الجهبذ | ما هي قوانين الحماقة؟ وهل فعلاً يوجد علم الحماقة؟
نستطيع تمييز الشخص الأحمق عن طريق
مجموعة من التصرفات الواضحة
مثلاً نلاحظ أنه يثق بالناس سريعاً
وغالباً ما يدفع ثمن ذلك غالياً
معقولة يكون انصب علي؟
مع أني صار لي بعرفه لمحمود حوالي أسبوع
ليك فريد فريد
فريد
صار لي بعرفه لفريد حوالي أسبوع
هو شو قال لي
قال لي فيه مشروع ناجح
هات مصرياتك وأنا علي الشغل
ولا تدق لي أنا بدق لك
وأصلاً ما أخدت رقمه أنا
وعادة ما يميل الأحمق في نفس الوقت
إلى الحديث بغرور
معجب بنفسه
كثير الكلام عن صفاته
أنا لما بدخل لأي مكان بجذب الأنظار لإلي
كاريزما
قوة شخصية
أناقة
لباقة
بس يعني خليك عم تحاول
بدك تكون بقى فيه حنكة
فيه حلم
فيه خبرة
فيه..
ما فهمت شو بدي بهالحكي أنا
سألتك وين موقف الباص بس؟
آه
لا أنا ماني من هاي الحارة
إيه روح
ليك خليك.. تعا
لك اسمع من..
ولكن أخطر ما يمكن أن يحصل
هو أن يصل هذا الأحمق
إلى موقع المسؤولية والتأثير على الناس
إنها مصيبة
شكراً جزيلاً لإلكن
شكراً لوجودكم بالملايين
ملايين معنا هون وعلى الشاشات عم يتابعوني
جايين تنهلوا من حكمتي
تتعلموا مني
الحمقى عم يحاولوا ينالوا منا
حاولوا ينالوا مني
هدول الحمقى لكن هيهات
لا الحمقى ولا الحماقة راح يقدروا
يوصلوا لمكانتنا ولأفكارنا
نحن ماضيين بطريقنا إلى الأمام
وراح ننفذ أفكارنا
إن كان بكيفهن هدول الحمقى
وللا غصباً عنعهن راح ننفذ أفكارنا
أهلين وسهلين ومية مرحبتين
بأحبائي وحبيباتي فلذات كبدي
المتابعين والمتابعات
للأمانة يا جهبذ
أنا بعاني من حماقة
أو هبل أو عبط بعض الناس اللي حواليّ
أنا شخصياً بعاني
ليش فيه حدا هيك بيتصرف تصرف
غير عقلاني
غير منطقي
بحس حالي هيك متضايق
هل كان عبر التاريخ دائماً فيه حمقى وهبلان؟
تعبت
لأختصر عليك الطريق يا حمادة الغالي
وسعاد
حيثما كان فيه بشر يوجد حماقة
دائماً بالعادة هيك بيكون
حتى الحكماء العرب من زمان قالوا
إنه لولا الحماقة ما كان تهنى حدا بعيشته
يعني الحماقة إلها فضل عليك
حتى أنه فيه مقولة تنسب لعلي بن أبي طالب
كرم الله وجهه
بتقول
ليس من أحد إلا وفيه حمقة فيها يعيش
يعني بفضلها بيعيش
لهاي الحمقة
وهالكلام هاد بيشبه كلام الفيلسوف الهولندي
الشهير إيراسموس
يللي كتب كتاب سماه
في مدح الحماقة
In Praise of Folly
بيقول فيه
الحياة دون حماقة تعني حياة دون سعادة
يعني عدم المؤاخذة كمان بدون هيك
رشة حماقة بحياتنا ما فينا نعيش
حمادة خلينا نكون صريحين
متل الفلفل
عالأكل
بالنهاية فلنكن صريحين
كلياتنا عندنا يا نسبة صغيرة يا نسبة كبيرة
من الحمق
بس فيه ناس عندهم أعراض أقوى من غيرهم
بتعيق حياتهم بشكل أكبر يعني
والمصيبة بالموضوع أنه شبه مستحيل
نقدر ندرس نسبة الحماقة عند الناس
بالطريقة اللي بندرس فيها الشغلات التانية
بشكل علمي
ليش؟
لأنك شلون بدك تقول للزلمة تعال لقول لك
تعال
بدي أدرس قديشك أحمق
تقول له للزلمة قديش أنت أهبل بالمية علمياً
