前文 再續 啊 書 接 上 一回 啊 。
話説 嗰個 身材 魁梧 嘅 老和尚 話 ：老夫 行 不 改名 ，坐 不 改 姓 ，奉 天王 李自成 ，就係 我 ！
韋小寶 大吃一驚 啊 佢 話 ： 啊 ， 你 ， 你 就 係 李闖 李自成 啊 ？
冇錯 ，小兄弟 ，你 出去 啦 。
大丈夫 一人 做事 一人 當 ，李某 身經百戰 ，七十幾歲 喇 ，亦 唔 要 你 呢個 小小 嘅 清廷 官仔 ，陪 我 一齊 送命 。
忽然之間 ，白影 晃動 ，屋頂 有人 跳落嚟 ，向住 吳三桂 頭頂 撲落去 。
吳三桂 一聲 怒喝 ，佢 身後 便 四名 衞士 四劍 齊 出 ，向 嗰個 白影 刺過去 。
嗰個人 衫袖 一拂 ，發出 一股 勁風 ，將 四名 衞士 震到 向後 退開 ，跟住 一掌 拍正 吳三桂 背脊 。
吳三桂 企唔穩 嘞 ，成個人 跌咗 入 房 。
嗰個人 如影隨形 啊 ，跟住 跳入去 ，右手 一掌 斬落 ，斬正 吳三桂 膊頭 。
吳三桂 嗯咗 一 聲 ，扽咗 喺 地 。
嗰個人 ，將 手掌 撳住 吳三桂 嘅 天靈蓋 ，向 四圍 啲 衛士 話 ：快啲 放箭 啦 。
呢一下 嘅 變化 快到 極 啊 ，班 衛士 都 嚇到 傻咗 ，睇住 王爺 已經 落入 敵手 嘞 ，邊個 敢 逳 啊 ？
韋小寶 好 歡喜 啊 ：師父 ，師父 ！
喺 屋頂 跳落嚟 ，制服 吳三桂 嘅 係 九難 。
韋小寶 嚟到 三聖庵 ，佢 又 暗中 跟住 嚟 ，一路 匿埋 喺 屋頂 。
平西王府 成千名 衞士 ，沊沊𡃈噉 圍住 三聖庵 ，喺 庵堂 外 便 守住 嘅 高彥超 等人 呢 就 唔 敢 貿貿然 逳手 。
九難以絕頂輕功 ，縮埋 喺 屋檐下 便 ，班 衛士 呢 竟然 發覺 唔到 。
九難 望 實 李自成 佢 問 ：你 真係 李自成 啊 ？
冇錯 。
聽講 你 喺 九宮山 畀 人 打死 嘞 ， 原來 你 冇 死 到 。
李自成 岌一岌頭 。
阿珂 係 你 同 佢 生 嘅 女 啊 ？
李自成 歎咗 口氣 ，向 陳圓圓 望咗 一眼 又 岌咗岌頭 。
吳三桂 好嬲噉 話 ：
我 早就 應該 知道 嘞 ，只有 你 呢個 反賊 先至 生出 啲 噉樣 。
九難 喺 佢 背脊 踢 一 腳 ，鬧 佢 話 ：
你哋 兩個 反賊 ，半斤八兩 ，都 唔知 邊個 更加 奸惡啲 。
李自成 用 禪杖 喺 地下 嘭噉 戙 咗 一下 ，青磚 當堂 碎 咗 幾 塊 啊 ，佢 話 ：
你呢個師姑 係 咩嘢 人 啊 ？膽敢 亂咁 講 。
韋小寶 見到 師父 嚟到 啊 精神 大振 ，李自成 雖然 係 威猛 啊 ，佢 已經 一啲 都 唔怕 嘞 佢 就 話 ：
你 膽敢 衝撞 我 師父 啊 嫌 命 長 喇 你 。
你 本來 就係 反賊 ，我 師父 佢 老人家 講 嘅 説話 ，從來 唔會 錯 嘅 。
突然間 呼呼聲 響 ，窗外 三支 長矛 飛入嚟 ，向住 九難 射過去 。
九難 輕輕 捩轉頭 ，左手 衫袖 一拂 ，就 已經 卷住 兩支 長矛 ，反擲 翻出去 ，右手 就 接住 第三支 長矛 。
