前文 再續 啊 書 接 上 一回 啊 ，話説 白衣尼 叫 韋小寶 審問 個 喇嘛 。
韋小寶 拔出 把 匕首 ，割咗 條 樹枝 ，噉 隨手 噉㓟 ，話 咁快 唧 ，就 將 樹枝 削 成 一 條 木棍 。
佢 問 嗰個 喇嘛 話 ：老兄 ，你 想唔想 變成 一條 人棍 呢 ？
嗰 個 喇嘛 見 把 匕首 咁 利 嘅 早就 心寒 喇 佢 話 ： 誒 請問 小爺 咩 嘢 叫做 人棍 啊 ？
嗱 ，將 你 兩 隻 手 削咗去 ，耳仔 同 鼻哥 亦 都 削埋 ，總之 呢 ，全身 突出 嚟 嘅 嘢 冚𠾴 唥 都 削平 ，噉 就係 一 條 人 棍 喇 。
好好玩㗎 ，你 要唔要 試下 吖 ？
講完 ，韋小寶 將 匕首 喺 佢 鼻哥 上面 擦 咗 幾 擦 。
嗰個 喇嘛 話 ：誒唔 ，唔好啊 ，唔好啊 ，誒 小僧 唔 做人棍 喇 。
韋小寶話 ：我 真係 冇 呃 你 㗎 ，好好玩嘅 呢 ，做 一次 咁多 唔緊要嘅 ，嚟啦 。
誒 恐怕 唔係 點 好玩 嘅 。
你 又 未 做過 點 知道 唔好玩 啊 ？我哋 試下 再 講 啦 。
講完 ，韋小寶 將 匕首 喺 佢 膊頭 又 擦 咗 幾 擦 。
嗰 個 喇嘛 哀求 佢 話 ： 誒 小爺 饒命 啊 ， 小人 大膽 冒犯 咗 師太 ， 係 係 係 小人 錯咯 。
好 ，我 問 一句 你 答 一句 。
如果 有 半句 唔老實 ，我 就 叫 你 做 一條 人棍 。
我 將 你 種 喺 呢度 ，加 啲 肥料 淋 啲 水 ，過得 十日 八日 ，講唔定 你 又 會 生翻 兩 隻 手 同埋 耳仔 鼻哥 出嚟 呢 ？
誒唔會㗎唔會㗎 ，小僧 老實 回答 就係啦 。
你 叫 咩 名 啊 ？點解 要 冒犯 師太 ？
小僧 叫做 呼巴音 ，係 西藏 嘅 喇嘛 ，奉咗 大師兄 桑結 嘅 命令 ，想要 生 ，誒 生擒 呢位 師太 。
韋小寶 諗 桑結 嘅 名 喺 五台山 都 聽過 㗎 嘞 ，佢 問 ：
呢 位師 太好 地地 ， 又 冇 得罪 咗 你 個 臭 師兄 ， 你 哋 點解 要 咁 大膽 妄為 啊 ？
大 師兄 話 ： 我 哋 活佛 有 八部 寶經 ， 畀 呢 位師 太 偷 誒 唔 唔 係 唔 係 ， 唔 係 偷 ， 係 借 咗 去 ， 要 請 師太 還翻 畀 佢 喎 。
咩嘢 寶經 啊 ？
係 差奄古 吐 鳥 經 。
亂噏 ，咩 嘰里咕嚕 鳥 經 唧 ？
誒誒係係係 ，誒 ，呢啲 係 我哋 西藏話 ，漢語 就係 四十二章經 。
你 嗰個 臭 師兄 啊 點 知道 師太 攞咗 四十二章經 呢 ？
嗯 ，呢層 我 就 唔知 嘞 。
你 唔 知 啊 ？ 噉 條 脷 有 咩 用 啊 ？ 伸條 脷 出 嚟 。
講完 將 匕首 一揚 。
呼巴音邊處 肯 伸吖 就 哀求 佢 話 ：小僧 真係 唔知 呢 ，唔知道 啊 。
你個臭師兄 喺 西藏 ，邊度 有 咁快 就 派咗 你哋 出嚟 呢 ？
