話說 衛瓘 奉命 去 逮捕 鄧艾 父子 ，佢 好 精 ，佢 出發 之前 呢 ，首先 發出 咗 二三十份 檄文 。
檄文 裏 便 講明 ，只係 奉旨 逮捕 鄧艾 ，其餘 人等 一概 唔 追究 。
早日嚟歸順嘅就加官進爵 ，膽敢唔投降嘅就滅三族 。
發出咗 檄文 之後 ，跟住 佢 準備好 兩架 囚車 就 漏夜 趕去 成都 。
到 咗 第朝 早 ， 雞啼 嘅 時候 ， 鄧艾 部下 個 將官 見到 檄文 嘅 呢 ， 個個 都 去 投奔 衛瓘 ， 話 要 同 鄧艾 一刀兩斷 斷絕 關係 喇 噉 。
鄧艾 呢陣時 呀 仲 烏瀡瀡 喎 ，喺 佢 嘅 太尉 府 裏 便 瞓 到 淰淰 ，仲 未 起身 。
衛瓘 就 帶住 幾十個 武士 ，好似 一浸 旋風 噉 啊 騎住 快馬 衝到 鄧艾 嘅 太尉 府 門口 ，落咗 馬 ，吥吥吥 撞入去 裏 便 。
守門官 就 唔知 咩嘢事 喎 唔敢 攔阻 佢 。
衛瓘 一 入到去 就 高聲大叫 ：
奉 皇上 命令 ，逮捕 鄧艾 父子 ！
鄧艾呀 好似 畀 個 大 雷 轟咗 一下 噉 啊 ，嚇到 喺 床上 便 碌咗 落 地下 。
衛瓘 就 喝啲 武士 將 佢 綁起嚟 ，韞咗 入 個 囚車 。
鄧艾 個 仔 鄧忠 呢 ，喺 裏 便 房 聽見 人聲 嘈雜 就 唔 知 發生 咩 嘢 事 幹 ，就 行出 嚟 問 喇 。
啱晒 都 唔使 去 搵 添 呢 。
一聲咪逳 ，即刻 又 將 佢 綁埋 韞咗 入 囚車 。
當時 太尉 府 裏 便 啊 嗰班 官員 呢 ，仲 想 搏一搏 ，想 逳手 搶 返 鄧艾 父子 喎 。
就喺呢個時候 ，探馬 飛奔 嚟到 話 ：外便 煙塵 滾滾 ，鐘司徒 率領 大軍 嚟到喇 ！嘿噉 就 走咯 。
嗰班 官員 喇喇聲 四散 逃命 ，顧唔住 救 鄧艾 咯 。
梗係啦 ，自己 執返 條命 仲 緊要 吖嘛 。
好嘞 ，鐘 會 同 姜維 騎 住 馬 嚟到 。
落 咗 馬 ，行入 去 太尉府 ，見到 鄧艾 兩 父子 呀 ，都 綁住 韞 喺 架 囚車 嚟 。
鐘 會 用 條 馬鞭 拂 下 鄧艾 個 頭 ，鬧 佢 話 ：你 個 看 牛仔 ，想 作反 咁 大膽 ！
姜維 亦 鬧 佢 啊 ：你 呢個 傢伙 ，靠 冒險 而 僥倖 成功 ，乜 你 亦 有 今日 呀 ？啊 ！
鄧艾 唔忿氣 啊 ，亦 放聲 鬧 返轉頭 。
鐘 會 立即 派兵 將 鄧艾 父子 就 押去 洛陽 ，交畀 司馬昭 嚟 處理 。
噉 呢次 鐘 會 嚟到 成都 ，逮捕 咗 鄧艾 父子 。
噉 鄧艾 原來 帶領 嘅 軍隊 呢 ，當然 係 全部 都 歸晒 鐘會 啦 。
嗨噉就厲害咯 ，鐘 會 嘅 勢力 呀 霎時間 增強咗 ，威名 大震 啊 。
鐘 會 就 好得意 啊 ，有 一次 佢 對 姜維 話 ：
今日呀 ，我 先至 算係 滿足咗 平生之 願啊 ！
姜維 就 話 喇 ：
不過噉噃將軍 ，古時候 ，韓信 佢 唔肯 聽 蒯通 嘅 說話 終歸 有 未央宮 之 禍 。
大夫 文種 唔肯 跟埋 范蠡 離開 越王 勾踐 ，結果 呢 ，死於 劍下 。
佢哋 呢 兩位 ，唔通 功名 仲 唔夠 顯赫 ？顯赫 到 極 啦 。
