前文 再續 啊 書 接 上 一回 啊 。
話說 康熙 好 憤恨 噉 話 ，想 殺咗 皇太后 ，但係 老皇爺 呢 ，又 叫 佢 唔好 難為 咗 佢 ，噉 就 唔知 點 好 嘞 。
韋小寶 諗 ：老皇爺 唔准 你 殺 老舉乸 啫 ，冇 唔准 我 殺 喇 。
就算 佢 唔准 我 殺 ，老子 係 佢 方丈 ，只能夠 我 向 佢 下令 ，又 不必 聽 佢 號令 嘅 。
不過 呢件事 呢 講穿咗 就 唔靈 㗎 喇 。
於是 佢 話 ：皇上 唔使 心煩 嘅 。
太后 作惡多端 ，終歸 唔會 有 好 下場 嘅 ，皇上 你 擘開 龍目 ，打開 龍耳 等住 嚟 啦 。
康熙 個人 係 幾咁 聰明 呢 ，已經 明白 佢 嘅 意思 嘞 ，定 眼 睇 咗 佢 一陣 岌一岌 頭 話 ：
冇錯 ，呢個 賤人 作惡多端 ，終歸 唔會 有 好 下場 嘅 。
佢 喺 經房 裏 便 踱嚟踱去 話 ：
而家 至 緊要 嘅 呢 ，就係 唔好 畀 啲 喇嘛 再 嚟 冒犯 父皇 。
最好 我哋 派 一個 靠得住 嘅 人 ，去 做 西藏 活佛 ，噉 天下 嘅 喇嘛 都 歸 佢 管 ，嗰陣時 乜嘢 後患 都 冇 嘞 。
只不過 西藏 活佛 係 投胎 轉世 嘅 ，皇帝 派 去 嘅 怕 唔 得 ，吖 要 想 個 法子 。
韋小寶 聽到 呢處 ，真係 嚇到 魂飛魄散 喇 佢 諗 ：
我 今日 扮 個 小喇嘛 ，咪 個 弄假成真 咯 皇上 金口 一 開 ，就 難以 挽回 㗎 嘞 ，嗯 ，要 搶先 至 得 。
佢 連忙 話 ：皇上 ，呢個 西藏 活佛 ，奴才 係 點 都 唔 做 㗎 喇 。
康熙 哈哈 大笑話 ：哈哈哈哈哈哈哈 ，你 真係 精嘞 。
其實 做 西藏 活佛 有 咩 唔好唧 ？
佢 管 嘅 地方 啊 仲 大過 吳三桂 嘅 雲南 ，做 活佛 就係 西藏 王 啊 。
韋小寶 猛咁 耍 手擰頭 話 ：
我 寧可 喺 你 身邊 做 侍衞 喇 ，一 做 活佛 就 好 難 同 你 喺 一起 㗎 喇 。
西藏 王 又 好 ， 東 藏王 又 好 ， 就算 係 地藏王 啊 我 都 唔 做 啊 。
地藏王菩薩 嘅 名 ，攞嚟 亂咁 講 都 得 嘅 咩 ？
康熙 推開 房門 ，行翻 出去 ，對 察爾珠 同 多隆 話 ：
你 兩個人 辦事 得力 ，朕 有 賞賜 。
察爾珠 同 多隆 好 歡喜 ，叩頭 謝恩 。
康熙話 ：朕 崇信 佛法 ，果然 呢幾年 上體 天心菩薩 保佑 ，國家 平安 萬民 康樂 。
韋小寶 喺 呢度 做 朕 嘅 替身 ，代 我 出家 做 和尚 ，有 好 大 功勞 啊 。
韋小寶 亦 叩頭 謝恩 嘞 。
康熙話 ：而家 韋小寶 做 朕 嘅 替身 已經 滿期 ，咪 跟 我 返 去 北京 。
輪到 察爾珠 出家 兩 年 ，不過 就 唔係 做 和尚 ，係 做 五台山 大喇嘛 。
