前 文 再續 啊 書 接上 一回 啊 。
話説 韋小寶 見 啲 外國 兵 殺 咗 十幾個 通古斯 獵人 ，佢 諗起 唔知 係咪 吳三桂 起兵 造反 呢 ？
突然間 佢 話 ：我要 返去 見 小皇帝 。
雙兒 好奇怪 嘞 就 問 ：見 小皇帝 ？
冇錯 。
吳三桂 起兵 造反 ，小皇帝 呢 一定 有 好多 説話 同 我 講 嘅 ，就算 我 諗唔出 咩 主意 ，同 佢 傾下 偈 解下 悶 都係 好 㗎嘛 。
我哋 而家 就 返去 北京 嘞 。
噉 ，唔 去 鹿鼎山 喇 ？
呢次 唔去 咯 ，下次 再去 啦 。
韋小寶 啊 雖然 係 貪財 啊 ， 但 係 佢 存 嘅 金銀財寶 ， 點都 使 唔 晒 啦 。
想到 鹿鼎山 同 小玄子 嘅 龍脈 有關 ，實在 唔想 去 掘 ，因為 怕 一掘 啊 ，就 會 害 咗 小玄子 條 命 嘞 。
佢 搵 出 八部 四十二章 經 裏 便 嘅 碎 羊皮 ， 將 佢 夾 成 一幅 地圖 ， 查出 咗 地圖 上 嘅 山川 名字 ， 噉 一直 都 係 非常熱心 嘅 。
但係 真係 嚟到 鹿鼎山 嘞 ，忽然 又 怕起上嚟 ，就 希望 搵 個 咩嘢 藉口 ，離得 越 遠 越 好 。
如果話 完全 係 為咗 顧全 對 康熙 嘅 義氣 噉 就 未必 ，只係 鹿鼎山 掘寶 呢 件 事實在 太 大 嘞 ，佢 身邊 呢 ，只有 雙兒 一個 人 ，事到臨頭 就 不免 膽怯 。
呢 ， 你 話 如果 佢 帶 住 幾千名 驍騎 營 官兵 ， 講唔 定 啊 已經 大叫 ： 誇 啦 啦 兵發 鹿鼎山 嘞 而 去 嘞 。
雙兒 又 冇 乜 主意 嘅 ，噉 當然 係 唯命是從 啦 。
韋小寶話 ：我哋 返去 北京 ，千祈 唔好 撞到 啲 外國 大賊 啊 ，仲係 跟住 條 江 邊 走 ，睇下 有 冇 船 啦 。
噉就 穿出咗 樹林 ，向 東 便 行嘞 。
行到 下午 ，嚟到 一條 大江 旁邊 ，噉啊 遠遠 望見 有座 城寨 。
韋小寶 好 歡喜 佢 心諗 ：
去 到 城寨 呢 請 船 又 好 騎馬 又 好 ， 總之 有錢 就 得 喇 。
就 急急腳噉 行 嘞 噃 。
行咗 幾里路 ，又 見到 一條 大江 ，由 西北 蜿蜒 而來 ，就嚟到 呢處 呢 ，同 嗰條 波濤洶湧 嘅 大江 會合 。
雙兒 忽然間 話 ： 相公 啊 ， 呢 條就 阿穆爾河 同 黑龍江 喇 ， 嗰 度 ， 嗰 度 就 係 鹿鼎山 喇 。
講完 ，用 手 指住 嗰座 城寨 。
韋小寶 話 ：你 有冇 記錯 啊 ？咁 巧 嘅 ？
地圖 上 的的確確 係 噉 畫 㗎 ， 不過 地圖 上 便 ， 只 係 八個 有 顏色 嘅 圈 仔 ， 就 冇 話 有 座 城寨 嘅 。
鹿鼎山 上面 有 座 城寨 真係 古怪 嘞 。
