前 文 再續 啊 書 接上 一回 啊 。
話說 韋小寶 要 去 審問 行刺 吳三桂 嘅 刺客 。
夏國相話嘞 ：欽差大人 要 去 審問 刺客 ，噉啊 最好啦 。
欽差大人 問 一句 ，勝過 我哋 問 一百句 、一千句 啊 ，就係 怕 王爺 ，誒 王爺佢 。
韋小寶 話 ：王爺 點啊 ？佢 唔准 我 審問 刺客 咩 ？
夏國 相連 忙 話 ：唔係唔係 ，欽差大人 唔好 誤會 。
大人 去 睇 下 個 刺客 ，查明 呢個 女仔 嘅 來歷 ，我哋 王爺 只有 感激 ，冇 話 攔阻 嘅 。
小將 斗膽 有 句 説話 ，請 大人 唔好 見怪 。
唉 你 呢個人 講嘢 啊 吞吞吐吐 ，一啲 大丈夫 氣概 都 冇 嘅 ，實係 平時 啊 跪 老婆 跪得 多過 頭 嘞 快啲 講 啦 快啲 講 啦 。
夏國相 喺 個 心 鬧 佢 嘞 ：你 韋小寶 十八代 祖宗 個個 都 係 畜生 ！
佢 話 ：就 怕 嗰個 刺客 萬一 就係 公主 身邊 嘅 宮女 ，噉 大人 一見 就 提 咗 去 咯 ，噉 王爺 要 起 上嚟 ，小將 交唔出 人 噉 就 好 弊 㗎 喇 。
韋小寶 諗嘞 ：你 呢個 傢伙 真係 狡猾 啊吓 。
將 説話 講 喺 前 便 ，要 我 應承 你 唔 提 刺客 。
你 阿爺 嘩 ，呢個 刺客 係 我 個 老婆 ，畀 你哋 欺負 都 得 嘅 咩 ？
佢 笑 住 話 ： 你 話過 刺客 一定 唔 係 公主 嘅 宮女 嘅 ， 噉 你 使 乜 擔心 唧 ？
夏國相話 ：呢啲 係 小將 估 嘅 啫 ，究竟 係 點 實在 都 唔 清楚 嘅 。
你 係 唔准 我 將 個 刺客 提走 喇 係唔係 啊 ？
不敢 ，不敢 。
欽差大人 請 喺 大廳 坐 一陣 先 ，等 小將 去 稟明 王爺 ，噉 以後 嘅 事 就 由 王爺 同 欽差大人 兩位 作主 嘞 。
就算 王爺 嬲 喇 ，亦 怪唔到 小將 頭上 吖 。
韋小寶 諗嘞 ：原來 你 係 怕 畀 岳父 打𦣇 柚 唔肯 負責 。
就 笑一笑話 ：好 ，你 去 稟告 啦 。
不過 我 同 你 講 啊 ，唔理 王爺 瞓着 抑或 係 醒 ，你 要 同 我 即刻 返嚟 。
你 王爺 身子 要緊 ，我哋 公主 嘅 生死 亦 唔係 小事 。
公主殿下 畀 你哋 世子 欺負 之後 ，而家 都 唔知 點嘅 ，我 要 趕住 返去 睇下 。
佢 因為 怕 吳三桂 昏迷 未醒 ，夏國相 入咗 去 守 喺 床 邊 ，再 唔 出嚟 就 弊 嘞 。
夏國相 躬身 話 ： 決 唔 敢 耽誤 欽差 大人 嘅 事 嘅 。
韋小寶 哼咗 一 聲 冷笑話 ：哼哼 ，呢啲 係 你哋 嘅 事 ，唔係 我 嘅 事 噃 。
夏國相 入咗 去 之後 ，噉 仲 係 過咗 好耐 下 先至 返出嚟 。
韋小寶 已經 等到 好唔耐煩 嘞 。
夏國相話 ：王爺 仲唔係 十分 清醒 。
