前 文 再續 啊 書 接上 一回 啊 ， 話 説 公主 要 韋小寶 扶 佢 返 入 房間 。
韋小寶 話 ：我 唔 扶 。
冇法子啦 ，公主 就 扶住 埲牆 慢慢 行出去 ，佢 話 ：
好桂子 ，聽日 再嚟 啦 好唔好啊 ？
忽然間 左腳 一屈 ，爭啲 跌倒 。
韋小寶 嗱嗱聲 衝上去 扶住 佢 。
公主 話 ： 好桂子 ， 唔 該 你 去 叫 兩名 太監 嚟 扶 我 返 去 啦 。
韋小寶 個 心 諗 一 叫 太監 ，至 怕 畀 太后 知道 噃 ，追查 公主 為 乜事 受 咗 傷 ，只要 稍為 洩漏 出去 ，就係 殺頭 嘅 罪名 噃 。
冇法子 啦 唯有 扶住 佢 話 ：我 扶 你 返 房 係 嘞 。
公主 笑住 話 ：好 桂子 唔該晒 你 喇 。
噉啊 靠住 佢 膊頭 就 行 嘞 。
公主 嘅 住地 喺 慈寧宮 之 西 ，壽康宮 側 跟 。
兩個人 漸漸 行近 慈寧花園 ，韋小寶 一 想起 太后 嗰種 神氣 啊 個 心 都 仲 震震地 。
噉 兩個人 行到 去 長廊 ，公主 忽然 對住 佢 耳仔 輕輕 噉 吹氣 。
韋小寶 面 都 紅晒 ，佢 話 ：唔好啦 ，唔 ，唔好呢 。
公主 話 ：點解 唧 ？我 又 唔係 打 你 。
講完 ，將 佢 耳珠 啊 輕輕 噉 咬住 扤下扤下 。
韋小寶 只 覺得 又 麻 又 癢 ，低聲 話 ：
你 如果 咬痛 咗 我 耳仔 ， 我 就 永遠 唔 嚟 見 你 喇 ， 大丈夫 一言既出 ， 死馬難 追 啊 。
公主 啊 本來 想 突然間 將 佢 耳珠 咬甩 一窟肉 嘅 ，聽 佢 噉 講 就 唔敢 再 咬 嘞 。
到咗 公主 嘅 寢宮 ，韋小寶 轉身 就 走 。
公主 話 ：你 入嚟 啦 ，我 畀 樣嘢 你 睇下 。
呢個 時候 建寧宮 嗰 四名 太監 、四名 宮女 就 企 喺 門外 侍候 ，韋小寶 當然 唔敢 放肆 嘞 ，唯有 跟住 入去 啦 。
公主 拉住 佢 隻手 ，直入 自己 臥室 。
噉啊 兩名 宮女 跟住 入嚟 ，攞 熱手巾 畀 公主 抹面 。
公主 攞起 一條 手巾 ，遞畀 韋小寶 。
韋小寶 接咗 就 抹 面 啲 汗 嘞 喎 。
兩名 宮女 見 公主 對 呢個 小太監 居然 破晒格 ，連 對 太后 、皇上 都 冇 咁 客氣 嘅 。
而 呢個 小太監 呢 ，竟然 亦都 坦然 接受 ，真係 冇 禮 到 極 喇 不由得 都 呆晒 。
公主 一擸 眼見到 ，睩大 雙眼 話 ：有 咩 咁 好睇 啊 ！
兩名 宮女 話 ： 係 ， 係 。 就 彎腰 退出 去 嘞 噃。
點知 已經 遲 喇 ，公主 一 伸手 ，向 最近 自己 嗰 名 宮女 隻 眼 挖 過去 。
嗰個 宮女 稍為 一閃 ，一聲 慘叫 ，眼核 呢 雖然 冇 挖中 ，不過 塊 面 就 鮮血淋漓 ，由 額頭 到 下 爬 當堂 出現 四條 爪痕 。
