋邊 轉彎 嗰 間 大莊院 就係 喇 。
林沖 佢哋 多謝 過 店主 ，帶齊 包裹 行李 就 出咗 酒店 去 搵 柴 進 嘅 莊院 咯噃 。
行咗 兩三里 路 ，哈 果然 見到 有座 大石橋 。
過咗橋 ，係 一條 平平坦坦 嘅 大路 ，前便 喺 啲 柳蔭 之中 就係 嗰間 莊院 嘞 。
呢間莊院 嘅 四周圍 有 一條河 ，岸邊 種滿晒 垂楊大樹 。
三個人 行到 莊前 ，見到 有 四五個 莊客 ，坐 喺 道闊板橋 上面 唞涼 。
佢哋 行到 橋邊 ，就 對 莊客 行咗 禮 ，林沖 話 ：
相煩 大哥 去 報畀 大官人 知 ，京師 有 個 犯人 姓 林 嘅 ，送配 嚟 滄州 牢城 ，專誠 求見 。
嗰班 莊客 話 喇 ：哈哈 ，嚱 你 真係 冇 福份 嘞 ，如果 大官人 喺 屋企 ，就 有 酒食 錢財 送畀 你 啦 。
之 今朝 早 大官人 去咗 打獵 咯 。
唔知 幾時 返嚟 呢吓 ？
啊 噉 又 講唔定 㗎 喎 ，怕且 去咗 東莊 休息 呢 ，幾時 至 返 就 好難 同你 講 嘞 。
唉 ，噉 我 真係 冇 福份 ，見唔到 大官人 ，我哋 走罷啦 。
辭別咗 班 莊客 ，三個 人 行返 條 舊路 扯 。
林沖 個 心 就 好 翳悶 。
大概 行咗 半里路 左右 ，只見 喺 前面 樹林 有 一班 人馬 ，向住 莊院 呢便 飛奔 而嚟 。
冇 幾耐 ，呢班人 就 嚟到 林沖 佢哋 面前 。
喺 呢班 人 嘅 中間 ，有 一 位 官人 ，騎 一 匹 雪白 捲毛 馬 。
呢個 官人 呀 ，生得 龍眉 鳳目 ，皓齒 朱唇 ，三縷 掩口鬍鬚 ，三十 四 五 歲 咁上下 年紀 啦 。
佢 頭戴 一頂 烏紗 轉角 簇花 巾 ，身穿 一領 紫 繡 團胸 繡花 袍 ，攬住 一條 玲瓏 嵌 寶玉 腰帶 ，腳穿 一對 金線 抹 綠黑 朝靴 。
帶 一張 弓 ，插一壺 箭 ，十分 英俊 。
林沖 見到 佢 就 諗 ：唔通 佢 就係 柴大官人 ？
但係 又 唔敢 問 喎 ，只見 騎住馬 嗰位 官人 ，縱馬 上前 問 林沖 話 ：
呢位 帶枷 嘅 係 咩嘢 人 啊 ？
林沖 慌忙 躬身 回答 話 ：
小人 係 東京 禁軍 教頭 姓林 名沖 ，為 因 得罪 咗 高太尉 ，畀 佢 借 啲 意 打發 到 開封府 ，判 咗 罪 刺配 嚟 滄州 。
喺 前面 間 酒店 ，聽見 人 話 呢度 有 一個 招賢納士 嘅 好漢 ，柴 大官人 ，因此 專誠 嚟 投奔 佢 。
點 知道 緣 慳 福薄 ，見 佢 唔 到 啊 。
嗰個 官人 聽咗 ，即刻 落馬 飛快 行上嚟 話 ：柴進 有失 遠迎 啊 ！
講完 ，喺 草地 上 就 拜 。
林沖 連忙 答禮 。
嗰個 官人 拖住 林沖 隻 手 ，一齊 行返去 莊院 。
嗰班 莊客 見到 主人 返嚟 咯 ，就 大開 莊門 迎接 啦 。
柴進 請 林沖 一直 嚟到 大廳 ，兩個 重新 見過 嚟 ，柴進 就 話 ：
小可 久聞 教頭 大名 ，想唔到 今日 教頭 光臨 敝莊 ，真係 大慰 平生 渴仰之願 啊 。
微賤 林沖 ，聞得 大人 貴名 傳播 海宇 ，邊個 唔 敬重 吖 ？
冇想到 今日 ，因為 犯咗罪 流配 到 滄州 ，能夠 同 大人 見面 ，真係 畢生 有幸 啊 。
好喇 ，開 枱 埋位 飲酒 。
