前 文 再續 啊 書 接上 一回 啊 。
話説 韋小寶 出咗 皇宮 ，只見 康親王 傑書 、李偉 、明珠 、索額圖 、勒德洪 、杜立德 、馮溥 、圖海 、王熙 、黃機 、吳正治 、宋德宜 ，等 滿漢 大臣 ，都 喺 宮門 外 便 等候 。
佢哋 紛紛 上前 道喜 ，擁住 佢 去 銅帽子胡同 。
去到喇 ，只見 一座 宏偉 嘅 府第 聳立 當地 ，比起 以前 嘅 伯爵 府 啊 更加 大咗 好多 。
大門 上 便 ，一塊 朱漆 嘅 匾額 ，乃係 空 框框 一個 字 都 冇 嘅 。
雖然 ， 韋小寶 識得 嘅 字 呢 西瓜 咁 大都 唔 夠 一擔 啊 ， 但 係 匾額 上面 有字 冇 字 ， 終歸 係 分得出 㗎 所以 不禁 愕然 喇 。
康親王 笑住 話 ：韋兄弟 ，皇上 對 你 嘅 恩澤 真係 天高地厚 嘞 。
嗰 一年 你 伯爵府 失火 焚毀 ，你 又 唔 喺 北京 ，皇上 知道 之後 ，就 派 我 同 你 另外 起 一座 府第 。
聖旨 裏 便 就 冇 吩咐 幾多 錢 嘅 ，只係 話 所有 費用 去 內庫 具 領 噉 。
呢座 府第 係 皇上 賞畀 你 嘅 ，阿哥 就 何必 同 皇上 慳 錢 唧 ？
梗係 鬆手啲 啦嘛 ，兄弟 ，你 睇下 ，合唔合 你 心水 啊 ？
講完 ， 捋 下 捋 下 鬍鬚 微微 笑 。
韋小寶 連忙 多謝 。
由大門入去 ，果然 係 美輪美奐 ，同 康親王府 亦 爭唔得 幾多 唧 。
班 官員 一味 稱讚 個個 都 非常 羨慕 啊 。
康親王 話 ：呢座 府第 ，起 好好耐 㗎喇 ，一直 等 兄弟 你 嚟 住 。
只係唔知道 皇上 點樣 加恩 ，要 封 你 咩嘢 官爵 ，因此 府上 嗰 塊 匾額 就 空住 冇 寫 啫 嘛 。
鹿鼎公府 呢 四個字 ，就 請 我哋 嘅 李 大學士 大筆一揮 啦 。
李偉 係 保和殿 大學士 ，兼 戶部尚書 ，喺 各 大學士 之 中 ，資歷 係 最 深 。
佢 亦 唔 推辭 喇 ，就 寫咗 鹿鼎公府 四個 大字 。
噉 自然 有人 搦 咗 去 叫 工匠 鑄成 金字 ，鑲 喺 匾 上 呢啲 就 唔 講 佢 嘞 。
當晚 ，鹿鼎公府 內 大排筵席 ，款待 嚟到 賀喜 嘅 親貴 大臣 。
鄭克塽 、馮錫范 等 台灣 投降 嘅 人 呢 ，亦都 送咗 禮 嚟 ，不過 就 冇 親身 到嚟 道賀 喇 。
送走賓客之後 呢 ，韋小寶 又 開 家宴 嘞噃 ，七位 夫人 把盞 慶賀 。
噉韋小寶 講起 要 帶 雙兒 跟埋 自己 北征 ，噉 其餘 嗰 六位 夫人 ，一齊 唔肯 啦 話 佢 太過 偏心 喇噉 。
韋小寶啊 只有 花言巧語 ，話 係 皇上 降旨 ，知道 雙兒 去過 羅剎國 ，識 講 羅剎話 ，所以 派 佢 隨軍 效力 啫噉 。
噉 六位 夫人 都 冇得 講 啦 。
