而家 講下 王進 母子 兩個人 啊 ，自從 離開咗 東京 之後 呢 ，一路上 曉行夜宿 ，饑餐 渴飲 ，行咗 成個 幾月 喇 。
有一日 ，上下黃昏 ，王進 就 擔住 擔行李 ，跟住 佢 阿媽 嘅 馬 後 。
佢 同 阿媽 話 ：哎呀 ，真係 天公 可憐 ，算 好彩 啦 。
我哋 母子 兩人 ，總算 衝出咗 天羅地網 。
呢度 離開 延安府 冇 幾 遠 㗎喇 。
高太尉 就算 係 派人 捉 我 ，亦 捉唔到 嘞 。
兩 母子 個 心 就 好 高興 啦 ，猛行猛行 ，點知 就 錯過咗 住宿 嘅 地方 。
一直行到好夜喇 ，都 仲 遇唔到 一個 村莊 ，噉 去 邊度 瞓 好 呢 今晚 ？
正在 冇修 嘅 時候 ，忽然 見到 遠遠 嘅 樹林 裏 便 有 道 燈光 閃下閃下 。
王進 見到 就 話 喇 ：嘿 好喇 好喇 ，去到 嗰處 講返 幾句 好話 ，借住 一晚 ，聽朝 一早 再 起行 啦 。
佢哋 行到去 樹林 ，入到去 一睇 ，原來 係 一個 大 莊院 嚟 嘅 ，沊沊𡃈 都係 泥墻 ，牆外 便 ，種咗 成 二三百 樖 大 柳樹 。
王進 就嚟到 莊前 ，拍咗 好耐 門 ，噉 就 有 個 莊客 出嚟 。
王進 放低 擔行李 ，同 佢 行咗 個 禮 。
個莊客 就 問嘞 ：嚟 我哋 個莊 有 咩事 啊 ？
小人 兩 母子 貪 快 行 多咗 路程 ，錯過咗 客店 。
嚟到 呢度 ，前 不近 村 後 不近 店 ，想 喺度 借住 一晚 ，聽朝 一早 起行 。
房錢 該 幾多 就 照 畀 ，萬望 多多 方便 。
噉 呀 ， 你 等一等 啦 ， 等 我入 去 問 下 莊主 太公 先 。
如果 肯咯 ，喺 處 過 一 晚 冇所謂 嘅 ，你 等等 啦吓 。
大哥 方便 下 啦 。
個 莊客 入咗 去 ，過咗 一陣 就 出嚟 喇 。
莊主 太公 叫 你 兩個 入去 喎 。
王進 叫 佢 阿媽 落咗 馬 。
自己 就 擔住 行李 ， 牽住 隻 馬 ， 跟隨 住 個 莊客 入到 去 裏 便 嘅 打麥場 ， 然後 ， 放落 擔 嘢 ， 將 隻 馬 綁 喺 柳樹 上面 。
兩母子 就 行入去 間 草堂 見 莊主 太公 喇 。
呢個 莊主 太公 ，六十零歲 ，頭髮 鬍鬚 都 白晒 㗎喇 ，戴住 頂 遮塵 暖帽 ，着住 件 直縫 寬衫 ，腰束 黑絲帶 ，足 穿 熟皮靴 。
王進 一見面 就 拜 。
太公 就 連忙 話 ： 客人 唔 使 咁 多禮 唔 使 咁 多禮 ， 哈哈哈 ， 你 哋 都 係 出門 趕路 嘅 人 ， 辛苦 咯 ， 坐 啦 ， 坐 啦 。
王進 兩 母子 同 太公 行過 禮 ，都 坐落 喇 。
太公 就 問 佢 哋 話 ：你 哋 ，係 喺 邊 處 嚟 啊 ？乜 咁 夜 嚟 到 呢 處 呢 ？
小人 姓 張 ，係 京師 人 。
因為 做生意 蝕咗 本 ，冇得 做咯 ，而家 要 去 延安府 投奔 親戚 。
點知 今日 貪快 行 多咗啲 路程 ，錯過咗 客店 ，想 喺 貴莊 借住 一晚 ，聽朝 一早 起行 。