你 挑選 一千名 驍騎營 嘅 得力 軍官 軍士 ，一齊 同 你 做 喇嘛 啦 ，噉 就 分別 住 喺 山上 十間 大 喇嘛寺 。
啲 軍士 出家 期間 ，雙倍 發 餉銀 ，另外 仲有 賞賜 。
察爾 打個 特 ，雖然 唔係 點 願意 啊 ，亦 只有 謝恩 嘞 。
康熙話 ：做善事 想 畀 人 知 ，就唔係 真善事 。
呢件事 吩咐 大家 守口如瓶 ，唔能夠 洩漏 ，否則 軍法 從事 。
多隆 將 五台山 嘅 喇嘛 都 鎖翻 去 北京 ，韞 起 佢哋 。
派人 去 通知 達賴活佛 ，話 皇上 請 呢啲 喇嘛 去 北京 宣揚 佛法 。
過得 七八十年 ，等到 佛法 昌盛 嘞 ，就 送 佢哋 返去 西藏 啦 。
佢 講 一句 ，察爾珠 同 多隆 就 應 一句 。
韋小寶 歡喜 咯 ：呢次 唔使 做 和尚 喇 。
康熙 又 話 ：韋小寶 ，升 你 為 驍騎營 正黃旗 都統 ，仍然 兼任 御前 侍衞 副總管 。
察爾珠 ，你 大喇嘛 做得 好 喇 ，返到 北京 之後 ，派 你 去 外省 做 提督 。
兩個人 又再 謝恩 。
韋小寶 亦 唔係 點 高興 唧 ，佢 諗 ：正 都統 、副都統 ，橫掂 都係 噉 一回事 㗎 啦 。
察爾珠 就 十分 歡喜 噃 ，北京 大官 極之 多 ，驍騎營 都統 不過 係 皇帝 親信 啫 嘛 ，淨係 驍騎營 一 營 啊 ，八旗 就 各 有 一 個 都統 ，就 有 八 個 都統 嘞 。
見到 親王 貝勒 、貝子 公侯 ，都 要 屈膝 請安 嘅 ，除咗 餉銀 之外 又 冇 咩 油水 。
一 放到 去 外省 做 提督 啊 ， 嘿 ， 唔 同咯 ， 威風八面 ， 財源 廣進 喇 。
當其時 個 天 已經 蒙蒙光 嘞 ，康熙 吩咐 去 清涼寺 拜佛 。
去到 寺外 便 ，只見 刀槍 拋到 成地 都係 ，到處 都 見到 血跡 ，可見 尋晚 捉拿 眾 喇嘛 嘅 時候 一場 激戰 ，打得 好 厲害 。
康熙 入 寺 參拜 如來 同 文殊菩薩 ，噉 就 去 後山 順治 參禪 嘅 小廟 睇下 ，只見 焦木 殘磚 ，小廟 早 已經 燒 清光 喇 。
康熙 暗暗 心驚 啊 ：如果 父皇 尋晚 走唔甩 ，就會 喺 廟 裏頭 燒死 喇 ，我 。
一時 都 唔敢 想落去 喇 ，吩咐 索額圖 佈施 白銀 二千 兩 重修 小廟 。
佢 知道 父親 唔願 咁 張揚 啊 ，因此 銀 呢 ，亦都 唔 畀 咁多 。
返到去 大雄寶殿 ，班 少林和尚 都 過嚟 拜見 。
佢哋 見 呢一位 小施主 隨從 眾多 ，氣派 極大 ，實係 大有 來頭 ，講唔定 仲 係 親王 貝勒 之流 添 。
班 和尚 雖然 唔係 趨炎附勢 啊 ，但係 佢 佈施 咁多 銀兩 ，重修 小廟 ，都 合十 多謝 。
澄通 等 人 亦 都 睇 出 ， 嗰 啲 假扮 香客 嘅 隨從 當中 ， 有 唔 少人 係 會 武功 嘅 。
