前文 再續 啊 書 接 上 一回 。
話說 洪教主 擰轉頭 望住 殷錦 ，雙眼 呢 閃住 冷酷 嘅 光芒 。
殷錦 吃咗 一驚 ，又 退咗 一步 ，佢 話 ：
教主 ，佢 ，佢哋 五個人 圖謀不軌 ，應該 一齊 殺咗 佢哋 啊 。
洪教主 話 ：先頭 你 講 乜嘢 話 ？
殷錦 見 佢 神色 不善 ，更加 害怕 喇 。
佢 聲 震震 噉 話 ： 屬下 ， 忠 ， 忠於 教主 ， 同 呢 啲 反賊 勢 ， 誒 勢不兩立 啊 。
我哋 當日 立過 重誓 ，如果 重提 舊事 ，追究 舊賬 ，噉 就 點樣啊 ？
殷錦 嚇到 魂魄 都 唔齊 啊 佢 話 ：
誒 ， 教 ， 教主 開恩 ， 屬下 不過 係 一片 忠心 ， 冇 ， 冇 第樣 意思 嘅 。
當日 ，我 同 夫人 曾經 起過 誓 ，如果 個 心 記住 舊怨 ，就 身 入 龍潭 ，畀 萬 蛇 咬死 。
呢 件 事 早就 一筆勾銷 ， 人人 都 已經 唔 記得 晒 㗎 嘞 ， 就 係 你 ， 仲 念念不忘 ， 一有 機會 ， 就 嚟 挑撥離間 ， 到底 係 乜嘢 用意 啊 ？ 有 乜嘢 居心 啊 ？
殷錦塊面 呢 已經 毫無 血色 喇 ，雙腳 一攣 ，即刻 跪低 佢 話 ：誒 屬下 知錯 喇 ，以後 永遠 都 唔敢 再 提 喇 。
洪教主 話 ：本教 嘅 人 起過 嘅 毒誓 ，點 可以 隨便 違犯 㗎 ？
呢個 誓 ，如果 唔 應 喺 你 身上 ，就 會 應 喺 我 身上 。
你話 應該 係 你 身 入 龍潭 呢 ，定係 我 去 啊 ？
殷錦 大叫 一聲 ，倒退 跳出 丈 幾 遠 ，一轉身 發腳 狂奔 。
洪教主 等 佢 跑咗 幾丈 遠 之後 ，護 低身 執起 一嚿 石頭 掟 出去 。
拂 一 聲 ，掟 正 殷錦 後腦 ，佢 大聲 慘叫 成個 跳起 ，又 𢴈翻 落嚟 ，扭 咗 幾 下 就 冇命 嘞 。
洪教主 眼見 許雪亭 等 五人 聯手 ，雖然 以 自己 嘅 武功 ，再加埋 夫人 同 殷錦 幫手 完全 可以 克制得住 嘅 。
但係 教 中 元氣 大傷 之後 ，而家 只係 剩低 寥寥 幾個 人 ，殷錦 呢 只係 會 奉承 諂媚 ，真實 本事 就 冇 幾多 嘅 。
如果 再 將 呢 五個 人 殺咗 ，自己 部屬 就 蕩然無存 嘞 。
佢 喺 頃刻之間 ，權衡 輕重利害 ，即時 殺咗 殷錦 ，嚟到 平息 許雪亭 等 五個人 嘅 憤怒 。
張淡月 同 陸高軒 躬身 話 ：教主 言出如山 ，誅殺 奸邪 ，屬下 佩服 之至 。
許雪亭 、無根道人 、肥頭陀 三個人 一齊 話 ：多謝 教主 。
呢 五個 人 平常 見到 殷錦 一味 吹牛 拍馬 ，人品 低下 ，對 佢 係 十分 鄙視 嘅 。
而家 見 教主 親自 落手 將 佢 處死 ，都 覺得 好 痛快 啊 。
洪教主 指住 韋小寶 話 ：唔係 我要 放生 佢 ，但係 呢個 嘢 知道 遼東 極北 苦寒 嘅 地方 有 一個 極大 嘅 寶藏 。
如果 唔係 由 佢 帶路 ，就 冇 法子 搵得到 嘅 。
