前 文 再續 啊 書 接上 一回 啊 。
話說 瘦頭陀 跌落 海 嘅 地方 呢 ，同 艇仔 只係 相差 幾 尺 。
瘦頭陀 將 個 身 一擁 ，左手 就 揸住 艇邊 。
雙兒 舉起 木槳 ，出力 㩧落去 ，打正 佢 頭殼 。
瘦頭陀 啊 忍住 痛 ，哼咗 一 聲 ，右手 又 揸住 艇邊 。
雙兒 急起 上嚟 ，出力 再 㩧 落去 ，啪 一聲 ，木槳 斷 為 兩橛 ，艇仔 啊 當堂 喺 海上 打橫 。
瘦頭陀 個 頭 暈咗 一下 ，捹 一捹 個 頭 。
韋小寶 匕首 一 割 ，瘦頭陀 右手 四隻 手指 一齊 斷晒 ，痛到 佢 不得了 ，點都 支持唔住 喇 一鬆手 ，個身 喺 海處 浮下沉下 ，大叫 大罵 。
雙兒 攞起 剩翻 嘅 一支 槳 ，出力 咁 扒 ，噉 啊 艇仔 呢 ，又 向 岸邊 駛去 。
駛咗 一陣 ，離開 大船 好 遠 嘞 ，眼見 就 追唔到 嘞 。
大船上 便啊 只有 一隻 艇仔 ，洪教主 佢哋 武功 再 高啊 ，喺 呢個 寒冷 徹骨 嘅 天氣 ，邊個 都 唔敢 跳落水 游水嚟 追㗎 ？何況 游水啊 ，再快 都 追唔到 艇仔 嘞 。
韋小寶 攞起 艇底 一塊 木板 幫住 扒 ，噉 初時 呢 ，仲 隱約 聽見 大船 上 便 眾人 憤怒 噉 叫罵 ，又 過咗 一陣 ，啲 北風 終於 冚住 眾人 嘅 聲音 嘞 。
韋小寶 松 翻啖氣 佢 話 ：唉 ，謝天謝地 ，終於 走甩 嘞 。
噉 兩個人 扒咗 細半個 時辰 ，艇仔 靠岸 。
雙兒 跳 落水 ，海水 啊 只係 浸到 膝頭 哥唧 ，佢 拉住 艇頭 嗰 半 闕 鐵鏈 ，將 艇仔 掹 到 岸邊 佢 話 ：得喇 。
韋小寶 擁身 一 跳 就 上咗 岸 ，佢 話 ：大功告成 喇 。
雙兒 笑咗 一笑 ，退開 幾步 佢 話 ：相公 你 唔好 嚟 啊 。
我哋 要 快啲 走 喇 ，畀 洪 教主 佢哋 追到 就 唔得 喇 。
韋小寶 吃咗 一驚 ，皺起 眉頭 問 ：呢度 係 乜鬼嘢 地方 嚟 啊 ？
佢 四圍 咁 望 ，只見 白雪皚皚 嘅 平原 無邊無際 ，黑夜 之中 ，亦 睇唔見 有 第二樣 嘢 。
雙兒話 ：真係 唔知道 呢度 係 咩嘢 地方 噃 。
相公啊 ，你 話 我哋 走到 邊度 好 呢 ？
韋小寶 冷到 滴滴震 ，頭腦 都 似乎 凍到 僵晒 嘞 ，一啲 辦法 都 諗唔出 ，佢 猛咁 鬧 ：
死人頭吖 ，都係 方怡 嗰個 衰女 唔好 ，害到 我哋 啊 ，凍死 喺 雪地 。
雙兒話 ：我哋 走罷啦 ，行 一陣 個身 就 會 暖啲 㗎喇 。
兩個人 拖住 手 ，向住 雪地 行過去 。
啲 雪 呢 已經 積咗 成 尺 幾 厚 ，一步 踩落去 成 隻 小腿 咁 深 ，拔腳 跨步 非常 艱難 。
