前 文 再續 啊 書 接上 一回 啊 。
話說 韋小寶 將 一部 正紅 、一部 鑲紅 嘅 經書 ，攞 去 畀 肥頭陀 同 陸高軒 。
韋小寶 話 ： 陸先生 ， 你將 經書 呈 畀 教主 同 夫人 ， 就 話 我 探聽到 ， 吳三桂 知道 另外 六部 經書 嘅 下落 。
我 白龍 使為 教主 同 夫人 辦事 ，忠字 當頭 ，十萬 死 百萬 死不辭 ，因此 我 要 去 雲南 赴 湯 蹈火 ，搵 啲 經書 。
肥尊者 ，你 護送 我 再 為 教主 立功 啦 。
肥陸 兩個 人 欣然 答應 啊 。
肥頭陀 話 ：陸兄 ，白龍 使 立 呢個 大功 ，我哋 兩個人 亦 跟住 有 好處 。
教主 賜畀 我哋 嘅 豹胎 易筋丸 嘅 解藥 ，你 務必要 盡快 派 靠得 嘅 人 ，送嚟 雲南 啊 。
陸高軒 就 猛話 一定 一定噉 ，佢 諗 ：
白龍 使 小小年紀 ，已經 咁 使得 嘞 ，教主 呢個 大位 啊 ，日後 非 傳畀 佢 不可 。
我 而家 唔 乘機 討好 佢 更 待 何時 呢 ？
就話 ：啲 解藥 非 同小可 ，屬下 決 唔 放心 交畀 第二個 人 ，我 一定 親自 送嚟 。
白龍使 ，屬下 對 你 忠心耿耿 ，一定 要 服侍 你 食咗 解藥 之後 ，屬下 同 肥兄 再 食 。
否則 ，就算 豹胎易筋丸 嘅 藥性 發作 ，屬下 有 解藥 喺 手 啊 ，亦 寧可 死 都 決唔 先 食 嘅 。
韋小寶 笑 住 話 ： 好極 喇 ， 你 對 我 咁 忠心 ， 我 一定 唔 會 忘記 你 嘅 好處 嘅 。
陸高軒 好 歡喜 ，躬身 話 ：屬下 恭祝 白龍使 永享 清福 ，壽 比 南山 。
韋小寶 個心 諗 ： 我 只 係 比 教主 低 咗 一級 啫 噃， 永 享清福 ， 壽比南山 ， 噉 都 唔 錯 啦 。
噉啊韋小寶 回宮 之後 冇 幾 耐 ，就 有 太監 嚟到 宣旨 。
封韋小寶 為 一等子爵 ，賜婚 使 ，護送 建寧公主 前去 雲南 ，賜婚 平西王 世子 吳應熊 。
吳應熊 封 三等 精奇尼哈番 ，加 少保 ，兼 太子太保 。
韋小寶 攞咗 錢 賞畀 太監 ，佢 諗 ：
真係 便宜咗 吳應熊 呢個 衰仔 嘞 ，娶咗 個 美貌 公主 ，又 封咗 個 大官 。
講古 先生 講 精忠 岳傳 ，岳飛 岳爺爺 官 封 少保 。
吳應熊 你 個 衰仔 啊 點 同 岳爺爺 比 呢 ？
不過 皇上 封 佢 做 個 大官 ，只不過 係 叫 吳三桂 唔會 懷疑 啫 ，遲早 會 斬 佢 個人頭 㗎 。
鰲拜 又 唔係 官封 少保 咩 ？
嗯 冇錯冇錯喇 ，岳飛 岳少保 亦係 畀 皇帝 殺 嘅 。
可見 官 封 少保 就 要 殺 佢 個 頭 。
嗯 ，咪䎺嘞 ，下次 皇上 如果 封 我 做 少保 啊 ，死 我 都 要 推辭 喇 唔 做 。
噉韋小寶 去 見 皇帝 謝恩 ，佢 話 ：