大師兄 同埋 我哋 幾個 本來 都 喺 北京 嘅 ，我哋 一路 喺 北京 追出嚟 㗎 。
韋小寶 岌一岌頭 明白 嘞 ，佢 諗 ：
梗係 老舉 乸 通咗 消息 畀 佢哋 知 啦 。
噉 佢 問 ： 你 哋 呢 班 臭 喇嘛 ， 武功 叻 過 你 嘅 、 同 你 差 唔 多 嘅 仲 有 幾 多個 啊 ？
我哋 同門 師兄弟 ，總共 係 十三 個 人 ，畀 師太 打死 咗 五 個 ，仲有 八 個 。
韋小寶 有啲 心驚嘞 ，喝佢 話 ：咩 八個 啊 ？你 仲 算 係 人 啊 ？遲早 你 都 變成 一條 人棍 。
呼巴音話 ：嗯 小爺 應承過 ，唔 將 小僧 變 做人棍 嘅 。
其餘 嗰 七條 人棍 而家 去 邊處 啊 ？
我哋 大師兄 本領 高強 到 極 ，唔會 變 做人棍 嘅 。
韋小寶 喺 佢 條 腰 處 出力 噉 踢 一 腳 ，鬧 佢 話 ：你 呢個 臭 賊 ，死到臨頭 嘞 仲 喺度 認叻 ？
你 嗰個 臭 師兄 啊 本領 再 大 ，我 都 將 佢 削 成 一條 人棍 畀 你 睇下 。
嗯 ，係 ，係 。
不過 呼巴音 啲 表情 呢 ，就 唔係 點 信 嘅 。
韋小寶 反來覆去 噉 又 盤問 咗 好耐 ，再 問唔出 啲 咩嘢 喇 。
於是就 蜎入 架 大車 ，放低 車帷 ，細細聲 將 呼巴音 嘅 説話 ，講咗 畀 白衣尼 聽 。
佢 話 ：師太 ，仲有 七個 喇嘛 添啊 ，如果 一齊 追到嚟 ，噉 就 唔係 咁 容易 對付 嘞 。
如果係平時 ，師太 當然 唔放在心上 啦 ，不過 而家 你 身子 又 唔係 點 舒服 。
白衣尼 擰 下個 頭 話 ：就算 我 安然無恙 ，一個 打 六個 亦係 難以 取勝 嘅 ，何況 仲有 一個 武功 高過 晒 佢哋 嘅 大師兄 添 。
聽講 嗰個 桑結 ，係 西藏 密宗 嘅 第一 高手 ，大手印 神功 ，已經 練到 登峰造極 嘞 。
韋小寶 話 ： 我 啊 有 一個 法子 ， 不過 ， 不過 啊 搞 到 師太好 失威 就 係 嘞 。
出家人 有 咩 威風 好 講 吖 ？你 有 咩 法子 啊 ？
嗱 ，我哋 去到 偏僻 嘅 地方 ，搵 戶 農家 匿埋 。
請 師太 換 翻 套 鄉下 女子 嘅 衣服 ，瞓 喺 床 上面 養傷 。
阿珂 姑娘 呢 同埋 我 呢 換套 鄉下 姑娘 同埋 後 生仔 嘅 衣服 ， 算 係 師 太 嘅 ， 誒 誒 師 太 嘅 仔 女 。
白衣尼 擰擰頭 。
阿珂話 ： 你 嘅 人 真 係 曳 嘅 啫 ， 想出 嚟 啲 計仔 都 係 咁 曳 嘅 。
師父 係 當世 高人 ，噉樣 匿埋 豈不是 怕咗 人哋 ？
白衣尼 話 ：條計 係 得 嘅 ，你哋 兩個 算 係 我 嘅 侄 同 侄女 啦 。
韋小寶 好 歡喜 啊 話 ：係 ，係 。
佢 個 心話 ：算係 你 嘅 侄 同 侄新抱 就 最好 喇 。
阿珂 矋咗 佢 一眼 ，聽見 師父 接納咗 佢 條計 ，唔係 幾 鐘意 嘞 。