房錢 就 照例 拜納 。
哎 冇 所謂 嘅 ， 有 邊個 孭 住 間屋 出門 㗎 ？ 哈哈哈 係 喇 ， 你 哋 兩位 怕 未 食飯 㗎 ？
太公 講完 ，就 叫 莊客 整飯 嚟 。
冇幾耐 ，就 喺 廳處 開咗 張 枱 ，莊客 捧住 個 托盤 出嚟 ，四樣 菜蔬 ，一碟 牛肉 ，喺 張 枱 處 擺好 。
又座 熱住 啲 酒 。
太公話 ：喺 鄉下 嚟 ，冇 咩嘢 款待 ，唔好 見怪 喎 。
小人 兩 母子 噉樣 滾攪 你哋 ，呢個 恩德 真係 難以 報答 啊 。
哈哈哈 哈哈哈 ， 唔 好 噉 講 ， 唔 好 噉 講 ， 請 飲 啦 。
一連 敬咗 好幾 杯 酒 ，就 攞 飯 出嚟 。
食完之後 ，太公 就 帶 王 進 兩 母子 去 客房 休息 。
王進話 ：小人 母親 騎 嗰匹馬 ，勞煩 照顧 一下 ，畀啲 草料 佢 ，一齊 拜謝 。
呢層冇所謂 ，我屋企 亦 養咗 啲 騾馬 ，等陣 叫 莊客 牽去 馬房 一齊 餵 就得喇 。
王進 多謝咗 太公 ，擔起 行李 就 去 客房 。
莊客 同 佢 點着 眼燈 ，一便 就 攞 熱水 嚟 畀 佢哋 兩個 洗腳 。
太公 自己 都 入去 裏 便 休息 嘞 。
王進 兩 母子 多謝 過 莊客 ，掩好 道 房門 瞓覺 。
第日 ，瞓到 天光 ，仲未見 佢哋 起身 噃 。
莊主 太公 嚟 到 客房 前面 ， 聽見 房 裏頭 有人 唉 唉 聲 。
太公 就 話 ：客官 呀 ，天光 喇 ，好 起身 喇 。
王進 聽見 就 連忙 喺 間 房 行 出嚟 ，同 太公 行咗 禮 就 話 喇 ：
小人 起咗身 好耐 嘞 ，尋晚 諸多 打攪 十分 過意唔去 。
先頭 ，邊個 嗌得 咁 辛苦 啊 ？
太公 ，唔怕 同 你 講 ，我 老母 騎 馬 攰得滯 ，尋晚 心痛 病 又 發作 。
哦 ，既然 係噉呀 ，客官 ，你 唔使 擔心 。
你 哋 就 喺 老夫 呢 度 住 幾日 ， 我 有 個 醫 心痛病 嘅 藥方 好 靈擎 嘅 ， 等陣 叫 啲 莊客 去 縣城 執 啲 藥 返 嚟 ， 畀 你 母親 食 。
誒叫佢放心 ，就喺度 好好醫病 啦 ，啊 。
王進 就 梗係 好多 得定 啦 。
佢哋 住咗 好幾日 ，王進 個 老母 食咗 藥 就 好返 ，就 準備 走 咯 喎 。
嗰日 ，王 進去 馬房 睇下 隻 馬 ，只見 喺 空地 處 有 個 後生仔 ，除 大 赤肋 ，佢 個 身上 便 係 刺咗 花紋 嘅 ，刺住 幾 條 青龍 。
呢個 後生仔 面口 好 白淨 ，好似 隻 銀碟 噉 ，約莫 十八九歲 ，揸住 條 棍 喺度 舞緊 。
王進 睇咗 一陣 ，唔覺意 講咗 一聲 話 ：
呢條棍 ，都算 使得 好 ，不過 仲係 有啲 破綻 ，贏唔到 真 好漢 。
嗰個 後生仔 聽到 就 火滾 啦 ：你 係 咩人 啊 ？咁 大膽 ，敢 笑 我 啲 本事 唔使得 ？
我 拜過 七八個 有名 嘅 師父 ，我 又 唔信 唔及 你 喎 ，你 敢唔敢 同 我 挭 兩下 呢 ？
