前文 再續 啊 書 接 上 一回 啊 ，話説 韋小寶 想 引 小郡主 食嘢 ，但係 小郡主 呢 一啲 都 唔 想 食 。
噉 韋小寶 有啲 意興索然 嘞 ，佢 話 ：
原來 第九流 個 妹 釘 啊 淨係 鐘意 食 第九流 嘅 臭 魚 、臭 肉 、臭 鴨蛋 嘅 。
我 呢啲 好餸 好點心 呢 ，本來 係 第一流 上等 人 食 嘅 。
等陣 我 叫 人 去 搦 啲 臭魚 、臭肉 、臭鴨蛋 、臭豆腐 嚟 畀 你 食 。
小郡主 話 ：我 唔 食 臭鴨蛋 、臭豆腐 。
啊 ，原來 你 淨係 食 臭魚 、臭肉 嘅 。
你 就 鐘意 亂講 ，我 亦 唔 食 臭 魚 、臭肉 。
韋小寶 食咗 幾箸 蝦仁 ，噉啊 食 一嚿 豬肉 ，大讚 話 ：嘖嘖嘖 ，哎 味道 真係 好喇 。
見 小郡主 始終 無動於衷 ，就 放落 筷子 ，個心 諗 ：點樣 先 能夠 使 佢 問 自己 攞嚟 食 呢 ？
噉 過咗 一陣 ，小太監 又 送 飯菜 嚟喇 ，佢 話 ：
桂公公 ，廚房 叫 小人 稟告 公公 ，呢 啲 過橋米線 嘅 湯 呢 好 焫 嘅 ，睇 嚟 一 啲 都 唔 熱 ，其實 呀 係 好熱 㗎 。
呢啲 宣威火腿 係 用 蜜餞 蓮子 煮 嘅 ，煮得 快過 頭 ，或者 唔係 好 腍 ，請 公公 包涵 。
呢啲 係 雲南 嘅 黑色 大頭菜 。
呢一碟 呢 ，係 大理 洱海 嘅 工魚乾 ，雖然 唔係 新鮮 魚 ，不過 係 十分 名貴 ，係 用 雲南 紅花油 炒 嘅 。
噉 又 沖咗 一壺 云南 普洱茶 。
廚房話 ，雲南 嘅 名菜 氣鍋雞 要 兩個 幾時辰 先至 煮得好 ，只有 夜晚 先至 攞嚟 畀 桂公公 你 老人家 喇 。
韋小寶 岌一岌頭 ，噉啊 等 小太監 去咗 之後 ，將 飯菜 搬 入 去 房 。
御廚房 一眨眼 咁快 ，就 整咗 四樣 道地 嘅 雲南菜 ，都 算係 好好 功夫 喇 。
原來 吳三桂 喺 雲南 做 平西王 啊 ，雖然 係 好 跋扈 ，但係 逢年過節 ，對 皇室 嘅 進貢 ，對 各位 王公大臣 嘅 孝敬 啊 ，卻 係 豐厚 無比 ，叻過 其他 省份 十倍 。
因此 朝廷 上 幫 佢 講 好話 嘅 人 呢 就 實在 唔 少 嘅 。
吳三桂 進貢 畀 皇帝 嘅 ，除 咗 金銀珠寶 ，象牙 犀角 等等 珍貴 物品 之外 ，雲南 嘅 各樣 土產 呢 亦 都 係 應有盡有 。
正因為 係 噉樣 ，御廚房 要 喺 眨眼 咁快 煮 幾味 雲南菜 呢 就 一啲 都 唔 難 嘅 。
小郡主 本來 已經 餓 嘞 ，見到 呢 幾 味道地 嘅 家鄉菜 ，忍 唔 住 心 逳逳 。
只係 佢 畀 韋小寶 實在 欺負 得 夠 慘 啊 ，唔願 就 噉 就 屈服 ，佢 揸 定 主意 喇 ：
唔理 呢 個 小 惡人 點樣 氹 我 ，我 總係 唔 食 。