韋小寶 又 話 ：留低 呢個 喇嘛 ，怕 佢 會 洩漏 風聲 噃 ，不如 我哋 將 佢 活埋 咗 就 算 喇 ，一啲 痕跡 都 唔 留 。
白衣尼 話 ：先頭 同人哋 打 ，係 不得已 ，唔能夠 留情 啫 。
呢個 喇嘛 已經 冇咗 抗拒 嘅 能力 ，再 要 殺 佢 未免 太過 狠毒 喇 。
不過 ， 不過 放 咗 佢 亦 唔 得 ， 噉 啦 ， 我 哋 暫時 帶 住 佢 睇 下 點 先 至 算啦 。
韋小寶 應咗 ，就 叫 車夫 嚟 將 呼巴音 抬翻 上 車 ，就 吩咐 車夫 趕住 大車 又 行 嘞 。
一路上 唔見 有 咩 農家 ，又 怕 畀 桑結 追到 啊 ，所以 一等 見到 小路 呢 就 轉路 行 㗎喇 。
只係 沿途 見到 嘅 岔路 都 太過 窄小 ，唔 行得 大車 唧 。
行行下 ，忽然間 聽見 身後 就 馬蹄聲 ，有 幾十 騎馬 飛馳 趕住 嚟 。
韋小寶 暗暗 叫苦 喇 ：弊喇 弊喇弊喇 ，啲 死喇嘛 原來 有 幾十 名 咁多 㗎 ？
噉啊催大車快啲跑 ，兩名車夫 啊 口 催 鞭 打 就 猛咁 趕 啲 騾仔 。
但係 追住嚟 嗰 幾十 騎馬 就 越 跑 越 近 ，冇 幾 耐 ，已經 嚟到 大車 後 便 嘞 。
韋小寶 喺 車廂 板壁 條 罅處 一 裝 ，嘿 即時 放心 啊 ，唞咗 個 大氣 。
原來 呢 幾十 騎 啊 都 係 身穿 青衣 嘅 漢子 ，唔係 喇嘛 。
好快脆 ，幾十 騎馬 都 喺 車旁 掠過 ，衝咗 去 車 嘅 前 便 。
阿珂 突然間 叫 ：鄭公子 ，鄭公子 ！
馬上 有 一名 乘客 即時 勒住咗 馬 ，向 旁邊 讓開 。
等大車 追翻 上嚟 嘅 時候 ，同架車 一拍 噉 跑 ，佢 話 ：係 陳姑娘 啊 ？
阿珂 話 ：係啊 ，係 我 。
想唔到 又 再見到 你 嘞 ，你係咪 同 王姑娘 一齊 㗎 ？
唔係 ，師姐 唔喺 呢處 。
你 又 係 去 河間府 啊 ？我哋 同路 啊 ，一齊 行 啦 。
唔係啊 ，我哋 唔係 去 河間府 。
河間府 好 熱鬧 㗎 ，你 都 去 啦 。
佢 兩個人 講説話 嘅 時候 ，車馬 仍然 繼續 向前 奔跑 。
韋小寶 見 阿珂 面 珠 紅紅 ，雙眼 裏 便 充滿 咗 光彩 非常 高興 ，就 好似 遇到 世上 最 親近 嘅 人 一樣 。
霎時之間 ，佢 個 心口 就 好似 畀 大錘 重重 捶咗 一下 。
佢 心諗 ：唔通 係 佢 嘅 意中人 嚟咗 ？
就低聲話 ：我哋 避難 緊要 啊 ，唔好 同 嗰啲 唔相干 嘅 人 講嘢 啦 。
阿珂 完全 冇 聽見 佢 嘅 説話 ，只係 問 嗰個 人 ：河間府 有 咩 事 咁 熱鬧 啊 ？
嗰個人 話 ：你 唔 知道 咩 ？
車帷一 掀 ， 有 個人 伸 個頭 入 嚟 。
嗰個人 面目 俊美 ，約莫 二十三四歲 啦 ，滿面 笑容 話 ：
