而家 講 下 呂布 啊 。
佢 係 下邳 ，就 恃住 糧食 儲備 充足 ，而且 又 有 泗水 呢個 天險 作為 屏障 ，所以 就 安安心心 喺度 守衛 ，乜 都 唔怕 。
當 曹操 率領 大兵 嚟到 個 時候 ，陳宮 就 向 呂布 建議 話 ：
將軍啊 ，而家 曹兵 啱啱 到 ，我哋 趁 佢 兵馬 未曾 企定 腳 ，營寨 又 未 安好 ，以逸擊勞 就 實 贏 㗎噃 。
點知 呂布 話 ：
我 呢一排 屢屢 打敗 ，都係 唔好 輕易 出擊 嘞 。
等 佢 嚟 攻 嘅 時候 先至 打 佢 ，實 將 佢哋 打晒 落 泗水 都 得 啦 。
冇 聽 陳宮 講 。
過咗幾日 ，好喇 ，曹兵 已經 扎好 營寨 ，樣樣 都 安排 就緒 嘞 。
呢一日 ，曹操 帶領 所有 嘅 將領 ，一齊 嚟到 城下 ，大聲 噉 嗌 ：呂布 出嚟 答話 ！
呂布 就 行 上 城樓 企 定 喺度 。
曹操 對 呂布 話 ：聽聞 奉先 你 又 想 同 袁術 聯婚 ，所以 我 就 帶 兵 嚟 呢處 。
袁術 此人 有 謀反 嘅 大罪 ，而 你 呢 ，卻 係 有 討伐 董卓 嘅 功勞 。
我 真係 唔明白 啊 ，你 為咩事 竟然 會 將 以前 嘅 功績 都 拋棄 唔要 ，反而 去 追隨 嗰個 反賊 呢 ？
如果 城池 一破 ，你 就 悔 之 晚 矣 咯 。
如果 及早 投降 ，共 扶 皇室 ，噉 就 一定 不失 封侯 之位 嘅 。
呂布 話 ：丞相 你 返去 先 ，等 我 商量 一下 再 答覆 你 啦 。
當時 ，陳宮 正 企 喺 呂布 旁邊 ，佢 一便 破口大罵 曹操 奸賊 ，一便 拈 弓 搭 箭 ，𠻘噉 一箭 就 射中 曹操 嘅 帥旗 。
嬲到 曹操 不得了 ：我 發誓 要 殺咗 你 ！於是 就 帶兵 攻城 嘞 。
陳宮 對 呂布 話 ：曹操 喺 咁 遠 嚟 ，佢 呢種 勢頭 唔 支持 得 幾耐 嘅 。
嗱 ，將軍 呀 ，你 就 帶住 馬步軍 出去 城外 駐扎 ，我 就 率領 其餘 嘅 人馬 喺 城內 死守 。
曹操 如果 攻打 將軍 你 嘅 時候 ，我 即刻 帶兵 攻擊 佢 嘅 後便 。
如果 曹操 嚟 攻城 嘞 ，噉 將軍 你 就 喺 後便 嚟到 支援 。
我哋 用 噉嘅 打法 ，唔使 十日 咋 ，曹操 個 軍糧 一 食完 ，我哋 一鼓作氣 就 可以 打敗 佢 嘞 。
呢個 係 互相 支援 ，犄角 之 勢 啊 。
你 講得 好啱 。呂布 就 返 屋企 執拾 行軍 打仗 嘅 衣服 。
當時 正係 冬天 ，佢 就 吩咐 啲 隨從 人員 啊 帶 多啲 棉衣 。
佢 老婆 嚴氏 聽到 ，咦 ？乜 帶 多啲 棉衣 呀 ，做咩 嘢 事 呢 ？就 出嚟 問 呂布 話 ：
夫君 你 要 去 邊處 啊 ？
呂布 就 將 陳宮 嘅 計劃 講 畀 佢 聽 。