兩名 宮女 嚇到 魂飛天外 急忙 退出去 。
公主 笑住 話 ：你 睇下 ，呢啲 奴才 就 只係 會 叫住 求饒 ，有 咩嘢 好玩 唧 ？
韋小寶 見到 佢 出手 殘忍 ，佢 諗 ：
呢個 衰女 吖 太過 兇惡 喇 ，同 佢 母親 老 舉 乸 差唔多 。
咪喇咪喇 ，仲係 及早 甩身 為好 。
佢 話 ：公主 ，皇上 派 我 有事 做 啊 ，我 要 去 喇 。
急 咩 嘢 唧 ？
公主 反手 閂埋 門 ，上咗 門戌 。
嘩 ，韋小寶 個 心 嘣嘣聲 亂 咁 跳 ，唔知 佢 又 要 做 啲 乜嘢 古怪 事 嘞 。
公主 笑住 話 ：我 做 主子 做咗 十五 年 ，成日 都係 畀 人哋 服侍 ，冇 釐味道 嘅 ，我哋 今日 嚟 換 個 班 。
你 做主子 ，我 做奴才 吖嗱 。
韋小寶 啊 猛咁 耍 手擰頭 佢 話 ：誒 唔得唔得 ，我 冇 噉 嘅 福氣 啊 。
公主 板 起 塊 面 話 ：你 唔 肯 係 嘛 ？我要 叫 㗎 喇 ，我 話 你 對 我 冇 禮 ，打 到 我 全身 又 青 又 腫 。
突然 放聲 大叫 ：哎呀 ！好痛啊 ！
嚇 到 韋小寶 猛 咁 作揖 話 ： 哎呀 唔 好 嗌 喇 唔 好 嗌 喇 ， 我 聽 你 吩咐 就 係 嘞 。
呢處 係 公主 寢宮 ，外面 有 好多 太監 宮女 企 喺 度 侍候 嘅 ，佢 只要 再 叫 幾 聲 ，即刻 就 有 好多人 湧入 嚟 。
呢處 唔同 嗰間 比武 嘅 小屋 啊 ，嗰度 四周圍 都 冇 人 嘅 。
公主 微微 笑一笑 話 ： 賤格 ！ 好地 地同 你講 你 偏偏 唔 肯 聽 ， 一定 要 敬酒 唔 飲 飲 罰酒 嘅 。
韋小寶 喺 個 心 話 ：你 先至 係 賤格 啊 ，主子 唔 做 做 奴才 。
公主 屈低 一隻腳 ，恭恭敬敬噉 向 佢 請 個 安 ，佢 話 ：
桂貝勒 ，你 要 唞喇 ，奴才 侍候 你 除 衫 啦 。
貝勒 呢 ，係 清朝 嘅 爵號 ，地位 次於 郡王 。
噉韋小寶話 ：哼 ，我唔瞓嘞 ，你 同 我 輕輕 𢱕下 骨 啦 。
係 。
噉 啊 公主 坐 喺 地下 ，攞 起 佢 右腳 晾 喺 自己 嘅 大 髀 上 便 輕輕 噉 𢱕 骨 ， 細心 熨帖 ， 一 啲 都 冇 整 痛 佢 嘅 傷口 。
韋小寶 讚佢話 ：你 真係 天生 嘅 奴才 啊 ，服侍得 我 好 舒服 啊 。
噉啊 喺 佢 面珠 上面 輕輕 搣咗 一下 。
公主 就 歡喜 到 乜嘢 噉 低聲 話 ：主子 誇獎 喇 。
除咗 韋小寶 隻 靴 ，喺 佢 腳 上 輕輕 噉 捻咗 一陣 ，又 換過 佢 左腳 ，𢱕完 骨 喇 ，又 除咗 佢 隻 靴 嚟 按摩 ，佢 話 ：
桂貝勒 ，你 喺 床上面 瞓 啦 ，我 同 你 𢱕 下 背脊 啦 。