小將 怕 欽差 大人 等到 心急 嘞 ，所以 匆匆忙忙 稟告 完 之後 ，嚟唔切 等候 王爺 嘅 諭示 ，就 即刻 嚟 侍候 大人 去 審問 刺客 。
欽差大人 ，請 。
韋小寶 岌一岌頭 ，跟住 佢 行 入去 裏便 ，穿過 幾 條 迴廊 就 嚟到 花園 裏便 嘞 。
只見 幾十名 家將 ，手執 兵器 來回 巡邏 ，戒備 森嚴 。
夏國相 帶 佢 嚟到 一座 大 假山 前面 ，向 一名 武官 出示 咗 一支 金 批令箭 ，佢 話 ：
奉王爺諭 ，侍候 欽差 大人 前嚟 審訊 刺客 。
嗰個 武官 驗咗 令箭 躬身 話 ：欽差 大人 請 ，總兵 大人 請 。
打側 個 身 企埋 一便 。
夏國相話 ：小將 帶路 。就 喺 假山 石洞 行入去 。
韋小寶 跟住 佢 行入去 ，行咗 冇 幾多 步 ，就 見到 一道 大 鐵門 ，門 旁邊 有 兩名 家將 把守 。
原來 呢座 假山 啊 係 地牢 嘅 入口 嚟 。
噉 夏國 相 帶住 韋小寶 連 氣 過咗 三道 鐵門 ，就 越行越低 ，嚟到 一間 房仔 前面 。
喺呢度呢 ，裝咗 一堂 好大嘅 鐵閘 ，閘後 便 有 個 少女 坐 喺 地下 ，雙手 捧住 個 頭 ，正 喺度 低聲 飲泣 。
牆上 掛住 幾盞 油燈 ，發出 淡淡 嘅 黃光 。
韋小寶 快步 行 上前 ，雙手 揸住 鐵閘 ，定眼噉 望住 嗰個 少女 。
夏國相話 ：企起身 ，欽差大人 有 說話 問 你 。
嗰個 少女 擰轉 個 頭 ，燈光 就 照住 佢 塊 面 。
韋小寶 同 佢 互相 一望 ，不禁 吖噉 一聲 。
嗰個 少女 即時 企起身 ，手腳 上面 嘅 鐵鏈 啊 咣咣 聲 ，少女 話 ：點解 ，點 ，點解 你 喺 呢處 嘅 ？
兩個人 都 驚奇 到 極 。
韋小寶 點都 想唔到 啊 ，呢個 少女 唔係 阿珂 ，而係 沐王府 嘅 小郡主 沐劍屏 啊 。
佢 定 一定神 ，擰轉頭 問 夏國相 話 ：點解 將 佢 韞 喺 呢處 啊 ？
夏國相話 ：大人 識得 刺客 咩 ？
佢 ，佢 真係 服侍 公主 嘅 宮女 啊 ？
佢 嗰種 驚奇法 啊 ，真係 不下於 韋小寶 同 沐劍屏 啊 。
韋小寶話 ：佢 ，佢就係 行刺 吳 ，誒 行刺王爺 嘅 刺客 啊 ？
夏國相話 ：係啊 ，呢個 女仔 膽大到極 ，做 啲 噉 嘅 犯上作亂 嘅 嘢 ，噉 到底 係 邊個 人 主使 嘅 ，請 大人 詳加 審問 。
韋小寶 稍為 放心 嘞 佢 諗 ：
原來 大家 都 誤會晒 ，行刺 吳三桂 嘅 唔係 阿珂 ，係 沐家 嘅 小郡主 。
佢 父親 畀 吳三桂 害死 ，噉 佢 嚟 行刺 吳三桂 為 父親 報仇 一啲 都 唔 稀奇 啦 。
佢 又 問 夏國 相話 ：佢 自己 話 叫做 王可兒 啊 ？係 公主 身邊 嘅 宮女 ？
夏國相話 ：我哋 捉到 佢 之後 呢 問 佢 姓名 來歷 ，主使人 係 邊個 ，佢 乜嘢 都 唔肯 講 。