雖然 係 噉唧 ，因為 怕 洪教主 追住嚟 啊 ，所以 一陣 都 唔敢 停留 嘞 ，猛咁 趕路 。
噉又 問起 雙兒 點解 會 喺 隻 船 處 啊 噉 。
原來 嗰日 韋小寶 一 見到 方怡 ，就 失魂落魄 噉 趕住 過去 會面 ，雙兒 喺 隻 艇仔 處 跟住 佢 。
等到 佢 失手 被 擒 嘞 ，噉 人人 都 掛住 睇住 韋小寶 ，雙兒 十分 機靈 ，即刻 喺 船尾 匿埋 。
嗰隻 戰船 呢 ，係 洪教主 等 人 ，由 清兵 手上 搶翻嚟 嘅 ，舵師 水手 都 係 清兵 。
雙兒 着嘅 呢 本來 係 驍騎 營 官兵 服飾 ，噉 啊 撈埋 喺 官兵 裏 便 呢邊個 都 冇 發覺 。
一直到 戰船 駛到 岸邊 喇 ，佢 先至 半夜 出嚟 搭救 韋小寶 。
韋小寶 大讚 佢 聰明 機警 呢 就 話 ：
方怡 呢個 妹釘 呢 一味 呃 我 、害 我 ，雙兒 呢個 寶貝 呢 總係 救翻 我 條命 。
我 唔 要 佢 做 老婆 喇 ， 我要 你 做 老婆 。
雙兒 連忙 放開 佢 隻手 ，避開 幾步 佢 話 ：
我話 你 嘅 丫鬟 ，梗係 一心一意 服侍 你 啦 。
我 有 咗 你 呢 個 丫鬟 呢 ， 一定 係 前世 㩧 穿 咗 十幾 二十個 大 木魚 ， 掀爛 咗 十幾 二十部 四十二章 經 ， 今世 啊 先 至 有 咁 好福氣 啊 。
雙兒 咭咭聲 咁 笑佢 話 ：相公 總係 有 説話 講 嘅 。
噉啊 一路 行到 天光 ，離開 海邊 已經 好 遠 嘞 ，捩轉頭 一望 ，只見 雪地 上 兩 排 清清楚楚 嘅 腳印 遠遠 咁 伸展 出去 。
再 向前 望 ，平原 似乎 係 無窮無盡 。
洪教主 佢哋 雖然 冇 追嚟 啊 ，睇嚟 ，亦 不過 係 遲早 之間 而已 唧 。
韋小寶 好 擔心 啊 佢 話 ：
我哋 就算 再 行 十日 十夜 ，都 仲係 會 畀 佢哋 追到 嘅 。
雙兒 指住 右便 話 ：吖 嗰 便 好似 有啲 樹林 ，我哋 行咗 入 樹林 裏 便 ，洪教主 佢哋 就 唔 容易 搵 喇 。
如果 係 樹林 就 好咯 ，不過 睇起上嚟 都 唔係 點 似 唧 。
於是 兩個人 對準 嗰 一團 高起 嘅 雪丘 ，奮力 噉 走過去 。
行咗 一個 時辰 ，已經 睇得 清楚 嘞 ，只不過 係 大平原 上 高起 嘅 一座 小丘 ，唔係 樹林 。
韋小寶 話 ：去到 小丘 後 便 睇下 啦 ，或者 有 地方 可以 匿埋 嘅 。
佢 行 到 呢 陣 時 啊 ， 已經 係 隔夜 風爐 都 吹 得 着 咯 好 攰 啊 。
又行咗半個時辰 ，嚟到 小丘 後便 ，只見 仍然 係 白茫茫 噉 一片 ，就好似 係 白雪 鋪成 嘅 大海 ，一啲 可以 匿埋 嘅 地方 都 冇 。
