前 文 再續 啊 書 接上 一回 啊 。
話說 韋小寶 話 嗰 兩個 女郎 根本 就 唔識 內功 嘅 ，自己 呢 ，就 唔使 練 內功 喇 ，淨係 學 嗰啲 破 佢哋 功夫 嘅 招式 就 得 喇 噉 。
真係 一言 驚醒 夢中人 啊 。
澄觀 唞 咗 個 大氣 話 ： 啊 原來如此 原來如此 ， 師侄 一直 想 唔 到 呢 一層 啊 。
誒 ，誒不過噉噃 ，另外 有 一樣 難處 。
本派 入門 拳法 係 十八路 ，內外 器械 三十六門 ，絕技 七十二 項 。
每 一門 功夫 變化 少 嘅 有 幾十種 ， 多 嘅 呢 有 一千 以上 嘅 。
噉 要 將 呢啲 招式 冚𠾴 唥 學齊 佢 ，都 唔係 咁 容易 㗎 。
就算 唔學 內功 啊 ，淨係 學 招式 ，都 要 幾十年 功夫 至 得 。
韋小寶 諗 ：呢個 老和尚 真係 笨 到死 啊 。
就 笑住 話 ：噉 又 何必 都 學晒 唧 ？只要 知道 姑娘仔 會 咩 招式 就 得 啦 嘛 。
開講有話 ：兵 來 將 擋 ，水 來 土 掩 。
姑娘 仔 呢 一招 打過 嚟 ， 老和尚 呢 一招 破 咗 佢 ， 擔保 殺 到 佢 哋 落荒而逃 ， 片甲不回 啊 。
澄觀 猛咁 岌頭 ，個樣 歡喜 喇 ，大有 茅塞頓開 之 感啊 。
韋小寶 話 ：
嗰個 着 藍衫 嘅 姑娘 用 一招 咩 勞山派 嘅 江河日下 ，你 話 有 六種 避法 ，又 有 七種 反擊 嘅 法子 吖 ，其實 又 何必 咁 啰嗦 唧 ？
只要 有 一種 法子 反擊 ，能夠 將 佢 打敗 ，噉 其餘 嗰 十二 種 就 唔 使 學 啦 嘛 ，噉咪 慳 功夫 得多 囉 。
澄觀 好 歡喜 噉 話 ：係啊 ，冇錯 冇錯 。
嗰 兩位 女 施主 拗斷 師叔 隻 手 ， 打傷 淨濟 師侄 佢 哋 四個 人 ， 所用 嘅 分 筋 錯 骨 手 ， 包含 咗 四派 手法 ， 噉 用 我 哋 少林 派 嘅 武功 係 化解 得 了 嘅 。
於是 先將 兩個 女仔 所用 嘅 手法 逐樣 施演 ， 跟 住 又講 咗 每 一招 一種 破法 ， 就 同 韋小寶 試演 嘞 。
澄觀 嘅 破解 方法 有時 太過 繁複 難學 ， 有時 又 不知不覺 噉 用 咗 內功 ， 噉 韋小寶 呢 就要 佢 另外 想個 簡明 嘅 法子 。
總之 呢 只要 韋小寶 覺得 難學 擰擰頭 唧 ，佢 又 另外 再 想過 一招 。
如果 唔得 ，又再 換過 一招 ，直到 韋小寶 能夠 毫不費力 噉 學會 為止 。
澄觀 見到 小師叔 唔到 半個 時辰 ，就 將 呢啲 招式 學會 晒 ，苦思 多日 嘅 難題 一旦 豁然 解開 ，歡喜 到 佢 啊 抓耳撓腮 。
突然間 ，佢 又 諗起 一件事 佢 話 ：哎呀 ，可惜啊 可惜啊 ，哎呀 危險啊 ，危險啊 。
韋小寶 連忙 問佢 ：咩 可惜 啊 ？咩 危險 啊 ？
嗱 ，師叔 你 老人家 同 淨濟 佢哋 四個人 出去 ，同 兩位 女施主 打過 ，等 佢哋 拗斷 你 手腳 。
