前文 再續 啊 書 接 上一回 啊 ，話説 韋小寶 跟住 阿珂 嚟到 一座 山仔 上 便 。
呢座 山仔 生滿咗 密密 嘅 松樹 ，確實 係 僻靜 無人 ，風景 呢 ，就 冇乜 好 睇 嘅 啫 。
但 係 就算 係 天地間 最醜 最 唔 好 睇 嘅 山水 ， 而家 韋小寶 雙眼 睇 起 上 嚟 ， 亦 係 天下 間 最好 嘅 景緻 。
何況 景色 嘅 好醜 ，佢 本來 亦 唔係 點 分辨得出 嘅 。
佢 大讚 話 ：哈 ，呢處 個 風景 啊 真係 美妙無比 呢嚱 ，哈哈哈 。
阿珂 話 ：有 咩 咁 美妙 啊 ？咁多 亂石 樹木 逼埋 一齊 ，難 睇 到 死 啊 。
係啊係啊 ，呢處 嘅 風景 ，都 冇 咩 好睇 嘅 嚱 ？
噉 你 點解 話 呢 度個 風景 真 係 美妙 無比 呢 ？
嘿嘿 ，呢度 嘅 風景 本來 係 唔好睇 嘅 ，不過 你 嘅 樣 一 映埋 上去 呢 ，就 美妙無比 嘞 。
呢個 山 上 冇 花 ，但係 你 嘅 樣 呢 ，比 一萬 朵 鮮花 仲要 美麗 。
山上面 又 冇 雀 ，你 把 聲 啊 ，比 一千 隻 黃鶯 一齊 唱歌 仲 好聽得多 啊 ，嘿嘿嘿嘿嘿 。
哼 ，我 叫 你 嚟 呢度 ，唔係 嚟 聽 你 亂噏 一通 嘅 ，係 叫 你 即刻 扯 ，趯 到 有 咁 遠 得 咁 遠 ，從 今 之 後 唔准 你 再 嚟 見 我 。
如果 再 畀 我 見到 你 呢 ，一定要 挖咗 你 對眼 核 出嚟 。
韋小寶 個 心 啊 當堂 沉 低落 去 ，苦 起 塊 面 話 ：
姑娘 ，以後 我 唔敢 再 得罪 你 喇 ，請 你 原諒 咗 我 啦 。
我係 原諒咗 你 啊 ，今日 唔 攞 你 條命 就係 原諒 你 喇 。
講完 ，嚓 一聲 ，拔出 柳葉刀 佢 話 ：
你 跟住 我 ，個 心 一味 諗住 啲 壞嘢 ，唔通 我 唔 知道 啊 ？
你噉樣羞辱我 ，我 寧可 畀 師父 責罰 我 一千次 一萬次 ，亦非 殺 你 不可 。
韋小寶 見到 刀光閃閃 ，想起 佢 嗰啲 剛烈 嘅 性情 知道 唔係 開玩笑 喇 就 話 ：
噉師太 叫 我 幫手 搵 阿琪 姑娘 吖嘛 ，搵到 之後 ，我 唔再 跟住 你 就係啦 。
唔得 ，冇 你 幫手 ，我哋 亦 搵 得到 。
就算搵唔到 ，我 師姐 又 唔係 三歲 細佬哥 ，唔通 佢 自己 唔會 返嚟 咩 ？
佢 舉起 把 刀 喺 空中 虛劈 ，呼呼 生風 ，大聲 噉 話 ：你 仲 唔 走 就 唔好 怪 我 無情 啊 。
嘿嘿嘿 ，你 本來 對 我 就 好 冇 情 㗎 喇 ，唔 走 又 冇 情 走 又 冇 情 ，噉 我 唔 走 咯 。
到咗 而家 你 仲 膽敢 向 我 風言風語 係嘛 ？
阿珂 一個 箭步 衝埋去 ，舉刀 向 韋小寶 頭殼 就 斬 。
嘩 ，韋小寶 大吃一驚 啊 ，連忙 跳開 閃避 。
