到 黃忠 就 唔 服老 吖 ，一個人 帶住 幾個 親兵 ，走到 去 彝陵 前線 ，要 同 東吳 嘅 將領 打過 ，顯 下 佢 越 老 越 英雄 。
呢一日 ，東吳 人馬 嚟到 挑戰 嘞 。
黃忠 奮發 精神 啪聲 起身 行出 中軍 帳 ，騎 上 戰馬 準備 出戰 。
馮習 佢哋 都 勸 佢 啊 ：老將軍 ，你 唔好 去 啊 。
黃忠 點 肯 聽 吖 ，一拍馬 就 跑 出去 嘞 。
吳班 就 命令 馮習 快啲 帶兵 去 助戰 。
黃忠 衝到 嚟 吳軍 陣前 勒馬 橫刀 ，就係 向 佢哋 先鋒 潘璋 挑戰 。
潘璋啊 帶住 部將 史跡 出陣 。
史跡 見到 黃忠 係 個 白頭公 ，哈哈 ，蝦 佢 老 喎 ，縱馬 挺槍 就嚟 同 黃忠 打 。
點知 打咗 唔夠 三個 回合 ，黃忠 大喝 一聲 刀光 一閃 ，就 將 史跡 斬 成 兩 橛 。
潘璋 嬲 喇 ，舞起 關公 當年 使過 嘅 青龍刀 嚟 鬥 黃忠 ，噉 啊 打咗 幾個 回合 不分 勝敗 。
黃忠啊 出盡力 打到 搏晒命 ，咦 ，潘璋 諗住 頂唔順 喇 ，撥馬 就 走 。
黃忠 趁勢 追殺 一輪 ，就 獲得 全勝 呀 收兵 回營 。
喺 路上 遇着 關興 同 張苞 趕到嚟 ，關興啊 勸佢 話 喇 ：老將軍 ，我哋 奉咗 皇上 聖旨 嚟 幫 老將軍 手 啊 ，而家 既然 立咗 功 嘞 ，請 老將軍 同 我哋 返去 啦 。
嚱 ！我 唔 返去 ，唔返去 啊 ！黃忠 唔肯 啊 。
第日 ，潘璋 嚟 挑戰 喇 ，黃忠 奮然 上馬 。
關興 同 張苞 要 助戰 ，黃忠 啊 唔 畀 。
吳班 要 助戰 ，黃忠 啊 亦都 唔 畀 。
只係 自己 帶住 五千 人馬 就 出去 應戰 嘞 ，打咗 幾個 回合 ，潘璋 拖刀 就 走 。
黃忠 縱馬 追住去 ，大聲 噉 喝 ：賊 將 你 咪 走 ！我 今日 要 為 關公 報仇 ！
𠽤𠽤𡃈𠽤𠽤𡃈𠽤𠽤𡃈 一直 就 追咗 三十幾里 ，喎嗬 突然 四面八方 伏兵 一齊 衝出嚟 。
右便 周泰 ，左便 韓當 ，前 有 潘璋 後 有 凌統 ，將 黃忠 沊沊𡃈 圍住 喺 戰陣 中心 。
打得幾打 ，突然間 發發聲 翻起 大風 ，黃忠 急急 想 撤退 。
喺 呢個 時候 ，馬忠 喺 山坡 上 便 帶住 一彪 軍馬 出現 ，佢 一箭 射過嚟 就 正中 黃忠 嘅 肩窩 ，就係 心口 對上 膊頭 對落 啊 ，哎呀 ，黃忠 爭啲 跌咗 落 馬 。
吳兵 見到 黃忠 中箭 喎 ，哇 殺啊 ！噉 就 一擁而上 喇 。
正在 危急 嘅 時候 ，後 便 吶喊 連天 呀 ，關興 、張苞 兩路 軍馬 殺到 ，殺散 咗 吳兵 就 救出 黃忠 。
噉 兩 員 小將 一直 護送 黃忠 返到去 劉備 嘅 大本營 。
返到去嘅時候 ，黃忠 因為 年紀 老 ，血氣 衰弱 ，戰傷 又 嚴重 就 病得 好 緊要 。