但係 有人 認得 佢 係 宮女王可兒 ，唔知 係唔係 呢 ？要 請 大人 指示 。
韋小寶 諗 ：小郡主 被 擒 ，我 一定 要 設法子 救 佢 嘅 ，佢 亦 係 我 老婆 吖 嘛 做人 唔 能夠 偏心 㗎 。
佢 就 話 ：佢 梗係 公主 身邊 嘅 宮女 啦 ，公主 十分 歡喜 佢 嘅 。
講完 ，向 沐劍屏 眨眨眼 。
你 點解 嚟 行刺 平西王 啊 ？嫌 命 長 啊 你 ？
到底係邊個主使你嘅 ？快啲招供 ，免致皮肉受苦 。
沐劍屏 話 ：吳三桂 呢個 大漢奸 ，認賊作父 ，將 大明 江山 奉送 畀 清廷 ，凡係 漢人 邊個 唔想 攞 佢 條命 啊 ？
可惜 我 唔能夠 殺死 呢個 奸賊 唧 。
韋小寶 詐 假意 發 惡話 ：你個 妹 釘 ，咁 無法無天 。
你 喺 皇宮 住 咗 咁 耐 喇 ，一啲 規矩 都 唔 懂 。
膽敢 講埋 呢啲 大逆不道 嘅 説話 ，你 唔怕 殺頭 啊 ？
沐劍屏 話 ：你 喺 皇宮 住得 耐過 我 好多 ，你 又 知道 咩嘢 規矩 啊 ？
我 怕 殺頭 ，就 唔 嚟 昆明 殺 吳三桂 呢個 大 漢奸 喇 。
韋小寶 行 上 一步 ，喝佢 話 ：
快啲 招供啊 ，到底 係 邊個 指使 你 嚟 行刺 嘅 ？同黨 仲有 咩 嘢 人 ？
一便講 ，一便 右手 手指 公 向 身後 指咗 幾指 ，要 小郡主 拉 夏國 相 落水 。
佢 個 身 呢 擋住 手指 ，夏國相 企 喺 佢 後 便 ，見 唔到 佢 嘅 手勢 同埋 眨眉眨眼 嘅 神情 。
沐劍屏 會意 喇 ，即刻 指住 夏國相 大聲 噉 話 ：
我嘅 同黨 就係 佢 ，係 佢 指使 我 嘅 。
嘩 ，夏國 相嬲 啊 ，佢 話 ：亂噏 無為 啦 你 。
你仲想賴 ？ 你 叫 我 行刺 吳三桂 ， 你 話 吳三桂 呢 個人 啊 ， 壞到 透 嘞 ， 大家 都 憎 死 佢 。
你 話 ， 你 話 刺死 咗 吳三桂 之後 ， 你 就 可以 ， 誒 可以 。
佢 唔 知道 夏國相 係 咩 嘢 身份 ，講 大話 又 唔叻 ，一時 接 唔落去 。
韋小寶話 ：佢 就 可以 升官 發財 ，從此 就 冇人 打佢 鬧佢 咯 係嘛 ？
沐劍屏 大聲 話 ： 冇 錯 喇 ， 佢 話 吳三桂 呢 時時 咁 打 佢 鬧 佢 ， 對 佢 好惡 嘅 ， 個心 啊 好 嬲 佢 ， 早就 想 親手 殺 咗 吳三桂 喇 ， 就 係 ， 就 係 冇 膽唧 。
夏國相 又 喝 佢 又 鬧 佢 ，沐劍屏 完全 唔理 啊 。
韋小寶 喝 佢 話 ：喂 ，你 講嘢 要 因住 噃 ，你 知道 呢位 將軍 係 邊個 嘛 ？
佢 係 平西王 嘅 女婿 夏國相 夏 總兵 。
平西王 雖然 有時 打佢 鬧佢 ，噉 都係 為咗 佢 好啫噃 。
講完 ，喺 心口 戙起 手指公 ，讚佢 講得 好 。
沐劍屏 話 ：夏總兵 同 我 講嘞 ，一 殺咗 吳三桂 呢 ，佢 自己 就 可以 做 平西王 。