話猶未了 ，太公 嚟到 就 喝 個 後生仔 話 ：唔准 咁 冇禮 ！
邊個 叫 呢個 嘢 笑 我 嘅 棍法 啊 。
太公 就 問 王進 話 喇 ：莫非 客官 你 會 使 槍棒 咩 ？
都會得啲嘅 ，請問 太公 呢個 後生仔 係 府上 邊位 啊 ？
係 我 嘅 仔 。
哦 ，既然 係 府上 嘅 小官人 ，如果 佢 鍾意 學 ，噉 小人 指點 下 佢 好 唔 好 呢 ？
噉就好到極咯 ！
太公 即刻 叫 個 後生仔 嚟 拜 師父 咯 喎 。
嗰個 後生仔 啊 邊處 肯 拜 至 得 㗎 ，佢 越發 嬲 喇 ，佢 話 ：
阿爹 ，你 唔好 聽 呢個 嘢 亂咁噏 啊 ，如果 佢 贏得 我 呢條 棍 我 就 拜 佢 為 師 係啦 。
王進 就 話喇 ：小官人 ，如果 你 睇得起 ，就 較量 一棍 玩下 啦 。
嗰個 後生仔 就 喺 空地 當中 ，將 條 棍 呀 舞到 風車 咁 轉 。
你嚟吖 你嚟啦 ，怕嘅 就唔係 好漢 ！
王進 就 一味 笑 唔肯 逳手 。
太公 話 ：客官 既然 話 肯教 我 呢 個 頑皮 仔咯 ，玩一棍 咁 多 又 何妨 呢 ？
嘿嘿 ，怕 衝撞咗 令郎 嘅 時候 ，唔好 睇 喎 。
噉係唔區嘅 ，就算係 打斷咗 手腳 ，亦係 佢 自作自受 嘅 咋嘛 。
噉就 恕 我 無禮 喇 。
王進 講完 就 去 槍架 上面 攞咗 一條 棍 揸住 喺 手 嚟 ，行開 去 空地 ，擺咗 個 姿勢 。
個 後生仔 睇咗 一睇 ，揸住 條棍 ，噔噔噔 直 對住 王進 衝過嚟 。
王進霎聲拖住條棍就走 。
個 後生仔 將 條棍 一 捹 ，又 趕過嚟 。
王進一 回轉身 ，將 條棍 對住 空地 劈過去 。
個 後生仔 見到 條 棍 劈過嚟 就 使 條 棍 去 格 嘞 。
點知 王進 唔 打落嚟 喎 ，佢 將 條 棍 一 縮 ，𠻘聲 對住 後生仔 個 肚 直 㨃 過去 。
拂噉 一撩 ，個 後生仔 條 棍 當堂 打飛 咗 ，個人 呢 ，啪聲 成個 打仰 就 跌 喺 地 嚟 。
王進 連忙 掉低 條 棍 ，行前 扶住 佢 話 ：嗨 對唔住 對唔住 ！
個 後生仔 躝 返 起身 ，就 去 旁邊 搬 張 凳 嚟 ，扤 王 進 坐落 就 跪低 叩頭 話 ：
枉我 拜過 咁多 師父 ，原來 都係 唔值 半文錢 嘅 。
冇辦法啦 ，師父 ，只有 請教 你嘞 。
我哋 兩 母子 喺度 滾攪 咁多日 ，冇 咩嘢 好 報答 ，應該 效勞 嘅 。
太公 十分 高興 ，叫 個 後生仔 着 返 衫 ，一齊 嚟到 後堂 坐 。
又 吩咐 莊客 去 劏 隻 羊 ，安排 酒菜 。
然後 就 請埋 王 進 個 老母 一齊 入席 。
四個人 坐定 喇 ，太公 起身 敬咗 一杯酒 ，佢 話 ：
師父 嘅 本領 咁 高強 ，必定 係 個 教頭 。
小兒 有 眼 不識 泰山 啊 ，哈哈哈哈哈哈哈哈 。
我哋 真人 面前 唔 講 假話 ，小人 ，唔係 姓 張 。
哦？
我係 東京 八十萬 禁軍 教頭 王進 ，槍槍棒棒 都係 成日 咁 玩 㗎喇 。
