前文 再續 啊 書 接 上一回 啊 ，話說 方怡 發咗 誓 ，話 如果 韋小寶 ，能夠 救到 劉一舟 脱險 呢 ，就 肯 嫁 佢 噉 。
嘩韋小寶歡喜啊 ，佢 問 沐劍屏 話 ：
好妹妹 ，你 有 咩 心上人 啊 要唔要 我 去 救 吖 ？
沐劍屏 話 ：冇啊 ，我 點會 有 咩 心上人 唧 。
唉 真係 可惜 嘞 。
可惜 咩嘢 啊 ？
如果 你 亦 有 個 心上人 ，我 啊 救埋 佢 出嚟 ，噉 你 咪 嫁埋 我 ，做 我 個 好 老婆 囉 。
呸 ！有咗 個 老婆 仲 唔夠 喎 ，得隴望蜀 。
嘿嘿嘿嘿 ，癩蝦蟆 想 食 天鵝 肉 吖嘛 。
啊喂 ，好妹妹 ，同 你 劉師哥 一齊 被 捉 嘅 仲 有 兩個 人 ，一個 係 滿面 鬍鬚 嘅 。
嗰個 係 吳 師叔 。
仲有 一個 身上 刺滿咗 花 ，心口 仲係 隻 老虎 頭 嘅 呢 ？
嗰個 係 青毛虎敖彪 ，係 吳師叔 嘅 徒弟 。
嗰個 吳 師叔 叫 咩 名 啊 ？
吳師叔 叫做 吳立身 ，外號 叫做 搖頭獅子 。
哈哈哈哈哈哈 ，哈哈，唉，真係有點錯狀元，就冇改錯花名，呢個外號改得好，人哋無論講乜嘢啊，佢一味係擰頭嘅。
桂大哥 ， 你 既然 去 救劉 師哥 咯 ， 不妨 順便 將 吳師叔 同敖 師哥 都 救 埋出 嚟 啦 。
嗰個 吳師叔 同 敖彪 有冇 相好 㗎 ？要 羞花閉月 㗎噃 。
唔知道呢 ，你 問嚟 做咩嘢 啊 ？
我要 去 問 下 佢哋 嘅 相好 先 咯 ，肯唔肯 畀 我 佔 啲 便宜 。
否則 我 搏命 去 救人 ，豈不是 白白 辛苦 一場 ？
正在講到 十分得意 ，突然間 眼前 黑影 一晃 ，拂一聲 有件嘢 飛過嚟 。
韋小寶 連忙 耷低頭 ，不過 已經 嚟唔切 喇 ，啪 一聲 打中 個 額角 ，嗰 件 嘢 撞到 粉碎 ，原來 係 一隻 酒杯 。
韋小寶 同 沐劍屏 一齊 嗌咗 聲 ：哎呀 ！
韋小寶 跳開 三步 連 張 椅 都 帶 跌埋 ，額頭 上 啲 血 啊 叭叭聲 咁 流 。
只聽見 方怡 喝佢 話 ：你 即刻 去 殺咗 劉一舟 啦 ，本姑娘 都 唔想 生 喇 ，免得 成日 受埋 你啲 噉嘅 欺負 。
原來 嗰隻 酒杯 呢 係 方怡 掟 嘅 ，好彩 佢 重傷 之後 手上 冇 力 唧 。
韋小寶 額頭 畀 酒杯 掟 中 ，只係 損 咗 啲 皮肉 。
沐劍屏 話 ：桂大哥 你 過嚟 啦 ，我 同 你 睇 下 個 傷口 ，啲 碎瓷片 留 喺 肉 裏 便 就 唔好 喇 。
韋小寶 話 ：我 真係 唔 過嚟 啊 ，我 老婆 要 謀殺 親夫 啊 。
沐劍屏 話 ：邊個 叫 你 亂講 又 去 佔 第個 女人 嘅 便宜 呢 ？連 我 聽咗 都 嬲 啊 。
韋小寶 哈哈大笑 佢 話 ： 哈哈哈哈 哈哈哈 ， 我 明白 喇 ， 原來 你 哋 兩個 係 呷 醋 。
聽到 我 要 佔 第二個 女人 便宜 ，我嘅 大老婆 、小老婆 就 呷醋 喇 。
沐劍屏 攞起 酒杯 佢 話 ：你 叫 我 做 乜嘢 嘩 ？