韋小寶 用 筷子 夾咗 一件 鮮紅 噴香 嘅 宣威火腿 ，搦 到 小郡主 口邊 笑住 話 ：擘 開 個 嘴 啦 。
小郡主 咬實 啲 牙 ，個 嘴 眯到 實 一 實 。
韋小寶 將 火腿 喺 佢 嘴唇 上 便 擦 嚟 擦去 ，擦到 佢 滿嘴 都 係 油 笑住 話 ：
你 乖乖哋 食咗 呢片 火腿 ，我 就 解開 你 手上 嘅 穴道 。
小郡主 眯埋 嘴 擰擰 頭 。
韋小寶 放低 火腿 攞起 嗰 碗 熱湯 ，嚇佢 話 ：
呢碗湯 呢 焫 到 死 死 下 嘅 ，你 如果 肯 飲 ，我 就 等 啲 湯 冷 咗 啲 ，一 羹 一 羹 噉 慢慢 餵 你 。
你 唔 飲 呢 ？哼 ！哼 ！哼 ！左手 一伸 ，捻 住 佢 個 鼻 。
小郡主 冇 得 呼吸 ，就 唯有 擘開 把 口 咯 播 。
韋小寶啊 右手 攞 一隻 匙羹 塞住 佢 嘅 口 ，佢 話 ：
呢碗 熱湯 我 就 噉樣 倒落去 ，將 你 嘅 肚 煲 都 焫到 熟 。
等 小郡主 唞咗 幾啖 氣 喇 ，噉 先 攞開 個 匙羹 ，放開 左手 。
小郡主 知道 過橋米線 嘅 湯 一半 係 油 ，比 平常 嘅 羹湯 呢 熱 幾倍 嘅 。
如果 就 噉 倒入 喉嚨 呀 ，怕 真係 畀佢 焫死 都 似 啊 ，佢 喊 喇 。
誒 ，你 劃 花咗 我 個 面 ，我 ，我 唔 做人 喇 ，咁 醜怪 。
韋小寶 個 心 諗 ：原來 你 以為 我 真係 喺 你 塊 面 處 刻 咗 隻 烏龜 ，噉 佢 微微 笑話 ：
你個面 雖然 係 劃花咗 ，但 呢隻 烏龜仔 畫得 好靚 啊 ，你 出到去 街 啊 ，擔保 人人 喝彩 至 算啦 。
小郡主 喊住 話 ：真係 難睇 到 死 啊 ，我 ，我 寧可 死 喇 。
唉 ，咁 靚 隻 烏龜仔 你 居然 唔要 喎 ，早知 係 噉 我 就 唔使 花 咁多 心思 ，喺 你 塊 面 刻 花 啦 。
刻咩嘢 花 唧 ，我 ，我 又 唔係 木頭 。
你 明明 姓 木 嘞 點解 唔係 木頭 啊 ？
我 屋企 個 沐 字 ，係 三點水 嘅 沐 ，又 唔係 木頭 嘅 木 。
韋小寶 亦 分 唔 出 嗰 兩個 木字 有 咩 唔同 嘞 ：
木頭 浸 喺 水 裏 便 ，不過 係 一 塊 爛 木頭 啫嘛 。
小郡主 又 喊嘞 。
噉 又 使 乜 喊 到 唔 收聲 喎 ？
嗱 ，你 叫 我 三聲 好哥哥 ，我 將 你 塊 面珠墩 補翻 好 ，將 烏龜仔 刮 咗 去 一啲 痕跡 都 唔 留 嘅 。
小郡主 塊面 一紅 佢 話 ：點樣 刮得去 唧 ？
仲 噉樣 刮一刮 ，我塊面 仲 似 咩樣 啊 ？
我 有 靈丹妙藥 㗎 嘛 ，嗱 ，第一流 嘅 英雄好漢 呢 ，噉 啊 難 補 啲 。
不過 你 係 第九流 嘅 妹釘 ，修補 你 塊 面 呀 ，真係 易過 借火 啦 。