康熙 嚟到 父親 出家 嘅 地方 唔 想 即刻 走 ，佢 話 ：
我 想 喺 寶剎 借住 三五日 ，唔知 得唔得 呢 ？
韋小寶 話 ：大施主 光臨 ，求之不得 。
突然間 ，嘭一聲 ，泥沙 紛紛 跌落嚟 ，大雄寶殿 嘅 屋頂 穿咗 個 窿 ，白影 晃動 ，一團 白色 嘅 嘢 飛落嚟 。
原來 係 一個 身穿 白衣 嘅 僧人 ，手執 長劍 ，飛快 向 康熙 撲過去 ，佢 話 ：
今日 為 大明 天子 報仇 啊 ！
康熙 急忙 退後 。
多隆 、 察爾珠 、 康親王 等 人 因 為 喺 皇帝 旁邊 ， 都 冇 帶 兵器 ， 唯有 空手 向 嗰 人 捉 過去 啦 。
嗰個人 左手 衫袖 一揮 ，一股 強勁 到極 嘅 風 啊 鼓蕩 而出 ，多隆 等 七八 個 人 企唔穩 ，同時 𢴈低 嘞 。
澄心 、澄光 都 一齊 話 ：唔好 傷害 人 。
即刻 出手 攔阻 。
嗰個 僧人 又係 袍袖 一拂 ，少林寺 澄字輩 嘅 僧人 各 施 絕技 化開 。
但係 佢哋 嘅 虎爪手 、龍爪手 、拈花擒拿手 、擒龍功 等等 ，亦 捉唔到 呢個 人 。
佢 哋 都 心念 一閃 ： 啊 天下 間 ， 竟然 有 咁 厲害 嘅 人物 嘅 。
嗰個 白衣 僧 啊 停 都 冇 停 啊 ，挺 劍 向 康熙 刺 過去 。
康熙 背脊 挨住 佛座 供桌 ，已經 退 無可 退嘞 。
説時遲那時快啊 ，韋小寶 一個 箭步 衝上去 ，擋住 康熙 。
啪一聲 ，劍尖 刺 正 佢 心口 ，長劍 一彎 ，竟然 刺唔入 。
韋小寶 心口 痛到 不得了 ，佢 早就 拔出 匕首 揸住 ，回手 一揮 ，哐 一聲 ，將 敵人 把 劍 斬為 兩截 。
嗰個 白衣 僧 打 個 特 ，澄觀 大叫 話 ：唔好 傷害 我 師叔 ！
左掌 向住 佢 右膊 拍落去 。
白衣僧 拋去 短劍 ，反掌 一格 ，哎呀 ，澄觀 只覺得 心口 熱血 翻騰 ，眼前 金星 直冒 。
白衣僧 讚話 ：好功夫 ！
佢 眼見 四圍 高手 好多 ，啱先 嗰 一劍 刺唔入 嗰個 小和尚 心口 ，真係 嚇 佢 一驚 啊 。
於是 唔敢 戀戰 嘞 ，右手 一伸 ，已經 揦住 韋小寶 條 衫 領 ，突然間 個 身 一湧 ，喺 殿 頂 嘅 破洞 飆 出去 。
呢一下 去得 快到 極 ，殿上 空 有 三十六 名 少林 高手 ，竟然 冇 一個 人 嚟得 切 阻擋 啊 。
澄心 、澄光 等人 急急 跟住 喺 個 破洞 飆 出去 ，只見 後山 白影 晃動 ，已經 喺 十幾丈 之外 嘞 。
呢個人 嘅 輕功 啊 好 到 極 。
班 少林 和尚 見到 追唔到 ，但係 本寺 方丈 畀 人 捉咗 追唔到 都 要 追 㗎 。
三十六名 少林 僧 ，吶喊住 追上去 ，但係 晃眼之間 ，嗰團 白色 人影 ，已經 轉過 咗 山坳 嘞 。