睇 我 畀唔畀 隻 酒杯 掟 你 吖嗱 。
韋小寶 攞 衫袖 抹 下 雙眼 ，見到 沐劍屏 喺度 詐嬲 ，不過 眉梢 眼角 係 帶住 笑 嘅 ；
又見方怡嘅神情 呢 有啲 對唔住 噉 ，自己 額頭 雖然 係 痛 ，個 心 就 好 快樂 ，佢 話 ：
大老婆 用 隻 酒杯 掟 我 ，細老婆 如果 唔 掟翻 隻 呢 太過 唔 公平 嘞 。
行上一步佢話 ：細老婆 ，掟啦 。
沐劍屏 話 ：好 ！手 一揚 ，將 酒杯 裏 便 嗰 半杯 酒 ，向 佢 塊 面 潑 過去 。
韋小寶 竟然 避 都 唔 避 ，半杯 酒 都 潑 晒 落 佢 嘅 面 上 便 。
佢 伸 條 脷 出嚟 ，舐 咗 面上 嘅 鮮血 同埋 酒 ，猛 咁 稱讚 話 ：
哎呀 好食 啊 ， 好食 啊 ， 啲 血 呢 ， 係 大老婆 打 嘅 ， 啲 酒 呢 ， 係 小老婆 潑過 嚟 嘅 ， 哎喲 ， 真 係 甜 死 嚟 咯 ， 好 甜 啊 。
沐劍屏啊笑先 ，方怡 忍唔住 咭 一聲 ，亦 笑嘞 ，鬧佢 話 ：無賴 。
扲出 條 手巾仔 交畀 沐劍屏 話 ：你 同 佢 抹下 啦 。
沐劍屏 笑住 話 ：你 打傷 咗 人哋 點解 要 我 抹唧 ？
你 唔係 佢 細 老婆 咩 ？
哎吖 ，你 先頭 親口 應承 佢 嘅 ，我 冇 應承 啊 。
邊個 話 冇 應承 啊 ？ 佢 話 ： 細 老婆 ，掟 啦 。 你 就 攞 酒 潑 佢 咯 ， 噉 咪 自己 應承 做 佢 細 老婆 囉 。
韋小寶 笑住 話 ：冇錯冇錯冇錯 ，我 錫 大老婆 ，又 錫 細老婆 。
嗱 你 兩個 放心 ，我 再 唔 去 勾搭 第二啲 女人 喇 。
方怡 叫 韋小寶 行過去 ，睇下 佢 額頭 傷口 裏 便 有冇 碎瓷片 ，見到 冇喇 ，然後 同 佢 抹乾淨 咗 啲 血 。
噉 三個人 都 唔會 飲酒 ，肚 呢 又 餓 嘞 ，食咗 唔少 餸菜 ，噉 講講笑笑 都 唔知 幾 快活 。
食完飯 韋小寶 打個 喊 路 佢 話 ：
今晚 我 同 大老婆 瞓 呢 ，定係 同 細老婆 瞓 啊 ？
方怡 面色 一沉 ，好正經 噉 話 ：
你 講笑 都 有 個 譜 得 㗎 嘛 ， 你 再 蜎 上 嚟 床 我 ， 我 一劍 殺 咗 你 。
韋小寶 伸 一伸 條 脷 佢 話 ：總 有 一日 呢 ，我 呢條 老命 要 死 喺 你 手下 嘅 。
噉啊 將 飯菜 搬 去 外便廳 ，攞咗 張 席 鋪 喺 地下 連埋 衫 就 瞓嘞 。
呢 個 時候 實在 疲倦 到 極咯 ， 眨下 眼唧 就 瞓 到 淰 嘞 。
第日 一早 醒咗 ，覺到 個 身上 暖笠笠 嘅 ，擘開 隻 眼 一 睇 ，啊 ，身上 𢫏咗 一 張 棉被 。
又覺得 頭殼 下 便 有 個 枕頭 ，噉 坐起身 ，見到 落咗 紗帳 。
隔住 紗帳 隱隱約約 見到 方怡 同 沐劍屏 一拍 噉 瞓 喺 處 。
佢 起咗 身 ，輕手輕腳 去 開門 ，道門 咿 一 聲 ，方怡 即刻 醒嘞 ，微微 笑話 ：
桂 ，桂，早晨啊 。