哼 ，我 睇 呢座 城寨 啊 ，唔係 點 靠得住 唧 ，我哋 仲係 唔好 去 喇 。
咩嘢 唔係 點 靠得住 啊 相公 ？
你 睇 下 吖 ， 城頭 上 啊 ， 有朵 妖 雲 ， 睇 嚟 城寨 裏頭 有個 好 大好 大 嘅 妖怪 啊 。
哎呀 ，我 最怕 妖怪 㗎喇 ，相公 啊 ，我哋 快啲 扯 啦 。
就喺呢個時候 ，只聽見 馬蹄聲響 ，有 幾十 騎馬 順住 江邊 由 南 便 過嚟 。
呢處 四圍 都係 平原 ，冇 地方 可以 躲藏 嘅 。
韋小寶 拉 一拉 雙兒 ，兩個人 喺 江岸 轆 落去 ，縮 喺 江邊 嘅 大石 後 便 。
過咗 冇 幾耐 ，就 見 一隊 馬隊 飛跑 而過 ，騎 喺 馬 上 嘅 都 係 外國 官兵 。
韋小寶 伸伸 條脷 ，眼 睇住 呢 隊 外國 兵 啊 入 咗 城寨 嘞 ，佢 話 ：係唔係 呢 係唔係 呢 ？
我話 呢座 城寨 唔係 點 靠得住 ，果然 冇錯 喇 。
原來 嗰啲 唔係 妖雲 ，係 外國 番雲 啊 。
雙兒 話 ： 我 哋 咁 辛苦 先至 搵 到 鹿鼎山 ， 點 知道 呢 座 山 啊 ， 畀 外國 大賊 霸佔 咗 去 喎 。
韋小寶 哎吖 一 聲 ，跳起身 大叫 話 ：弊喇弊喇 。
雙兒 見 佢 面色 都 變咗 就 連忙 問 佢 ：做咩嘢 啊 ？
啲 外國 大賊 一定 知道咗 地圖 上 嘅 秘密 ，如果 唔係 ，點解 搵到 呢處 啊 ？
呢批 寶藏 同埋 龍脈 啊 ，都 保唔住 咯 。
雙兒 從來 都 冇 聽 佢 講 過 寶藏 同 龍脈 嘅 事 嘅 ， 不過 嗰 幅 地圖 砌 得 咁 艱難 ， 亦 早就 想到 鹿鼎山 呢 必定 係 事關重大 。
見佢 皺實 眉頭 就 勸佢 話 ：
相公 ，既然 畀 外國 兵 搵到 先 咯 ，都 冇 法子 啦 。
啲 外國 大賊 有 火器 ，咁 兇惡 ，我哋 兩個 鬥 佢哋 唔過 㗎 。
韋小寶 歎咗 口氣 就 話 ：
唉 ，噉 真係 奇怪 嘞 ，我哋 嘅 地圖 拼成咗 之後 ，過 咗 冇 幾日 就 燒咗 咯 ，點 會 洩漏 咗 機密 呢 ？
呢啲 外國 大賊 係唔係 已經 掘咗 寶藏 ，破咗 小皇帝 嘅 龍脈 呢 ？一定要 查明 佢 至得 。
不過 諗起 先頭 外國 兵 喺 樹林 裏 便 ，殺人 嗰啲 兇狼 殘忍 嘅 樣 ，不由得 打個 冷顫 佢 沉吟 話 ：
我 想 去 鹿鼎山 查清楚 呢件事 ，但係 太過 危險 嘞 ，要 想 個 法子 至 得 。
雙兒啊 ，我哋 等到 天黑 先至 去 ，就 唔 容易 畀 啲 鬼佬 發覺 喇 。
話說 韋小寶 同 雙兒 食咗 啲 鹿肉乾 ，就 瞓 喺 江岸 邊 休息 。
等到 二更 時分 ，噉啊 靜靜 行去 城寨 。
四圍 寂靜 無聲 ，呢一晚 月色 非常之好 ，望見 嗰座 城寨 係 用 大 木材 同 大 石頭 起 嘅 ，面積 呢 都 好 大 ，決非 一朝一夕 之 功 。