我 唔信 ，你 就 鐘意 講説話 整蠱人 嘅 。
你 叫唔叫 啊 ？
小郡主 紅起 塊面 擰擰頭 。
我 話 你 聽 吖 ，烏龜仔 呢 係 新刻 嘅 ，修補 好 容易 嘅啫 。
不過 時間 捱得 長 喇 ，先至 修補 呢噉 如果 留翻 條 烏龜 尾 補 唔到 噉 就 怕 你 將來 後悔 咋 。
你 ，你 係 咪 呃 我 啊 ？
我 呃 你 做 咩嘢 唧 ？
嗱 你 越 叫得 早 ，我 越早 逳手 ，噉 你 塊面 呢 越 修補得 好 。
乖乖 哋 快 啲 叫 啦 ，叫 啦 。
噉 ，噉 如果 我 ，我 我 叫 咗 之後 ，你 補得 唔 好 呢 ？
噉 我 就 加倍 還翻畀 你 ，連 氣 叫 你 六聲 好妹妹 。
小郡主 又 試 滿面 通紅 嘞 ：你 嘅 人 好 曳 㗎 ，我 唔 䎺 。
好喇好喇 ，你 既然 唔 放心 ，我哋 分開嚟 叫 吖嗱 。
你 誒 叫 我 一聲 好 哥哥 先 ，等 我 補 好 咗 之後 呢 ，你 再 叫 第二 聲 。
噉 我 用 塊 鏡 呢 幫 你 照過 ，果然 係 一啲 𤶸 都 冇 喇 ，你 十分 滿意 喇 ，噉 再 叫 第三 聲 好唔好 ？
講唔定 你 開心過頭 啊 ，連 氣 叫 十聲 都 話唔定 啊 。
唔得唔得 ，你 話 要 三聲 啫嘛 ，點解 又 加 啊 ？
好啦 ，三聲 就 三聲啦 ，噉 你 快啲 叫 啦 。
小郡主 嘅 嘴唇 逳 咗 幾下 ，硬係 叫唔出口 。
韋小寶 話 ：叫 一 聲 好哥哥 啫 嘛 有 咩 咁 緊要 唧 ？又 唔 係 要 你 叫 好老公 叫 親 老公 。
嗱 ，你 仲 唔 叫 ，我 個 價錢 就 越 開 越 高 㗎喇 。
小郡主 又 真係 怕 佢 逼 自己 叫 咩 老公 啊 噉 ，就 話 ：
我 叫 一個 字 先 ，等 你 真係 醫好 咗 喇 ，我 就 叫埋 下面 ，下便 嗰 兩 個 字 。
唉 ，你 真係 會 討價還價 㗎 喇 ，先 畀 錢 後 畀 錢 都 一樣 啫 嘛 ，噉 你 叫 啦 。
小郡主 眯埋 雙眼 ，細細聲 噉 叫 ：好 。
呢個 好字 啊 ，真係 細到 蚊茲 叫噉 ，耳仔 稍為 差啲 啲 唧 都 聽唔出 。
不過 就算 係 噉 ，佢 塊面 啊 已經 醜到 紅紙 咁 紅 喇 。
韋小寶 話 ：哎呀 噉樣 叫法 真係 冇癮 嘅 ，七 折 八 扣 仲有 得 剩 嘅 ？
都 唔 知 你 心裏 便 啊 講 個 好 字 下 便 接 咩 字 嘅 啫 ，好 王八蛋 又 係 好 ，好 賊仔 又 係 好 。
唔 係 呢 ，我 心裏 便 諗 嘅 就 係 ，就 係 嗰 兩個 字 啫 嘛 ，我 唔 呃 你 嘅 ，真 係 冇 呃 你 嘅 。
噉 嗰 兩個 係 咩 字 吖 ？係 烏龜 啊 ，定 賊仔 啊 ？
唔 係 呢 ，唔 係 呢 ，係 哥 。
講 咗 個 哥 字 ，連忙 收口 。
