前文 再續 啊 書 接 上 一回 啊 。
話說 韋小寶 呢 點 都 唔 肯 去 神龍島 ，肥頭陀 冇 辦法 嘞 。
噉 分別 嘅 時候 ，韋小寶 話 ：大師 行 先 啦 。
佢 似乎 係 客氣 啊 ，其實 係 要 肥頭陀 行 先 ，佢 如果 向 東 行 呢 ，自己 就 向 西 ，佢 如果 向 北 ，自己 就 向 南 。
但係 肥頭陀 擰擰頭 佢 話 ：施主 行先 啦 ，我 要 將 呢個 石碑 上面 嘅 碑文 拓翻 去 啊 。
韋小寶 偷笑 嘞 ，佢 諗 ：自己 亂咁 吹 嘅 啫 ，居然 呃到 佢 信以為真 喎 。
拓 ，即係 喺 刻注咗 文字 圖像 嘅 物件 上 便 啊 ，蒙 上一層 紙 ，捶打 之後 凹凸分明 ，塗上 墨 ，就 顯出 文字 同 圖像 呢啲 叫做 拓 。
嗰張 紙 呢 ，就 叫做 拓片 嘞 。
話說 十八 少林僧 同埋 韋小寶 、雙兒 就 落咗 錦繡峰 。
澄心啊 將 經書 還畀 韋小寶 ，佢 問 ：施主 係唔係 即刻 返去 北京 啊 ？
韋小寶 話 ：係啊 。
玉林大師 囑咐 我哋 ，要 護送 施主 平安 返去 北京 啊 。
哈好極嘞 ，我 正係 擔心 嗰個 好似 竹篙 噉 嘅 頭陀 ，仲 唔 死心 啊 又 試 嚟 啰嗦 。
誒不過 ，不過 各位 同 我 一齊 返 北京 ，行癡 大師 有冇 人 保護 啊 ？
施主 放心 啦 ，玉林 大師 另有 安排 。
韋小寶 呢個 時候 對 玉林 呢個 老和尚 啊 已經 十分 佩服 。
佢 閉目 打坐 ，似乎 天塌落嚟 都 唔理 ，其實 呢 就 不動聲色 ，喺 暗中 一切 都 佈置 得 妥妥當當 。
噉既然 有 少林 十八 羅漢 護送 ，一路上 梗係 一啲 兇險 都 冇 啦 。
嗰個 身材 又 高 又 瘦 嘅 肥頭陀 固然 係 冇 出現 啊 ，連 其餘 嘅 武林 人物 一個 都 冇 撞見 。
噉 呢 一日 嚟到 北京城 外 嘞 ，十八 少林僧 同 韋小寶 行禮 告別 。
澄心話 ：施主 已經 返到 京城 ，老僧 等 告辭 。
韋小寶 話 ：各位 大和尚 ，真係 多得晒 你哋 不辭辛苦 ，一直 送 我 嚟 呢度 ，我 ，唉 我 實在 係 感激不盡 ，請 受 我 一拜 。
講完 跪低 叩頭 。
澄心 啊 連忙 扶起 佢 ：
施主 一路上 款待得 咁好 ，我哋 由 山西 嚟到 北京 乃係 遊山玩水 啫 ，邊度 算得 係 辛苦 吖 ？
原來 韋小寶 一 落 五台山 啊 ，就 請咗 十九 架 大車 ，自己 同 雙兒 啊 坐 一 架 ，十八 位 少林 僧 一個人 坐 一 架 。
又叫 于 八 騎馬 行先 ，噉 就 早 一日 打前站 ，沿途 訂好 客店 ，預備 名茶 細點 齋菜 ，極之 豐盛 。
噉到咗 每一笪 地方 呢 ，韋小寶 就 猛咁 打賞 ，啲 掌櫃 同 夥記 啊 將 十八位 少林 僧 當做 天神 菩薩 一樣 噉 款待 。
少林僧 係 清苦 修持 原來 一啲 都 唔 貪圖 呢啲 好飲好食 嘅 ，但係 見 佢 咁 敬重 而且 好 誠心 ，所以 呢 都 好 歡喜 。