韋小寶 又 攰 又 餓 ，就 瞓 喺 雪地 上 便 佢 話 ：
唉 ，雙兒 啊 ，你 如果 唔 畀 我 抱下 ，接 個 吻 呢 ，我 真係 冇力 再 行路 㗎 喇 。
雙兒 面 都 紅晒 ，想話 應承 啦 ，又 覺得 呢件事 唔係 點 妥當 。
正到遲疑嘅時候 ，忽然 聽見 身後 有啲 響聲 。
兩個人 擰轉頭 一睇 ，只見 七八隻 大鹿 ，喺 小丘 後 便 行出嚟 。
韋小寶 好 歡喜 噉 話 ：嘿呀 餓到 我 死死下 。
你 ， 你 有 冇 法子 捉 隻 鹿 嚟 ， 殺 嚟 烤 鹿 肉食 啊 ？
雙兒話 ：我 試下 啦 。
突然 飛身 一撲 ，向 幾隻 大鹿 衝過去 。
梅花鹿 啊 四隻 腳 好 長 嘅 ，奔跳 如 飛 ，一 轉身 就 跑咗 幾十 丈 遠 。
雙兒 擰擰頭 話 ：追唔到 嘅 。
點知 呢啲 梅花鹿 呢 係 唔怕 人 嘅 ，見 雙兒 停咗 腳步 ，又 擰翻 轉頭 嘞 。
韋小寶話 ：我哋 瞓 喺 地下 詐死 ，睇下 啲 鹿 過 唔過嚟 吖嗱 。
雙兒 笑住 話 ：好啊 ，我 試下 啦 。
講完 就 瞓咗 喺 地 。
幾隻 梅花鹿 慢慢慢慢 噉 行到 兩個 人 身邊 ，似乎 十分 好奇 。
動物之中啊 ，鹿嘅 智慧 係 極之 低嘅 ，遠遠 唔及 狗啊 、馬啊 、狐狸啊 噉 ，因此 成語 裏 便啊 有 一句 ，蠢如 鹿豕 嘅 説話 。
幾隻 梅花鹿 耷低 個 頭 ，喺 韋小寶 同埋 雙兒 塊 面 處 擦 下 聞 下 ，又 叫 咗 幾 聲 。
韋小寶 話 ：翻身 上馬 ，狄青 降龍 ！
突然 成個人 彈起 ，飛身 坐上 鹿背 ，雙手 緊緊 揸住 鹿角 。
雙兒 亦 輕輕 擎擎噉 跳 上 一隻 梅花鹿 嘅 背 上 。
嗰班 鹿 驚 喇 ，猛跳 猛跑 。
雙兒話 ：你 用 匕首 殺 鹿 啦 。
韋小寶 話 ：唔殺住 ，騎住 隻 鹿 逃命 ，洪教主 就 追 唔到 㗎喇 。
啊 ，冇錯喇 ，不過 千祈 唔好 失散 至 得 。
雙兒 擔心 兩隻 鹿 啊 一隻 向 東 跑 ，一隻 向 西 跑 噉 就 弊 嘞 。
好在 梅花鹿 呢 ，脾性 係 鐘意 合群 嘅 ，八隻 大鹿 喺埋一齊 奔跑 ，噉 跑咗 一陣 ，又 有 七八隻 大鹿 合埋嚟 夾埋 一齊 。
梅花鹿 身高 腿 長 ， 奔跑 起 嚟 都 唔 會輸 畀 駿馬 嘅 ， 只 係 騎 喺 鹿 背 呢 就 顛簸 得 好 緊要 就 係 喇 。
班鹿 向住 西北 一口氣 衝咗 幾里路 ，噉 先至 放慢 腳步 。
背上 騎住 人 嗰 兩 隻 鹿 呢 就 出力 咁 跳 ，想 將 兩 個 人 拋落嚟 。
但係 韋小寶 同 雙兒 啊 緊緊 噉 揸住 鹿角 ，噉 嗰 兩 隻 鹿 呢 點 拋 都 拋 佢哋 唔 落 嘞 。