嚴氏話 嘞 ： 哎呀 ， 夫君 啊 ， 你 成個 城 都 擗 低 ， 妻子 亦 唔 顧 ， 孤軍 遠出 。 如果 ， 如果 一旦 有 咩 三長兩短 ， 噉 將軍 你 就 冇 咗 我 呢 個人 㗎 喇 。
吓 ？哎 ！當堂 搞到 呂布 冇晒 主意 。
佢 躊躇不決 ，連氣 三日 啊 就 冇 出去 衙門 理事 。
陳宮 等 下一 日 ，等下 又 一 日 ，唔係 路 喇 ，就 直情 入去 見 呂布 話 ：
曹操 四面 圍城 ，將軍 你 唔 及早 出去 ，實 畀 佢 困死 㗎 。
我 諗咗 一下 ，遠出 不如 堅守 啊 。
哦 ，誒將軍啊 ，呢 兩日 聽講 曹操 嘅 軍糧 好 少 嘞 ，已經 派咗 人 去 許都 運 糧食 嚟 ，好快 就 會 運到 。
將軍 你 帶 一隊 精兵 ，去 截斷 佢 運糧 嘅 路 ，呢 條 計 呀 妙 啊 。
呂布 諗下 係 噃嚱 ，就 入去 內室 同 嚴氏 講 。
嚴氏 一聽 就 喊起上嚟 話 ：夫君 呀 你 一去咗 ，就係 靠 陳宮 高順 佢哋 ，點 守得住 個 城池 㗎 。
如果 有 咩 錯漏 ，就 後悔 不及 㗎喇 ！
以前 ，喺 長安 嗰陣 ，我 已經 畀 夫君 你 擗低 咗 一次 。
好彩 多得 龐 舒靜靜 地 收埋 我 ，噉 先至 能夠 再 同 夫君 你 相聚 啫 。
點知 ，點知道 今日 夫君 你 又 要 擗低 我 去咗 。
將軍 ，你 前程 萬里 。請 你唔使 掛住 我 咯 ，你 去 ，你去 係啦 。
講完 ，放聲 痛哭 。
嘻嘻 ， 任 你 呂布 呀 點樣 英雄好漢 ， 畀 女人 嘅 眼淚 一 𢴈 過 嚟 即刻 冇 晒 符 。 嘻嘻 ， 呢 個 正 係 呂布 嘅 弱點 。
呂布 聽 佢 老婆 噉樣 講法 ，愁悶 到 不得了 都 唔知 點 做好 。
佢 又 去 將 呢 件 事 講 畀 貂蟬 聽 。 貂蟬 話 嘞 ： 將軍 你 要 顧住 我 哋 先 至 好 啊 ， 千祈 唔 好 自己 隨便 出去 打 啊 。
你唔使憂慮嘅 ，我 有 方天畫戟 ，有 赤兔馬 ，邊個 打得過 我 吖 。
於是 呂布 就 出嚟 同 陳宮 話嘞 ：
話咩 曹操 啲 軍糧 運到 喇 等等 假 嘅 。
曹操 此人 詭計 多端 ，我 未 敢 逳 啊 。
冇法子啦 ，陳宮 辭別 咗 呂布 行 出嚟 ，佢 長嘆 一聲 話 ：
唉 ！我哋 呀 ，死 無 葬身之地 啊 ！
從此之後 ，呂布 日日 都 唔 出嚟 理事 ，一味 同 嚴氏 、貂蟬 飲酒 解悶 。
有一日 ，謀士 許汜 、王楷 兩個 去 見 呂布 ，佢哋 諗咗 個 打敗 曹操 嘅 辦法 ，佢 話 ：
而家 袁 術 喺 淮南 ， 聲威大震 。
往日 ，將軍 同 佢 係 有過 婚約 嘅 ，而家 點解 唔 再 去 求下 佢 呢 ？
如果 袁術 嘅 兵馬 一 到 呀 ，嗰陣 內外 夾攻 ，要 打敗 曹操 就 唔 難 喇 。
好 ！我 即刻 寫 封 信 ，就 請 你哋 兩位 去 一趟 啦 。