好在 雙兒 為人 温柔 謙和 ，同 六位 夫人 個個 情誼 極好 ，噉 大家 呢 ，都 冇 妒忌 佢 。
第日 ，韋小寶 叫 雙兒 攞出 鄭克塽 當年 喺 通食島 上 用 血 寫 嘅 借據 出嚟 ，噉 請 咗 多隆 嚟 ，將 借據 交畀 佢 。
多隆 好 歡喜 噉 話 ：有 親筆 借據 喺度 呀 ，佢 係 石頭 都 要 榨出 油 嚟 啊 。
鄭克塽 嗰個 嘢 如果 膽敢 賴債 唔還 ，我哋 御前侍衞 同 驍騎營 ，亦 唔使 喺 北京城 撈 咯 。
話説喺 以後 幾日 之中 ，康熙 啊 連氣 宣召 韋小寶 入 宮 ，畀 咗 佢 一 張 好大 嘅 地圖 。
噉 啊 點樣 進軍 ， 點樣 打仗 ， 點樣 圍城 ， 點樣 打援 ， 逐樣 逐樣 詳細 指示 ， 用 朱 筆 喺 地圖 上 便 分別 寫 清楚 。
韋小寶 話 ：呢一仗 啊 ，係 皇上 親自 帶兵 打 嘅 。
奴才 咩嘢 都 唔敢 自作主張 ，總之 係 遵照 皇上 嘅 吩咐 辦事 就係 喇 。
否則 ，就算 打咗 勝仗 ，皇上 都 唔 歡喜 嘅 。
康熙 微微 笑岌 下頭 ，韋小寶 呢 一番 説話 啱晒 佢 心水 。
佢 細時 學咗 武藝 ，冇法子 施展 ，噉啊 只有 同 韋小寶 打交 嚟 玩 ；
以後 不斷 派遣 韋小寶 出外 辦事 ，喺 佢 內心 裏 便 啊 ，都係 要 韋小寶 作為 自己 替身 嘅 意思 嘅 。
韋小寶 年紀 啊 細過 自己 ， 武功 智謀 、 學問 見識 ， 冇 一樣 及 得 自己 嘅 ， 噉 韋小寶 能夠 做 得 成功 ， 自己 當然 更加 游刃 有餘 啦 。
所以 喺 派遣 韋小寶 辦事 之中 啊 ，內心 得到 咗 滿足 。
當年 吳三桂 造反 ， 吳三桂 係 身經百戰 嘅 猛將 ， 非同小可 ， 必須 用 大臣 猛將 嚟 對付 。
如果 畀 韋小寶 領兵 ，必敗 無疑 啊 。
呢一仗 打咗 幾年 ，康熙 雖然 冇 上 前線 ，但係 每一場 戰役 ，都 問得 好 詳細 。
其中 利弊 得失 ，樣樣 都 了如 指掌 ，喺 實戰 之中 就 學會 咗 兵法 嘞 。
而家 同 羅剎國 開戰 ，事 無 巨細 啊 ，都 已經 籌劃 妥善 ，大軍 未 出 都門 ，就 已經 料到 呢場 戰爭 實 贏 嘅 。
比起 當年 對付 吳三桂 嗰陣 戰戰兢兢 ，真係 不可 同日而語 嘞 。
韋小寶 出征 在即 ，唔敢 再 去 見 天地會 兄弟 喇 ，佢 諗 ：
皇上 唔 叫 我 去 滅 天地會 ，係 佢 向 我 投降 ，已經 啊 畀 足 面 過 我 喇 。
我 如果 唔識趣 ，又 去 同 李力世 、徐天川 佢哋 聚會 ，你 話 畀 皇上 知道 咗 啊 ，又 嚟 舊事 重提 ，噉 我 韋小寶 豈 不是 搬石頭 嚟 𢱕 自己 隻 腳 ？笨 到 無比 啦 。
噉欽天監啊擇咗個黃道吉日 ，大軍北征 。
呢一日 ，康熙 喺 太和門 賜宴 。