柴進 再三 謙讓 ，請 林沖 坐喺 客席 ，董超 、薛霸 亦都 喺 一便 坐落 。
柴進 就 叫 莊客 攞 酒 嚟 啦 。
冇 幾耐 ，只見 幾個 莊客 托住 一碟 肉 ，一碟 餅 ，一壺 酒 出嚟 ；另外 仲 托住 一斗 白米 ，上面 放住 十貫 錢 。
柴進 一見到 就 話 喇 ：啲 鄉下佬 不知 高低 ，教頭 嚟到 咁 輕慢 都 得 嘅 咩 ？
快啲 攞返 入去 。
去攞 果盒酒 嚟 先 ，然後 劏 隻 羊 嚟 款待 ，快啲 去 整 。
林沖 企起身 多謝 話 ：大官人 呀 ，不必 賞賜 咁多 ，就係 噉樣 已經 十分 足夠 。
唔 好 噉 講 ，難得 教頭 嚟 到 呢 度 ，點 能夠 輕慢 呢 ？
啲 莊客 ，好快 就 捧 咗 果 盒 酒 出嚟 ，柴進 企起身 敬咗 林沖 三 杯 。
飲完 之後 柴進 話 ：教頭 ，請 入去 裏 便 坐下 。
柴進 解 低 身上 掛住 嘅 弓袋 箭壺 ，請 林沖 入去 後堂 ，亦 請埋 兩個 差人 一齊 去 飲酒 。
柴進 就 坐 喺 主席 ，林沖 就 坐 喺 客席 ，兩個 差人 呢 ，就 坐 喺 林沖 嘅 下首 便 嘞 。
柴進 同 林沖 傾 下 閒偈 ，又 講 下 江湖 上 嘅 事情 ，不 知 不 覺 已經 紅日 西沉 。
到咗 黃昏 時候 ，筵席 已經 準備好 ，啲 果品 、海味 啊 擺 滿 晒 成 枱 。
柴進 親自 舉杯 敬咗 三巡酒 ，佢 坐低 話 ：攞 湯 嚟 啦 。
啱啱 飲咗 一道 湯 ，幾 杯 酒 ，有 個 莊客 就 嚟 報話 ：教師 嚟 。
吖啱喇啱喇 ，一齊 請 教師 嚟 坐下 會 下面 亦 好 吖 ，你們 快啲 擺 多 張 枱 嚟 。
林沖 起身 睇下 ，只見 嗰個 教師 嚟 ，佢 頂頭巾 呀 ，戴得 歪歪扯扯 ，演 胸突肚 噉 行到 入嚟 後堂 。
林沖 諗 ：啲 莊客 稱呼 佢 做 教師 ，必定 係 大官人 嘅 師父 喇 。
於是就 急急 躬身 行 個 禮話 ：林沖 ，謹參 。
點知 嗰個人 睬 都 唔 睬 林沖 ，亦 唔 還禮 喎 。
林沖 就 企 喺 度 唔 敢 抬頭 。
柴進 指住 林沖 對 呢位 洪教頭 話 ：嚟 相見 下 ，呢位 就係 東京 八十萬 禁軍 槍棒 教頭 林 武師 ，林沖 。
林沖 聽咗 ，對住 洪教頭 就 拜 。
個 洪教頭 話 ：唔使 拜喇 ，起身 啦 。
佢 自己 呢 ，亦 冇 躬身 答禮 喎 。
柴進 見到 佢 噉樣 個 心 好 唔鍾意 。
林沖 拜咗 兩 拜 ，起身 就 請 洪教頭 坐 。
洪教頭 啊 冇 啲 客氣 啊 ，唔該 都 冇 聲 ，就 喺 上首 個 大位 坐落 。
柴進 見咗 又 唔 高興 。
林沖 就 只有 喺 洪教頭 嘅 下首 坐 啦 。
洪教頭 問 柴進 話 ：大官人 ，今日 為咩嘢 用 咁 厚禮 嚟 款待 配軍 呢 ？
呢位 唔同 第二個 ，佢 係 八十萬 禁軍 教頭 嚟喎 ，師父 點解 咁 輕慢 呢 ？
哈哈 ，大官人啊 ，皆因 你 鍾意 學武藝 ，往往 嗰啲 流配 軍人 都 走嚟 攀附 你 。
個個 都 話 自己 係 槍棒 教師 ，嚟 呢度 氹 啲 酒食 錢米 。
大官人 你 啊 當 佢 係 真嘅 。
林沖 聽咗 唔 出聲 。
柴進 就 話 ： 人 不可 貌相 ， 師父 唔 好 睇 小 佢 。