將軍 有 令 ，我哋 一定 遵從 。不過 ，事 必要 有 一支 軍隊 ，行頭 引路 衝 出去 噉 先至 得 嘅 噃 。
噉 我 叫 張遼 同 郝萌 兩個 ，帶 一千 人馬 送 你哋 出去 啦 。
於是 當晚 二更 ，張遼 在 前 ，郝萌 在 後 ，保護住 許汜 、王楷 ，打開 城門 殺咗 出去 。
佢哋 喺 劉備 營寨 旁邊 飛 咁快 跑過 ，劉備 手下 嘅 將官 追 佢哋 追唔切 ，就 畀 佢哋 衝 咗 出去 隘口 。
郝萌 帶住 五百人 就 一路 保護 許汜 、王楷 去 壽春 。
噉 張遼 呢 ，就 帶住 其餘 嗰 一半 兵馬 就 返嚟 。
當嚟到隘口個時候 ，關雲長 立馬 橫刀 當頭 攔住 。
但係呢 ，都 未曾 交鋒 ，高順 已經 帶住 兵馬 出城 嚟 接應 ，接咗 張遼 入城 嘞 。
而家 講 下 許汜 、王楷 。
佢哋 兩個 去到 壽春 ，拜見 袁術 ，呈上咗 封 書信 。
袁術 就 話 嘞 ： 前 嗰 次 殺 咗 我 嘅 使者 ， 賴 咗 我 嘅 婚姻 ， 而家 又 嚟 提 呢 件 事 ， 究竟 點解 啊 ， 吓 ？
許汜 話嘞 ：過去 皆因 係 畀 曹操 嘅 奸計 所 誤唧 ，請 明 上鑒 諒 啊 ！
乜許汜 稱呼 袁術 做 明上 嘅 呢 ？
噉嘅 ，喺 封建時代 啊 ，往往 係 用 個 上字 嚟 稱 皇帝 嘅 。
因為 當時 袁術 已經 自稱 為 皇帝 咯 ，而且 仲 定 咗 個 年號 添 ，所以 許汜 佢 哋 呢 就 不便 按照 一般 嘅 尊稱 ，稱呼 佢 做 明公 ，而 改為 稱呼 佢 做 明上 嘞 。
噉袁術就話啦 ：哼哼 ，你嘅主公 如果唔係 因為 畀 曹兵 困住 ，處境 危急 ，又 點肯 將 個女 嫁畀 我 個仔 呀 ？
王楷 話 ：明上 如果 唔去 援救 ，恐怕 唇亡齒寒 ，亦 唔係 明上之福 噃 。
奉先 嘅 為人 反復無常 ，唔 講 信用 。
噉啦 ，等 佢 送 個 女 嚟 先 ，然後 我 就 出兵 啦 。
已經 將 說話 講到 噉 嘞 ，許汜 、王楷 只有 辭別 袁術 ，同 郝萌 返去 下邳 係 啦 。
呢一日 ，返到嘞 ，又 試 要 經過 劉備 營寨 旁邊 嘞 。
許汜話 ：日頭 唔好 經過 佢哋 處 呀 ，仲係 等到 今晚 半夜 先 啦 。
我哋 兩個 先行 ，就 勞煩 郝將軍 你 押後 嘞 。
好喇 ，商量 妥喇 ，到咗 半夜 ，就 按照 計劃 行動 嘞喎 。
許汜 、王楷 就 過咗 去 先 。
郝萌 正在 行緊 ，忽然 撞正 張飛 出嚟 喺 前 便 攔住 去路 。
郝萌 頂硬衝 上去 同 張飛 打 。
僅僅 一個 回合 唧 ，就 畀 張飛 生擒 咗 過去 。
嗰 五百 人馬 畀 張飛 佢哋 殺散 晒 。
噉啊首先 ，張飛 解 郝萌 嚟 見 劉備 ，劉備就 即刻 押 佢 去 大本營 見 曹操 。
曹操 一審 問 佢 ，郝萌 就 將 去 壽春 求救 同埋 應承 婚事 嘅 經過 講咗出嚟 。