只聽見 窗外 兩聲 慘叫 ，兩名 衞士 心口 啊 畀 長矛 插中 當堂 冇命 。
第三 支 長矛 嘅 矛頭 呢 ，就 已經 頂住 吳三桂 嘅 後心 嘞 。
吳三桂 大叫 話 ：唔准 輕舉妄動 ，大家 退後 十步 。
眾衞士 齊聲 答應 ，退開咗 幾步 。
九難 冷笑 話 ： 今日 真 係 巧 嘞 ， 喺 呢 間 小小 嘅 禪房 裏 便 ， 聚會 咗 一個 古往今來 第一 大 反賊 ， 一個 古往今來 第一 大 漢奸 啊 。
韋小寶 話 ：仲有 一個 古往今來 第一 大美人 ，一位 古往今來 ，第一 武功 大高手 添 啊 。
九難 嘅 表情 本來 係 非常 冷峻 嘅 ，佢 聽咗 呢句 説話 亦 忍唔住 露出 一絲 微笑 ，佢 話 ：
武功 第一 點 敢當 吖 ？
你 倒是 係 古往今來 嘅 第一 滑頭仔 啊 真 。
韋小寶 哈哈大笑 ，陳圓圓 呢 亦都 輕輕 笑咗 一 聲 。
吳三桂 同 李自成 就 繃緊 塊面 ，佢哋 都 喺度 諗計 甩身 嘞 。
呢 兩個 人 都 係 畢生 統率 大軍 ，轉戰 天下 嘅 大 梟雄 ，生平 亦 唔知 經歷過 幾多 艱難 險阻 嘞 ，但係 喺 噉樣 嘅 處境 之下 ，竟然 一籌莫展 。
雖然 佢哋 都 諗過 十幾條 計 啊 ，但係 覺得 冇 一條 有用 嘅 。
李自成 向 九難 大聲 噉 喝 ：你 想 點 啊 ？
九難 冷笑話 ：我 想 點 啊 ？當然 係 要 親手 殺咗 你 啦 。
陳圓圓話 ：呢位 師太 ，你 係唔係 我 個 女 阿珂 嘅 師父 啊 ？
九難冷笑話 ：你個女 係 我 抱走 嘅 ，我 教 佢 嘅 武功 ，不過 就 唔係 好 深 ，我 要 佢 親手 刺死 呢個 大漢奸 。
講完 ，右手 微微 用力 ，矛尖 㓤入 吳三桂 嘅 肉 裏 便 半寸 深 ，吳三桂 忍唔住 吖噉 叫 一聲 。
陳圓圓話 ：呢位 師父 ，佢 ，佢 同 你 老人家 係 素不相識 ，無冤無仇 㗎 。
九難 昂起 個 頭 ，哈哈 大笑 佢 話 ：佢 ，佢 同 我 無 冤 無 仇 ？
小寶 ，你 同 佢 講 下 我 係 邊個 ，等 大漢奸 同 大反賊 兩個 人 死得 明明白白 。
韋小寶 話 ：我 師父 佢 老人家 就係 大明 崇禎 皇帝 嘅 親生 公主 ，長平 公主 啊 ！
吳三桂 、李自成 、陳圓圓 三個人 ，都 叫咗 一聲 ，非常非常之 驚奇 。
李自成 哈哈大笑話 ：哈哈哈哈哈哈哈 ，好極 ，好極喇 ！
我 當年 逼死 你 阿爹 ，今日 死 喺 你 手上 ，比 死 喺 呢個 大漢 手上 勝過 百倍 。
講完 行前 兩步 ，將 禪杖 喺 地 下一插 ，入咗 地 成 尺 深 。
雙手揸住 胸口 衣服 兩便 一分 ，呎 一聲 ，衣襟 破裂 ，露出 毛茸茸 嘅 胸膛 ，佢 笑住 話 ：
公主 ，你 逳手 啦 。
李某 冇 死 喺 漢奸 手上 ，冇 死 喺 清兵 手上 ，卻 係 喺 大明 公主 嘅 手下 喪生 ，真係 好 啊 。