哈哈 ，算你 有良心 啦 ，噉 我 同 你 修補 塊 面 嗰陣 呢 ，就 用 最好 個 手段 。
請 泥水佬 去 整 狗洞 ，出 第一流 嘅 價錢 ，泥水佬 就 用 第一流 嘅 手段 。
如果 價錢 低過 頭 啊 ，泥水佬 用 幾 嚿 爛 磚頭 塞滿 就 算數 咯 ，石灰 都 唔 掃 一下 ，豈唔係 難看到 極 ，係唔係 ？
人哋 叫 就 叫咗 嘞 ，你 仲 笑 我 係 狗洞 、爛磚頭 喎 。
哈哈哈哈哈哈 ，呢啲 係 比方 啫嘛 。
韋小寶 打開 海老公 嘅 籠 ，攞出 個 藥箱 ，將 箱 裏頭 嗰 幾十個 藥樽 呢 放 喺 枱 上面 。
每一樽 藥 呢 倒 啲 藥粉 出嚟 ，好 認真 噉 調配 藥粉 。
小郡主 本來 只係 信 三分 㗎啫 ，睇見 咁多 藥樽 ，不免 又 信 多咗 兩分 嘞 。
韋小寶 將 藥粉 放入 去 藥缽 ，攞到 去 外便 ，嗱嗱聲 ，倒 喺 紙處 包實 ，袋咗 落 袋 。
另外 攞咗 一件 綠豆糕 、一件 豌豆黃 ，再 喺 一個 廣東 月餅 裏 便 挖咗 一嚿 蓮蓉 ；
將 藥缽 洗 乾淨 喇 ，一啲 藥粉 都 唔 留 ，噉 先 將 蓮蓉 、綠豆糕 、豌豆黃 喺 藥缽 裏頭 舂爛 ；
又 加咗 兩羹 蜜糖 ，個 心念 一動 ，又 𦧲咗 兩 大㞘 口水 落去 ，撈到 勻喇 ，噉 搦 入去 房 ，佢 話 ：
佢 話 ：呢啲 係 生肌靈膏 ，其中 啊 ，有 無數 咁 多 靈丹妙藥 㗎 。
啊係嘞 ，你 塊面 呢 ，係 我 刻 花咗 嘅 ，就算 恢復翻 原來 個 樣 ，亦 不過 同 舊時 一樣 啫 ，你 亦 唔會 話 我 好 。
於是 搦起 尋日 喺 珠寶鋪 鑲 珍珠 嗰 頂 帽 ，將 帽 上面 四粒 明珠 都 掹咗 落嚟 ，擠 喺 左手 手掌 上 便 問 小郡主 話 ：
呢 四粒 珍珠 靚 唔 靚 啊 ？
小郡主 祖先 世代 都 封王 襲爵 ，雖然 佢 出世 嘅 時候 沐家 已經 破敗 嘞 ，但係 世家 貴女 ，見識 啊 畢竟 唔同 嘅 。
見 呢 四粒 珍珠 都有 手指頭 咁 大 ，發出 柔和 嘅 珠光 渾圓 無瑕 就 話 ：
啲 珍珠 好 靚 啊 ，四 粒 一樣 咁 大細 ，真係 難得 嘞 。
韋小寶 好 得意 啊 佢 話 ：呢啲 啊 ，係 我 尋日 用 二千九百兩 銀 買返嚟 㗎 ，好貴 呢 係唔係 ？
呢 四 粒 珍珠 雖然 係 珍貴 ，不過 亦 唔 值 二千九百兩 ，其實 係 九百兩 唧 ，佢 啊 加多咗 二千兩 。
佢 攞咗 一隻 藥缽 ，將 四 粒 珍珠 放入 缽 裏頭 轉咗 幾 轉 ，叮叮聲 。
韋小寶 攞 一條 小小 嘅 石杵 ，一杵 捶 落去 咯 喎 。
小郡主 吖噉 一聲 ：你 做乜嘢 啊 ？