得咗 呢個 寶藏 之後 ，我哋 重建 神龍教 就 易如反掌 嘞 。
啱先 你哋 五個人 話 ，嗰啲 少年男女 極之 唔可靠 ，勸 我 唔好 重蹈覆轍 。
本座 仔細 諗一諗 ，亦 不無道理 。
噉就 依照 你哋 嘅 主張 ，今後 本教 新招 教徒 嘅 時候 ，務須 特別 鄭重 ，以免 奸徒 壞人 混入 本教 。
許雪亭 佢哋 噉 就 高興 嘞 ，一齊 躬身 多謝 。
洪教主 喺 身邊 攞咗 兩個 瓷樽 出嚟 ，每個 樽 裏 便 各 倒出 五粒 藥丸 ，五粒 黃色 ，五粒 白色 。
佢 擠翻 樽仔 入 懷內 ，將 藥丸 放 喺 左 掌 ，佢 話 ：
呢啲 係 豹胎易筋丸 嘅 解藥 ，你哋 每人 各 服 兩粒 啦 。
許雪亭 等 呢 歡喜 到 乜嘢 噉 ，多謝 過 教主 就 接 過 啲 藥 。
洪教主 話 ：你哋 即刻 食咗佢 啦 。
噉 五個人 將 藥丸 放入 口 ，吞咗 落 肚 。
洪教主 啊 微微 笑話 ：噉 就 好喇 。
陸高軒 ，你 隻 左手 揸住 啲 乜嘢 ？
陸高軒 退 咗 兩步 佢 話 ： 冇 ， 冇 咩 嘢 啊 。
左手 垂低 揸 成 拳頭 。
攤開 左手 睇下 。
洪教主 呢 一 聲 大喝 ，震到 各人 隻 耳仔 呢 嗡嗡聲 。
陸高軒 左手 慢慢 攤開 ， 嗒 一聲 ， 一粒 白色 藥丸 跌 喺 地下 。
許雪亭 等 四個人 都 變咗 面色 ，佢哋 知道 陸高軒 見識 不凡 ，都 幾 聰明 嘅 。
佢 隱藏 呢粒 白丸 唔肯 食 ，必定 有 道理 ，不過 自己 已經 吞咗 落 肚 嘞噃 ，噉 點算好 呢 ？
洪教主 大聲話 ：呢粒 白丸 係 強身健體 嘅 大補 雪參丸 ，點解 你 懷疑 本座 ，竟然 敢 收埋 唔食 啊 ？
陸高軒 話 ：屬下 不敢 。
屬下 近來 練內功 唔 妥當 ， 經脈 裏頭 氣血 不順 ， 因此 ， 因此 教主 恩賜 呢 粒大 補藥 丸 ， 想 今晚 打坐 調息 之後 慢慢 先至 食唧 ， 以免 賤體 經受 ， 誒 經受 唔 住 啊 。
洪教主 嘅 面色 當堂 和氣 翻 佢 話 ：原來 係 噉 係嘛 。
你 邊處 嘅 經脈 氣血 不順 啊 ？
噉 都 好 容易 嘅 啫 ，我 幫 你 調順 內息 就係 喇 ，你 過嚟 啦 。
陸高軒 又 倒退 一步 佢 話 ：
唔敢勞煩 教主 嘞 ，屬下 慢慢 調息 就會好嘅 。
洪教主 歎 一口氣 ，佢 話 ：唉 ，噉樣 講 ，你 終歸 信唔過 我 啊 。
陸高軒 話 ：屬下 不敢 。
洪教主 指住 地下 嗰粒 白丸 ，佢 話 ：
噉 你 即刻 食咗 佢 啦 ，如果 食咗 之後 氣息 不調 ，我 點 會 袖手 唔理 呢 ？
陸高軒 望住 嗰粒 藥丸 ，定咗 一陣 佢 話 ：係 。
護低身 執起 藥丸 ，突然 中指 一彈 ，嗤一聲 ，藥丸 飛過 天空 ，遠遠噉 跌咗 落 山谷 。
佢 話 ：屬下 已經 食咗 嘞 ，多謝 教主 。
洪教主 哈哈大笑話 ：好 ，好 ，好 ！你 真係 大膽 。