話 説 韋小寶 畀 佢 扚 住 飛 咁 走 ， 好似 騰雲駕霧 一樣 ， 一 樖樖 大樹 喺 身邊 掠過 ， 只 覺得 越 走 就 越 高 ， 個心 啊 都 唔 知幾怕 。
佢 諗 ：呢個 賊 禿 一劍 刺 我 唔死 ，梗係 好 唔服氣 定 嘞 。
佢 要 改用 第二個 法子 ，睇下 喺 萬丈高峰 掟 我 落去 我呢個 小賊 禿 會唔會 死 。
果然 不出所料 ，嗰個 白衣 僧 突然 鬆手 ，將 韋小寶 掟 低 。
哎吖 ！韋小寶 大叫 一聲 ，跟住 背脊 落地 嘞 ，原來 只係 掟 喺 地下 啫 。
白衣僧 冷冰冰 噉 睇住 佢 ：聽講 少林派 有 一門 護體神功 ，刀槍 唔入 ，想唔到 你 呢個 和尚仔 都 會 噃 。
韋小寶 聽 呢個 人 語音 清亮 ，帶住 三分 温柔 ，覺得 有啲 奇怪 喇 。
再睇下嗰個人塊面 ，只見 佢 白雪雪 ，瓜子口面 ，雙眉 彎彎 ，鳳目 含愁 ，竟然 係 個 極之 美貌 嘅 女子 ，約莫 三十零歲 。
只係 剃光 個 頭 ，頭頂 有 香疤 ，原來 係 個 師姑 。
韋小寶 個 心 歡喜 喇 佢 諗 ：師姑 總係 比 和尚 好 講説話 啲 嘅 。
佢 想 坐翻 起身 ，只 覺得 心口 劇痛 啊 。
因為 先頭 畀 佢 刺咗 一劍 ，雖然 有 寶衣 護身 ，冇 刺傷 皮肉 ，但係 佢 內力 太 強 嘞 ，督到 佢 痛到 死死下 ，佢 哎喲 一 聲 ，又 跌翻 低 。
嗰個 師姑 冷冰冰 噉 話 ：我 以為 少林 神功 有 咩 咁 叻 ，原來 亦 不過 如此 唧 。
韋小寶 話 ： 唉 唔 怕 同師 太講 吖 ， 清涼寺 大雄寶殿 裏 便 嗰 三十六名 少林 僧 啊 ， 有 啲 係 達摩院 首座 ， 有 啲 係 般若 堂 首座 。
哎 ，哎呀 ，個 肚 好好 痛啊 。
少林 派 大名鼎鼎 嘅 十八名 羅漢 都 喺 齊 處 嘞 ， 個個 都 係 少林 派 最 叻 嘅 高手 ， 佢 哋 三十六個 人 打 唔 過你師 太 一個 人 啊 ， 哎呀 ， 哎 。
早知 係 噉樣 ，我 都 唔 入 少林寺 喇 ，哎喲 ，哎呀 ，我 拜 你 師太 為 師 啊 ，噉 就 高 成 百倍 喇 。
白衣尼 露出 一絲 笑容 佢 問 ：你 叫做 咩 名 啊 ？喺 少林寺 學藝 幾 多年 喇 ？
韋小寶 諗 ：佢 行刺 皇上 ，話 要 同 大明 天子 報仇 ，噉 當然 係 反清復明 之 至 啦 。
只 係 唔 知 佢 同 天地會 係 朋友 定 係 敵人 唧 ， 仲 係 暫時 唔 講為 好 喇 。
佢 話 ：我 係 揚州 嘅 孤兒 ，屋企 好 窮 㗎 ，阿爹 係 畀 清兵 殺死 咗 ，自細 畀人 送 咗 入 皇宮 做 小太監 ，叫做 小桂子 ，收尾 。
白衣尼 沉吟 話 ：小太監 小桂子 ？好似 聽過 你 嘅 名 。
清廷 有 個 大奸臣 鰲拜 ，係 畀 一個 小太監 殺死 嘅 ，嗰個 係 邊個 啊 ？