九難 呢一生 對 李自成 啊 痛恨 到 入骨 ，不過 以為 佢 早就 喺 湖北 九宮山 死咗 咯 ，冇法子 親手 殺死 呢個 大仇人 。
今日 ，知道 佢 仲 在 人世 ，可以 講得 係 意外之喜 。
但係 而家 見 佢 慷慨 豪邁 坦然 就 死 ，一啲 都 唔 驚 ，個 心 亦 不禁 佩服 ，佢 話 ：
閣下 係 條 好漢 。
我 今日 殺死 咗 你 嘅 仇人 先 ，再 嚟 攞 你 條 命 ，等 你 見到 仇人 死 先 過 你 ，死 亦 死得 痛快 吖 。
李自成 好 歡喜 啊 佢 拱手 話 ：
多謝 公主 ，在下 感激不盡 。
我 一生人 嘅 願望 ，就係 要 親眼 見到 呢個 大漢奸 死於 非命 。
九難 見到 吳三桂 毫無 抗拒 嘅 能力 ，佢 唔 願 就 噉 一矛 刺死 咗 佢 啊 ，就 對 李自成 話 ：
我 索性 成全 你 嘅 心願 ，你 嚟 殺 佢 啦 。
李自成 好 歡喜噉 話 ：多謝啊 ！
耷低 個 頭 對 吳三桂 話 ：
奸賊 ，當年 山海關 一片 石 大戰 ，你 得 辮子 兵 幫手 ，我 先至 不幸 打敗 唧 。
而家 你 畀 公主 捉住 ，我 如果 就噉 殺咗 你 ，執 呢啲 便宜 ，諒 你 死咗 心 都 唔 服 。
擔高頭 對 九難 話 ：公主殿下 ，請 你 放咗佢 ，我 同 呢個 奸賊 ，拼 個 死活 ！
九難 提起 長矛 佢 話 ：好 ，睇下 你哋 係 邊個 殺咗 邊個 先 。
吳三桂 趴 喺 地下 哼咗 幾 聲 ，突然間 一下 跳起身 ，搶過 禪杖 ，猛 向 九難 腰間 掃過去 。
九難 鬧 佢 嘞 ：你 嘅 嘢 真係 唔知 死 。
右手 長矛 一轉 ，已經 壓住咗 禪杖 ，內力 一發 ，吳三桂 只 覺得 手臂 一陣 痠麻 ，禪杖 跟住 跌翻 落地 ，長矛 嘅 矛尖 ，已經 指住 佢 咽喉 嘞 。
吳三桂 雖然 勇猛 啊 ，但係 喺 九難 呢啲 內功 深厚 嘅 大 高手 面前 ，就 好似 嬰兒 一樣 ，連 一招 都 抵擋 唔住 。
佢 面如 死灰 猛咁 倒退 ，但係 矛尖 呢 ，始終 頂住 佢 喉嚨 。
李自成 護 低身 執起 禪杖 。
九難 調轉 長矛 ，交畀 吳三桂 佢 話 ：你哋 兩個 公公平平 打一場 啦 。
吳三桂 喝 一 聲 ：好 ！
挺矛 向住 李自成 就 刺啊 。
李自成 揮舞 禪杖 格開 佢 ，就 還翻 一杖 。
噉 兩個人 呢 ，就 喺 呢個 小小 禪房 裏 便 惡鬥 起嚟 嘞 。
九難 掹 一 掹 韋小寶 ， 叫 佢 匿 埋 喺 自己 身後 ， 怕 啲 長 兵器 會 打傷 佢 。
陳圓圓 就 退到 去 角落頭 ，佢 面色 慘白 ，眯埋 雙眼 ，喺 腦海 之中 ，閃過 當年 一幕幕 嘅 情景 ：
我 喺 明朝 嘅 皇宮 裏 便 ，崇禎 皇帝 黃昏 嘅 時候 嚟到 ，佢 讚 我 生得 好 美貌 。
第二日 ， 皇帝 冇 上朝 ， 一直 喺 寢 殿 裏 便 陪住 我 ， 要 我 唱歌 畀 佢 聽 ， 又 同 我 調脂 抹粉 ，攞 起 眉筆 嚟 同 我畫 眼眉 。