陸高軒話 ：屬下 忠心 為 教主 出力 ，教主既然 已經 賜 服 解藥 ，解咗 豹胎易筋丸 嘅 毒性 ，不過 就 另外 賜 呢粒 毒性 更加 厲害 嘅 百涎丸 。
屬下 冇 罪 ，唔願 領罰 。
許雪亭 等人 一齊 問 ：百涎丸 ？係 咩 毒藥 啊 ？
陸高軒 話 ：教主 採集 一百種 毒蛇 毒蟲 嘅 口水 ，調製 而成 呢種 藥丸 。
係唔係 含有 劇毒 ，我 就 唔係 點 清楚 嘞 ，話唔埋 ，真係 有 大補之效 呢 ？
只不過 我 膽量 好 細 ，唔敢 試食 唧 。
許雪亭 佢哋 更加 驚嘞 ，一齊 衝到 陸高軒 身邊 ，五個人 企 成 一排 ，定眼 睇實 洪教主 。
洪教主 冷冰冰 噉 話 ：你 點知 呢啲 係 白涎丸 啊 ？
亂噏一通 ，挑撥離間 ，擾亂人心 。
陸高軒 向 方怡 一 指 就 話 ：
嗰日 ，我 見到 方姑娘 喺 草堆 裏 便 捉 蝸牛 ，我 問 佢 捉嚟 做 乜嘢 ，佢 話 奉 教主 之 命 ，捉到 蝸牛 嚟 配 藥 。
教主 嗰條 白涎丸 嘅 丹方 ，我 亦 無意之中 見到 嘞 。
雖然 話 白涎丸 嘅 毒性 要 喺 三年 之後 先至 發作 ，但 一來 ，白涎丸 怕 教主 從來 都 未 配過 ，亦 唔 知道 係 唔係 真係 三年 之後 毒性 先至 發 ；
二來 ，屬下 仲 想 過多 幾年 ，唔想 三年 之後 就 死 咁快 啊 。
洪教主 塊 面啲 黑氣 漸漸 多嘞 ，佢 話 ：
我嘅藥方 ，你 又 點 能夠 睇見 啊 ？
陸高軒 打斜向 洪夫人 望咗 一眼 ，佢 話 ：
夫人 要 屬下 喺 教主 嘅 藥箱 裏 便 搵 藥 畀 佢 食 ，呢條 丹方 ，就 喺 藥箱 裏 便 嘅 。
亂咁噏 ！夫人 就算 身子 唔舒服 ，唔通 唔會 問 我 攞 藥 ，何必要 你 嚟 搵 啊 ？
我 呢個 藥箱 向來 鎖到 好 實 嘅 ，你 點 敢 私自 開 佢 ？
屬下 並冇 私自 開 藥箱 。
你 冇 私自 開 ？唔通 係 我 吩咐 你 開 㗎 ？
洪教主 一諗 ，就 問 洪夫人 嘞 ：係唔係 你 開畀 佢 㗎 ？
洪夫人 面色 蒼白 慢慢 岌一岌 頭 。
洪教主 話 ：你 要 搵 咩 藥 ？點解 唔 同 我 講 啊 ？
洪夫人 突然 間 滿面 通紅 ， 跟 住 又 變翻 慘白 個 身震 咗 幾下 ， 忽然間 揞 住 個 肚 ， 喉嚨 噁 噁 聲 嘔 咗 唔 少 清水 出 嚟 。
洪 教主 皺起 眉頭 好聲好氣 噉 問 佢 ： 你 邊度 唔 舒服 啊 ？ 坐低 唞 下 啦 。
建寧公主 突然間 話 ：佢 有咗 細路 啊 你 呢個 老懵懂 ，自己 要 生仔 啦 仲 唔 知道 。
洪教主 大吃一驚 ，飛身 向前 ，捉住 夫人 隻手 ，大聲 問佢 ：佢 嘅 説話 ，真唔真 ？
洪夫人 彎低 條 腰 猛咁 嘔 ，越加 震得 厲害 嘞 。
洪教主 話 ：你 想 搵 藥 嚟 打胎 ，係咪 ？
除咗 陸高軒 之外 ，大家 聽咗 呢句 説話 冇 話 唔 奇怪 。
洪教主 並無 子女 ，對 夫人 又 十分 痛愛 。