為因 新 上任 嘅 一個 高太尉 ，舊時 ，係 畀 先父 打輸過 ，而家 佢 做到 殿帥府 太尉 ，佢 要 報 呢 一點 舊仇 ，想 整鬼 我 王進 。
我 畀 佢 管 到 正 ，點 同 佢 爭 呢 ？
所以 我哋 兩 母子 只好 趯去 延安府 ，投奔 老種 經略 相公 搵 啲 事 做 。
想唔到 嚟到 呢度 ，得到 太公 你 父子 兩位 咁好 嘅 款待 。
又 承蒙 救咗 母親 嘅 病痛 ，真係 感激 不淺 。
既然 令郎 肯 學咯 ，小人 一定 盡力 嚟 教 。
不過 令郎 所學 嘅 都係 啲 花棍 ，淨係 得 好睇 嘅 啫 ，上起陣嚟 冇 用 嘅 。
等 小人 從頭 指點 佢 啦 。
太公 聽咗 就 話 喇 ：阿仔啊 ，呢回 認輸 嘞啩 ？哈哈哈哈哈哈 ，快啲 再嚟 拜下 師父 ！
於是 個 後生仔 又 拜咗 幾 拜 。
太公 又 講畀 王進 聽 ，佢 話 ：
教頭 ，老漢 祖居 喺 呢個 華陰 縣 嚟 ，前便 就 係 少華山 。
呢 條 村 ，就 叫做 史家村 ，村裏 頭 ，總共 有 三四百 戶 人家 都 係 姓 史 嘅 。
老漢 呢個 仔 ，自細 唔肯 務農 ，就係 鍾意 舞槍 弄棒 。
佢 老母 話 佢 又 話 唔聽 ，激氣 激死咗 喇 ，老漢 就 只好 由得 佢 係 啦 。
都唔知 使 幾多 錢 ，請 師父 返嚟 教 佢 。
又 請咗 個 好好 本事 嘅 匠人 ，同 佢 刺咗 呢 一 身 嘅 花繡 ，膊頭 、手臂 、心口 ，總共 刺咗 九 條 龍 。
嘿嘿嘿 ，成個 縣 啲 人 貪 口爽 ，都 叫 佢 做 九紋龍 史進 喎 ，哈哈哈哈哈哈 。
教頭 今日 既然 咁啱 嚟到 呢處 ，就 成全 咗 佢 啦 。
老漢 自然 重重酬謝 。
太公 請 你 放心 ，既然 係噉 小人 一於 教會咗 令郎 先至 走 。
自從 當日 開始 ，飲完 酒 食完 飯 ，就 留住 王教頭 兩 母子 喺 史家莊 。
史進 就 日日 都 跟 王進 學 武藝 ，一 十 八般 武藝 就 件件 從頭 學起 。
喂 係 喇 ，成日 都 聽見 講話 十八般武藝 就 十八般武藝 ，究竟 邊 十八般武藝 啊 ？
呢 十八般 武藝 呀 就係 ：
矛 錘 弓 弩 銃 ， 鞭 簡 劍 鏈 撾 。 斧 鋮 共 戈 戟 ， 牌 棒 與 槍 扠 。 噉 就 係 十八般 武藝 喇 。
噉史進 就 每日 都 跟住 王 教頭 練武 。
史太公 係 喺 華陰縣 做 里正 ，呢啲 就 唔多 講 佢 。
日子 過得 快啊 ，不知不覺 ，已經 過咗 半年 有多 。
喺 呢 半年多 裏頭 ，史進 得到 王進 盡心 指教 ，對 呢 十八般武藝 重新 學得 十分 精通 熟練 。
王進 見 佢 學得 咁 好 喇 ，個 心 諗 ：喺 呢度 雖然 係 好啊 ，之 冇 乜 結局 㗎 。
有一日 ，佢 諗起嚟 就 要 辭別 史進 去 延安府 咯 喎 。
史進 就 唔肯 放佢走 ，佢 就 話 ：
師父 你 就 喺 呢處 住 落去 啦 ，小弟 奉養 你 母子 兩個人 一直 到 老 噉 幾 好 呢 。