韋小寶 個人 雖然 係 油腔滑調 言不由衷 啊 ，但係 佢 天生 鐘意 交朋友 ，同人哋 結交 呢 ，係 一番 好心 嘅 。
一路上 同班 和尚 傾傾講講 好合得嚟 ，忽然間 話 要 分別 喎 ，個心 一酸 ，不禁 流出 眼淚 。
澄心話 ：善哉善哉 ！小施主 唔使 難過 嘅 ，第日 如果 有緣 ，請 到 少林寺 嚟 相聚 。
韋小寶 哽噎住 話 ：嗯 ，我 ，我會去嘅 ，我會去嘅 。
澄心 同埋 眾僧 告辭 就 走咗 喇 。
入咗 北京城 ，天色 已經 好 晏 嘞 ，就 不便 入 宮 。
韋小寶 去到 西正門 一 間 大 客店 如 歸 客棧 就 開咗 間 上房 ，就 準備 過咗 一 晚 之後 呢 ，聽日 去 見 康熙 ，奏明 一切 。
佢 諗 ：嗰個 肥頭陀 搏命 想 搶 我 呢部 經書 ，嗯 ，講唔定 啊 仲 暗中 跟住 我 嘅 。
十八位 少林 和尚 走咗 咯 ，佢 再 嚟 逳手搶 ，我 同 雙兒 就 頂唔住 㗎 嘞 噃 。
咪喇咪喇 ，仲係 麻煩 一啲 ，將 經書 收好 先 ，聽日 入宮 帶領 大隊 侍衞 嚟 攞 就 呈畀 小皇帝 ，噉 就 叫做 萬失無一 喇 。
於是就叫 于八 去 買齊 應用 嘅 嘢 ，叫 雙兒 出咗 去 ，閂實 道門 。
喺 閂窗 之前 呢 ，先 查明 窗外 並冇 肥頭陀 窺探 喇 ，噉 先至 用 油布 將 嗰部 四十二章經 包好 ，拉開 張 枱 ，攞 把 匕首 出嚟 ，喺 枱底 嘅 磚牆 上面 挖 個 窿 。
嗰 把 匕首 啊 削 鐵 如 泥 嘅 ，挖 墻窿 啊 當然 係 毫不 費力 嘞 。
噉 將 經書 放入 墻窿 ，堆翻 好啲 磚 ，又 攞 啲 水 化開 石灰 ，抿翻 磚罅 。
噉等到 石灰 乾咗 之後 ，如果 唔係 特登 去 搵 呢 就 點 都 唔會 發現 嘅 。
第日一早 ，咪叫 于 八 去 套車 ，佢 要 先 帶 雙兒 去 食 一 餐 豐盛 嘅 早餐 ，噉 擺下 闊佬 ，等 呢個 小丫鬟 大開眼界 。
然後呢 ，就 去 買 套 太監 衣服 着住 然後 入 宮 。
呢 市面 上 要 買 太監 衣帽 就 好 難 嘅 。
噉 如果 買唔到 呢 ，索性 就 着 侍衞服飾 ，再 趕 做 一件 黃馬褂 套 上去 嗰陣時 威風凜凜 ，大搖大擺 噉 入 宮 。
要 嗰班 侍衞 太監 睇下 ，睇到 口擘擘 眼定定 ，嘿過癮咯 。
自己 呢個 御前侍衞 副總管 係 皇上 親自 封 嘅 又唔係 假 嘅 。
佢 諗 ：一於 係 噉 話 啦 ，仲 做 乜鬼嘢 太監 吖 ，老子 着 黃馬褂 入 宮 。
噉佢 同 雙兒 啊 上咗 騾車 ，噉 佢 話 ：
我哋 先 去 西單 老魁星館 ，嗰度 嘅 炸羊尾 、羊肉餃子 都 食得下 嘅 。
噉 個 車夫 恭恭敬敬 應 一 聲 ：係 。
于 八 挺直 條 腰 ，坐 喺 車夫 嘅 側 跟 ，噉 佢 話 ：