韋小寶 畀 佢 按摩 得 十分 舒服 ，個 心 諗 呢個 賤格鬼 如果 唔 畀 佢 過足 奴才 癮 呢 ，決 唔會 放 我 走 嘅 。
噉就 上床 打橫 瞓 喺 處 ，即刻 就 聞到 一浸浸 嘅 幽香 ，佢 諗 ：
呢個 賤格 鬼吖 鋪床 咁 華麗 ，麗春院 裏頭 嘅 頭等 紅牌 阿姑 都 冇 咁 靚 嘅 被褥 枕頭 啊 。
噉啊 公主 攞過 張 薄被 𢫏 喺 佢 個 身處 ，喺 佢 背脊 輕輕 噉 拍打 。
韋小寶 迷迷懵懵 啊 正在 大充桂貝勒 嘅 時候 ，忽然間 聽見 門外 好多人 齊聲 話 ：皇太后 駕到 ！
噓 嚇到 佢 不得了 ，連忙 想 跳起身 。
公主 神色 驚惶 佢 話 ：嚟唔切 走喇 ，蜎 落 被 竇 啦 ，唔好 逳 啊 。
韋小寶 個 頭 一縮 ，蜎 咗 入去 張 被 裏 便 ，隱約 啊 聽見 打門 聲 ，嚇到 佢 爭啲 暈 咁滯 。
公主 嗱嗱聲 放低 羅帳 ，就 去 拔開 門戌 ，一 開 門 唧 ，太后 就 𨂾 入嚟 喇 佢 話 ：
青天白日 ，閂埋 道門 做咩嘢 啊 ？
公主 笑住 話 ：我 好 攰 啊 ，正 話 想 瞓 一陣 啫 嘛 。
太后 坐低 之後 又 問 佢 嘞 ： 又 喺 度 搞 咩 鬼 啊 ？
咦 ？塊 面 點解 一啲 血色 都 冇 嘅 ？
我 都 話 好攰 咯 。
太后 一耷低頭 ，見到 床前 便 有 一對 靴 ，又 見 堂 羅帳 逳逳 下 ，嗯 個 心 知道 有 古怪 喇 ，就 對 班 太監 宮女 話 ：
你哋 都 出去 外便 侍候 。
等班人 出咗 去 之後 ，對 公主 話 ：閂埋 門 ，上埋 門戌 。
公主 笑住 話 ：太后 又 想 搞 咩嘢 呢 ？
噉啊 聽 佢 話 閂埋 道門 ，順住 太后 隻 眼光 望過去 ，一 見到 對 靴 ，不由得 面色 都 變咗 佢 強笑 話 ：
誒 我 正 話 想着 翻套 男裝 ，扮 個 男仔 畀 太后 睇下 ，你 話 我 着咗 男裝 個 樣 英俊 唔 英俊 呢 ？
太后 冷冰冰噉 話 ：我要 睇 下 床上 嗰個 男仔 個 樣 英俊 唔 英俊 啊 。
噗聲 企 起身 ，行 到 張 床 前面 。
公主 驚到 不得了 ，拉住 太后 隻手 佢 話 ：
太后 ，我 同佢 玩下 啫 嘛 ，我 同佢 玩下 㗎 咋 。
太后 將 隻 手 一 捹 將佢 捹開 幾 步 ，揦 起 堂羅帳 掀 咗 張 被 ，揦住 韋小寶 個 衫 領 扚 佢 起身 。
韋小寶 塊面 呢 就 向住 床 裏 便 唔 敢 擰轉頭 同 佢 打對面 ，周身 啊 嚇到 滴滴 震 。
公主 話 ： 太后 啊 ， 佢 係 皇帝 哥哥 最 鐘意 嘅 小太監 ， 你 ， 你 唔 好 殺 佢 啊 。
太后 哼咗 一 聲 ，個 心 諗 ：
個女 年紀 漸漸 大喇 ，情竇 已 開 ，床上 收埋 個 小太監 ，亦 不過 做 啲 假 鳳 虛凰 嘅 勾當 啫 ，都 唔 算得 咩 大事 嘅 。