وبالرغم من كل هالحكي هاد أنه ما فينا
نعمل دراسة لنثبت الحماقة
بنلاقي عبر الزمان فلاسفة وعلماء
نفس وعلماء اجتماع وغيرهن عم يحاولوا
يدرسوا الحماقة ويشوفوا مين هو
الشخص الأحمق
ألفوا مؤلفات
حاولوا يوصفوا بشكل دقيق ويكتبوا
مواصفات الشخص الأحمق
واليوم أنا جاي يا حمادة ويا سعاد
أستعرض لكم جهود زملائي من الباحثين
والفلاسفة والعلماء في وصف الحماقة
والأشخاص الحم.. الحمقاء
الأحمقين
الحمقى
علّنا نفهم أكثر هاي الظاهرة ونصير نحكم
عليها بشكل عقلاني أكبر
الموضوع بيرجع لأيام زمان
لقدماء اليونان بالحضارة اليونانية
وصلتنا دراسات عن الحماقة والحمقى
من هديك الأيام
كانوا يحاولوا يصنفوا الناس
أنه هاد ذكي وهاد غبي بحسب شكله
ابن الجوزي ألف كتاب اسمه
تاريخ الحمقى والمغفلين
نقل فيه عن فيلسوف يوناني قديم اسمه
غالينوس
أو جالينوس
بيقول فيه إنه حجم الراس الصغير
بيدل على صغر العقل
وذكر مجموعة صفات شكلية برأيه
إذا انوجدت بشخص بيكون أحمق
وأصلاً مجموعة هالصفات الشكلية هي
لحالها حمقاء
متل مثلاً إذا الوجه مدور بيكون صاحبه جاهل
وإذا واحد صوته حلو بيكون قليل فهم
وإذا أدنه صغيرة فهاد دليل على الحماقة
بس بالمقابل ابن الجوزي أورد شغلات
بكتابه ممكن تعتبر شغالة إلى يومنا هذا
بيقول إنه مثلاً من صفات الأحمق
أنه ما بيشوف عواقب أعماله
بيوثق بناس ما بيعرفهم منيح
مغرور شايف حاله
معجب بحاله
ثرثار بيحكي كتير
يعني قد نتفق اليوم يا حمادة مع هذه الصفات
أنه تنطبق على شخص ممكن نقول له أحمق
ولحتى نفهم شخصية الأحمق أكتر
راح نستعين بصديقي الشخصي عالم
النفس الفرنسي
جون فرانسوا مارميون
يللي بيصنف نفسه كمختص بعلم الحماقة
مختص بالحماقة
بيقول عن حاله Connologue
يعني مختص بالحماقة باللغة الفرنسية
بيقول إنه الأحمق غالباً بيكون معجب بحاله كتير
مفكر حاله أفهم واحد بالدنيا
ما بيغلط
لا يرتكب الأخطاء
عم بحكي عن ناس بتعرفوهن أكيد
وكمان من أشهر محاولات دراسة هذه الظاهرة
كتاب اسمه القوانين الأساسية للغباء البشري
لكاتب اسمه كارلو إم شيبولا
إيطالي
حكى بكتابه أنه نحن بكتير أحيان بنقلل من
خطورة التعامل مع الأشخاص الأغبياء
وبندفع تمن هالشي كتير
وذكر فيه 5 قوانين منهن قانون ذهبي
في الغباء
سجلي عندك سعاد بسرعة شو هو القانون
الشخص الغبي هو شخص بيسبب خسائر
للآخرين بدون ما تجيه فائدة بل وأحياناً
بيخسر هو ذات نفسه كمان
يعني يا ريت بيخسر الناس مشان يستفيد
كمان بيخسر هو
قلت لك بيستفزوني من أول الحلقة
مو هون المصيبة يا سعاد
الموضوع مو بس أنه هنن بيخسروا
هدول الناس الحمقى والأغبياء ممكن يكونوا
بموقع قيادة
بموقع صناعة قرار
فهون نحن العلماء عم نسأل
هل أحياناً السلطة بتخلي الناس حمقى؟
وللا أحياناً الحمقى هنن بيركضوا ورا السلطة؟
أياً كان السبب نتيجة الحمقى أحياناً بمواقع
صناعة القرار ممكن يؤدي لمصائب وكوارث
وشن حروب تقتل الآلاف وتشرد مئات الآلاف
والملايين وتدمر البلاد
أو بنلاقي أوهام عند هالأحمق أنه هو متفوق