劉備 去 探望 佢 ，摸住 黃忠 嘅 背脊 話 ：
唉 ！令到 老將軍 中箭 負傷 ，都係 朕 嘅 過錯 啊 。
陛下 ，臣 係 一個 軍人 ，能夠 遇到 陛下 係 極之 幸運 啊 。
臣 今年 ，七十五歲 咯 ，亦 夠 長壽 咯 。
希望陛下 ，多多保重 龍體 ，奪取 中原 啊 ！啊 ！啊 ！
講完 ，就 不省人事 ，當晚 就 喺 劉備 嘅 大本營 逝世 。
唉 ， 真 係 臨亡頭 似雪 啊 猶自 顯 英雄 啊 。
劉備 睇 住 黃忠 氣絕身亡 ， 當然 係 十分 悲傷 啦 ， 佢 命令 同 黃忠 舉行 隆重 嘅 葬禮 ， 安葬 喺 成都 。
劉備 話 喇 ：唉 ！五虎大將 ，已經 死咗 三個 ，朕 仲 未 能夠 報仇 ，真係 痛心 啊 ！
劉備 下咗 大 決心 ，率領 御林軍 一直 去到 猇亭 啊 。
嗱各位 ，請記住 呢笪地方 吓 ，猇亭 就 喺 今日 湖北省 宜都 以北 。
歷史上 吳蜀 兩國 為咗 爭奪 荊州 ，所進行 嘅 猇亭 之戰 啊 ，或者 稱作 彝陵 之戰 ，就係 發生 喺 呢處 ，以後 呢 我哋 好快 就 會 講到 㗎喇 。
劉備 喺 猇亭 同 全軍 嘅 將領 會合 ，然後 分兵 八路 水陸 並進 。
水路 就 由 黃權 帶領 ，劉備 啊 親自 統率 大軍 ，由 陸路 進發 。
當時呢 ，係 章武 二 年 ，就係 公元 二二二 年 喇 ，二月 中旬 。
呢一日 ，韓當 、周泰 就 聽聞 劉備 親自 帶兵 嚟到 ，當然 率領 兵馬 迎戰 啦 。
噉啊 雙方 擺好 陣勢 。
吳軍 ，韓當 、周泰 出馬 。
蜀軍 嘅 門旗 一 開 ，劉備 親自 出馬 。
只見 打起 黃羅 銷金 大傘 蓋 ，左右 白旄 黃鉞 ，金銀 旌節 ，前後 圍繞 呀 極之 威風 。
韓當 大聲 噉 話 ：陛下 今日 係 蜀國 之 主 ，點解 要 隨便 出嚟 征戰 啊 ？有 咩 疏忽 就 悔之不及 喇 ！
劉備 破口大罵 ： 你 哋 啲 吳狗 ， 殺害 孤 王 嘅 手足 ， 孤王同 你 哋 勢不兩立 啊 ！
韓 當 回頭 問 嘞 ：邊個 敢 去 沖陣 ？
韓 當 嘅 部將 夏恂 就 挺 槍 出 馬 。
喺 劉備 背後 呢 ，張苞 縱馬 衝出 ，大喝 一 聲 ，挺起 丈八 長矛 直取 夏恂 。
張苞 一聲 大喝 ，嘩嗨 好似 行咗 個 雷 噉 啊 ，真係 有 佢 老豆 幾 成 啊吓 ，當堂 嚇窒 夏恂 。
夏恂 正 話 想 走 啊 ，周泰 嘅 細佬 周平 呢 眼 睇住 夏恂 頂唔住 嘞 ，就 揮 刀 縱馬 跑 出 嚟 想 助戰 。
關興 見到 ，躍馬 提刀 迎上去 。
就喺 呢個 同一 時間 ，張苞 大喝 一聲 ，一矛 就 刺中 夏恂 ，𢴈咗 落馬 就係 咁 大嘞 。
周平 措手不及 呢 ，被 畀 關興 斬死 咗 。