如果 斷得 厲害 ，好 難 醫翻好 ，從此 就 殘廢 咗 噉 豈唔係 好 可惜 咩 ？
噉又如果 兩個 女施主 落手 狠辣 ，將 你哋 五位 殺咗 ，噉咪 好 危險 ？
點解 又 要 我哋 五個人 去 打過唧 ？
噉 兩位 女施主 所學 嘅 招數 ，一定 唔止 呢啲 嘅 。
師侄 既然 唔 知道 佢哋 另外 有 咩 嘢 招數 ，就 當然 唔 知道 拆解 嘅 方法 嘞 。
五位 如果 唔係 送埋 去 捱打 試招 ，又 點 能夠 查明 啊 ？
韋小寶 哈哈大笑話 ：哈哈哈哈哈哈 ，哎 ，哎呀 ，原來 噉 係嘛 ？
有法子嘅 ，只要 你 去 同佢哋 打過 ，噉 就 唔會 可惜 唔會 危險 喇 。
哎呀 ，出家人 不生嗔怒 ，無𪐀𪐀去 同人哋 打交 ，好唔妥㗎噃 。
有喇 ，我哋 兩個 出寺 去 行下 ，噉 如果 兩位 女施主 已經 去咗 咯 ，噉 就 乜嘢 都 冇 咁 好 啦 。
呢啲 叫做 人 不犯 我 就 我 不犯 人 吖 嘛 。
噉佢哋就算有另外咩招數 ，我哋亦唔使理佢哋喇 。
冇錯冇錯 ！
誒不過 師侄 從來 唔 出 寺門 嘅 ，一 出去 就 存心 惹事 ，立意 似乎 不善 噃 。
我佛 當年 喺 鹿野苑 初 轉 法輪 ，傳 嘅 係 四聖諦 、八正道 ，呢啲 正意 呢 係 八正道 之一道 ，噉 。
韋小寶 打斷 佢 説話 ：我哋 唔使 去 好遠 喇 ，就 喺 寺 嘅 附近 隨意 走下 ，噉 最好 係 撞唔到 佢哋 啦 。
冇 錯 冇 錯 ， 哈哈哈哈 ， 師叔立 心仁善 ， 與人無爭 無 競 ， 呢 個 就 係 正意 喇 ， 師侄 應當 引為 模楷 啊 。
韋小寶 個 心 偷笑 嘞 ，就 拖住 佢 由 側門 行出 少林寺 。
澄觀 連寺 旁邊 嘅 樹林 亦都 未見過 嘅 ，睇見 一大片 青松 覺得 好好睇 ，佢 話 ：
啊 咁多 松樹 生埋 喺 一齊 真係 奇觀 嘞 。
我哋 般若堂 嘅 院子 裏 便 ，只有 兩 樖 。
説話 未完 ，忽然間 聽見 身後 一聲 呼喝 ：小賊 禿 喺 呢度 ！
白光 閃動 一把 鋼刀 向 韋小寶 斬過嚟 。
澄觀 話 ： 呢 招 係 五虎 斷門 刀 裏頭 嘅 猛虎下山 啊 。
伸手 去 捉 使刀人 嘅 手腕 。
忽然間諗起 ，呢一招 係 拈花擒拿手裏便 嘅 手法 ，太過 難學 嘞 就 話 ：哎呀 唔得 ！連忙 縮手 。
嗰個 使刀人 係 藍衫 女郎 ，佢 見 澄觀 縮手 ，柳葉刀 啊 即時 一翻 ，打橫 掃 佢 條 腰 。
就喺呢個時候 ，綠衫女郎 喺 叢林 裏 便 衝出嚟 ，揮刀 向 韋小寶 斬過去 。
韋小寶 急急 匿埋 喺 澄觀 後便 ，噉 綠衫 女郎 呢 一刀 呢 ，就 斬 澄觀 嘅 左膊 。
澄觀話 ：呢招 係 太極刀 嘅 招數 ，唔 容易 用 簡單 嘅 法子 嚟 化解 㗎 。
一句 説話 未 講完 ，兩個 女仔 雙刀 揮舞 ，越 斬 越 快 。
澄觀話 ：師叔 ，唔得啊唔得啊 。
