شريحة الدماغ نيورالينك | Neuralink
يعني رح نصير الكترونيين؟
مرحبا
أول شيء بخطر ع بالك لما تسمع خبر نيورالينك
إنه.. خ
رح نصير سايبورغز؟
كائنات بشرية الكترونية؟
لكن ماذا لو قلتلك
انك انت اصلا سايبورغ
بس اول شي خلينا في إيلون ماسك
هلأ إيلون ماسك
في 29 أغسطس 2020
أعلن عن إطلاق الشريحة الالكترونية
اللي تنزرع في المخ
"نيورالينك"
ووضح انه بشيلوا جزء من الجمجمة
وبشبوكوها مع مخك
كيف يعني بشبكوها مع مخك؟
هلأ صح انت كتلة إحساس ومشاعر وأحداث الله يحميك
ومريت ب كتير دراما.. ومشاكل عائلية.. وغيبت من الضحك مع صحابك
وانكسر قلبك
وبتاكل وبتتحرك وبتستوعب
أحداث متنوعة جدا ومغامرات
لكن على مستوى الدماغ
هذه الأحداث
والتجارب كلها
عبارة عن كهرباء
فقط
وكهرباء بعلم الأحياء
يعني تفاعلات كيميائية
بين الخلايا
بتولد تيار كهربائي
مخك
عبارة عن شبكة من 86 مليار خلية عصبية
والتفاعل بين هذه الخلايا عبارة عن تبادل كيماوي بين ال synapses
او المشابك
اللي بتوصل الخلايا العصبية مع بعض
كل هذه الذكريات
والأحداث
عبارة عن كيمياء
حضرتك
عشان هيك
ممكن انك تشم ريحة معينة مثلا
وبطريقة ما
تذكرك بصورة لحالك وانت طالب ثانوية عامة
كل ما خلية ترسل إشارة
بصير اشي اسمه neurospikes
وهون بيجي دور نيورالنك
هلأ هذه الشريحة
رح تكون قريبة من الخلايا العصبية جدا جدا
لدرجة انها تعتبر
شابكة معها
وهيك بتصير تقدر تقرأ الإشارات الكهربائية
اللي عم بنتجها دماغك
أو جزء منه
قراءة مباشرة
يعني وهي عم بتصير
إيلون ماسك
شرح هذا الموضوع
عن طريق هذه الخنزيرة الكتكوتة
gertrude
شريحة نيورالينك
كانت قادرة إنها تقرأ الإشارات اللي عم بتصير في منخار gertrude
وهي عم بتشمشم حواليها
هلأ الشريحة معمولة بطريقة انه بيشيلو جزء من الجمجمة
ويحطولك الشريحة بدالها
من الصورة اللي حاطينها في الويب سايت
مبين انهم بدهم يزرعوها في ال parietal bone
هلأ هذه سمكها بحدود ال 5.8 ميل
يعني العملية دقيقة جدا
طبعا ماسك بيك حكالهم طيب
طالما نحنا عم نعمل عملية عشان نشبك البشر مع الروبوتات
اعملولي روبوت
عشان هو يعمل هذه العملية عالبشر
لإنه الروبوتات أحسن منا حتى في هاي
وعملوله والله
طيب
شو يعني؟ شو استفدنا؟
ماسك بيقول
انه هذه الشريحة رح تخلي مخك قادر يستخدم عدد خلايا عصبية اكثر
وبالتالي
ممكن يساعدك في حل مشاكل عصبية زي
ضعف الذاكرة
أو فقدان البصر
أو حتى القلق
لا تنسى انه بما انه الدماغ بيترجم كل هذه الإشارات على إنها إشارات كهربائية
إذا بطريقة ما طورنا القدرة للشريحة انها تعطينا إشارات عصبية معقدة
ومدروسة وحسب الطلب
الموضوع بصير معقد كتير
لنفترض انه هاد الكلام صار
وبالمستقبل
صرت تقدر تنقل اللغة الصينية مثلا لمخ شخص خلال ثواني
عن طريق الشريحة
والشريحة بتكون شابكة مباشرة مع الشبكة العصبية تبعتك
وهون لازم نسأل سؤال مهم
لما يجي هذا اليوم وتقدر الشريحة بالمستقبل إنها تعطيني معرفة لحظية
كيف رح تكون التجربة؟
وهون بلاقي حالي قدام خيارين
إما أنه الشريحة رح تعطيني فقط المعرفة
أو
إنها رح تعطيني المعرفة
والمهارة كمان
كيف يعني؟
لنفترض مثلا يعني إنك طلبت من الشريحة إنها تعملك تحميل للغة الصينية
هل هذا يعني انه اللغة هاي رح تتخزن في شبكتك العصبية
كمعلومات جديدة؟
يعني مثلا إذا حاولت تحكي صيني
هل مخك