佢 話 ，無論 行刺 成功 唔 成功 ，佢 都 會 放 我 出去 ，唔使 我 受苦 嘅 。
不過 佢 就 韞咗 我 喺 呢處 。
夏總兵 ，我 聽 你 吩咐 做咗 呢件事 嘞 ，你 幾時 放 我 出去 啊 ？
夏國 相嬲 到 極 啊 佢 諗 ：
你呢個臭妹釘 ，本來 唔識得 我嘅 ，都係 呢個 僆仔 講 嘅 啫 。
呢個 衰仔 吖 為咗 要 救 你 ，攞 老子 嚟 開玩笑 。
哦 你 兩個 人 本來 係 識 嘅 ， 真 係 點都估 唔 到 啊 。
佢 話 ：你 再 係 亂咁 噏 ，我 就 打到 你 皮開肉綻 、死去活來 。
沐劍屏 吃咗 一驚 嘞 就 唔敢 再 講 。
佢 諗 ：韋小寶 如果 救 自己 唔到 ，呢個 武官 實 會 狠狠 噉 對付 自己 嘅 。
韋小寶話 ：你 心裏 便 有 咩 説話 ，都 講晒出嚟 啦 ，唔怕 㗎 。
呢位 夏總兵 係 我 個 好朋友 ，如果 真係 佢 指使 你 行刺 平西王 嘅 ，你就 老老實實 同 我 講 ，我 亦 唔會 洩漏 出去 嘅 。
講完 ，又 猛咁 打眼色 。
沐劍屏 話 ：佢 ，佢 會 打死 我 嘅 我 唔 講 嘞 。
韋小寶 話 ：噉樣 講 係 真 㗎 嘞噃 ？
講完 ，歎 一口氣 ，退後 幾步 擰咗 擰頭 。
夏國相話 ：大人 明鑑 ，反賊 冤戾 長官 呢啲 事 時時 都有 嘅 唔好 信 佢 啊 。
韋小寶 沉吟 話 ：講 係 噉 講 。
不過 平西王 平時 對 夏總兵 好 嚴 ，夏總兵嘅 心 好 嬲 佢 ，想 殺咗 外父 ，呢啲 説話 ，恐怕 佢 一個 細路 女 憑空 都 捏造 唔出 嘅 。
等 平西王 傷好 翻 之後 ， 我要 好好 地 勸 下 佢 ， 免致 你 哋 外父 同 女婿 勢成 ， 勢成 咩 水 啊 咩 咩 火 嘅 。
先頭 夏國 相 聽見 沐劍屏 冤戾 自己 ，雖然 係 嬲 啊 ，不過 亦 唔係 點 在意 。
因為 自己 一生 功名 富貴 ，都係 平西王 畀 嘅 ，冇人 會 信 自己 有 不軌 嘅 圖謀 。
但係 韋小寶 如果 去 同 平西王 講 及 呢件事 ，外父 啊 實 以為 自己 心中 懷恨 ，竟然 對 外人 口出 怨言 。
外父 近年來 脾氣 暴躁 ，對 下屬 極 嚴 嘅 ，一 聽到 呢番 説話 ，恐怕 即刻 就 有 不測之禍 噃 ，就 連忙 話 ：
王爺 對待 小將 仁至義盡 ，就 當 係 親生仔 一樣 ，小將 真係 感激萬分 啊 。
欽差大人 千祈唔好 同 王爺 講 呢啲 説話 啊 。
韋小寶 見 佢 着急 喇 就 微微 笑話 ：
人 無 傷 虎 意 就 虎 有 害 人 心 。
恩將仇報嘅事 世間上 係 有嘅 。
平西王 待 我 唔錯 ，我 一定 要 勸佢 好好 提防 ，免致 畀 自己人 害咗 。
平西王 兵強馬壯 ，身邊 有 無數 武功 高手 防衞 ，噉 外人 要害 佢 難啊 。