韋小寶 又 諗嘞 ：呢 座 城寨 早就 起 㗎 喇 ，唔係 有人 偷 睇 咗 我 個 地圖 ，講畀 羅剎人 知 就 嚟 呢度 起 座 城寨 嘅 。
佢 睇見 自己 同 雙兒 嘅 人影 照 喺 地下 ，驚 喇 。
你話 城頭 如果 有 羅剎兵 看守 ，幾槍 打過嚟 ，韋小寶 變成 韋死寶 喇 ，就 掹 一掹 雙兒 ，趴低 個身 ，察看 動靜 。
只見 城寨 東南角 有 一座 木屋 ，窗 裏 便 透出 火光 ，睇嚟 係 守兵 住 嘅 地方 嘞 。
韋小寶 喺 雙兒 耳邊 低聲 話 ：
我哋 去 嗰 便 睇 下 咯 。
噉 兩個人 慢慢 向 嗰間 木屋 躝 過去 嘞 。
啱啱 去到 窗外 ，就 聽見 屋裏 便 傳出 幾下 女子 嘅 笑聲 ，笑得 好 淫蕩 嘅 。
韋小寶 同 雙兒 對望 一眼 都 覺得 好奇怪 ：點解 有 女人 嘅 ？
韋小寶 哄 隻 眼 喺 窗罅 裝入 去 。
因為 當地 天寒 風大 啊 ，窗罅 塞到 密密實實 ，咩嘢 都 睇唔見 。
屋裏 便 呢 就 不斷 噉 傳出 人聲 ，一男 一女 有 講 有笑 ，嘰哩咕嚕 噉 一句 都 聽唔懂 。
韋小寶啊 知道 呢 對 羅剎 男女 呢 唔係 做好事 㗎喇 ，佢 想 搵 條 罅 嚟 裝下 。
點知道 地下 呢 結滿晒 冰 ，好滑嘅 ，一下 企唔穩 ，個 頭殼 啊 撞埋 個 窗處 ，忍唔住 哎吖 一聲 。
屋裏 便嘅 聲音 當堂 停咗 。
過咗 一陣間 ，一個 男子 聲音 大聲 噉 喝問 嘞 。
韋小寶 同 雙兒 趴 喺 地下 ，一時 就 唔知 點樣 好噃 。
只聽見 拔起 門閂 ，木門 推開 ，一個人 手挽 燈籠 ，照住 門外 睇下 。
韋小寶 輕輕 跳起身 ，舉起 匕首 㓤入 佢 嘅 胸膛 。
嗰個人 啊哼 都 冇 哼 一下 ，就 軟顂顂 噉 跌低 嘞 。
雙兒啊 搶先 入屋 ，只見 房裏 便 空空蕩蕩 唔見 有人 ，佢 話 ：咦 ？嗰個 女人 呢 ？
韋小寶 跟住 入去 ，見到 房 裏 便 有 一張 炕床 、一張 木枱 、一個 木箱 ，枱 上 便 點住 一支 熊脂 蠟燭 。
嗰個 女人 已經 不知 去向 嘞 ，就 話 ：
快啲 搵 ，唔好 畀佢 去 報信 喇 。
眼見 房裏 便 除咗 大門 之外 ，冇 其他 出路 啊 。
佢 將 死人 拉咗 入嚟 ，閂 翻埋 道 大門 。
見 嗰 個 死 人 係 個 外國 兵士 ， 下身 赤裸 就 冇 着 褲 嘅 。
韋小寶 擔 高頭 望 下 屋頂 ，亦 唔見 有 咩 異狀 啊 就 話 ：一定 喺 呢處 嘅 。
衝到 木箱 旁邊 ，揭開 箱蓋 ，跟住 個身 向 旁邊 一閃 ，防備 嗰個 羅剎 女人 喺 箱 裏 便 開槍 。
過咗一陣 ，唔見 動靜 啊 ，雙兒 話 ：