韋小寶話 ：一落鹿背啊 ，想再上去就難喇 ，我哋 趯得越遠越好 。
呢 啲 叫做 大丈夫 一言既出 ， 活鹿 難 追 啊 。
呢一日 ，兩個人 雖然 餓到 頭暈眼花 ，仍然 係 緊緊噉 攬住 鹿頸 、揸住 鹿角 ，任由 班鹿 呢 喺 茫茫無際 嘅 雪原 裏 便 奔跑 。
兩個人 知道 班鹿 多 跑 一陣 ，就 離開 洪教主 佢哋 遠 一啲 ，同時 雪地 上 便 啊 ，亦 冇 咗 兩個人 嘅 腳印 。
到咗 傍晚 時分 ，班鹿 呢 ，走咗 入 一座 森林 嘞 。
韋小寶 話 ：好喇 ，落嚟 啦 。
拔出 匕首 ，將 佢 騎住 嗰 隻 鹿 嘅 喉嚨 割斷 。
嗰隻 鹿 跑咗 幾 步 就 𢴈 喺 地 嚟 。
雙兒話 ：一隻鹿 夠食 㗎喇 ，放生 我 嗰隻鹿 啦 。
噉就 喺 鹿背 跳咗 落 地 。
韋小寶 筋疲力盡 啊 全身 骨骼 就 好似 散晒 噉 ， 噉 瞓 喺 地下 一味 喘氣 。
過咗 一陣 ，趴 喺 隻 鹿 嘅 頸邊 ，將 個 嘴 對住 傷口 ，咕咕聲 飲咗 十幾 啖 熱血 。
佢 話 ：雙兒 啊 ，你 過嚟 飲 啦 。
因為 有 大量 鹿血 入 肚 ，精神 為之一振 啊 ，個 身 呢 都 慢慢 有 啲 暖意 嘞 。
雙兒 飲過 鹿血 ，用 匕首 割咗 一隻 鹿腿 ，執咗 啲 枯枝 ，就 透着 火 燒烤 鹿肉 。
佢 話 ： 鹿 啊 鹿 ， 你 救 咗 我 哋 條命 ， 我 哋 反而 將你殺 咗 嚟 食 ， 實在 對 唔 住 啊 。
兩個人 食完 烤鹿肉 ，就 喺 火堆 旁邊 瞓覺 嘞 。
第二 朝早 醒咗 起身 ，雙兒 又 試 燒烤 啲 鹿肉 ，噉 兩個人 飽餐 一頓 。
韋小寶 頂帽 呢 尋日 騎 喺 鹿 背上 便 ， 奔跑 嘅 時候 跌 咗 ， 雙兒 啊 剝 咗 啲 鹿皮 ， 幫 佢 做 過 一頂 。
韋小寶 話 ：尋日 跑咗 一日 ，洪教主 佢哋 唔 容易 搵到 我哋 㗎 喇 ，不過 呢 仲 有 啲 危險 啊 。
最好就騎住梅花鹿 ，再向北跑多三四日添 ，噉 我韋教主 同 你 雙兒夫人 呢 ，就 仙福 永享 壽 與 天齊 喇 。
雙兒 笑住 話 ：咩嘢 雙兒夫人 呢 幾 咁 難聽 啊 。
你 想 騎 鹿 啫 嘛 噉 都 唔 難 ，呢 ，嗰度 唔係 有 群 鹿 過緊 嚟 嘞 咩 ？
果然 見到 二十幾 隻 大鹿 小鹿 ，喺 東 便 踏雪 而 嚟 ，噉 啊 伸高 個 頭 ，咬 樹 上 嗰 啲 嫩葉 嚟 食 。
森林 裏 便 啊 人跡 罕至 啊 ，啲 鹿 見到 兩個 人 呢 一啲 都 唔 怕 嘅 。
雙兒話 ：啲鹿 咁 和善 ，唔好 殺傷 佢哋 喇 。
尋日 嗰隻 大鹿 已經 夠 我哋 食 十幾日 喇 。