兩位 女施主 出招 太 快 ，我 ，我嚟唔切 想啊 。
你 ，誒 你快啲 請 兩位 唔好 唔心急 ，慢慢噉 斬 啦 。
藍衫 女郎 連 氣 使咗 幾招 狠招 ，始終 斬唔到 老和尚 ，有 幾次 仲 爭啲 畀佢 將 把刀 搶咗去 添 。
聽佢 大呼小叫 ，以為 佢 有意 諷刺 自己 ，嬲起 上嚟 斬得 更加 快 喇 。
韋小寶 笑住 話 ：喂 兩位 姑娘 啊 ，我 師侄 請 你哋 唔好 咁 心急 ，慢慢 噉 發招 喎 。
澄觀話 ：係咯 ，我 頭腦 唔夠 靈活 ，一時半時 我 想唔出 咁多種 破法 㗎 。
綠衫 女郎 嬲 到 韋小寶 死死下 ，幾刀 斬唔中 澄觀 ，又 揮刀 向 韋小寶 斬過去 。
噉澄觀 用 手 擋住 佢 話 ：
呢位 女施主 ，我 師叔 冇 學過 你 呢路 刀 嘅 破法 ，而家 你 不必 斬佢 ，等 佢 學會咗 之後 ，識得 抵擋 個 方法 喇 嗰陣時 再 斬佢 都 唔遲 吖 。
唉 ，我 呢啲 法子 ，真係 唔得 㗎 呢 。
師叔 ，呢 你 而家 唔使 記住 啊 ，我 呢啲 法子 啊 都係 唔 頂用 嘅 ，等陣 ，我哋 再 慢慢 研究 啦 。
佢 一味 噉 講 ，但係 又 唔 停手 噃 ，將 兩個 女仔 纏到 緊緊 ，綠衫 女郎 要 去 殺 韋小寶 邊度 殺得到 呢 ？
韋小寶 見到 冇 危險 嘞 ，就 笑嘻嘻 噉 挨住 樖樹 睇 佢哋 打 。
一雙眼 猛 咁 睇 住 個 綠衫 女郎 ， 所謂 飽餐秀色 啊 樂 也 無窮 啊 。
綠衫女郎 唔見咗 韋小寶 ，以為 佢 已經 逃走咗 嘞 就 擰轉頭 去 搵 佢 。
見佢 一雙眼 正 盯住 自己 ，塊面 一紅 ，唔理 澄觀 喇 ，轉身 舉刀 衝過 佢 嗰處 。
誰知 澄觀 正 用 手 點 佢 小掩 ，呢一 指 呢 故意 點得 好 慢 ，佢 本來 可以 避開 嘅 ；
但係 佢 急住 要 去 殺人 喇 ，小掩 即刻 中指 ，一聲 呻吟 就 𢴈咗 喺 地 。
澄觀 連忙 話 ：哎呀 對唔住 啊 。
老僧 呢一招 笑 指天南 ，指力 使得 並唔 厲害 嘅 ，女施主 只要 用 五虎斷門刀 其中 嗰招 惡虎攔路 ，斜刀 一封 就 可以 擋開 嘞 。
呢一招 女施主 雖然 未使過 啊 ，但係 嗰位 着 藍衫 嘅 女施主 係 使過 嘅 ，噉 老僧 諗住 女施主 一定 亦 會 使 啦 ，啊 誰知 ，誒 哎呀 得罪 晒 ，得罪晒 嘞 。
藍衫 女郎 嬲 到極 ， 鋼刀 橫斬直 削勢 道 凌厲 啊 ， 不過 佢 武功 同 澄觀 啊 相差 實在太 遠 ， 連 佢 僧袍 衫 角 亦 碰 唔 到 。
澄觀 個 嘴 呢 一味 咁 講 ，個 心 呢 一味 記住 佢 嘅 招數 ，噉 佢 當場 想唔出 簡易 嘅 破法 ，就 只有 記明咗 刀法 招數 ，以後 再嚟 一招一招 噉 仔細 參詳 。
韋小寶 行到 綠衫 女郎 面前 ，讚佢 話 ：
好似 你 咁 美貌 嘅 小美人 ，普天下 都 只有 你 一個 唧 ，嘖嘖嘖嘖 ，真係 睇到 我 魂 飛 天外 啊 。
