前文 再續 啊 書 接 上 一回 啊 。
話說 呢一日 ，發現 有 幾千名 喇嘛 包圍住 清涼寺 ，估計 實係 嚟 劫 行癡 嘅 。
韋小寶 同 澄通 和尚 啊 商量 對策 。
韋小寶 諗起 身上 袋住 皇帝 親筆 御札 ，可以 調遣 文武官員 嘅 ，佢 就 話 ：
而家 事情 緊急 ，我哋 少林 和尚 武功 雖然 係 高強 啫 ，但係 寡 不敵 眾 啊 ，三十七 個 和尚 ，點 打得過 佢哋 三千 幾 名 喇嘛 唧 ？
我 睇 啊 ，要 即刻 落 山 去 求救 至 得 。
澄通話 ：只怕 遠水 救唔到 近火 噃 。
噉 我哋 護送 行癡 大師 衝 出去 咯 。
睇嚟 ，只有 呢個 法子 嘞 。
我哋 三十七 名 少林 和尚 ，再加埋 師叔 嘅 書童 ，要 抵擋 三千 幾 名 喇嘛 ，噉 就 點 都 唔 得 嘅 。
但 要 喺 啲 空隙 裏 便 衝 出去 ，噉 都 唔係 好 難 㗎啫 。
就至怕 行癡 大師 同 佢 師父 玉林 大師 唔肯 呢 ，佢哋 話 ，生死 都 一樣 喎 ，逃唔逃走 亦 冇 咩 嘢 分別 ，唉 。
噉就 需要 請 師叔 勸 一勸 佢哋 喇 。
勸服 行癡 大師 仲有 法子 ，要 勸 嗰個 玉林 老和尚 啊 ，老子 真係 服輸 喇 ，呢啲 叫 老鼠 拉 龜 冇 埞埋 手 。
韋小寶 向 下 便 望 下 ，只見 一 群 群 喇嘛 分散 坐晒 喺 處 ，似乎 係 雜亂無章 ，之 又 分布 均勻 。
上山 落山 嘅 通道 ，更加 係 人數 眾多 。
佢 諗住 天色 一黑 ，呢 三千 喇嘛 一擁而上 ，清涼寺 啲 和尚 唯有 大叫 我佛 慈悲 嘞 。
佢 諗 ：老子 做 乜鬼嘢 和尚 呢 ？如果 做咗 喇嘛 ，嘿 而家 幾咁 得意洋洋 啊 ，一啲 都 唔使 擔心 。
平時 食肉 、 嫖老舉 ， 我 都 仲未 計添 啊 。
一想到 嫖老舉 ，腦海中 靈機一閃 ，已經 有咗 計嘞 。
佢 不動聲色 噉 話 ：我 返去 禪房 瞓 鬼佢 一覺 先 。
澄通 愕然 嘞 ，眼光光 望住 佢 。
韋小寶 唔理 佢 嘞 ，噔噔聲 落咗 個 山 ，返去 清涼寺 行 入 自己 嘅 禪房 。
過咗冇幾耐 ，澄心 、澄觀 、澄光 、澄通 ，一齊 嚟 求見 。
韋小寶 請 四個人 入 房 ，眼見 各人 都有 啲 驚噉 ，佢 伸 個 懶腰 打 個 喊路 ，懶洋洋噉 問 ：
哎 啊 ， 各位 有 咩 嘢 事 啊 ？
澄心話 ：山下 好多 喇嘛 聚集 喺 處 ，顯然 會 不利於 本寺 嘅 。
方丈師叔 有 咩 應付 嘅 方法 呢 ？
韋小寶 話 ：我 啊 想咗 好耐 喇 ，都 想唔出 咩 辦法 ，噉 只好 瞓覺 啦 。
大家 在 劫難逃 ，只要 逆來順受 ，刀 來 頸 受 。
人 哋 一刀斬 過 嚟 ， 用條 頸 去 頂 佢 一頂 ， 噉 睇 下 嗰 把 刀 利 唔 利 ， 斬 唔 斬 得 入 去 啦 。
澄心 佢哋 三個人 知道 佢 係 隨口亂咁噏 嘅 ，澄觀 就 信以為真 噃 ，佢 話 ：
嗰班 喇嘛 嗰啲 刀 啊 ，睇起嚟 十分 鋒利 ，我哋 條 頸 係 頂唔住 㗎 。
