My Life - Lesson 2
بالأول رح اخبركم عن شغلي. بعدين رح اخبركم عن شغل دلال. وبدي أشوف إزا بتقدرو تحزروا شو بنشتغل أنا ودلال. وبرايكم هل بنحب شغلنا أو لا؟
أنا شغلي متعب جسديا بس مش عاطفيا. وممكن يكون كتير متعب لإني بقعد ساعات طويلة و أنا بشتغل وعشان هيك ما بحب يكون شغلي عالانترنت. بفضل إني اطلع من البيت والتقي بالناس إللي بشتغل معهم واتمش بأوقات الاستراحة وادردش مع زملائي. بس مع هيك, شغلي كتير ممتع, لإنو كل يوم وكل موضوع بختلف عن التاني. وبكيف بس تطلع معي أنسب كلمة لاسياق, وبالحقيقة, بكون شعوري كتير حلو وأنا بساعد الناس يفهمو بوضوح الحكي بالقاعة خاصة إنهم ما بيحكو نفس اللغة.
وهلأ رح اخبركم عن شغل دلال. لازم دلال تتدرج بلغتها وتغير من اسلوبها على طول, ووظيفتها مش سهلة. خاصة لما يكون عندها حصص طويلة بس بنفس الوقت شغلها في جانب إبداعي وفي عواطف لإنها بتتعامل مع الصغار والكبار. وممكن شغلها بجيب توتر لاناس اللي ما بحبو يحضروا قبل بوقت. لإنو التحضير كتير مهم عشان توصل الشغل بطريقة الها معنى وجودة. بس على عكسي, دلال بتحب تشتغل عالانترنت مع إنها برضه بتحس إنو القعدة الطويلة متعبة.
المشترك بيني أن ودلال إنو مستحيل نشتغل بمكتب. وما بنقدر نشتغل لساعات محددة ولا بوظايف بدوام كامل. وما عنا مشكلة نقبض فلوس اقل طالما ضغط الشغل علينا مش كتير.