講完 ，喺 佢 塊面 處 輕輕噉 摸咗 一下 。
嗰個 女郎 又 驚 又 嬲 ，條氣 一 頂 ，當堂 暈咗 。
韋小寶 嚇咗 一驚 ，唔敢 輕薄 喇 ，佢 企起身 佢話 ：
澄觀師侄 ，你 將 呢一位 女施主 都 點 倒埋 ，請 佢 將 各種 招數 慢慢 講出嚟 就 免 傷 和氣 啦 。
澄觀話 ：噉唔係 點好啩 ？
而家 噉樣 逳手逳腳 ，太過 唔雅觀 嘞 ，仲係 請 佢 畀 把 口 講 ，就 斯文 大方 啲 。
師叔 講得 啱 ，逳 手 逳 腳 唔 係 正 行 之 道 啊 。
藍衫女郎 知道 只要 呢個 老和尚 全力 嚟 打 ，自己 係 實在 擋唔住 一招半式 嘅 。
而家 師妹 被擒 ，自己 如果 亦 畀 佢 捉埋 ，就 冇人 去 報信 求救 㗎喇 。
佢 即刻 向 後 便 跳開 佢 話 ：
你 如果 傷 我 師妹 一條 頭髮 ，我 就 將 你 少林寺 燒 成 瓦渣缸 。
澄觀 打個 特嘞 佢 話 ：
我哋 點 敢 打傷 呢位 女施主 唧 ？
不過 如果 係 佢 自己 甩咗 一條 頭髮 ，唔通 你 都 要 放火 燒 寺 咯噃 ？
藍衫 女郎 跑咗 幾步 ，捩轉頭 鬧 佢 話 ：
老賊 禿 油嘴滑舌 ，小賊 禿 。
佢 本來 想 講 淫邪 好色 嘅 ，但係 呢 四個 字 不便 出口 ，噉 就 𨂽一𨂽腳 ，飆入去 樹林 嘞 。
韋小寶 見 綠衫女郎 瞓 喺 地下 ，喺 綠草如茵 之上 ，直情 好似 翡翠 座 上 嘅 一尊 白玉 觀音 噉樣 ，唉 ，睇到 佢 傻咗 啊 。
澄觀話 ：女施主 ，你 師姐 走咗 嘞噃 。
你 都 快啲 走罷啦 ，千祈 唔好 甩 條 頭髮 啊 ，唔係 啊 ，你 師姐 就嚟 燒 我哋 寺廟 㗎 喇 。
韋小寶 心諗 ：良機 勿失 啊 。
呢個 小美人 既然 落入 我 手 ，我 點都 唔肯 放佢 走 㗎喇 。
就合十話 ：我佛保佑 ，澄觀師侄 ，我佛 要 你 光大 少林武學 ，維護 本派 千幾年 威名 ，你 真係 本派 嘅 第一 大功臣 喇 。
澄觀 奇怪 喇 ：師叔 點解 會 噉 講 呢 ？
我哋 正 喺度 煩惱緊 ，都 唔知 兩位 女施主 仲 有 咩 招數 。
哈 ，好彩 我 佛 可憐 ，派遣 呢位 女施主 光臨 本寺 ，等 佢 一一 施展 啊 。
講完 ，彎腰 將 嗰個 女郎 抱起 身佢 話 ：返去 啦 。
澄觀 愕然 喇 ，只係 覺得 呢件事 唔係 點 啱 ，但係 邊度 唔啱 呢 又 講唔出 。
過咗 一陣 佢 話 ：師叔 ，我哋 請 呢位 女施主 入寺 好似 唔啱 規矩 噃 。
咩唔啱規矩啊 ？佢 入過 少林寺 未 吖 ？入過啦嘛 。
方丈 同 戒律院 首座 都 話 冇 咩 唔啱 嘅 ，梗係 啱 規矩 啦 係唔係 ？
佢 問 一句 ，澄觀 啊 岌 一下 頭 ，只覺得 佢 每 一句 説話 都 係 無可辯駁 嘅 。
睇住 小師叔 除咗 件 僧袍 褸住 嗰個 女郎 ，抱住 佢 由 側門 入 寺 ，咪 只有 跟住 後 便 行 嘞 。