皆因 佢哋 不明 厲害 ，對 事態 嘅 發展 冇 預見 ，故此 落得 噉嘅 下場 啫 。
今日 ，將軍 你 建立咗 前所未有 嘅 極大 功勛 ，噉 你嘅 威勢 足以 震動 君主 。
噉就 不如 飄然而去 ，四海 雲遊 尋訪 神仙 學道 好過咯 。
鐘 會 一 聽 就 不禁 笑起嚟 話 喇 ：吓 ？哈哈哈哈哈哈哈哈 ，我 今年 都 未 夠 四十歲 呀 ，正係 要 進取 功名 嘅 時候 ，點 能夠 學人 做 呢啲 噉嘅 退隱 嘅 事 吖 ？啊 ？哈哈哈哈哈哈 。
如果 鐘將軍 你 唔 想 退隱 ，就 應該 及早 諗 個 妥善 嘅 計策 。
將軍 咁 聰明 ，自己 會 諗 㗎 啦 ，唔使 老夫 ，啊 ，講 咁多 㗎咯 。
哈哈哈 哈哈哈 哈哈哈 哈哈哈 ， 伯約 你 ， 你 真 係 摸清 我 嘅 心事 啊 ！ 哈哈哈 哈哈哈 。
噉 從此之後啊 ，佢 兩個人 都 經常 商量 點樣 嚟 奪取 皇位 啊 。
係 喇 各位 ，上面 講到 韓信 、文種 呢 兩個 人 嘅 遭遇 ，究竟 係 點 嘅 呢 ？
噉嘅 ，誒 先 講下 韓信 ，韓信係 漢朝 開國 功臣 。
當佢 掌握 兵權 嘅 時候 呢 ，齊國 有 個人 叫做 蒯通 ，就 曾經 勸 佢 起兵 自立為王 ，背叛 劉邦 ，韓信 就 冇 聽 佢 。
收尾呢 ，劉邦 就 懷疑 佢 謀反 ，用計 逮捕咗 佢 ，過後 又 釋放返 。
噉啊過咗幾年啊 ，劉邦 嘅 妻子 呂後 ，又 將 佢 騙到 去 皇宮 裏 便 殺咗 。
噉文種 同 范蠡 呢 ，佢 兩個 都係 春秋 時候 越王 勾踐 嘅 得力 謀臣 ，就 幫助 勾踐 啊 ，消滅 咗 吳國 。
喺 成功 之後 啊 ，范蠡 就 認為 勾踐 呢個 人 ，同 人 共 患難 可以 ，共 安樂 就 唔得 㗎 喇 。
於是乎 呢 就 靜靜地 離開咗 勾踐 ，搵 地方 匿埋 隱居 。
佢 臨行 嘅 時候 啊 ，曾經 勸 文種 學 佢 噉樣 離開 喇 ，但係 文種 就 唔 聽 佢 勸 。
收尾呢 ，勾踐 就果然 聽信咗 別人 講 個 壞話 ，逼到 文種 自殺 。
噉姜維 講 呢番說話 即係 勸 鐘會 啊 ，你 一係 就 功成身退 ，免致 將來 畀 司馬昭 殺死 。
一係呢 ，就 索性 掌握 時機 ，起兵 自立為王 啦噉 。
好 喇 ，而家 講下 姜維 啊 。
佢 取得 咗 鐘 會 嘅 信任 之後 啊 ，就 秘密 噉 寫信 畀 劉禪 ，話 ：希望 陛下 忍耐住 暫時 嘅 恥辱 ，我 就要 使到 社稷 轉危為安 ，掃盡 陰雲 ，使 日月 重現 光明 ，漢室 必定 唔 會 滅亡 嘅 噉 。
而家 講返 下 鐘會 ，佢 呀 一直 都 同 姜維 商量 謀反 嘅 事 吖 。
有一日 ，佢 突然間 接到 司馬昭 一封信 喎 。
封信 裏 便 話 ：我 怕 司徒 你 捉唔到 鄧艾 ，故此 我 親自 帶兵 駐扎 喺 長安 。
就快 見面 喇 ，先 報個 信 你 知 。
哎呀 ！鐘 會 大吃一驚 啊 佢 諗 ：
我嘅 兵馬 多於 鄧艾 幾倍 ，要 我 嚟 捉拿 鄧艾 ，晉公 應該 知道 淨係 我嘅 力量 就 辦得妥 㗎啦 。