阿珂 喝 佢 話 ：你 扯 唔 扯 啊 ？
你 就算 將 我 碎尸萬段 ，我 變咗 隻 鬼 我 都 要 跟實 你 。
阿珂 嬲 到 極 喇 ，攞起 把 刀 連 劈 佢 三刀 。
好彩 呢啲 招數 呢 喺 少林寺 般若堂 嘅 時候 已經 施展過 嘞 ，澄觀 和尚 都 想 咗 拆解 嘅 法子 。
噉 韋小寶 係 學過 嘅 ，就 全部 避開咗 。
阿珂 斬佢 唔中 就 更加 嬲 嘞 ，柳葉刀 啊 越 斬 越快 。
再過得幾招 ，韋小寶 覺得 難以 閃避 嘞 ，只有 拔出 匕首 ，哐 一聲 ，將 佢 把 柳葉刀 啊 削為 兩 橛 。
阿珂 又 驚 又 嬲 ，舞起 半橛 斷刀 ，對 佢 冇 頭 冇 腦 噉 亂 咁 斬 。
韋小寶 見 佢 把 刀 短 ，唔敢 再 用 匕首 嚟 招架 嘞 。
事關 自己 武藝 平庸 ，一下 掌握 唔準 ，咁 鋒利 嘅 匕首 只要 喺 佢 身上 輕輕 一 帶 啊 就 會 攞咗 佢 條 命 。
避咗 幾下 ，冇法子 喇 唯有 發 腳趯 落 山 。
阿珂 揸住 斷刀 追 佢 大叫 話 ：
你 同 我 躝 到 遠遠 我就 唔 殺 你 係啦 ！
見佢 趯翻去 市鎮 個 心 好 急 喇 佢 諗 ：哎呀 呢個 衰人 去 搵 師父 講 ，噉 就 弊 喇 。
連忙 提氣 猛咁 追 ，想 將 佢 迎頭 截住 。
但係 白衣尼 只係 教咗 佢 一啲 武功 招式 ，內功 心法 呢 從來 冇 教過 佢 。
佢 嘅 內功 修為 同 韋小寶 只係 半斤八兩 唧 ，就 始終 追 佢 唔到 。
睇住 韋小寶 走咗 入 客店 ，急到 佢 爭啲 喊 咁滯 個 心 諗 ：
如果 師父 責怪 我 ，就 將 佢 以前 調戲 我 個 説話 講晒出嚟 係 啦 。
噉 收起 把 斷刀 ，慢慢 行入 客店 。
誰知 佢 行 入去 客店 間 房 ，突然間 覺得 一股 力量 奇大 嘅 勁風 ，喺 房門 裏 便 猛撲 出嚟 ，將 佢 一撞 。
當堂 企腳 唔穩 ，蹬蹬蹬 倒退 三步 ，一跤 就 扽 喺度 。
阿珂 覺得 坐落去 嗰處 係 軟綿綿 嘅 ，原來 係 坐 喺 一個 人 身上 。
噉啊 連忙 想 撐翻 住 企 起身 ，右手 捩手 一撐 ，撳正 嗰個 人 塊 面 ，噉 狼狽 到 極 。
都嚟唔切想喇 ，企翻起身 ，擰轉身一睇 ，見 地下 嗰個人 原來 係 韋小寶 。
佢 吃咗 一 驚 佢 話 ：你 做咩嘢 啊 ？
説話 未完 ，突然間 雙腳 一軟 ，點都 企唔穩 喇 ，一下 就 趴 喺度 ，向住 韋小寶 跌落去 。
呢 一次 啊 ，係 趴低 跌倒 。
佢 一 便 叫住 話 ： 唔 好 啊 唔 好 啊 ！ 就 趴 咗 喺 佢 嘅 身處 。
四隻 眼睛 相對 ，距離 唔到 幾寸 咁多 。
阿珂 好 急 啦 ，怕 呢個 小惡人 乘機 嚟 吻 自己 ，就 博命 想 快啲 企 起身 ，哈 ，唔知 點解 ，竟然 全身 都 冇 到 力 噃 。