如果 夫人 幫 佢 生 翻 個 細路 ， 無論 係 男定 女 都 係 極大 嘅 好事 ， 噉 何以 佢 竟然 要 打胎 呢 ？
估計 洪教主 呢一下 實係 估錯咗 定 嘞 。
誰知 洪夫人 慢慢 岌一岌頭 ，佢 話 ：
冇錯 ，我 要 打咗 個 胎 ，你 快啲 殺咗 我 啦 。
洪教主 左掌 提起 喝佢 話 ：係 邊個 嘅 細路 ？
人人 都 知道 佢 武功 高 到 極 ，呢 一 掌 擊落去 ，洪夫人 必定 立時 斃命 。
點知 洪夫人 反而 將 個 頭 向 上 一 挺 ，昂然 話 ：
叫你 快啲 殺咗 我 ，為咩事 又 唔 落手 呢 ？
洪教主 雙眼 啊 好似 噴出 火 噉 ，佢 話 ：
我 唔 殺 你 ，係 邊個 嘅 細路 ？
洪夫人 眯埋 個 嘴 ，神氣 非常之 倔強 ，顯然 早就 係 拼死 㗎 嘞 。
洪教主 擰轉頭 睩住 陸高軒 ：係唔係 你㗎 ？
陸高軒 連忙 話 ：唔係啊 ，唔係啊 ！
屬下 敬重 夫人 有如 天神 ，點 敢 冒犯 呢 ？
洪教主 嘅 眼光 ，由 陸高軒 嗰 處 慢慢 移去 張 淡月 、許 雪亭 、無根 道人 、胖 頭陀 ，一個個 掃過去 。
佢 雙眼 望 到 邊個 ， 邊個 就 打個 冷震 。
洪夫人 大聲 話 ：邊個 都 唔係 ，你 殺咗 我 就係 喇 ，問 咁多 嚟 做乜嘢 吖 ？
公主 就 話 ：佢 係 你 老婆 ，呢個 細路 自不然 係 你 㗎 啦 ，又 亂 咁 疑心 做 咩 嘢 唧 ？真係 糊塗 啊 你 。
洪教主 喝佢 話 ：收聲 ！
你 再 講 多 一句 ，我 就 扭斷 你 條 頸 ！
公主 唔敢 再 講 嘞 ，佢 個 心 好 唔服 啊 。
佢啊邊處知道 ，洪教主 近年來 修習 上乘 內功 ，早就 不近女色 。
同 夫人 夫婦 之 情 雖然 好 深 啊 ，不過 就 冇 夫婦 之 實 嘅 。
亦正係因為噉 ，喺 洪教主 嘅 心 啊 對 佢 好 抱歉 好 內疚 ，所以 平日 對 佢 呢 加倍 敬愛 。
呢陣時 ，佢 突然間 聽見 夫人 有咗 孕 ，霎時之間 ，個心裏 便 呀 憤怒 、羞慚 、悔恨 、傷心 、苦楚 、憎恨 、愛惜 、恐懼 ，各種 激情 冚𠾴唥 都 嚟齊 。
一隻手掌 高高 舉 在 半空 ，就係 落唔到去 ，一轉頭 ，見到 許雪亭 佢哋 人人 都 露出 惶恐 嘅 表情 ，佢 諗 ：
呢 件 事 咁 丟架 ， 今日 都 畀 佢 哋 知道 晒 ， 我仲點 有面 嚟 做 佢 哋 教主 啊 ？
呢班人 都 要 殺到 一乾二淨 ，唔能夠 留低 一個 活口 。
只要 洩漏咗 半點 風聲 ，江湖 上 嘅 好漢 人人 都 會 恥笑 我 ，我 仲 逞 咩 英雄豪傑 啊 ？
佢 殺心 一起 ，突然間 右手 放開 夫人 ，飛身 向前 一手 拉住 陸高軒 ，佢 話 ：
都係 你 呢個 反教 叛徒 從中 搞鬼 。
陸高軒 大叫 話 ：你 想 殺人 滅 。
個口字 仲未曾 離嘴 啊 ，頭頂上 便 啪噉 一聲 ，已經 畀 洪教主 出力 擊 咗 一掌 ，當堂 雙眼 突出 ，氣絕 而 死嘞 。