韋小寶 聽見 鰲拜 嘅 名 前面 加 咗 個 大 奸臣 三個 字 ， 連忙 話 ： 係 ， 係 我 殺 㗎 。
白衣尼 將信將疑 ，佢 話 ：真係 你 殺 嘅 ？
嗰個 鰲拜 武功 好 高 ，號稱 滿洲 第一 勇士 ，你 點 殺得到 佢 㗎 ？
韋小寶 慢慢 坐翻 起身 ，講咗 捉鰲拜 嘅 經過 。
話點樣 小皇帝 下令 動手 ，點樣 自己 失驚無神 ，向 鰲拜 刺咗 一刀 ，又 點樣 將 香爐 灰 糝入 佢 雙眼 ，噉 收尾 呢 又 點樣 喺 囚室 裏 便 ，刺 佢 背脊 等等 。
呢件事 呢佢 已經 講過 好多 次 畀 人 聽 㗎喇 ，每 講 多 次 ，油鹽醬醋 呢啲 調味品 呢 就 加 多 一啲 。
白衣尼 靜一靜 噉 聽完 ，歎一口氣 自言自語 噉話 ：
如果 真係 噉樣 ，莊家 嗰啲 寡婦 ，就 真係 要 多謝 你 喇 。
韋小寶 好 歡喜 噉 話 ：你 老人家 係 話 莊家 三 少奶 佢哋 啊 ？
佢 早就 多謝過 我 喇 ，仲 送咗 個 丫鬟 畀 我 添 ，叫做 雙兒 。
哎呀 ，而家 佢 一個人 一定 急到 死死下 喇 。
你 又 點 會 識得 莊家 嘅 人 呢 ？
韋小寶 於是 老老實實 噉 講咗 ，最後 佢 話 ：
你 老人家 如果 唔信 ，可以 叫 雙兒 嚟 問 下 吖 。
你 知道 三少奶 同 雙兒 噉 就係 喇 。
噉 你 點解 又 去 做咗 和尚 呢 ？
韋小寶 諗住 老皇爺 出家 嘅 事 應該 隱瞞 ，就 話 ：
小皇帝 派 我 去 做 佢 替身 ，去 少林寺 出家 ，收尾 又 派 我 去 清涼寺 。
少林派 嘅 武功 啊 ，我 學得 好 少 㗎 咋 。
其實 就算 再 學 幾十年 ，將 咩 韋陀掌 、般若掌 、拈花擒拿手 等等 都 學齊晒 ，喺 你 老人家 面前 ，又 唔係 一啲 用 都 冇 。
白衣尼 突然間 面色 一沉 佢 話 ：
你既然係漢人 ，點解 認賊作父 ，唔要命噉 去保護 皇帝 啊 ？
真係 天生 嘅 奴才 種 ！
韋小寶 個 心 一 寒 ，佢 呢句 説話 實在 唔 容易 回答 。
當時 呢個 白衣尼 行刺 康熙 ，佢 一時 情急 啊 挺身 遮擋 ，佢 完全 冇 想到 要 討好 皇帝 嘅 。
佢 只係 覺得 康熙 ，係 自己 世上 最 親近 嘅 人 ，就 好似 親哥哥 一樣 ，無論 如何 唔能夠 畀 人哋 殺咗 佢 。
白衣尼 冷冰冰 噉 話 ：
清廷 嚟 搶 我哋 大明 天下 ，仲 唔算 係 最壞 嘅 壞人 。
最壞嘅 ，係 嗰啲 為虎作倀 嘅 漢人 ，只求 自己 榮華富貴 ，咩嘢事 都 做得出 。
我 將 你 喺 呢個 山峰 拋落去 ，你嘅 護體 神功 仲 有冇 用 啊 ？
韋小寶 大聲 話 ：當然 係 冇用 啦 。