韋小寶 見 佢 神情 咁 緊張 ，更 得戚 啦 ，連 氣 啊 舂 幾 舂 ，將 四粒 珍珠 舂到 粉 咁 碎 。
然後 不停 咁 轉動 石杵 ，將 珍珠 呢 磨成 細粉 ，佢 話 ：
我 如果 淨係 將 你 塊面 恢復 翻 舊時 噉 嘅 樣 呢 ，就 顯唔出 我 韋 ，誒 顯唔出 我 小桂子 公公 嘅 本事 ；
一定要 將 你 塊面 呢 ，變得 比 原來 靚 十倍 ，噉 你 呢 十聲 好 哥哥 先 叫得 心甘情願 ，冇 半點 勉強 㗎 嘛 。
三聲 啫嘛 ，點解 又 變成 十聲 唧 ？
韋小寶 微微 一笑 ，將 珍珠粉 撈 喺 綠豆糕 、碗豆黃 、蓮蓉 、蜜糖 ，加 口水 嘅 漿糊 裏便 ，用 藥杵 撈到 勻一勻 。
小郡主 雙眼 啊 擘到 大大 唔知 佢 搞 乜鬼 。
睇住 佢 將 四粒 明珠 舂 成 粉 嘞 ，噉 啲 藥膏 嗰 種 珍貴 法 就 可 想而知 啦 。
韋小寶 話 ：呢 四粒 珍珠 雖然 係 貴 啊 ，但 比起 其他 無價之寶 個 藥粉 呢 ，都 唔算得 乜嘢 啫 。
你嘅 相貌 呢 本來 係 唔錯 嘅 ，但係 唔能夠 講 係 天下 第一流 嘅 。
呢 ，等 搽咗 我 呢種 藥膏 之後 呢 ，九成 會 變為 一位 天下無雙 ，羞月閉花 。
羞花閉月 啊 。小郡主 聽 韋小寶 講錯咗 噉 就 隨口 改正 。
但係 說話 一 出口 ，不由得 好唔好意思 啊 。
韋小寶 用 錯 成語 乃係 家常便飯 一啲 都 不以為意 ，佢 話 ：
哎 冇 錯 冇 錯 ， 變成 一個 羞花閉月 嘅 靚妹 仔 噉 先至 好 吖 嘛 。
講完 ，就 揦 起 豆蓉 蓮蓉 珍珠 糊 ，糊 落 佢 塊 面 嘞 噃 。
小郡主 啊 一聲 都 唔 出 ，由 得 佢 亂 咁 糊 。
一陣間 唧 ，成 塊 面 除 咗 眼 耳 口 鼻 之外 ，冚 𠾴 唥 畀 佢 糊到 滿一滿 。
只 覺得 呢個 藥膏 呢 又 甜 又 香 ，一啲 都 冇 赤鼻 嘅 藥味 嘅 ，完全 唔 覺得 難受 。
韋小寶 見 佢 上當 就 搏命 忍住 笑 ，個心 諗 ：
我 唔 喺 啲 藥膏 裏 便 屙 翻 㞘 尿 呢 算 係 我 客氣 嘞 ，呢 啲 係 睇 在 你 祖宗 沐 英 沐王爺 嘅 份 上 唧 。
佢 係 開國 功臣 ，我 韋小寶 讓 佢 三分 。
噉 韋小寶 搽完 藥膏 ，洗乾淨咗 手 佢 話 ：
等 藥膏 乾咗 ，我 再 用 奇妙 嘅 藥粉 同 你 洗咗 去 。
噉 三搽 三洗 ，你 呢 就 非羞月 ，誒誒 ，非羞花 閉月 不可 喇 。
小郡主 個 心 諗 ：咩 非羞花 閉月 不可 呢句 說話 咁 拗口 嘅 。
噉 佢 問 ：點解 要 搽 三次 啊 ？
三次 仲 算 係 少 㗎 喇 ，人哋 整 豉油 啊 要 九 蒸 九 曬 添 啊 。
就算 係 煮 狗肉 都 要 連 滾 三滾 啦 。
