前 文 再續 啊 書 接上 一回 啊 。
話說 小郡主 沐劍屏 勸 韋小寶 唔好 殺 洪教主 同 夫人 噉 。
韋小寶 一 諗 冇 錯 啊 ，洪夫人 咁 千嬌百媚 ，無論 如何 呢 殺唔落手 嘅 。
眼前 ，正係 建立 大功 嘅 機會 。
只 係 肥 頭陀 、 陸先生 、 無根道人 呢 幾個 人 呢 ， 就 會 畀 教主 殺 㗎 嘞 。
嗰個 無根 道人 十分 豪傑 ，殺咗 佢 就 未免 可惜 吖 。
最好呢就係唔殺教主同夫人 ，又保全 肥頭陀 佢哋 條命 。
噉佢就話 ：冇錯 ，好老婆啊 ，就算 教主 要 殺 我 ，我都 非 救 你 不可 嘅 。
講完 ，就 喺 佢 面 珠錫 咗 一啖 。
沐劍屏 啊 醜到 滿面 通紅 啊 佢 低聲 話 ：
你 立咗 大功 又係 細佬哥 ，教主 點 會 殺 你 呢 ？
韋小寶 將 沐劍屏 輕輕 放翻 喺 地下 ，擰轉 頭 對 陸 先生 話 ：
陸 先生 ，教主 係 唔 殺得 㗎 ，夫人 呢 亦都 係 唔 殺得 㗎 。
石碑上 便 呢 刻咗 字 ，話 教主 同 夫人 係 永享 仙福 壽 與 天齊 吖嘛 ，我 點 敢 害死 佢哋 啊 ？
佢 兩位 神通廣大 ，就係 要害 啊 ，都 害唔死 㗎 嘛 。
急到 陸先生 大聲 噉 話 ： 碑文 係 假 嘅 點算 得數 呢 ？
唔好 胡思亂想 喇 ，快啲 將 兩個人 殺咗 ，否則 大家 都 死 無 葬身之地 㗎 。
韋小寶 一味 擰頭 話 ：陸 先生 ，你 唔好 講埋 呢啲 噉嘅 犯上作亂 嘅 説話 至得 㗎 。
你 有冇 解藥 啊 ？我哋 快啲 幫 教主 同 夫人 解 身上 嘅 毒 啦 。
洪夫人 話 ：講得 真係 啱喇 小兄弟 ，你 真係 見識 高超 啊 。
上天 派咗 你 噉樣 一個 少年 英雄 下凡 ，嚟到 輔助 教主 。
神龍教 有咗 你 噉樣 一位 少年 英雄 ，真係 大家 嘅 福氣 啊 。
呢幾句 説話 講得 似乎 出自 真心 ，充滿 咗 驚奇 讚歎 嘅 意思 。
韋小寶 聽咗 啊 講唔出 咁 舒服 啊 佢 話 ：
夫人 ，我 唔係 神龍教 嘅 人 啊 。
洪夫人 話 ：噉就 容易 啦 ，你 而家 即刻 入教 啦 ，我 就係 你 嘅 接引人 。
教主啊 ，呢位 小兄弟 ，為 本教 立咗 咁大 嘅 功勞 ，我哋 派 一個 咩嘢 職司 畀 佢 至 啱 呢 ？
教主 話 ： 白龍門 掌門 使 鐘志靈 叛教 伏法 ， 我 哋 升 呢 個 少年 做白龍 使 啦 。
洪夫人 話 ：好極嘞 。
小兄弟 ， 本教以 教主 為首 ， 下 便 就 係 青 、 黃 、 赤 、 白 、 黑五龍 使 。
好似 你 噉 樣一 入教 就 做 五龍 使 ， 真 係 前所未有 嘅 事 啊 ， 足見 教主 對 你 倚重 之深 嘞 。
小兄弟 ，你 姓 韋 吖 我哋 知道 嘅 ，你 大號 叫做 乜嘢 啊 ？
我 叫做 韋小寶 ，江湖上 有 個 外號 叫做 小白龍 。
哎呀 你 睇 你 睇 ， 呢 個 係 上天 嘅 安排 啊 ， 如果 唔 係 邊處 有 咁 巧 㗎 ？
教主 金口 ，一言既出 ，決不 反悔 。
陸 先生 就 好 急 啊 佢 話 ：韋 公子 ，你 咪 上 佢哋 嘅 當 啊 。
就算 你 做咗 白龍使 ，佢哋 一 唔 鐘意 ，如果 要 殺 你 仲 唔係 易如反掌 咩 ？