跟 住 兩位 小將 馬頭 一撥 ， 直取 韓當 、 周泰 。 嘩 嗨 乜 咁 厲害 㗎 喂 ？ 韓當 、 周泰 就 慌忙 退返 入陣 啊 。
劉備 睇住 兩員 小將 威風八面 就 不禁 大讚 ，真係 虎父 無 犬子 啊 ！
劉備 用 馬鞭 一 指 ，蜀兵 一齊 掩殺 過去 打到 吳兵 大敗 。
嘿 劉備 嗰 八路兵馬 ，以 雷霆萬鈞 之 勢 殺到 吳兵 呀 ，屍 橫遍 野 血 流 成 河 。
而家 講下 甘寧 ，佢 啊 本來 得咗 痢疾 一直 都 病緊 ，呢次 佢 係 帶病 出征 嘅 ，當時 佢 正 喺 船上 養病 ，一 聽聞 蜀兵 大軍 殺到 就 火急 上馬 。
咁 啱 啊 遇 着 一彪 蠻兵 ， 個個 都 係 披頭散髮 打大 赤腳 嘅 ， 都 係 使 弓弩 長槍 ， 藤牌 刀 斧 嘅 。
為首嗰個就係番王沙摩柯嘞 ，沙摩柯生得面如噴血 ，碧眼突出就使一個鐵蒺藜骨朵 。
就係 當時 一種 兵器 嘞 ，一頭 係 柄 ，一頭 係 長 圓形 嘅 ，上便 呢 仲 有 好多 鐵刺 嘅 ，你 話 畀 佢 𢱕 一下 ，唔死 都 周身 窿 啊 。
條 腰處 呢 帶住 兩 張 弓 ，威風凜凜 殺氣騰騰 。
甘寧 見 啲 番兵 人 多 勢 大 ，自己 又 一直 肚 屙 周身 冇 力 ，唔敢 同 佢哋 打 就 撥 馬 就 走 。
點知 畀 番 王沙摩柯 一箭 就 射中 個 頭殼 。
甘寧 帶住 箭傷 猛跑 ，去到 富池口 呢個 地方 呢 ，走唔逳 喇 ，落咗 馬 ，就 坐 喺 一樖 大樹 底下 死咗 。
哈 ， 樹上 有 一群 烏鴉 成 幾百隻 嘅 ， 都 飛落 嚟 圍繞 住 佢 個 屍體 保護 住 佢 噃。
收尾 孫權 知道 咗 就 十分 哀痛 ， 派 人 去 收 咗 佢 嘅 屍 ， 安葬 好 ， 並且 為 佢 起 咗 一間 廟 啊 ， 四時 祭祀 ， 呢 啲 呢 就 放落 唔 講喇 。
而家 講返 下 劉備 ，佢 指揮 兵馬 就 趁勢 追殺 啊 殺到 吳兵 四散 咁 逃跑 ，於是 劉備 就 佔領 咗 猇亭 。
到 收兵 嘅 時候 ，弊 喇 ！唔見 咗 關興 添 ，劉備 就 慌忙 派 張苞 佢哋 四處 去 搵 啦 。
關興 到底 係 去 咗 邊處 呢 ？ 噉 嘅 ， 原來 關興 佢 殺入 吳 兵陣 內 啊 ， 嘿 呀 畀 佢 撞 正 仇人 潘璋 。
真係 踏破 鐵鞋 就 無 覓處 得來 全 不費 功夫 啊 ，追 ！咪 驟馬 猛追 。
潘璋 驚 啊 ，搏命 趯 咗 入去 山谷 裏頭 轉咗 幾 轉 啊 ？關興 追 佢 唔到 嘞 。
關興 諗 ：哼 ！潘璋 係 趯 咗 入 山 㗎 喇 ，去咗 邊處 呢吓 ？咪 四圍 咁 搵 。
眼睇住天黑嘞 ，又 迷失咗 路 添 ，好在 呢 ，仲有 啲 星光 月光 ，勉強 睇到 啲 山間 小路 嘅 。
搵下搵下 ，都 成 二更天 嘞 ，就 終歸 嚟到 一個 山莊 ，就 落馬 拍門 。