講完 ，喺 死鹿 身上 斬 咗 幾 大嚿 鹿肉 ，用 鹿皮 索 綁起嚟 ，同 韋小寶 一人 孭 幾嚿 ，就 慢慢 行去 啲 鹿 嗰度 咯噃 。
韋小寶 摸 下一隻 大鹿 ，嗰隻 鹿 擰轉頭 過嚟 ，舐 下 佢 塊面 ，一啲 都 唔驚 佢 。
韋小寶 話 ：哎呀 呢隻 鹿 吖 同 我 大功告成 喎 。
雙兒咭噉一笑 ，佢話 ：你 騎上去 先啦 。
噉佢 同 雙兒 分別 跳 上 鹿背 ，噉 兩隻 鹿 呢 噉 先至 驚起 上嚟 向前 飛跑 。
啲鹿啊 始終 喺 密林裏 便 奔跑 。
兩個人 揸住 鹿角 ，控制 方向 ，只要 係 向住 北 便 行 ，噉 就 同 洪教主 越嚟越 遠 嘞 。
韋小寶 呢陣時 已經 知道 騎 鹿 唔難 嘞 ，騎咗 兩個 幾時辰 ，就 同 雙兒 跳翻 落地 ，由得 啲 鹿 自己 跑咗 去 。
就係噉樣 ，連氣 十幾日 啊 ，喺 密林 裏 便 騎 鹿 奔跑 。
有時 遇唔到 鹿群 嘅 時候 就 慢慢 行 ，餓喇 ，就 食 烤 鹿肉 。
兩個 人 原來 着 嘅 衣服 ， 早就 喺 樹林 裏 便 畀 啲 荊棘 勾到 破爛不堪 ， 噉 而 家都換 咗 雙兒 新 做 嘅 鹿皮 衫褲 ， 連對 鞋 都 係 鹿皮 做 嘅 。
呢一日 ，出咗 大樹林 ，忽然間 聽見 水聲 轟隆 ，行咗 一陣 ，就嚟到 一條 大江 旁邊 ，只見 水勢 洶湧 啊 流得 好 急 。
兩個人 喺 密林 裏 便 行咗 十幾日 ，突然間 見到 呢條 大江 ，胸襟 都 爽朗晒 啊 。
噉 順住 呢條 江水 向北 行咗 幾個 時辰 ，忽然 見到 三名 身穿 獸皮 嘅 漢子 ，手 揸 鋤頭 鐵叉 ，睇 個 樣 呢 ，似乎 係 獵人 嘞 。
韋小寶 好耐 都 冇 見過 人 嘞 ，個 心 好 歡喜 ，連忙 行 上前 問 佢哋 話 ：三位 大哥 ，你哋 去 邊處 啊 ？
一名 四十零歲 嘅 漢子 話 ：我哋 去 牡丹江 趁 圩 ，你哋 又 係 去 邊度 㗎 ？
啲 口音 好 古怪 嘅 。
韋小寶 話 ：哎呀 ，牡丹江 喺 嗰便 㗎 ？
我哋 行錯路 喇 ，跟住 三位 大哥 去 呢噉 就 啱晒 喇 。
噉就 同 三個人 一拍 行 ，一便 行 一便 嘍佢哋 傾偈 。
原來 嗰 三個 人 呢 係 通古斯人 ，以 打獵 挖參 為 生 ，噉 經常 去 牡丹江 趁 圩 嘅 ，同 漢人 做 生意 ，因此 呢 ，會 講 翻 一啲 漢話 。
去到 牡丹江 ，原來 係 好大 一個 圩市 。
韋小寶 身邊 嗰 一大沓 銀票 啊 ，一直 帶住 冇 失到 嘅 ，就 請 嗰 三個 通古斯人 去 酒鋪 飲酒 。
飲飲下 ，聽見 隔籬 枱 有人 話 ：
嗯 ，你 呢條 棒槌 ，好到極咯 ，啊 上個月 有人 喺 呼瑪爾窩 集山 嗰便 嚟 。