而家 佢 自己 帶兵 嚟 ，係 懷疑 我 咯 喎 。
得了 ，鐘會 就 搵 姜維 嚟 商量 。
姜維話 喇 ： 君疑臣 ， 則臣 必 死 ！
鐘 將軍 你 見唔見 鄧艾 啊 ？
鐘 會 就 話 喇 ：我 下 咗 決心 喇 。
事情 如果 成功 ，就 得到 整個 天下 ；
唔成功呢 ，就 退入 西蜀 ，做 劉備 噉 亦 唔錯吖 。
鐘將軍 ，最近 聽聞 郭太后 死咗 冇 幾耐 。
將軍 你 可以 詐作 話 ，太后 有 遺詔 ，命令 討伐 司馬昭 ，清算 佢 殺死 皇帝 嘅 大罪 。
以 鐘將軍 你 個 雄才大略 ，中原 可以 席捲 而 定 啊 ！
好 ！伯 約 你 嚟 做 先鋒 ，將來 大事 成功 之後 ，我哋 同享 富貴 ！
我 姜維 願 效 犬馬 之 勞 。
不過 ，就係 怕 啲 將官 唔肯 啊 。
噉啦 ，聽日 係 元宵佳節 ，我 喺 故宮 大張燈火 ，請 眾 將官 嚟 宴會 。
如果 邊個 唔肯 跟隨 我 嘅 ，就 殺咗佢 ！
係 ，將軍 高見 啊 。
呵呵 ，姜維 個 心 呀 暗暗 高興 喇 。
第日 ，鐘會 、姜維 就 喺 故宮 大排筵席 ，請 齊 眾 將官 嚟 飲 咯噃 。
酒 過 數 巡 ，鐘 會 攞 起 隻 酒杯 ，就 忽然間 喊 起 上嚟 。
嗰班 將官 驚奇 到 極 ，就 問 佢 為咩 事 喊 啊噉 。
鐘 會話 喇 ：唉 ，郭太后 臨死 嘅 時候 ，留低 一 封 遺詔 畀 我 。
話司馬昭 ，喺 南闕 殺害 君王 ，大逆不道 ，遲早 必定 會 謀朝篡位 ，命令 我 討伐 佢 。
而家 大家 都 喺 齊處 ，你哋 各人 都 簽 個 名 ，共同 嚟 做好 呢件 大事 啦 。
吓 ？乜 ，乜 ，乜 ，乜 要 作 反 啊 ！
當堂 嚇到 嗰班 將官 眼 都 擎晒 。
先頭 飲 嗰 幾 杯 酒 ，都 變咗 冷汗 流 返 晒 出嚟 喇 。
鐘 會 用 雙眼 一掃 ，見 大家 唔 出聲 ，又 唔 逳 手簽名 。
佢 撐噉 拔出 把 劍 ，大聲噉 話 ：違抗 命令 嘅 ，斬 ！
一聽見斬字 ，大家 怕喇 ，唯有 贊成 係啦 。
簽完字 ，班將官 以為 走得嘞啩 ，正話 想告辭嘞 ，誰知 鐘會 一聲 咪行住 ，就 將 嗰班 將官 軟禁 喺 皇宮 裏便 ，派咗 一大隊 武士 嚴密 看守 。
姜維 話 喇 ：鐘將軍 ，我 睇 呢班 將官 都 係 唔 服 嘅 ，請 將軍 你 下令 坑咗 佢哋 啦 ！
得喇 ，我 已經 下令 喺 宮 裏 便 掘 咗 個 大 坑 ，準備咗 幾千 條 大 棍 。
有邊個 唔肯 跟 我哋 嘅 ，就 打死 ，坑咗 佢 ！
鐘 會 同 姜維 喺度 商量 緊 嘅 時候 啊 ，有 個 心腹 將官 叫做 丘建 喺 旁邊 。
丘建 係 邊個 呢 ？原來 佢 係 護軍 胡烈 舊時 嘅 部下 。
而 胡烈 呢 ， 當日 亦 有 份 韞 埋 喺 宮 裏頭 嘅 。
丘建 就 睺住 鐘會 一行 開 ，就 將 鐘會 先頭 講 嘅 說話 ，靜靜 講返 畀 胡烈 知 。
嚇到 胡烈 就 大驚失色 ，佢 流住 眼淚 噉 𠼮丘建 話 ：