韋小寶 話 ：桂 咩 啊 桂 ，好老公 都 唔 叫 一 聲 。
你 仲未 將 人 救出嚟 啊 。
你 放心 ，我 而家 就 去 救人 。
沐劍屏 都 醒嘞 ，佢 問 ：咁早 你 兩個 喺度 講 咩嘢 啫 ？
韋小寶話 ：我哋啊 一直 都 冇 瞓 ，兩個人 傾咗 成晚 偈 。
啊啊啊啊嗯 ，好眼瞓啊 ，誒 我而家 要瞓嘞 。
又 伸咗 個 懶腰 。
方怡 塊 面 紅 喇 佢 話 ：同 你 有 咩 説話 好 講 唧 ？
點解 你 要 話 我哋 傾咗 成晚 偈 吖 ？
韋小寶 笑 一笑話 ：好老婆 嗱 我哋 講 正經嘢 吓 。
你 寫 一 封 信 ，我 攞 去 畀 你 嘅 劉 師哥 噉 佢 先 肯 信 我 ，同 我 混 出 皇宮 㗎 嘛 。
否則 佢 咬 定 係 吳三桂 個 女婿 。
沐劍屏 話 ：佢 冒充 吳三桂 女婿 嘅 侄 啫 嘛 。
方姑娘 做咗 我 大 老婆 ，噉 劉一舟 唯有 去 做 吳三桂 嘅 女婿 啦嘛 。
方怡話 ：你 唔好 亂噏 ，不過 要 寫 封 信 ，都 唔錯 嘅 。
不過 ，不過 寫 咩嘢 好 呢 ？
韋小寶話 ：寫咩都好 ，嗱 ，就話 我 係 你 嘅 老公 ，天下 第一 嘅 大好人 ，最 有義氣 ，受咗 你 嘅 囑託 ，前來 相救 ，貨真價實 ，十足 真金 ，噉咪 就得囉 。
於是 搵齊晒 海大富 嘅 筆硯紙張 ，磨咗 墨 ，將 一張 白紙 放 喺 枱仔 上 便 ，推到去 床前 便 。
方怡 坐起身 ，接過 筆 ，忽然間 啲 眼淚 叭叭聲 惦流 ，佢 話 ：
我 ，我寫 咩嘢 好 呢 ？
韋小寶 見 佢 嗰種 可憐法 ，個心腸 忽然間 軟喇 ，佢 話 ：
你 寫 咩嘢 都 好啦 ，橫掂 我 又 唔識字 嘅 ，你 唔好 講話 嫁咗 我 做 老婆 ，否則 你 劉 師哥 一嬲 就 唔 要 我 救 嘞 。
方怡話 ：你 唔識字 ？你呃我 。
我 如果 識字 啊 ，我 係 烏龜 王八蛋 ，唔係 你 老公 ，係 你 嘅 仔 ，係 你 嘅 孫 。
方怡攞起支筆 ，只覺得 好難落筆啊 ，咿咿啞啞 又 喊起上嚟 。
韋小寶 見到 佢 噉樣 ，一下 英雄 起嚟 大聲 話 ：
好 喇 好 喇 ， 我救 咗 劉一舟 出 嚟 之後 呢 ， 你 嫁 佢 啦 ， 我 唔 同 佢 爭 喇 。
橫掂 你 跟咗 我 之後 ，仲係 要 勾佢 嘅 。
與其 將來 戴 綠帽 做 烏龜 ，仲係 等 你 快快活活 去 嫁 畀 個 衰鬼 劉一舟 啦 。
你 鐘意 寫 咩嘢 就 寫 咩嘢 ，老子 乜嘢 都 唔 計 喇 。
方怡 含住 眼淚 睇咗 佢 一 眼 ，耷低 個 頭 ，又 歡喜 又 感激 。
喺 張 紙 上面 寫咗 幾 行 ，然後 將 紙 摺好 ，佢 話 ：
唔該 你 ，交畀 佢 啦 。
韋小寶 喺 個 心處 鬧 嘞 ：
豈有此理 你啊你啊 ，大哥 都 唔叫 一聲 ，過河拆橋 ，打完齋 又 唔要 和尚 。