河間府 要 開 殺龜 大會 ，天下 英雄 好漢 都 去 參加 ，好好玩 㗎 。
咩 殺 龜 大會 啊 ， 殺大 烏龜 啊 ？ 噉 有 咩 好玩 唧 ？
哈哈哈哈哈哈 ，係 殺 大 烏龜 ，不過 唔係 真 嘅 烏龜 ，係 個 大 壞蛋 ，佢 個 名 裏 便 有 個 龜 字 嘅 。
邊度 有人 個 名 裏頭 有 個 龜 字 嘅 呢 ，你 呃 人 嘅 。
唔 係 烏龜 個 龜 啊 ， 同音 唧 ， 係 桂花 個桂字 ， 你 估下 係 邊個 吖 嗱？
韋小寶 聽咗 嚇咗 一跳 個 心 諗 ：
個名 裏頭 有 桂花 個桂字 㗎 ？ 噉 唔 係 要 殺 我 小桂子 ？
只聽見 阿珂 拍手 笑住 話 ：啊 我 知道 喇 我 知道 喇 ，係 大漢奸 吳三桂 。
嗰個人 笑住 話 ：冇錯喇 你 真係 聰明 ，一估 就 中 嘞 。
你哋 捉到 吳三桂 嘞 咩 ？
噉就未 ，大家 係 商量 點樣 殺咗 呢個 大漢奸 啊 。
韋小寶 噉 就 松翻 啖氣 嘞 ，佢 諗 ：
噉就係喇 ，想 我 小桂子 係 個 細路 ，佢哋 唔會 殺 我 嘅 ，就算 要 殺 ，亦 唔使 開 咩 殺龜大會 吖 。
哈 豈有此理 ， 老子 假冒 姓名 ， 亦 都 算 衰 喇 ， 冒充 得 嚟 個 名 裏頭 有個 桂 字 嘅 。
只見 嗰個人 笑吟吟 噉 睇住 阿珂 。
呢個人 騎住 馬 彎低 個身 嚟 望住 架 車 裏 便 ，騎術 就 極 高 啊 。
阿珂 細細聲 問 白衣尼 話 ：師父 ，我哋 去唔去 啊 ？
白衣尼 武功 啊 雖然 係 極高 ，不過 應變能力 呢 就 好 弱 嘅 。
武林 豪傑 一齊 商量 殺 吳三桂 嘅 計策 ，自己 係 好 想 參加 ，但係 桑結 呢 班 喇嘛 冇 幾 耐 就 會 追住 嚟 嘞 ，情況 緊急 。
佢 沉吟咗 一陣 就 問 韋小寶 話 ：你 話 呢 ？
韋小寶 見到 阿珂 對待 嗰個 青年 嘅 神態 語氣 ，個 心 啊 真係 講唔出 咁 討厭 ，決唔想 阿珂 同 佢 喺 一齊 ，就 話 ：
啲惡喇嘛 一嚟 我哋 對付唔了 㗎噃 ，仲係 盡快 搵 地方 避開 佢哋 好 。
嗰個 青年 問 ：咩嘢 惡喇嘛 啊 ？
阿珂 話 ：鄭公子 ，呢位 係 我 師父 。
我哋 喺 半路 啊 遇到 一班 惡 喇嘛 ，要害 我 師父 啊 。
佢 老人家 身受 重傷 ，後 便 仲 有 七 名 喇嘛 追住 嚟 啊 。
嗰個 青年 話 ：哦 ，原來 係 噉嘅 事 啊 。
轉頭 出去 幾 聲 呼嘯 ，馬隊 都 停低 嘞 ，兩 架 大車 亦 都 停低 嘞 。
嗰個 青年 落咗 馬 ，捲起 車帷 躬身 話 ：晚輩 鄭克塽 拜見 前輩 。
白衣尼 岌 一岌頭 。
鄭克塽 話 ：諒佢 七八 名 喇嘛 亦 唔使 掛心 嘅 ，晚輩 代勞 ，打發 佢哋 走 就係 啦 。
阿珂 又 驚 又 喜 又 有 啲 擔心 佢 話 ：嗰班 惡 喇嘛 好 厲害 㗎 噃 。
