الفصل السابع وعشرين - الدرس الأول - حوار ٢
أحمد: طيب ده هيبقى فيه مشاكل كده عند العراق وسوريا كتير؟
منى: حالياً فيه مشاكل يعني...
أحمد: زي ايه كده تقريباً؟
منى: الأرض الزراعية، فيه أراضي زراعية كتير جفّت عندهم....
أحمد: ياه!
منى: آه الميه بقت قليلة بالنسبة للنمو السكاني، عندهم نمو سكاني.
أحمد: آه طبعاً ده عندهم نمو سكاني كبير في المنطقة دي.
منى: فالميه قلت طبعا الناس... مش لاقية ميه كتير تشربها.
أحمد: أيوه صح صح.
منى: ده زائد الميه اللي بتوصلهم ميه ملوثة مليانة.
أحمد: ملوثة؟
منى: ماهو من المنشآت اللي بتبنيها تركيا بتوصلهم الميه فيها أملاح، فيها منتجات كيماوية بيبقى فيها مبيدات حشرية طبعا الأراضي الزراعية مهددة، الثروة الس...
أحمد: ده الزراعة هتبوظ كده!
منى: فيه أراضي كتير باظت والثروة السمكية كمان.
أحمد: هيحصلهم ايه الثروة السمكية؟
منى: يعني فيه شكوى إن الأسماك ماتت.
أحمد: طبعا طبعا من المواد الكيماوية الحاجات اللي بيعملواها دي، ده كده بقى الحكاية وصلت إنه هيبقى صراع ميه بين سوريا والعراق من ناحية... وتركيا.
منى: فعلاً فيه سياسيين كتير بيقولوا إن الحرب هتبقى على الميه في القرون اللي جاية.
أحمد: ربنا يستر.
مني: ربنا يستر.