噉啊 只有 擰歪 塊 面話 ：快啲 扶 我 起身 啦 ，快啲 扶 我 起身 啦 。
我 都 冇 力 啊 噉 點算 啊 ？
韋小寶 個 身上 便 ，有 個 千嬌百媚 嘅 美女 趴 喺 度 ，嗨 真係 快活 到 佢 癲 啊 ，佢 諗 ：
咪 講話 我 冇 力 吖 ，而家 我 就算 有 一萬 斤 力 都 唔會 扶 你 起身 㗎 喇 。
係 你 自己 趴 喺 我 處 嘅 ，點 怪得 我 啊 ？
阿珂 話 ：師父 畀 敵人 圍攻 啊 ，快啲 想法子 幫佢 啦 。
原來 啱先 佢 一 入門 ，只見 白衣尼 盤膝 坐 喺 地下 ，右手 出掌 ，左手 啊 揮動 衫袖 ，正在 同 敵人 對抗 。
噉 對方 係 啲 咩嘢 人 呢 就 冇 睇清 嘞 ，只係 知道 唔止 一個 人 ，想話 要 仔細啲 睇下 ，就 畀 房裏 便 嘅 內力 勁風 逼 咗 出嚟 。
韋小寶 啊 比 佢 先 到 幾步 ，遭遇 同 佢 一模一樣 。
亦係 一腳 啱啱 踏入 門口 ，即刻 就 畀 勁風 撞翻 出去 ，𢴈 喺 地下 ，噉 阿珂 呢 就 跟住 趕到 嚟 ，就 跌 喺 佢 嘅 身上 。
雖然 韋小寶 啊 𢴈到 𦣇柚 痛到 極 ，阿珂 呢 ，再 跌落嚟 就 矺到 佢 心口 啊 肚 啊 又 痛多下 。
但係 個 心 呢 就 歡喜 到 不得了 ，只係 望 呢個 小美人 永遠 趴 喺 自己 身處 ，唔好 起身 就 好嘞 。
至於 白衣尼 同 咩嘢 人 打鬥 完全 唔 放 喺 心上 ，估計 佢 功力 通神 ，再 厲害啲 嘅 敵人 啊 亦 奈 佢 唔 何 嘅 。
阿珂 右手 撐住 韋小寶 心口 ，慢慢 挺起 個身 ，深深 吸咗啖氣 ，終於 企起身 嘞 。
佢 話 韋小寶 ：你 點解 瞓 喺 呢度 啊 ？𠽤到 我 跌咗 一 跤 。
佢 明知 韋小寶 同 自己 嘅 遭遇 相同 ，身不由己 ，但係 先頭 嘅 情景 呢 實在 太過 羞家 嘞 ，忍唔住 要 發作 幾句 。
韋小寶 話 ： 係 ， 係 ， 早知 你 要 𢴈 喺 呢 處 呢 ， 我 啊 應該 向 旁邊 躝 開 三尺 至 係 㗎 。
誒唔得唔得唔得 ，三尺 都 仲 唔夠 啊 ，如果 淨係 躝開 三尺 ，噉 同 你 一拍 噉 瞓 喺 處 ，都 唔係 點 好睇 嘅 嚱 ？
阿珂 唔理 佢 嘞 ，掛住 師父 就 望 下 間 房 裏 便 。
只見 白衣尼 坐喺 地下 ，正在 迎擊 敵人 。
圍攻佢嘅敵人 一眼 見到 呢 總共有 五個 ，都係 身穿 紅衣 嘅 喇嘛 ，每人 出掌 拍擊 啊 非常 迅速 。
但係 畀 白衣尼 嘅 掌力 逼住 ，都係 背脊 緊緊 貼住 房間 嘅 板壁 ，難以 逼近 。
阿珂 行 前 一步 ，想 睇下 除咗 呢 五個 人 之外 仲 有冇 其他 嘅 敵人 啦 噉 。
