前 文 再續 啊 書 接上 一回 啊 。
話説 韋小寶 幫 個 高佬 執 翻 起 頂 帽 ，同 佢 帶 翻 。
又 將 十五 頂 帽 啊 一 頂 頂 執起 ，佢 笑住 話 ：
唉 佢哋 噉樣 做 ，豈不是 得罪 咗 朋友 嘞 咩 ？
佢 都 分唔清楚 邊 頂 帽 係 邊個 嘅 ，噉 捧住 喺 手 ，等 各人 攞嚟 自己 帶翻 。
呢啲 隨從 睇住 韋小寶 坐 喺 本府 世子 身邊 ，係 康親王 呢次 宴請 嘅 大 貴客 。
雖然 係 年紀 細細 啊 ，但係 席上 人人 對 佢 十分 恭敬 。
先前 已經 聽 人 講起 喇 ，係 擒殺 鰲拜 嘅 桂公公 。
見佢 同 自己 執 帽 唄 ，連忙 請安 行禮 一味 話 ：不敢當 ，不敢當 。
韋小寶 對 平西王 府 嘅 人 本來 就 毫無 好感 嘅 ， 本來 係 望 吳三桂 手下 撞個 大板 。
但係 神照 等人 一再 進逼 ，呢啲 人 呢 始終 容忍 ，就 激發 咗 佢 鋤強扶弱 個 心 嘞 。
見到 佢哋 感激 自己 咁 真誠 ，個 心裏 便 高興 ，轉頭 向 康親王 話 ：
王爺 ，問 你 借 幾 兩 銀 使 下 。
康親王 笑住 話 ：桂兄弟 即管 攞去 使 啦 ，五萬 兩 銀 夠唔夠 啊 ？
邊 使得 咁多 吖 ？
韋小寶 同 王府 一 名 侍從 話 ：快啲 去 買 十六 頂 最好 個 帽 返嚟 ，越 快 越好 吓 。
嗰個 侍從 應咗 就 去 嘞 。
吳應熊 拱手 話 ：桂公公 愛屋及烏 ，在下 感激不盡 啊 。
韋小寶 拱手 還禮 ，個心 諗 ：咩嘢 愛屋及烏 吖 ？及 咩嘢 烏 啊 ？及 你 呢隻 小 烏龜 啊 ？
康親王 見到 神照 等人 ，削落 平西王府 嗰班 隨從 頂帽 ，佢 心裏 便 呢 亦 早就 覺得 未免 過分 ，怕 得罪 咗 吳應熊 。
但係 如果 出口 道歉 ，又 覺得 唔 妥當 啊 。
韋小寶 噉樣 一嚟 ，好得 佢 個 心 啊 佢 話 ：人 嚟 啊 ，吳世子 嘅 手下 ，每 人 賞 五十 兩 銀 。
佢 又 諗 ：淨係 賞 對方 ，豈不是 令 我 手下 嘅 眾 武師 失 咗 面子 ？
於是 佢 又 話 ：我哋 府 嗰 十六 位 武師 ，每 人 亦 係 五十 兩 銀 喇 。
當堂 大廳 之上 一片 歡呼聲 。
索額圖 企 起身 ，同席 上 眾人 都 斟 咗 酒 佢 話 ：
小王爺 ， 令尊 用兵如神 ， 今日 一見 果然 名不虛傳 啊 。
令尊 軍令 森嚴 ，部屬 人人 效死 ，無怪 戰 無 不勝 ，攻 無 不克 。
哈哈哈 ，嚟嚟嚟 ，大家 遙敬 平西王 一杯 。
吳應熊 連忙 企起身 ，舉杯 話 ：
晚生 謹 代表 家嚴 飲酒 ，多謝 各位 厚意 啊 。
噉 眾人 都 舉杯 飲 勝 嘞 。
吳應熊 又 話 ：
家嚴 鎮守 南疆 ，邊陲 平靜 ，都係 托賴 聖上 洪福 ，再 ，再加 朝中 王公 大臣 措置 得宜 ，指導 有方 。
家嚴 只係 盡忠 為 皇上 效力 ，秉承 朝中 各位 王公大臣 嘅 訓示 ，唔敢 偷懶 而已啫 。
實在 唔敢話 有 咩嘢 功勞 嘅 。