皇上 ，奴才 呢次 去 雲南 同 你 辦事 ，你 有 咩 錦囊妙計 就 講畀 我 聽啦 。
康熙 哈哈 大笑話 ：
哈哈哈 ，話 你 小桂子 冇 學問 啫 ，錦囊妙計 係 封住 喺 錦囊 裏 便 㗎嘛 。
天機 不可 洩漏 啊 ，點 能夠 講畀 你 聽 先 㗎 ？
原來 係 噉嘅 ，可惜 我 唔識字 呢 ，皇上 如果 有 錦囊妙計 ，就 要 畫 成 圖畫 至 得 。
皇上啊 ，上次 你 吩咐 我 去 清涼寺 做 主持 ，嗰道 聖旨 啊 畫得 真係 靚喇 。
自古以來 ，聖旨 唔 用 文字 而 用 圖畫 ，恐怕 以 我哋 君臣 兩個人 開始 嘞 。
呢啲 就 叫做 前無古人 ，後無來者 喇 。
哈哈哈哈 ， 好極 嘞 好極 嘞 ， 你 記性 真 係 好 嘞 ， 教 咗 你 一句 成語 你 就 記住 。
皇上 教 嘅 我 總 係 記得 嘅 ， 人 哋 教 嘅 呢 ， 就 記來 記去 都 總記 唔 住 嘅 都 唔 知 點解 。
嗱 ，好似 一言既出 ，嗰隻 馬 難追 噉吖 ，吖 嗰匹 係 咩嘢 馬 硬係 記唔住 嘅 。
講到 呢處 ，太監 嚟 稟報 話 建寧公主 嚟 辭行 。
康熙 睇咗 韋小寶 一 眼 ，就 吩咐 進見 。
建寧公主 一 入 書房 ，就 撲 喺 康熙 懷抱 裏 便 放聲 大哭 。
佢 話 ：皇帝 哥哥 ，我 ，我唔願 嫁去 雲南 啊 ，我 求下 你 收回 聖旨 啦 。
康熙 拍下 佢 膊頭 好聲好氣 噉 話 ：
女仔 大個 咗 ， 總 係 要 嫁人 㗎 嘛 ， 我同 你 揀 嘅 丈夫 好 唔 錯 㗎 。
小桂子 ，你 同 公主 講 下 ，嗰個 吳應熊 嘅 相貌 好 英俊 㗎 係咪 啊 ？
韋小寶話 ：係啊 ，公主 ，你 嗰位 額駙 啊 ，係 雲南省 有名 嘅 美男子 。
上次 佢 嚟到 北京 ，前門外 有 十幾個 姑娘 打交 ，打出 三條 人命 啊 。
建寧公主 打 個 特嘞 佢 問 ：點解 啊 ？
平西王 世子 生得 威啫 ，天下 都有名 㗎 。
佢 進京 嗰 日 ，北京 城 內 成千成萬 嘅 姑娘 太太 ，逼住 去 睇 佢 。
有 十幾個 姑娘 你 逼 我 我 逼 你 ， 就 打起 嚟 啦 。
建寧公主 啊 破涕為笑 佢 話 ：呸 ，你 呃人 嘅 ，邊度 有 噉 嘅 事 呢 ？
公主啊 ，你 估 皇上 點解 派 我 護送 你 去 雲南 ，又 吩咐 我 帶 多啲 侍衞兵 勇 ，好好地 保護 你 吖嗱 ？
皇帝 哥哥 錫 我 咯 。
冇錯喇 ，呢啲 係 皇上 嘅 英明 遠見 ，深謀遠慮 。
你 諗下 吖 ，額駙 咁 英俊 瀟灑 ，唔知 有 幾多 姑娘 想 嫁 畀 佢 做 夫人 啊 。
而家 畀 你 一下 就 佔咗 去 ，天下 唔知 打爛 咗 幾多 醋缸 、醋埕 、醋罐 、醋罌 。
