前文 再續 啊 書 接 上 一回 啊 。
話説 白衣尼 佢哋 同埋 鄭克塽 一齊 去 河間府 。
喺 架 大車 上 便 ，白衣尼 低聲 問 阿珂 ：呢個 鄭公子 你 點 識 佢 㗎 ？
阿珂 塊面 一紅 佢 話 ：
我 同 師姐 喺 河南 開封府 見到 佢 嘅 。
嗰 陣 時 我 哋 ， 我 哋 着 住 男裝 ， 佢 以 為 我 哋 係 男人 ， 喺 酒樓 過 嚟 請 我 哋 飲酒 啫 嘛 。
白衣尼 話 ：你哋 真係 大膽 喇 ，兩個 大姑娘 去 酒樓 飲酒 。
阿珂 耷低頭 話 ：我哋 都 唔係 真嘅 飲酒 ，裝模作樣 貪 好玩 啫 嘛 。
韋小寶話 ：阿珂姑娘 ，你個樣 咁靚 啊 ，就算 着咗 男裝 人人 一睇 都 知道 你 係 個 美貌 姑娘 啦 。
呢個 鄭公子 啊 ，哼 ，我 睇 佢 係 不懷好意 唧 。
阿珂 好嬲 噉 話 ：你 先至 不懷好意 啊 ！
我哋 扮咗 男人 佢 一啲 都 睇唔出 。
收尾師姐 同 佢 講咗 ，佢 仲 一味 道歉 添噃 。
人哋 係 彬彬有禮 嘅 君子 ，邊度 似 你 吖 ？
到咗 中午 時分 ，一行人 嚟到 豐爾莊 ，呢度 係 河北 西部 嘅 一個 大鎮 。
噉 眾人 去到 一間 飯店 打尖 嘞 。
韋小寶 落咗 車 ，只見 鄭克塽 長身 玉立 ，氣宇 軒昂 ，至少 要 高過 自己 個 半頭 ，不由得 更加 自慚形穢 嘞 。
又見佢 衣飾 華貴 ，腰間 掛住 個 配劍 嘅 劍鞘 上 便 ，鑲住 珠玉 寶石 ，閃閃發光 。
佢 手下 二十幾 名 隨從 ，有啲 係 身材 魁梧 ，有啲 係 精悍 挺拔 ，帶住 刀劍 ，睇嚟 個個 都 係 神氣十足 嘅 。
去到 飯店 ，阿珂 扶 白衣尼 喺 枱邊 坐落 ，佢 同 鄭克塽 呢 就 打橫 坐嚟 陪 白衣尼 。
韋小寶 正話 想 喺 白衣尼 對面 坐低 ，阿珂 矋 咗 佢 一眼 話 ：
嗰便 咁多位 ，你 唔好 坐 呢處 得唔得 ？我 見到 你 啊 食唔落 飯 喇 。
韋小寶 好嬲啊 ，塊面 當堂 唂到 紅晒 ，個心 諗 ：
呢位 鄭公子 陪住 你 ，噉 你 食多 幾碗 飯 啦 ，豈有此理 ，撐死 你 個 衰女 至得 。
白衣尼 話 ：阿珂 ，你 點解 對 小寶 咁 冇 禮 㗎 ？
阿珂 話 ：佢 係 個 無惡不作 嘅 壞人 ，師父 吩咐 唔准 殺 佢 咋 ，否則 。
講完 ，向 韋小寶 出力 噉 矋 咗 一眼 。
激到韋小寶死死下 ，噉冇法子啦 ，唯有 行去 角落頭 搵 張 枱 坐落 。
個 心 喺度 諗 ：你 係 一心一意 ，要 嫁畀 呢個 臭賊 鄭 公子 做 老婆 ，我 韋小寶 真係 唔肯 過 你 啊 。
你 想 殺 我 冇 咁 容易 。