رح يحاول يستخرج هذه المعلومات المخزنة في الشريحة
ويحكيها لأول مرة؟
لإنه إذا هيك الوضع انت رح تأ تأ كتير
لانك رح تكون زي كإنك عم تقرأ من صفحة ترجمة صينية وتحكيها
بس اللهم بدل ما تعمل غوغل في أصبعك بتعمله في مخك
هل رح تعطيني الشريحة المعرفة باللغة الصينية فقط؟
ولا رح تخليني على طول احكي صيني بطلاقة
ومخي فاهم هذه اللغة لدرجة إنه مو محتاج
إنه يبذل أي جهد واعي فيها؟
زي طلاقتي بالعربي مثلا
إيلون ماسك ونيورالينك
ما بجاوبوا على هذا السؤال
لهلأ ما منعرف كيف رح يكون الشعور في مخك إنه عنده سوبر كمبيوتر
بيشتغل معاه
وبيخليه يمتلك قدرات خارقة
لكن كلنا بنعرف
كيف يعني تكون سايبورغ
لإنه كلنا
أصلا سايبورغز
كيف يعني؟
اذا حطيتك بغرفة فاضية
وقلتلك ما اسم اول رئيس في امريكا؟
ممكن تقول لي ما بعرف
لكن اذا حطيتك بغرفة فاضية مع موبايل
وسألتك شو اسم اول رئيس لامريكا
رح يعم الهدوء في الغرفة لبضع ثواني
بعدين رح تقول لي
جورج واشنطن
مين اللي جاوب عالسؤالين هدول؟
انت
طيب مين اللي كان جوابه أحسن؟
انت
لما كان معك موبايل
انت اللي مخك فهم السؤالين وحللهم بنفس الطريقة بالضبط
لكن الفرق انه المرة الثانية
مخك استعان بإشي اسمه كمبيوتر
عشان
ياخد اللي بده اياه
يعني زي كأنك مددت منطقة سيطرتك الدماغية
لأجزاء غير بشرية للمساعدة
سواء كان الموبايل
أو النظارات
كل هذا عشان تزيد من قدراتك
بمعنى آخر
بتحصل على قدرات خارقة عن طبيعتك
بتخليك تقدر تعرف قانون نيوتن الثالث
بثانيتين
بس ممكن تقولي لا طيب ما هو هذا الكمبيوتر يعتبر شيء مفصول عني
باجي أنا بقولك
اوعى تقول مفصول
اوعى تقول مفصول
بالله عليك ما بتنجن اذا ضاع منك خمس دقائق؟
قبل ما تخاف من الذكاء الاصطناعي
كيف بده يكون مشبوك فيك
خلينا نسأل حالنا السؤال التالي
هو الذكاء الاصطناعي اصلا شو بعرف عنك؟
الطبيعة الأم: كل شيء بعرف عنه
كل شيء بعرف عنه
حيوانات منوية مهدورة
وصرتولي ضد التناسل أخرى
بوزع عليكم بويضات من دار أبوي ما أنا
قاعدين لي عالانترنت
قوموا تكاثروا
قومييي
قومي تكاثري
قومي تكاثري
قومي
ماله التكاثر والله حلو التكاثر
سلام: هاي ماما الطبيعة معها حق فيها
بعرف كل شيء عنك
بعرف كم مرة بتمسك فيها موبايلك في اليوم
وكم ساعة بتقضي عليه
وكم خطوة بتمشي
ووين رحت
ومع مين
وقديه قعدتوا هناك
ويمكن شو شربتوا كمان
بعرف كمان لما تكتب تعليق وترجع تمسحه
بعرف لما تكون بتراقب حد
وتقعد ساعة فاتح صوره
بعرف مودك اليوم
وشو بتحضر
وشو بتعمل
متبعلك 24 على 24
بحار من التيرابيتات عشان يخزن فيها كل تصرف عملته
فاهمك اكثر من حالك
لدرجة انه بقدر يتنبأ بتصرفاتك
ليش؟
هاي البيانات كلها بياخدها وبدرسها
عشان يفهمك شخصيتك
وبناء عليها ببني محتوى دعائي بناسب شخصيتك
ممكن يزبط معك
مثلا
سارة بتطول على صور الشباب السمر اكثر من الشقر
بيجي عشان يعملها دعاية كوكاكولا
بحطلها واحد اسمر بشرب كولا
كم هي نسبة الوقت باليوم اللي بيكون فيها موبايلك معك؟
تقريبا.. طول الوقت
هذا يعني انه انت في اي لحظة
رح تكون أذكى بآلاف المرات
بس لانه معك موبايل
بيعطي لمخك دخول على المعرفة البشرية
بالتالي الشيء الوحيد اللي بيخلي هاي الشريحة تبعت نيورالينك
تقدم.. هو انها بتخلي سرعة حصولي عالمعلومات
اكبر
بدل ما استغرق
نصف دقيقة
أدور على مين أول رئيس لأمريكا
مع الشريحة بستغرق ثانيتين فقط