有啲 會武藝 嘅 姑娘 一嬲 啊 ，講唔定 要 嚟 同 你 為難 。
雖然 公主 自己 武藝 高強 啊 ，終歸 係 寡 不敵 眾 㗎 嘛 係唔係 ？
所以 奴才 呢 一次 護送 公主 南下 ，我 嘅 擔挑 啊 真係 唔 輕 啊 ，要 對付 呢 一隊 糖醋 娘子軍 ，你 諗下 ，幾 難 啊 。
建寧公主 笑住 話 ：咩嘢 糖醋 娘子軍 唧 ？你 真係 會 亂噏 一通 㗎喇 。
佢 呢個 時候 笑靨 如 花 ，面珠 上 便 仲 掛住 幾 滴 亮晶晶 嘅 淚珠 。
佢 對 康熙 話 ：皇帝 哥哥 啊 ，小桂子 送 我 去到 雲南 之後 ，叫 佢 唔好 返嚟 咯 ，叫 佢 喺度 陪 我 傾偈 、解悶 。
如果 唔係 啊 ，我 就 唔 去 啫 。
康熙 笑 住 話 ： 好 ， 好 ， 等 佢 陪 你 耐 啲 ， 等到 一切 都 習慣 喇先 再講 啦 。
嗯 ，我 要 佢 永遠 陪住 我 ，唔 畀 佢 返嚟 。
韋小寶 伸 一伸 條 脷 佢 話 ：噉 唔得 嘅 ，你 嘅 駙馬爺 如果 見 我 討厭 咯 ，嬲 起 上嚟 一刀 將 我 斬 咗 。
冇咗 個人頭 嘅 小桂子 就 唔能夠 陪 公主 傾偈 解悶 嘞 。
建寧公主 將 個 嘴 一扁 話 ：哼 ，佢 敢 ？
康熙話 ：小桂子 ，你 去 雲南 之前 有 件事 同 我 查下 先 。
喺 上書房 唔見咗 一部 佛經 ，呢件事 有啲 奇怪 嘞 ，連 呢處 嘅 嘢 ，竟然 亦 有人 敢 偷 ？
講到 最後 一句 説話 嘅 時候 ，語氣 變得 幾 嚴峻 。
韋小寶 應 佢 話 ：係 。
建寧公主 插口話 ：皇帝哥哥 啊 ，你 呢部 佛經 ，係 我 攞咗去 嘅 ，嘻嘻 。
你 攞 去 做 咩嘢 啊 ？點解 唔 問過 我 先 呢 ？
係 太后 吩咐 我 攞 嘅 。
太后 話 ，皇帝 每日 要 辦 一千幾百件 軍國大事 ，問 你 攞 部 佛經 呢啲 噉 嘅 小事 ，就 唔使 嚟 麻煩 你 喇 。
康熙 哼咗 一 聲 就 唔 出 聲 嘞 。
建寧公主 𠼮佢 話 ：
皇帝 哥哥 啊 ，你 唔好 嬲 我 啦 。
以後 我 去咗 雲南 ，就 想 再 嚟 呢度 攞 你 嘅 書 都 嚟唔到 喇 。
康熙 聽 佢 講得 咁 可憐 ，心腸 當堂 軟翻晒 嘞 ，就 話 ：
你 去咗 雲南 想要 乜嘢 咯 ，即管 問 我 要 啦 。
其實 ，平西王府 裏 便 ，又 有 乜嘢 冇 吖 ？
韋小寶 喺 上書房 出嚟 ，班 侍衞 啊 、太監 啊 紛紛 恭喜 佢 。
每個 侍衞 都 希望 能夠 帶 佢 去 雲南 ，吳三桂 富可敵國 ，呢 一趟 美差 啊 ，發 一筆 財 就 十拿九穩 㗎 嘞 。
到咗 下午 ，康親王 入嚟 皇宮 見 韋小寶 。
佢 喜氣洋洋 噉 話 ：兄弟 ，經書 已經 呈繳 畀 皇上 嘞 ，皇上 啊 好 高興 ，認真 誇獎 咗 我 幾句 啊 。