我 個 仔 胡淵 喺 外便 帶 兵 ，佢 點 知道 鐘 會 想 作反 㗎 ？
唔該 你 念 在 我哋 往日 嘅 情分 ，送 個 消息 去 畀 我 嘅 仔 ，我 就算 係 死 啊 亦 冇 遺憾 咯 ！
恩公 你 唔使 擔心 ，等 我 想法子 搞掂 佢 啦 。
於是 丘建 就 出去 稟告 鐘 會話 喇 ：
主公 你 將眾 將官 軟禁 喺 宮裏 頭 ，佢 哋 飲食 唔 方便 ，不如 派 個人 往來 傳遞 噉 好 唔 好 啊 ？
好 吖 ！鐘會 素來 都 好 信 丘 建 嘅 ，就 派 丘建 嚟 監督 呢 件 事 。
鐘會話 ： 我將 呢 件 咁 重要 嘅 事 交 畀 你 ， 你千祈 唔 好 走漏消息 啊 。
係 ，請 主公 放心 ，小將 一定 會 嚴密 噉 看守住 佢哋 嘅 。
噉鐘會 就 好 放心 嘞 。
誰知 一行 轉便 ，丘建 就 暗中 叫咗 胡烈 一個 親信 人 入嚟 。
胡烈 就 交咗 封 密信 畀 佢 。
嗰 個人 就 攞 住 封信 ， 火速 趕到 胡 淵 嘅 兵營 ， 見到 胡淵 就將 發生 嘅 事 啊 ， 一五一十 講晒出 嚟 ， 同時 呀 呈 上 密信 。
胡淵 睇完 信 啊 ，大吃一驚 ，就 將 封信 攞去 各個 兵營 傳閱 ，等 啲 將官 啊 個個 知道 。
噉 大家 都 好 憤怒 啊 ，急急 嚟到 胡淵 嘅 兵營 商量 。
大家 都 話 喇 ：我哋 寧肯 死 ，都唔 能夠 跟住 作反 㗎 ！
胡淵 話 喇 ：正月 十八 中午 ，我哋 衝入 故宮 ，如此如此 。
監軍 衛瓘 聽咗 胡淵 講 嘅 計劃 好 同意 ，立即 整頓 好 人馬 ，叫 丘建 帶 個 信 返 去 報畀 胡烈 知 。
胡烈 知道咗 就 暗中 通知 一齊 被 軟禁 嗰班 將官 咯噃 。
到咗 八月 十八 嗰日 喇 ，鐘 會 叫 人 請 姜維 嚟 問 佢 話 ：
昨晚 我 發 咗 個 夢 ，夢見 有 幾千條 大蛇 咬 我 噃 ，你 話 呢 個 夢 ，係 咩 嘢 兆頭 呢 嚱 ？
嗯 ，凡係 發夢 見到 龍 啊 蛇 啊 ，呢啲 都 係 吉慶 嘅 兆頭 嚟 嘅 。
啊 ，冇錯冇錯 ，哈哈哈哈哈哈 ！係喇 ，而家 樣樣 都 準備好晒 ，放 嗰班 將官 出嚟 問下 佢哋 呢 好唔好 啊 ？
鐘 將軍 ，我 睇 呢班 人 個 心 都 係 唔 服 嘅 ，日後 ，必定 係 個 禍患 啊 。
不如 趁早 殺咗佢哋 好過 喇 。
噉呀 ，好啦 ！鐘 會 聽 姜維 嘅 ，就 叫 佢 帶 一 隊 武士 去 殺 嗰班 將官 嘞 。
姜維 接受 咗 命令 ，啱啱 要 行動 唧 ，哎呀 ，突然間 一陣 心絞痛 ，痛到 暈咗 𢴈 喺 地 嚟 。
啲侍從 急忙 扶佢 起身 ，過咗 好耐 下 先至 醒返 。
就喺呢個時候 ，忽然 聽見 宮外 人聲鼎沸 嘈到不得了 。
鐘 會 正 話 叫 人 出去 睇 下 究竟 係 咩 嘢 事 啦 ，喎 嗬 噉 吶喊 連 天 ，四面八方 啊 無數 咁 多人 馬 湧 到 嚟 喇 。
姜維 話 喇 ：實係 嗰班 將官 作惡 ，快啲 殺晒 佢哋 先 啦 ，殺咗 佢哋 先 啦 ！
殺啊喎殺啊 ！外便 嘅 兵 啊 已經 衝緊 入嚟 喇 。