哈 ，京城 啊 ，連 隻 騾仔 都 與眾不同 嘅 ，好似 呢 隻 咁 靚 嘅 叫 騾 ，我哋 山西 全省 都 搵唔出 一隻 。
韋小寶 功成 回京 ， 哎個 心 啊 ， 都 唔 知 幾 得意 啊 。
嗰架 騾車 行咗 一陣 ，忽然 就 出咗 西直門 。
韋小寶 話 ： 喂 ， 係 去 西單 啊 ， 點解 出 咗 城 啊 ？
個 車夫 話 ：係 ，係啊 ，啊 對唔住 啊 大爺 。
小人 呢隻 驢 呢 就 啲 脾氣 好 犟 嘅 ，去到 城門口 一定 要 行 出 城 兜 個 圈 至 得 嘅 。
韋小寶 同 雙兒 都 笑嘞 。
于八話 ： 嗨 ， 京城 裏 便連 騾仔 都 有 官架子 㗎 喎 。
噉 啊 大車 出 咗 城 之後 一直 向 北行 ， 行 咗 里 幾路 仲 唔 翻 轉頭 。
韋小寶 知道 事 有 蹺蹊 嘞 就 喝 個 車夫 話 ：喂 ，你 搞 咩鬼 啊 ？快啲 返去 啦 。
哦 ， 哦哦哦 哦 哦 ， 翻 轉頭 ， 翻 轉頭 。
車夫 猛咁 喝 隻 騾仔 ，又 叫 又 鞭 。
但係 隻 騾仔 一味 向住 北 便 跑 ，越 跑 越快 。
個 車夫 啊 破口大罵 啦 ，嗰 隻 騾仔 係 睬 你 都 傻 啊 ，繼續 猛 咁 跑 。
就喺呢個時候 ，有 兩 騎馬 喺 旁邊 衝上嚟 ，貼住 個 騾車 旁邊 ，騎馬嘅 係 兩名 身材 魁梧 嘅 漢子 。
韋小寶 低聲 話 ：逳手 啦 。
雙兒 即刻 用 手 向 前 一 督 ，督正 車夫 後 腰 。
車夫 個 身 一晃 ，就 𢴈咗 落 車 ，大叫 一 聲 ，畀 車 旁邊 隻 馬 踩到 正 。
馬上 嘅 漢子 飛身而起 ，坐 喺 車夫 嘅 位處 。
雙兒 又 用 手指 督 佢 。
呢個人 反手 揦 佢 手腕 ，雙兒 手掌 一翻 ，拍 佢 個 面門 。
嗰個 漢子 用 左 掌 隔開 ，就 右手 揦 佢 膊頭 。
噉 兩個人 呢 就 拆咗 八九 招 。
啪一聲 ，車上 嘅 漢子 心口 畀 雙兒 右掌 打中 ，飛身 跌咗 落地 。
另外一名 馬上 漢子 揮 鞭 打過嚟 ，雙兒 一手 揸住 條 鞭 ，順手 就 纏 喺 架 車 上 便 。
架騾車 呢 正在 向前 猛咁 跑 ，一拉 ，嗰個 漢子 當堂 𢴈咗 落馬 ，連忙 放開 條 鞭 就 哇哇聲 咁 叫 。
雙兒 攞起 騾仔 條 韁繩 ，噉 佢 唔會 趕車 啊 ，交咗 畀 于八 佢 話 ：你 嚟 趕車 啦 。
于八話 ：我我我 ，誒 我我 都 唔 會 㗎 。
韋小寶 跳 上 車夫 嘅 座位 ，接過 韁繩 。
不過 佢 亦都 唔會 趕車 嘅 ，佢 學 車夫 得儿 、得儿 噉 叫咗 幾 聲 ，左手 鬆 韁 右手 緊 韁 ，就 好似 騎馬 一樣 。
嗰隻 騾仔 啊 果然 翻轉頭 嘞 ，嘿 ，隻 騾仔 啊 邊度 係 脾氣 犟 吖 ？
呢陣時 ，又 有 十幾 騎馬 就 追住嚟 。
韋小寶 好 驚啊 ，噉 啊 拉 隻 騾仔 向 斜路 上面 跑 。
嗰 十幾 匹 馬 呢 就 搏命 喺 後 便 跟 。