酒 過 數 巡 ，王府 侍從 已經 將 十六 頂 帽 賣 返嚟 嘞 ，噉 雙手 捧住 ，送到 韋小寶 面前 。
韋小寶 向 康親王 話 ：
王爺 ，你 府裏 便 嘅 師傅 失手 打落 咗 人哋 嘅 帽 ，你 應該 賠翻 頂 新 帽 畀 人哋 啩 ？
康親王 笑 住 話 ： 應該 ， 應該 ！ 仲 係 桂兄弟 想得 周到 啊 。
吩咐 侍從 將 啲 帽 送 畀 吳應熊 嘅 隨從 。
噉 眾 隨從 接過咗 ，躬身 話 ：謝 王爺 ，謝 桂公公 。
然後 將 頂帽 褶好 放 喺 懷內 ，頭 上 仍然 係 戴住 舊帽 。
康親王 同 索額圖 對望咗 一眼 ，知道 呢啲人 呢 唔 換 新 帽 乃 係 尊重 吳應熊 嘅 意思 。
又飲咗一陣 ，王府 戲班 啊 出嚟 獻技 嘞 。
康親王 要 吳應熊 點戲 ， 吳應熊 啊點 咗 齣 滿堂 笏 ， 呢 出 係 郭子儀 做壽 ， 七子八婿 賀 壽 嘅 熱鬧 戲 。
郭子儀 大富大貴 又 長壽 ，君臣 啊 十分 相得 。
吳應熊 點 呢齣戲 啊 ，又 可以 話 係 祝賀 康親王 ，亦都 係 為 佢 父親 吳三桂 自己 講説話 ，都 幾 得體 嘅 。
康親王 等 佢 點完 喇 ，噉 啊 將 戲牌 遞 畀 韋小寶 佢 話 ：韋兄弟 ，你 都 點齣 啦 。
戲牌 上邊 啲 字 韋小寶 啊 一個 都 唔 識 ，佢 就 話 喇 ：
我 就 唔會 點 喇 ，王爺 ，你 代 我 點 一齣 啦 ，誒 要 打得 好睇 嘅 武打戲 就 得 喇 。
康親王 話 ：小兄弟 鐘意 睇 武打戲 係嘛 ？嗯 ，我哋 點 一齣 少年 英雄 打敗 大人 嘅 戲 ，就 好似 小兄弟 捉住 鰲拜 一樣 。
冇錯喇 ，點齣 白水灘 啦 ，小英雄 十一郎 ，打得 青面虎 落花流水 ，好唔好啊 ？哈哈哈哈 。
滿床笏 同埋 白水灘 演完 嘞 ，第三 齣 係 遊園 驚夢 。
兩個 旦角 咿咿呀呀 一味 唱到 唔停 ，韋小寶 聽得 不知所云 ，唔耐煩 嘞 ，就 離席 行開 。
見到 邊廳 有 幾張 枱 已經 有人 喺度 賭錢 ，有啲 係 賭牌九 有啲 係 擲 骰仔 。
喺 骰仔 枱 上面 做莊 嘅 呢 係 一 名 軍官 ，係 康親王 嘅 部屬 ，面前 呢 ，已經 贏咗 一 大堆 銀 嘞 。
佢 見 韋小寶 走埋嚟 就 笑住 話 ：桂公公 ，你 都 嚟 玩 幾手 啊 ？
韋小寶 笑住 話 ：好啊 。
一擸眼 ，見到 吳應熊 手下 嗰個 高佬 企 喺 一便 。
佢 對 呢個 人 呢 幾 有 好感 嘅 ，就 同 佢 擪 一擪 手 。
嗰個人 搶 前一步 佢 話 ：桂公公 有 咩 吩咐 呢 ？
韋小寶 話 ：賭台 之上 無 父子 你 唔使 客氣 㗎 ，老哥 貴姓 啊 ？大號 點樣 稱呼 呢 ？
先頭 神照 問 佢 佢 唔肯 答覆 ，但係 韋小寶 喺 咁多 賓客 面前 畀 足 面 佢哋 ，問得 又 客氣 ，佢 就 話 ：
小人 姓 楊 ，叫做 楊溢之 啊 。
韋小寶 都 唔 知溢 之 兩個 字 係 咩 意思 ， 噉 隨口 就 話 ： 吖 ， 好名 ， 好名 。
