ياللا نروح نخيم
مريم: هالة شو رح تسوي خلال عطلة الربيع؟
هالة: بدي اروح كامبنج مع اهلي وادي الرم.
مريم: انا متأكدة انكو رح تنبسطو هناك، انا عمري ما رحت كامبنج.
هالة: رايحين ننبسط كثير، ورح ننبسط اكثر لو جيتي معنا. تعالي معنا يا مريم.
مريم: بحب اجي معكو، وينتة رح تروحو؟
هالة: رح نروح الاسبوع الجاي، يوم الجمعة ويوم الاثنين انشالله رح نرجع.
مريم: هذا مناسب الي كثير، شو لازم اجيب معي؟
هالة: لازم تجيبي معاك لوازم شخصية مثل فرشاية اسنان ومعجون اسنان، وشو كمان، ا .. وبرضو بشكير وصابونة وشامبو.
مريم: ومش لازم اجيب طقية كمان؟
هالة: طبعاً، ولازم تجيبي كريم للشمس ونظارات شمسية. وبرضو عشان الطقس بارد في الليل، فلازم تجيبي جرزاية او جاكيت.
مريم: وماتنسيش تجيبي معك ملابس رياضية وكندرة التنس عشان نمشي في الواد.
هالة: منيح اللي ذكرتيني.
مريم: بس انا ماعنديش خيمة!
هالة: ولا يهمك، عنا خيمتين وكثير سليب باغات، وكمان عنا مخدات وحرامات ولوكسات.
مريم: وشو بالنسبة للأكل؟
هالة: في اليوم الاول رح نوخذ لحمة مفرومة عشان نعمل كباب ونشوي عالنار.
مريم:شو زاكي!
هالة: وللأيام الثانية رح نوخذ خبز وجبنة وفواكه ومعلبات كثيرة خاصة حمص.
مريم: وانا رح اجيب شيبس ومكسرات وشوكلاتة وعلى فكرة يا هالة البيض المسلوق مهم في الرحلات.
هالة: هذا مزبوط.
مريم: خلتيني متشوقة اروح.
هالة: انا متأكدة انك رح تحبي الرحلة، ومش رح تندمي ابداً.