右手 一轉 ，將 韋小寶 個 面 轉翻 出嚟 ，啪啪 噉 打 咗 兩 巴喝 佢 話 ：
快啲躝喇 ，再畀我見到 你 同 公主 鬼混 。
突然間 睇見咗 佢 個樣 ，吃咗一驚 話 ：哎呀 ，係 你 啊 ？
韋小寶 擰 翻轉頭 話 ：唔係 我 啊 。
哈 ，呢 三個 字 真係 莫名其妙 。
但係 而家 佢 心驚膽戰 ，唔係 噉 講 又 有 咩 好 講 呢 ？
太后 出力 噉 揸住 佢 條 頭領 ，慢慢 噉 話 ：
天堂 有 路 你 唔 走 ，地獄 無 門 闖 進來 。
你 對 公主 無禮 ，今日 就 唔 怨得 我 喇 。
公主 話 ：太后 啊 ，係 我要 佢 瞓 喺 呢處 㗎 咋唔好 怪 佢 啊 。
太后 用 左掌 喺 韋小寶 腦門 輕輕 拍 咗 拍 ，跟住 舉起 左手 ，就 想 運力 打落去 ，一掌 就 殺 咗 佢 嘞 。
韋小寶 喺 萬分 危急 之中 ，突然間 想起 洪教主 教 佢 嗰 招 狄青 降龍 ，即刻 捩轉 雙手 ，喺 太后 胸前 摸咗 下 。
太后 吃咗 一驚 ，胸口 急急 向 後 縮 ，喝佢話 ：你 作死 啊 ！
韋小寶 雙腳 喺 床 邊 一 𨅝， 一個 倒 翻 關斗 就 騎 喺 太后 條頸處 ， 雙手 食指 撳住 佢 雙眼 ， 手指 公 呢 頂住 佢 太陽穴 ， 喝 佢 話 ：
你 一逳 ，我 就 挖咗 你 眼核 。
佢 呢 一招 呢 未曾 練熟 㗎 ， 本來 就 好 難 施展 ， 好 在 佢 企 喺 床上 便 ， 而 太后 呢 就 企 喺 地下 ， 一高一低 就 倒 騎 容易 噃。
而挖眼呢 本來 應該 用 中指 嘅 ，而家 變成 用 食指 ，倒翻 關斗 個 時候 ，腳尖 呢 就 勾咗 堂羅帳 落嚟 。
呢一招 使得 拖泥帶水 狼狽不堪 ，洪教主 如果 見到 啊 ，非 激到 半死 不可 。
雖然 係 手法 唔啱 啫 ，但係 招式 係 實在 巧妙 噃 ，太后 仲 係 畀 佢 制住 ，竟然 難以 抵擋 。
公主 哈哈大笑話 ：小桂子 唔准 無禮 啊 ，快啲 放咗 太后 啦 。
韋小寶 右腳 一提 ，右手 拔出 匕首 頂住 太后 後心 ，然後 喺 條 頸處 瀡 翻落地 。
忽然間 啪 一聲 ，一件 五色 燦爛 嘅 物件 跌咗 喺 地下 正係 神龍教 嘅 五龍令 。
太后 一 見到 大吃一驚 話 ： 呢 ， 呢 ， 呢 件 嘢 ， 係 點樣 嚟 㗎 ？
韋小寶 想起 太后 同 神龍教 個 假 宮女 鄧炳春 、劉燕 暗中 勾結 ，講唔定 呢個 五龍令 可以 逼到 佢 聽 自己 話 噃 ，就 話 ：
咩 呢件 嘢 嗰件 嘢 啊 ，呢個 係 本 教 嘅 五龍 令 你 唔 認得 咩 ？好 大膽 啊 你 ！
太后 全身 一震 話 ：係 ，係 。