你 又 鬧 我 係 豉油 狗肉 咯 。
哈哈哈 ，冇 ，豉油 狗肉 冇 噉 講法 嘅 ，豉油 煮 狗肉 呢 ，就 係 紅燒 狗肉 。
唔用 豉油 呢 ，就 係 清燉 狗肉 。
噉啊 攞 筷子 夾起 一片 火腿 送到 佢 嘴邊 佢 話 ：食啦 。
小郡主 一來 呢 亦 真係 餓 喇 ；
二來 就 唔敢 得罪 佢 ，怕 佢 手 腳 不 清 ，喺 自己 塊 面 處 呢 留落 一條 烏龜尾 ；
三來 見 佢 碾碎 咗 珍珠 一啲 都 唔 可惜 ，噉 不免 領 佢 個 情 。
稍為 遲疑咗 一下 ，就 擘 開 口 將 火腿 食咗 。
韋小寶 噉 就 歡喜 喇 ，贊佢 話 ：好妹妹 ，噉至 乖 吖嘛 。
小 郡主 話 ：我 ，我 唔 係 你 好 妹妹 啊 。
噉 係 好 姐姐 啦 。
都 唔 係 啫 。
噉 係 我 好 媽媽 。
小郡主 咭聲 笑咗 出嚟 ：我 ，我 點會 係 。
韋小寶 自從 見到 佢 以來 啊 ，直到 而家 先至 聽到 佢 笑聲 。
只係 佢 塊 面 呢 搽 滿咗 蓮蓉 豆蓉 ，就 難得 見 佢 笑到 好似 花 噉 ，但係 淨係 聽見 佢 銀鈴 一樣 嘅 笑聲 ，亦都 夠晒 開心 嘞 。
韋小寶 話 佢 係 我 嘅 好 媽媽 ，其實 即係 鬧 佢 係 老舉 啫 。
因為 佢 自己 母親 係 個 妓女 ，但係 聽 佢 笑得 又 歡暢 又 温柔 ，不禁 啊 稍為 有 啲 後悔 嘞 。
之佢 又 諗 ：做 老舉 亦 冇 咩 唔好 吖 。
我 阿媽 喺 麗春院 賺錢 ，啊 未必 就 賤得過 佢 木頭 目腦 沐王府 嘅 郡主 啊 。
噉 又 夾咗 幾片 火腿 餵 佢 食咗 。
你 如果 應承 我 唔 逃走 呢 ，我 啊 將 你 手 上面 嘅 穴道 都 解開 埋 。
我 點解 要 逃走 唧 ？塊面 刻 咗 隻 烏龜仔 ，走出去 啊 ，醜 都 醜死 嚟 喇 。
韋小寶 個 心 諗 嘞 ：等 你 知道 塊面 上 其實 冇 烏龜仔 噉 啊 實 會 逃走 嘅 。
嗰個 錢 老闆 亦 冇 話 幾時 嚟 接 佢 出去 。
宮裏 便 韞住 噉樣 一個 姑娘仔 ，畀人 發覺咗 就 弊 嘞 噃 ，死喇 ，點算呢 ？
正 喺度 諗 緊 ，忽然間 聽見 屋外 便 有人 叫 佢 ：
桂公公 ，小人 係 康親王府 嘅 ，有事 求見 啊 。
韋小寶 話 ：好 ，知道 喇 。
跟着 又 壓低 把聲 話 ：有人 嚟 喇 你 唔好 出聲 啊 ，呢處 係 咩 地方 你 知唔知 吖 ？
小郡主 擰擰 頭 。
韋小寶 話 ：講出嚟 呀 ，嚇 你 一跳 。
嗰啲 人 個個 都 想 害 你 ，只有 我 睇見 你 咁 可憐 就 暫時 收留 咗 你 咋 。
如果 畀 人 知道咗 你 喺 呢處 啊 ，哼哼 ，嗯 。
個心諗 ：講咩説話 嚇佢 最好呢 ？佢 最怕 咩嘢 呢 ？