白龍 使 鍾志靈 就係 你 嘅 榜樣 嘞 。
你 快啲 去 殺咗 教主 同 夫人 ，大家 奉 你 做 神龍教 嘅 教主 就係 嘞 。
呢句 説話 一 講出嚟 ，人人 都 吃咗 一 驚 。
肥頭陀 、許雪亭 、無根道人 等 都 覺得 呢句 説話 直情 不可思議 。
但係 轉念 一諗 ：如果 唔 奉佢 做 教主 ，噉 教裏 便 就 再 冇 比 白龍 使 更 高 嘅 職位 嘞 。
眼前 情勢 咁 惡劣 ，大家 條命 啊 都 喺 佢 嘅 手 處 ，亦 只有 噉樣 先至 能夠 氹得 佢 去 殺 教主 同 夫人 。
只要 渡過 難關 ，諒 呢個 小小 嘅 細佬哥 就算 真係 做咗 教主 啊 ，亦 走唔甩 大家 嘅 掌握 嘅 。
於是 大家 一齊 話 ：冇錯 ，我哋 一齊 奉 韋公子 做 神龍教 教主 ，大家 對 你 忠心耿耿 。
韋小寶 個 心 諗 ：呢啲 人 個個 武功 高強 ，身上 嘅 毒性 一 解 我 又 點 管得住 佢哋 啊 ？
呢個 係 過橋 抽板 唧 。
佢 笑住 話 ：教主 我 係 做唔嚟 㗎 喇 ，你哋 講埋 啲 噉嘅 説話 ，真係 嚇死 我 啊 。
噉樣啦 ，教主 、夫人 ，大家 言歸於好 ，今日 嘅 事 呢 雙方 都 唔好 計數 喇 。
陸 先生 同 青龍 使 佢哋 冒犯 咗 教主 ，請 教主 寬宏大量 唔 處 佢哋 嘅 罪 。
陸 先生 ，你 攞 啲 解藥 出嚟 啦 ，大家 食 咗 和和氣氣 噉 咪 好囉 。
洪教主 唔 等 陸先生 開口 ，即刻 就 話 ：好 ，一於 噉 話 啦 。
白龍 使 勸 我 哋 和衷共濟 ， 不咎既往 ， 本座 嘉納 忠言 ， 今日 廳 上 一切 犯上作亂 嘅 行 為 ， 本座 一概 赦免 ， 不再 追究 。
韋小寶 好 歡喜 噉 話 ： 青龍 使 ， 教主 應承 嘞 噉 咪 好好 囉 。
陸 先生 睇見 韋小寶 無論如何 呢 係 唔會 去 殺 教主 㗎 嘞 ，就 長歎 一 聲 話 ：
唉 ，既然 係 噉樣 ，教主 、夫人 ，請 你哋 兩位 立 一個 誓 啦 。
洪夫人 話 ：我 蘇荃 決 唔 追究 今日 嘅 事 ，如果 違背 呢句 説話 ，叫 我 身 入 龍潭 ，畀 萬 蛇 咬死 。
洪教主 又話 ：神龍教 教主 洪安通 ，日後 如果 向 各位 老兄弟 清算 今日 嘅 事 ，洪某 身入 龍潭 ，畀 萬蛇 咬死 ，屍骨 無存 。
身入 龍潭 畀 萬 蛇 咬死 ，係 神龍教 裏 便 最 重 嘅 刑罰 。
教主 同埋 夫人 當眾 立 呢個 重誓 雖然 係 為 勢 所逼 ，不過 亦係 決 唔能夠 反口 㗎 嘞 。
陸 先生 話 ：青龍 使 ，你 意下 如何 呢 ？
許雪亭 已經 奄奄一息 嘞 佢 話 ：我 ，我 ，我 橫掂 都 死 㗎 喇 。
陸 先生 又 問 ：無根 道長 ，你 以為 點樣 啊 ？
無根道人 大聲 話 ： 就 係 噉 啦 。
洪教主 本來 係 我哋 老兄弟 ，佢 文才 武功 啊 叻過 第二啲 人 十倍 ，大家 本來 奉 佢 為 主 ，完全 係 冇 兩條心 嘅 。
自從 佢 娶咗 呢位 夫人 之後 ，性格 都 變晒 ，淨係 鐘意 提拔 少年 男女 ，將 我哋 老兄弟 一個個 噉 殘殺 。
青龍 使 呢次 發難 ，只求 係 保住 條命 嘅 啫 ，再冇 其他 嘅 意思 嘅 。