賢弟 ，多得 你 咁 關照 ，喺 呢處 係 非常之 好 ；
就係 怕 高太尉 追捕 到嚟 呢處 連累 咗 你 就 唔 妥當 。
我 一心 要 去 延安府 ，投奔 老種 經略 嗰度 搵 份 差事 。
嗰 度 係 鎮守 邊疆 ，正 係 用人 嘅 時候 ，可以 喺 處 安身立命 啊 。
史進 同 太公 苦苦 留佢 都 留唔住 ，只有 擺酒 同 佢 送行 係啦 。
又 送咗 兩 匹 綢緞 ，一百 兩 花銀 謝師 。
第二日 ，王進 執拾 好 一擔 行李 ，備好 馬 ，母子 兩人 同 史太公 辭過 行 。
王進 就 請 阿媽 上咗 馬 ，滴滴鐸鐸 滴滴鐸鐸 就 向住 延安府 路途 出發 嘞 。
史進 叫 個 莊客 擔住 行李 ，親自 送咗 十里 咁 遠 。
唉真係 送君 千里 就 終須 一別 ，雖然 個心 好唔捨得 啊 ，亦 只有 拜咗 師父 幾拜 ，同 師父 灑淚 分別 係啦 。
王教頭 啊 依然 自己 擔起 擔 行李 ，跟住 馬 ，同 個 老母 一路 去 關西 延安府 嘞 。
而家 唔 講 咁多 王 進去 投軍 嘅 事 嘞 ，淨係 講下 史 進 。
史進 佢 返到去 史家莊 啊 ，每 日 只係 鍛煉 氣力 。
佢 正係 壯年 嘅 時候 ，又 未曾 娶 老婆 嘅 ，都 係 半夜 三更 就 起身 ，演習 武藝 。
日頭 呢 ，就 喺 莊 後 個 空地 跑馬 射箭 。
係噉樣 過咗 未到 半年 ，佢 父親 史太公 啊 得咗 病 ，病到 唔起得身 。
史進 就 叫人 四處 咁 請 啲 好 醫生 返嚟 同 阿爹 睇病 ，點知 醫唔好 咯 ，嗚呼哀哉 太公 就 過咗 身 。
史進 辦完 喪事 之後 ，佢 個人 又 唔肯 務農 嘅 ，亦 唔願 管理 家業 。
只係 好似 平時 一樣 ，日日 都 搵 人 嚟 耍刀 耍槍 練習 武藝 。
就係噉樣 ，又 過咗 三四個月 。
當時 正 係 六月 中旬 ，個 天 好 熱 。
有一日 ，史進 就 冇 咩嘢 好 消遣 ，就 擔咗 張 挨廳椅 ，坐 喺 打麥場 牆邊 嘅 樹蔭 底下 唞涼 。
喺 對面 叢林 一浸浸 清 風吹過嚟 ，史進 喝彩 喇 ：嘿 ，啲 風 真 涼爽 啊 ！
正喺處唞緊涼 ，忽然 見到 有個人 探頭探腦 喺 嗰便 裝裝下 喎 。
史進 就 喝 咗 一聲 話 ：哈 作怪 喇 ，邊個 喺 嗰 處 裝裝 下 啊 ？
史進 跳起身 ，轉過咗 樹 背後 行過去 一 睇 ，認得 嗰個 人 係 獵戶 李吉 。
史進 就 喝 佢 話 ：李吉 ！嚟 我 個 莊處 裝 咩嘢 啊 ？嚟 探 下 盤 摸 下 底 係 嘛 ？
李吉上 前行 咗 個 禮話 ： 哦 ， 大郎 ， 嘿嘿 ， 乜 說話 呢 乜 說話 呢 ， 小人 想 嚟 搵 矮 仔阿二去 飲碗 酒 啫 。
因為 見到 大郎 喺 處 唞緊 涼 ，所以 又 唔敢 過嚟 衝撞 啊 。
係喇李吉 ，我 嚟 問聲 你 ：往日 你 時時 都 擔 啲 野味 嚟 我 個 莊處 賣 嘅 ，我 未曾 虧待過 你 吖 。