韋小寶 聽 佢 言語 恭順 ，不由得 心花怒放 喇 佢 話 ：
見五龍令 就好似 見到 教主 一樣 ，洪教主 仙福 永享 ，壽 與 天 齊 。
太后 聲 都 震晒 噉 話 ：洪教主 仙福 永享 ，壽 與 天 齊 。
護 低身 執起 五龍 令 高高噉 舉起 。
韋小寶 接翻 五龍 令 喇 ， 問 佢 ： 你 聽 唔 聽 我 號令 啊 ？
係 ，謹遵 吩咐 。
教主 寶訓 ，時刻 在心 。制勝 克敵 ，無事 不成 。
教主 寶訓 ，時刻 在心 。制勝 克敵 ，無事 不成 。
直到而家 ，韋小寶 先至 唞咗 個 大氣 ，放開 匕首 ，大模大樣 噉 坐喺 張 床 處 。
太后 對 公主 話 ：你 出去 外便 ，咩嘢 事 都 唔好 講 ，否則 ，我 殺咗 你 。
嚇咗 公主 一 驚 佢 話 ：係 。
佢 睇咗 韋小寶 一 眼 ，佢 就 問 嘞 ：
太后 ，係 皇帝 哥哥 個 聖旨 啊 ？
康熙 年紀 漸漸 大 ，威權 日 重 ，太監 、宮女 以及 御前 侍衞 講到 皇上 個 時候 ，越嚟越 恭敬 同 害怕 。
公主 呢 亦都 知道 太后 對 皇帝 都 幾 怕 嘅 。
太后 岌一岌頭 話 ：係 。
佢 係 皇帝 嘅 親信 ，有 緊要事 同 我 講 ，千祈 唔能夠 洩漏 啊 ，喺 皇帝 面前 更加 唔能夠 提起 。
免致 ，免致皇帝嬲你啊 。
公主 話 ：係 ，我 冇 咁 笨 。
講完 就 行 出 間 房 ，順手 閂 翻 埋 道 房門 。
太后 同 韋小寶 面面 相對 ， 大家 都 互相 猜疑 啊 。
噉 過咗 一陣間 ，太后 話 ：
隔墻有耳 ，呢處 唔係 講説話嘅地方 ，請 去 慈寧宮 詳談 啦 好嘛 ？
聽佢 用咗 個 請字 ，又 係 商量 嘅 口吻 ，唔敢 擅作主張 ，噉 韋小寶 更加 寬心 嘞 ，跟住 佢 又 諗 ：
呢個 老舉乸 心狠手辣 ，呃 我 去到 慈寧宮 唔知道 使 咩 詭計 嚟 害 老子 嘞 。
噉就 岌一岌 頭 低聲 話 ：
我係 本教 新任 白龍使 ，奉 洪教主 命令 出掌 五龍令 。
太后 當堂 肅然 起敬 ，躬身 話 ：屬下 參見 白龍使 。
雖然 韋小寶 啊 早就 想到 ，太后 既然 同 黑龍門 屬下 教眾 勾結 ，對 洪教主 啊 必定 十分 尊敬 嘅 ，呢個 五龍令 對 佢 呢 多數 會 嚇窒 佢 嘅 。
但係 萬萬 想唔到 ，佢 自己 竟然 亦係 神龍教 嘅 教眾 。
以 佢 太后 之 尊 啊 ，天下 事 有 咩 叫做 得唔到 㗎 ？
居然 會 去 加入 神龍教 ，而 地位 呢 低過 自己 好多 ，真係 實在 發夢 都 想唔到 嘞 。
所以 見 佢 恭恭敬敬 噉 行禮 ，不由得 愕然 。
太后 見到 佢 唔出聲 ，仲 以為 佢 記仇 噃 ，好 驚 啊 ，佢 低聲 話 ：
