26.2 Pagbabasa - Paglalakbay
Bawat pagsinta'y paglalakbay. [=pagsinta ay]
Paglalayag sa malawak na dagat,
Pag-akyat sa pinakatuktok ng bundok.
-
Sumasakay ka sa pag-asa,
Humahawak sa pananalig.
Bawat pagsinta'y paglalakbay.
-
Tandaan.
Huwag kaybagal at baka may hindi maabutan.
Huwag kaybilis at baka may malampasan.
-
Sa gitna nitong paglalakbay,
Saglit na tumigil.
Punasan ang noo,
Hagurin ang talampakan.
Kumustahin ang sarili,
Na minsa'y nakakalimutan sa gilid ng daan. [minsan]
-
Huwag hayaang mapagod ang puso
Sa bawat paglalakbay.
Ngunit huwag,
Huwag ring magpapigil sa pangamba
Kahit ang paroroona'y di tiyak. [paroroonan]
-
Walang huling biyahe sa mangingibig
Na handang maglakbay
Nang may pananalig.
-
- Tanong -
1) Sa anong mga imahe ihinahambing ang paglalakbay?
2) Bakit hindi dapat mabagal ang paglalakbay?
3) Bakit hindi dapat mabilis ang paglalakbay?
4) Ano ang dapat gawin sa gitna ng paglalakbay?
5) Ano ang dapat mayroon ang mangingibig sa paglalakbay?