許雪亭 等 見到 噉嘅 情形 ，知道 洪教主 確係 要 殺人 滅口 嘞 ，四個人 一齊 抽出 兵器 ，保護住 自己 。
許雪亭 話 ：教主 ，呢啲 係 你 嘅 私事 ，同 屬下 冇 關係 。
洪教主 高聲大叫 ：今日 大家 同歸於盡 ，邊個 都 唔使 有命 喇 ！
猛 向 四個人 衝過去 。
胖頭陀 挺起 一把 二十零斤 重 嘅 潑風 大環刀 ，當頭 斬過去 威猛 到 極 。
洪教主 啊 側身 讓開 ，右掌 向 張淡月 頭頂 拍落 。
許雪亭 一對 判官筆 啊 ，向 洪教主 背心 連 刺 兩招 ，同時 無根道人 嘅 雁瓴刀 亦 已經 斬 向 佢 腰間 嘞 。
洪教主 大喝一聲 ，向 半空 跳起 ，仍然 向 張淡月 撲擊 落去 。
張淡月 啊 使 一對 鴛鴦 短劍 啊 ， 霎時之間 ， 向上 連刺 七劍 。
呢一招 七聲聚月 ，係 佢 生平 嘅 力作 ，七劍 刺得 迅猛 凌厲 到 極 嘅 。
洪教主 右掌 略偏 ，喺 佢 左膊 輕輕 一撳 ，借勢 跳開 。
張淡月 大叫 一聲 ，喺 地 下 一趢 ，翻身 企翻起 ，只覺得 左邊 半邊 身 啊 痠痛 到 不得了 ，佢 大叫 話 ：
今日 唔 殺咗 佢 ，邊個 都 好 難 有 命 㗎 喇 。
四個人 各 展 兵器 ，又 向 洪教主 圍攻 上去 。
呢 四個 人 啊 ，都 係 神龍教 中 嘅 第一流 人物 ，尤其是 以 肥頭陀 同 許雪亭 更加 使得 。
肥頭陀 大環刀 上面 九個 鋼環 哐唥唥 噉 響 ，走 嘅 純粹 係 剛猛 路子 。
許雪亭 一對 判官筆 呢 ，卻 係 綿密 小巧 嘅 技術 ，招招 點 向 對方 周身 要穴 。
無根道人 將雁瓴 刀 啊 舞成 一團 白光 。
佢 諗住 今日 食咗 百涎丸 之後 ，條命 都 冇 幾耐 㗎 嘞 ，喺 臨死 之前 ，一定 要 殺咗 呢個 奸詐 兇狠 嘅 大 仇人 先 。
所以 十刀 之中 啊 ，有 九刀 係 進攻 招數 ，只係 希望 同 敵人 同歸於盡 。
張淡月啊 想起 當日 ，因為 部屬 辦事 不力 ，攞唔到 四十二章經 。
如果 唔係 得到 無根 道人 同 許雪亭 幫手 ，早就 畀 洪 教主 處死 嘞 。
自己 呢條命 ，其實 係 執翻嚟 嘅 啫 。
呢陣時 ，左臂 雖然 係 痛到 不得了 啊 ，仍然 奮力 出劍 。
洪教主 嘅 武功 啊 ，高過 四個人 好多 嘅 ，如果 淨係 要 攞 其中 一人 條命 ，就 並冇 難處 ，但係 四個人 連環 進擊 ，殺到 一個人 ，自己 難免 受傷 。
佢 鬥咗 幾十個 回合 之後 ，胸中 一股 憤恨 到極 嘅 氣 呢 ，慢慢 平息 翻 嘞 。
心神 一定 ，出招 更加 得心應手 ，一雙 肉掌 喺 四種 兵器 嘅 圍攻 之 中 啊 盤旋 來去 ，一啲 都 冇 落下風 。
眼見 張淡月 左 劍 刺出 嘅 時候 漸漸 冇力 嘞 ，佢 諗 ：
呢一個 係 對方 最弱 之處 ，由 呢處 着手 就 可以 攻破 強敵 嘞 。