曹操 嬲 到 極 呀 ，下令 斬咗 郝萌 。
同時 呢 派 人 通告 各個 營寨 ， 如果 有 走漏 咗 呂布 ， 或者 走漏 佢 嘅 軍士 嘅 ， 一律 按照 軍法 處理 。
嘩嗨 ！各個 寨 呀 當堂 醒定 起上嚟 。
劉備 返到 自己 嘅 營寨 就 吩咐 關公 同 張飛 話嘞 ：
我哋 喺 正通 向 淮南 嘅 要沖 地方 ，你哋 兩個 千祈 要 小心 在意 ，唔好 違犯 曹公 嘅 軍令 啊吓 。
張飛 話嘞 ：哼 ！捉咗 一員 賊將 ，唔見 曹操 有 乜嘢 褒獎 ，反而 仲 嚟 嚇人 添 ，點解 啊佢 ？
劉備 話嘞 ：唔係噉講啊 賢弟 。曹操 統率 咁 大 嘅 軍隊 ，軍令 唔嚴 ，你 話 點樣 管理 吖 。
總之 你哋 千祈 唔好 違反 軍令 啊 。
好啦 ！關公 、張飛 噉 就 冇 說話 講 。
而家 講下 許汜 、王楷 ，佢哋 返到去 見 呂布 就 講 佢 聽 ，話 袁術 呢 首先 要 得到 個 新抱 ，然後 先至 起兵 嚟 救 噉 。
呂布 話 ：送個女 去 先 都 得 ，不過 點樣 送去 呢 ？
許汜話 ： 而家 郝萌 畀 佢 哋 捉住 ， 曹操 必定 知道 晒 我 哋 嘅 情形 ， 樣樣 都 會 作好 準備 㗎 嘞 。
所以 ，如果 唔係 將軍 你 親自 護送 ，邊個 咁 本事 能夠 衝出 重圍 呢 ？
嗯 ，今日 就 送去 ，點啊 ？
誒 ，今日 係 兇神 值日 ，唔好 去 啊 。
聽日 就 大吉大利 嘞 ，最好 就係 戌時 同 亥時 嘞 。
即係話 晚上 七點 到 十一點 呢個 時候 好噉 。
好 ！就噉 定啦 。
跟住 呂布 對 張遼 、高順 話 ：你哋 點 三千 軍馬 ，準備好 一架 車 ，聽日 我 親自 送 你哋 過咗 二百里 ，然後 由 你哋 兩個 繼續 送 我 個 女 去 壽春 。
遵命 ！
好喇 ，到咗 第二日 ，夜晚 二更 時分 ，呂布 用 啲 靚 棉花 纏住 個 女 嘅 身 ，然後 用 鐵甲 裹好 ，孭 喺 背脊 上 便 ，裝束 好喇 。
呂布 提戟 上馬 打開 城門 ， 呂布 縱馬 就 首先 出 城 ， 張 遼 、 高順 就 跟 到 佢 實 。
一路行 ，就嚟 行到 劉備 營寨 喇 。
只聽見 咚咚咚 一 聲 鼓響 ，關公 、張飛 就 攔住 去路 喝 佢哋 話 咪 走 ！
呂布 無心 戀戰 嘞 ，一味 顧住 搶路 走 。
呢個 時候 劉備 又 親自 帶咗 一隊 軍馬 殺嚟 添 ，兩便 就 混戰 一場 。
呂布 啊 雖然 係 勇猛 啫 ，終歸 係 孭住 個 女 喺 身 嚟 ，至 怕 就係 傷親 佢 。
所以 打起上嚟 就 度度 顧住 擏手擏腳 ，亦 唔 敢 衝突 重圍 。
打咗 一輪 ，弊晒 ，後便 徐晃 、許褚 等等 都 殺過嚟 嘞 ，啲 兵卒 大聲 噉 嗌 ：唔好 畀 呂布 走咗 啊 ！殺啊 ！