馬 快車 慢 ，冇 幾耐 ，十幾 騎馬 就 將 騾車 沊沊𡃈噉 圍住 嘞 。
韋小寶 見 馬上 漢子 都 揸住 兵器 嘅 就 話 ：青天白日 ，喺 天子 腳下 你 想 攔路 搶劫 啊 ？
一名 漢子 笑住 話 ：我哋 係 請客 嘅 使者 唔係 打劫 嘅 賊 。
韋公子 ，我哋 主人 請 你 去 飲杯酒 啊 。
吓 ？你哋 主人 係 邊個 啊 ？
公子 見咗 面 嘞 就 識㗎喇 。
我哋 主人 如果 唔係 公子 嘅 朋友 ，點 會 請 你 去 飲酒 呢 ？
韋小寶 見 呢啲 人 古古怪怪 ，多數 都 不懷好意 㗎喇 就 話 ：
邊度 有 噉樣 請客 㗎 ？唔該 ，讓 條 路 行 啦 。
另外一名 大漢 笑住 話 ：讓路 就 讓路啦 。
手起一刀 ，斬咗 個 騾頭 ，噉 騾尸 啊 跌 喺 地 ，連 騾車 都 帶 倒埋 。
韋小寶 同 雙兒 啊 即刻 跳 落 地 。
雙兒 出手 如 風 啊 ，不過 敵人 係 騎住 馬 ，佢 身材 又 矮細 就 打唔到 敵人 。
所以 佢 連 用 手指 啊 督 出去 ，唔係 督盲 咗 隻 馬眼 呢 ，就係 督中 敵人 大髀 嘅 穴道 。
一時間 人 叫 馬 嘶 。
幾名 漢子 就 跳落 馬 ，揮刀 上前 咯噃 。
雙兒 身手 靈活 到 極 啊 ，指 東 打 西 ，又 打低 咗 七八 名 漢子 。
其餘 嗰 四五 個 人 呢 ，互相 望 下 ，都 唔知 點 好 嘞 。
呢個 時候 ，喺 條 路 處 一 架 車 飛馳 而 來 ，車上 便 一 個 女子 叫 ：係 自己人 啊 唔好 打 喇 ！
韋小寶 一 聽見 把 聲 ，即刻 心花怒放 佢 話 ：吖哈 我 老婆 嚟喇 。
雙兒 同埋 班 漢子 即刻 停手 唔打 嘞 。
雙兒 非常之 驚訝 ，佢 完全 冇 估到 呢位 相公 已經 娶咗 少奶 。
冇 錯當 其時 盛行 早婚 啊 ， 男仔 十四五歲 娶 老婆 係 司空見慣 㗎 ， 不過 韋小寶 從來 冇 同 佢 講 過 已經 有 咗 老婆 吖 。
架車 跑 到 面前 嘞 ， 有 個人 跳 落地 ， 係 方怡 啊 。
韋小寶 笑容滿面 ，迎上去 拉住 佢 隻手 佢話 ：好姐姐 ，真係 想到 我 死 啊 ，你 去咗 邊處 啊 ？
方怡微微笑話 ：慢慢先至講啦 。點解 你哋 會 打起上嚟嘅 ？
佢 睇 下 地下 趢 咗 咁 多人 喺 處 ，騾 血 灑 到 滿 地 都 係 都 好 驚奇 。
一名 漢子 躬身 話 ：方 姑娘 ，我哋 嚟 請 韋 公子 去 飲酒 ，實係 大家 唔夠 恭敬 得罪 咗 公子 嘞 。
方 姑娘 親自 嚟 請 噉 啊 最好 啦 。
方怡 對 韋小寶 話 ：呢啲 人 都係 你 打低 嘅 咩 ？你 嘅 武功 進步 好 大 噃 。
韋小寶 話 ：要 進步 都 冇 咁快 吖 ，雙兒 姑娘 為 咗 保護 我 ，小顯身手 啫 。
方怡望 下 雙兒 ， 見 佢 不過 十四五歲 唧 ， 嬌滴滴 噉 ， 真 係 唔 信 佢 武功 咁 高強 嘅 就 問 佢 ： 妹妹 貴姓 啊 ？