話説 韋小寶 見 四個人 鬥得 咁 激烈 ，噉啊 靜靜 拉 一拉 曾柔 同 沐劍屏 嘅 衫袖 ，又 向 公主 打 個 手勢 ，叫 佢 唔好 出聲 。
噉 四個人 擰轉身 ，拈手拈腳 噉 行落山 嘞 噃 。
洪教主 等 五 個人 啊 鬥 到 正係 好 緊張 ，噉 邊個 都 冇 見到 佢哋 ，就算 見到 啊 ，亦 冇 人 出得手 嚟 攔阻 佢哋 嘞 。
四個人 行咗 一陣 ，離開 洪教主 佢哋 好 遠 嘞 ，個心 好 歡喜 啦 。
韋小寶 捩轉頭 一望 ，見到 五個人 仲 喺度 狠鬥 ，刀光 閃爍 ，掌影 飛舞 ，一時 難分 勝敗 ，佢 話 ：我哋 行快啲 啦 。
噉 四個人 加快 腳步 ，忽然間 聽見 後便 有 腳步聲 ，噉 兩個人 飛跑 而嚟 ，係 洪夫人 同 方怡 啊 。
四個人 吃咗 一驚 ，最弊 就係 身上 嘅 兵器 暗器 ，喺 被擒 嘅 時候 畀 佢哋 搜咗 去 。
方怡 都 話 唔緊要啫 ，洪夫人 係 十分 厲害 㗎 嘛 ，估計 唔夠 佢 打 㗎 喇 唯有 搏命 走 係 啦 。
跑咗 幾十步 ，公主 啊 畀 石仔 一𠽤 ，咪 跌倒 喺 地 ，哎吖 噉 叫咗 一 聲 。
韋小寶 諗 ：佢 肚 裏頭 有 我 個 細路 噃 ，唔 救 佢 唔得 㗎 。
就行 翻轉頭 扶佢 。
洪夫人 幾個 起落 ，已經 跳到 佢 前 便 嘞 ，叉住 條 腰 企 喺 處 佢 話 ：
韋小寶 ，你 想 逃走 啊 ？
韋小寶 笑住 話 ：我哋 唔係 逃走 ，呢便 風景 好啊 ，過嚟 玩下 啫嘛 。
洪夫人 冷笑話 ：好啊 ，你哋 嚟 欣賞 風景 點解 唔 叫埋 我 啊 ？
講説話嘅時候 ，方怡 亦 已經 趕到 嘞 。
沐劍屏 同 曾柔 見到 韋小寶 ，已經 畀 洪夫人 截住 就 行翻轉頭 ，企 喺 韋小寶 身 跟 。
沐劍屏 對方 怡 話 ：方師姐 ，你 同 我哋 一齊 走 啦 ，佢 。
一便 講 一便 指 一指 韋小寶 。
佢 一直 對你 好好嘅 ，你 以前 都 發過 誓㗎 ，唔通 你 唔記得 嘞咩 ？
方怡話 ：我 只係 忠心 於 夫人 ，聽 夫人 嘅 命令 。
沐劍屏 話 ：你 不過 食咗 夫人 嘅 藥 啫 嘛 ，我 以前 亦 食過 嘅 。
韋小寶 恍然大悟 啊 ，到而家 先至 知道 方怡 過去 一再 欺騙 自己 ，都係 受 咗 洪夫人 嘅 挾制 ，唔係 噉 做 就 唔得 嘅啫 。
個心啊即刻就唔嬲佢嘞 ，就話 ：怡姐 ，你 同 我哋 一齊 走 啦 。
怡姐 呢種 叫法 啊 ，係 上次 佢 同 方怡 一齊 嚟 神龍島 ，喺 船上 親熱 纏綿 嘅 時候 叫慣咗 嘅 。
方怡 又 試聽 翻 ，不禁 塊面 一紅 。
突然 之間 ， 只 聽見 洪 教主 大聲 噉 叫 ： 夫人 ， 夫人 ！ 阿荃 ， 阿荃 啊 ！ 你 去 咗 邊處 啊 ？
喺 叫聲 裏 便 充滿咗 驚惶 同 焦慮 ，顯然 係 怕 洪夫人 拋棄 佢 走咗 。
但係 洪夫人 好似 聽唔見 噉噃 。
洪教主 又 叫咗 幾聲 ，洪夫人 始終 唔 回答 。
嗱 各位 ，欲知 後事 如何 ，且 聽 下回 分解 。