佢 應承 封 我 做 貴妃 ，將來 再 封 我 做 皇后 。
佢 話 從 今 之後 ，皇宮 裏 便 嘅 妃嬪 貴人 ，佢 再 冇 一個 睇得上眼 喇 噉 。
皇帝 好 後生 ，笑得 好 歡暢 嘅 時候 ，突然間 呢 ，會 定 一定 噉 發吽逗 嘅 。
佢 係 皇帝 ，但係 喺 我 心裏 便 ，佢 同 以前 嗰啲 嚟 妓院 嘅 王孫公子 亦 冇 咩 嘢 唔同 吖 。
三日 裏 便 ，佢 日日夜夜 一步 都 冇 離開過 我 。
到咗 第四日 朝頭早 ，我 醒咗 啊 ，見到 身邊 有 個人 ，塊面 啊 一啲 血色 都 冇 ，兩個腮 都 凹咗 入去 ，眉頭 皺 到 緊緊 ，就係 發夢 啊 佢 都 喺度 憂心 。
我諗 ：呢個 就係 皇帝 啊 ？佢 做咗 皇帝 ，點解 仲 咁 唔快活 呢 ？
嗰日 佢 去 上朝 嘞 ，中午 嘅 時候 返嚟 ，面色 更加 白 喇 ，眉頭 皺得 更加 緊 嘞 。
佢 忽然間 向 我 大發脾氣 ，話 我 耽誤 咗 國事 ，佢 話 ：
佢 係 英明 之 主 ，唔能夠 沉迷 女色 變咗 做 昏君 喎 。
佢 要 勵精圖治 ，於是 叫 周皇后 ，即刻 就 將 我 送走 。
佢 話 我 係 誤國 嘅 妖女 ，話 我 喺 皇宮 住咗 三 日 ，反賊 李自成 ，就 攻破咗 三 座 城池 。
我 亦 唔 傷心 ，男人 都 係 噉嘅 ，有 咩嘢 事 唔如意 咯 ，就 嚟 埋怨 女人 嘞 。
皇帝 成日 喺度 擔憂 ，個心 怕到 死 ，佢 怕 嘅 ，係 一個 叫做 李自成 嘅 人 。
我 嗰陣時 嘅 心 就 諗嘞 ：
李自成 ，真係 了不起 啊 ，佢 使到 皇帝 咁 怕 佢 ，唔知道 佢 係 點樣 一個 人 呢 ？
陳圓圓 擘開 眼 ，只見 李自成 揮舞 禪杖 ，一杖杖 向 吳三桂 打過去 。
吳三桂 閃避 好 迅速 ，禪杖 啊 始終 打唔中 佢 。
陳圓圓 嘅 心諗 ：佢 身手 仲係 好快 啊 。
咁 多年 嚟 ， 佢 日日 仲 喺 度 練武 ， 因為 ， 因 為 佢 想 做 皇帝 ， 要 帶兵 打 到 北京 啊 。
佢 想起 喺 皇宮 出嚟 之後 ，就 返到去 周國丈 屋企 。
噉啊 有 一日 ，周國丈 大宴 賓客 ，叫 佢 出嚟 歌舞 娛 賓 ，就 喺 嗰 晚 ，吳三桂 見到 佢 嘞 。
到而家 佢 仲 清清楚楚 噉 記得 ，喺 燭光 之下 吳三桂 嗰 對 充滿 情慾 嘅 眼睛 ，隔住 酒席 望過嚟 。
呢種 眼光 啊 ，佢 生平 見得 多 喇 。
佢 忽然間 想到 ：先頭 嗰個 細佬哥 見到 我 嘅 時候 ，亦 露出 噉 嘅 眼光 ，吖 ，真係 好笑 嘞 ，一個 細佬哥 都 會 對 我 色迷迷 嘅 ？
唉 ，男人 都係 噉樣 㗎喇 ，伯爺公 係 噉樣 ，連 細佬哥 亦 係 噉樣 嘅 。
佢 擔 高頭 望咗 韋小寶 一 眼 ，只 見到 佢 非常 興奮 噉 ，睇實 李 吳 兩個人 搏鬥 。
