الفصل السادس وعشرين - الدرس الخامس - حوار ٤
المذيع: مساء الخير سيداتي سادتي... معانا النهارده المؤرخ الأدبي الدكتور إبراهيم علوان اللي هيكلمنا عن الأديب العملاق نجيب محفوظ... مساء الخير يا دكتور.
دكتور إبراهيم: مساء النور.
المذيع: مين هو نجيب محفوظ؟
دكتور إبراهيم: نجيب محفوظ هو روائي مصري وأول عربي حاز على جايزة نوبل في الأدب. اتولد نجيب محفوظ في ١١ ديسمبر ١٩١١ في حي الجمالية في القاهرة وكان أصغر إخواته، والفرق بينه وبين أقرب إخواته سناً كان حوالي ١٠ سنين وعشان كده اتعامل في أسرته كأنه ابن وحيد. دخل نجيب محفوظ جامعة القاهرة في ١٩٣٠ واتخرج بليسانس فلسفة، وبعد كده اشتغل في الحكومة سنة ١٩٣٨، واترقى في الوظايف حتى وصل لرئيس مجلس إدارة المؤسسة العامة للسينما في سنة ١٩٦٦، واتقاعد من الوظيفة الحكومية في ١٩٧١. نجيب محفوظ اتجوز سنة ١٩٥٢ وأنجب بنتين، لكن الحاجة الغربية إنه أخفى خبر جوازه عن الناس اللي حواليه لمدة ١٠ سنين. في ١١ أغسطس ٢٠٠٦ اتوفى نجيب محفوظ وكان عمره حوالي ٩٥ سنة. وده هو نجيب محفوظ الإنسان.