وهي أوهام غير مبررة
وبينتج عنها عنصرية وبينتج عن هاي العنصرية
سياسات ضد المهاجرين
متل السور يللي انبنى بين
الولايات المتحدة الأمريكية والمكسيك
حتى أنه بعض المختصين بيعطونا مثال
عن حماقة المسؤولين بحماقة الرئيس الأمريكي
كارتر
يللي مول بعهده برنامج لناسا أنه يبعتوا
رسائل للفضائيين بركي حدا منهم بيرد
وبيبعتوا لنا كمان
ولذلك ولخطورة الموضوع
ألف إيريك دورشميد
الكاتب والصحفي من أصل نمساوي
كتاب كامل بعنوان فرعي
How Chance and Stupidity Have
Changed History
كيف غيرت الصدفة والغباء التاريخ
ذكر فيه عدة حوادث عبر التاريخ
صارت لحماقات ما استفادوا منها شي أصحابها
متل حرب أمريكا على فيتنام
يللي خسروا فيها كتير وما ربحوا شي أبداً
بتعرف شو بيزعجني يا جهبذ؟
شو؟
أنه بحس الحماقة والهبلنة والعبط
عم يزيدوا هالأيام
ما كانت هيك الدنيا من زمان
كانوا الناس أركز
بصراحة حمادة العلماء بيقولوا إنه عصرنا
الحالي تبع وسائل التواصل الاجتماعي
هو اللي أظهر الحماقات اللي كانت موجودة
على طول عبر التاريخ
بس ما كان فيه شي يظهرها
وسائل التواصل الاجتماعي خلتها تظهر للعلن
الناس تشوفها
صار الهبل يللي كنا نعمله قدام المراية
لحالنا حمادة
فيديوهات تيكتوك
يعني منذ قديم الزمان الهبل موجود
بس كان منتظر مين يصوره
هاد عدا عن موضوع الترند يللي بيزيد العبط
والحماقة عند الناس
ليش؟
لأنه فيه ترند بسرعة بدي أعطي رأيي
بدون ما أفكر وبدون ما أحلل
بدون ما أسأل
بدون ما أقرأ
بدي أعطي رأيي قبل ما يخلص الترند بسرعة
لأنه رأيي كتير مهم أنا لازم قوله بكل شي
أحياناً بنكون ما بدنا نبذل جهد
ما بدنا نتعب حالنا ونجمع أدلة ونفكر كتير
خلص راح أعطي رأيي بالقضية الفلانية
أني مع بناءً على تحيزات عندي أنا مسبقة
بعدين ببلش بقى أجمع أدلة لحتى
أدعم موقفي
وبجمع الأدلة بس اللي بتدعم موقفي
طيب أنا مع هاي القضية فبروح بجيب
الأدلة يللي بتدعم هاي القضية
ما بجيب الأدلة التانية
اللي ما بتدعم القضية
بتنقضها
ليش؟
لأنه هدفي بيصير أني أفوز بالنقاش
بالمطلق
ما بيعود هدفي أتعلم شي جديد
ما بيعود هدفي أني أفكر بطريقة أكثر عقلانية
خلص المهم أفوز على هاد الزلمة اللي قاعد
عم يناقشني
شو ما صار
وحتى لما بنكون عم بندور على أدلة
بنجيب الأدلة يللي بتدعم موقفنا وبنترك
أي دليل مخالف
بيقول ابن الجوزي
ينبغي على الإنسان أن يتبع دليلاً
لا أن يتبع طريقاً ثم يتطلب دليلها
طيب عدم المؤاخذة
بيلتقى عندك دوا للحماقة يا جهبذ؟
إلا الحماقة أعيت من يداويها يا حمادة
معروفة
بس مع ذلك كرمال عين تكرم مرج عيون
حمادة وسعاد غاليين علينا وما بتطلعوا
من عندي من محلات الجهبذ وشركاه
إلا وأنتوا آخدين دواء للحماقة
ابن الجوزي بيقول إنه ممكن الفقير يكسب مال
ويصير غني
بس مو ممكن الأحمق يكسب عقل
ويصير حكيم
وهالشي بيشبه كمان اللي قاله الفيلسوف
الهولندي إيراسموس نفسه يللي بيقول
الرجل الأحمق ما بيتغير بيشبه الشمس
الأصمعي شو بيقول