師叔 ，出家人 與世無爭 ，逆來順受 係 唔錯 嘅 ，但係 刀 來 頸 受 ，未免 過分啲 咯 。
當年 達摩祖師 亦 冇 教 人 淨係 捱 刀 唔 反抗 㗎 ，否則 ，大家 而家 唔 使 學 武 都 得 啦 。
韋小寶 岌頭 話 ：照 澄觀 師侄 嘅 意見 ，刀 嚟 頸 受 係 唔得 嘞 。
澄觀 話 ： 唔 得 咯 ， 吖 但 係 拳 嚟 胸受 ， 腳 嚟 腹受 都 仲 可以 嘅 。
因為 佢 內功 深湛 啊 ，對方 向 佢 拳 打 腳 踢 ，亦 可以 不加 抵擋 ，只 需要 運起 內功 ，就 可以 將 人哋 嘅 拳腳 反彈 出去 㗎 嘞 。
韋小寶話 ：嗰啲 喇嘛 都 帶咗 戒刀 禪杖 嚟 ，唔知 有 咩 法子 ，能夠 開導 佢哋 唔用 兵器 呢 ？
澄觀話 ：嗰啲 喇嘛 都 怕 係 不可理喻 嘅 ，要 佢哋 放下 屠刀 ，嗯 ，似乎 非 一朝一夕 之 功 嘞 。
韋小寶 話 ：噉就 難喇 ，唔知 四位 師侄 有 咩 妙計 呢 ？
澄心話 ：而家 只有 大家 保住 玉林 、行癡 同行 癲 三位 ，搵 機會 衝出去 啦 。
佢哋 志在 劫行 癡 大師 啫 ，寺 裏 便 其餘 嘅 僧侶 唔 會 武功 ，呢啲 喇嘛 亦 唔 會 殺害 佢哋 嘅 。
韋小寶 話 ：好 ，我哋 去 同 嗰 三位 老和尚 講 下 。
於是就 帶埋 四個 和尚 ，去到 後山 間 小廟 嘞噃 。
小沙彌 通報 入去 ，玉林 佢哋 聽見 話 住持 嚟到 唄 ，就 出門 迎接 啦 。
一見 ，玉林 、行癡 、行癲 都 大為 錯愕 。
三個人 只係 聽講 新住持 晦明禪師 ，係 少林寺 晦聰 方丈 嘅 師弟 ，係 一位 年紀 好 輕 嘅 高僧 ，估唔到 竟然 係 佢 。
玉林 同行 癡 當堂 就 明白 嘞 ，呢啲 係 皇帝 嘅 安排 ，用意 係 保護 父親 。
佛家 規矩 好 嚴 嘅 ，噉 住持 係 一 廟 之 主 ，玉林 三 個 人 行禮 參見 。
韋小寶 啊 恭謹 還禮 ，一齊 行 入去 禪房 。
玉林 請 佢 喺 中間 嘅 蒲團 坐落 ，其餘 啲 人 呢 ，就 喺 兩邊 企 。
韋小寶 個 心 好 得意 啊 ：老子 喺 中間 坐 ，老皇爺 企 喺 旁邊 侍候 ，就算 係 小皇帝 都 冇 咁 威風 啊 。
佢 強忍 笑容 話 ：玉林 大師 、行癡 大師 兩位 請坐 啦 。
玉林 同行 癡 就 坐低 嘞 。
玉林話 ：方丈 大師 住持 清涼 ，小僧 等 未曾 去 參謁 ，有勞 方丈 大駕 親臨 ，十分 不安 啊 。
韋小寶話 ：好話喇 ，小衲 知道 三位 唔鐘意 旁人 打擾 ，所以 一直 冇嚟 睇 你哋 。
如果 唔係 今日 發生咗 一件 大事 呢 ，小衲 仲 係 唔會 嚟 嘅 。
佢 時常 聽 老和尚 自己 謙稱 係 老衲 ，噉 佢 諗 自己 年紀 細 啊 ，就 自稱 小衲 嘞 。
班 和尚 聽 佢 異想天開 ， 生 安白造 一個 稱呼 出 嚟 ， 不覺 暗暗 偷笑 啊 。
玉林 呢 只係 話 係 啊噉 ，不過 呢 ，冇 問 佢 咩嘢 大事 。
韋小寶 話 ：澄光 師侄 ，唔該 你 同 三位 講下 啦 。
澄光 恭恭敬敬噉 應咗 ，就 將 清涼寺 周圍 有 幾千個 喇嘛 ，重重 圍困 嘅 情形 講咗 嘞 。