其實 佢 啊 迷迷懵懵 頭腦 又 亂糟糟 。
韋小寶 個 心 就 兵兵嘣嘣 亂 咁 跳 ，雖然 呢個 女郎 從頭到腳 ，都 畀 僧袍 罩住 啊 ，啲 多 都 冇 打出嚟 。
但 係 如果 畀 寺裏 便 嘅 和尚 見到 ， 總 係 會思疑 㗎 ： 嘿 ， 你 攬住 嚿 乜嘢 啊 ？
好在 般若堂 係 喺 寺 後 靜僻 嘅 地方 ，佢 急急腳 咁 行 ，冇 撞到 其他 嘅 和尚 。
入堂 個 時候 ，裏 便 執事 僧 見到 師叔祖 駕到 ，首座 跟住 佢 後 便 ，都 恭恭敬敬 企 喺 一 便 嘞 。
入咗 澄觀 嘅 禪房 ，嗰個 女仔 仲 未 醒 。
韋小寶 將 佢 放 喺 床 上 ，成手 都 係 冷汗 。
噉 兩 隻 手 喺 大髀 旁邊 一擦 ，唞咗 個 大氣 笑住 話 ：唉 ，得喇 。
澄觀 問 佢 ：噉 我哋 請 呢位 ，誒 呢位 女施主 住 喺 呢處 啊 ？
係啊 ，佢 又 唔係 第一次 喺 本寺 住 。
以前 佢 整傷 條 頸 ，唔係 喺 東院 住過 咩 ？
係 ，不過 ，誒 不過 嗰 一次 係 幫佢 醫 啊 ，性命攸關 ，不得不 從權 處置 啫 。
哦噉啊容易啫 。
韋小寶 喺 靴筒 裏 便 拔出 匕首 佢 話 ：
我 只要 出力 割佢 一刀 ，等 佢 再 有 性命 之 憂 又 可以 從權 處置 啦 嘛 。
講完 行到 佢 身前 便 ，作狀 就 要 割落去 咯喎 。
澄觀 連忙 話 ： 誒 唔 好 啊 唔 好 啊 ， 噉 ， 噉 就 不必 咯 。
好 ，我 聽 你 話 。
嗱 除非 你 唔 畀 人 知 ，等 佢 將 各種 招數 演晒 喇 ，我哋 靜靜 送翻 佢 出去 ，否則 ，我 就 唯有 割傷 佢 喇 。
係 ， 係 ， 我 唔 講 ， 我 唔 講 。
佢 只 覺得 呢位 小師叔 做事 啊 實在 奇怪 。
不過 諗 住 佢 既然 係 晦字 輩 嘅 尊長 ， 見識 一定 比 自己 高超 嘅 ， 噉 聽 佢 吩咐 啊 決 冇 差錯 。
韋小寶 話 ： 呢 個 女 施主 脾氣 剛硬 ， 佢 話 一定 要 搶 咗 你 嘅 般若 堂 首座 嚟 做 喎 ， 我要 好好 地 勸 下 佢 至 得 。
佢 一定要 做 ，噉 師侄 讓 畀 佢 做 就係 啦 。
韋小寶 打個 特嘞 ，真係 估唔到 呢個 老和尚 性情 咁 淡薄 ，一啲 想爭下 嘅 意思 都 冇 嘅 。
噉佢話 ：佢 又唔係 本寺 嘅 和尚 ，搶 咗 般若堂 首座 個 位置 啊 ，我哋 少林寺 仲 有 面 嘅 ？
你 如果 有 噉 嘅 心 呢 ， 就 係 對 唔 住 少林 派 。
講完 黑起塊面 。
嘩 ，將 澄觀 嚇到 一味 話 ，係 係 係噉 。
韋小寶 板起 塊面 話 ：得喇 ，你 出去 先 啦 ，你 喺 外便 等住 ，我 要 勸 下 佢 喇 。
澄觀 躬身 應咗 佢 ，就 行 出 禪房 順手 閂埋 道門 。