楊家 英雄 最多 喇 ， 楊老令 公啦 、 楊六郎 啦 、 楊宗保 啦 、 楊文廣 啦 ， 楊家將 啊 個個 係 英雄好漢 。
楊大哥 ，我哋 夾份 嚟 賭 一場 呢 。
楊溢之 聽 佢 稱讚 楊家 祖宗 個 心 好 歡喜 ，就 微微 笑話 ：小人 唔係 點 識 賭 㗎 。
怕咩啫 ？我嚟教你 ，你 嗰 兩隻 元寶 呢 ？攞出嚟啦 。
楊溢之 就 將 康親王 所 賞賜 嗰 兩隻 元寶 攞出嚟 。
韋小寶 喺 袋 裏 便 扲出 一 張 銀票 ，喺 枱 面 一 放 ，佢 話 ：
我 同 呢位 楊兄 夾份 ，押 一百 兩 。
噉莊家話 ：好 ，越多越好 。
佢哋 賭 嘅 係 兩粒 骰仔 ，一擲 定 輸贏 。
莊家 骰仔 一擲 ，夾成 一張 和牌 ，韋小寶 呢 擲咗 個 七點 ，咪 輸咗 一百 兩 。
韋小寶 話 ：再 押 一百 兩 。呢 一次 呢佢 贏 喇 。
等咗 十六七 手 之後 ，來來去去 又 冇 咩 輸贏 。
韋小寶 焦躁 起嚟 嘞 佢 諗 ：我 輸 幾百 兩 銀 就 唔緊要 啊 ，連累 到 呢位 姓 楊 嘅 輸 咗 嗰 兩 隻 元寶 噉 啊 對唔住 人哋 喇 。
一手 擲 出 一個 六點 ， 噉 啊 已經 輸 咗 九成 㗎 啦 ， 吖 ， 估 唔 到 莊家 擲 咗 個 五點 喎 。
韋小寶 哈哈大笑 ，噉 以後 呢 又 連氣 贏咗 幾 鋪 。
一百兩 變咗 二百兩 ，二百兩 就 變成 四百兩 。
做莊 嗰 個 軍官 笑 住 話 ： 桂公公 吖 真 係 好 手氣 啊 。
韋小寶 話 ：你 話 我 好手氣 係嘛 ？我哋 再 試 兩手 啦 。
噉啊 將 四百 兩 銀 向 前 一 推 ，一手 骰仔 擲落嚟 ，出嚟 一隻 四六 。
莊家 擲 咗 個 長三 ， 啊 莊家 又 輸 嘞 。
韋小寶 擰轉頭 話 ：楊大哥 ，我哋 仲 賭 唔 賭 啊 ？
楊溢之話 ：桂公公 揸主意 啦 。
韋小寶 將 原來 嗰 四百兩 銀 ， 再加 埋贏 咗 嗰 四百兩 ， 總共 係 八百兩 銀 ， 向前 一推 ， 佢 笑 住 話 ：
索性 賭得 爽快啲 。喝一聲 ：贏佢 ！
骰子 一 擲 落去 ，猛咁 轉 ，過咗 一陣 ，一粒 骰仔 已經 轉 成 六點 ，另外 一粒 呢 ，仲係 不停 咁 轉 。
韋小寶 隻手 呢 使咗 暗勁 ，要 呢粒 骰仔 呢 亦 成為 六點 ，噉 啊 成為 一張 天牌 。
但係 骰仔 唔係 自己 帶嚟 㗎喎 ，佢 擲骰 嘅 本事 呢 到底 冇 練到 爐火純青 。
呢粒骰仔 轉 定咗 落嚟 ，係 兩點 ，噉 八點 係 輸 多 贏 少 㗎 喇 。
韋小寶 大聲 咁 鬧 啊 ：衰鬼 你 個 臭 骰仔 ，咁 唔 幫忙 。
莊家 哈哈大笑 佢 話 ：桂公公 ，呢次 呢 怕 要 食 你 喇 。
一手擲落去 ，一粒骰仔 係 五點 ，另外一粒呢 ，猛咁轉 。
韋小寶 就 喝 喇 ：二 ，二 ，二 ！
呢一粒骰仔啊 ，擲出嚟 如果 係 一點 ，噉 就 幺五 ；
三點呢 ，就 夾 成為 八點 ，就 八食 八莊家 贏 ；