因為 佢 喺 莊家 嘅 時候 啊 未見過 雙兒 ，所以 兩個人 呢 就 互不 相識 。
雙兒 上前 跪低 叩頭 佢 話 ： 奴婢 雙兒 叩見 少奶 。
韋小寶 哈哈大笑 啊 。
方怡 就 醜 到 滿面 通紅 連忙 閃開 唔肯 受禮 ：你 ，你 ，你 叫 我 做 咩嘢 唧 ？
我 ，哎呀 我唔係㗎 。
雙兒 企 翻 起身 佢 話 ：
相公 話 你 係 佢 嘅 夫人 ， 奴婢 服侍 相公 ， 梗 係 叫 你 做 少奶 啦 。
方怡 出力 噉 矋 咗 韋小寶 一眼 。
佢 呢個 人 啊 成日 亂咁 講 嘅 唔好 信 佢 啊 。
你 服侍 咗 佢 幾耐 啊 ？唔通 仲 唔知道 佢 嘅 脾氣 咩 ？
我 係 方 姑娘 。
雙兒 微微 一笑 佢 話 ：而家 暫時 唔叫 ，以後 先至 叫啦 。
方怡 話 ：以後 再 叫 咩 ？
塊面 又 試 紅 起上嚟 嘞 ，唔 講 嘞 。
雙兒 睇下 韋小寶 ，見到 佢 一副 得意洋洋 嘅 神情 ，突然之間 ，佢 亦係 滿面 通紅 嘞 。
因為 佢 諗起 喺 五台山 嘅 時候 ，佢 曾經 同 肥頭陀 話 自己 係 佢 老婆 。
嗯 原來 佢 鐘意 叫 嗰啲 年輕 姑娘 做 老婆 嘅 。
跟住 韋小寶 又 問 嘞 ：我 嗰個 小老婆 呢 ？
雙兒 呢次 呢 就 不以為奇 喇 。
方怡 又 矋咗 佢 一眼 話 ：唔見咗 咁 耐 一見面 都 冇 句 正經 嘅 ，一味 口花花 。
於是就 吩咐 班 漢子 收拾 起程 。
嗰啲 漢子 畀 雙兒 點 咗 穴道 嘅 唔 逳得 ，由 雙兒 去 幫 佢哋 解開 。
韋小寶 笑住 話 ：早知道 你 請 我 飲酒 啊 ，我 恨不得 生 對翼 飛住 去 啊 。
方怡 又 矋咗 佢 一 眼 話 ：
你 一早 就 唔記得咗 我 喇 ，梗係 諗唔到 係 我 請 你 啦 。
韋小寶 個 心 啊 甜 一 甜 ：我 點 會 唔 記得 你 唧 ？一陣 都 唔 會 啊 。
早知 係 你 叫 我 啊 ，咪 講話 飲酒 啊 ，就係 飲 馬尿 、飲 毒藥 ，我 都 係 隨傳隨到 啊 。
嗱唔好講得咁好聽住 ，如果 我 請 你 去 天涯海角 飲 毒藥 呢 ？
韋小寶 見 佢 講説話 個 時候 似 笑 非 笑 ，嗰 種 靚法 啊 真係 講唔出 ，只 覺得 全身 暖笠笠 ，佢 話 ：
咪 講話 天涯海角 啦 ，就係 上刀山 落油鑊 我 都 去 啊 。
好 ，大丈夫 一言既出 ，嗰隻 馬 難追 。
韋小寶 出力 拍下 心口 大聲話 ：大丈夫 一言既出 ，嗰隻馬 難追 。
講完 兩個人 同時 笑起上嚟 嘞 。
方怡 叫 人 牽 咗 匹 馬 畀 韋小寶 騎 ，噉 啊 叫 雙兒 坐 佢 自己 嚟 嗰 架 車 。
自己啊 騎馬 同 韋小寶 一拍 行 ，噉 啊 迎住 朝陽 慢慢 噉 跑 ，班 漢子 呢 就 跟住 喺 後 便 。
方怡話 ：你 嘅 本事 真係 大噃 ，落咗 咩 嘴頭 收咗 一個 武功 咁 使得嘅 小丫鬟 啊 ？