韋小寶 話 ：噉就好啦 。
康親王 話 ：你 冇 幾耐 就 要 去 雲南 咯 ，今日 阿哥 做 個 小東 ，一來 ，慶賀 你 封咗 子爵 ，二來 同 你 餞行 啊 。
拖住 佢 隻 手 出咗 皇宮 。
噉呢次 就唔係 去 康親王府 ，而係 去咗 東城 一座 精緻 嘅 住宅 。
呢 座 屋 雖然 冇 康親王 府 咁 宏偉 啊 ， 但 係 雕樑畫棟 、 花木 山石 ， 陳設 得 非常 之 奢華 。
康親王 話 ：兄弟 ，你 睇 呢間 屋 點 啊 ？
韋小寶 笑住 話 ：好極嘞 ，真係 靚啊 ，王爺 真係 會 享福 嘞 。
呢處 係 唔係 小福晉 嘅 住宅 啊 ？
康親王 微微笑 冇 回答 ，噉 啊 請 佢 行 入 大廳 。
大廳 裏 便 有 好多 貴官 喺度 等候 ，索額圖 、多隆 等 都 出嚟 迎接 ，噉 大家 都 連聲 恭喜 。
康親王 笑住 話 ：我哋 今日 慶賀 韋大人 高升 ，照理 佢 應該 坐 首席 至 係嘅 。
不過 佢 係 本宅 嘅 主人 噃 ，只好 坐 主位 喇 。
韋小寶 好奇怪 噉 話 ：咩嘢 本宅 主人 喇 ？
呢座 住宅 ，喺 韋大人 嘅 子爵府 。
係 阿哥 同 你 預備 嘅 。
車夫 、廚子 、僕人 、丫鬟 ，冚𠾴唥 都有喇 。
不過 匆匆忙忙 ，恐怕 好唔夠 周到 ，兄弟 見 缺 咩 咯 ，即管 吩咐 ，叫人 嚟 我 屋企 攞 就係喇 。
韋小寶 真係 驚喜交集 嘞 ，自己 幫咗 康親王 呢個 大忙 ，一分 錢 本錢 都 唔 使 ，又 冇 一絲一毫 風險 嘅 。
雖然 明知 佢 一定 有 酬謝 嘅 ，不過 就 點都 想唔到 竟然 會 送 噉樣 一件 重禮 。
佢 一時 都 講唔出 説話 喇 ，只係 話 ：噉 ，噉 ，唉 噉 點得 㗎 ？
康親王 捻 一捻 佢 隻 手 ，就 話 ：
我哋 兩 兄弟 係 過命 嘅 交情 ，仲 分 咩 彼此 呢 ？
嚟嚟嚟 ，大家 開懷 飲酒 。
邊 一位 唔 飲醉 嘅 ，今晚 就 唔 放 佢 返 扯 。
呢一席 酒 飲到 盡歡而散 啊 。
韋小寶 貴為 子爵 ，大家 又 知道 佢 嗰個 太監 係 奉旨 假扮 嘅 ，就 唔能夠 再 回 宮 住宿 咯 。
呢一晚 ，韋小寶 喺 間 富麗華 貴 嘅 臥室 瞓覺 ，睇埋 去 唔係 金器 銀器 ，就係 綾羅綢緞 。
佢 忽然間 諗 ： 佢 阿爺 吖 ， 我 如果 喺 呢 間 子爵 府 開間 妓院 ， 真 係 十間 麗春院 啊 拍馬 都 追 唔 上 啊 。
話説 韋小寶 第日 一早 就 去 見 九難 ，講 佢 聽 皇帝 派 佢 去 雲南 送 婚 。
九難 話 ： 好 啊 ， 我 陪 你 一齊 去 。
韋小寶 好 歡喜 ，擰轉頭 望住 阿珂 。
九難話 ：阿珂 都 去 。
韋小寶 更加 喜從天降 啦 ，呢個 喜訊 呀 ，就算 皇帝 連氣 封 佢 一百個 子爵 都 比 唔上 啊 。