但係 佢 既然 已經 認咗 叻 啊 ，噉 就 唔能夠 再 逼 方怡 做 老婆 啦 ，接過 啲 紙條 塞落 衫袋 ，頭 都 唔 回 就 出門 去咗 ，個 心 諗 ：
要做 英雄 自己 就 要 蝕底 㗎喇 ，好地地 一個 老婆 ，又 雙手 送翻 畀 人 。
乾清宮 旁邊 侍衞房 嘅 值班 頭頭 ，呢陣時 ，已經 換咗 係 張康年 。
佢 早就 得到 多隆 嘅 囑咐 ，要 佢 幫 桂公公 將 刺客 救出 皇宮 。
不過 呢 就 唔好 露出 一啲 痕跡 ，等 刺客 疑心 。
而家 見 韋小寶 嚟到 嘞 連忙 迎上去 打個眼色 ，同 佢 一齊 行 到 假山 旁邊 低聲 問 佢 ：
桂公公 ，你 要 點樣 救人 啊 ？
韋小寶 見 佢 神態 咁 親熱 ，個心 諗 ：
皇上啊 叫 我 殺 個 把 侍衛 嚟 救人 ，等 劉一舟 佢哋 唔會 疑心 。
呢個 張 老兄 對 我 咁 好 ，確係 有啲 唔忍心 殺佢 嘞 。
好在 臭妹釘 有 封信 ，劉一舟 呢個 斬頭鬼 實信 我 嘅 。
噉 於是 沉沉吟吟 噉 話 ：等 我 再 審 下 嗰 三個 龜蛋 先 ，隨機應變 啦 。
張康年 笑住 請咗 個 安 佢 話 ：多謝 桂公公 。
韋小寶 話 ：咦 ，又 多謝 咩 啊 ？
小人 跟住 桂公公 做事 ，以後 公公 不斷 噉 提拔 ，小人 升官 發財 噉 啊 梗係 走 都 走唔甩 㗎 啦 。
你 赤膽忠心 同 皇上 當差 ，將來 只係 怕 一件事 唧 。
吓 ？怕咩 啊 ？
就怕 你 屋企 嘅 庫房 細 過 頭 ，裝 唔落 咁多 銀 喇 。
嘿嘿嘿 ，嘿嘿 ，嘿 ，誒公公 ，我哋 十幾個 侍衞 暗中 都 商量好喇 ，大家 盡力 同 公公 做事 ，乜 都 要 保 公公 做到 宮裏 便 嘅 太監 總首領 。
噉就 妙極喇 ，不過 等 我 大 幾歲 再 講 啦 。
韋小寶 呢個 時候 突然間 諗起 錢老闆 送 生豬 補 漏洞 嘅 事 ，佢 問 ：
瑞 副總管 去咗 邊處 啊 ？
多 總管 同 你哋 大家 忙到 不可開交 ，點解 一直 都 唔見 瑞 副總管 嘅 ？
張康年 話 ：多數 係 太后 派 咗 佢 出宮 辦事 啦 。
你 見到 瑞 副總管 嘅 時候 ，請 佢 嚟 一下 我 間 屋 ，皇上 吩咐過 有 幾句 説話 要 問 佢 嘅 。
哦 ，哦 。
韋小寶 行 入 侍衞房 ，走到 綁住 劉一舟 佢哋 三個人 嘅 大廳 。
一晚唔見面 ，三個人 精神 又 憔悴 咗 好多 。
雖然 冇 再 受到 拷打 ，但係 兩日 兩夜 未曾 飲水 食飯 ，就算 係 鐵打 嘅 亦 頂唔住 吖 。
喺 大廳 看守 嗰 七八 名 侍衞 一齊 向 韋小寶 請安 ，神態 啊 十分 恭敬 。
韋小寶 大聲 話 ：
皇上 有 旨 ，呢 三個 反賊 大逆不道 ，立即 斬首 示眾 。
快啲 攞 啲 酒肉飯菜 嚟 ，等 佢哋 食到飽 一飽 ，免至 死咗 做 餓鬼 。
眾侍衛 一齊 應咗 。
嗰個 虬髯 漢子 吳立身 大聲 話 ：
我哋 為 平西王 盡忠 而 死 ，流芳百世 ，叻過 你哋 啲 為 韃子 做 奴才 嘅 畜生 萬倍 ！