韋小寶 話 ：落咩 嘴頭唧 ，係 佢 心甘情願 跟 我 嘅 。
韋小寶 跟住 問起 沐劍屏 、徐天川 佢哋 嘅 行蹤 ，佢 話 ：
喺 嗰間 鬼屋 裏 便 ，你 唔係 畀 神龍 教 嗰批 傢伙 捉住 嘅 ，噉 收尾 點樣 脱險 㗎 ？
係咪 莊家 三少奶 請 人 嚟 救翻 你哋 㗎 ？
邊個 係 莊家 三少奶 啊 ？
唔係 嗰間 屋 嘅 主人 囉 。
方怡 擰 擰 頭話 ： 間 屋 嘅 主人 ？ 我 哋 一直 都 冇 見到 啊 。
神龍教 要 搵 嘅 係 你 ， 佢 哋 對 你 呢 亦 冇 惡意 嘅 ， 嗰 個 章老三 搵 你 唔 到 就 放 咗 我 哋 嘞 。
小郡主 佢哋 就 喺 前便 啊 冇 幾 耐 就 會 見到 㗎 喇 。
你啊 ，個心 一味 掛住 小郡主 ，見面 先至 一陣 唧 ，就 問咗 七八次 嘞 。
哈哈 ，幾時 問過 七八次 唧 ，真係 冤枉 人 啊 你 。
如果 我 見到 佢 ，見唔到 你 啊 ，而家 我 問咗 七八十 次 就 真 。
你就算係有十個嘴啊 ，一陣間 咁耐 都嚟唔切 問 七八十次 啦 。
不過 你 啊 ， 一個 嘴比 十個 嘴仲 厲害 啊 。
噉 兩個人 傾傾 講講 ，冇 幾 耐 呢 就 行咗 十幾里 ，早 就 繞過 咗 北京城 一直 向住 東便 行 。
韋小寶 話 ： 就 快 到 未 啊 ？
方怡 唔 高興 喇 ：仲要 行 好 遠 啊 ，你 掛住 小郡主 都 唔 使 咁 心急 㗎 。
早知 你 係 噉樣 ，等 佢 嚟 接 你 就 好得多 嘞 ，免致 你 牽腸掛肚 。
韋小寶 伸 一伸 條 脷 ：噉 以後 我 一句 説話 都 唔 問 就係 啦 。
你嘅嘴 就 唔 問 ，個心 就 急 咯 ，噉 我 仲 嬲 。
方怡 似乎 醋意 好 濃 啊 。
韋小寶 啊 越 聽 越 高興 ，佢 笑住 話 ：
如果 我 個 心 有 一啲 咁多 急 呢 ，我 就 唔係 你 老公 ，係 你 嘅 仔 。
方怡咭聲噉笑住話 ：乖 。個面一紅 ，下便嗰個仔字就唔講嘞 。
到咗晏晝 ，噉 喺 市鎮 打咗尖 ，一行人 又 向住 東 便 行 。
韋小寶 又 唔敢 再 問 要 去 邊度 嘞 。
佢 見到 離開 北京 已經 好 遠 ，今日 冇法子 趕翻 入 宮 去 見 康熙 ，噉 佢 諗 ：
橫掂 小玄子 又 冇 限 我 幾時 返去 嘅 ，噉 啊 算 我 喺 五台山 耽擱 多 幾 日 ，一 係 呢 ，就 畀 肥頭陀 捉住 唔 放 啫 嘛 ，遲 幾 日 返去 又 有 乜 緊要 吖 ？
噉樣 一諗 呢 就 乜事 都 冇 嘞 。
一路上 方怡 啊 同 佢 傾 閒偈 。
當日 喺 皇宮 裏 便 嘅 時候 ，兩個人 雖然 係 同埋 一間 房 啊 ，但 因為 多咗 個 沐劍屏 啊 ，方怡 顯得 頗為 矜持 嘅 。
而家 一拍噉 騎住 馬 行 ，方怡 就 有 講 有 笑 嘞 。
其餘啲人 呢 十分識 做 ，喺 後 便 就 離開 遠遠 。