鐘 會 就 命令 閂實 大殿 嘅 門 ，叫 啲 軍士 擒 上去 大殿 屋頂 ，掀 啲 瓦 掟 落去 。
噉啊 互相 殺死咗 幾十人 。
弊喇 ，啲 兵 喺 宮 外 四圍 放火 ，含含聲 燒起嚟喇 。
跟住 就 撞開 大門 衝入嚟 殺人 咯噃 。
鐘 會 拔出 寶劍 ，殺死咗 幾個 衝入嚟 嘅 軍士 。
嗰啲 軍士 一下 退開 ，亂箭 𠻘𠻘聲 射過嚟 ，鐘會 就 當堂 畀 佢哋 射死 ，啲 人 啊 仲 斬咗 佢 個 人頭 。
姜維 手執 利劍 ，大踏步 走上 大殿 ，就 往來 衝突 。
不幸 心痛 又 發作 ，而且 痛得 仲 厲害 添 。
姜維 仰天 大叫 話 ：我 嘅 計劃 唔 成功 ，係 天意 啊 ！
誒 ！ 啊 ！ 佢 回首 一劍 ， 喺 自己 條 頸 處 出力 一割 ， 鮮血 好似 泉水 噉 噴出 嚟 ， 噉 就 自刎 身亡 喇 。
佢 死嘅 時候 啊 ，係 五十九 歲 。
嗰班 魏兵 就 個個 都 爭住 要 報仇 啊 ，成班 人 湧住嚟 ，劏開 姜維 嘅 肚 。
哇 ，見到 姜維 個 膽 呀 ，好似 雞蛋 咁 大 㗎 。
跟住 嗰班 將官 又 去 捉咗 姜維 嘅 家屬 嚟 ，冚𠾴 唥 殺 清光 。
當時 啊 ，原來 係 鄧艾 部下 嗰 啲 人 呢 ，見到 鐘會 、姜維 都 已經 死 咗 咯 ，就 漏夜 去 追 ，想 救返 鄧艾 父子 啦 。
呢件事 又 有人 報畀 衛瓘 知 。
衛瓘 一 聽 就 話 喇 ：弊 ！當日 係 我 去 捉 鄧艾 嘅 ，如果 而家 放生 佢 呀 ，我 就 死 無 葬身之地 㗎 喇 。
護軍田 續 就 話 喇 ：以前 鄧艾 去 攻打 江油 嘅 時候 ，佢 想 殺咗 我 嘅 ，好彩 得 大家 幫 我 講情 先至 冇事 唧 。
今日 ，我 要 去 報 呢個 仇 啊 ！
衛瓘 好 高興 ，就 派 田續 帶 五百 兵 十萬 火急 趕去 綿竹 。
一去到呀 ，見到 鄧艾 父子 正 話 啱啱 喺 囚車 放出嚟 ，想 返去 成都 。
鄧艾仲 以為 係 本部 兵 到 喎 ，根本 就 冇 防備 。
正話 想 開口 問 唧 ，就 畀 田 續 一刀 斬死 咗 。
鄧忠 呢 ，亦 死於 亂軍 之中 。
鄧艾 死嘅 時候 ，係 六十七 歲 ，鐘會 呢 ，係 三十九 歲 。
噉啊 當時 魏兵 殺入 成都 ，張翼 等人 呢 亦 死於 亂軍 之中 嘞 。
噉啊太子劉璿 、漢壽亭侯關彝 ，都 畀 魏兵 殺死咗 。
全城 大亂 啊 死傷 嘅 軍民 就 不計其數 。
過 咗 成 十日 ，賈充 趕到 嚟 ，即時 出榜 安民 收拾 局面 ，噉 先至 慢慢 慢慢 平靜 返 。
於是呢 ，就 留 衛瓘 鎮守 成都 ，將 後主 劉禪 送 去 洛陽 。
尚書令樊建 、侍中張紹 、光祿大夫譙周 、秘書郎郤正 ，就 為 數 甚少 呢 幾個 人 啊 跟住 去 。
廖化 、董厥 佢哋 呢 都 藉口 有病 唔去 嘞 。
噉啊收尾啊 ，佢哋 都 因為 憂心 過度 先後 死咗 ，呢啲 呢 就 唔多 講 喇 。
到咗 魏國 景元 五 年 ，呢 一年 魏主 將 年號 改為 鹹熙 元年 ，即係 公元 二百 六十四 年 ，春天 。