韋小寶 掀開 冚住 嗰個 女郎 頭上 嘅 僧袍 ，嗰個 女郎 正 話 想 擘開 口 大嗌 ，突然 見到 一把 寒光閃閃 嘅 匕首 ，指住 自己 個 鼻 ，當堂 唔敢 叫 嘞 。
韋小寶 笑嘻嘻噉 話 ：姑娘仔 ，你 只要 乖乖地 聽話 ，我 唔會 逳 你 一條 頭髮 嘅 。
如果唔係啊 ，我 只有 割咗 你嘅 鼻哥 放 你 出 寺 喇 。
一個人 少咗 鼻哥 ，不過 係 聞唔到 香氣 同 臭氣 啫 ，亦 冇 咩 大不了 嘅 係唔係 ？
嗰個 女郎 又 驚 又 嬲 ，塊面 啊 一啲 血色 都 冇 。
韋小寶 話 ：你 聽唔聽話 吖 ？
嗰個 女郎 嬲 到 極 嘞 低聲 話 ：你 快啲 殺咗 我 啦 。
韋小寶 歎 一啖 氣 佢 話 ：
唉 ，你 咁靚 ，我 點 捨得 殺咗 你 吖 ？
不過 放 你 走 呢 ，從此 我 日夜 都 會 想念 你 ，實 會 為 你 生 相思病 而 死 嘅 ，嗯 噉 亦 係 有 傷 上天 好 生 之 德 啊 。
嗰個 女郎 塊面 一紅 ，跟住 又 轉為 蒼白 嘞 。
韋小寶 話 ：法子 呢 就 有 一 個 。
就 係 我 割 咗 你 嘅 鼻 哥 ， 噉 你 嘅 相貌 就 唔 係 點靚 喇 ， 噉 我 呢 ， 亦 唔 會生 相思病 喇 。
嗰個 女郎 眯埋 雙眼 ，兩粒 淚珠 喺 長長 嘅 睫毛 下 便 滲出嚟 。
韋小寶 個 心 一 軟 就 安慰 佢 話 ：唔好 喊 唔好 喊 。
只要 你 乖乖 地 聽話 ， 我 寧可 割 咗 自己 嘅 鼻 哥 都 唔 割 你 嘅 鼻 哥 嘅 。
你 叫做 咩嘢 名 啊 ？
嗰個 女郎 擰擰頭 ，眼淚 更加 流得 多嘞 。
哦 ，原來 你 嘅 名 叫做 擰頭貓 ，不過 呢個 名 唔係 幾 好聽 噃 。
嗰個 女郎 擘開 雙眼 ，嗚噎住 話 ：
邊個 叫做 擰 頭貓唧 ？ 你 先 至 係 擰 頭貓 啊 。
韋小寶 聽 佢 肯 回答 ，個心 好 歡喜 ，笑住 話 ：嘿嘿 ，好 ，我 係 擰頭貓 ，噉 你 叫做 咩嘢 吖 ？
唔講 。
你唔肯講 ，噉啊 只有 同 你 起個名喇 ，叫做 ，叫做啞貓啦 。
亂噏一通 ，我 又唔係 啞嘅 。
韋小寶 坐喺 一沓 高高堆起 嘅 少林 武學 典籍 上 便 ，翹起 隻 腳 輕輕噉 搖下搖下 。
見佢 雖然 係 滿面 怒容 啊 但係 秀麗 絕倫 ，動人 心魄 ，噉 笑住 話 ：
噉 你 尊姓大名 呢 ？
我 話過 唔講 就係 唔講㗎喇 。
我 有 説話 同 你 商量 吖嘛 ，噉 冇 名 冇 姓 ，講起嚟 幾 論盡 呢 。
噉 你 既然 唔肯 講 ，我啊 只有 同 你 改個名 喇 。
誒 改 個 咩嘢 名 好 呢 ？
唔要 ，唔要唔要 ！
啊 有 喇 ，你 叫做 韋門擰氏 。
咁 古怪 嘅 我 又 唔係 姓 韋 嘅 。
韋小寶 好正經噉 話 ：皇天 在上 ，后土 在下 ，我 呢一生一世 ，就算 係 上刀山 ，落油鑊 ，千刀萬剮 ，滿門抄斬 ；