教主 同 夫人 既然 當眾 立誓 ，決唔 追究 今日 嘅 事 ，唔再 肆意 殺害 老兄弟 咯 ，大家 又 何必 反佢 呢 ？
何況 ，神龍教 本來 亦 唔少得 呢位 教主 嘅 。
一班 少年 男女 縱聲 大叫 ：教主 永享 仙福 ，壽 與 天 齊 。
陸 先生 話 ：韋 公子 ，你 冇 飲 雄黃藥酒 唔 中 百花腹蛇 膏 嘅 毒 ，所以 今日 就 成功 嘞 ，冥冥之中 自有 天意 啊 。
要解咗 呢啲 毒 好 容易 嘅啫 ，你 去 外便 𢳂啲 冷水 嚟 喂畀 各人 飲咗 就 得㗎 喇 。
韋小寶 笑住 話 ：哈 呢啲 毒 原來 咁 容易 解 㗎 咋 。
行到出去大廳外便 ，搵唔到 冷水 。
噉啊兜到廳後 ，見到 一排 放住 二十幾隻 大水缸 ，都 裝滿晒 清水 嘅 ，原來 係 防備 竹廳 火燭 用 嘅 。
噉就 挽咗 滿滿 一桶 清水 返 入 大廳 ，先 𢳂 一殼 餵畀 教主 飲咗 ，其次 呢 餵畀 洪夫人 。
第三 殼 就 餵 畀 無根道人 嘞 佢 話 ： 道長 ， 你 係 英雄好漢 啊 。
第四 第五 殼 就 餵畀 肥頭陀 同 陸 先生 ，第六 殼 呢 ，就 餵畀 沐劍屏 喇 。
各人 飲咗 啲 冷水 之後 就 嘔吐 ，慢慢慢慢 ，手腳 可以 逳動 得 喇 。
韋小寶 就 餵咗 幾個人 之後 ，陸先生 已經 可以 起身 行走 ，就 過去 扶起 青龍使 許雪亭 ，同 佢 止血 治傷 。
肥頭陀 佢哋 呢 分別 去 挽 冷水 嚟 ，畀 啲 好兄弟 飲 。
冇 幾耐 ，沐劍屏 又 救咗 幾名 紅衣 少女 。
一時之間 大廳 上 嘔吐 狼藉 啊 臭不可聞 啊 。
洪夫人 話 ：大家 返去 休息 呢 ，聽日 再 嚟 聚會 。
洪教主 話 ：本座 既然 不咎既往 咯 ，眾兄弟 亦 唔好 因為 今日 嘅 事 ，互相 爭吵 尋仇 ，違者 重罰 。
五龍 少年 唔准 對 掌門 使 不敬 ，掌門使 亦 唔 可以 搵 啲 理由 嚟 處置 本門 少年 㗎 。
噉啊眾人齊聲奉令 ，但係 彼此 猜疑 啊 到底 好難 消除 。
洪夫人 話 ：白龍 使 你 跟 我 嚟 啦 。
韋小寶 仲 唔 知道 佢 係 嗌 自己 噃 ，噉 見到 佢 擪 手 嘞 ，噉 先至 想起 自己 已經 做咗 神龍教 嘅 白龍 使 ，就 跟住 過去 。
教主 同 夫人 並肩 噉 行 出咗 大廳 。
已經 可以 行動 嘅 教眾 都 躬身 行禮 ，高聲 話 ：
教主 永享 仙福 ，壽 與 天 齊 。
教主 同 夫人 順住 一條 青石板路 ，向住 竹廳 嘅 左手 便 行 ，噉啊 穿過 一大片 竹林 ，嚟到 一個 平台 上 便 。
台上面 起咗 幾間 大竹屋 ，有 十幾名 分別 着住 五色 衣服 嘅 少年男女 ，揸住 把 長劍 喺 前後 把守 ，見到 教主 一齊 躬身 行禮 。
洪夫人 帶 韋小寶 行 入 竹屋 ，向 一 名 白衣 少年 話 ：
呢位 韋公子 係 你哋 白龍門 新任 嘅 掌門使 ，你 帶 佢 去 東廂房 休息 ，你哋 要 好好 服侍 佢 。
講完 ，向 韋小寶 笑一笑 就 行入 內堂 嘞 。
幾名 白衣 少年 躬身 向 韋小寶 話 ：屬下 少年 參見 座 使 。