一個 侍衞 攞起 條 鞭 ，拂噉 一鞭 打過去 ，鬧 佢 話 ：吳三桂 呢個 反賊 ，叫 佢 滿門 抄斬 ！
劉一舟啊 神情激動 ，雙眼 望住 個天 ，口唇 震下震下 ，唔知 喺度 講啲乜嘢 。
啲侍衞 攞咗 三大碗 飯 、三大碗 酒 入嚟 。
韋小寶 話 ：呢 三個 反賊 啊 聽見 話 要 殺頭 嚇到 周身 震 ，只怕 酒 又 飲唔到 飯 亦 食唔落 喇 。
三位 兄弟 辛苦啲 ，餵 佢哋 每人 飲 兩啖 酒 ，就 唔好 飲 咁多 喇 。
呢大碗飯 就 餵佢哋食 啦 ，如果 飲到 醉晒 ，殺起頭 嚟 唔知 痛 ，噉 就 太過 便宜 佢哋 喇 。
去到 陰間 ，閻羅王 見到 三個 酒鬼 ，可惱嘢 啦 ，每個 酒鬼 先 打 三百 軍棍 ，誒噉 又 將 佢哋 害到 慘過 頭 嘞 噃 。
班侍衛 都 笑起上嚟 ，就 餵 三個人 飲酒 食飯 。
吳立身 就 大啖大啖 咁 飲酒 ，大啖大啖 噉 食飯 ，神色 自若 。
敖彪啊 食 一啖 飯 鬧 一句 ：狗奴才 噉 。
劉一舟 呢 面色 慘白 ，食咗 唔到 細半碗 唧 ，就 擰擰頭 唔食 嘞 。
韋小寶 話 ：好啦 ，大家 出去 先 ，皇上 叫 我 問 佢哋 幾句 説話 ，問完 之後 再 殺頭 。
張康年 躬身 話 ：係 。
帶住 班 侍衞 出咗 去 ，噉 啊 掩翻埋 道廳 門 。
韋小寶 聽見 啲 人 腳步聲 去 遠咗 ，啊哼 噉 咳 一 聲 ，向住 吳立身 佢哋 三 個 人 猛咁 睇 ，塊 面 呢 露出 神秘 嘅 笑容 。
吳立身 鬧 佢 嘞 ：狗太監 有 咩 咁 好笑 啊 ？
韋小寶 話 ：我 有 我自己 笑 啫 嘛 關 你 咩 嘢 事 唧 ？
劉一舟 突然間 話 ：公公 ，我 ，我就係 劉一舟 。
韋小寶 打個 特 ，都 仲 未曾 回答 ，吳立身 同埋 敖彪 已經 同時 喝佢 ：你 亂講 咩 啊 ？
劉一舟 話 ：公公 ，唔該 你 救下 我 啦 ，救 ，救 ，救下 我哋 吖 。
吳立身 話 ：貪生怕死 算 咩 英雄好漢 ！何必 就 開口 求人 唧 。
劉一舟 話 ：佢 ，佢 ，佢 係 小公爺 同 我 師父 ，託 ，託 佢 嚟 ，嚟 救 我哋 㗎 。
吳立身 擰頭 話 ：佢 呢啲 呃人 嘅 説話 都 信得過 嘅 ？
韋小寶 話 ：搖頭獅子 吳大爺 ，唔該 你 畀面 我 ，搖少 几次 頭 得唔得 ？
吳立身 一驚 ，佢 話 ：你 ，你你 。
呢一位 青毛虎 ，敖彪 敖大哥 係 你 嘅 得意 弟子 係咪 呢 ？
名師 必定 出 高徒 噃 ，佩服 ，佩服 。
吳立身 同埋 敖彪 面色 都 變咗 。
韋小寶 喺 衫袋 攞出 方怡 寫 嘅 字條 ，打開咗 佢 ，放 喺 劉一舟 面前 笑住 話 ：
你 睇下 呢張 係 邊個 寫 嘅 字 。
劉一舟 一睇 ，歡喜 到 不得了 ，聲 都 震埋 佢 話 ：
真係 方師妹 嘅 筆跡 啊 。
吳師叔 ， 方 師妹 話 呢 個 ， 呢 ， 呢 位 公公 係 嚟 救 我 哋 㗎 ， 叫 我 哋 一切 都 聽 佢 説 話 。