大逆不道 ，十惡不赦 ，男盜 女娼 ，絕子絕孫 ，天打雷劈 ，周身生滿 一千零一個 大毒瘡 ，我亦非 娶 你 做 老婆 不可 。
嗰個 女郎 聽 佢 一口氣 發咗 咁多 毒誓 ，初時 都 唔知 佢 想 點噃 ，聽到 最後 一句 説話 ，不由得 滿面 通紅 ，呸 佢 一聲 。
韋小寶話 ：我 係 姓 韋 㗎 ，因為 你 呢 已經 命中 註定 ，總之 係 姓 韋 㗎 喇 。
我 又 唔知 你 姓 乜嘢 ，你 一味 擰頭 ，所以 就 叫 你 做 韋門擰 氏 喇 。
嗰個 女郎 眯 翻埋 雙眼 ，好 嬲 噉 話 ：
世間上 真係 冇 你 呢啲 噉嘅 和尚 ，淨係 識得 亂咁噏 。
你 係 出家人 ， 娶 咩 嘢 ， 娶 咩 嘢 ， 都 唔 怕 菩薩 罰 你 ， 死 咗 打落 十八層 地獄 嘅 。
韋小寶 雙手 合十 ，噗 一聲 跪低 。
嗰個 女郎 聽到 佢 跪 喺 地下 嘅 聲音 ，好奇 起上嚟 ，擘開 隻 眼 ，見到 佢 對住 個 窗口 叩 幾個 頭 ，佢 話 ：
我佛如來 ，阿彌陀佛 ，觀世音菩薩 、文殊菩薩 、普賢菩薩 、玉皇大帝 、四大金剛 、閻王判官 、無常小鬼 ，唔該 大家 一齊 聽住 啊 。
我 韋小寶 非 娶 呢個 姑娘 為 妻 不可 。
就算 我 死咗 之後 ，打落 十八層 地獄 ，勾脷根 ，鋸頭殼 ，萬劫 不得 超生 ，我 都 唔緊要 。
我 在 生 就 乜 都 唔 理 ，死咗 之後 呢 就 乜 都 唔 怕 ，呢個 老婆 總之 我 係 娶 梗㗎 喇 。
嗰個 女郎 見 佢 講得 斬釘切鐵 ，一啲 都 唔似 係 輕輕浮浮 開玩笑 ，反而 怕起上嚟 佢 話 ：唔好 講 喇 ，唔好 講 喇 。
哼 ，你 殺咗 我 亦 好 ，日日 打 我 亦 好 ，總之 我 嬲死 你 㗎 喇 ，我 ，我 決唔肯 應承 你 嘅 。
韋小寶 企起身 話 ：你 應承 又 好 ，唔 應承 又 好 ，總而言之 ，言而總之 ，我 今後 八十年 呢 ，係 跟住 你 㗎喇 。
就算 你 變咗 一百歲 嘅 伯爺婆 ，我 如果 娶唔到 你 呢 ，我 仍然 係 死不瞑目 。
嗰個 女郎 話 ：你 噉樣 侮辱 我 ，總有一日 ，我 要 你 死 喺 我 手 。
我要 殺咗 你 先 ，然後 自殺 。
韋小寶 話 ：你 殺 我 係 可以 嘅 ，不過 噉 就係 謀殺 親夫 咯噃 。
我 如果 做唔成 你 老公 呢 ，唔會 就 噉 就 死 嘅 。
嗰個 女郎 見 佢 咬牙切齒 ，額頭 都 起晒 青筋 ，個 心 怕 起嚟 又 眯埋 雙眼 。
韋小寶 向 佢 行近 幾步 ，只覺得 全身 都 軟晒 手揗腳震 ，呢個時候 ，只係 想 向 佢 跪低 ，𠼮佢 。
再行一步 ，喺 喉嚨 低低 噉 叫咗聲 ，哎呀 ，好似 受傷 嘅 野獸 叫噉 ，噉 突然之間 ，又 想 不如 捻死佢 算喇 噉 。
嗰個 女郎 聽到 怪聲 ，即刻 擘翻開 雙眼 ，見到 佢 眼神 咁 古怪 嘅 就 尖聲 叫起嚟 。
各位 ，欲知 後事 如何 ，且 聽 下回 分解 。