宴會 之後 ，康熙 親自 送出 午門 。
撫遠 大將軍 鹿鼎公 韋小寶 ，同埋 眾官 啊 跪請 回駕 ，然後 水陸 大軍 ，起程 北征 嘞 。
韋小寶 奉 皇帝 之 命 辦事 ，從來 都 冇 呢次 咁 威 嘅 ，個 心 嗰種 得意法 啊 ，都 唔使 講 嘞 。
佢 知道 呢 一次 事關 重大 ，喺 軍隊 裏 便 ，居然 唔敢 開 賭 噃 。
喺 無聊 嘅 時候 ，亦 不過 請 幾 名 大將 嚟 擲下 骰仔 ，輸咗 呢 飲酒 而已 唧 。
呢一日 ，大軍 出 山海關 ，向 北 啊 直 去 遼東 。
呢度 係 韋小寶 舊遊 之 地 啊 ，只係 當年 同 雙兒 喺 森林 裏 便 捉 鹿 嚟 食 ，東躲西藏 狼狽不堪 ，又 邊度 有 今日 出關 北征 嘅 威風 呢 ？
當其時 ，秋高氣爽 晴空萬里 ，噉啊 大軍 越行越北 ，朔風 啊 漸漸 強烈嘞 。
呢一日 ，離開 雅克薩城 仲有 百幾里 ，前鋒 何佑 啊 嚟到 大營 稟報 話 ：
斥堠兵 ，即係 偵察兵 ，聽見 當地 百姓 話 ，羅剎兵 四出 擾民 ，殺人 放火 姦淫 擄掠 ，無惡不作 。
每 過 十零 日 呢 就 嚟 一次 ，預料 再 過 幾 日 ，又 會 出嚟 劫掠 喇 噉 。
韋小寶 早啊 得到 康熙 指示 機宜 ，就 吩咐 大軍 就地 扎營 ，命令 何佑 率領 十個 百人隊 ，喺 離 雅克薩城 三十里 之外 分頭 埋伏 。
如果 羅剎軍 大隊 嚟到 ，就 唔好 出嚟 ，唔同 佢哋 打 ；
遇到 小隊 敵軍 ， 就 殺 咗 佢 哋 ， 或者 捉 咗 佢 哋 ，冚𠾴唥 殲滅 ， 一個 都 唔 准放 翻入 城 。
噉 何佑 得到 命令 就 去 喇 。
過 咗 幾日 ， 呢 日 上午 ， 隱隱約約 聽見 遠處 有 火槍 轟擊 嘅 聲音 ， 此起彼伏 ， 好 耐 都 冇 停 。
估計 先鋒 呢 ，已經 喺度 同 羅剎兵 交戰 嘞 。
到咗 下午 ，何佑 派 人 嚟 到 大營 報捷 ，話 殲滅 羅剎兵 二十五 人 ，俘虜 十二 人 。
韋小寶 得到 報告 ，歡喜 到 極 。
傍晚 時分 ，前鋒 將 所俘虜 嗰 十二 名 羅剎 兵 啊 送 到嚟 大營 嘞 。
韋小寶 升帳 啊 親自 審問 。
嗰 十二 名 羅剎 兵 聽見 韋小寶 居然 會 講 羅剎話 ，非常 驚奇 。
但係 人人 都 十分 倔強 ，話 係 中咗 埋伏 唧 ，清兵 人 多 ，贏得 毫不 光彩 噉 。
韋小寶 可惱嘢 啦 ，叫 兩名 羅剎兵 出嚟 ，然後 喺 自己 嘅 袋 處 扲出 兩粒 骰仔 ，佢 話 ：你哋 兩個 擲 骰仔 。
擲骰仔 呢 ，西洋 古時 就 有 嘞 。
喺 埃及 古墓 裏 便所 發掘出嚟 嘅 ，同 中國 骰仔 毫無 分別 。
羅剎兵 呢 ，亦都 係 玩慣咗 嘅 。
兩名 羅剎兵 都 好 愕然 ，唔知 呢個 清兵 嘅 少年 將軍 搞 咩 花樣 ，噉 就 聽 佢 話 擲 骰仔 啦 。