玉林 眯埋 眼 諗咗 一陣 ，擘開 眼 話 ：
請問 方丈 大師 點樣 應付 呢 ？
韋小寶話 ：呢啲 喇嘛 喺 本寺 周圍 坐 嘅 又 有 企 嘅 又 有 ，只係 觀賞 風景 啫 冇 咩 其他 意思 嘅 。
呢度 風景 清雅 ，噉 佢哋 嚟 遊山玩水 都 好 平常 啫 。
行癲 忍唔住 話 ：
如果 係 觀賞 風景 ，唔會 將 本寺 沊沊𡃈噉 圍到 實嘅 ，好幾個 時辰 都 唔 走 。
嗯 佢哋 實係 想 嚟 捉 行癡 師兄 去 就 真 。
韋小寶 話 ：小衲 以為 天下 青廟 黃廟 ，都 係 我 座 佛 下 嘅 釋氏 弟子 。
佢哋 如果 要 請 行癡 大師 去 ，亦 必定 係 仰慕 三位 大師 佛法 深湛 ，請 你哋 去 喇嘛廟 講經 説法 啫 。
講唔定 ，啲 喇嘛 仰慕 我哋 中土 佛法 ，大家 唔做 喇嘛 改做 和尚 ，誒噉 亦係 極好 嘅 機緣 喇 。
行癲猛咁擰頭 不以為然 佢 話 ：未必 ，未必 。
澄觀話 ：方丈師叔 ，噉 佢哋 點解 都 帶咗 兵器 嚟 嘅 呢 ？
韋小寶 合十 話 ：佢哋 帶埋 禪杖 戒刀 嚟 聲勢洶洶 ，或者 真係 想 嚟 殺 本寺 僧侶 嘅 頭 啊 。
佛 曰 ：我 不 入 地獄 ，誰 入 地獄 呢 ？
我哋 應當 刀 來 頸 受 ，噉 就 叫做 我 唔 畀 人 殺頭 ，誰 畀 人 殺頭 喇 。
不生不滅 ，不垢不淨 。
有生 故 有滅 ，有頭 故 有殺 。
佛 有 三德 ：大定 、大智 、大悲 。
嗰班 喇嘛 帶住 刀 嚟 ，我哋 不 聞 不 見 ，不 觀 不 識 啊 是為 大定 ；
佢哋 舉 刀 要 斬 ，我哋 當 佢 刀 即是 空 ，空 即是 刀 ，是為 大智 嘞 ；
一刀刀 將 我哋 嘅 光頭 都 斬晒 落嚟 ，大家 嗚呼哀哉 是 為 大悲 。
佢 喺 寺 裏 便 聽咗 唔少 佛經 裏 便 嘅 説話 ，就 信口 亂咁 噏 。
澄觀話 ：方丈師叔 ，呢個 大悲 嘅 悲字 ，恐怕 係 慈悲 嘅 悲 ，唔係 悲哀 之 悲噃 。
韋小寶 微微 笑話 ：師侄 亦 講得 啱 ，想 我 佛 割肉 餵 鷹 ，捨身 飼 虎 ，真係 大慈大悲 之至 咯 。
嗰啲 喇嘛 雖然 係 兇頑 ，比起 惡 鷹 猛虎 ，到底 都會 好啲 嘅 。
噉 我哋 捨身 使到 惡喇嘛 得償所願 ，亦係 大慈大悲 之心 嗎 。
澄觀合十話 ：師叔 妙慧 ，令人 敬服 啊 。
韋小寶 話 ：往日 玉林 大師 曾經 講過 ，出家人 與 世 無爭 ，逆來順受 。
清涼寺 如果 真係 有 禍殃 咯 ，噉 亦係 在劫難逃 噉 。
我哋 一齊 喺 惡喇嘛 刀下 圓寂 ，一齊 去 西方 極樂世界 ，一路 咁 熱鬧 ，哈 真係 有趣 啊 。
大家 互相 你 望 我 我 望 你 ， 都 諗 韋小寶 個 説 話 ， 雖然 亦 言之成理 ， 到底 太過 迂腐 吖 ， 恐怕 係 錯解 咗 佛法 咯 。
澄心 、 澄通 就 覺得 呢 啲 説 話 ， 同 佢 平常 嘅 為 人 完全 唔 啱 嘅 ， 估計 佢 講 嘅 係 反話 ， 多數 係 要 激得 玉林 同行 癡 自己 開聲 求救 個 啫 。