韋小寶 喺 皇宮 裏頭 就 做慣咗 首領 太監 ，喺 天地會 呢 又 做慣咗 香主 ，啲 人 對 佢 恭敬 已經 毫不 在乎 喇 ，只係 岌一岌 頭 唧 。
幾名 白衣 少年 帶 佢 去 東廂房 ，獻咗 茶 。
雖然 話 呢間 係 廂房 啊 ，不過 就 十分 寬敞 ，陳設 又 雅潔 。
枱上 架上 啊 擺滿咗 金玉 古玩 ，牆壁 上 掛住 字畫 ，床上 邊啲 被褥 呢 非常之 華美 ，居然 有 啲 皇宮 嘅 派頭 啊 。
幾名 白衣 少年 見到 洪夫人 嘅 説話 神情 ，顯然 係 對 韋小寶 極之 睇得起 嘅 ；
而 教主 呢間 仙福居 呢 ，係 從來 冇 外人 喺 呢處 住宿過 ，白龍 使 享受 呢個 殊榮 ，噉 地位 就 高過 其他 四使 嘞 。
呢啲 少年 喺 呢度 守衛 ，就 唔 知道 先頭 大廳 嘅 變故 ，但係 見到 韋小寶 位 尊 得 寵 ，噉 一個個 都 過嚟 大獻殷勤 。
當日下午 ，韋小寶 問 嗰 幾 名 白衣 少年 關於 五龍門 嘅 各種 規矩 。
原來 ，神龍教 下 便 分 五門 ，每 一門 統率 幾十名 老兄弟 ，一百名 少年 ，幾百名 平常 教眾 。
掌門 使 本來 都 係 神龍教 裏 便 立過 大功 嘅 高手 宿將 ， 但 係 教主 近來 全力 提拔 新秀 ， 往往 二十歲 左右 嘅 人 呢 ， 就 出任 要職 嘞 ， 地位 僅僅 係 低過 掌門 使 嘅 啫 。
所以 韋小寶 年紀 雖然 係 細 啊 ，啲 人 呢 都 唔 覺得 奇怪 。
第日 ，洪教主 同 夫人 又 喺 大廳 召集 會眾 。
各人 都有 啲 惴惴不安 嘞 ，教主 啊 雖然 已經 立誓 唔再 追究 啊 ，但係 佢 城府 極 深 ，邊個 都 估唔到 佢 會 有 咩嘢 厲害 嘅 手段 使出嚟 。
教主 同 夫人 升座 。
韋小寶 呢排 喺 五龍使 嘅 班次 第四 位 ，喺 肥頭陀 同 陸 先生 之 上 。
洪教主 問 ：青龍 使 嘅 傷勢 點 啊 ？
陸 先生 躬身 話 ：啟稟 教主 ，青龍 使 傷勢 唔 輕 ，條 命 保 唔 保得住 而家 仲 好 難 講 。
教主 喺 身邊 攞咗 一個 深紅色 嘅 小瓷瓶 出嚟 佢 話 ：
呢度 係 三粒 天王保命丹 ，你 攞 去 畀 佢 食 啦 。
講完 ，亦 唔見 佢 逳手 ，嗰個 瓷瓶 呢 就 向住 陸 先生 身邊 慢慢 飛過去 。
陸 先生 連忙 伸手 接住 跪喺 地 話 ：多謝 教主 大恩 。
佢 知道 呢啲 天王保命丹 係 十分 難得 嘅 ，喺 教主 派遣 部下 采集 無數 珍奇 嘅 藥材 制煉 而成 。
其中 嘅 三百年 老山人參 、白熊膽 、雪蓮 等等 呢 幾 種 藥材 尤其是 難得 。
教主 用咗 好多 年 心力 所練成 嘅 前後 不過 十幾 粒 唧 。
許雪亭 一 食 呢 三粒 靈丹 ，條命 就 冇事 喇 。
噉 其餘啲 老兄弟 都 躬身 多謝 ，佢哋 諗 ：
青龍 使 尋日 衝撞 教主 ， 仲立心 要害 佢 條 命 。
今日 教主 反而 賜 咁 珍貴 嘅 藥 畀 佢 食 ， 睇 嚟 教主 的的確確 係 不咎既往 嘞 。
於是 個個 都 好 欣慰 。
本來 人人 都 嚴加 戒備 嘅 ，呢個 時候 ，都 現出 笑容 喇 。
洪夫人 話 ：白龍使 ，聽講 你 喺 五台山 見到 一塊 石碑 ，碑上 刻住 蝌蚪 文字 嘅 係嘛 ？