點解 呢一排 總 唔見 攞 啲 野味 嚟 賣 啊 ？蝦 我 冇 錢 買 係嘛 ？
哎呀哎大郎 ，哎 ，小人 點敢 呢 ？皆因 一直 都 冇 野味 所以 冇嚟 咋嘛 。
亂噏 ，咁 大 一個 少華山 ，山 又 深 時 地 又 闊 ，我 就 唔 信 冇 幾隻 黃猄 野兔 啊 。
唉 ，大郎 ，你 有所不知 啊 。
近來 山上 便 多咗 一幫 賊 啊 ，扎落 一架 山寨 ，喺 上面 聚集咗 六七百 個 小嘍啰 ，仲有 百零 匹 好馬 。
做頭嗰個大王 ，叫做 神機軍師 朱武 ；
第二個 叫做 跳澗虎 陳達 ；
第三個 呀 叫做 白花蛇 楊春 。
呢 三個 人 做 頭 ，打家劫舍 ，華陰縣 治 佢哋 唔掂 ，出到 三千 貫 賞錢 ，招 人 嚟 捉 佢哋 啊 ，之 有 邊個 敢 去 惹 佢哋 吖 ？
就係因為噉 ，我哋 都 唔敢 上山 去 打獵 咯 ，噉 點 有 野味 攞嚟 賣 呢 又 ？
冇錯 ，我 亦 聽講 話 有 一班 賊 ，之 估唔到 嗰班 傢伙 咁 巴閉 ，係噉 就 一定 會 嚟 騷擾 嘅 。
李吉啊 ，總之 你 以後 打到 啲 野味 就 攞 啲 嚟 啦 吓 。
好呢大郎 ，李吉 行咗 個 禮 ，扯咗 喇 。
史進行返入廳 ，佢 諗 ：哼 ！呢班 傢伙 要 大搞 ，必定 會 嚟 騷擾 村莊 。
既然 係 噉呀 ，好啦 ！
於是 史進 就 叫 莊客 ， 揀 兩 隻 肥大 嘅 水牛 劏 咗 佢 ，攞 出 幾 埕 屋企 自己 剩 嘅 靚 酒 ， 燒 咗 一 刀 紙錢 拜神 。
就 叫 莊客 去 請 呢處 三四百 家 史家 莊戶 ，都 嚟 屋企 大廳 ，按照 尊卑 輩份 坐落 ，叫 莊客 同 大家 敬酒 。
史進 同 大家 話 ：我 聽講 少華山 上 便 有 三個 賊佬 ，聚集 住 六七百 個 小嘍啰 ，到處 打家劫舍 。
呢班傢伙 既然 要 大搞 咯 ，必定 遲早 都 會 嚟 我哋 條村 囉嗦 嘅 。
我 今日 特登 請 你哋 各位 嚟 一齊 商量 下 ，如果 嗰班 傢伙 嚟 嘅 時候 ，各家 都 要 準備好 。
我個莊 一打起 梆子 呢 ，你哋 大家 就 攞住 刀槍 前嚟 救應 。
你哋 各家 有事 亦係 噉樣 ，總之 就係 互相 救護 ，共保 村莊 。
如果 係 賊佬 自己 嚟 ，就 等 我 嚟 解決 佢 啦 。
大家 聽咗 都 話 喇 ：我哋 啲 耕田 人仔 ，凡事 都係 靠 大郎 你 作主 嘅 啫 。
一打響梆子 ，邊個 敢 話 唔嚟 吖 ？
當晚 ，大家 飲完 酒 散咗席 ，就 各有各 返 屋企 準備 刀槍兵器 嘞 。
自此之後呢 ，史進 就 修理 好啲 門戶 圍牆 ，喺 莊內 設立 幾個 梆子 ，準備 盔甲 ，整頓 刀馬 ，提防 賊寇 ，呢啲 又 唔 講 佢 住 。
而家 講 下 少華山 山寨 裏 便 嗰 三位 頭領 。
為首嗰個 神機軍師 朱武 ，係 定遠 人士 ，能夠 使 兩口 雙刀 。
雖然 佢 嘅 武藝 唔係 十分 高強 啊 ，之 佢 精通 陣法 就 好 有 計謀 嘅 喎 。