兩粒骰仔 ，一個 擲咗 七點 ，一個 擲咗 五點 。
韋小寶 指住 嗰個 擲咗 五點 嘅 羅剎兵 話 ：你 輸 喇 ，死 蠻基 ！
羅剎話 裏頭 死蠻基 係 死亡 嘅 意思 。
佢 轉頭 吩咐 親兵 話 ：拉 出去 殺 嘞 。
噉 四 名 親兵 就 將 嗰個 羅剎兵 押 到 帳口 ，一刀 殺死 ，呈上 首級 。
剩低 嗰 十一名 羅剎兵 一見 ，個個 面色 都 變晒 。
韋小寶 指住 另外 兩名 羅剎兵 話 ：你哋 兩個 都 嚟 擲骰仔 。
嗰 兩 名 啊 邊度 仲 肯 擲 吖 ？不約而同 噉 話 ：我 唔 擲 。
韋小寶話 ：好 ，你哋 唔使 擲 。
對親兵話 ：兩個 都 拉出去 殺 ！
一陣間 又 殺咗 兩個 人 。
韋小寶 又 指住 兩名 羅剎兵 話 ：你哋 兩個 嚟 擲 。
嗰 兩個 人 知道 如果 唔 擲 呢 ，即刻 就 要 死 嘞 ，擲 一手 骰仔 都 仲 有 一半 逃生 嘅 機會 吖 。
噉 一個人 呢 慌到 手揗腳震 攞起 骰仔 ，正話 想 擲 嘅 時候 ，另一名 羅剎兵 伸手 搶 咗 過去 ，對 韋小寶 話 ：我 同 你 擲 。
神情 極之 傲慢 。
韋小寶 笑住 話 ：好吖 ，你 竟然 膽敢 向 我 挑戰 ，你 擲 先 。
嗰個 兵 擲咗 個 七點 ，韋小寶 卻 係 擲咗 個 十點 ，噉 啊 笑住 問 佢 ：點啊 ？
嗰個 兵 神情 淒慘 佢 話 ：
我 運氣 唔好 ，冇 咩 好 講 嘞 。
韋小寶 話 ： 你 嚟 到 我 哋 中國 ， 殺過 幾多 中國 人 啊 ？
個兵 昂昂然 噉 話 ：唔記得喇 ，至少 亦 有 十七八個 ，你 殺咗 我 啦 ，我 橫掂 都 唔使 蝕底 。
韋小寶 吩咐 將 佢 殺 咗 ， 又 指住 另一名 羅剎 兵話 ： 你 嚟 擲 。
嗰個 兵 攞住 骰仔 ，隻 手 一味 咁 震 。
噉 兩粒 骰仔 一 先 一 後 ，跌 喺 枱面 ，哈 ，竟然 係 十一點 ，贏面 啊 已經 好 大 嘞 。
韋小寶 啊 想 出術 擲 個 十二點 ， 點 知道 疏於 練習 手法 唔 靈啊 ， 兩粒 骰 仔 嘅 六點 呢 唔 係 向上 ， 而 係 一齊 向下 ， 變成 只有 兩點 。
佢 打咗 個 突 ，就 哈哈大笑 話 ：嘿嘿嘿嘿 ，我 贏 喇 ！
個兵 連忙 話 ：我 係 十一點 ，你 只有 兩點 ，點解 係 你 贏 啊 ？
呢次 係 點 小 嘅 贏 ，點 大 嘅 輸 。
個 兵 唔 服 啦 ：梗係 點 大 嘅 贏 㗎 ，我 羅剎人 向來 規矩 係 噉樣 嘅 。
呢度 係 中國 嘅 地方 ，定係 羅剎 嘅 地方 啊 ？
係 ，係 ，係 中國 地方 。
既然 係 中國 嘅 地方 ，當然 係 照 中國 規矩 ，邊個 叫 你 嚟到 中國 啊 ？