韋小寶 躬身 話 ：係啊 。
肥 頭陀 話 ： 啟 稟 教主 、 夫人 ， 屬下 拓 咗 張 碑文 啊 。
喺 身邊 攞出 一個 油紙包 ，打開 佢 ，攞出 一張 好大 嘅 拓片 ，掛 喺 東便埲 墻 處 。
拓片 黑底白字 ，啲 文字 啊 稀奇古怪 嘞 冇 人 識得 嘅 。
洪夫人 話 ：白龍使 ，你 如果 識得 呢啲 文字 就 讀 畀 大家 聽 下 啦 。
係 。
韋小寶 應咗 ，就 望住 張 拓片 ，大聲 背誦 陸 先生 作出嚟 嗰 篇 文章 嘞 。
維大唐貞觀二年十月甲子 ，慢慢噉 一路 背落去 。
偶然 唔記得 喇 就 話 ：吖 呢個 係 咩嘢 字 呢 真係 難認 喇 。
係喇係喇 ，係 個 魔字 。
當 佢 背到 仙福永享 ，普天 崇敬 ，壽 與 天 齊 ，文武 仁 聖 嗰 四句 嘅 時候 ，佢 將 佢 改咗 一 改 。
話係 ：仙福永享 ，連同 夫人 ，壽與天齊 ，文武仁聖 。
洪夫人 一 聽到 呢 四個 字 眉開眼笑 話 ：
教主 ，碑文 裏 便 果然 係 有 我 嘅 名 噃 ，唔係 白龍 使 生安 白 造 㗎 。
洪教主 亦 十分 高興 嘞 佢 話 ：
好 ， 好 ！ 我 哋 上 邀天眷 ， 創落 呢 個 神龍教 原來 大 唐貞觀 年間 ， 上天 已經 有 預示 㗎 喇 。
廳上 教眾 齊聲 高呼 ：教主 仙福 永享 ，壽 與 天 齊 。
無根 道 人 呢 班 老兄弟 都 驚 喇 ，佢哋 諗 ：
教主 同 夫人 上應 天象 ， 真 係 唔 能夠 冒犯 㗎 。
噉韋小寶 最後 將 八部 四十二章經 喺 邊度 嘅 地方 都 逐一逐二 講咗出嚟 嘞 。
洪夫人 話 ：聖賢 豪傑 ，惠民 救世 ，固然 上天 早 有 安排 啦 ，就係 連 吳三桂 呢啲 人 ，老天爺 都 算定 㗎 喇 。
教主 ，呢 八部 寶經 ，註定 係 屬於 本教 所有 嘅 ，遲早 ，都 會 係 我哋 神龍教 嘅 。
教主 捋下 啲 鬍鬚 微微 笑話 ：夫人 講得 啱 。
班人 又 大叫 嘞 ： 壽與天 齊 ， 壽與天 齊 ！
等啲人靜翻喇 ，洪教主 話 ：
而家 開 香堂 ，封 韋小寶 為 本 教 白龍門 掌門 使之職 。
神龍教 開 香堂 同 天地會 嘅 儀式 又 有 唔同 嘞 。
韋小寶 見 香案 上 便 放住 五 隻 黃金 盤 。
每個 盤 上 便 都 裝住 一條 蛇仔 ，分為 青 、黃 、赤 、白 、黑 五色 。
五條 蛇仔 昂起 個 頭條脷 啊 一伸一縮 ，個身 呢 ，就 盤住 唔逳 嘅 。
韋小寶 拜過 五色 神龍 ， 就 向 教主 同 夫人 叩頭 ， 接受 無根道人 等 人 嘅 祝賀 。
洪夫人 斟 咗 三 杯 雄黃酒 叫 佢 飲咗 ，笑住 話 ：
飲咗 呢 三杯 酒 ，島上 嘅 神龍 就 知道 你 係 自己人 ，以後 再 唔會 嚟 咬 你 㗎 喇 。
教主 又 賜 咗 一串 雄黃 珠 畀 佢 ， 叫 佢 貼 肉 掛 喺 身邊 ， 百毒不侵 。
噉 跟住 白龍門 本門 嘅 執事 同 少年 一齊 嚟 參見 掌門 使 。
教主 吩咐 話 ： 青龍 掌門 使 因病 休養 ， 肥 頭陀 拓 啲 碑文 有功 ， 青龍門 事務 ， 暫時 由肥 頭陀 代理 。
等 青龍 使 好 翻 嘞 ，再 行 接掌 。