洪教頭 畀 柴進 講 呢句 唔好 睇小 佢 啊 當堂 激扤 ，一下 就 跳 起身 嚟 話 ：
我 就 唔 信 佢 ，佢 敢 同 我 打 一 棍 我 就 話 佢 真 教頭 嚟 ！
柴進 哈哈 大笑 起嚟 話 ：嘿 噉好噉好 ，林武師 ，你 意下 如何 呢 ？
小人 ，不敢 。
洪教頭 個 心 諗 嚱 呢個 嘢 吖 實 係 冇 料 吖 嗱 ，個 心 都 怯晒 嘞 ，所以 就 越發 要 嘍 林沖 嚟 較量 咯 喎 。
柴進 呢 ，一來 係 想 睇下 林沖 嘅 本領 ；
二來呢 ，確係 想 林沖 贏咗 洪教頭 塞住 佢 把嘴 。
所以 柴進 就 話 喇 ：噉 就 飲住酒 先 ，等 月 出 先至 講 啦 。
又飲咗 六七杯酒 ，呢個時候 個月 出嚟 ，照到 廳堂 裏 便 呀 好似 日頭 咁 光猛 。
柴進 企 起身 話 ：兩位 教頭 較量 一棍 呢 。
林沖 有 林沖嘅 諗法 ，佢 個 心 想 ：
呢個 洪教頭 實係 柴大官人 嘅 師父 嚟 ，你 話 畀 我 一棍 打低 就 好唔好 睇 㗎 嘞 噃 。
柴進 見 林沖 咁 躊躇 ，就 話 喇 ：
呢位 洪教頭 亦都 係 嚟咗 呢處 冇 幾耐 嘅 啫 ，呢處 又 冇 對手 。
林武師 唔好 推辭 喇 ，小可 正係 想要 睇下 兩位 教頭 個 本領 。
柴進 講 呢番 說話 意思 就 講到 白晒 ，即話 林沖 ，你 唔使 唔好意思 㗎 ，有 本事 就 使出嚟 啦 噉 。
林沖 見到 柴進 噉樣 講 咯 就 放心 啦 。
洪教頭 早就 忍唔住 嘞 ，佢 企起身 話 ：嚟嚟嚟 ，同 你 打 一 棍 睇下 。
大家 都 想 睇熱鬧 㗎 嘛 ，一班人 呀 㗾㗾聲 湧晒出去 間廳 後便 嘅 空地 處 。
莊客 就 攞咗 一紮 棍棒 嚟 放 喺 地下 。
洪教頭 除咗 件 衣服 先 ，扎好 晒 ，攞 條 棍 擺咗 個 姿勢 ，喝 一聲 話 ：嚟嚟嚟 ！
柴進 話 ：林武師 ，請 較量 一棍 。
大官人 ，唔好 笑 喎 。
林沖 亦 攞起 一條 棍 話 ：師父 ，請教 喇 ！
洪教頭 見到 呀 ，恨不得 一啖 就 吞咗 林沖 。
林沖 攞住 條 棍 ，好似 連 根 拔 樹 ，毒蛇 吐信 噉 ，𠻘 一聲 就 打過去 。
洪教頭 將 條棍 就地 鞭 一下 就 嚟 搏 林沖 嘞 。
兩個 教頭 ，就 喺 月光 之下 交手 ，打咗 四五個 回合 。
林沖 啪聲 跳出 圈外 ，叫咗 聲 話 ：暫停 ！
柴進 話 喇 ：教頭 點解 唔 攞 啲 本事 出嚟 啊 ？
小人 ，輸 嘞 。
咦 ？都 未 見 兩位 較量 ，點解 話 輸 嘞 呢 ？
小人 ，多咗 一面 枷 ，因此 ，就算 輸 喇 。
哎呀 ，係 小可 一時 諗唔到 ，哈哈哈哈 ，呢個 容易啫 ，人 嚟 ！
咩事啊 大官人 ？
攞 十 兩 銀 嚟 。
係 。
轉 下 眼 ，十 兩 銀 搦 到 嚟 。
柴進 對 嗰 兩個 押送 差人 話 ：
小可 斗膽 ，相煩 兩位 通融 一下 ，暫時 將 林教頭 嗰面 枷 開咗 佢 先 。
聽日 ，如果 牢城 軍營 裏頭 有 咩嘢 事 ，都 包 喺 小可 嘅 身上 。
呢度 有 十 兩 銀 送 畀 兩位 。
董超 、薛霸 睇見 柴進 呀 ，器宇 軒昂 ，就 唔敢 唔聽 佢 話 。