不過 只係 行前 一步 唧 ，就 覺得 勁風 壓過嚟 ，氣 都 唞唔到 ，唯有 退後 兩步 。
佢 踢咗 韋小寶 一腳 話 ：喂 ，仲唔 起身 ？快啲 睇下 敵人 係 咩 路數 啦 。
韋小寶 扶住 後便埲墻 企起身 ，見到 房 裏 便 嘅 情景 ，佢 話 喇 ：六個 喇嘛 都 係 壞人 啊 。
佢 企 喺 阿珂 旁邊 ，噉 啊 多 見到 一 名 喇嘛 。
阿珂 話 ：攞嚟 講嘅 ，梗係 壞人 啦 ，使乜 你 講 啊 ？
嘿 ，係唔係 壞人 啊 ，都 唔 一定 㗎 。
好似 我 噉 ，我係 個 好人 喇 ，你 就 偏偏 話 我 係 壞人 。
呢 六個 喇嘛 膽敢 同 師太 打 ，哼 就 比 我 壞得多 嘞 。
哼 ，我 睇 你 啊 都 係 同埋 佢哋 嗰 一路 嘅 。
呢 六個 喇嘛 係 你 引嚟 嘅 ，係 嚟 害 師父 嘅 。
點會呢 ？我 敬重 師太 就 好似 敬重 菩薩 一樣 ；
敬重 姑娘 ，就好似 敬重 仙女 一樣 ，點會 係 害 佢 嘅 呢 ？
阿珂 定晒神 噉 睇 住房 裏 便 嘅 情景 ，突然間 吖 一 聲 噉 驚叫 。
韋小寶 望 下 間 房 ，只見 六個 喇嘛 都 已經 揸住 戒刀 ，正 話 想 上前 斬 白衣尼 ，不過 畀 白衣尼 嘅 袖力 掌風 逼實 ，唔埋得去 唧 。
但係 白衣尼 嘅 頭頂 ，已經 冒出 一絲絲 白氣 ，睇嚟 已經 係 出盡咗 全力 嘞 。
佢 只有 一隻 手 ，一個 人 同 六個 手執 兵器 嘅 喇嘛 嚟到 打 ，再 打落去 啊 恐怕 難以 抵敵 。
韋小寶啊 想 上去 幫手 嘅 ，但 自知 武藝 低微 ，連 房門 都 行唔入去 。
就算 喺 地下 躝入去 啊 ，白衣尼 不免 要 分心 照顧 ，反而 係 越 幫 越 忙 啫 。
焦急起嚟 ，見到 角落頭 有 把 掃把 憑 喺 處 ，即刻 行過去 攞起佢 ，個身 縮 喺 門邊 ，伸 把 掃把 出去 向 靠近 門口 一名 喇嘛 亂咁 撥 。
只係盼望佢心神一亂 ，內力不純 ，就可以畀白衣尼嘅掌力震死嘞 。
點知 把 掃把 啱啱 伸出去 ，就 聽見 一聲 大喝 ，掃把頭 已經 畀 個 喇嘛 一刀 斬斷 。
跟 住房 裏頭 嘅 勁風 直 飛 出嚟 ，擦過 佢 塊 面 ，當堂 擦損 咗 ，痛 到 不得了 。
阿珂 話 ：你 噉樣 搞 點得 嘅 呢 ？唔好 啊 。
韋小寶 個人 挨住 房門 嘅 板壁 ， 只 覺得 不停 咁 震動 ， 似乎 間房 四面 嘅 板壁 啊 ， 都 會 畀 刀鋒 掌力震 冧 一樣 。
佢 心念 一動 ，睇清楚 六名 喇嘛 企 嘅 方位 嘞 ，行去 削斷 佢 掃把 嘅 喇嘛 身後 ，拔出 匕首 ，隔住 板壁 就 刺入去 。
把 匕首 呢 鋒利 無比 嘅 ， 板壁 就 不過 寸 零厚唧 ， 匕首 刺入 去 就 好似 刺入 豆腐 一樣 ， 跟 住 插入 嗰 個 喇嘛 後 心 。