吳立身 話 ：畀 我 睇下 。
韋小寶 將 嗰張 紙 攞到 吳立身 面前 ，只 聽見 吳立身 讀 信 話 ：
劉師哥 ，桂公公 係 自己人 ，義薄雲天 ，甘 冒 奇險 ，前來 相救 ，務須 聽 桂公公 指示 ，求 脫 虎口 。妹怡 手啟 。
嗯 ，呢 上 便 又 畫咗 我哋 沐王府 嘅 記認 花押 ，真㗎 噃 。
韋小寶 聽 方怡 喺 信 裏 便 稱讚 自己 義薄雲天 ，噉 佢 唔明白 義薄雲天 係 咩 意思 。
個心諗 ：義氣 梗係 越厚越好啦 ，薄到 飛得上天 ，仲有 咩 剩低 㗎 ？
但係 以前 曾經 聽 人 講過 好幾次 ，知道 確實 係 一句 好話 。
又 聽 佢 喺 信 裏 便 並 冇 對 劉一舟 講 咩 肉麻 嘅 説話 ，噉 更加 歡喜 喇 ，佢 話 ：梗係 真 㗎 啦 唔通 仲 有 假 嘅 咩 ？
劉一舟 問 佢 ：公公 ，方師妹 喺 邊處 啊 ？
韋小寶 個 心 啊 話 ：喺 我 鋪床 處 。
之把口呢就話 ：佢 而家 匿埋 喺 個 安全穩陣 嘅 地方 。
我救 咗 你 哋 出去 之後 呢 ， 再 設法 子 救 佢 同 你 會面 啦 。
劉一舟 眼淚 奪眶而出 ，佢 哽哽噎噎 噉 話 ：
公公 嘅 大恩大德 ，真係 唔知 點樣 報答 喇 。
佢 啱先 聽 韋小寶 講 ，食完 早飯 就 要 攞 去 殺頭 嘞 ，佢 係 本來 膽大 嘅 ，但係 突然間 面臨 生死 關頭 就 慌 喇 。
忍唔住 聲稱 自己 就係 劉一舟 ，盼望 留翻 條命 啦 。
等到 見到 方怡 嘅 書信 ，知道 有命 喇 ，呢種 歡喜 法 啊 真係 難以 形容 啊 。
吳立身 呢 臨危不懼 ，佢 仲係 要 查清查楚 ，佢 問 ：
請問 閣下 尊姓大名 ， 點解 肯 幫手 呢 ？
韋小寶 話 ：唉 索性 同 你哋 講明 講白 佢 算喇 。
我啲 朋友 呢 都 叫 我 做 癩痢頭 小三 ，啊 你哋 唔 好奇怪 ，我 以前 係 癩痢 嘅 ，而家 就 唔 癩痢 喇 。
噉 我 有 個 好 朋友 ，係 天地會 青木堂 嘅 香主 叫做 韋小寶 。
佢 話 天地會 裏頭 呢 有 個 老伯 叫做 八臂猿猴 徐天川 ，為咗 爭執 咩 擁 唐 擁 桂 啊 噉 ，就 打死 你哋 沐王府 嘅 白寒松 。
噉 沐家 小公爺 同 白寒楓 啊 唔肯 罷手 ，但係 人 都 死咗 嘞 不能 復生 ，冇法子 啦 。
嗰韋小寶呢 ，就嚟 託 我 救 你哋 三位 出去 ，賠翻 畀 沐王府 嚟到 顧全 雙方 嘅 義氣 ，嗱 就係 咁多 喇 。
同天地會嘅糾葛啊 ，吳立身 就 知道得好清楚嘅 ，噉就更冇懷疑 不停噉又擰頭又岌頭 話 ：噉就係喇 。
在下 啱先 講説話 得罪咗 你 ，唔好意思啊 。
韋小寶 笑住 話 ：好話 ，好話 。
不過 點樣 逃出 皇宮 呢 ，要 想 個 好 法子 至 得 。
劉一舟 話 ：桂公公 想 嘅 法子 ，必定 係 好 嘅 ，我哋 都 聽 你 吩咐 就係 喇 。