過咗 一陣 有 個 伯父 出嚟 開門 問 係 咩 人 啊噉 。
關興話 ：我 係 個 戰將 ，因為 迷咗路 撞到 嚟 呢處 唧 ，求 老伯 畀 碗 飯 食下 啦 。
哦 ，得 ，得 ！請 入嚟 啦 吓 。個 老伯 呀 帶 關興 入 到 大廳 。
咦 ？關興 奇怪 喇 ，見到 大廳 有 張 神台 點住 香燭 ，當中 掛住 關公 嘅 神像 。
關興 一見 就 忍唔住 喊起上嚟 ，跪低 就 拜 。
個 伯父 就 問嘞 ：誒 將軍 ，為咩事 對住 神像 又 喊 又 叩頭 啊吓 ？
佢 ，係 我 父親 啊 ！
啊！ 原來 係 關小將軍 ，老夫 有 禮 ！伯父 啊 即刻 同 關興 叩 個 頭 。
關興 問 嘞 ：老伯 ，點解 呢處 要 拜 我 父親 嘅 呢 ？
呢 處 呀 ， 都 係 尊神敬佛 㗎 ， 佢 在 生 嘅 時候 ， 家家 都 侍奉 佢 。
何況 佢 今日 做咗 神 呢 ？啊 老夫 但 望 蜀兵 早日 報仇 雪恨 就 好喇 。
今日 小將軍 嚟到 呢處 真係 百姓 有福 喇 。個 伯父 就 即刻 擺 酒 嚟 款待 關興 。
又叫人 拉 匹 馬 去 卸 鞍 餵 草料 。
食得飯嚟 已經 三更 過後 ，忽然 又 聽到 有人 拍門 ，個 伯父 就 出去 開門 問下 。
原來 係 潘璋 啊 亦 係 迷失 咗 路 ，摸到 嚟 呢處 投宿 喎 。
佢 啱啱 行 入嚟 大廳 ，關 興 眼 快 一下 就 擸到 ，揸住 把 劍 大 喝 一聲 話 潘 賊 你 咪 走 ！
嘩 ，潘璋 擰轉頭 想 跑出去 。
點知 門口 外 便 有 個人 ，面 如 重棗 ，丹鳳眼 ，臥蠶眉 ，三縷 長鬚 ，綠袍 金甲 。
佢 用 手 按住 把 劍 行 入嚟 ，哎呀 關公 顯聖 啊 ！嚇到 潘璋 啊 魂飛魄散 ，饒命 啊 噉 大叫 一 聲 。
正話 想 轉身 唧 ，畀 關興 手 起 劍 落 斬 咗 喺 地 ，再 一 劍 ，攞 咗 個 心 出嚟 ，就 喺 關公 嘅 神像 前 便 祭奠 一番 。
噉關興呢 ，就 得返 父親 嘅 青龍偃月刀 嘞 。
佢 將 潘璋 嘅 首級 綁住 喺 馬 頸 下 便 ，辭別 咗 嗰個 老伯 ，就 騎 咗 潘璋 嘅 馬 返 去 蜀營 喇 。
噉嗰個伯父 又 搵人 將 潘璋 嘅 屍體 啊 ，拖咗 出去 焚化 ，呢啲 就 不在話下 喇 。
而家 講 下 關興 ，佢 行咗 冇 幾 遠 就 聽見 前面 人 叫 馬 嘶 。
原來 有 一彪 軍馬 嚟到 ，為首 一個 將官 乃係 潘璋 嘅 部將 馬忠 。
豈有此理得了 ？馬忠 見 關興 殺咗 自己 嘅 主將 ，而且 將 個 首級 綁住 喺 馬 頸 下 便 添 。
青龍刀 又 畀 關興 得咗 ，嬲 到 佢 肚 都 爆 啊 ，縱馬 過嚟 直取 關興 。