等 老子 想 條 計仔 ，殺咗 你 心目中 嗰個 老公 先 。
等 你 未曾 出嫁 就 做咗 寡婦 ，終歸 非 嫁 老子 不可 。
老子 唔算 你 係 寡婦 改嫁 就 便宜 咗 你 嘅 衰女 喇 。
好喇 ，飯菜 嚟嘞 ，鄭家班 隨從 啊 狼吞虎噎 噉 猛咁 噍 。
韋小寶 攞咗 七八個 饅頭 ，去 畀 綁住 喺 大車 裏 便 嘅 呼巴音 食 ，佢 覺得 呢個 呼巴音 啊 比 鄭家 嗰啲 人 仲 可親啲 。
佢 翻埋 個位 ，隔住 幾張 枱 望過去 ，只見 阿珂 容光煥發 ，同 鄭克塽 啊 有 講 有笑 傾得 非常 親密 。
韋小寶 激到 啊 條氣 真係 唔順 喇 ，飯 都 吞唔落 。
忽然間 聽見 一陣 馬蹄聲 ，有 幾個 人 騎馬 飛跑 入嚟 市鎮 ，落咗 馬 就 入嚟 飯店 嘞 ，原來 係 七個 喇嘛 。
韋小寶 個 心 嘭嘭聲 亂咁 跳 ，但係 又 有 啲 幸災樂禍 啊 ，個 心 諗 ：
呢個 鄭公子 先頭 猛咁 認叻 ，講 咩 跟 三個 高手 師父 學咗 武功 啊 等等 ，好 ，等 你哋 打場 大交 我 睇下 ，老子 啊 袖手旁觀 嘿 妙到極 啊 。
嗰 七 名 喇嘛 一 見到 白衣尼 當堂 面色 都 變咗 ，嘰里咕嚕 喺度 講嘢 。
其中 一名 身材 高瘦 嘅 喇嘛 吩咐 咗 幾句 ，噉 七個人 喺 門口 一張 枱 坐落 ，叫 咗 飯菜 。
各人 目不轉睛 噉 望住 白衣尼 ，神情 都 好 憤怒 。
白衣尼 啊 詐諦 睇唔見 ，佢 有 佢 喺度 慢慢 噉 食飯 。
過咗一陣 ，一名 喇嘛 企起身 行到 白衣尼 張 枱 處 ，大聲 噉 話 ：
喂 師姑 ，我哋 幾個 同伴 都 係 你 害死 嘅 係唔係 ？
鄭克塽 企起身嚟 高聲 噉 話 ：你哋 做咩 㗎 ？喺 呢處 大呼小叫 咁 冇 禮 ？
嗰 個 喇嘛 發惡話 ： 你 係 咩 嘢 東東 啊 ？ 我 有 我 同 呢 個 師姑講 嘢 關你 咩 嘢 事 啊 ？ 躝 開 ！
只聽見 呼呼 幾聲 ，鄭克塽 手下 四名 隨從 跳過嚟 ，一齊 捉 嗰個 喇嘛 。
嗰個 喇嘛 右手 一格 ，擋開咗 兩個 人 ；
飛出 一腳 ，將 一名 隨從 踢到 𢴈咗 出去 店外 便 ；
跟住 迎面 一拳 ，打正 另外一個 隨從 嘅 鼻樑 ，將 佢 打到 暈咗 喺 地 。
其餘嗰啲 隨從 大叫 ：並肩子上啊 ！
係 江湖 黑話 嚟 ，即係 一齊 上噉 解 。
噉 各人 拔出 兵器 ，向 嗰個 喇嘛 殺 過去 咯噃 。
嗰便 五名 喇嘛 亦都 拔出 戒刀 殺過嚟 ，只有 嗰個 高瘦 喇嘛 坐 喺 處 冇 逳 。
嘩 飯店 裏頭 啊 乒乒乓乓 ，打 到 十分 熱鬧 。