呢個 時候 吳三桂 喺度 反擊 嘞 ，長矛 不斷 噉 向 李自成 刺過去 。
陳圓圓 又 回憶起 往事 嘞 ：
佢 問 周國丈 攞 咗 我 去 。
過咗 冇 幾多 日 ，皇帝 命令 佢 去 鎮守 山海關 ，防止 滿洲 兵 打入嚟 。
不過 李自成 先 攻破 咗 北京 ，崇禎 皇帝 喺 煤山 吊頸 死咗 嘞 。
李自成 嘅 部下 捉咗 我 ，獻咗 畀 佢 。
呢個 咁 粗豪 嘅 大漢 ，就係 崇禎 皇帝 喺 睡夢 之中 都 害怕 嘅 人 咩 ？
佢 攻破咗 北京 ，十分 忙碌 ，明朝 好多 好多 大官 都 畀 佢 殺咗 。
佢 部下 喺 北京城 姦淫 擄掠 ，捉咗 好多 好多人 嚟 拷打 勒索 ，好多好多 無辜 百姓 ，都 畀 佢哋 害死 咗 嘞 。
不過 佢 每日 夜晚 陪住 我 嘅 時候 ，總係 好 開心 嘅 笑得 好 響亮 。
佢 鼻鼾 啊 好大 嘅 ，時時 半夜 嘈醒 我 。
佢 嘅 手臂 、 大 髀 、 心口 嘅 毛 啊 真 係 長 ， 真 係 多 嘞 。
我 從來 都 冇 見過 噉 嘅 男人 。
吳三桂 本來 已經 投降咗 佢 ，不過 一 聽講 佢 將 我 搶咗 去 ，就 去 同 滿洲人 借 兵 ，帶 清兵 打入 關內 。
唉 ，噉 就係 衝冠 一怒 為 紅顏 嘞 。
李自成啊 帶咗 大軍 出去 ，喺 一片 石 嗰 笪 地方 同 吳三桂 大戰 ，點知 滿洲 精兵 突然間 出現 ，噉 李自成 嘅 部下 就 大敗 喇 。
佢哋 話 ，喺 一片 石 戰場 上 啊 滿地 都係 血 ，幾十里 路 之間 ，攤 滿 晒 死屍 。
佢哋 話 ，呢啲 人 都 係 為 我 而 死 嘅 ，係 我 害死 咗 呢 十幾萬 人 。
我 真 係 有 咁 大 嘅 罪 咩 ？
李自成 失敗 之後 返去 北京 ，就 登基 做咗 皇帝 ，叫做 大順國 皇帝 。
佢 帶埋 我 向 西 便 逃走 ，吳三桂 就 一路 噉 跟住 追嚟 。
李自成 雖然 係 打咗 敗仗 ，仲係 笑得 好爽朗 嘅 。
佢 手下 嘅 兵 將 一日 一日 少 嘞 ， 局面 越 嚟 越 不利 ， 但 係 佢 呢 毫不在乎 。
佢 話 佢 本來 乜嘢 都 冇 嘅 ，最多 亦 不過 仍舊 乜嘢 都 冇 啫 ，有 咩 咁 稀罕 唧 ？
佢 話 ，佢 生平 做過 三件 得意 嘅 事 ：
第一 係 逼死咗 明朝 嘅 皇帝 ，第二 係 自己 做過 皇帝 ，第三 ，係 同 天下 第一 美人 瞓過 覺 。
呢個人 講嘢 啊 真係 粗俗 啊 ，佢 話 喺 三件事情 之中 ，最得意 嘅 仲 係 第三件 喎 。
吳三桂 一心一意 亦 想 做 皇帝 ，佢 從來 冇 講過 ，但係 我 知道 。
只不過 佢 個 心 怕 啫 ，一味 喺度 猶豫 ，又 想 逳手 又 唔敢 。
只要 佢 今日 唔 死 呢 ，總 有 一 日 佢 會 做 皇帝 嘅 。
就算 只係 喺 昆明 城 裏 便 做 下 都 好 ，只係 做 一日 噉 都 好 。