鄭克塽話 ：我 帶 嗰啲 隨從 ，武藝 都 好 犀利 ，估計 可以 搞得 佢 掂 嘅 。
我哋 就算 唔 以 多勝少 啊 ，一個 對 一個 亦 唔 怕 佢 七八個 喇嘛 吖 。
阿珂 擰轉頭 望住 師父 ，眼神 好似 話 ，聽 鄭公子 話啦噉 。
韋小寶 話 ：唔得啊 ，師父 咁 高深 嘅 武功 仲 受咗 傷 ，你 二十幾個 人 又 有 咩 用吖 ？
阿珂 嬲 嘞 ：又 唔係 問 你 ，啰嗦 咁多 做 咩嘢 啊 ？
我 係 關心 師太 嘅 平安 啫 嘛 。
你 自己 怕死 就 話 關心 師父 。
你呢個小惡人吖 ，淨係會做壞事 ，有咩好心啊你 ？
乜 呢個 姓 鄭 嘅 本事 好 叻 㗎 ？唔通 仲 叻過 師太 ？
佢 帶住 二十幾個 人 ，個個 武藝 高強 ，唔通 二十幾個 人 仲 怕 佢 七 個 喇嘛 咩 ？
你 點 知道 二十幾個 人 個個 武藝 高強 唧 ？我 睇 啊 ，個個 武藝 低微 就 真 。
我 梗 係 知 啦 ， 我見 過 佢 哋 出手 ， 每個 啊 都 頂得住 你 一百個 啊 。
白衣尼 沉沉 吟吟 唔出聲 。
韋小寶 要 佢 扮 個 農婦 ，躲避 喇嘛 ，事非得已 ，其實 呢 佢 就 好 唔 想 嘅 。
如果 淨係 兩個 細佬哥 知道 噉 就 算啦 ，要 佢 當住 二三十個 江湖 豪客 之前 去 喬裝 避禍 ，佢 真係 寧可 死 都 唔 做 。
佢 慢慢 噉 話 ： 呢 啲 喇嘛 係 嚟 搵 我 嘅 啫 ， 鄭公子 ， 多謝 你 嘅 好意 嘞 ， 你 哋 去 啦 ， 唔 阻 你 喇 。
鄭克塽話 ：師太 乜噉 講 呢 ？路見不平 尚且 要 拔刀相助 ，何況 ，何況 師太 係 陳 姑娘 嘅 師父 ，晚輩 稍 效 微勞 ，係 義 不容辭 嘅 。
阿珂 塊面 一紅 ，耷低 個頭 ，但係 顯得 十分 得意 。
白衣尼 岌一岌頭 ，佢 話 ：好 ，噉 我哋 一齊 去 河間府 睇下 啦 ，不過 你 唔使 對 第二啲 人 講起 。
我 生性 疏懶 ，唔想 同 第二啲 人 見面 啊 。
鄭克塽 好 歡喜 話 ：係係 ，謹遵 前輩 吩咐 。
鄭公子 你 係 邊 一 門派 㗎 ？尊師 係 邊 一位 呢 ？
白衣尼 問 佢 門派 師承 ，就係 考查 佢嘅 武功 嘞 。
鄭克塽 話 ：晚輩 承蒙 三位 師父 傳 個 武藝 。
啓蒙嘅 業師 姓 施 ，係 武夷派 高手 。
第二位 師父 姓 劉 ，係 福建 莆田 少林寺 嘅 俗家 高手 。
誒 呢位 劉師傅 尊姓大名 啊 ？
佢 叫做 劉國軒 。
白衣尼 聽見 佢 就 噉 叫 師父 個 名 ，並 冇 恭敬 嘅 意思 覺得 有啲 奇怪 。
跟住 佢 想起 一個 人 ，就 話 ：噉 佢 唔係 同 台灣 嘅 劉 大將軍 同名 咩 ？
係 ，佢 就係 台灣 延平郡王 麾下 提督 ，劉國軒 劉 大將軍 嘞 。
鄭公子 係 延平郡王 一家人 喇 ？
晚輩 係 延平郡王 次子 啊 。
