28.3 Pagbabasa - Ang Lalaking Nakaputi
Nakasuot ng puti ang lalaking naka-upo sa loob ng eroplano. Maiksi ang buhok niya at may salamin siya sa mata. Mayroon siyang hawak na bag.
Galing ng Hong Kong ang lalaki. Bago pumunta ng Hong Kong, nakatira ang lalaki sa Newton, Massachussetts dahil mayroon siyang “fellowships” sa Harvard University at Massachussetts Institute of Technology. Doon, nagbigay ng mga lektyur at sumulat ng mga libro ang lalaki. Dating bilanggong pulitikal o “political prisoner” ang lalaki dahil kalaban niya sa pulitika ang Pangulo.
Pauwi na ang lalaki sa kanyang bayan. Maraming tao sa airport para sunduin siya. Nakasuot ang marami sa kanila ng mga damit na kulay dilaw. Nagsabit din sila ng mga dilaw na ribbon. Inspirasyon nila para dito ang kantang “Tie a Yellow Ribbon”.
Lumapag sa paliparan ng Maynila ang eroplano. Tumayo ang lalaki para lumabas ng eroplano. Pababa na ng eroplano ang lalaki nang may biglang pumutok na baril.
Bumagsak ang lalaki.
Sa kanyang passport, nakasulat ang pangalang “Marcial Bonifacio”. Ninoy Aquino ang tunay niyang pangalan.
- Tanong -
1) Ano ang suot ng lalaking naka-upo sa eroplano?
2) Saan galing ang lalaki?
3) Bakit tumira ang lalaki sa Massachusetts?
4) Ano ang mga ginawa ng lalaki sa Massachusetts?
5) Ano ang suot ng mga tao sa airport na sumundo sa lalaki?
6) Ano ang nangyari sa lalaki nang pababa siya sa eroplano?
7) Ano ang nakasulat na pangalan sa passport ng lalaki?
8) Ano ang tunay niyang pangalan?