呢 ，下次 我 去 羅剎 地方 嘅 時候 ，再 同 你 擲骰仔 就 照 羅剎 規矩 嘞 。
你 死 蠻基 ！
轉頭 對 親兵 話 ：拉 出去 ，殺 ！
佢 又 叫咗 一 名 羅剎兵 出嚟 。
吖 嗰個 兵 啊 幾 精細 噃 ，佢 要 問 明白 先 佢 話 ：
按照 中國 規矩 ， 呢 一次 係 點 大 嘅 贏 呢 ， 定 係 點 小 嘅 贏 啊 ？
韋小寶 話 ：按照 中國 規矩 ，係 中國人 贏 。
中國 人 嘅 點 大 ， 就算 大 嘅 贏 ， 中國 人點 小 喇 ， 就算 小 嘅 贏 。
個兵 好氣憤 噉 話 ：你 咁 蠻 嘅 ，一啲 都 唔 講道理 。
韋小寶話 ：你哋 羅剎兵 嚟到 中國 ，殺人 搶劫 ，唔係 我哋 中國人 去 羅剎 殺人 搶劫 噃 。
到底係 羅剎人 蠻 呢 定係 中國人 蠻 啊 ？
嗰個 兵 冇 聲 出 喇 。
韋小寶 話 ：快啲 擲 ，快啲擲 。
嗰個 兵 話 ：橫掂 都係 我 輸 嘞 仲 擲 咩 啊 ？
韋小寶 話 ： 唔 擲 呀 ？ 死蠻 基 ， 死蠻 基 ！ 又 殺 埋 佢 。
佢 再 叫 一 名 羅剎兵 出嚟 。
嗰個 兵 身材 魁梧 ，滿面 鬍鬚 ，佢 大聲 話 ：
中國僆仔 ，你 唔使 玩 鬼花樣 嘞 ，爽爽快快 將 我 殺咗 就係 喇 。
呢一次 你哋 恃住 人多 ，埋伏 喺 雪地 處 ，突然間 湧出嚟 ，贏咗 都 唔算 光彩 。
我哋 羅剎國 大兵 嚟到 ，將 你哋 一個 二個 都 殺晒 。
韋小寶 話 ： 吖 ， 你 畀 我 哋 捉住 ， 輸得 唔 服 係 唔 係 啊 ？
梗係 唔服 啦 。
如果 我哋 人數 一樣 ，面對面 噉 交鋒 打仗 ，你哋 就 一定 贏 喇 係 唔係 啊 ？
噉啊 當然 啦 。
我哋 羅剎人 一個 打得贏 五個 中國人 ，否則 ，我哋 亦 唔到 中國 嚟 嘞 。
我 同 你 輸 賭 吖 ，你哋 派 五 個 人 出嚟 同 我 打 。
你哋 贏咗 ，就 殺 我 個 頭 ，如果 係 我 贏 ，即刻 放咗 我 。
呢個人 ，係 羅剎 軍隊 裏 便 嘅 著名 勇士 ，天生 神力 。
眼見 韋小寶 帳 內 嘅 將軍 親兵 ，個個 都 比 自己 至少 矮 一個 頭 ，以 一 敵 五 ，自己 贏 嘅 機會 ，亦 係 好高 㗎 。
雙兒 一直 坐喺 一便 ，呢陣時 聽見 佢 言語 傲慢 就 話 ：
羅剎人 ，冇用 。中國 女人 ，亦 打贏 你 。
講完喇 行過嚟 ，企 喺 韋小寶 身邊 。
嗰個 兵 見 佢 身材 纖小 ，相貌 美麗 ，忍唔住 笑起上嚟 佢 話 ：你 要 同 我 比武 啊 ？
韋小寶 吩咐 親兵 ，割斷 綁住 佢 雙手 嘅 繩索 ，又 對 雙兒 話 ：
雙兒啊 ，等 佢 見識 下 我哋 中國 女人 嘅 厲害 。
嗰個 兵 話 ：中國 女人 ，會 講 羅剎話 ，好好 ，好好 ！