呂布 見 對方 嘅 人馬 越嚟越多 ，冇辦法 衝出去 㗎 嘞 ，就 唯有 退返 入去 城 。
噉劉備啊 收兵啦 。
徐晃 佢哋 亦 各自 帶兵 歸寨 。
噉啊 確係 一個 都 冇 走甩 到 。
呂布 退返 入城 之後 個 心 啊 愁悶 到 不得了 ，就 一味 係 飲酒 。
噉啊不知不覺啊 ，過咗 兩個月 嘞 ，曹操 攻城 啊 仲係 攻佢 唔落 。
有一日 ，忽然 得到 報告 話 ，河內 太守 張楊 想 出兵 嚟 救 呂布 ，畀 佢 個 部下 楊醜 殺咗 。
楊醜 本來 想帶 住 張 楊 嘅 首級 嚟 獻 畀 丞相 嘅 ， 點知 畀 張 楊 一個 心腹 將領 眭固 殺死 ， 而家眭固 投奔 犬城 去 咗 咯 。
曹操 聽咗 呢個 消息 ，即刻 就 命令 史渙 帶 齊 人馬 去 追 眭固 ，務必要 斬咗 佢 。
跟住 佢 同 大家 商量 話 ：張楊 雖然 自取滅亡 啊 ，噉 好吖 ，唔使 我哋 去 打 。
但係 北 便 有 袁紹 之 憂 ，東 便 有 劉表 、張繡 之 患 噃 。
我哋 圍攻 下邳 咁 耐 仲 攻佢 唔落 。
誒 ，我 想 擗開 呂布 唔 打 佢 住 ，返去 許都 先 ，暫時 停戰 ，你哋 話 噉 好唔好 呢 ？
荀攸 一聽 曹操 噉 講 就 話嘞 ：唔好啊 ！呂布 打親 都 輸 ，已經 失咗 銳氣 嘞 。
一支 軍隊 以 將 為 主 ，主將 一 軟弱 就 全軍 都 無心 作戰 㗎 嘞 。
嗰個 陳宮 雖然 係 有計謀 ，不過 係 遲鈍 嘞 。
而家 呂布 個 元氣 都 未曾 恢恢復 ，陳宮 嘅 計策 亦 都 未曾 定得 。
我哋 有 咁快 時 得 咁快 ，加緊 進攻 ，一實 可以 捉到 呂布 嘅 。
郭嘉 就 話 ：我 諗到 一個 辦法 ，可以 立即 攻破 下邳城 ，勝過 用 二十萬 大軍 嘞 。
荀彧 就 話 喇 ：哦 ！莫非 掘開 沂水 、泗水 嘅 河堤 ，用 水 浸 佢哋 係 嘛 ？
郭嘉 話 ：冇錯喇 ，哼哼哼哼哼哼哼 。
曹操 歡喜 到極 ， 即刻 下令 就 叫 啲 軍士 掘開 兩條 河 嘅 河堤 。
當時 曹操 嘅 人馬 ，佢哋 所 駐扎 嘅 地方 都 係 高原 ，睇住 啲 大水 㗾㗾 聲 湧住嚟 浸 下 邳 。
轉眼之間 ，全個 下邳城 啊 ，就 除咗 東門 嘅 地勢 比較 高 冇 水 之外 呢 ，其餘 各個 城門 都 畀 水浸 晒 嘞 。
噉啊 各處 守城 嘅 軍士 就 飛 咁快 趯嚟 報告 畀 呂布 知 啦 。
點知 呂布 當 佢 冇事 噃 ，佢 話 ：
我 有 赤兔馬 ，渡水 好似 行 平地 噉 ，一啲 都 唔 使 怕 。
佢 依然 日日 同 老婆 、妾侍 呀 痛飲 美酒 ，尋歡作樂 。
唉 ，呂布 你 估 真係 鐵打 嘅 咩 ？
因為 酒色 傷身 ，呂布 當堂 落晒 形 。
有一日 ，佢 偶然 照 一照 鏡 ，哎呀 ，嚇親 自己 。