韋小寶 情竇初開 ， 喺 皇宮 裏 便 嘅 時候 叫 佢 做 老婆 呢 ， 仲 係 開玩笑 啊 佔 咗 六成 ， 輕薄 攞 便宜 就 佔 咗 三成 ， 只有 一成 呢 先 係 隱隱約約 有 男女 嘅 情愛 。
今日 別後 重逢 ，見到 方怡 一時 又 嬲嬲地 ，一時 又 温柔 笑笑口 ，不由得 動情 喇 。
見佢 騎 咗 大半日 馬 ，面 珠紅 卜卜 ，微微 噉 出汗 ，真係 講唔出 咁 嬌美 可愛 啊 。
佢 傻傻噉 睇住 佢 成個 人 定晒 型 。
方怡微微笑噉問佢 ：做咩嘢啊你 ？傻咗噉 。
韋小寶 話 ： 好 姐姐 ， 你 ， 你 真 係 好 睇 㗎 喇 ， 我 想 ， 我 想 。
你 想 咩嘢 唧 ？
嗱 我 講出嚟 你 唔好 嬲 噃 。
講正經嘅嘢 我 唔嬲 ，不過 你 講埋 啲 唔三唔四嘅嘢 我 梗係 嬲 啦 。
你 想 咩嘢 啊 ？
我 想 ，你 如果 真係 做咗 我 老婆 我 都 唔知 幾 開心 啊 。
方 怡 矋 咗 佢 一眼 板 起塊面 擰 轉頭 。
韋小寶 急嘞 ：好姐姐 ，你 嬲啊 ？
梗係嬲啦 ，嬲死你啊 。
呢句 説話 都 唔知 幾 正經 啊 ，我 ，我係 真心 㗎 。
喺 皇宮 嘅 時候 ，我 就 發過 誓話 一世人 都 跟住 你 ，服侍 你 㗎嘛 ，仲有 咩 真嘅 假嘅 呢 ？
你噉樣講 ，就係 自己 想 變心 。
嘩 ，韋小寶 歡喜 到 癲 啊 。
如果唔係 兩個人 都 騎住 馬 ，即時 就 一下 抱住 佢 錫 下 佢 面珠 㗎 嘞 。
噉佢 拉住 方怡 隻 手 話 ：我 點 會 變心 呢 ？一千年 、一萬年 都 唔 變心 。
你噉講又係假㗎喇 ，一個人 點會 有 一千年 、一萬年 呢 ？除非 你 係 烏 。
講到 呢個 烏字 ，咭噉 笑 一 聲 ，擰歪 塊 面 ，不過 隻 手 呢 仲 係 由得 佢 揸住 。
韋小寶 揸住 佢 隻手 ，心花怒放 啊 佢 笑住 話 ：
你 待 我 咁 好 ，我 永遠 都 唔會 做 烏龜 嘅 。
老婆勾佬 ，丈夫 啊 做 烏龜 ，呢句 説話 方怡 當然 明白 。
真係 狗嘴 長唔出 象牙 啊 你 。
哈哈哈 ， 你 嫁雞隨雞 嫁狗隨狗 ， 呢 一世 啊 想見 你 老公 把 嘴長 出 象牙 ， 難咯 。
方怡 趴 喺 馬鞍 咁 笑 ，隻手 呢 就 緊緊 揸住 韋小寶 隻手 。
噉 兩個人 一路 講講笑笑 ，到到 挨晚 時分 ，喺 一個 大 市鎮 嘅 客店 過夜 。
第二日 ，韋小寶 啊 叫 于八 請咗 架 大車 ，噉 佢 同 方怡 坐 。
噉 一路 行 ，有時 韋小寶 又 攬住 佢 錫 下 佢 面珠 ，噉 方怡 呢 亦 都 唔 拒絕 。
韋小寶 啊 哎 真係 不知 人間 何世 咯 。
佢 喺 溫柔鄉 之中 ，咩 嘢 皇帝 嘅 詔令 ，咩 四十二章經 咩 五台山 上 嘅 老皇爺 冚𠾴 唥 置之 腦後 。
迷迷懵懵噉 ，真係 快活 唔知 時日 過 ，條路 有 幾 遠 冚𠾴 唥 唔記得 晒 嘞 。
嗱 各位 ，欲知 後事 如何 ，且 聽 下回 分解 。