第二個 好漢 ，姓 陳 名 達 ，人稱 跳澗虎 ，係 鄴城 人氏 ，使 一條 出白點 鋼槍 。
第三個 好漢 ，姓 楊 名 春 ，外號 白花蛇 ，係 蒲州 解良 縣 人氏 ，使 一口 大桿刀 。
呢一日 ，三個 頭領 喺度 商議 事情 。
朱武 對 陳達 、楊春 話 ：我 聽講 華陰縣 出 三千 貫 賞錢 ，召 人 捉 我哋 。
兵馬 一 嚟 ，就要 同 佢 哋 殺過 㗎 。
之 山寨 錢糧 欠缺 噃 ，我哋 不如 去 劫 啲 返嚟 ，供應 山寨 嘅 使用 。
同時 積存 啲 糧食 喺 個 山寨 嚟 ，第日 官軍 嚟 咯 ，我哋 噉 先至 能夠 堅持得住 㗎 嘛 。
跳澗虎陳達話 ：講得啱 。
而家 就 去 華陰縣 ，同 佢 借 啲 糧 先 睇下 佢 點 ！
白花蛇楊春話 ：唔好去 華陰縣 喇 ，去 蒲城縣 啦 ，萬無一失 。
陳達話喇 ：蒲城縣 人家 稀少 ，錢糧 唔多 冇乜好撈嘅 ，不如 去 打 華陰縣 罷啦 ，嗰處 啲人 富有 啊 ，錢糧 都 大把 。
楊春話 ：阿哥 你 有所不知 啊 ，如果 去 打 華陰縣 ，一定 要 經過 史家村 。
嗰個 九紋龍 史進 係 隻 老虎 嚟 㗎 ，唔好 去 撩撥 佢 啊 。
你 話 喇 ，佢 點 肯 放 我哋 過去 呢 ？
兄弟 你 真 怕事 ！一個 村莊 都 唔 過得去 ，仲 敢 同 官軍 打 ？
阿哥 你 唔好 睇 小 佢 啊 ，佢 個人 確實 使得 㗎 ！
朱武 聽 佢哋 兩個 拗咗 一輪 就 話 ：
我 都 聽聞 佢 係 十分 英雄 㗎 ，話 呢個人 真係 有 本事 ，噉咪 去 喇 兄弟 。
陳達 就 嘈起 上嚟 話 ：誒 ！你 兩個 都 咪 講 喇 ！
長別人志氣就滅自己威風 。
佢 亦 係 個人 啫 ，又 唔係 三頭六臂 ，有 乜 咁 厲害 啊 ？我 就 唔 信 ！
人嚟 ！叫 小嘍啰 咯 喎 ：同 我 備 馬 。
我 而家 就 去 先 打 史家莊 ，後 取 華陰縣 。
朱武 、楊春 就 再三 勸諫 叫佢 唔好 去 ，陳達 就 畫咗 耳仔 上 墻 一於 唔聽 。
跟住 就 穿好 盔甲 ，上咗 馬 ，點咗 百 四 五 個 小嘍啰 ，敲鑼打鼓 落山 就 一路 去 史家莊 。
呢一日 ，史進 就 正 喺 莊前 操練 兵馬 ，莊客 走嚟 報告 話 少華山 有 賊 嚟 啊噉 。
史進 就 即刻 叫 人 打 響 梆子 。
嘿呀 ，個 莊 前 莊 後 莊 東 莊 西 啊 ，三四百 史家 莊 戶 ，聽到 梆子 響 唄 ，都 有 槍 攞 槍 有 棍 攞 棍 就 聚起 三四百 人 ，一齊 嚟到 史家 莊 。
只見 史進 頭戴 一字巾 ，身披 朱紅甲 ，上 穿 青錦襖 下 着 抹 綠靴 ，腰束 皮 搭膊 啊 前後 鐵掩心 ，一張 弓 ，一壺 箭 ，手上 攞 住 一把 三尖 兩刃 ，四竅八環刀 。
莊客 牽過 嗰 匹 火炭赤馬 。
史進 上咗 馬 ，揸住 刀 ，前面 擺住 三四十 個 壯健 嘅 莊客 ，後 便 排住 八九十 個 鄉下佬 。