哦 ，原來 係 忠良 後代 。
鄭成功 喺 荷蘭人 手上 搶到 台灣 。
桂王 封 鄭成功 為 延平郡王 、招討 大將軍 。
永歷 十六 年 ，即係 康熙 元年 ，五月 ，鄭成功 逝世 。
當其時 佢 個 仔 鄭經 係 鎮守 金門 同 廈門 ，鄭成功 細佬 鄭襲 ，喺 台灣 接位 。
鄭經 啊 率領 大將 周全 斌 、 陳近南 等 啊 回師 台灣 ， 攻破 擁戴 鄭 襲 嘅 部隊 ， 咪 接翻 延平郡王 個位 。
鄭經 有 兩個 仔 ，長子 克臧 ，次子 克塽 ，噉啊 由 鄭成功 嘅 父親 鄭芝龍 計 起 呢 ，鄭克塽 已經 係 鄭家 嘅 第四 代 嘞 。
當時 延平郡王 以 一支 軍隊 力抗 清廷 不屈 ，喺 台灣 一個 島處 仍然 奉 大明 正朔 ，噉 天下 仁人義士 啊 ，冇 個 唔 敬仰 嘅 。
鄭克塽 講出 自己 嘅 身份 ，以為 呢個 師姑 一定 會 肅然起敬 ，點知 白衣尼 只係 岌一岌頭 ，講咗 一句 原來 係 忠良 後代 ，就 再冇 其他 表示 嘞 。
佢 唔 知道 白衣尼 係 崇禎 皇帝 嘅 公主 。
因為 佢 嘅 師父 劉國軒 係 父親 部屬 ，所以 對 佢 呢 就 唔係 點 恭敬 。
其實 喺 白衣尼 眼內 ，鄭經 亦 不過 係 一個 忠良 嘅 臣子 而已 唧 。
韋小寶 喺 個 肚處 又 猛 咁 鬧 ：
你 去 死 啦 ， 好 叻 啊 ？ 延平郡王 有 咩 嘢 咁 了不起 啊 ？
其實 佢 知道 延平郡王 係 了不起 嘅 ，佢 師父 陳近南 ，就係 延平郡王 嘅 部下 。
不過 佢 個 心 啊 越嚟越 覺得 不妙 嘞 。
睇住 鄭克塽 嘅 神情 ，對 阿珂 好 有意思 。
佢 係 坐 擁 雄兵 、 據 地 開府 嘅 郡王 嘅 堂堂 公子 ， 比起 流落江湖 嘅 沐 王府 不可同日而語 啊 。
何況 呢個 人 嘅 相貌 比 自己 ，英俊 文雅 十倍 ，談吐 呢叻 過 八倍 ，年紀 又 比 自己 大得多 。
武功 點樣 雖然 係 唔 知道 啊 ，不過 睇嚟 就算 唔 高過 自己 十倍 ，高 七八倍 總係 有 㗎 。
阿珂 對 佢 十分 傾心 ，就 盲公 都 睇出嚟 啦 。
如果 師父 知道 自己 同 鄭公子 爭奪 阿珂 啊 ，都 唔 使 鄭公子 下令 啊 ，怕 一掌 就 將 自己 打死 先 嘞 。
師太 又 讚 佢 係 忠良 後代 ，噉 自己 係 咩嘢 後代 啊 ？不過 係 老舉 嘅 後代 而已 啫 。
白衣尼 望住 鄭克塽 ，佢 話 ：噉 你 第一個 師父 ，係唔係 投降咗 清廷 嘅 施瑯 啊 ？
鄭克塽 話 ：係 。
呢個人 無恥 忘義 ，晚輩 早就 唔認 佢 係 師父 嘞 ，第日 喺 戰場 見面 ，必定 親手 殺咗 佢 。
佢 講起嚟 十分 慷慨激昂 。
韋小寶 諗 ：原來 你 嘅 師父 投降咗 朝廷 。
呢個 施瑯 啊 ，下次 見到面 要 留心啲 至得 。