嗰啲 夥記 同 食飯 嘅 人 見到 有人 打 群架 唄 紛紛 趯 出去 店 外 。
鄭克塽 同 阿珂 都 拔出 長劍 ，喺 白衣尼 身邊 守衞 。
飯店 裏 便 ，碗碟 紛飛 啊 枱椅 亂 咁 掉 。
每一名 喇嘛 都 抵擋 四五名 鄭府 個 隨從 咁多 嘅 。
忽然 聽見 呼噉 一 聲 ，一把 單刀 向 上 飛起 ，斬 喺 屋樑 上 便 。
韋小寶 一 睇 ，白光 閃閃 ，又 有 兩 把 刀 飛咗 上去 ，斬 喺 屋樑 上 便 。
跟住 又 有 三四 把 長劍 飛 上去 。
幾個 鄭府 隨從 哇哇聲 噉 驚叫 ，空手 跳開 嘞 。
只聽見 呼呼聲 ，一把把 兵器 向上 飛起 ，都係 釘 喺 橫樑 或者 桁條 上便 。
一釘咗就唔跌翻落嚟嘞 ，有啲 鋼鞭 啊 鐵锏 之類 嘅 沉重 兵器 ，就 打穿 屋頂 ，轆咗 上 瓦面 。
打咗 唔到 半炷香 咁耐 ，鄭府 二十幾 名 隨從 都 冇 咗 兵器 嘞 。
韋小寶 真係 又 驚 又 喜 啊 。
幾名 喇嘛 紛紛 噉 大喝 ：快啲 跪低 投降 ，跪遲啲 ，將 你哋 頭殼 一個個 都 斬落嚟 。
鄭府 班 隨從 嘅 兵器 雖然 失咗 啊 ，但 一啲 都 唔 膽怯 噃 ，啲 用 拳頭 ，有 啲 又 攞起 橋凳 ，又 向住 六個 喇嘛 撲過去 。
六名 喇嘛 一聲 大喝 ，將 戒刀 擲出去 ，噗噉 一聲 ，六把 戒刀 都 插 喺 個 高瘦 喇嘛 坐 嗰 張 枱 處 ，齊齊整整 圍 成 個 圓圈 。
跟住 六名 喇嘛 跳入 班 隨從 裏 便 ，只 聽見 咿嘩鬼 震啊 ，瀝瀝嘞嘞 。
一陣間唧 ，二十幾名 隨從 個個 都 畀 喇嘛 拗斷 咗 大髀骨 ，𢴈到 成地 都係 啊 。
韋小寶 呢個 時候 個 心 就 驚喇 ，一味 叫苦 個 心 話 ：
佢哋 就 要 去 為難 師太 同 我 個 小美人 喇 噉 點算 好 呢 ？
六名 喇嘛 打低晒 嗰班 鄭府 隨從 ，雙手 合十 ，嘰里咕嚕噉 似乎 念咗 一陣 經 ，坐翻埋 枱 ，拔翻 枱面 嘅 戒刀 ，掛 喺 身邊 。
嗰 個 高瘦 喇嘛 叫 話 ：攞 酒 嚟 ，攞 飯菜 嚟 ！
喝咗幾聲 ，店小二 啊 遠遠 噉 睇下 睇下 唔敢 過嚟 噃 。
一名 喇嘛 就 話 ：唔攞 酒飯 嚟 我哋 放火 燒 咗 呢間 黑店 ！
嗰個 事頭 一 聽見 話 要 燒 鋪頭 唄 ，連忙 話 ：啊 嚟喇 嚟喇 ，即刻 就 攞 酒飯 嚟 。
快 啲 啦 快 啲 啦 ， 快 啲 攞 酒飯 畀 眾位 佛爺 啦 。
韋小寶 望住 白衣尼 ，睇 佢 有 咩嘢 對策 。
見到 佢 右手 揸住 茶杯 慢慢 咁 飲茶 ，衫袖 紋 絲 不動 ，面上 神色 若無其事 。
阿珂 呢 就 面色 慘白 ，眼神 好 驚 啊 。