其實 亦 唔使 將 我 拋落山 喇 ，只要 輕輕 喺 我 頭頂 一掌 ，我 個 頭殼 啊 ，即時 就 碎開 十七八 塊 喇 。
噉 你 討好 嗰個 小皇帝 ，又 想 得到 咩嘢 好處 呢 ？
我 唔係 想 討好 佢 啊 。
小皇帝 係 我 嘅 朋友 ，佢 ，佢 話過 要 永不 加賦 ，愛惜 百姓 。
我哋 江湖 上 嘅 漢子 ，義氣 為重 吖嘛 ，要 愛惜 百姓 吖嘛 。
其實 佢 對 康熙 義氣 呢 ，確實 係 有 嘅 ，至於 愛惜 百姓 啊 噉 ，就 連 發夢 都 冇 想過 嘞 。
目前 性命交關 ，只好 抬出 呢頂 大帽子 嚟 頂 一陣 。
白衣尼 有 啲 遲疑 嘞 ，佢 話 ：佢 話過 要 永不 加賦 、愛惜 百姓 咩 ？
係啊 ，都唔知 講過 幾百次 嘞 。
佢 話 ，當年 佢哋 進關 之後 大殺 百姓 ，係 非常之 唔啱 。
咩 揚州 十日 、 嘉定 三賭 ， 簡直 係 禽獸 畜生 做 嘅 事 ， 佢 心 啊 好 不安 啊 。
所以 ，嗯 ，所以 佢 要 上 五台山 嚟 燒香 拜佛 ，仲 下 旨 免 咗 揚州 、嘉定 三 年 錢糧 添 啊 。
白衣尼 岌一岌 頭 。
韋小寶 又 話 ：鰲拜 呢個 大奸臣 ，害死 咁多 忠良 ，小皇帝 唔准 佢 害 ，佢 偏偏 唔聽 。
噉 小皇帝 嬲 起上嚟 ，就 叫 我 去 殺 佢 。
好師太 ，你 如果 殺咗 小皇帝 ，朝廷 嘅 大事 啊 ，就 要 由 太后 作主 喇 。
呢個 老舉乸 壞 到 不得了 ，佢 一揸咗 權唧 ，又 要 搞 咩 揚州 十日 、嘉定 三 賭 嘞 。
你 要 殺 小皇帝 啊 ，不如 去 殺咗 太后 呢個 老 舉乸 仲好 。
白衣尼 睩咗 佢 一眼 話 ：喺 我 面前 ，唔好 講埋 啲 粗俗 無禮 嘅 説話 。
韋小寶 話 ：係 ，係 ，喺 你 老人家 面前 ，以後 七八十年 ，我 點 都 唔 講 半句 粗俗 嘅 説話 喇 。
白衣尼 擔 高頭 望住 天上 嘅 白雲 唔理佢 ，過咗 一陣 佢 問 ：
太后 有 咩嘢 唔好 啊 ？
韋小寶 諗 ：太后 做 嘅 壞事 同 呢個 師太 冚𠾴唥 冇 𪐀更 嘅 ，要 安啲 罪名 畀 佢 至 得 。
佢 話 ：太后 話 啊 ，而家 係 大清 嘅 天下 ，應該 將 大明 十七八代 皇帝 嘅 墳墓 都 掘開 佢 ，睇下 墳 裏頭 有 咩 嘢 寶貝 。
又話 天下 姓 朱 嘅 漢人 都 唔 要得 嘅 ，應該 家家 滿門 抄斬 ，免致 佢哋 返嚟 搶 大清 嘅 江山 啊 。
白衣 尼 嬲 到極 ， 右手 一掌 拍 喺 石頭 上 便當 堂 石屑 紛飛 ， 佢 大聲 話 ：
呢個 女人 好 惡毒 啊 ！
韋小寶話 ：噉咪就係囉 ，我勸 小皇帝 話 ，呢啲事 啊 千祈千祈 唔做得 㗎 。
哼 ， 你 有 咩 嘢 學問 ， 講 得出 咩 嘢 道理 能夠 勸 得到 小 皇帝 信 你 嘅 説 話 呢 ？