箱 裏頭 都 冇 人 啊 ，真係 奇 喇 。
韋小寶 行埋 去 睇下 ，見到 木箱 裏 便 擠滿晒 皮草 ，用手 一扲 ，下 便 亦 係 皮草 。
忽然間 ，佢 聞到 一陣 濃香 ，顯然 係 女子 嘅 脂粉 香氣 ，就 話 ：
呢處 有 啲 靠唔住 喇 。
將 皮草 揦起嚟 掉咗 喺 地 ，木箱 底下 竟然 係 個 大 洞 ，佢 好 歡喜 噉 話 ：喺 呢處 啊 ！
雙兒話 ：原來 呢度 有 地道 嘅 。
韋小寶 話 ：要 快啲 去 截住 嗰個 羅剎 女子 至得 。
佢 一去 報信 ，大隊 嘅 外國 大差 就 湧到嚟 ，噉 就 不得了 喇 。
佢 嗱嗱聲 除咗 身上 臃腫 嘅 皮衣 ，手 揸 匕首 ，就 喺 個 洞 處 蜎入去 。
佢 對 外國 兵 呢 就 好 怕 嘅 ，至於 外國 女人 就 唔 放 在 心上 。
嗰條 地道 斜斜地 向下 行 ，只能夠 躝 㗎啫 。
佢 個人 瘦小 靈活 ，喺 地道 裏 便 躝 得 特別 迅速 。
躝咗 十幾丈 喇 ，就 聽見 前面 有 聲 。
佢 手腳 加力 ，躝得 更加快 嘞 ，前面 嘅 聲音 ，已經 隔得 好 近 。
左手 向前 一 伸出 力 一拉 ，碰到 一隻 小腿 。
嗰個 女子 一 聲 低叫 連忙 向 前 逃走 。
韋小寶 歡喜 到 乜嘢 噉 佢 諗 ：
我 如果 一劍 㓤死 你 呢 唔算 英雄 好漢 。
好男 不 與 女 鬥 ，中國 好男 不 與 羅剎鬼婆 鬥 。
外國 男鬼 我 見得 多 喇 ，外國 女鬼 係 點樣 嘅 呢 ？嘿 ，我 點 都 要 睇 清楚 至 得 。
佢 將 匕首 插翻 落 劍鞘 ，猛躝 上前 ，雙手 揦住 嗰個 女子 小腿 。
嗰個 女子 喺 地道 裏 便 唔 能夠 轉身 嘞 ，就 搏命 向前 躝 。
呢個 女子 好夠力㗎 ，韋小寶 竟然 拉佢 唔住 ，反而 畀 佢 拖住 向前 移咗 丈 幾 遠 。
韋小寶啊 雙腳 撐開 ，頂住 個 地道 兩便 嘅 土壁 ，噉 先至 唔再 畀 佢 拉 向前 。
突然之間 ，嗰個 女子 出力 掙扎 ，韋小寶 手上 一滑 ，啊 竟然 又 畀 佢 掙扎 甩 嘞 。
嗰個 女子 迅速 躝 向前 便 ，韋小寶 撲 上去 ，一下 攬住 佢 條 腰 。
突然間 頭頂 空咗 ，原來 ，係 到咗 一笪 比較 寬敞 嘅 地方 。
嗰個 女子 低笑 兩 聲 ，擰轉 頭 ，向住 韋小寶 就 吻 。
黑暗之中 ，吻 喺 佢 鼻哥 上 便 。
韋小寶 只 覺得 成鼻 都 係 濃香 ，抱住 嗰個 女子 呢 全身 赤裸 ，竟然 一絲不掛 噃 。
又覺得 個 女子 反手 過嚟 攬住 自己 ，個 心 啊 一下 迷迷懵懵 。
聽見 雙兒 低聲 問 佢 ：相公 ，你 做 乜嘢 啊 ？
韋小寶 嗯嗯 牙牙 想 話 答 佢 啦 ，懷中 嗰個 女子 吻住咗 佢 個 嘴 ，當堂 講唔出 説話 。