本來 奉咗 吳王 命令 去 幫助 蜀國 嘅 吳國 大將 丁奉 啊 ，佢 見到 蜀國 已經 亡咗 咯 ，就 收兵 回朝 啦 。
中書丞 華覈 就 向 吳主 孫休 稟奏 話 ：
吳 、蜀 兩 國 乃係 唇齒關係 ，唇亡則齒寒 啊 。
臣 估計 司馬昭 好快 就會 嚟 侵犯 我哋 吳國 㗎喇 ，請 陛下 要 嚴加 防禦 至好 啊 。
講得 有 道理 。 孫休 聽從 佢 嘅 說話 ， 任命 陸遜 個 仔 陸抗 做 鎮東 大將軍 ， 領 荊州 牧 ， 鎮守 江口 。
派咗 將軍 孫異 ，鎮守 南徐 各處 隘口 。
又喺 沿江 一帶 啊 ，駐兵 幾百 營 ，由 老將 丁奉 統率 指揮 ，防禦 魏兵 入侵 。
呢啲呢 ，暫時 就 放落 唔講住 。
而家 就 講下 劉禪 去到 洛陽 嘅 時候 ，司馬昭 就 已經 返到 洛陽 先 。
呢一日 ，司馬昭 接見 劉禪 嘅 時候 ，就 指責 劉禪 話 喇 ：
劉公 你 荒淫無道 ，政績 腐敗 ，賢德 嘅 人士 都 畀 你 趕走 晒 。
按道理講 ，係應該 殺㗎 。
吓 ？ 哦 ， 哦 。 嚇 到 劉禪 面如土色 周身 滴滴 震 。
當時 啲 文武 官員 都 為 劉禪 求情 噃 ， 佢 哋 話 ：
蜀主 確實 係 有 失國紀 ，不過 好在 佢 及早 歸降 ，仲係 赦免 佢 啦 。
司馬昭 其實 想 教訓 下 劉禪 ，嚇 下 佢 嘅 。
既然 而家 文武 官員 都 為 劉禪 求情 咯 ，就 赦 佢 嘅 罪 ，封 佢 做 安樂 公 ，賜 住宅 ，絹 一萬匹 ，僕人 、婢女 一百 人 ，每個 月 供給 使用 。
對劉禪個仔劉瑤 ，與及 佢 原來 個 大臣 啊 樊建 、譙周 、郤正 等等 呢 ，都 封做 侯爵 。
噉 至於 嗰個 太監 黃皓 又 點 呢 ？
司馬昭 因為 佢 禍國殃民 啊 ，就 下令 將 佢 押去 街市 ，凌遲 處死 。
過咗 一日 ，劉禪 親自 去 司馬昭 嘅 府上 拜謝 。
司馬昭 設宴 款待 佢 。
飲宴 嘅 時候 啊 ，當然 係 有 歌舞 助興 啦 。
先不先 ，表演嘅 係 魏國 嘅 音樂 歌舞 ，嗰班 蜀國 嘅 官員 睇咗 都 覺得 好 難過 啊 。
哈哈 ，唯獨 劉禪 仲 笑容滿面 噉喎 。
跟住呢 ，司馬昭 又 吩咐 一班 蜀國人 ，演奏 蜀國 嘅 音樂 。
嗰班 蜀國 官員 聽到 ，人人 都 心傷到 流眼淚 啊 。
嗰個 劉禪 呢 ，一樣 有 講 有 笑 。
飲到半醉 ，司馬昭 見到 劉禪 噉嘅樣 就 對 賈充 話 ：
唉 ！哈哈哈哈 ，一個人 真係 咁 冇感情 到咗 噉嘅 地步 嘅 吓 ，就算 諸葛孔明 喺 處 啊 ，亦 唔能夠 保得住 佢 長久 坐 江山 啊 。
何況 姜維 呢 ？
噉司馬昭 就 問 劉禪 話 喇 ：
你 ，想唔想 念 蜀國 啊吓 ？
劉禪 回答 話 喇 ：喺 呢度 咁 快樂 ，我 唔 想 蜀國 喇 。
過咗一陣 ，劉禪 起身 去 小便 ，郤正 就 跟住 佢 行到 走廊 外 便 就 提醒 佢 話 喇 ：
陛下 ，你 點解 先頭 回答 晉公 話 唔 想 蜀國 呢 ？