各 史家 莊戶 都 跟住 喺 後便 嚟 ，一齊 吶喊 ，浩浩蕩蕩 一直 去到 村北 路口 。
少華山 嗰個 陳達 就 帶住 人馬 ，飛奔 嚟到 山坡 之下 ，就 將 小嘍啰 擺開 。
史進 睇過去 ，見到 陳達 頭戴 干紅凹面巾 ，身披 裹金生鐵甲 ，上穿 一件 紅衲襖 ，腳着 一對 吊墩靴 ，腰束 七尺攢線搭膊 ，騎住 一匹 高頭白馬 ，手上 打橫 揸住 一支 丈八點鋼矛 。
嗰班 小嘍啰 ，喎嗬噉 吶喊 助威 。
兩員猛將 喺 馬上 相見 ，陳達 向住 史進 欠身 行咗 個 禮 。
史進 就 喝 佢 話 喇 ：嘿 ！你哋 呢班 傢伙 打家劫舍 ，殺人 放火 ，犯下 滔天 大罪 ，都 係 抵死 有餘 㗎 喇 。
你 都 有 隻 耳仔 㗎 ，咁 大膽 ，敢 嚟 太歲 頭上 動土 ？
陳達 就 回答 話 ：
我哋 山寨 缺少咗 啲 糧草 ，要 去 華陰縣 借 糧 ，經過 貴莊 ，想 借 一條 路 ，並 唔 動 貴莊 嘅 一草一木 ，放咗 我哋 過去 ，返嚟 嘅 時候 就 多多 拜謝 。
呸 ！你 亂講 ！
我 屋企 而家 做緊 里正 ，正 係 要 嚟 捉 你哋 呢班 賊 。
今日 你 哋 要 經 我 條 村 過 ， 哦 ， 唔 捉 你 仲 放 你 過去 呀 ？ 縣 裏 便 知道 豈 唔 係 連累 埋 我 ？
四海之內 皆 兄弟 也 。相煩 你 借 一條 路 呢 ！
正廢話 ！哼 ！就算 我 肯 ，之有 一個 唔肯 喎 ，你 問下 佢 嘞 ，佢 肯 你 就 去 啦 。
好漢 ，你 叫 我 問 邊個 啊 ？
呢 ，你 問 下 我 手裏頭 呢把 刀 啦 ，佢 肯 啦 就 放 你 過去 啦 ！
陳達火 起 喇 ：趕 人 唔 好 趕到 絕 ，咪 懶叻 啊 你 ！
史進 亦 都 嬲 起 上嚟 ，將 把 刀 一 舞 ，策 馬 上前 ，同 陳達 交手 。
陳達 亦都 拍馬 挺槍 迎戰 史進 。
兩個人 兵兵棒棒 ，你 一槍 嚟 我 一刀 去 。
一來一往 就 好似 深水 戲珠 龍 ；
一上一下 ，有如 半山 爭食 虎 。
兩個人 鬥咗 好耐 ，史進 故意 賣 個 破綻 ，陳達 以為 得食 喇 呢趟 ，向住 心口 一槍 就 㨃過去 。
點知 史進 將 條 腰 一 閃 ，陳達 就 連 人 帶 槍 僂咗 過嚟 。
史進 輕輕噉 將 手 一 伸 ，腰 一 扭 ，一挾 ，將 陳達 就 成個 喺 馬鞍 處 扚 起 ，掅住 佢 條 腰帶 一 掉 ，掉咗 落地 。
陳達 嗰 匹 馬 就 一浸 風 噉 跑開咗 。
史進 叫 啲 莊客 綁起 咗 陳達 。
嗰 班 小 嘍 啰 睇 見 主將 都 畀 人 捉 咗 去 嘞 ，就 畀 眾人 一趕 ，就 走夾 冇 唞 就 趯 晒 啦 。
史進 就 返到 屋企 ，將 陳達 綁 喺 條 柱 上 便 ，話 等 捉埋 另外 嗰 兩個 賊頭 呢 ，就 一齊 解 官 領 獎 。
又攞酒出嚟 ，賞畀 大家 飲 ，叫 大家 返去 先 。
眾人 都 喝彩 ，個個 都 戙起 手指 公頭 話 ：史大郎 真係 使得 啊 ！