鄭克塽塊面呢就青一陣白一陣 ，用手撳住劍柄 ，手臂啊不停咁震動 ，一時揸唔定主意 ，唔知係唔係要上前廝殺 。
突然間 ，嗰個 高瘦 喇嘛 一聲 冷笑 ，企起身 行到 鄭克塽 面前 。
鄭克塽 啪聲 跳開 ，用 劍尖 指住 嗰個 喇嘛 喝咗 話 ：你 ，你 ，你 想 點 啊 ？
嗰個 喇嘛 話 ：我哋 有 啲 事 淨係 搵 呢個 師姑唧 ，同 其他 嘅 人 冇 關係 。
你 係 佢 嘅 弟子 啊 ？
唔係 。
好 ，識做嘅 就 快啲 躝扯 。
尊駕 ， 尊駕 係 邊個 ？ 唔 該 留 低個 名 日後 ， 日後 亦 可以 。
嗰個 喇嘛 誇誇聲 大笑 。
韋小寶 雙耳 啊 嗡嗡聲 咁 響 ，當堂 頭暈 腦脹 。
阿珂 企唔穩 嘞 ，扽倒 喺 張 凳 處 伏 喺 枱 面 。
嗰個 喇嘛 笑住 話 ：我 法名 叫做 桑結 ，係 西藏 達賴喇嘛 活佛 座下 嘅 大護法 。
你 日後 點樣 啊 ？係唔係 想 搵 我 報仇 啊 ？
鄭克塽 硬起頭皮 ，聲 都 震晒 噉 話 ：冇 ，冇錯 。
桑結 哈哈大笑 ，左手 衫袖 向 佢 塊面 拂過去 。
鄭克塽 舉劍 擋 佢 。
桑結 右手 中指 一彈 ，噹 一聲 ，長劍 飛起 ，插喺 屋頂 條 樑 處 ，跟住 左手 一伸 ，就 揸住 佢 條 後頸 。
將佢扚起嚟 ，出力 將佢扽喺 張凳 處 笑住 話 ：坐低啦 。
鄭克塽 畀 佢 揸住 後頸 大椎穴 ，嗰度 係 手足 三陽 督脈 嘅 會合點 ，當堂 全身 都 唔逳得 。
桑結 一便 冷笑 ，一便 返去 自己 張 枱 坐低 。
韋小寶 個 心 諗 ：佢哋 喺度 等 咩嘢 呢 ？
點解 仲 唔 搵 師太 逳手 呢 ？唔通 仲 有 幫手 嚟 啊 ？
四圍一望 ，飯店 四便 都係 磚墻 ，就 唔能夠 用翻 嗰個 法子 用 匕首 隔住 板壁 嚟 刺 敵人 嘞 。
忽然間 想起 大車 裏 便 嗰個 呼巴音 ，佢 諗 ：哎呀 弊嘞 。
佢哋 將 呼巴音 一 救出嚟 ，即刻 就 知道 我 同 師太 係 一路 嘅 ，噉 講 唔定 仲 會 知道 嗰 四個 喇嘛 係 我 殺 嘅 噉 咪 弊 ？
轉頭 睇下 桑結 ，只見 佢 神情 嚴肅 ，稍為 有啲 惴惴不安 。
佢 明白 喇 ： 冇 錯 喇 佢 唔 知道 師太 已經 負 咗 重傷 ， 怕 師太 武功 使得 仲 揸 唔 定 主意 ， 唔 知 點樣 出手 至 好 。
呢個 時候 ，店小二 送 酒 嚟 嘞 。
一壺酒 喺 每個 喇嘛 面前 就 斟咗 半碗 就 空 嘞 。
有個 喇嘛 拍 枱 鬧 佢 話 ：啲 咁多 酒 ，畀 佛爺 一個人 飲 都 唔夠 啊 ！
店小二 早就 全身 發抖 更加 怕得 厲害 ，噉 轉身 又 去 攞 酒 咯噃 。