關興 見到 馬忠 呀 ，就係 殺父 仇人 喇 ，嘩 真係 氣衝牛斗 啊 ！舉起 青龍刀 對住 馬忠 就 斬 。
馬忠 部下 有 成 三百 人 ，哦 殺啊 ！噉啊 一擁而上 ，將 關興 圍住 猛打 。
關興 啊 勢 單力孤 吖 ，危險 啊 ！
忽然 西北方 有 一彪 軍馬 殺嚟 ，係 張苞 啊 ！
馬忠 見到 對方 有 救兵 到 唄 ，諗住 都 執唔到 便宜 㗎 喇 ，慌忙 帶 兵 撤退 。
關興 、 張苞 一齊 向前 追 ， 追 咗 幾里路 ， 糜芳 、 傅士仁 帶住 兵 嚟 搵 馬 忠 ， 噉 兩 便 一 遭遇 就 混戰 一場 。
張苞 、關興 因為 兵 少 啊 就 唔敢 再 打落去 ，急忙 就 退兵 。
糜芳 佢哋 呢 亦都 冇 追 。
張苞 、關興 返到 猇亭 首先 啊 拜見 劉備 ，獻上 潘璋 嘅 首級 ，將 經過 就 講畀 劉備 聽 ，劉備 好 驚異 啊 又 好 高興 。
呢場仗 旗開得勝 吖 ，當然 係 大賞 三軍 。
而家 講 下 馬忠 ，佢 返去 見到 韓當 、周泰 ，就 收容 同埋 整頓 好 軍隊 ，就 各人 分頭 把守 。
馬忠 同 傅士仁 、糜芳 喺 江邊 駐扎 。
當時 啲 兵卒 裏頭 呢 ，受傷 嘅 人 啊 不計其數 咁多 。
半夜 嘅 時候 啲 兵卒 喺度 喊 ，喊得 好 淒涼 。
糜芳 偷偷 走去 聽下 ，聽見 有 一班 兵卒 話嘞 ：
我哋 都係 荊州 兵 嚟 ，皆因 呂蒙 用 詭計 害 咗 主公 條 命 。
而家 ，劉皇叔 御駕 親征 ，東吳 遲早 都 冇 行 㗎喇 。
劉皇叔呀 ，至嬲 就係 糜芳 同 傅士仁 喇 。
噓 ，喂 ，我哋 不如 殺咗 呢 兩個 衰人 ，去 蜀營 投降 啦 ，呢個 功勞 呀 ，唔 細 㗎 。
又 聽見 另外 一班 兵卒 話 嘞 ：唔好 咁 性急 ，睺啱 個 機會 先至 好 逳手 啊 。
哎呀 ，原來 把 刀 貼住 條 頸 咯 ！
糜芳 聽咗 啲 兵卒 嘅 談話 ，嚇到 成身 冷汗 喇 。
佢 搵 傅士仁 商量 話 ：軍心 一 變 ，我哋 兩 個 人 條 命 就 凍過 水 啊 保唔住 㗎 喇 。
而家 漢中 王 最 嬲 嘅 就 係 馬 忠 啫 ， 我 哋 不如 殺 咗 佢 ，攞 佢 個 首級 去 獻 畀 漢中 王 講 佢 聽 ， 我 哋 都 係 不得已 先至 投降 東吳 嘅 。
而家 見到 御駕 嚟到 嘞 ，特意 前嚟 請罪 噉 ，你 話 好唔好 吖 ？
唔得嘅 ，千祈 唔好 噉 做 添啊 ，去親 呀 實死㗎 。
冇事嘅 ，漢中王 寬仁厚德 ，阿斗 太子 係 我 嘅 外甥 ，佢 念在 我 皇親國戚 之 情 ，必定 唔會 難為 我 嘅 。
噉 兩個人 密斟 就 斟掂晒 。先 備好 馬 ，到咗 三更時分 ，兩個人 就 入去 帳幕 暗殺 咗 馬忠 ，割 咗 佢 嘅 首級 ，帶住 幾十 人 就 偷偷 趯 去 猇亭 嘞 。