而且 又 逗 佢 十 兩 銀 ，樂得 做 個 人情 ，亦 唔怕 林沖 會 走咗 去 㗎 。
薛霸 就 話 喇 ：嚱得得得得得 ，跟手 就 將 林沖 嗰面 護身 枷 開 咗 。
柴進 好高興 噉 話 ：好喇 ，呢次 兩位 教師 再 嚟 試 一棍 啦 。
洪教頭 見 林沖 先頭 啲 棍法 冇 咩嘢 出奇 吖 ，蝦 佢 冇 料 ，攞去 支 棍 又 想 打 過 嚟 咯喎 。
柴進 話 ：咪 住 ！
佢 叫 莊客 攞咗 一個 銀錠 出嚟 ，廿五 兩 重 嘅 ，佢 話 ：
兩位 教頭 今晚 比 棍 ，好 難得 啊 ，呢個 銀錠 ，就 愛嚟 做 彩金 ，邊位 贏咗 就 攞 佢 去 啦 。
柴進 一心 想 林沖 攞出 真本事 嚟 ，就 故意 將 銀錠 掉 喺 地下 。
洪教頭 呀 ，都 唔知 幾 憎 林沖 嚟 ，又 想 爭 呢個 大銀錠 ，又 怕 輸咗 銳氣 喎 。
揸 住 條 棍 ，畀 心機 擺好 個 姿勢 ，叫做 把火燒天勢 噃 。
林沖 諗 ：柴 大官人 個 心 一味 想 我 贏 佢 ，好 ！
於是 打橫 揸住 條 棍 ，擺咗 個 姿勢 叫做 撥草尋蛇勢 。
洪教頭 喝 一聲 ：嚟嚟嚟 ！舞起 條 棍 就 劈過嚟 。
林沖 向 後 一 退 。
洪教頭 趕 入 一步 ，舉起 棍 又 一棍 冚過嚟 。
林沖 睇見 佢 腳步 已經 亂咗 咯 ，就 將 條 棍 喺 地下 一跳 。
洪教頭 措手 不及 ，就 喺 嗰 一跳 裏 便 個身 一轉 ，嗰條 棍 啡聲 掃過去 打正 洪教頭 隻 腳 嘅 下五寸 當堂 成個 碌低 ，連 棍 都 掉埋 。
柴進 真係 高興 ，即刻 叫人 攞 酒 嚟 敬畀 林沖 。
圍住 喺度 睇 熱鬧 嗰啲 人 呀 呱呱聲 大笑 起上嚟 。
洪教頭 掙扎 返 起身 ，啲 莊客 一便 笑 一便 扶住 洪教頭 。
洪教頭 滿面 羞慚 咯呢趟 ，趷下趷下 ，畀 啲 莊客 扶住 就 出咗去 莊外 便 。
柴進 拖住 林沖 隻手 ，再 入去 後堂 飲酒 ，叫人 攞 啲 彩金 嚟 送畀 教師 。
林沖 又 唔肯 收 ，之 推 嚟 推 去 都 推 唔 甩 ，就 只 好 多 謝 一聲 收起 係啦 。
柴進 就 留 林沖 喺 莊處 ，住咗 幾日 ，每 日 都係 好酒 好食 嚟 款待 。
又 住咗 六七日 添 ，嗰 兩個 差人 就 催住 要 走 。
柴進 就 擺酒 同 林沖 送行 ，又 寫咗 兩 封 信 就 吩咐 林沖 話 ：
滄州 大尹 同 我 好好 嘅 ，牢城 嘅 管營 同 差撥 ，亦都 同 我 有 好 深 嘅 交情 。
教頭 攞住 呢 兩 封 信 去 ，佢哋 必定 會 好好 咁 照顧 教頭 你 ，
講完 ，又 叫 人 捧出 一錠 二十五 兩 個 大銀 送畀 林沖 ，又 攞 五 兩 銀 嚟 送畀 兩 個 差人 。
當晚 ，飲咗 成晚 酒 。
第日 天光 ，食完 早飯 ，由 莊客 擔住 三個 人 嘅 行李 ，林沖 啊 依然 帶返 嗰面 枷 ，辭別 咗 柴進 就 要 起程 嘞 。
柴進 一直 送出 莊門 ，佢 話 ：過 幾日 ，小可 就 會 使人 送 天冷 衣服 畀 教頭 你 㗎 喇 。
多謝 ，多謝 ，真係 點樣 嚟 報答 大官人 你 好 呢 ？
林沖 多謝 過 柴進 ，就 同 兩個 差人 一齊 去 滄州 。