不過 呢 ，家賊 難防 ，自己人 下毒手 ，恐怕 就 避唔過 喇 。
夏國 相越 聽 就 越 心驚 ，明知 韋小寶 個 説話 係 無中生有 ，佢 嘅 用意 完全 係 搭救 呢個 少女 嘅 啫 。
不過 平西王 疑心 極重 ，對 人人 都 猜疑 。
呢 前幾日 佢 親兄弟 吳 三枚 啊 ，行 入 後堂 ，唔記得 除低 佩刀 唧 ，就 畀 佢 親手 繳咗 把 刀 ，痛罵 咗 一餐 啊 。
韋小寶 如果 同 平西王 去 講 咩嘢 外敵 易 擋 ，家賊 難 防 ，平西王 就算 唔 信 啊 ，呢番 説話 喺 佢 個 心裏 便 生 咗 根 嘞 ，對 自己 前程 必定 好 有 妨礙 嘅 ，就 低聲 話 ：
欽差大人 提拔 栽培 ，小將 永遠 唔敢 忘記 你 嘅 大恩大德 。
大人 有 咩 吩咐 咯 ， 小將 赴湯蹈火 在所不辭 啊 。
就係 有天 大 嘅 關係 ，小將 ，亦 一力 承擔 就係啦 。
韋小寶 笑笑口 話 ：我 係 為 你 着想 咋 。
呢 個妹 釘 嘅 説 話 ， 天知地知 ， 你 知 我 知 ， 仲有妹 釘 自己 知 ， 總共 係 三個 人 知道 。
本來呢 ，你 一早 將 佢 一刀 殺咗 滅口 ，噉 就 乾淨利落 ，冇 手尾 跟 嘞 。
但係 而家 呢啲 説話 我 聽咗 嘞 喎 ，你 要 滅口 呢 就 要 連 我 都 一刀 殺埋 先至 得 。
不過 我 手下 啲 侍衞兵 將 ，早就 提防 呢一着 喇 ，幾千人 都 喺 王府 外 便 等候 ，噉 你 要 殺 我 ，比較起嚟 ，就 要 難多 噉 一啲啲 。
夏國相 面色 都 變 咗 ， 請 咗 個 安話 ： 小將 萬萬 不敢 ， 小將 萬萬 不敢 。
韋小寶 笑住 話 ：既然 滅唔到 口嘞 ，呢番 説話 ，遲早 都 會 傳翻去 平西王 嗰度 嘅 。
夏總兵 ，你 係 十大 總兵 嘅 頭頭 ，又 係 平西王 嘅 女婿 ，其餘 嗰 九位 總兵 ，仲 有 王府 嘅 文武百官 呷 你 嘅 醋 嘅 人 恐怕 唔 少 。
開講 都有 話咯 ：開門 七件事 ，柴米油鹽醬醋茶 。
噉既然 有人 呷醋 咯 ，加油 添醬 嘅事 當然 就 免不了 啦 。
只要 漏咗 一啲啲 風聲 出去 ，平西王 嘅 耳邊 就 唔係 點 清靜 嘞噃 。
人人 喺 佢 老人家 耳邊 講 你 嘅 壞話 ， 加柴 添草 煽風點火 ， 噉 平西王 受 咗 傷 ， 病 緊 嘅 脾氣 ， 唔 會 係 好好 嘅 啩？
噉誒 ，啊噉誒 ，唉 。
講完 猛咁 擰頭 。
韋小寶 不過 係 照常 情 推測 ，夏國 相 就 諗嘞 ：
呢個 僆仔 對於 我哋 王府 嘅 事 ，都 知道 得 好 清楚 噃 ，妒忌 我 個人 的確 唔少 。
佢 就 話 ：大人 為 小將 着想 ，小將 感激不盡 啊 ，就係 唔知 點樣 先至 好唧 。