韋小寶 靈機 一動 ，跟住 佢 入 廚房 。
佢 係 個 細路 ，邊個 都 冇 留意 。
只見 嗰個 店小二 攞住 個 酒殼 喺 酒埕 𢳂 酒 倒入 個 壺 裏 便 。
因為 雙手 猛咁 震啊 ，搞到 地下 、枱面 、埕邊 、酒壺 旁邊 到處 都 係 酒 。
韋小寶 攞出 一錠 銀 交咗 畀 佢 話 ：
唔使 怕 㗎 吓 ，嗱 呢處 係 我 嘅 飯錢 ，多咗 呢 打賞 你 。
嚟啦 等我 嚟 幫 你 𢳂酒 啦 。
講完 接過咗 酒殼 。
嗰個 店小二 好 歡喜 ，想唔到 世間上 竟然 有 噉樣 嘅 好人 。
韋小寶話 ：呢啲 喇嘛 好惡 㗎 ，嗱 你 去 睇下 佢 喺度 做 咩 嘢 吖 。
店小二 應咗 ，就 走去 廚房 門口 望住 大堂 咯噃 。
韋小寶 喺 身邊 攞出 蒙汗藥 ，打開 個 紙包 ，冚𠾴 唥 倒晒 落 個 酒壺 裏 便 ，又 𢳂 咗 幾 殼 酒 出 力 咁 搖 。
嗰個 店小二 轉身 話 ：佢哋 喺度 飲酒 啊 ，冇 ，冇 做乜嘢 啊 。
韋小寶 將 酒壺 交畀 佢 話 ：快啲 攞去 啦 ，佢哋 發起 脾氣 上嚟 啊 ，真係 將 飯店 燒咗 都 似 。
嗰個 店小二 啊 猛 咁 多謝 韋小寶 ，噉 啊 雙手 捧起 酒壺 出去 。
個口啊 仲 喺度 自言自語 噉 話 ：唉 真係 多謝喇 多謝喇 ，真係 好人啊 ，菩薩 保佑 你啊 。
嗰班 喇嘛 搶咗 酒壺 ，各人 斟咗 半碗 ，又話 ：唔夠啊 ，再去 打酒嚟 ！
韋小寶 見 七名 喇嘛 一啲 都 冇 思疑 ，將 碗 裏 便 嘅 藥酒 飲 到 一滴 都 冇 剩 。
呢班 臭鬼 喇嘛吖 ，枉佢 武功 咁 高強 啊 ，連 呢啲 粗淺 到 極 嘅 江湖 勾當 都 唔 提防 ，真係 好笑 嘞 。
其實 係 佢 唔知 咋 ，桑結 呢 班 人 見到 五 名 師兄弟 死於 非命 。
其中 有 一個 ，係 畀 掌力 震到 全身 前後 肋骨 都 斷晒 ，敵人 武功 之 高強 啊 世間 罕見 。
桑結 諗住 如果 同 呢個 人 打過 ，都 怕 仲係 輸 嘅 多 啊 。
喺 飯店 裏面 見到 白衣 尼 始終 神色自若 ，的確 係 大高手 個 風範 。
噉 七個人 全神貫注 ，都 注視 佢 嘅 動靜 ，又 點 會 提防 一位 武功 已經 達到 登峰造極 嘅 大高手 ，竟然 會 使用 蒙汗藥 呢啲 下三濫 嘅 勾當 呢 ？
佢哋 雖然 係 飲酒 啊 ，其實 都 係 飲而不知其味 ，想到 五名 師兄弟 慘死 嘅 情形 ，個 心 啊 一直 都 喺度 怕緊 。
如果 飯店 裏 便 並冇 白衣 尼安然 噉 坐 響處 ，噉 呢一 壺 落咗 大量 蒙汗藥 嘅 藥酒 飲 入口 ，未必 就 覺察 唔出 嘅 。