乜 變成 噉樣 呀 ！佢 話 嘞 ：我 畀 酒色 傷 咗 喇 。
嘿！ 從 今日 開始 ，戒酒 ！
於是 立即 通令 全城 ，從 即日起 ，凡 有 飲酒 嘅 ，斬 ！
而家 講 下 呂布 部下 有 個 將領 叫做 侯成 吖 。
佢 有 十五 匹 好 馬 ，畀 個 馬夫 偷 咗 ，想 愛 嚟 獻 畀 劉備 嘅 。
侯成 發覺 咗 之後 就 追 到 嗰 個 馬 夫 殺 咗 佢 ， 搶返 啲 好 馬 返 嚟 。 噉 啊 好 高興 啦 。
噉啊 成班 軍官啊 ，都 嚟 同 侯成 賀喜 嘞 。
侯成啊 本來 釀咗 五六石 酒 ，就 想 同班 軍官 飲 返 餐 嚟 高興 下 。
之又怕呂布怪罪啊 ，於是呢就帶咗五瓶酒 送去畀呂布 ，就稟告佢聽話 ：
托將軍嘅 虎威 ，失咗 啲 好馬 全部 追返嚟 ，眾位 將官 都 嚟 賀喜 。
小將 釀 到 多少 酒 ，唔敢 擅自 飲用 ，特意 奉獻 一啲 畀 將軍 ，聊表 微意 啊 。
吓 ？吖吖吖呸 ！
我啱啱禁酒 ，你又要聚眾飲酒 ，莫非 想 同謀 嚟 害 我 係嘛 ？
人嚟 ！將 佢 推出去 斬首 ！
嘩 ！ 不得了 嘩 ！ 宋憲 、 魏續 等等 將官 喇喇聲 走 嚟 同侯成 講情 啦 。
呂布 話嘞 ：故意 違犯 我 嘅 命令 ，理應 斬首 。
而家 睇 在 各位 將官 面 上 ，姑且 打 一百 棍 啦 。
眾位 將官 又 苦苦 哀求 ，終歸 打咗 五十 棍 ，然後 先至 放返 侯成 。
唉 ！所有 嘅 將官 呀 ，個個 都 搞到 垂頭喪氣 。
宋憲 、魏續 去 侯成 屋企 探望 下 佢 。
侯成 又 喊起 上嚟 話 ：
唔係 各位 講情 ，今日 我 實死 嘅 喇 ！
宋憲話嘞 ：呂布 一味 識得 顧住 個 老婆 ，當 我哋 都 唔係 嘢 。
魏續話嘞 ：兵圍城下 ，水浸壕邊 。
𠺪 ，我哋 呀 ，等死 係啦 ！
宋憲話 ：呂布 噉樣 不仁不義 ，我哋 擗開 佢 走人 喇 。點啊 ？
魏續 話 喇 ： 無毒不丈夫 ， 我 哋 不如 ， 我 哋 不如 捉 咗 呂布 獻 畀 曹操 唔 好 ？ 吓 ？
侯成話 ：冇錯喇 ！嗱 ，呂布 恃 咩 呢 ？恃佢 嗰匹 赤兔馬 咋嘛 。
你哋 兩個 如果 真係 獻門 嚟 捉 呂布 ，噉 我 就 先 去 偷 馬 送 畀 曹操 ！
三個人 就 秘密 商量 好晒 。
當晚 ，侯成 靜靜 去到 馬棚 ，偷咗 嗰匹 赤兔馬 出嚟 ，就 飛奔 去到 東門 。
魏續 開咗 城門 放佢 出咗 去 ，然後 就 詐 假意 整成 去 追佢 噉樣 ，追咗 幾步 就 返轉頭 嘞 。
侯成 去到 曹操 個 營寨 ，獻上 匹 赤兔馬 。
將 宋憲 、魏續 有意 投降 ，喺 城頭 插 白旗 做 信號 ，準備 獻門 嘅 事 稟告 畀 曹操 聽 。
曹操 一 聽到 呢個 消息 ，哎得法喇 ！馬上 簽署 咗 幾十 張 佈告 ，叫 人 用 箭 射 入去 城 裏 便 。