韋小寶 話 ：呢件事 做起嚟 呢 ，本來 都 幾 為難 嘅 ，好啦 ，我 就 孭 上身 ，交 你 呢個 朋友 。
你 將 呢個 妹釘 交畀 我 帶翻去 ，話 係 公主 要 親自 審問 。
講到 呢處 ，哄 個嘴 埋去 佢 耳仔 邊 低聲 話 ：
今晚 黑 ，我 將 佢 殺咗 ，放 消息 出嚟 ，話 佢 死 都 唔肯 招供 ，受刑 頂唔住 喇 ，就 嗚呼哀哉 嘞 。
噉就 大事化小 小事化無 ，一乾二淨 ，一清二楚 啦嘛 。
夏國相 早就 估到 佢 要 講 呢 幾句 説話 㗎 嘞 ，佢 諗 ：
豈有此理 你個 衰仔 吖 ，你 想 救 呢個 妹釘 ，仲要 我 多得 你 ，係 你個 衰仔 幫咗 我 一個 大 忙 。
哎不過 你 點 會 識得 呢個 妹釘 嘅 呢 ？真係 奇喇 。
佢 問 ：大人 的 確認 清楚 ，佢 係 公主 身邊 嘅 宮女 啦 嘛 ？
小將 先頭 盤問 佢 嘅 時候 ，佢 對 公主 相貌 年紀 ，宮裏 便 嘅 情形 ，講得 都 唔係 點 啱 㗎 噃 。
韋小寶 話 ：佢 唔想 連累 公主 ，梗係 特登 講錯 啦 。
呢個 妹釘 忠於 公主 ，又 不負 你 夏總兵 嘅 重託 ，好極 喇 噉就 。
夏國 相聽 佢 將 說話 一 轉 ，又 轉到 自己 頭上 ，哎咪 搞喇 連忙 話 ：
大人 嘅 妙計 果然 係 高明 啊 。
誒 ，就 請 大人 寫 個 手諭 ，話 將 犯人 提咗 去 ，等 小將 向 王爺 交代 都 好啲 吖 。
韋小寶 笑住 話 ：你 阿爺 吖 ，老子 盲字 都 唔 識 一個 ，寫 咩 手諭 腳諭 啊 ？
喺 身邊 攞出 一支 短筒 火槍 就 話 ：
呢支槍 ，係 你 王爺 送畀 我 嘅 禮物 ，你 攞 去 畀 王爺 睇下 ，就 話 我 奉公主之命 ，將 犯人 提咗 去 ，呢支 火槍 就 係 證物 喇 。
夏國相 雙手 接過 收埋 喺 身邊 。
出去 叫咗 兩名 武官 入嚟 ，吩咐 佢哋 打開 鐵閘 ，除咗 沐劍屏 嘅 腳鐐 ，但係 呢 ，仍然 戴住 手銬 。
夏國相 揸 住 手銬 上面 嘅 鐵鏈 ， 一直 送到 王府 門外 ， 將 鐵鏈 交 咗 畀 韋小寶 揸 住 ， 又將 手銬 嘅 鎖匙 交 咗 畀 佢 ， 就 大聲 話 ：
欽差大人 奉 公主 殿下 諭示 ，將 女犯 一名 提去 審問 ，大家 小心 看守 ，唔好 畀 犯人 逃跑 。
韋小寶 話 ：你 怕 我 提咗 犯人 會 抵賴 啊 ？
而家 呢處 人人 都 睇見 嘞 ，都 聽見 嘞 ，我 要 賴 ，都 賴唔 了 啦 。
夏國相 躬身 話 ：大人 開玩笑 啦 ，小將 決 冇 噉 嘅 意思 。
你 去 同 王爺 講 ，話 我 好 掛住 佢 老人家 身子 ，聽日 再 嚟 請安 問候 啦 。
不敢當 。
話説 韋小寶 帶住 沐劍屏 返到去 安阜園 自己 間 屋 ，閂埋 房門 ，笑嘻嘻 噉 話 ：
好老婆 ，到底 係 咩嘢 一回事 唧 ？