بيقول إذا أردت أن تعرف عقل الرجل
فحدثه بحديث لا أصل له
فإن رأيته أصغى إليه وقبله
فاعلم أنه أحمق
وإن أنكره فهو عاقل
بسيطة حمادة سهلة
اعرض عليه حديث
أنكره وقبله
وكأنه الأصمعي عم يقول لنا إنه الأحمق
ما عنده تفكير ناقد
Critical Thinking
التفكير النقدي هي مهارة
فينا نطورها ونزودها
وهي نفسها اللي بنتبعها بكتابة حلقات
الجهبذ هون
أنا بجي بحاكيكم بتفكير نقدي
حمادة وسعاد
حتى بالمدارس لازم الأولاد من صغرهن
يتعلموا طرق التفكير النقدي
متل ما بيتعلموا القراءة والكتابة تماماً
لحتى يتعلموا كيف يجيبوا حجج مقنعة
ويحاكموا مصدر المعلومة إذا ثقة وللا لا
وبالأخير يوصلوا لاستنتاجات صح
بس بصراحة وما راح أخبي عليكم
حتى إذا قدرنا نعلم كل الأطفال التفكير الناقد
ما راح نقدر نقضي على الحماقة
بنقدر نخففها بس
لأنه رح يضل فيه عالم بيكونوا تعلموا
هاي المهارات
بس قرروا أنه ما يستعملوها بحياتهم
بل نحن أحياناً بنقرر قرار واعي عن سابق
إصرار وتصميم أنه نتصرف بحماقة
مو بالضرورة بسبب نقص الذكاء أو الجهل
أحياناً بسبب الغرور والمكابرة
بيعرف أنه كلامك صح
بس بده يعمل عكسه
وأحياناً ممكن نعمل حماقة لدوافع نبيلة
متل ما بيقول عالم الاجتماع الفرنسي
جون فرانسوا دورتير
يعني فيه ناس بيقرروا يقاوموا ويوقفوا
بوجه قوة أكبر منهم بكتير
ناس تانيين بيقولوا عنهم أنتوا حمقى
شو هاد اللي عم تعملوه؟
بس بالحقيقة ممكن تكون دوافعهم نبيلة
شجعان
فما فينا نحكم عليها دائماً أنه غباء أو حماقة
بالنهاية وهاد كلام كتير حساس وكتير مهم إلكن
يا حمادة ويا سعاد
والعلماء والفلاسفة بيقولوا إنه نحن بنميل
لنطلق صفة أحمق على أي حدا ما بيشبهنا
هاد ما بيشبهنا فهو أجدب
أحمق
سبحان الله نفس التصرف هو هو
إذا حدا غيرنا عمله بنقول ليك شو أجدب
أحمق هاد شو هالهبل هاد
وإذا نحن عملناه بنلاقي له مبررات
إيه أنا عملت هيك لأنه كيت
كنت مضطر
بس هيك هلأ بكرة بتشوف نتيجة أفعالي
راح تكون أفضل بكتير
وأنا أحسن وذكي جداً ما شاء الله
هالشي هاد بيسموه بالانحياز للمصلحة الذاتية
Self-serving Bias
يعني بنطلع الأعذار لحالنا نحن وبس
وغيرنا ما بنعذره
والمشكلة أنه هاي الحماقة بالذات هي أكثر
حماقة ما بننتبه لها وهي أكتر حماقة بتؤذينا
أكتر من حماقة الآخرين
هي حماقتنا مع أنفسنا
حماقتنا اللي بتخلينا نضيع الفرص ونخسر
اللي بيحبونا وندمر حياتنا
بس نحن دائماً بندور على غيرنا
لنحمله المسؤولية
أنه هو مو نحن
أنا عم أنصحكم يا حمادة ويا سعاد
بدال ما تقعدوا تراقبوا الناس
وتقولوا ليكن هدنك شو عملوا حماقات
وليكن هدنك شو هبل
وشو غلطوا وشو ساووا
انتبه على حالك واستثمر وقتك بنفسك
وتذكر أنت شو عامل حماقات يا حمادة
شو صار معكم مواقف حماقة شخصية
أو حماقات من الآخرين؟
جاوبوني على هاد السؤال بالتعليقات
وإذا حبيتوا الحلقة أعطونا لايك إعجاب
واشتركوا بالقناة وفعلوا زر الجرس
وشوفوا الحلقات السابقة
وانتظروا الحلقات القادمة
سلام