嗰個 喇嘛 大叫 一聲 ，成個人 軟顂顂 靠住 板壁 啊 慢慢 坐低 嘞 。
韋小寶 聽見 叫聲 ，知道 得手 嘞 ，就 行去 第二名 喇嘛 後便 ，又係 一 匕首 刺 出去 。
轉眼之間 ，就係噉樣 連氣 殺咗 四個人 。
因為 匕首 短 啊 ，切入 後心 之後 呢 ，匕首尖 就 冇 喺 前胸 穿出去 ，所以 每名 喇嘛 中劍 坐低 ，房 裏 便 其他 嘅 人 呢 都 唔 知道 佢 係 點樣 死 嘅 。
其餘 兩名 喇嘛 慌到 極 喇 ，想 走 嘞 。
白衣尼 跳起嚟 ，一掌 打正 一名 喇嘛 後心 ，即時 震到 佢 狂噴 鮮血 而死 啊 。
左手衫袖 一拂 ，攔住 另外 一名 喇嘛 嘅 去路 ，右手 飛快 噉 點咗 佢 身上 五處 穴道 ，嗰個 喇嘛 𢴈咗 喺 地 唔逳得 嘞 。
白衣尼 將 嗰 四名 喇嘛 嘅 屍體 踢轉過嚟 ，見到 背上 各 有 刀傷 ，又 見到 板壁 上面 嘅 窿 ，先至 明白 知道 佢哋 點 死 嘅 。
佢 喝 嗰個 喇嘛 話 ：你 ，你 喺 邊處 ？
突然 個身 一 岌 ， 就 坐 低 嘞 ， 口吐 鮮血 。
嗰 六名 喇嘛 都係 好手 啊 ，佢 一個 打 六個 ，內力 幾乎 消耗晒 嘞 ，最後 嗰 一擊 一拂 ，更加 用盡 全力 ，所以 就 支持唔住 。
阿珂 同 韋小寶 大驚 啦 衝上去 扶住 佢 。
阿珂 猛咁 叫話 ：師父 ，師父 ！
白衣尼 呼吸 微弱 ，眯埋 雙眼 唔出聲 。
韋小寶 同 阿珂 兩個人 ，將 佢 抬 去 炕床 瞓低 ，佢 又 嘔 咗 好多 血 。
阿珂 啊 慌到 手揗腳震 ，一味 流眼淚 。
客店 嘅 事頭 同埋 店小二 呢 ，見到 有人 打鬥 唄 ，早就 匿埋 。
而家 聽見 冇聲 喇 就 過嚟 探頭探腦 ，見到 滿地 鮮血 ，死屍 狼藉 ，嚇到 鬼鬼聲 咁 叫 。
韋小寶 雙手 各 揸 住 一把 戒刀 喝 佢 哋 話 ： 嘈 咩 啊 嘈 咩 啊 ！ 仲 嘈 呢 我 就 一刀 一個 劏 咗 你 哋 先 。
眾人 見到 擸擸 亮 嘅 戒刀 ，嚇到 猛咁 岌頭 。
韋小寶 攞出 三錠 銀 ，每 錠 都係 五 兩 嘅 ，交畀 夥記 話 ：
快啲 去 請 兩架 大車 嚟 ，仲有 五兩 銀 呢 係 打賞 畀 你 嘅 。
嗰個 夥記 又 驚 又 喜 ，飛奔 出去 ，冇 幾 耐 ，就 請 咗 大車 返嚟 嘞 。
韋小寶 又 攞出 四十 兩 銀 交畀 事頭 話 ：
呢 六個 惡 喇嘛 係 自己 打交 ， 你 殺 我 我 殺 你 ， 你 哋 都 親眼 睇 見 㗎 ， 係 唔 係 啊 ？ 睇 唔 睇 到 啊 ？ 睇 到 啦 嘛 ？ 係 。
嗰個 事頭 點 敢 話 唔係 呢 ，就 一味 岌頭 。
韋小寶 話 ：呢 四十 兩 銀 ，算 係 房錢 同 飯錢 ，好喇 我哋 走喇 。