張佈告 嘅 大意 呢 就係話 ：大將軍 曹操 ，奉 咗 皇上 聖旨 ，嚟到 征伐 呂布 。
如果 膽敢 抗拒 大軍 嘅 ，攻破 城池 嘅 時候 ，就 要 全家 殺絕 。
如果 有人 能夠 捉住 呂布 獻禮 ，或者 獻佢 個 首級 嚟 嘅 ，不論 上至 將校 ，下至 庶民 ，一律 重 加官賞 。
到咗 第朝 ，蒙蒙光 嘅 時候 ，呂布 只 聽見 城外 嘅 吶喊聲 呀 震天動地 。
呂布 大吃一驚 ，揸住 支 方天畫戟 行 上 城樓 逐個 城門 去 視察 。
佢 見到 魏續 就 大鬧 佢 一餐 ，鬧 佢 畀 侯成 走甩 咗 ，仲 失 咗 赤兔馬 ，嬲 到 呂布 不得了 要 治 佢 嘅 罪 。
但係 喺 呢個 時候 呢 ，城下 嘅 曹兵 啊 見到 城上 插起 白旗 嘞 就 搏命 咁 攻城 。
嘩 ，好緊急啊 。呂布 就唯有 親自 抵敵 啦 。
從 個 天曚曚 光 一直 打到 中午 ，曹兵 先至 稍為 後退咗 一啲 ，就 冇 攻得 咁 厲害 。
呂布 已經 疲倦不堪 嘞 ，就 喺 門樓 上面 休息 一下 。
點知 坐 喺 張 椅 處 ，一 瞌 就 瞓着咗 。
宋憲 見到 機會 嚟 喇 ， 就 喝 左右 啲 衛兵 行開 ， 拈手 拈腳 就 偷 咗 呂布 支畫 戟 收埋 。
然後 同 魏續 一二三 一齊 逳手 ，將 呂布 一撳 ，撳到 佢 實 ，即刻 用 繩 將 佢 綁 到 實 一實 。
呂布 一下 扎醒 ，弊 ！畀人 綁住 嘞 ，就 大嗌 衛兵 ，但係 啲 衛兵 呢 ，都 畀 宋憲 、魏續 殺走 晒 咯 。
宋憲 將 白旗 一拂 ，曹操 嘅 兵馬 即刻 㗾㗾聲 衝到嚟 城下 。
魏續 大聲 噉 嗌話 ：我哋 已經 生擒 呂布 喇 ！
夏侯淵 唔信 喎 ，嘘嘘 ，你 兩個 嘢 有 咁 大 本事 ？
宋憲 就 喺 城樓 上 ，咣聲 下 將 呂布 支 畫戟 掉咗 落 城 ，大開 城門 。
嘩 ！乜 真係 捉到 呂布 喇 ！啲 曹兵 潮水 噉 一擁而入 啊 。
當時 高順 、張遼 啊 喺 西門 嗰便 ，因為 畀 水 浸住 ，出唔到 城 ，就 畀 曹兵 捉到 。
陳宮 趯咗 去 南門 ，就 畀 徐晃 捉住 。
曹操 入咗 城 ，馬上 傳令 ，要塞 返好 掘開咗 嘅 河堤 ，同時 呢 引啲 水 退乾 ，又 出 榜 安民 。
呢 兩件 最 緊要 嘅 事 交帶咗 嘞 ，曹操 就 同 劉備 坐 喺 白門樓 上 ，關公 、張飛 就 企 喺 劉備 嘅 側 跟嚟 。
曹操 吩咐 將 捉到 嘅 人 押 上嚟 ！
呂布雖然 生得 又高又大 ，但係 而家 呢 ，嘿 ！畀人 用 繩 呀 好似 扎粽 噉 扎埋 一嚿 。
呂布 大聲 噉 嗌 話 ： 綁 得 太緊 喇 ！ 唔 該 鬆一鬆 啦 ！
曹操 話 ：綁 老虎 唔 緊 都 得 嘅 咩 ？
呂布 擸咗 一眼 ，見到 侯成 、魏續 、宋憲 都 企住 喺 旁邊 ，就 對 佢哋 話嘞 ：