啲伏路兵 截住 佢哋 ，帶咗 佢哋 去 見 張南 同 馮習先 ，噉 就 將 啲事情 前前後後 講清楚 。
第日 ，糜芳 、傅士仁 就 去到 大本營 見 劉備 ，跪喺 處 獻上 馬忠 嘅 首級 。
然後 喊住 稟告 話 ：臣等 實在 唔想 背叛 嘅 ，都係 呂蒙 用 詭計 ，話 關公 已經 死咗 ，氹開 咗 城門 ，臣等 不得已 先至 投降 嘅 啫 。
今日 聽聞 皇上 親自 嚟到 ，故此 特意 殺咗 馬忠 ，為 陛下 洩咗 心頭之恨 ，請 陛下 饒恕 臣等 嘅 罪過 啦 。
劉備 就 嬲得 好 緊要 啊 ，佢 話 ：
朕 離開 成都 咁 耐 喇 ，你 兩個 點解 唔 嚟 請罪 ？吓 ，點解 唔 嚟 ！
今日 形勢 危急 喇 ，就 走嚟 花言巧語 ，想 得返 條命 係 嘛 ！
朕 若果 饒恕 你 哋 呀 ， 朕 到 咗 九泉之下 ， 仲有 咩 面目 見 關公 呀 ？
講完 ，就 叫 關興 喺 大本營 裏 便 ，擺好 關公 嘅 靈位 。
劉備 親自 捧起 馬忠 嘅 首級 ，喺 靈前 祭奠 。
跟住 又 叫 關興 剝 咗 糜芳 同 傅士仁 嘅 衣服 ，拉 佢哋 埋嚟 跪 喺 靈前 ，親自 用 刀 殺 咗 佢哋 嚟 祭奠 關公 。
張苞 噔噔聲 行入嚟 ，喊住 跪 喺 劉備 面前 話 ：二伯父 嘅 仇人 已經 殺晒 嘞 ，小臣 父親 嘅 冤仇 ，幾時 至 報得 啊 ！
賢侄 你 唔使 憂心 ，朕 一定 要 削平 江南 ，殺盡 吳狗 。
務必 生擒 嗰 兩個 奸賊 ，等 你 將 佢哋 斬 成 肉醬 嚟 祭 你 嘅 父親 ！
張苞 噉 就 叩頭 多謝 劉備 ，退返 出去 。
呢個 時候 呀 ，劉備 嘅 聲威 大震 ，江南 嘅 將士 呢 人人 都 膽裂心寒 。
韓當 、周泰 就 急急 稟奏 畀 孫權 聽 ，話 糜芳 、傅士仁 就 暗殺 咗 馬忠 去 投降 返 劉備 ，結果 呢 亦都 畀 劉備 殺 咗 喇 噉 。
孫權 心怯 啊 ，就 召集 一班 文武大臣 嚟 商量 。
步騭 就 稟奏 話 ：漢中王 所 痛恨 嘅 ，就係 呂蒙 、潘璋 、馬忠 、糜芳 、傅士仁 啫 。
而家 呢 五個人 都 死晒 ，仲 留返 喺 東吳 嚟 嘅 ，就係 得 范疆 、張達 兩個人 。
不如 捉起 呢 兩個 人 ，連同 張飛 嘅 首級 ，派 個 使者 送返 去 畀 漢中王 。
同時 交還 荊州 ，送還 夫人 ，寫 封 信 去 求和 ，請求 恢復 從前 嘅 交情 ，聯合 一齊 去 消滅 北魏 。
如果 大王 噉樣 做 呀 ，蜀兵 自然 會 撤走 㗎 嘞 。
孫權 聽 佢 話 ，用 個 沉香木盒 ，裝好 張飛 嘅 首級 ，綁起 范疆 、張達 就 用 架 囚車 裝住 ，派 程秉 啊 做 使者 ，帶住 國書 去 猇亭 求見 劉備 。
呢一日 ，劉備 正 話 想 發兵 前進 。