嘿 ，我 個 道理 啊 長咯 ，我話 ，皇上 ，一個人 呢 總係 要 死 嘅 。
陽間 固之然 係 你哋 滿洲人 掌權 啦 ，你 又 知唔知道 陰間 嘅 閻羅王 ，係 漢人 定係 滿人 啊 ？
嗰啲 判官 、小鬼 、牛頭 、馬面 、黑無常 、白無常 ，係 漢人 定係 滿人 啦 ？
佢哋 個個 係 漢人 啊 。
你 喺 陽間 欺壓 漢人 ，就算 你 有 一百歲 命 ，總有 一日 ，你 就 弊弊冇咁弊喇 。
噉 小皇帝 話 ：吖 小桂子 ，好彩 你 提醒 我 唧 。
因此 太后 嗰啲 壞鬼 主意 ，小皇帝 一句 都 唔 聽 ，反而 話 要 頒發 銀兩 ，修理 大明 皇帝 嘅 墳墓 。
從 洪武 爺爺 嘅 墳墓 修 起 ， 一直 修修 修 ， 修 到 崇禎 皇帝 ， 啊 係 喇 ， 仲有 咩 福王 啊 、 魯王 啊 、 唐王 啊 、 桂王 啊 噉 。
我 都 唔 記得 清 咁多 皇帝 喇 。
白衣尼 突然間 眼圈 一紅 ，流起 眼淚 。
過咗 好耐 下 ，佢 用 衫袖 抹乾 啲 淚水 話 ：
如果 真係 噉樣 ，你 不但 無 過 反而 有 極大 嘅 功勞 。
如果 我 ， 如果 我 大明 列 代皇帝 嘅 陵墓 都 畀 呢 個 ， 呢 個 惡 女人 派 人 掘開 咗 。
講到 呢處 聲音 哽噎 ，再 講 唔落去 嘞 ，佢 企 起身 行 上去 一 塊 懸崖 。
韋小寶 大叫 話 ：師太 ，你 千祈 唔好 ，誒誒誒 ，唔好 自殺 啊 ！
講完 走過去 拉住 佢 左手 。
喺 呢一 剎那 之間 ，佢 對 呢個 美貌 尼姑 已經 非常 好感 嘞 ，只 覺得 佢 清麗 高雅 斯文 慈祥 ，平生 所見 女子 之中 ，冇 一個 及得上 佢 嘅 。
一拉之下 ，只係 拉到 一堂 空衫 袖 空 纊纊 。
韋小寶 打個 特嘞 ，而家 先至 知道 佢 冇 咗 左手 。
白衣尼 回頭 話 ：亂講 ，我 點解 要 自殺 啊 ？
韋小寶 話 ：我 見 你 咁 傷心 ，怕 你 一時 想唔開 咋 。
我 如果 自殺 ，你 返到 皇帝 身邊 從此 大富大貴 噉 咪 仲 好 咩 ？
我 做 小太監 係 迫不得已 㗎 咋 ， 清兵 殺 咗 我 阿爹 ， 我點 能夠 認賊 ， 誒 ， 作 嗰 個 爹 唧 ？
你 都 仲 算 有 良心 。
白衣尼 喺 身邊 攞出 十幾 兩 銀 ，遞畀 韋小寶 話 ：
畀 你 做 路費 你 返 去 揚州 鄉下 啦 。
韋小寶 個心 諗 ： 我 打賞 人 哋 唔 係 畀 二百兩 都 有 一百兩 嘅 ， 點會 稀罕 你 啲 啲 咁 多 錢 啦 ？
啊 呢個 師太 心腸 軟 ，我 索性 討下 佢 好 至得 。
佢 唔 接 啲 銀 ，突然間 趴 喺 地下 攬住 佢 隻 腳 ，放聲 大哭 。
嗱 各位 ，欲知 後事 如何 ，且 聽 下回 分解 。