佢 告辭咗 九難 ，就 去 天地會 新 搬 嘅 住地 嘞 。
陳近南 聽完 韋小寶 噉 講 ，就 話 ：
清廷 皇帝 對 吳三桂 咁 寵幸 ，我 睇 一時半時 係 推 佢 唔冧 嘅 。
不過 呢個 係 個 大好機會 。
小寶 ，吳三桂 呢個 奸賊 唔 造反 ，我哋 要 激到 佢 造反 ，激唔到 呢 ，就 冤枉 佢 造反 。
我 本來 應該 同 你 一齊 去 至 係 㗎 ，不過 二公子 同 馮錫范 返 到 台灣 之後 ，必定 會 向 王爺 講 天地會 嘅 壞話 。
估計 王爺 會 派 人 嚟 查問 天地會 嘅 事 ，我 要 留 喺 呢處 ，據實 稟告 。
噉呢處眾位兄弟 ，你 都 帶埋 去 雲南 啦 。
韋小寶 話 ：就怕 馮錫范 呢個 傢伙 又 嚟 害 師父 噃 。
呢度 各位 兄弟 仲係 留 喺 處 幫助 師父 罷啦 ，否則 弟子 放心 唔落 啊 。
陳近南 拍下 佢 膊頭 話 ：難得 你 咁 孝心 。
馮錫范 嘅 武功 雖然 係 強 ，你 師父 亦 唔 見得 會 弱 過 佢 啊 。
呢次 佢 只不過 係 攻 我哋 嘅 出其不意 ，一嚟到 就 匿 喺 門 後 偷襲 ，打傷 咗 我 右手 。
哼 ，下次 再 遇到 ，佢 未必 能夠 再 佔便宜 嘞 。
諸殺吳三桂 係 當前 第一 大事 ，我哋 需要 傾 全力以赴 啊 。
就係 望 呢處 嘅 事情 快啲 了結 ，噉 我 亦 能夠 趕去 雲南 。
我哋 唔能夠 畀 沐家 得手 先 㗎 。
韋小寶話 ：係定啦 ，如果 畀 沐王府 得咗手 先 啊 ，今後 天地會 要 奉 佢哋 嘅 號令 噉 就 好 冇 癮 咯 。
陳近南 同 韋小寶 把 下脈 ，又 叫 佢 伸 條 脷 出嚟 睇下 ，就 皺住 眉頭 話 ：
你 中嘅 毒 點解 又 轉咗 性 啊 ？好在 一時 亦 唔會 發作 。
嗯 ，我 傳 你 嘅 內功 暫時 唔好 再 練 喇 ，怕 毒性 侵入 經脈 啊 。
韋小寶 好 歡喜 啊 佢 諗 ：
係 你 叫 我 唔 練功夫 㗎 咋 ，係 你 自己 講 㗎 ，以後 就 唔 能夠 怪 我 喇 。
佢 又 諗 ： 呢 啲 豹 胎易 筋 丸 啊 真 係 厲害 ， 連師父 都 唔 知道 係 乜嘢 東東 ， 陸先生 啊 要 快 啲 送 解藥 嚟 先 至 好 。
噉幾日之後 ，各事齊備喇 ，韋小寶 率領 御前侍衞 、驍騎營 、天地會 群雄 、神龍教 嘅 肥頭陀 等人 ，辭別 咗 康熙 同 太后 ，護送 建寧公主 啊 前去 雲南 。
九難 同 阿珂 化妝 做 宮女 ，混埋 喺 人群 裏 便 。
天地會 群雄 同 肥頭陀 呢 亦 都 化咗 妝 ，算係 韋小寶 嘅 親隨 ，着住 驍騎營 軍士 嘅 服飾 。
韋小寶 騎住 康親王 送 嘅 玉骢馬 ，前 呼 後 擁 ，得意洋洋 噉 出發 。