噉佢 同 阿珂 合力 抬起 白衣尼 ，放咗 落架 大車 處 ，又 攞咗 炕床 上面 嘅 棉被 ，𢫏住 佢 。
又叫 夥記 將 嗰個 點咗 穴道 嘅 喇嘛 ，抬 入去 另外 一架 大車 。
韋小寶 同 阿珂 話 ：你 陪 師父 啦 ，我 陪 佢 。
噉 兩個 人 上咗 大車 。
韋小寶 吩咐 順住 大路 向 南 行 ，佢 諗 ：
師太 身受 重傷 ，如果 再 有 喇嘛 嚟 攻 ，噉 就 弊 嘞 。
要 搵 笪 偏僻 嘅 地方 等 師太 養傷 至 得 。
噉佢 又 怕 嗰個 喇嘛 解開咗 穴道 ，自己 唔夠 佢 打 啊 ，就 攞咗 一條 繩 嚟 ，將 佢 手腳 綁 到 實 一實 。
行咗 十幾里 ，阿珂 忽然間 叫停車 ，喺 車上 跳落嚟 ，走到 韋小寶 架 車 前便 ，個樣 好 驚 噉 話 ：
師父 嘅 氣息 越嚟越弱 喇 ，只怕 ，只怕 。
韋小寶 吃咗 一驚 啊 ，連忙 落車 去 睇 ，見到 白衣尼 已經 氣若遊絲 嘞 。
阿珂 喊住話 ：啊 ，有 咩 靈效 嘅 傷藥 就 好嘞 ，我哋 快啲 去 搵 醫生 啦 ，不過 呢處 。
韋小寶 忽然間 諗起 ，太后 畀 咗 三十 粒 藥丸 過 自己 嘅 ，叫做 咩 雪參玉蟾丸 。
係 高麗國 國王 進貢 嚟 嘅 ，話 服 後 強身健體 ，解毒 療傷 ，靈效 非常 噉 。
其中 廿二 粒 呢 係 送畀 洪教主 同 夫人 ，噉 自己 有 八粒 ，就 喺 身邊 攞出 嗰個 玉瓶 話 ：靈效 傷藥 我 呢處 有 。
噉啊倒咗 兩粒 出嚟 ，餵畀 白衣尼 食 。
阿珂 又 攞咗 個 水壺 ，餵 師父 飲咗 兩 啖 水 。
韋小寶啊 乘機 喺 白衣尼 架 車 上面 坐 嘞 ，因為 可以 對住 阿珂 吖 嘛 ，佢 話 ：
師太 服藥 之後 唔知 點 㗎 ，我 要 時時刻刻 守住 佢 至得 。
於是 吩咐 兩架 車 又 行嘞 。
過咗 一陣間 ，白衣尼 忽然間 長長 吸咗啖氣 ，慢慢 擘開 雙眼 。
阿珂 好 歡喜 噉 話 ：師父 ，你 好啲 啦嘛 ？
白衣尼 岌一岌 頭 。
韋小寶 連忙 又 攞出 兩粒 藥丸 嚟 佢 話 ：師太 ，藥丸 有效 啊 ？你 再 食 兩粒 啦 。
白衣尼 擰擰 頭 低聲 話 ：今日 ，夠喇 ，我 要 運氣化 呢啲 藥 。
誒 ，停 ，停低架車 啦 。
哦哦 。
韋小寶 吩咐 停車 。
噉 白衣尼 叫 阿珂 扶起 佢 ，盤膝 而 坐 ，閉目 運功 。
阿珂 目不轉睛 噉 望住 師父 ，韋小寶 卻 係 目不轉睛 噉 望住 阿珂 。
只見 阿珂 初時 個樣 好 憂慮 ， 漸漸 漸漸 堂 眼眉 舒展 翻 ， 雙眼 裏 便 露出 光彩 嘞 。
又過一陣 ，嘴邊 露出 一絲 笑意 。
韋小寶 都 唔使 睇 白衣尼 就 知道 運功 療傷 大 有 進步 。