有個 肥肥 嘅 喇嘛 係 個 好色之徒 ，見到 阿珂 容顏 豔麗 ，早就 想 去 摸 手 摸 腳 㗎 嘞 ，只係 怕 白衣尼 使得 唔 敢 無禮 嘅 啫 。
等到 半碗 酒 一 落肚 ，就 已經 忍唔住 嘞 。
過咗 一陣間 ，藥性 發作 ，頭腦 啊 昏昏沉沉 乜嘢 都 唔 在乎 咯 ，企起身 笑嘻嘻 噉 話 ：
姑娘仔 ，啊 嫁咗 人 未 啊你 ？
伸出隻大手 ，喺 阿珂 塊面 摸咗一下 。
阿珂 嚇到 全身 發抖 話 ：你 ，你 。
噉啊揮刀斬過去 。
嗰個 喇嘛 一手 捉住 佢 手腕 一扭 ，阿珂 手上 嘅 鋼刀 落 咗 地 嘞 。
嗰個 喇嘛 哈哈大笑 ，將 佢 抱起嚟 。
阿珂 高聲 尖叫 搏命 掙扎 ，但係 嗰個 喇嘛 一雙 又 粗 又 大 嘅 手臂 好似 個 大 鐵圈 噉 ，緊緊 箍住 佢 ，根本 掙扎 唔甩 。
白衣尼 本來 鎮靜自若 嘅 ，而家 都 驚 喇 個 心 諗 ：
呢啲惡喇嘛 如果 一刀 殺咗 我 ，噉 就 唔緊要 ，噉樣 當眾 無禮 ，我 就算 死咗 都 唔眼閉 啊 。
鄭克塽 雙手 撐住 張枱 企起身 大叫 話 ：你 ，你 。
嗰個 肥大 喇嘛 左手 一拳 ，嘭 一聲 ，將 佢 打到 跌咗 喺 地 趢 咗 兩 趢 。
韋小寶 見到 心上人 受辱 ，十分 焦急 嘞 佢 諗 ：點解 蒙汗藥 仲 唔 發作 嘅 ？
唔通啲 臭喇嘛 另外 仲有 啲 古怪 功夫 唔怕 迷藥 嘅 ？
眼見 嗰個 喇嘛 喺 阿珂 塊 面 處 亂吻 亂咁 聞 ，佢 唔顧得 兇險 唔兇險 嘞 ，喺 衫袖 裏 便 暗藏 匕首 ，笑騎騎 噉 行過去 笑住 話 ：
大和尚 你 做咩嘢 唧 ？
右手 碰到 佢 左便 背脊 ，手腕 一 翻 ，匕首 喺 衫袖 裏 便 㓤出嚟 ，插入 嗰個 喇嘛 心臟 。
佢 又 笑住 話 ：大和尚 ，你 喺 處 玩 乜嘢 啊 ？
即刻 向 左便 一閃 ，防 佢 反擊 。
把 匕首 鋒利 無比 入肉 無聲 ，㓤住 去 嘅 時候 又 係 對準 心臟 嘅 ，呢個 喇嘛 個 心跳 呢 即刻 就 停咗 嘞 ，就噉樣 企 喺 處 唔逳 ，但係 雙手 仍然 抱住 阿珂 唔放 。
阿珂 唔 知道 佢 已經 死咗 噃 ，只係 一味 尖聲 大叫 。
韋小寶 行過去 ，摱開 嗰個 喇嘛 雙手 ，又 喺 佢 心口 一撞 ，低聲 話 ：阿珂 ，快啲 跟我 走啦 。
一手 拉住 佢 ，一手 扶住 白衣尼 ，就 行 去 飯店 外 便 嘞 。
嗰個 肥大 喇嘛 一 離開 阿珂 ，就 慢慢 跌 喺 地 ，其餘 嗰 幾 名 喇嘛 大驚 啊 ，紛紛 衝上嚟 。
韋小寶 話 ：企響處 ！我 師父 神功 奇妙 ，呢個 喇嘛 咁 無禮 ，已經 將 佢 整死 咗 嘞 。