四點 呢 ，就 成為 九點 ；
五點 呢 係 隻 梅花 ；
六點 呢 係 隻 牛頭 ，都 大過 佢 八點 嘅 。
唯有擲出個兩點呢 ，莊家 先至 輸 嘅啫 。
韋小寶啊 不停咁 喝 ，啊 真係 有 咁啱得咁巧噃 ，嗰粒 骰 一 停 ，真係 兩點 。
韋小寶 好 歡喜 啊 笑住 話 ：哈將軍 啊 ，你 今日 手氣 唔係 點 好噃 。
個 軍官 笑住 話 ：唉 ，霉莊 ，霉莊啊 ！
桂公公 真係 當時 得令 ，做咩嘢事 都 得心應手 嘅 ，梗係 賭 你 唔過 啦 。
噉就 賠咗 三張 二百 兩 嘅 銀票 ，再加 兩 隻 一百 兩 嘅 元寶 。
韋小寶 啊 真係 一額汗 啊 佢 話 ：哎 多謝晒 ，多謝晒 。
又 向 楊溢之 話 ：楊大哥 ，我哋 冇 本事 啊 ，見好就收 喇 ，唔好 賭 喇 。
將 八百 兩 銀 啊 畀 晒 佢 。
楊溢之 無𪐀𪐀 發咗 一筆 橫財 ，個 心裏 便 好 歡喜 佢 話 ：
桂公公 ，呢位 將軍 係 咩嘢 官名 啊 ？
韋小寶 打個 特嘞 ，低聲 話 ：吖 ，我 冇 問過 噃 。
擰 轉頭 問 嗰 個 軍官 ： 大將軍 ， 你 尊姓大名 啊 ？
嗰個 軍官 笑逐顏開 企 起身 嚟 恭恭敬敬 噉 話 ：
小將 江百勝 ，記名 總兵 ，一直 喺 康親王 麾下 辦事 嘅 。
江將軍 ，你 打仗 呢 ，就 百戰百勝 ，賭錢 就 唔係 點得噃 。
小將 同 第二啲人 賭 ，差唔多 亦 講得 係 百戰百勝 嘅 。
只不過 強中 還有 強中手 ，哈哈哈 ，今日 遇到 公公 ，江百勝 變咗 江百敗 咯 。
韋小寶 哈哈大笑 ，噉就 行開咗 。
忽然間 個 心 諗 ：嗰個 姓 楊 嘅 點解 要 問 我 莊家 嘅 名 呢 ？
佢 隔遠 睇過 江百勝 擲骰 嘅 手法 ，只見 佢 揸 骰 、轉腕 、彎指 、擲骰 ，手法 極之 熟練 ，乃係 江湖上 賭錢 嘅 一等一 好手 。
啱 先 賭 得 興起 ， 冇 留意到 啫 ， 而家 啊 ， 當堂 恍然大悟 啊 ：
原來 呢個 傢伙 係 特登 輸 畀 我 嘅 。
唔怪得 我 連贏 五手 啦 你 真係 咁 好運氣 咩 我 ？
呢個 雲南 姓 楊 嘅 亦 唔係 羊牯 ，係 劏 羊 嘅 。
佢 又 諗嘞 ：點解 連 一個 素不相識 嘅 記名 總兵 亦 要 故意 輸錢 畀 我 呢 ？
噉梗係因為我喺皇上面前有面子 ，大家盼望我同佢哋講好話啦 。
就算 唔講好話 ，至少 亦 唔扠 𢰸佢哋檔 喇 。
死得 你 嘩 ，佢 使 一千四百 兩 銀 ，就 贏得 老子 嘅 歡心 嘞 ，真係 便宜 死 你 喇 。
佢 既然 知道 人哋 係 故意 輸錢 畀 佢 ，勝之不武 啊 ，噉 就 唔再 去 賭錢 嘞 ，又 返翻 上席 ，一面 食嘢 一便 睇戲 。
呢個 時候 唱 嘅 係 一齣 思凡 ，一個 師姑 又 做 又 唱 ，旁邊 啲 人 呢 就 不停 咁 叫好 。
韋小寶 都 唔知 佢 喺度 搞 乜鬼 啊 覺得 非常 氣悶 又 企起身 。
康親王 就 笑住 話 ：小兄弟 想 玩 啲 咩 啊 ？唔使 客氣 啊 ，即管 吩咐 啦 。