忽然間 ，聽見 頭頂 有人 話 ：我哋 知道 總督 嚟到 雅克薩 ，所以 趕嚟 相會 啊 。
呢 句 説 話 一 入 韋小寶 耳仔 ， 吖 好似 一桶 冰水 ， 兜頭 淋落 嚟 ， 講 説 話 嘅 人 ， 竟然 係 神龍教 洪 教主 啊 。
點解 洪教主 會 喺 頭殼 頂 嘅 ？
自己 抱住 呢個 羅剎 女子 ，點解 又 咁 風騷 親熱 嘅 呢 ？
佢 生平 遇到 嘅 奇事 實在 唔 少 ， 但 係 今晚 喺 呢 條 地道 裏 便 嘅 遭遇 ， 卻 係 從來 都 未有 過 嘅 ， 任 佢 點 想 都 想 唔 到 㗎 嘞 。
佢 抱住 嘅 係 温香軟玉 ，心裏頭 想 嘅 呢 係 洪教主 要 抽筋剝皮 。
佢 膽戰心驚 ，急忙 啊 放開 懷抱 嘅 女子 ，就 想 轉身 逃走 嘞噃 ，點知 呢個 女子 緊緊 攬住 佢 唔肯 鬆手 。
韋小寶 急到不得了 ，喺 佢 耳邊 講話 ：嘰哩咕嚕 稀里嘩啦 糊里糊塗 。
講咗 幾句 生安白造 嘅 羅剎話 就 希望 佢 聽懂 啦 。
嗰個 女子 笑咗 兩聲 ，喺 佢 耳邊 低聲 噉 講咗 幾句 説話 。
噉估計 必定 係 正宗 羅剎 話 喇 ，跟住 用 手 喺 佢 面珠 出力 噉 擰咗 一下 。
就喺呢個時候 ，聽見 頭殼 頂 一個 男人 嘰哩咕嚕 噉 講咗 一串 外國話 。
佢 個 聲音 一 停 ，另外 一個 人 話 ：
總督大人 話 ，神龍教 教主 大駕光臨 ，佢 非常 歡迎 ，冇過嚟 迎接 非常 失禮 ，請 洪教主 原諒 。
總督大人 祝賀 洪教主 長命百歲 ，多福多壽 ，事事如意 ，盼望 同 洪教主 做個 好朋友 ，同心協力 ，共圖 大事 。
韋小寶 個 心話 ：呢個 傳話 嘅 人 冇 學問 呢 ，將 仙福 永享 壽 與 天 齊 ，傳 成 長命 百歲 多福 多壽 喎 。
又 聽見 洪教主 話 ：敝人 祝賀 羅剎國 皇上 萬壽無疆 ，祝賀 總督 大人 福壽康寧 ，指日 高升 。
敝人 竭誠竭力 ，同 羅剎國 同心協力 ，共圖 大事 ，從此 有福共享 ，有難共當 ，雙方 永遠 唔會 背盟 。
嗰個 傳話 嘅 人 講咗 之後 ，羅剎國 總督 跟住 又 嘰哩咕嚕 噉 講到 冇 停 嘞 。
韋小寶 喺 嗰個 女子 耳邊 低聲 噉 問 ：你 係 邊個 啊 ？點解 唔着 衫 㗎 ？
嗰個 女子 低聲 笑住 話 ：你 係 邊個 ？為乜嘢 ，衫 ，着住 嘅 ？
講完 ，就嚟 解 韋小寶 嘅 內衣 。
韋小寶 喺 呢個 時候 邊度 有 心情 做 呢啲 風流快活 勾當 吖 。
佢 聽過 湯若望 、南懷仁 講 中國話 ，噉 呢個 時候 呢個 羅剎 女子 會 講 中國話 亦 唔 奇怪 ，佢 連忙 話 ：
呢處 好 危險 㗎 ，我哋 快啲 出去 啦 。