只有 澄觀 一個人 ，信到 佢 十足十 。
嗰班 和尚 沉默咗 好 耐 ，行癲 突然間 大聲 話 ：
師父 曾經 講過 ，西藏 喇嘛 要 捉咗 師兄 去 ，乃係 想 殘害 萬民 ，要 佔 我哋 嘅 呢個 花花世界 。
我哋 自己 嘅 生死 唔緊要 啊 ，千千萬萬 百姓 ，都 受 佢哋 欺負 壓迫 ，呢個 罪業 就 太 大 喇 。
師父 講過 ，我哋 決唔能夠 任由 佢哋 胡作非為 嘅 。
韋小寶 岌頭 話 ：師兄 呢番 説話 極之 有道理 ，比起 小衲 嘅 見解 又 高咗 一層 喇 。
不過 目前 喇嘛 咁 多人 ，我哋 只怕 寡 不敵 眾 噃 。
行癲話 ：我哋 保護住 師父 、師兄 衝出去 ，估計 班 惡喇嘛 亦 擋唔住 嘅 。
韋小寶 話 ：就怕 爭鬥 一起 ，不免 要 殺傷 班 喇嘛 。
阿彌陀佛 ，我 佛 有 好生之德 ，救人 一命 ，勝 造 七級 浮屠 ，殺人 一命 ，如 拆 八級 寶塔 。
佛家 各戒 ， 第一 戒 就 係 戒 殺生 。
噉點算好呢 ？
行癲話 ：係佢哋要嚟殺人之嘛 ，我哋 迫不得已 ，但求 保護 自己 。
能夠 唔 殺人 ， 當然 最好 啦 ， 不過 亦 唔 能夠 眼 白白 噉 束手待斃 啊 。
忽然間 ，少林僧 澄覺 急急 腳行 入嚟 話 ：
啟稟 方丈 師叔 ，山下 班 喇嘛 先頭 一齊 上山 ，又 逼近 咗 約莫 一百 丈 就 停低 嘞 。
韋小寶 話 ：為咩事 上咗 一闕 路 就 停低 呢 ？
啊 ，恐怕 係 忽然 受到 我佛 感化 ，生咗 悔悟 之心 ，明白咗 回頭 是 岸 嘅 道理 啊 。
行癲大聲話 ：唔係嘅唔係嘅 ，佢哋 等到 個天 一黑 ，就 一鼓作氣 衝入嚟 㗎喇 。
佢 往年 係 正黃旗 大將 ，進關 嘅 時候 ，身經百戰 ，熟悉 行軍 打仗 嘅 方法 ，噉 收尾 先至 做咗 順治 嘅 御前 侍衞 總管 。
韋小寶話 ：等佢哋 一入 本寺 大雄寶殿 ，見到 我佛如來 嘅 莊嚴 寶相 ，忽然間 懸 ，誒 懸咩 勒馬 ，噉係 有 嘅 。
行癲嬲嘞 ：你 呢位 小方丈 吖 ，實在 係 胡 ，哎 唔會嘅 。
佢 本來 想 話 實在 糊塗 嘅 ，不過 諗住 唔 可以 對方 丈 無禮 吖 ，話 到 口唇 邊 ，佢 就 懸崖勒馬 嘞 。
玉林 一直 唔 出聲 ，只係 聽住 大家 辯論 。
眼見 行癲 額頭 爆起 青筋 ，講説話 越嚟越 大聲 就 微微 一笑 話 ：
行癲 ，你 自己 先至 係 實在 糊塗 啊 。
方丈大師 早就 智珠在握 ，成竹在胸 咯 ，你 又 何必 咁多 顧慮 吖 ？
行癲 打個 特話 ：哦 ，原來 方丈 大師 早就 有 妙計 啊 。
韋小寶 愁眉苦面 噉 話 ：我 妙計 就 冇 ，三十六計 走 為 上計 。
大家 既然 都 話 衝出去 好咯 ，噉 我哋 就 衝出去 啦 。
不過 如果 唔係 迫不得已 ，千祈 唔好 殺人 啊 。
行癲 同 澄心 等 啊 一齊 話 係 啊噉 。
韋小寶話 ：噉 大家 執拾 下 先 啦 ，一等 天黑 ，佢哋 仲未曾 逳手 我哋 就 先 衝落去 。
向住 東便 衝到 阜平縣 縣城 ，呢啲 喇嘛 更 惡 啫 ，點 都 唔 敢 公然 嚟 攻打 縣城 嘅 。