永歷皇帝 走咗 去 緬甸 ，吳三桂 追住 去 殺咗 佢 嘞 。
人哋 話 ，有 三個 皇帝 斷送 喺 我 手裏 便 喎 ，崇禎 、永歷 ，仲有 李自成 呢個 大順國 皇帝 。
點解 崇禎皇帝 嘅 賬 ，都 算埋 喺 我 頭上 呢 ？
今日 吳三桂 唔知 會唔會 死 ？
如果 佢 將來 做咗 皇帝 嘞 ，噉 我 又 害死 多 一個 皇帝 嘞 。
大明 嘅 江山 、幾十萬 嘅 兵將 、幾百萬 百姓 嘅 性命 ，仲有 四個 皇帝 ，都 係 我 陳圓圓 害死 嘅 。
不過 我 咩 嘢 壞事 都 冇 做 ， 連 一句 害人 嘅 説 話 亦 冇 講 過 啊 。
陳圓圓 一嶽 高 個頭 ，只見 兵兵乓乓 李自成 同 吳三桂 竄 高 伏 低 ，鬥得 極之 兇狠 。
兩個人 嘅 年紀 雖然 係 老 啊 ，身手 仍然 係 非常 敏捷 。
佢 生平 最怕 見 嘅 就係 男人 廝殺 嘞 ，佢 唔 睇 喇 ，又 回憶起 往事 。
李自成 打咗 個 大敗仗 ，手下 兵馬 都 散咗 喇 。
當時 夜晚 黑𠵼𠵼 ，佢 同 我 亦 失散 埋 。
吳三桂 嘅 部下 呢 遇見 我 ，連忙 送 我 去 獻畀 大帥 。
佢 當然 係 歡喜 到 乜嘢 噉啦 。
佢 話 人哋 鬧 佢 係 大漢奸 ，不過 為咗 我 ，孭 呢個 惡名聲 亦都 好 值得 。
我 好感激 佢 嘅 情意 。
佢 係 大 漢奸 亦 好 ， 係 大 忠臣 亦 好 ， 總之 佢 係 對 我 一片 真情 ， 為 咗 我 乜嘢 都 唔 顧 嘞 。
除咗 佢 之外 ，邊個 都 冇 噉樣 做過 。
嗰陣時候 我 諗 ，從今以後 ，可以 安安樂樂 噉 過日子 嘞 。
咩嘢 一品夫人 二品夫人 我 都 唔 稀罕 ，只係 望 唔好 再 喺 咁多 男人 手裏 便 轉嚟轉去 。
不過 ，不過喺 昆明 住咗 幾年 ，佢 封咗 親王 ，親王 ，就 要 有 福晉 。
福晉 即 係 夫人 啊 。
佢 元配 夫人 早就 去世 。
佢 嘅 細佬 吳 三枚 嚟到 同 我 講 ，王爺 為 咗 福晉 嘅 事 個 心 好 煩 。
照理講 ，應該 等我 做福晉 至係嘅 ，不過 我 嘅 出身 天下 皆知 ，如果 將 我 個 名 報 上去 求 皇上 誥封 ，未免 褻瀆 咗 朝廷 吖 。
我 當然 明白 ，佢 做咗 親王 ，嫌 我 係 妓女 出身 嘅 下賤 女子 ，唔 配 受 皇帝 誥封 。
我唔想佢因為我而覺得為難 ，就唔等吳三枚嘅説話講完 ，就話 ：
呢 件 事 好容易 做 啫 ， 請 王爺 另選 名門 淑女 做 福晉 ， 以免 玷污 咗 佢 嘅 名堂 啊 。
佢 嚟 向 我 道歉 ，話 呢件事 好 對 我 唔住 喎 。
哼 ，做唔做 福晉 ，有 咩 嘢 咁 大不了 唧 ？
不過 我 終歸 明白 一件事 嘞 ，佢 對 我 個 情意 ，亦 不過 係 噉樣 啫 。
我 喺 王府 搬 咗 出嚟 ，因為 王爺 要 正式 結婚 ，要 立 福晉 啊 。
好喇 各位 ，欲知 後事 如何 ，且 聽 下回 分解 。