我 一向 待 你哋 都 唔 錯 㗎 吖 ，你哋 真係 咁 忍心 背叛 我 咩 ？
宋憲 駁佢 話嘞 ：聽埋晒 老婆 妾侍 嘅 說話 ，唔聽 將領 嘅 計策 ，噉 仲 話 待 我哋 唔錯 ？
吓 ？ 哎 ， 呂布 當堂 誒 都 冇 得 誒 ， 啞口無言 啊 。
無耐 ，啲 刀斧手 擁住 高順 嚟 ，曹操 問 佢 ：你 有 乜嘢 講 啊 ？
高順 唔 出聲 。
你 有 乜嘢 講 ！嗯 ！
將 佢 推出去 ，斬 ！於是 斬咗 高順 。
跟住 ，徐晃 解 陳宮 嚟 嘞 ，曹操 一見 陳宮 就 話 ：分別 之後 ，你 幾 好 吖嘛 ？
陳宮 話 ：你 心術 不正 ，所以 我 離開 你 。
哦？ 我 心術不正 ，你 又 為 乜嘢 要 去 為 呂布 效力 呢 ？
呂布 雖然 有勇無謀 ，唔似 你 咁 詭詐 奸險 啊 ！
哼哼 ！噉 你 自認 係 足智多謀 ，而家 又 點 啊 ？吓 ？
我 至嬲 呂布 此人 唔聽 我 嘅 說話 ，如果 聽 我 講 ，未必 畀 你哋 捉到 。
噉 ，今日 嘅 事 該 點樣 辦 呢 ？
今日 唯有 一死 而已 ！
你 係 噉啫 ，你嘅 母親 、妻子 又 如何 啊 ！
我 一向 都 聽聞 話 ：以 孝 治 天下 者 ，不 害 人 之 親 ；施 仁政 於 天下 者 ，不 絕 人 之 後 。
我 母親 、 妻子 或 生或死 ， 就 睇 明公 你 嘞 。
我 今日 已經 被 擒 ，請 你 殺咗 我 啦 ，我 並無 牽掛 ！
曹操 仲 係 有啲 留戀之意 ，唔捨得 殺 陳宮 。
但係 陳宮 已經 直筆 行 落 城樓 咯 ，啲 衛兵 拉 都 拉佢 唔住 。
曹操 企 起身 ，流住 眼淚 送 陳宮 。
陳宮 理 都 唔 理 佢 啊 頭 都 唔 回 。
曹操 對 佢 嘅 侍從 話 嘞 ：即刻 送 公台 嘅 母親 、妻子 返去 許都 養老 ，怠慢 嘅 斬 ！
陳宮 聽住 曹操 講 呢番 說話 ，佢 亦 唔 開口 ，眼 都 唔 眨 下 ，伸長 條 頸 等 你 斬 啊 。
當時 在場 嘅 人 個個 都 流眼淚 。
斬咗 陳宮 之後 ，曹操 叫 人 用 副 上等 棺材 斂咗 佢 嘅 尸體 ，葬 喺 許都 嚟 。
當 曹操 起身 送 陳宮 落 城樓 嘅 時候 啊 ，呂布 就 揸緊 呢個 機會 𠱓 劉備 嘞 ，佢 話 ：
玄德公 ，你 係 貴客 ，我 係 囚犯 ，點解 唔 講句 說話 救下 我 啊 ？
劉備 岌岌 頭 ，冇 出聲 。
好喇 ，曹操 返上嚟 嘞 ，呂布 就 大聲 噉 對 曹操 話 ：
明公 你 最 棹忌 嘅 ，不過 係 我 呂布 啫 ，我 而家 已經 服 你 喇 。
明公 你 做 大將 ，我 做 你嘅 副手 ，平定 天下 就 唔 難 喇 。
曹操 就 問 劉備 話 嘞 ：點啊 ？吓 ？
你 估 劉備 啊 點 答 曹操 呢 ？呂布 嘅 命運 又 如何 呢 ？