韋小寶 話 ：我 自己 搵 嘢 玩 你 唔使 客氣 喇 。
睇住 廊下 啲 人 賭 得 十分 熱鬧 ，個 心裏 便 又 有 啲 痕痕哋 嘞 喎 。
不過 佢 諗 ：嘿 ，算喇算喇 ，眼不見為淨 ，今日 係 唔 賭喇 。
因為 佢 上次 嚟過 康親王府 ，噉 啊 依稀 記得 路 ，就 行 去 後堂 嘞 。
王府 裏 便 啊 到處 燈燭輝煌 ， 噉 眾人 一 見到 佢 就 恭恭敬敬 垂手 而立 。
韋小寶 順腳行 ，忽然間 尿急 噉啊 想 小便 。
噉佢 亦 懶得 問 人 廁所 喺 邊度 嘞 ，見到 左手 便 係 一個 小花園 ，噉 推開 道門 ，去到 黑暗 角落頭 ，拉開 條 褲 啊 正 話 想 小便 喇 。
忽然間 聽見 隔籬 花叢 有人 喺度 低聲 講説話 。
有個人 講 ：攞 銀 嚟 先 啦 ，我 就 帶 你 去 嘞 。
另外一個人 話 ：你 帶 我 去 先 啦 ，搵到 嗰件 嘢 ，梗係 會 畀 銀 你 嘅 。
先銀後貨 ，你 搦到嘢 如果 唔畀銀 ，我 去 邊度 搵 你 啊 ？
好啦 ，嗱 呢處 係 一千兩銀 ，畀 一成 你 先 。
韋小寶 個 心 一 動 ：一千兩 銀 不過 係 一 成 啊 ？噉 嗰 件 係 咩 嘢 咁 緊要 啊 ？
即刻 就 忍住 小便 ，打側 嘅 耳仔 嚟 聽 嘞 喎 。
只聽見 嗰個人 話 ：你 畀 一半 先 啦 ，否則 呢件事 就 算了 喇 。
呢啲 係 揸住 人頭 過橋 嘅 事 啊 你 當 係 好玩 啊 ？
另外 嗰個 人 稍為 沉吟 咗 下 話 ：
好啦 ，嗱 五千 兩 銀票 ，你 收咗 佢 先 啦 。
嗰個人 話 ：多謝晒 ，跟住 就 聽見 淅淅索索聲 ，梗係 喺度 數 銀票 喇 。
跟住 就 話 ：跟我嚟啦 。
韋小寶 好奇心 起 喇 佢 諗 ：
咩嘢 揸住 人頭 過橋 嘅 事 啊 ？唔 跟去 睇下 唔得 噃 。
噉 啊 聽 住 兩個 人 嘅 腳步聲 向 住 西便行 ， 噉 就 喺 花叢 裏 便 靜靜 鬆 出 嚟 ， 遠遠 跟 喺 後 便 。
噉睇住 兩個人 嘅 背影 喺 花叢 樹木 之間 閃下閃下 ，行咗 幾丈 ，就 停住 腳步 ，左右 睇下 ，慌死 怕 畀 人哋 發現 。
韋小寶 個 心 諗 ：鬼鬼鼠鼠 ，做 嘅 一定 唔係 好事 。
康親王 待 我 咁 好 ，等 我 今晚 同 佢 捉翻 兩個 賊佬 ，顯 下 我 桂公公 個 手段 至得 。
於是 第一 摸 ，摸一摸 靴筒 裏 便 嗰 把 削鐵如泥 嘅 匕首 ；
第二摸呢 ，摸一摸 身上 嗰件 刀槍不入 嘅 背心 ，但 當堂 又 大膽啲 。
只見 兩個人 穿過 花園 ，行入 一間 精緻 嘅 小屋 。
韋小寶 拈手拈腳 行埋去 。
見到 雕花 嘅 窗格 裏 便 透出 燈光 ，就 兜到去 窗後 ，用 手指 啊 蘸 啲 口水 ，整濕 窗紙 ，用 一隻 眼 裝入 去 。
原來 裏便 啊 係 一座 佛堂 ，供住 一尊 如來 佛像 ，神座 面前 就 點住 燈 。
有個 僕人 打扮 嘅 人 就 細細聲 話 ：