雙兒 嘅 羅剎 話 比起 韋小寶 差得 好 遠 ，講起 上嚟 詞不達意 ，就 唔 想 同 佢 講 咁多 。
左手 揮出 ，向 佢 塊 面 上 虛晃 一掌 。
嗰個 兵 急忙 昂高 個 頭 伸手 嚟 格 。
雙兒 右腿 飛出 ，啪 一聲 ，踢中 佢 嘅 小腹 。
嗰個 兵 痛嘞 ，大哮 一 聲 ，雙拳 連發 。
佢 係 羅剎國 嘅 拳擊 好手 ，出拳 迅速 ，沉重 有力 。
雙兒 睇見 佢 咁 厲害 唄 ，一閃身 ，跳到 佢 背後 一招 左右逢源 啪啪 兩聲 ，喺 佢 左右 腰眼 各 踢 一腳 。
嗰兵啊 痛到 踎低 大叫 話 ：你 用 腳 ，犯規 ，犯規 ！
原來 羅剎人 比 拳 啊 ，規定 唔准 出腳 嘅 。
韋小寶 笑住 話 ：嘿嘿 ，呢度 係 中國 地方 ，打交 亦 係 講 中國 規矩 嘅 。
雙兒話 ：羅剎 嘅 ，我 亦 贏 。
一閃身 ，又 轉到 嗰個 兵 嘅 前便 ，右拳 向 佢 小腹 打過去 。
嗰個 兵 伸手 擋 格 。
雙兒 呢 一拳 呢乃 係 虛招 ，唔 等 佢 擋到 嚟 ，右拳 縮 翻轉頭 ，左拳 已經 打到 佢 心口 嘞 。
嗰兵 又 伸手 嚟 格 咯噃 。
雙兒 左 一拳 右 一拳 ，連發 十二 拳 ，拳拳 都係 虛招 。
呢啲 招數啊 ，喺 中國 武術 裏 便 有 個 名堂 ，叫做 海市蜃樓 ，意思 即係 話 都 係 虛幻 嘅 。
因為 每一招 又 唔 打到 實 ，又 唔 打到 盡 ，當然 係 比 平常 拳法 啊 快咗 幾倍 啦 。
嗰個 兵 連 擋 幾下 都 擋 個 空 ，就 哈哈大笑話 ：哈哈哈哈 ，女仔 打拳 ，唔中用 。
一句 説話 都 未 講完 唧 ，啪啪 兩聲 ，左右 兩邊 面珠 ，捱咗 兩 巴嘞 。
個兵 大聲 叫喊 ，雙手 直上直下 猛攻 過嚟 。
雙兒 側身 避開 ， 右手 食指 忽然 督 出去 ， 點中 嗰 個 兵 嘅 右 便 太陽穴 。
嗰個 兵 即時 暈咗 一下 ，岌咗 兩 岌 。
雙兒 跳起身嚟 ，手掌 斬落去 ，打中 嗰個 兵 後腦 嘅 玉枕穴 。
呢個 係 人身 大穴 ，嗰 兵 雖然 係 粗壯 啊 ，都 支持 唔住 嘞啪聲 跌低 ，就 再 躝唔起 身 。
韋小寶 歡喜 到 乜嘢 噉 ，拖住 雙兒 隻 手 ，喺 個 兵 嘅 頭殼 踢咗 一 腳 ，問 佢 話 ：你 服唔服 啊 ？
個 兵 迷迷懵懵 噉 話 ：中國 女人 ，使 妖法 ，係 女巫 。
韋小寶 鬧 佢 話 ：臭豬 ！咩 妖法 啊 ？拉 出去 殺頭 ！
你哋 呢啲 羅剎兵 ，邊個 唔服 嘅 ，再 嚟 比武 。
剩 低 嗰 五名 羅剎 兵 啊 大家 你 睇 我 我 睇 你 ， 眼見 呢 個 大力士 都 已經 輸 咗 咯 ， 自己 更加 唔 係 對手 啦 ， 邊個 都 唔 敢講 説 話 喇 。
韋小寶 話 ：你哋 認輸 投降 ，就 放生 你哋 唔 殺 。