嗰 個 女子 低聲 話 ： 唔 逳， 唔 逳，逳 喇 ， 就 聽見 喇 。
佢 講 嘅 雖然 係 中國話 啊 ，但 語氣 生硬 ，聽起嚟 好 硬耳 嘅 。
於是 韋小寶 逳 都 唔 敢 逳 嘞 。
佢 聽住 洪教主 同 嗰個 羅剎國 總督 商議 ，話 吳三桂 喺 雲南 一起 兵 ，雙方 就 夾攻 清廷 。
所定嘅方略 ，果然 同 嗰個 蒙古鬍鬚佬 罕帖摩 所講嘅 完全 一樣嘅 。
講到 收尾 ，洪教主 又 獻 一計 。
話 羅剎國 如果 由 遼東 進攻 ，路程 又 遠 ，沿途 清兵 防守 又 嚴 ；
不如 由 海路 喺 天津 登陸 ，用 火器 大炮 直攻 北京 ，就 可以 比 吳三桂 先 取 北京 喇 噉 。
嗰個 總督 好 歡喜 猛讚 好嘢 ，話 洪教主 咁 忠心 ，將來 一定 劃出 中國 幾個 省 ，立 佢 為 王 。
洪教主 啊 猛咁 多謝 。
韋小寶 又 驚 又 嬲 啊 ，佢 諗 ：
洪教主 呢個 傢伙 亦係 大漢奸 ，同 吳三桂 啊 一啲 分別 都 冇 。
呢個 計策 啊 好 毒辣 啊 ，我 要 去 稟告 小皇帝 聽 ，喺 天津 海口 多 裝 啲 大炮 ，羅剎國 兵船 嚟 攻 ，就 兵乓兵乓 轟 叉 佢 。
只聽 洪教主 又 話 ：
總督大人 咁遠路 嚟到 中國 ，我哋 冇 咩嘢 好嘢 孝敬 嘞 ，只係 大東珠 一百粒 、貂皮 一百張 、人參 一百斤 ，送畀 總督大人 ；
另外 仲有 貢品 ，呈畀 羅剎國 皇上 。
韋小寶 聽到 呢處 個 心話 ：呢隻 老狗 吖 居然 置備咗 咁多 禮物 ，確係 神通廣大 噃 。
突然 覺得 塊面 一熱 ， 原來 嗰 個 女子 將個 面珠 貼過 嚟 ， 跟 住 又 摸 下 佢 。
韋小寶 亦 唔 客氣 喇 亦 摸 翻轉 頭 。
嗰個 女子 突然間 咭噉 一聲 ，笑起 上嚟 噃 。
呢下 笑聲 都 幾 大 㗎 ，洪教主 當堂 聽見 嘞 。
但係 諗住 總督 大人 房間 裏 便 收埋 個 女子 ，事屬 尋常 吖 ，就 詐作 冇 聽見 。
講咗 幾句 客套話 ，話 聽日 再 詳談 啦 噉 就 告辭 出去 嘞 。
韋小寶 突然 聽見 頭頂 啪噉 一聲 ，跟住 耀眼 生光 ，原來 自己 同 嗰個 女子 攬實 ，縮埋 喺 一個 大 木箱 裏便 ，箱蓋 啊 啱啱 畀 人 掀開 。
嗰個 女子 咭咭聲 咁 嬌笑 ，跳出 木箱 ，攞 一件 衫 啊褸 喺 身上 ，對 韋小寶 笑住 話 ：出嚟 ，出嚟啦 。
韋小寶 慢慢 喺 木箱 躝出嚟 ，只見 一個 身材 魁梧 嘅 外國 軍官 手 按 佩劍 ，企 喺 木箱 旁邊 。
嗰個 女子 笑住 話 ：仲有 一個 。
雙兒 本來 想 匿埋 喺 木箱 裏 便 嘅 ，因為 韋小寶 如果 遇險 啊 ，就 可以 設法子 救 佢 吖 嘛 。