屬下 以前 唔 知道 尊使 身份 ，多多 得罪 十分 惶恐 ，希望 尊使 大度 寬容 啊 。
但係 見到 佢 年紀 咁 細小 ，竟然 喺 教內 身居 高位 ，噉 究竟 係咪 真嘅 呢 ？
但係 跟住 又 想到 ，近年來 教主 同 夫人 係 大量 提拔 新晉 少年 ，教裏頭 嘅 老兄弟 被 屠殺 又 有 ，被 疑忌 又 有 ，漸漸 失去 權勢 。
呢個 細佬哥 新任 白龍使 ，又 一啲 都 唔 出奇 噃 。
佢 又 諗 ：就算 佢 係 真嘅 白龍使 ，我 而家 殺咗 佢 ，教 裏頭 亦 冇 人 知 㗎 。
呢 個 衰仔 對 我 記仇 記得 好 厲害 ， 留 佢 喺 處 就 後患無窮 喇 。
太后 一想到 殺人 ，雙眼 不由自主 噉 露出 狠毒 嘅 表情 。
韋小寶 即時 驚覺 喇 佢 諗 ：弊喇 ，老舉乸 要 殺 我 。
就低聲話 ：先頭 我 捉 你 嘅 手法 ，你 知唔知 係 邊個 傳授 我 㗎 ？
太后 吃咗 一驚 啊 ，諗翻 呢個 衰仔 先頭 所使 嘅 手法 ，詭秘莫測 ，一招唧 就 將 自己 制住 ，呢啲 正係 教主 嘅 手段 。
佢 聲 都 震晒 話 ：唔通 ，唔通 係 教主 親傳 畀 你 嘅 ？
韋小寶 笑住 話 ：教主 傳咗 我 三十 招 殺手 ，洪夫人 呢 ，傳咗 我 三十 招 擒拿手 ，噉 比較起嚟 ，噉 梗係 教主 嘅 手法 厲害得多 啦 。
不過 佢 老人家 嘅 招數 呢 ，一出手 就 要 攞 人 條命 嘅 ，噉 我 唔想 殺 你 ，因此 呢 ，只係 用 咗 夫人 所 傳 嘅 一招 飛燕回翔 唧 。
嘿 ，佢 吹牛 唔 使 本錢 ，招數 一 加 就 多咗 十倍 。
太后 就 毫不 懷疑 噃， 佢 知道 洪夫人 所 使 嘅 好多 招數 ， 確實 係 安 咗 個 古代 美 人 嘅 名 嘅 ， 不由得 出 咗 一身 冷汗 佢 諗 ：
好彩 佢 只係 用 洪夫人 嘅 招數 對付 我 唧 ，如果 用 教主 所 傳授 嘅 ，而家 我 早就 冇命 喇 。
呢陣時 佢 邊度 仲 敢 害 韋小寶 啊 ，恭恭敬敬噉 話 ：多謝 尊使 不殺 之恩 啊 。
韋小寶 得意洋洋 噉 話 ：我 冇 挖到 你 雙眼核 ，比 夫人 所 教 嘅 呢 就 放寬 咗 幾分 嘞 。
太后 越 想 越驚 啊 佢 話 ：
多謝 手下留情 ， 屬下 感激萬分 ， 必定會 報答 尊 使 嘅 恩德 嘅 。
韋小寶 本來 一見 太后 就 好似 老鼠 見 貓 噉 ，情不自禁 就 篩糠 噉 全身 震 ，點知道 而家 竟然 將 佢 制得 服服帖帖 。
見佢 誠惶誠恐 噉 企 喺 面前 ，個 心 嗰種 得意法 啊 真係 難以 形容 咯 。
佢 用 左腳 晾 喺 右腳 上便 ，搖咗 幾 搖 低聲 話 ：
呢次 跟埋 本 使 由 神龍島 嚟 北京 嘅 ，仲有 肥頭陀 同 陸高軒 兩個人 啊 。