韋小寶 同 雙兒 聽到 呼瑪爾窩集山 ，個 心 都 不禁 一震 啊 ，對望咗 一眼 ，就 一齊 向 講説話嘅人 望過去 。
見 係 兩個 老人家 ，正 喺度 攞住 一條 帶葉 嘅 新挖 人參 喺度 欣賞緊 。
韋小寶 攞出 一 錠 銀 ，交畀 酒保 ，吩咐 佢 切 一 大 碟 熟 牛肉 ，打 兩 斤 白酒 送過 隔籬 枱 。
兩名 老參客 好奇怪 啦 唔知道 呢個 小獵人 因咩事 咁 好客 呢 ，就 猛咁 多謝 。
韋小寶 過去 敬 咗 幾杯酒 ， 噉 啊 以 佢 嘅 口才 啊 ， 三言兩語 之間 ， 就 探聽到 呼瑪爾 窩集 山 喺 邊 處 嘞 。
原來 由 呢處 向 北 ，仲有 成 兩三千里 ，嗰 兩個 參客 都 從來 未 去過 嘅 。
韋小寶 叫埋 雙兒 過嚟 ，要 佢 講咗 啲 地圖 上 其餘 山川 嘅 名 。
兩個 老參客 啊 逐一逐二 指點 咗 方位 遠近 ，果然 同 地圖 上 嘅 記載 係 一啲 都 冇 錯 嘅 。
酒醉 飯飽 之後 ，噉啊 同 通古斯人 同埋 參客 分別 咗 。
韋小寶 諗嘞 ：嗰個 鹿鼎山 ，原來 離 呢度 仲 有 好幾 千里 路 嘅 ，橫 掂 得閒 冇事做 啫 ，不如 去 將 寶貝 掘出嚟 都 好啊 。
其實 掘唔掘 寶貝 啊 ，佢 並唔係 點 在乎 嘅 ，講真 㗎啦 ，佢 係 怕 遇到 洪教主 瘦 頭陀 嗰 班 人 啊 。
洪 教主 佢 哋 喺 南 便 ， 如果 自己 再 向 北 兩三千里 ， 洪 教主 無論如何 都 搵 唔 到 自己 嘞 。
佢 又 諗 ：我 同 雙兒 喺 荒山野嶺 等 佢 十年 八年 ，洪教主 啊 非 死 不可 嘅 ，唔通 佢 真係 能夠 ，壽 與 天 齊 咩 ？
於是 去 鋪頭 買咗 兩件 上等 嘅 貂皮 袍 ，同 雙兒 一人 一件 着好 。
噉 又 怕 萬一 畀 洪 教主 追到 啊 ， 貂皮 袍外 便 呢 仍然 着 住 嗰 件 粗陋 嘅 鹿皮 衫 冚 住 ， 用 煤 麩 啊 搽 黑塊面 ， 噉 就算 追到 嘞 ， 亦 希望 佢 認 唔 出 。
噉啊 請咗 一架 大車 ，一路 向 北 行 。
喺 大車 裏 便 ，同 雙兒 傾傾 講講 ，偶然 大功告成 一下 ，真係 其樂融融 啊 。
噉啊 坐咗 二十幾日 大車 ，越係 向北 呢 ，就 越加 冷嘞 。
條路 冰封 雪積 ，大車 已經 唔能夠 通行 。
兩個人 就 改為 騎馬 ，到咗 收尾 ，連 馬 都 唔 能夠 行 喇 ，就 喺 密林 雪原 上 便 就噉 行 。
好在 韋小寶 其實 係 為咗 避難 唧 ，眼見 窮山惡水 四野 無人 ，個心 啊 越 覺得 平安 。
雙兒 嘅 記性 極之 好 嘅 ， 跟 住 地圖 上面 所 畫 嘅 方位 ， 慢慢 向 北方 一路 咁 搵 。