肥頭陀 躬身 奉令 。
教主 又 話 ： 五龍 使同 陸高軒 六個 人 ， 一齊 去後廳 議事 。
講完 ，就 同埋 夫人 離座 行 嘞 。
廳 上 班人 高呼 恭送 。
無根道人 、 韋小寶 、 肥 頭陀 、 陸先生 等 人 都 跟 住 教主 後 便 。
韋小寶 而家 先 知道 原來 陸 先生 個 名 叫做 陸高軒 。
嗰個 後廳 就 喺 大廳 後便 ，廳堂 唔係 好 大 㗎啫 ，當中 兩張 大 竹椅 ，教主 同 夫人 就座 。
下便 呢 就 擺咗 五張 矮凳 ，三位 掌門 使 啊 分別 坐低 。
肥頭陀 亦 坐咗 一張 佢 話 ：白龍 使 請 坐 。
韋小寶 見 陸 先生 冇 座位 就 有啲 遲疑 嘞 。
陸 先生 微笑 話 ：白龍 使 請坐 ，潛龍 堂 裏 便 ，冇 我 呢啲 閒職 教 眾 嘅 座位 嘅 。
韋小寶 諗住 規矩 係 噉㗎喇 ，肥頭陀 如果 唔係 代理 青龍使 呢 亦 都 冇 座位 ，咪 即刻 就 坐低 。
陸 先生 企 喺 黑龍 使 下 首便 。
突然間 ，殷錦 等 四個人 都 企起身 ，韋小寶 不明所以 啊 不過 都 跟住 企起身噉 。
只聽見 殷錦 同 陸 先生 等 五個人 齊聲 噉 念 ：教主 寶訓 。
韋小寶 即刻 跟住 念落去 嘞 ：時刻 在 心 ，制勝 克敵 ，無事 不成 。
佢 把 細佬 哥聲 呢 特別 尖 嘅 ，比 嗰 五 個 人 啊 更加 大聲 啲 。
洪教主 岌一岌頭 ，五個人 噉 先至 坐翻低 。
洪教主 話 ：碑文 裏 便 講 ，呢 八部 四十二章經 分散 喺 各地 。
但係 黑龍 使 報告 話 其中 四部 係 喺 皇宮 裏邊 ，噉 又 咩嘢 緣故 呢 ？
黑龍 使 話 ： 睇 嚟 ， 呢 四部 經書 本來 喺 少林寺 、 沐 王府 等等 嘅 地方 嘅 ， 收尾 畀 清廷 搶 咗 入 去 皇宮 嘞 。
教主 唔 出聲 ， 黑龍 使 慢慢 慢慢 怕 起 上 嚟 喇 。
洪教主 問 肥頭陀 話 ：你 師兄 有冇 消息 回報 啊 ？
肥頭陀 恭恭敬敬 噉 話 ：
啟稟 教主 ，瘦頭陀 以前 曾經 講過 ，喺 鑲藍旗 旗主府 裏 便 ，查到 一啲 線索 ，不過 收尾 ，再 查唔出 咩嘢 喇 。
韋小寶 心中 一動 ：鑲藍旗 旗主 府裏 便 ？嗰度 唔係 陶阿姨 嘅 師父 去過 嘅 地方 咩 ？
啊 原來 肥頭陀 仲 有 個 師兄 叫做 瘦頭陀 嘅 。
只聽見 洪教主 話 ：你 話 我 吩咐 佢 盡快 追查 ，唔好 咁 懶散 。
肥頭陀 一味 答話 ：係係係 。
過咗 一陣嘞 ，洪夫人 微笑 話 ：
黑龍 使 派 人 去 皇宮 攞 經書 ，據 佢 自己 講 已經 竭盡全力 㗎喇 ，不過 直到 今日 ，一部 經書 都 冇 攞翻嚟 。
呢件事 ，我哋 恐怕 要 另外 派 一個 福分 大啲 嘅 人 去 做 喇 。
黃龍 使 殷錦 連忙 話 ：夫人 高見 啊 。
誒攞 經書 嘅 事 ，睇嚟 同 福分 大小 關係 好 大 嘅 。
黑龍使 亦 唔係 唔 努力 ，唔肯 同 教主 立功 。
但係 始終 阻難重重 ，多數 係 福氣 唔夠 啫 ，所以 寶經 難以 到手 啊 。
洪夫人 話 ：照 你 睇 ，邊個 嘅 福分 夠 呢 ？
嗱 各位 ，欲知 後事 如何 ，且 聽 下回 分解 。