行癲佢哋又話係啊係啊噉 。
行癡 忽然間 話 ：我 係 個 不祥之身 ，上次 已經 為 我 殺傷 咗 唔少 人 嘞 。
就算 呢次 能夠 走得甩 ，佢哋 仍然 死心不息 嘅 。
多做殺業 ，始終 冇了期 嘅 。
行癲話 ：師兄 ，呢啲 惡喇嘛 ，係 想 將 你 綁架 去 ，殘害 天下 百姓 啊 。
唉 ，我 係 世間 禍胎 ，等到 佢哋 嚟 喇 ，我 當眾 自焚 ，等 佢哋 從此 死咗 呢條心 就係 喇 。
皇皇 ，哎哎唔係 ，師兄 ，你 千祈 唔好 噉 啊 ，我 代 你 自焚 啦 。
你 代 我 自焚 又 有 咩嘢 用處 吖 ？
佢哋 只係 要 捉 我 去 ，有所 挾制 而已 啫 。
班 和尚 又 唔 出聲 嘞 。
玉林話 ：善哉善哉 ，行癡 已經 覺悟 大道 喇 ，呢啲 先至 係 佛説 ，我 不入 地獄 ，誰 入 地獄 嘅 真義 啊 。
韋小寶 喺 個 心處 鬧鬼 佢 嘞 ：臭和尚 ，佢 講 嘅 係 真義 ，我 講 嘅 就 假義 嘞 噃 ？
玉林 又 話 ：等陣 班 喇嘛 嚟到 ，老衲 同行 癡 一齊 自焚 ，方丈 大師 同 眾位 師兄 ，唔好 攔阻 。
韋小寶 同埋 班 和尚 大家 你 望 我 我 望 你 ， 都 驚 晒 啊 。
行癡話 ：往日 攻城掠地 ，生靈塗炭 ，小僧 真係 百死莫贖 。
今日 能夠 為 黎民 捨身 ，亦 不過 係 補償 當年 罪業 之 萬一 唧 。
如果 又 因為 小僧 而 爭鬥 不息 ， 殺傷 咁 多 人 ， 噉 就 仲 增加 我 嘅 罪業 咯 。
我 已經 決意 噉 做 ，請 各位 護持 ，促成 呢件 因緣 。
如果 能夠 因此 而 感化 各位 喇嘛 ，去惡 向善 ，更加 係 一件 好事 。
講完 ，企起身 向 韋小寶 同 少林 五僧 合十 躬身 。
澄心 佢哋 見 佢 嘅 神情 ，顯然 係 落咗 決心 ，好 難 勸 佢 㗎 嘞 ，只有 辭別 出嚟 ，返到去 文殊殿 裏 便 。
韋小寶 召集 三十六 名 少林 僧 ，將 件事 講 畀 大家 知 。
班 和尚 都 話 ：兩位 大師 要 自焚 嚟 消除 業障 ，點 都 唔 做得 㗎 ，事 到 臨頭 ，只有 用 武力 阻止 佢哋 啦 噉 。
韋小寶 話 ：大家 係唔係 都 要 保護 三位 大師 嘅 安全 啊 ？
班和尚 一齊 話 ：係 。
韋小寶 話 ：好 ，嗱 大家 聽 我 講 。
你哋 三十六 位 ，而家 就 衝出去 ，一齊 攻打 東路 ，裝作 向 山下 突圍 。
但係呢 就 難以 成功 ，所以 又 要 退翻返嚟 ，不過 要 順手牽羊 ，捉佢 四五十 名 喇嘛 上嚟 。
澄心話 ：方丈 嘅 意思 ，係 唔係 將 呢啲 喇嘛 當 做人質 ，使得 佢哋 唔敢 輕舉妄動 啊 ？
如果 係 噉樣 ，噉 捉 嗰啲 喇嘛 嘅 地位 越 高 就 越 好 嘞 。
韋小寶話 ：要 捉 大喇嘛 怕 唔 容易 ，難免 要 殺傷 好多人 嘅 ，我哋 只要 捉 幾十個 小喇嘛 都 夠 嘞 。
班 和尚 唔 明白 佢 嘅 用意 噃 ，但係 方丈 有 命令 ，就 奉令 出寺 照做 嘞 。