ولا هي ما عملت خطوة تاريخية
لأنه فيه كتير ناس عندهم شرائح
وأجزاء الكترونية بجسمهم من زمان
عشان هيك الحذر من الذكاء الاصطناعي بيبدأ الآن
حتى إنه كان لازم يبدأ من زمان
لانه الذكاء الاصطناعي مسيطر على حياتنا بطريقة حتى ما بتخطر ع بالنا
بال 2019
انتشرت الفضائح كيف انه شركة cambrige analatyica
استخدمت الذكاء الاصطناعي عشان يتلاعبوا بالانتخابات
وكيف انهم قبل هيك كانوا قاعدين عم بتدربوا على بلاد ثانية
عن طريقة تحريض شعوبها على أحداث معينة
كيف هيك؟
كيف يعني ذكاء اصطناعي بقدر يخلي الجيش المينماري
يقتل ويهجر ويغتصب مئات آلاف المسلمين هناك؟
هون
لازم نرجع لبياناتك
الذكاء الاصطناعي وهو قاعد براقب فيك
اكتشف انه اذا عمل خريطة لبياناتك
بقدر يغير رأيك في قضايا معينة
عن طريق انه يهريك اخبار سلبية
عن حزب معين مثلا
ويتلاعب
بشو المنشورات اللي يحطلك ياها
لغاية ما انت لا شعوريا
يصير عندك رأي سياسي
حتى لو انت ما بتحب السياسة
بس لا تفكر انه الموظفين المبرمجين ب cambridge analytica
هم اللي عرفوا
لا
نحنا ما بنعرف شيء
الذكاء الاصطناعي لحاله بشتغل
بناء على معلومات
كل شخص
كل واحد فينا فيه عنده مفصله فيد
مفصل له اياه الذكاء الاصطناعي تفصيل
لانه بعرف احنا شو بنحب نشوف
ومن هون
"ظهر مصطلح "الانحياز التصميمي
وهو ميل الذكاء الاصطناعي على تفضيل المحتوى اللي فيه عنصرية
او خطاب كراهية
او اباحية
لانه شاف انه هذا الشيء اللي بنحبه
ف صار اوتوماتيكيا يدعم هذا النوع من المحتوى بطريقة ما
لانه بيلاقي فيه كتير عليه تفاعل
عشان هيك
نحنا وصلنا لمكان
عم نتحول لكائنات عم تقضي معظم يومها
في الواقع الافتراضي
الشيء اللي عم بيبعدنا كتير عن بعض وعن طبيعتنا الاجتماعية
احنا كائنات اجتماعية جدا
هاي هي البيئة اللي متعودين عليها من آلاف السنين
البيئة اللي اذا حد بده اياك
رح يحتاج وقت ليوصلك
بس لما يوصلك
رح تتبادلوا تفاعل اجتماعي حقيقي
مكافئ
ومريح لجسمكم انتوا الاثنين
أما هلأ
أي حد على الكوكب بده اياك
بهذه اللحظة ببعتلك وبيوصلك
لكن بس تتواصلوا بتتواصلوا افتراضيا
الشيء اللي يبدوا انه دماغنا
مش متعود عليه وما بيحبوا
عشان هيك فيه كتير ناس بطلت تسأل.. كيف بنقدر نوصل الشريحة بالجسم؟
كيف بنقدر ندمج الحياة الالكترونية بالحياة العادية اكتر؟
بل بتسأل
طيب ماذا عن الحالة اللي وصلتها المجتمعات الإنسانية البشرية
من مشاكل نفسية؟
وتخبط بالهوية؟
وعدم رضا؟
ماذا عن هدول؟
يمكن تطور الذكاء الاصطناعي مافي مفر منه
لكن هذا التطور
عم بصير بسرعة هائلة جدا
لدرجة انه ما بنعرف
اذا رح يكون لصالحنا بالمستقبل
يمكن يغير حياتنا بطريقة تخلينا نسأل
طيب بعد كل هذا اللي عملناه من تطور
ونجاح الكتروني؟
هل صارت جودة حياة الشخص الالكتروني
افضل من جودة حياة صياد بدائي في البراري؟
إذا بتحبوا المحتوى اللي بعملوا وحابين تساعدوني
بتقدروا تدعموني على باتريون
كمان على باتريون كل شهر
رح نعمل جلسة أونلاين مباشرة
نتناقش فيها مع بعض نحنا الباترونز
عن أشياء الها علاقة بالعلم.. بالحياة
يعني ندردش
اذا مهتمين بالموضوع
رابط الباتريون بتلاقوه بصندوق الوصف
سلام
طيب.. ما فيه داعي نحكي بموضوع القناة وإنك لازم تشترك وتخلي الجرس يرن.. إلى آخره
بس صراحة لازك أذكرك أو أذكرك
انك تشوف أو تشوفي الفيديوهات التانية
يا اخي اسرح بخيالك