沐劍屏 醜 到 面 都 紅晒 ，佢 話 ：一見面 就 冇 句 好話 講 嘅 你 。
舉起 雙手 ，手銬 啲 鐵鏈 叮叮噹噹 咁 響 。
你 同 我 除咗 佢 先至 講 啦 。
韋小寶 笑住 話 ：我 同 你 親熱 下 先 ，一 除咗 手銬 啊 你 就 唔 肯 㗎 喇 。
講完 ，一手 攬住 佢 條腰 。
沐劍屏 好 急 啊 佢 話 ：你 ，你又 嚟 欺負 我 喇 。
韋小寶 話 ：好好好 ，我 唔 欺負 你 ，噉 你 嚟 欺負 我 啦 。
將 自己 嘅 面珠 哄埋 佢 嘴唇 處 ，輕輕 掂咗 一掂 ，就 攞出 夏國 相交 嚟 嘅 鎖匙 開 咗 手銬 ，拉住 佢 一拍 噉 坐 喺 床邊 ，問起 佢 行刺 吳三桂 嘅 原因 。
沐劍屏 話 ：洪教主 同 夫人 收到 你 送去 嘅 嘢 ，好 歡喜 啊 ，就 畀 解藥 我 食 ，解咗 身上 嘅 毒 ，就 派 赤龍 副使 帶埋 我 嚟 見 你 ，要 你 忠心 辦事 。
夫人 話 ：教主 同 夫人 知道 你 想見 我 ，所以 ，所以 。
韋小寶 揸住 佢 隻手 話 ：所以 派 你 嚟 做 我 老婆 呢 ？
唔係㗎唔係㗎 。
夫人 話 怕 你 成日 掛住 我 ，唔能夠 安心 做事 啫 嘛 ，佢 真係 冇 講 第二啲 嘢 呢 。
夫人 一定 講咗 嘅 ，你 自己 呃 我 唔 講 啫 嘛 。
你 如果 唔信 ，見到 夫人 嘅 時候 你 問 佢 吖 。
韋小寶 見 佢 急 到 眼淚 都 混晒擎 嘞 ， 怕 激 到 佢 喊 ， 佢 就 話 ：
好好 好 ， 夫人 冇 講 ， 冇 講 。
不過 你 自己 係咪 好 掛住 我 吖 ？都 好 想 見 我 吖 ？
沐劍屏 擰轉 塊面 ，輕輕 岌一岌 頭 。
韋小寶 話 ：噉嗰個 赤龍 副使 呢 ？點解 你 又 去 行刺 吳三桂 㗎 ？
沐劍屏 話 ：我哋 大前日 嚟到 昆明 ，就 想 嚟 見 你 㗎 嘞 ，誰知 喺 西門外 便 ，撞到 我 阿哥 同 柳師父 。
吓 ？你 阿哥 同 柳師父 都 嚟咗 昆明 啊 ？我 一啲 都 唔 知道 噃 。
敖師哥 、劉師哥 佢哋 都 嚟咗 啊 ，淨係 吳師叔 有 病 冇 嚟 唧 。
大家 嚟到 昆明 ，安排咗 個 計劃 ，要 刺殺 建寧 公主 。
韋小寶 吃咗 一驚 佢 話 ：
要 刺殺 公主 ？ 點解 啊 ？ 公主 又 冇 得罪 你 哋 沐 王府 啊 。
我 阿哥 話 ，我哋 要 推冧 吳三桂 呢個 大 漢奸 ，而家 有 一個 大好 嘅 機會 。
清廷 皇帝 將 個 妹 嫁畀 吳三桂 個 仔 ，我哋 如果 將 公主 殺咗 ，皇帝 一定 會 怪 吳三桂 保護 不周 ，就 會 下 聖旨 嚟 責罰 佢 ，噉 呢 ，多數 就 會 逼到 吳三桂 造反 㗎 喇 。
韋小寶 聽到 呢處 手板 都 出晒 冷汗 喇 。
嗱 各位 ，欲知 後事 如何 ，且 聽 下回 分解 。