我 用咗 年 幾 時候 啊 先至 查到 呢件 物件 嘅 所在 ，你 呢 一萬 兩 銀 ，真係 唔係 好 賺 㗎 。
另外一個人 就 背向 韋小寶 佢 問 ：喺 邊處 啊 ？
嗰個 僕人 話 ：攞嚟 啦 。
嗰個人 轉過身 問 ：攞 咩嘢 啊 ？
呢個人 面孔 瘦削 ，正係 啱先 喺 大廳 上 便 阻止 嗰個 姓 郎 嘅 武師 出去 嘅 齊元凱 。
嗰 個 僕人 話 ： 齊 師傅 明知故問 啦 ， 梗 係 嗰 五千兩 啦 。
齊元凱 話 ：你 真係 犀利 啊 吓 。
喺 身邊 啊 攞出 一沓 銀票 畀 佢 ，嗰個 僕人 喺 燈光 下 便 一 張張 噉 睇過 。
韋小寶 心裏頭 好慌啊 ，佢 知道 呢個 齊元凱 武功 好高 ，而 佢哋 所做嘅 一定係 一件 關係 重大 嘅 勾當 ，如果 畀 佢 知道 啊 ，即時 就會 殺咗 自己 滅口 。
個心一急 ，當堂 就 瀨尿 ，噉 瀨 就 瀨啦 ，索性 順其自然 等啲尿 啊 順住 大髀 流落地 ，一啲 聲 都 冇 。
嗰個 僕人 數完咗 銀票 笑住 話 ：冇錯喇 。
又壓低咗把聲 ，喺 齊元凱 耳仔 邊 啊 講咗 幾句 説話 。
齊元凱 一味 岌頭 ，韋小寶 呢 一句 都 冇 聽見 。
只見 齊元凱 突然間 跳起 ，上咗 神台 ，捩轉頭 望一望 ，就 伸手 去 佛像 嘅 左耳 裏頭 去 摸 。
佢 扲咗 一輪 ，攞咗 一件 物件 出嚟 ，跳翻 落地 ，噉 舉 喺 燭光 下 便 一睇 ，原來 係 一條 鎖匙 ，金光閃閃 好似 係 黃金 鑄 嘅 。
但係 呢條 鎖匙 呢 不過 係 手指尾 大小 ，唔夠 一兩 黃金 。
齊元凱 笑容滿面 ，耷低頭 嚟 數 磚頭 ，橫 數 十幾 塊 ，又 掂 數 十幾 塊 。
哦護低身 ，喺 靴筒 裏頭 攞出 一把 短刀 ，撬起 一塊 方磚 ，噉 啊 細細聲 歡呼咗 聲 。
嗰 僕人 話 ：嗱 貨真價實 ，冇 呃 你 啩 ？
齊元凱 唔答佢 ，將 金鎖匙 輕輕 插落去 ，睇嚟 ，喺 方磚 下 便 有 個 鎖匙窿 嘅 。
咵 一 聲 ，鎖 打開 咗 嘞 ，齊元凱 一窒 ，佢 話 ：點解 拉唔開 嘅 ？怕 唔 啱 噃 。
嗰個 僕人 話 ：點會 拉唔開 啊 ？王爺 親自 開鎖 ，我 喺 窗外 睇得 清清楚楚 嘅 。
講完 就 護低身 ，拉咗 一件 乜嘢 嘢 ，就 向 上一扚 。
突然間 聽見 瀡 一 聲 ，一支 箭 喺 下面 射 咗 出嚟 ，正中 嗰個 僕人 心口 。
嗰個 僕人 吖 一 聲 慘叫 ，向 後 啊𢴈 低 嘞 ，手 上 扚住 嗰 塊 鐵蓋 呢 亦 甩手 飛咗 去 。
齊元凱 斜身 一 伸手 ，接翻住 鐵蓋 ，免得 跌 喺 地下 發出 咣 一聲 。
佢 踎 喺 個 僕人 身後 便 ，右手 啊 揞住 佢 嘅 嘴 ，怕 佢 呻吟 呼叫 ，驚動 其他 人 。
左手啊揸住 僕人嘅 左手 ，又 伸到 個 窿處 摸 。
韋小寶 睇到 擘大個口 唔合得 翻埋 個心 諗 ：
啊 原來 個 窿 裏頭 另外 有 機關 嘅 ，呢個 姓 齊 嘅 真係 犀利 喇 。
不過 呢 一次 呢就 冇 箭 射出嚟 嘞 。