佢 一聽見 話 東吳 派 使者 送返 張飛 嘅 首級 ，同埋 解咗 范疆 張達 兩個 人 嚟 哎呀 真係 歡喜 喇 。
佢 立即 叫 張苞 同 佢 父親 安設 個 靈位 。
劉備 睇 下 張飛 嘅 首級 ， 雖然 事隔 咁 耐 啊 ， 但 係 未曾 變色 啊 ， 仲 係 同 生前 一樣 啊 ！ 啊 ！ 劉備 放聲大哭 。
張苞 就 咬牙切齒 ，親自 揸住 把 利刀 ，將 范疆 、張達 兩個 呀 千刀萬剮 ，拜祭 佢 父親 。
祭完嘞 ，劉備 怒氣不息 ，仲係 要 起兵 去 打 東吳 。
馬良 就 稟奏 話 喇 ：仇人 已經 全部 殺盡 ，仇恨 都 清雪晒 。
東吳 使臣 程秉 嚟到 ，要 送還 荊州 ，送 歸 夫人 ，同 我哋 永遠 結成 友好 同盟 ，共同 去 消滅 北魏 。
佢 喺度 等候 皇上 嘅 聖旨 啊 。
哼 ！朕 最大 嘅 仇人 就係 孫權 。
今日 如果 同佢 講和 ，就係 對唔住 兩位 賢弟 當日 嘅 盟誓 喇 。
朕 要 先 滅 吳 ，後 滅 魏 啊 ！
劉備 一發起惡 ，仲 想 做到 絕 啊 要 斬咗 個 東吳 使者 先 ，等 孫權 冇得 諗 。
當時 一班 大臣 苦苦 勸諫 噉 先至 放返 程秉 走 咋 。
程秉 返到去 話畀 孫權 知 ，劉備 唔肯 講和 ，發誓 要 先 滅 東吳 後 滅 魏 ，啲 大臣 啊 勸極 佢 都 唔肯 聽 喎 噉 。
嚇 到 孫權 啊 面 都 變色 手足無措 啊 。
闞澤 出班 稟奏 話 嘞 ：主上 ，現時 明明 擺住 擎天大柱 喺度 ，點解 唔 用 呢 ？
邊個啊 ？你 快啲 講 ！
往日 ，東吳 一切 大事 全靠 周郎 吖 ，後嚟 由 魯子敬 代替 佢 。
子敬 逝世 之後 ，一切 事情 就 取決於 呂蒙 嘞 ，今日 呂蒙 雖然 死咗 啫 ，仲有 陸遜 喺 荊州 噃 。
佢 表面 睇 嚟 係 個 書生 ， 實際上 呀 ， 佢 胸中 嘅 雄才大略 ， 以 微臣 睇 嚟 ， 係 不在 周郎 之下 㗎 。
以前 擊敗 關公 啲 計謀 都係 陸遜 出 嘅 ，主上 若果 能夠 用 佢 ，必定 打敗 劉備 㗎 。
如果 萬一 失算 ，微臣 ，情願 同 陸遜 承當 罪責 ！
係呀 ，唔係 你 講 ，孤王 幾乎 誤咗 大事 添 。
張昭 反對 嘞 ：主上 ，陸遜 係 個 書生 嚟 啫 ，唔係 劉備 嘅 敵手 啊 ，恐怕 唔 用得 㗎 。
顧雍 亦都 反對 ：陸遜 年紀 輕 聲望 唔夠 ，恐怕 啲 將領 唔服 ，一唔服 就 會 出 亂子 ，必定 會 誤咗 大事 㗎 ！
步騭 跟 住 話 ： 主 上 ， 陸 遜 嘅 才能 要 佢 管理 一個 郡 就 可以 ， 若果 將 全國 嘅 軍事 大權 交晒 畀 佢 ， 佢 就 擔 唔 起 㗎 喇 ， 唔 妥當 嘅 。