佢 已經 派 人 去 河南 ，通知 雙兒 起行 嘞 ，希望 同 佢 喺 半路 會合 。
呢陣時 唯一 美中不足 嘅 呢 ，就係 身邊 少咗 呢個 温柔 體貼 嘅 俏丫鬟 唧 。
一路上 ，官府 盡力 鋪張 供應 ，對 呢位 賜婚 使 大人 啊 巴結 奉承 ，托 大腳 啊 托到 十足十 。
韋小寶 心花怒放 ，自從 奉旨 出差 以來 啊 ，從來 未 試過 好似 呢次 咁 舒服 神氣 嘅 。
佢 個 心 諗 ：老舉乸 都 唔 爭氣 嘅 ，誒 生得 一 個 女 喎 。
如果 連 氣生 翻 十七八個 ，老子 啊 專 做 賜婚 大臣 ，送完 一個 又 一個 。
嘿 ，呢一世人啊 ，吃喝玩樂 、金銀珠寶 、傾鈴哐唥 ，好過 做乜啦 。
呢一日 ，嚟到咗 鄭州 ，知府 迎接 佢哋 一行人 喺 當地 大富紳 屋企 嘅 花園 裏 便 住宿 。
盛大 宴會 散咗 之後 ，建寧 公主 又 叫咗 韋小寶 去 傾 閒偈 。
自從 出咗 北京 以嚟 啊 ，日日 都係 噉 㗎 嘞 。
韋小寶 怕 畀 公主 拳打腳踢 ，每次 都 要 錢老本 同 高彥超 跟埋 喺 側 跟 。
無論 公主 𠼮 亦 好發嬲 亦 好 ，點 都 要 兩個人 喺 處 ，自己 係 決 唔 肯 單獨 同 公主 喺 一齊 嘅 。
呢日 食完 晚飯 ，公主 召見 韋小寶 ，噉 啊 三個人 嚟到 公主 臥室 外 便 間 客廳 。
公主 叫 韋小寶 坐低 ，錢高 兩個人 呢 企 喺 佢 後便 。
當其時 正係 大熱天 ，公主 着住 件 薄羅衫 ，噉啊 兩名 宮女 手執 團扇 ，喺 佢 後便 潑扇 。
公主 塊 面 紅卜卜 噉 ，嘴唇 上 便 滲出 一 滴滴 細微 汗珠 ，個 樣 啊 非常之 嬌豔 。
韋小寶 個 心 諗 ：公主 雖然 及 我 老婆 咁 靚 ，亦 算 係 一等一 嘅 人才 嘞 。
吳應熊 呢 個 衰仔 娶 咗 佢 ， 真 係 豔福不淺 啊 。
公主 打側 個 頭 望住 韋小寶 ，佢 話 ：
小桂子 ，你 熱唔熱 啊 ？
韋小寶 話 ：唔係 點 熱唧 。
仲話唔係點熱 ？點解 額頭 咁多 汗 㗎 你 ？
韋小寶 笑嘞 ，用 衫袖 抹 一抹 汗 。
有個 宮女 捧住 一個 五彩 大瓦缸 入嚟 ，佢 話 ：
啟稟公主 ，孟知府 送咗 冰鎮 酸梅湯 嚟 ，請 公主 消暑 解渴 啊 。
公主 好 歡喜 噉 話 ：好 ，𢳂碗 畀 我 飲 啦 。
一名 宮女 攞咗 隻 碎瓷 青花 碗 ，𢳂咗 酸梅湯 ，捧到 公主 面前 。
公主 攞 匙羹 飲咗 幾啖 ，吐咗 口氣 話 ：
難為佢 小小 鄭州府 ，都 藏咗 冰 喺 處 。
酸梅湯 裏 便 清甜 嘅 桂花 香氣 成 間 廳 都 聞到 。
啲 冰塊 同 瓷羹 碰起 上嚟 叮叮聲 ，韋小寶 同 錢高 兩個人 啊 忍唔住 流口水 嘞 。
公主 話 ：大家 熱得 咁 緊要 ，每人 𢳂 一 大碗 畀 佢哋 啦 。