過咗 冇 幾耐 ，只 聽見 山腰 嗰度 吶喊 連天 。
韋小寶 企 喺 鼓樓 上面 睇 ，見到 三十六 名 少林 和尚 衝 入 喇嘛 群 裏 便 ，刀光 閃閃 啊 打起嚟 喇 。
呢 三十六 名 和尚 啊 都 係 少林寺 高手 ，平常 喇嘛 當然 唔 係 敵手 啦 ，衝 出去 幾十 丈 之後 ，擋路 嘅 喇嘛 越嚟越 多 。
澄心 佢哋 拳打 腳踢 ，掌劈 指督 ，一陣間 就 打低 咗 幾十 人 。
澄心 高聲 大叫 ：敵人 太多 ，衝唔出去 啊 ，返去 寺 先 啦 。
佢 內力 深厚 ，呢 幾句 説話 遠遠 噉 傳 出去 ，山 鳴 谷 應 啊 。
澄通 亦 高聲 大叫 ：衝唔出去 點算 啊 ？
澄心話 ：大家 捉 啲 喇嘛 返去 ，等 佢哋 有所顧忌 ，唔敢 亂咁 害人 。
於是 班 和尚 嘶哩沙喇 紛紛 噉 捉 啲 喇嘛 ，返轉頭 入 寺 。
澄心 同 澄光 斷 後 ，又 點 倒 咗 幾個 人 。
呢個 時候 聽見 喇嘛 陣 後 有人 用 藏語 傳令 ，班 喇嘛 吶喊 叫罵 不過 就 唔 追過嚟 嘞 。
韋小寶 笑 騎騎噉 喺 門口 迎接 佢哋 ，一點 人數 ，捉咗 四十七 名 喇嘛 。
返到 文殊殿 ，韋小寶 話 ：將 呢啲 傢伙 全身 衣服 剝光 佢 ，每人 點 佢 十八處 穴道 ，然後 呢 ，將 佢哋 喺 後院 柴房 鎖起嚟 啦 。
班 和尚 都 覺得 方丈 真係 高深莫測 。
於是就 將 四十七名 喇嘛 都 剝晒光 豬 ，又 點咗 佢哋 嘅 穴道 ，鎖入 柴房 。
韋小寶 合十 話 ：世間 諸 色相 ，皆 空 皆無 。
無我無人 ，無和尚 無喇嘛 。
空即是色 ，色即是空 。
和尚 即 喇嘛 ，喇嘛 即 和尚 。
各位 師侄 ，大家 除咗 袈裟 ，着 上 喇嘛 件 袍 啦 。
班和尚 都 愕然 喇 ，大家 你 望 我 我 望 你 。
韋小寶 大聲噉叫 ：雙兒 過嚟 ，幫 我 扮 小喇嘛 啦 。
雙兒 一直 喺 殿 外 便 等候 ，聽 佢 一 叫 就 入嚟 嘞 ，揀咗 一件 最 細 嘅 喇嘛袍 ，幫 佢 換好 。
韋小寶 身材 矮細 ，着起嚟 仍然 係 太過 大 嘞 。
就 拔出 匕首 ，將 件 袍 腳 同 衫 袖 都 割咗 一 闕 ，條 腰 呢 ，又 扎 翻 條 腰帶 ，噉 戴 上 喇嘛 帽 ，哈哈 ，十足 一個 小 喇嘛 。
佢 同 雙兒 話 ：你 都 扮 個 小喇嘛 。
澄光 問 佢 話 ：師叔 改着 喇嘛 服裝 ，唔知 係 咩嘢 用意 呢 ？
澄觀話 ：唔通 我哋 向 喇嘛 投降 ，改歸 黃教 係嘛 ？
韋小寶 話 ：非也 ，大家 扮做 喇嘛 ，湧到 後 便 間 小廟 ，將 玉林 、行癡 、行癲 三個 和尚 捉住 ，點咗 佢哋 穴道 ，再 同 佢 換埋 喇嘛 服裝 。
澄通 聽到 呢處 ，拍住 手掌 噉 笑住 話 ：妙計 ，妙計啊 ！
我哋 幾十個 假喇嘛 黑麻麻 ，衝落山 ，嗰啲 喇嘛 就 好 難 分 邊啲 係 真 邊啲 係 假 㗎 啦 嘛 ，噉 佢哋 就 好 難 擋住 我哋 喇 。
嗰班 和尚 一齊 讚 話 好嘢 ，當堂 笑逐顏開 。
嗱 各位 ，欲知 後事 如何 ，且 聽 下回 分解 。