如果 等陣 佢 再 問 ，陛下 就 流住 眼淚 噉 回答 話 ：
先人嘅墳墓 都 喺 蜀國 咁 遠 嚟 ，個心 一 諗住 西蜀 就 覺得 悲傷 ，冇 一日 話 唔想 㗎 ，噉 晉公 就 實會 放 陛下 返去 西蜀 㗎 喇 。
哦 ， 哦 哦 。 劉禪 就將 呢 番 說話 記到實 ， 然後 就 返去 入席 嘞 。
飲酒 飲到 微微 有啲 醉意 喇 ，司馬昭 又 試問 劉禪 話 ：你 想唔想 念 蜀國 啊吓 ？
劉禪 就 將 郤正 教 佢 講 個 說話 嚟 回答 司馬昭 。
郤正仲 教佢 要 流住 眼淚 㗎 。
弊喇 ！佢 眨下眨下 雙眼 點 都 挾唔出 眼淚 ，冇修啦 ，就 唯有 瞇埋 雙眼 。
司馬昭 一 聽 就 話 喇 ：吓 ？乜 咁 似 郤 正 講 嘅 說話 噉 嘅 ？
劉禪 即刻 就 擘大 雙眼 望 實 司馬昭 ，好 驚奇 噉 話 ：
係啊係啊 ，係佢 教 我 講 㗎 。
呵呵呵呵 ，司馬昭 同埋 左右 一班 大臣 聽咗 呀 ，都 笑 劉禪 此人 確係 冇用 啊 。
不過噉 ，司馬昭 啊 亦 因此 而 覺得 劉禪 老實 。
老實 就 唔會 作反 啦 ，所以 對 佢 就 冇 疑心 嘞 。
唉 正是 追歡作樂 笑顏開 ，不念 危亡 半點 哀 。快樂 異鄉 忘 故國 ，方知 後主 是 庸才 。
呢就因為劉禪呢一件事 ，我哋而家 有句成語 叫做 樂不思蜀 嘞 。
啊 講下 朝廷 上 嘅 一班 大臣 啊 ，因為 司馬昭 征服 蜀國 有功 ，就 聯合 上表 稟奏 魏主 曹奐 ，請求 升 司馬昭 做 王爵 。
唉 當時 曹奐 名義上 叫做 天子 啊 ，實際上 半點 主意 都 唔到 佢 揸 。
國家 事務 大大小小 ，通通 由 司馬昭 話晒 事 。
噉既然 文武大臣 話 要 加封 司馬昭 做 王 咯 ，王就王啦 ，就 封 晉 公司 馬昭 做 晉王 ，尊稱 司馬懿 做 宣王 ，司馬師 做 景王 。
嘿嘿 ，厲害啩 ，老豆 大佬 死咗 都 要 追封 王爵 啊 。
司馬昭 做咗 晉王 之後 ，就 立 佢 個 長子 司馬炎 做 世子 ，即係 繼承人 。
呢個 司馬炎 生得 非常 魁梧 ，頭髮 好 長 嘅 ，企 喺 處 頭髮 可以 一直 髧 到 落地 。
兩隻手 垂直 呢 ，過 膝頭 咁 長 嘅 ，聰明 英武 就 膽量 過人 。
到咗 第二年 ，有 一班 大臣 就 向 司馬昭 建議 ，改用 天子 嘅 儀仗 ，戴 王冠 ，豎 王旗 ，王妃 就 晉位 做 王後 ，立 世子 做 太子 。
意思呢 ，即係 慫恿 司馬昭 做 皇帝 。
司馬昭 見到 咁多 大臣 擁護 自己 ，個心 啊 當然 歡喜 定 啦 。
佢 返到 王府 正話 要 食飯 ，忽然間 中風 ，連 說話 都 唔識 講 嘞 。
第日 ，病危 。
當時 太尉 王祥 、司徒 何曾 、司馬 荀顗 ，同埋 各 大臣 入 宮 嚟 請安 。
司馬昭 唔能夠 講說話 ，用 隻 手指 下 太子 司馬炎 ，眼 一 坦噉 就 死咗 ，死 嘅 時候 呢 係 五十四 歲 。
司馬昭 一 死 啊 ，何曾 等等 一班 大臣 ，就 擁戴 司馬炎 繼位 做 晉王 喇 。