邊個 行 前 一步 ，就 叫 佢 即刻 死 。
眾喇嘛 窒咗 一窒 ，嘭嘭 兩聲 ，兩個人 𢴈 喺 地 嘞 ，過咗 一陣間 ，又 有 兩個人 𢴈低 。
桑結 內力 深湛 ，蒙汗藥 一時 迷佢 唔倒 ，不過 佢 亦 覺得 頭暈腦脹 ，成個人 搖搖晃晃 雙腳 好似 踩住 嚿 雲 噉 。
噉估話 白衣尼 真係 有啲 古怪 法術 ，佢 心慌意亂 神志昏迷 ，點 想得到 係 中咗 蒙汗藥 呢 ？
阿珂 話 ：鄭公子 ，快啲 跟 我哋 走 啦 。
鄭克塽 應 佢 話 ：係 ！躝 翻 起身 搶先 走去 外便 嘞 。
韋小寶 扶住 白衣尼 行 出 飯店 。
桑結 追咗 兩步 ，個身 一晃 ，𢴈 喺 張 枱 上 便 ，瀝嘞 一聲 ，當堂 矺冧 咗 張 枱 。
韋小寶 見到 車夫 已經 唔知 趯咗 去 邊處 咯 ，唔等 佢 咯 ，就 扶 白衣尼 上 車 ，見到 嗰個 呼巴音 仲 喺 架 車 處 。
佢 怕 桑結 呢 班 喇嘛 追 出嚟 啊 ，見 阿珂 同 鄭克塽 都 上 咗 車 嘞 ，跳 上 車夫 嘅 座位 ，即刻 趕 架 車 走 。
一條氣 就 跑咗 十幾里 ，騾仔 攰 喇 ，噉 先至 放慢 行 。
就喺呢個時候 ，只聽見 馬蹄聲 響 ，有 幾 騎馬 追緊 嚟 。
鄭克 塽 話 ： 唉 可惜 冇 騎馬 唧 ， 否則 我 哋 嘅 駿馬 跑 得 咁 快 ， 啲 惡 喇嘛 一定 追 唔 到 嘅 。
韋小寶 話 ：師太 點能夠 騎馬唧 ？我 又 冇 請 你 上車 。
講完 ，就 喝 隻 騾仔 ，揮 鞭 趕 佢 快啲 行 。
鄭克塽 知道 講錯嘢 嘞 ，佢 係 王府 公子 ，一向 畀人 奉承 慣 嘅 ，而家 畀 韋小寶 整咗 兩句 當堂 滿面 怒容 啊 。
啲 馬蹄聲 越嚟越近 嘞 ，韋小寶 話 ：師太 ，我 落車 匿埋 下 先 啦 。
一眼望出去 冇 房 冇 屋 ，只見 右首 便 田 裏頭 有 幾個 大麥 草堆 ，佢 話 ：
我哋 匿埋 喺 麥草堆 裏 便 啦 。
講完 ，勒 停 隻 騾仔 。
鄭克塽 好嬲 噉話 ：匿埋 喺 草堆 裏 便 ，如果 畀 人哋 知道 豈不是 滅咗 我 延平王府 個 威風 ？
韋小寶 話 ：啱 ，我哋 三個人 去 匿埋 喺 草堆 裏 便 ，唔該 公子 啊 繼續 趕車 猛咁 跑 ，將 追兵 引開 啦 。
於是 扶住 白衣尼 落車 。
阿珂 一時 揸唔定 主意 。
白衣尼 話 ：阿珂 ，你 嚟 啦 。
阿珂 向 鄭克塽 擪 一擪 手話 ：你 都 匿埋 嚟 啦 。
鄭克塽 見 三個人 ，蜎咗 入去 麥草堆 ，佢 遲疑咗 一下 ，就 跟住 蜎入 草堆 嘞 。
嗱 各位 ，欲知 後事 如何 ，且 聽 下回 分解 。