鄭克塽 又 話 ：晚輩 近 十年 嚟 一直 跟 馮師傅 學藝 。
佢 係 崑崙派 嘅 第一 高手 ，外號 叫做 一劍無血 ，師太 一定 知道 佢 個 名 嘅 。
嗯 ，係 馮錫范 馮師傅 ，只係 唔知道 佢 呢個 外號 嘅 來歷 唧 。
馮師傅 個 劍法 極之 高強 ， 氣功 尤其 是 係 出神入化 。
佢 用 利劍 嘅 劍 尖點 人 死穴 ， 被 殺 嘅 人 皮膚 不 傷 ， 一 啲 都 唔 見 血 嘅 。
哦 ，氣功 練到 噉樣 由利 返 鈍 嘅 境界 ，世上 都 冇 幾多 個 人 唧 。
馮師傅 佢 有 幾大 年紀 啊 ？
今年 冬天 ，晚輩 就要 同 師父 辦 五十 壽筵 嘞 。
仲唔到 五十歲 ，內功 已經 咁 精純 ，好 難得 嘞 。
誒 ，你 帶 嗰啲 隨從 ，武功 都 過得去 㗎 ？
師太 放心 啦 ，嗰啲 都係 晚輩 王府 裏 便 精選 嘅 高手 衞士 嚟 。
韋小寶 忽然間 話 ：師太 ，天下 嘅 高手 點解 咁多 㗎 ？
呢位 鄭公子 嘅 第一個 師父 係 武夷派 高手 ；
第二個 師父 呢 係 福建 少林派 高手 ；
第三個 師父 係 崑崙派 高手 ；
帶嘅隨從 ，又 個個 都係 高手 ；
睇上嚟 ，佢 自己 亦 必定 係 個 高手 咯 。
鄭克塽 聽 佢 講得 咁 尖酸刻薄 ，想 發惡 㗎喇 ，不過 唔知道 呢個 細佬哥 嘅 來歷 。
見 佢 同 白衣 尼 、 阿珂 坐 埋 一架 大車 ， 睇 嚟 ， 必定 同 佢 哋 有 好 深 嘅 淵源 嘅 ， 所以 就 夾硬 忍住 。
阿珂 話 ：開講 有 話 名師 必 出 高徒 吖嘛 ，鄭公子 由 三位 名師 教 出 嚟 ，武功 梗係 使得 啦 。
韋小寶話 ：姑娘 講得 真係 啱嘞 。
我 冇 見識過 鄭公子 嘅 武功 啊 ，所以 隨口 問下 啫 。
姑娘 同 鄭 公子 相比 ，唔知 邊 一位 武功 強啲 呢 ？
阿珂 睇咗 鄭克塽 一 眼 佢 話 ：
當然 係 佢 比 我 強得多 啦 。
鄭克塽 笑住話 ：姑娘 太 謙 嘞 。
韋小寶 話 ：原來 如此 。
你話 名師 必 出 高徒 吖 ，噉 原來 你 武功 唔 高 ，就 因為 你 嘅 師父 是 低手 係 暗師 ，遠遠 唔 及得 鄭公子 嗰 三 位 高手 名師 咯 。
講到 拗頸 呢 ，阿珂 點 係 佢 嘅 對手 吖 ？一句 説話 就 畀 佢 捉住 咗 把柄 。
阿珂塊面 啊 唂 到 紅晒 連忙 話 ： 我 我 ， 我 幾時 話過 師父 係 低手 係 暗師唧 ？
你 自己 喺度 亂噏 無為 啫嘛 。
白衣尼 微微 一笑話 ：阿珂 ，你 同 小寶 鬥 牙骹 係 鬥唔過 嘅 。
我哋 走罷啦 。
噉 大車 放翻 落 車帷 ，一行 車馬 就 轉咗 向西 便 行 。
鄭克塽 就 騎馬 跟住 喺 大車 嘅 旁邊 。
嗱 各位 ，欲知 後事 如何 ，且 聽 下回 分解 。