係 ，係 。
太后 諗 肥陸 兩個人 係 教中 高手 ，好彩 先頭 啊 冇 莽撞 唧 。
如果 將 佢 打死咗 咪 講話 教主 日後 追究 啦 ，就算 係 肥陸 兩個人 搵到嚟 ，亦係 死路 一條 啊 。
見到 韋小寶 塊 面仲有 手指 印 ， 係 自己 先頭 摑 佢 兩 巴 留 喺 處 嘅 就 話 ：
屬下 過去 對待 尊使 種種 行為 ，確實 係 罪該萬死 。
尊使 大人 大量 ，後福 無窮 啊 。
韋小寶 微微 一 笑話 ：
白龍 使 鍾志靈 背叛 教主 ， 教主 同 夫人 已經 將 佢 殺 咗 嘞 ， 派 我 接掌 白龍門 。
黑龍 使 張淡月 辦事 不力 ， 教主 同 夫人 啊 好 嬲 啊 ，攞 經 嘅 事 而 家 由 我 嚟 辦 。
太后 全身 都 震晒 佢 話 ：係 ，係 。
佢 想起 幾部 經書 得而復失 ，呢一排 呢日夜 擔心 ，終於 事發 喇 佢 話 ：
呢件事 講起上嚟 ，好長篇 嘅 ，請 尊使 移駕 慈寧宮 ，由 屬下 詳稟 啦 。
好 。
韋小寶 諗 呢件事 裏頭 呢 唔明白 嘅 地方 好多 ，正係 想 查問 佢 ，噉 就 企起身 。
太后 轉身 去 拔開 門戌 ，開咗 房門 ，打側身 企 響處 ，讓 佢 行 先 。
韋小寶 啊 大聲 話 ：太后 啟駕 喇 。
太后 低聲 話 ：得罪 喇 。
就行出門口 ，韋小寶 跟住 佢 後便 ，噉啊 幾十名 太監 宮女 遠遠 噉 跟住 行 。
兩個人 嚟到 慈寧宮 。
太后 帶 佢 行 入 臥室 ，叫 啲 宮女 行開 嘞 ，噉 啊 閂埋 房門 ，親自 斟 咗 碗 參湯 雙手 敬畀 韋小寶 。
韋小寶 接咗 飲咗 幾啖 個 心 諗 ：
我 今日 嗰啲 威風法 啊 ，只有 當年 順治 老皇爺 可以 同 我 比 下 。
嚱 就算 係 小皇帝 ，太后 亦都 唔會 對 佢 咁 恭敬 嘅 。
個 心 又 試 歡喜 一 輪 。
太后 打開 個 箱 ，攞咗 個 錦盒 出嚟 ，又 開咗 盒 ，攞出 一個 小 玉瓶 佢 話 ：
啓稟尊使 ，呢度 有 三十粒 雪參 玉蟾丸 ，乃係 朝鮮 國王 嘅 貢品 ，珍貴無比 ，食咗 之後 強身健體 百毒不侵 啊 。
其中 十二粒 ，請 尊使 轉呈 教主 ，十粒 ，請 轉呈 教主夫人 ，噉 淨翻 嗰 八粒 ，請 尊使 自己 食 啦 ，算係 ，算係 屬下 一啲啲 心意 啊 。
韋小寶 岌一岌頭 話 ：多謝 你 嘞 。
不過 唔知 呢啲 藥丸 ，同 豹胎易筋丸 會 唔會 衝撞 嘅 呢 ？
唔會嘅 ，恭喜 尊使 得 蒙 教主 恩賜 豹胎 易筋丸 。
誒唔知 ，唔知道 屬下 今年 嘅 解藥 ，教主 是否 叫 尊使 帶咗嚟 呢 ？
韋小寶 打個 特 ，今年 嘅 解藥 ？
嗱 各位 ，欲知 後事 如何 ，且 聽 下回 分解 。