撞到 獵人 參客 ，就 打聽 地名 ，同 地圖 記載 嘅 嚟到 印證 。
地圖上 便 有 八個 顏色 嘅 圈仔 ，就係 鹿鼎山 嘞 ，嗰度 係 有 兩條 大江 合流 嘅 。
呢 日 計起 上 嚟 呢 ， 距離 應該 冇 幾遠 㗎 嘞 。
兩個人 喺 一座 大 叢林 裏 便 正在 行緊 ，突然間 ，東北角 上面 嘭噉 一聲 ，係 火器 射擊 嘅 聲音 。
韋小寶 大吃一驚 啊 佢 話 ：哎呀 弊嘞 ，洪教主 追嚟 喇 。
連忙 拉住 雙兒 ，匿埋 喺 樹 後 嗰啲 草林 裏 便 。
跟住 聽見 十幾個 人 呼喝 號叫 跑過嚟 ，跟住呢 ，又 有 馬蹄聲 。
韋小寶 怕 嘅 只 係 洪 教主 追 嚟 啫 將 佢 捉住 抽筋剝皮 ， 呢 個 時候 聽 啲 聲音 呢 ， 似乎 同洪 教主 無關 ， 就 稍 為 放心 嘞 。
喺 草林 裏 便 裝 出去 ，只見 十幾個 通古斯 獵人 ，猛咁 嗌 猛咁 走 。
忽然間 ，聽見 嘭嘭嘭嘭 ，幾個 獵人 𢴈咗 喺 地 ，轆 咗 幾 轆 ，就 死咗 咯 ，個 身 啊 流 啲 血 出嚟 。
韋小寶 揸住 雙兒 隻手 佢 心諗 ：呢啲 係 外國 鬼 嘅 火槍 啊 。
跟住 又 馬蹄聲 響 ，七八 騎馬 衝過嚟 ，騎馬嘅 ，果然 都係 黃鬚 綠眼 嘅 外國 官兵 。
一個個 身材 魁梧 神情 兇惡 ，有啲 係 揸住 火槍 ，有啲 係 揸住 彎刀 亂咁 斬 。
一陣間 咁耐 ，就 將 其餘 嘅 通古斯 獵人 冚𠾴 唥 斬死 嘞 。
啲 外國 官兵 哈哈大笑 ，跳咗 落馬 ，搜查 獵人 身上 所帶 嘅 嘢 ，噉 攞咗 幾張 貂皮 、六七 隻 銀狐 ，嘰哩咕嚕 噉 講咗 一陣 ，就 上馬 去咗 嘞 。
韋小寶 同 雙兒 聽見 馬蹄聲 去 遠咗 ，噉 先至 慢慢 喺 草林 裏 便 出嚟 。
睇下 啲 獵人 ，已經 冇 一 個 係 生 嘅 。
韋小寶 低聲 話 ：呢啲 外國 鬼 ，都 係 大 賊 啊 。
雙兒話 ：仲惡過 大賊 啊 ，搶咗嘢 仲要 殺人 喎 。
韋小寶 突然間 諗起 一件事 就 話 ：
點解 會 有 外國 大賊 嘅 呢 ？唔通 吳三桂 已經 造反 啦 ？
佢 知道 吳三桂 同 羅剎國 有 約 ，雲南 一 發兵 ，羅剎國 就 喺 北方 進攻 嘞 。
而家 突然間 見到 咁多 外國兵 ，莫非 幾十日 以嚟 ，不聞 外事 吳三桂 已經 逳手 啦 ？
想到 吳三桂 手下 兵馬 眾多 ，不禁 為 小玄子 擔憂 嘞 。
雙兒話 ：唉 ，呢啲 獵人 真係 可憐 喇 ，佢哋 屋企 嘅 父母 妻子 ，而家 正在 等 佢哋 返去 啊 。
韋小寶 嗯噉 應咗 一聲 ，突然間 佢 話 ：我要 返去 見 小皇帝 。
嗱 各位 ，欲知 後事 如何 ，且 聽 下回 分解 。