但係 而家 聽 個 女子 噉樣 講 咯 ，亦 只有 跳出嚟 啦 。
韋小寶 見 嗰個 女子 一頭 金色 嘅 頭髮 ，一直 褸 到 膊頭 ，眼珠 碧綠 ，皮色 雪白 ，容貌 非常之 美麗 。
不過 個 鼻哥 呢 ，就 未免 高咗 一啲 嘞 ，身材 亦 比 佢 高咗 半個 頭 。
韋小寶 從來 都 未見過 外國 女子 ，噉 睇唔出 佢 有 幾多 歲 ，估計 不過 二十 幾歲 啦 。
佢 笑吟吟 噉 望住 韋小寶 話 ：你 ，細佬哥 ，摸 我 ，壞蛋 ，嘿嘿嘿嘿 。
嗰個 總督 黑起 塊面 嘰哩咕嚕 噉 講咗 一陣 。
嗰個 女子 呢 亦 係 嘰哩咕嚕 噉 講 。
嗰個 總督 神態 恭敬 鞠咗 幾個 躬 。
嗰個 女子 又 講 幾句 ，跟住 用 手 指住 韋小寶 。
嗰個 總督 打開 門 ，又 將 嗰個 中國人 傳譯 叫 咗 入嚟 ，一 男 一 女 就 不停口 咁 講 。
韋小寶 見 間 屋 擺住 唔少 皮草 ，張 床 上 便 又 放咗 幾件 金光閃閃 嘅 女子 衣服 。
忽然間 ， 聽 嗰 個 傳譯 話 ： 公主 同 總督 問你 ， 你 係 咩 人 ？
韋小寶 好奇怪 噉 話 ：乜 佢 係 公主 啊 ？
嗰個 傳譯 話 ：呢位 係 羅剎國 皇帝 嘅 御姐 ，蘇菲亞 公主 殿下 ，呢位 係 高里津 總督 閣下 ，快啲 跪低 行禮 。
韋小寶 諗 ：公主殿下 邊 會 噉 亂七八糟 嘅 呢 ？
但係 跟住 諗到 康熙 御妹 建寧 公主 嗰種 亂七八糟 法 呢 實在 不在 呢位 羅剎 公主 之下 ，總之 係 皇帝 御姐 御妹 ，必定 又 靚 又 亂七八糟 嘅 就係 喇 。
於是 笑吟吟噉 請咗 個 安 ，佢 話 ：
公主殿下 ，你好 ，你美貌到極 ，好似 係 天上 仙女 下凡 噉 。
我哋 中國 ，從來 冇 你 噉嘅 美女 嘅 。
蘇菲亞 會 講 一啲 最 粗淺 嘅 中國話 ，聽咗 韋小寶 嘅 説話 ，知道 係 稱讚 自己 美麗 ，當堂 心花怒放 就 話 ：
細佬哥 ，好好 ，有賞 。
行到去 枱邊 ，拉開 櫃桶 攞咗 十幾個 金幣 ，放落 韋小寶 隻 手處 。
韋小寶 話 ：多謝 。
佢 接過 金幣 ，喺 燭光 之下 啊 ，見到 公主 五 隻 手指 啊 直情 好似 玉葱 一樣 ，忍唔住 伸手 揦住 放 喺 嘴邊 吻咗 一吻 。
嗰個 傳譯 大吃一驚 ，喝佢話 ：唔准 無禮 ！
點知道吻手禮啊 ，喺 西洋 外國 極之 通行 嘅 ，係 對 高貴 婦女 十分 尊敬 嘅 表示 。
韋小寶 誤打誤撞 ，吖 竟然 做啱咗 。
不過 吻手禮 呢 ，吻嘅 係 女子 手背 ，佢 卻 係 捉住 蘇菲亞 公主 嘅 手掌 ，亂咁 吮 手指 。
蘇菲亞 一味 咁 嬌笑 ，亦 唔 縮翻 隻手 嘞 。
嗱 各位 ，欲知 後事 如何 ，且 聽 下回 分解 。