韋小寶 同 錢高 兩個人 多謝咗 ，就 飲嘞 。
冰冷嘅 酸梅湯 一 飲 入口 唧 ，啲 涼氣 啊 一直 入到 心 ，講唔出 咁 暢快 。
一陣間唧 ，三個人 都 飲到 一乾二淨 。
公主 話 ：喺 噉嘅 大熱天 時 趕路 ，亦 真係 難頂 㗎 喇 。
從聽日起 ，我哋 一日 只係 行 四十里 啦 ，一早 起程 ，日頭 一出 就 停低 休息 。
韋小寶 話 ：公主 體貼 下人 ，大家 都 好 感恩 德 ，就係 怕 耽擱 得 耐 過頭 唧 。
怕咩嘢呢 ？我 都 唔 心急 咯 ，你 反而 着急 ？
唔係 由得 吳應熊 等 囉 。
韋小寶 正話 想 回答 ，忽然間 個頭 一暈 ，個身體 岌咗 幾岌 。
公主 問 佢 ：做咩嘢 啊 ？熱到 中暑 啊 ？
韋小寶 話 ：怕 ，怕係 先頭 飲酒 飲多咗 喇 。
誒 公主殿下 ，奴才 要 告辭 嘞 。
飲酒 飲 多咗 咩 ？噉 每人 再 飲 一碗 酸梅湯 醒酒 啦 。
啊 ，多謝 ，多謝 。
宮女 又 𢳂咗 三 碗 酸梅湯 嚟 。
錢 高 兩個人 亦 覺得 頭暈 嘞 ，就 大啖大啖 飲完 ，突然間 兩個人 搖咗 幾下 ，噼里啪啦 跌倒 喺 地 。
韋小寶 吃 咗 一驚 ， 只 覺得 眼前 金星 亂 閃 ， 一碗 酸梅湯 只 係 飲 咗 一 啖 唧 ， 已經 冚𠾴唥 潑 咗 喺 身處 ， 轉下 眼 就 人事不知 嘞 。
都唔知 過咗 幾多 時候 喇 ，昏昏沉沉 之中 似乎 大雨 淋頭 。
正話 想 擘開 雙眼 啦 ，又 試 一場 大雨 淋落嚟 。
過咗 一陣間 ，頭腦 稍為 清醒啲 嘞 ，只 覺得 身上 涼浸浸 ，又 聽見 咭咭聲 咁 笑 。
擘開眼 一 睇 ，只見 公主 笑嘻嘻 噉 望住 自己 。
韋小寶吖噉一聲 ，發覺 自己 係 瞓 喺 地下 ，噉啊 連忙 想 起身 嘞噃 。
誰知 手腳 都 綁住 晒 ，大吃一驚 啦 掙扎咗 幾下 ，一啲 都 唔逳得 。
四圍 一望 ，原來 係 喺 公主 間 臥房 裏 便 。
突然間 ，發覺 身上 嘅 衣服 已經 除 清光 嘞 ，赤條條 一絲不掛 ，呢下 真係 嚇到 佢 昏天黑地 喇 。
喺 燭光 之下 ，見到 房 裏 便 只係 得 公主 一個人 ，班 宮女 同 錢高 兩個人 都 不知 去向 嘞 ，佢 話 ：
點解 會 噉嘅 ？我 ，我 。
公主 話 ：你 你 你 你 咩嘢 啊 ？竟然 敢 對 我 咁 無禮 ？
韋小寶 話 ：佢哋 呢 ？
你 嗰 兩個 從人 ，我 睇到 就 討厭 喇 ，我 叫 人哋 殺咗 佢哋 喇 。
韋小寶 唔知 呢句 説話 係 真 定係 假 。
但係 想到 公主 做事 啊 都 唔同 人 噉 品 嘅 ，錢 高 兩個人 真係 畀 佢 殺咗 亦 唔 稀奇 啊 。
嗱 各位 ，欲知 後事 如何 ，且 聽 下回 分解 。