韋小寶 個 心 諗 ：我 都 仲 未曾 諗到 計 呢 。
就 問 吳立身 ：吳大爺 有 咩 計策 呢 ？
吳立身 話 ：皇宮 裏頭 嘅 狗 侍衞 極 多 ，日頭 係 衝 唔 出去 嘅 。
等到 夜晚 ，你 嚟 設法子 割斷 我哋 手腳 嘅 牛筋 ，等 我哋 趁 黑 衝殺 出去 就 得喇 。
韋小寶 話 ：妙 就 妙喇 ，怕 唔係 十拿九穩 唧 。
噉喺廳裏便行嚟行去喺度諗計 。
敖彪 話 ： 衝得 出去 最好 啦 ， 衝唔 出去 至多 唔 係 死 。
劉一舟 話 ：敖師哥 ，唔好 打斷 桂公公 嘅 思路 啦 。
敖彪 嬲 爆爆噉 睩咗 佢 一眼 。
韋小寶 個 心 諗 ：最好 係 有 啲 咩 迷藥 ，將 啲 侍衛 迷魂 就 好嘞 ，又 唔 使 殺人 。
噉啊 行去 外便 間 房 問 張 康年 話 ：
張大哥 ， 我 想 用 一 啲 迷藥 ， 你 能 唔 能夠 即刻 同 我 搞 啲 嚟 呢 ？
張康年 笑住 話 ：得得得 。趙二哥 嗰處 啊 ，有 蒙汗藥 ，我 即刻 去 搦 。
趙二哥 嗰處 有 蒙汗藥 ？要嚟 做 咩 用 㗎 ？
唔怕 同 公公 講 吖 ，前日 瑞 副總管 派 我哋 捉 一個 人 ，吩咐 我哋 要 靜雞雞 做 唔能夠 張揚 。
呢個人 嘅 武功 啊 ，好使得 㗎 ，我哋 怕 明刀明槍 噉 逳手 ，殺得人多 ，而且 又 唔能夠 活捉 啊 。
噉 趙二哥 就 去 搞咗 一批 蒙汗藥 嚟 ，做咗 手腳 。
結果啊 大功告成 吖嘛 ？
手到擒來 啦 梗係 。
韋小寶 聽講 係 瑞棟 要 佢 哋 捉 人 ， 噉 就要 問多 幾句 嘞 。
捉 嗰個 係 咩 人 啊 ？犯 咗 咩 罪 呢 ？
張康年 話 ：係 宗人府 嘅 鑲紅旗 統領 和察博 ，聽講 話 係 得罪 咗 太后 喎 。
瑞副 總管 啊 將 佢 捉 返 嚟 之後 ， 逼 佢 交 咗 一部 經書 出 嚟 ， 就 喺 佢 嘅 嘴 同埋 個 鼻哥 貼 咗 桑皮紙 ， 就 係 噉 樣 夾生 焗 死 佢 。
韋小寶 聽咗 心驚 啊 。
原來 老舉乸 又 係 為咗 嗰部 四十二章經 。
噉瑞棟 攞咗 經書 之後 ，點解 唔 即刻 去 交畀 老舉乸 要 收埋 喺 自己 身處 呢 ？
佢 係唔係 想 自己 吞沒 本 經書 啊 ？
唔係嘅 ，瑞棟 決 唔敢 吞沒 經書 嘅 。
實係 老舉乸 見到 瑞棟 ，嚟唔切 問 經書 嘅 事 ，就 即刻 派 佢 嚟 殺 我 嘞 。
噉佢隨口又問 ：係咩經書 啊 咁緊要 ？
張康年 話 ：噉 又 唔 知道 喇 ，誒 ，我 而家 去 攞 蒙汗藥 啊 。
喂 ，唔該 你 叫 膳房 送 兩 圍 上等 酒席 嚟 ，係 我 請 各位 大哥 嘅 。
啊 ，公公 又 賞酒 飲 。
哎呀 ， 只要 跟 住 公公 啊 ， 食有 得 食 ， 飲有 得 飲 ， 一世 都 唔 使 憂 啊 ， 好 ， 我 去 喇 。
嗱 各位 ，欲知 後事 如何 ，且 聽 下回 分解 。