否則 就 嚟 同 我 擲 骰仔 啦 ， 大家 按照 中國 規矩 ， 贏得 我 嘅 就 生 ， 輸 咗 嘅 就 死 蠻 基 。
講完 右手 一揮 ，做個 斬頭 嘅 手勢 。
五個 兵 都 諗 嘞 ： 按照 中國 規矩 ， 唔 理擲 出 咩 嘢 點數 都 係 你贏 㗎 啦 。
噉就 有 個 兵 躬身 話 ：投降 啊 。
韋小寶 好 歡喜 ，佢 話 ：好極喇 ！攞 酒肉 嚟 ，賞畀 佢 食 。
噉啊 親兵 去 後帳 攞咗 一大碗 酒 、一大碗 肉 出嚟 ，噉 同 嗰個 兵 鬆咗 綁 ，等 佢 飲酒 食肉 。
羅剎國 啊 氣候 嚴寒 ，人人 都 好酒 嘅 。
韋小寶 啊 雖然 唔 鐘意 飲 ， 但 係 軍隊 裏 便 呢 ， 所 準備 嘅 都 係 極品 高粱 ， 一捧出 嚟 呀 就 滿帳 皆 香 啊 。
其餘 嗰 四名 羅剎兵 一 聞到 酒香 ，早就 流晒 口水 嘞 ；
見到 嗰 個 兵 飲 到 眉開眼笑 ， 直情 心 都 痕 晒 ， 一個個 話 ： 投降 ， 投降 ， 要 飲酒 。
韋小寶 吩咐 將 四個 兵 鬆綁 ，噉啊 叫 親兵 攞 咗 四份 酒肉 分 畀 佢哋 食 。
羅剎兵 飲完酒 之後 ，仲 未夠喉 啊 ，韋小寶 吩咐 各人 再 賞 一份 。
五個 羅剎兵 啊 飲到 醉醺醺 ，手拉手 唱起 歌嚟 。
唱咗 一陣 嘞 ，想到 死裏逃生 之後 ，居然 仲有 得 大飲大食 ，都 向 韋小寶 躬身 多謝 。
噉 以後 幾日 啊 ，先鋒 何佑 不斷 解嚟 俘虜 嘅 羅剎兵 ，多則 十六七 名 少則 一 兩 名 。
呢啲 俘虜 同 最先 投降 嗰 五 名 見過 面 傾偈 之後 ，知道 如果 同 大清 將軍 擲骰仔 呢 就 必死 無疑 嘅 ；
投降咗 呢 ，就 有 酒肉 款待 ，於是 人人 都 投降嘞 。
呢啲 羅剎兵 ，本來 都係 亡命無賴 ，唔係 小偷盜賊 ，就係 被判流刑 嘅 罪犯 ，十之八九 係 無惡不作 嘅 壞蛋 。
初時 ，殺害 中國 平民 係 十分 順利 ，都 鄙視 華人 嘅 。
所以 雖然 被俘虜 啊 ，仍然 傲慢自大 。
直到 韋小寶 斬咗 幾個 兵 ，樹立 威嚴 ，噉 其餘 嘅 呢 先至 知道 厲害 。
呢 啲 人 欺善怕惡 ， 睇 見 對方 仲蠻 仲惡過 自己 ， 就 只好 乖乖 噉 投降 嘞 。
當其時 ，總督 高里津 呢 ，已經 奉咗 蘇菲亞 公主 之 命 返去 莫斯科 升任 高職 。
雅克薩 嘅 統兵 大將 叫做 圖爾布青 啊 。
羅剎兵小隊 出外 劫掠 ，噉啊 連氣 幾日 都 不知 所蹤 。
圖爾布 青 啊 派 人 探聽 ，始終 啊 唔見 返嚟 報告 ，嗯 ，知道 唔妥 喇 。
就點 起 城中 一半 兵馬 ， 總共 二千 幾人 ， 親自 率領 ， 出 嚟 睇 下 究竟 係 咩 嘢 事 嘞 喎 。
各位 ，欲知 後事 如何 ，且 聽 下回 分解 。
