تفضلوا عنا عاغدا
سامية: نبيل، انا حكيت مع اخي سامي قبل شوي، وقال انو يوم السبت بعد بكرة بيقدر يجي مع عيلتو يتغدوا عنا.
نبيل: كتير منيح. انا دايما بحب احكي معو. صارلي شهور ما شفتن.
سامية: والله اشتقتلو واشتقت لمرتو ولولادو. بدي اعمل الهن غدا كتير طيب.
نبيل: ممتاز
ممكن تروح عالسوق وتشتري اغراض؟
نبيل: اي طبعاً، انت بس احكيلي لالشياء اللي بدك إياها وانا بكتبها على ورقة.
سامية: اول شي لحتى اعمل سلطة، بحتاج لخس وبندورة وخيار وبقدونس.
نبيل: اديش الكمية؟
سامية: عندي بالبراد بقدونس، بحتاج لأربع خسات، والله يخليك تأكد انن تازة.
طيب وشو كمن؟
وبدي تلاتة كيلو بندورة، من النوع الكبير يلي للسلاطة، وكمان بدي اتنين كيلو خيار من النوع الزغير والطيب.
نبيل: منيح وشو بالنسبة لليمون؟
سامية: اه، ذكرتني، اشتري نص كيلو ليمون يعني حوالي تلت لأربع حبات كبار.
نبيل: لسة عنا زيت زيتون يا سامية؟
سامية: قنينة الزيت بآخرها، اشتري قنينة تانية لو سمحت.
نبيل: كتبت كلشي حكتيه، وشو كمان؟
سامية: بالنسبة للطبيخ، انا بفكر اعمل محاشي.
بيت اخي بحبو المحاشي كتير.
نبيل: وانا كمان بحب المحاشي، صارلي زمان ما اكلت هاي الطبخة.
سامية: لأنو تحضير المحاشي بياخد وقت،
بس جارتنا ام احمد رح تيجي يوم الجمعة وتساعدني بكل شي.
نبيل: كتير منيح.
سامية: وكمان ام احمد رح تجيب معها ورق عنب من دواليها.
نبيل: ممتاز، وهيك ورق العنب بكون تازة.
سامية: اكم كيلو كوسا اشتري؟
سامية: اشتري اربعة كيلو كوسا، نقي كوسا زغير كتير.
نبيل: طيب، وشو عن الملفوف؟
سامية: اشتري تلت ملفوفات، وتاكد انن ما يكونوا كبار متل اخر مرة.
نبيل: لا، لا يكونلك فكرة، كل شي رح يعجبك، طيب، كم كيلو لحمة مفرومة اشتري؟
سامية: اشتري عالاقل اتنين كيلو لحمة مفرومة،
وتأكد انو اللحام ما يحط دهن فيها.
نبيل: اكيد، اي شي تاني؟
سامية: اشتري كمان جاجتين كبار، اولادن بحبوا الجاج كتير خاصة المشوي.
نبيل: وبالنسبة للشراب، اي نوع شراب اشتري؟
سامية: اشتري عصير بردآن وعصير تفاح، وما تشتري كولا ابدا.
نبيل: حاضر يا ستي، بدك اشتري قهوة؟
اخوكي بحب يشرب قهوة مع السيجارة بعد الغدا.
سامية: اي اي، اشتري وقية قهوة لو سمحت. كتبت كل شي؟
نبيل: اي كتبت كل شي، واذا تذكرت اي شي تاني اتصلي في عالخلوي. وهلا انا رايح، سلام.