再過一陣 ，見 阿珂 更加 歡喜 嘞 。
韋小寶 個 心 諗 ：如果 架 車 裏 便 冇 呢位 師太 ，就 只係 我 同 小美人 兩個 ，而 佢 個 面色 亦 係 咁 歡喜 嘅 ，哎呀 ，我 真係 開心 死 咯 。
突然間 阿珂 擔 高頭 ，見到 佢 傻咗 噉 睇住 自己 ，當堂 面 都 紅晒 ，想 鬧 韋小寶 嘞 。
但係又怕 騷擾咗 師父 運功 啊 ，噉唯有 忍住 唔鬧 啦 ，只係 狠狠 噉 睩咗 佢 一眼 。
韋小寶 向 佢 笑 一 笑 ，順住 佢 眼光 睇 下 白衣尼 ，見到 佢 精神 平和 ，呼吸 已經 調勻 嘞 。
白衣尼 呼咗 一口氣 ，擘開 雙眼 低聲 話 ：可以 行 喇 。
韋小寶 話 ：再 唞 多 一陣 啦 唔 緊要 㗎 。
白衣尼 話 ：唔使 嘞 。
韋小寶 又 攞出 五兩 銀 賞 畀 車夫 ，叫 佢哋 起行 啦 噉 。
當時 請 一架 大車 ，一日 只 需要 一錢半銀 就 夠嘞 。
噉 兩名 車夫 見到 佢 出手 豪闊 ，歡喜 到 乜嘢 噉 啊 猛咁 話 多謝 。
白衣尼 慢慢噉 話 ：小寶 ，你 畀 我 食 嘅 係 咩嘢 藥 啊 ？
韋小寶話 ：係 雪參玉蟾丸 啊 ，朝鮮國 國王 進貢 畀 小皇帝 嘅 。
哦 ，雪參 同埋 玉蟾 兩樣 嘢 ，都係 療傷 大補 嘅 聖藥 ，差唔多 可以 起死回生 嘅 ，想唔到 竟然 畀 我 用到 佢 ，真係 命不該絕 啊 。
佢 重傷 之後 ，呢陣時 講嘢 竟然 聲調 平穩 ，已經 冇 中氣不足 嘅 現象 嘞 。
阿珂 好 歡喜 噉 話 ：師父 ，你 老人家 好咗 喇 ？
白衣尼 話 ：唔死得喇 。
韋小寶 話 ：我 呢處 仲 有 二十八 粒 ，請 師太 收起 佢 嚟 用 啦 。
講完 ，將 玉瓶 遞過去 。
白衣尼 唔接 佢 ，佢話 ：
最多食 兩三粒 就夠嘞 ，唔使 咁多 。
韋小寶 本來 就 好 慷慨 嘅 佢 諗 ：三十粒 藥丸 啫嘛 ，畀 你 食晒 有 乜 緊要 唧 ？
老舉 乸 嗰處 啊 一定 仲 有 嘅 。
佢 話 ：師太 ，你 身子 緊要 啊 ，啲 藥丸 既然 有用 ，噉 下次 我 見到 小皇帝 ，再 問 佢 攞 啲 咪 就係 囉 。
講完 ，將 玉瓶 放 喺 佢 手 。
白衣尼 點點頭 ，不過 仍然 將 玉瓶 還 翻 畀 佢 。
又行咗一程 ，白衣尼 話 ：有 咩 靜僻 嘅 地方 停低 架 車 ，問 下 嗰個 喇嘛 啦 。
韋小寶 應咗 佢 。
就 吩咐 大車 駛入 一個 山坳 ，叫 車夫 將 嗰個 喇嘛 抬 落 車 放 喺 地下 。
然後 牽 騾仔 去 山後 食草 佢 話 ：冇 我 叫 你哋 唔好 過嚟 啊 。
兩名 車夫 應咗 就 牽住 騾仔 行開 。
白衣尼 話 ：你 問 佢 啦 。
韋小寶 拔出 把 匕首 。
嗱 各位 ，欲知 後事 如何 ，且 聽 下回 分解 。
