رحلة الى البترا
وكيل السفر : ألو، شركة البندك للسياحة والرحلات. كيف ممكن اساعدك؟
الزبونة : اتصلت عشان الاعلانات السياحية اللي حاطيتوها في جريدة يوم الأحد.
وكيل السفر: عن اي برنامج حابة تعرفي؟
الزبونة: حابة استفسر كلشي عن برنامج البترا.
وكيل السفر: أه بكل تاكيد. الرحلة بتكون يوم الاتنين. الباص بطلع من مركز باصات الجت في جبل عمان الساعة خمسة وربع الصبح.
الزبونة : وايمتا بوصل البترا؟
وكيل السفر : بوصل البترا الساعة تمنية ونص الصبح.
الزبونة : وايمتا برجع الباص من البترا؟
وكيل السفر : الرجعة بتكون يوم الاتنين من الاسبوع اللي بعده.
الزبونة : ايش اسم الأوتيل لو سمحت؟ واكمن نجمة؟
وكيل السفر: الأوتيل اسمه "فندق الموفنبيك" وهو خمس نجوم.
الزبونة: السعر بشمل الوجبات في الأوتيل؟
وكيل السفر: أيوا. السعر بشمل وجبتين: وجبة الفطور ووجبة العشا بوفيه مفتوح. الفطور بيبلش الساعة ستة ونص للساعة اتنعش إلا ربع والعشا بيبلش الساعة ستة ووربع بلمسى للساعة إحدعش وعشرة بالليل.
الزبونة: طيب في بركة سباحة في الأوتيل؟
وكيل السفر: اه طبعاً. في بركة سباحة للكبار وبركة سباحة للأطفال وجاكوزي وسونة كمان.
الزبونة: ايش برنامج البركة ؟
وكيل السفر: كل يوم في درس سباحة للكبار وللصغار من الساعة تنتين وربع للساعة تالتة ونص بعد الضهر.
الزبونة : اكتير منيح. وفي اشي تاني؟
وكيل السفر: اه. يوم الخميس والسبت في عشا ورقص في المطعم اللي عالبركة ببلش من الساعة خمسة بعد الضهر للساعة اتنعش بنص الليل. والفرئة الموسيقية بتبلش عالساعة تسعة بلليل. وطبعا الناس بتقدر تشرب ارجيلة كمان.
الزبونة: وشو في برامج ترفيهية للكبار في الاوتيل ؟
وكيل السفر: في نادي رقص كل يوم من الساعة تسعة للساعة تنتين بعد نص الليل. ومطعم مكسيكي مع فرقة موسيقية من يوم الاربعة ليوم الاحد ببلش من الساعة ستة وعشرة للساعة اتنعش بنص الليل. واخيراً في مقهى ارجيلة مفتوح كل يوم للساعة وحدة بعد نص الليل، والناس بحبو وبنبسطو في كتير كتير.
الزبونة : اكتير حلو. بدي اجي علمكتب يوم التالت عشان بدي احجز اربع تزاكر.
وكيل السفر : طيب تمام. بنشوفك يوم التلات انشالله.