齊元凱 自己 伸手 入去 ，攞咗 一包 嘢 出嚟 ，係 個 包袱 。
佢 右手 一捹 ，將 嗰個 僕人 推咗 喺 地 。
企起身 ，右腳 一抬 就 已經 踩住 嗰個 僕人 把口 ，唔畀佢 出聲 。
然後 打側身 將 包袱 放 上 神台 ，打開咗 佢 。
哎呀 ，韋小寶 深深 嗍咗 啖 氣 ，只見 包袱 裏頭 係 一部 經書 。
世間上 嘅 書本 何止 千千萬萬 呢 ，佢 識得 書名 嘅 ，就 只有 四十二 章 經 一部 。
而 呢一部 ，就係 四十二章經 。
經書嘅形狀 ，同埋 喺 鰲拜府 中 抄出嚟 嘅 一模一樣嘅 ，只係 書套 呢 ，係 用 紅綢 做成嘅 。
齊元凱 快手快腳 ， 將 經書 仍然 用 包袱 包 好 ， 提起 左腳 ， 喺 嗰 支 箭尾 上面 用力 一 𨂽， 啪 一聲 ， 成 支箭 入 晒 嗰 個 僕人 心口 。
嗰個 僕人 呢 本來 已經 受咗 重傷 ，呢一下 梗係 即時 死咗 定啦 。
個嘴呢 ，又 畀 佢 右腳 踩住 ，只係 嗯咗 一聲 ，個身 扭 幾下 ，就 唔逳嘞 。
韋小寶 嚇到 個 心 嘣蹦亂跳 ，本來 已經 瀨咗 尿 㗎 啦 ，呢個 時候 忍唔住 又 瀨咗 好多 喺 褲襠 裏頭 。
只見 齊元凱 喺 個 僕人 嘅 袋 裏 便 攞翻 啲 銀票 出嚟 ，擠入 自己 嘅 袋處 ，佢 冷笑話 ：哼哼哼 ，你 真係 發財 啦 。
佢 沉吟咗 一下 ，將 金鎖匙 放落 嗰個 僕人 屍手 嘅 右掌心 ，又 卷起 死屍 嘅 手指 揸住 鎖匙 ，噉 先 快步 行 出去 。
韋小寶 個 心 諗 ：佢 就 要 逃走 嘞 噃 ，我 要 唔 要 大聲 嗌 呢 ？
突然間 人影 一晃 ，齊元凱 已經 上咗 屋頂 。
韋小寶 又 縮埋 一嚿 一啲 都 唔 敢 逳 ，噉 啊 聽見 屋頂 有 搬動 瓦片 嘅 聲音 。
過咗一陣間 ，齊元凱 又 跳翻落嚟 大模大樣 噉 走咗 咯 。
韋小寶 個 心 諗 ：冇錯喇 ，佢 將 經書 藏 喺 瓦面 下 便 ，翻轉頭 再 嚟 攞 ，哼 ！冇 咁 便宜 。
等咗一陣 ，等齊元凱 去 遠咗 喇 ，噉 佢 就 冇 本事 一下 跳到 屋頂 咯 ，就唯有 順住 條 柱 呢 爬上去 ，摱住 屋檐 ，噉 先至 翻身 上咗 屋頂 。
佢 回想起 啱先 瓦片 響動 嘅 地方 ，掀咗 十幾 塊 瓦 ，喺 夜色 朦朧 之中 已經 見到 包袱 嘅 一角 嘞 。
佢 將 包袱 攞出嚟 ，仍舊 將 瓦片 沓 翻好 ，佢 諗 ：
呢部 四十二章經 ，到底 點解 咁 值錢 呢 ？
老 烏龜 、 皇太后 、 呢 個 姓 齊 嘅 ， 仲有 鰲拜 、 康親王 ， 個個 都 當 佢 係 無價之寶 。
我 韋小寶 如果 唔 順手 牽羊 發 呢一筆 橫財 啊 ，我 就 白白 姓 韋 喇 。
噉啊解開包袱 ，將 經書 打平 噉 塞喺 條 腰 處 ，勒翻緊 條 腰帶 。
佢 件 袍 本嚟 就 好 闊大 嘅 ，真係 一啲 都 睇唔出 。
佢 將 包袱皮 啊 掟 入 花叢 ，又 返去 大廳 嘞 。
嗱 各位 ，欲知 後事 如何 ，且 聽 下回 分解 。