闞澤 大聲 疾呼 噉話 ：若果 唔用 陸遜 ，東吳 就 要 亡 嘅 喇 ！微臣 情願 以 全家 嘅 性命 嚟 擔保 佢 ！
爭論咗咁多 ，孫權 一直 都 冇 出聲 ，最後 佢 講喇 ：
朕 一向 知道 陸遜 係 個 奇才 ， 朕 已經 揸 定 主意 ， 各位 愛卿 唔 使 多講 。
孫權 於是 下令 召 陸遜 嚟 。
陸遜 本來 叫做 陸議 ，後嚟 就 改名 叫做 陸遜 ，字 伯言 ，係 吳郡 人 。
佢 嘅 祖父 呢 ，係 漢朝 城門 校尉 陸 紆 ，父親 係 九江 都尉 陸 駿 。
陸遜 生得 身高 八尺 ，面 如 美玉 ，現時 嘅 官職 係 鎮西 將軍 。
呢一日 ，陸遜 奉詔 嚟到 啊 參拜 過 孫權 。
孫權 話喇 ：而家 蜀兵 壓境 ，朕 要 任命 你 總督 兵馬 去 擊敗 劉備 啊 。
啟 稟 大王 ， 江東 文武 都 係 大王 故舊 之臣 ， 臣 年幼 冇 才 ， 點 能夠 統制 佢 哋 呢 ？
闞澤 願意 以 全家 擔保 你 ，朕 亦 一向 知道 你嘅 才能 ，今日 要 任命 你 做 大都督 ，你 就 唔好 推辭 喇 。
如果 文武大臣 唔 服 ，噉 如之奈何 呢 ？
陸愛卿 ，朕 將 自己 把 劍 交畀 你 ，有 邊個 唔聽 你 號令 嘅 ，先 斬 後奏 ！
承蒙 主上 重託 ，臣 必定 誓死 效力 。
不過 ，請 大王 喺 聽日 召集 文武百官 ，然後 先至 將 寶劍 賜畀 微臣 啦 。
闞澤 話 喇 ：係啊 ，古時 任命 大將 ，必定 要 築 一個 壇 ，召集 文武 官員 ，當眾 賜給 白旄 黃鉞 ，印綬 兵符 ，然後 有威有權 令 出必行 嘅 。
今日 ，大王 應該 遵照 呢個 禮法 ，築 一個 高壇 ，擇定 吉日 ，任命 陸遜 做 大都督 ，假 節鉞 ，噉樣 做 呢 ，大家 就 冇人 唔服 㗎 喇 。
孫權 聽從 闞澤 嘅 意見 ，立即 下令 築好 一個 高壇 ，作好 一切 儀禮 嘅 準備 。
到咗 呢一日 ，佢 大會 百官 ，請 陸遜 登壇 任命 佢 做 大都督 ，右護軍 鎮西 將軍 ，進封 婁候 ，又 將 寶劍 印綬 賜畀 佢 ，叫 佢 掌管 六郡 八十一州 兼 荊楚 各路 兵馬 。
孫權 對 佢 話 ：將軍 你 出征 打仗 ，一切 由 將軍 全權 指揮 ，朕 絕不 幹涉 ！
臣 領 旨 ！
陸遜 接受 咗 任命 ，就 行返 落壇 ，命令 徐盛 、丁奉 做 護衛 ，即日 出師 。
同時 調 各路 兵馬 ，水陸 並進 。
當 文書 嚟到 猇亭 啊 ，韓當 、周泰 就 大吃一驚 喇 ，哎呀呀呀 ！主上 點解 要 搵 個 書生 嚟 總督 兵馬 呢 ？
係喇 ，陸遜 呢個 書生 做 大將 啊 ，噉 係 好 難 做 嘅 。
噉究竟 後來 點 先至 取得 眾將官 對 佢 嘅 信任 ，又 點樣 同 劉備 作戰 呢 ？就 且 聽 下回 分解 喇 。