一轉念之間 ，佢 就 話 ：
呢啲 惡人 啊 ，一定要 剝光晒 你啲衫 ，打你𦣇柚 ，打到 痛到 不得了 。
小郡主 塊面 一紅 ，眼神 果然 露出 恐懼 嘅 神情 。
韋小寶 見 恐嚇 有效 嘞 ，就 出去 開門 ，只見 門口 外 便 有 個 三十幾歲 嘅 內監 。
嗰個人 向 韋小寶 請安 ，恭恭敬敬 噉 話 ：
小人 係 康親王府 嘅 ，我哋 王爺 話 ，好耐 唔見 公公 喇 ，好掛念 你 ，今日 叫咗 戲班 ，請 公公 去 王府 飲酒 睇 戲 啊 。
韋小寶 聽 講話 睇戲 即刻 精神 一振 。
但係 自己 間 屋 裏 便 收埋 一個 小郡主 ，噉 又 怕 畀 人哋 撞見 ，又 怕 佢 嘈 起 上嚟 諸多 不便 ，一時之間 就 頗為 躊躇 喇 。
嗰個 內監 話 ：王爺 吩咐 ，務必要 請 公公 光臨 啊 。
今日 王府 好 熱鬧 啊 ，擲骰仔 、賭牌九 乜嘢 都有 。
韋小寶 聽到 話 睇戲 不過 精神 一振 啫 ，聽到 話 賭錢 噉 就 精神 大振 喇 。
佢 自從 發咗 大財 之後 ，同 温氏 兄弟 、平威 佢哋 賭錢 呢 亦 都 冇 乜 趣味 ，擲下 骰仔 ，不過 聊 勝 於 無 啫 。
康親王府 既然 開咗 賭局 ，梗係 豪賭 啦 ，仲 邊度 理 佢 咩嘢 小郡主 大郡主 吖 。
噉啊 即刻 好 歡喜 噉話 ：好 ，你 等 一 等 ，我 就 跟埋 你 去 。
佢 嗱嗱 聲 返 入 房 ，同 小郡主 鬆 咗 綁 ，放 喺 床 上 ，又 將 佢 手腳 綁 翻 住 ，拉 張 被 嚟 𢫏 住 佢 。
細細 聲 話 ：我 有事 出去 ，等 一陣 就 返嚟 喇 。
見 佢 眼光 裏 便 有 啲 疑慮 嘅 意思 就 話 ：
啲 珍珠 唔夠 吖嘛 ，我 去 珠寶鋪 買 啲 ，碾碎 咗 同 你 搽 面 噉 先至 十全十美 啊 。
你 ，你 唔 好 去 啦 ，珍珠 又 貴 。
貴 都 唔 緊要 ，你 好 哥哥 有 嘅 係 錢 ，要 叫 你 羞花 閉月 ，多 使 幾千 兩 銀 算得 乜嘢 吖 ？
我 ，我 喺 呢處 好 怕 啊 。
韋小寶 見 佢 楚楚可憐 有啲 唔 忍心 ，但係 要 佢 唔 去 賭錢 喎 ，小郡主 就算 再 可憐 十倍 都 冇用 。
佢 夾 咗 一 筷子 工 魚 亁 畀 佢 食 咗 ，又 攞 咗 四件 八珍 糕 ，疊起 嚟 放 喺 佢 嘅 嘴 處 。
嗱 ，你 一 擘 開 口 ，就 有 一件 糕 跌落 個 口處 喇 。
但 你 小心 啲 啊 ，啲 糕 一 跌咗 落去 枕頭 處 就 食 唔 到 㗎 喇 。
你 ，唔好 去 吖 。
事關 嘴上面 有 糕 ，講説話 把聲 呢唔清唔楚 ，仲 細 到 啊 蚊玆 噉 ，聽 都 聽唔到 咁滯 。
韋小寶 啊 詐 假意 冇 聽見 ，喺 箱 裏 便 攞出 一 沓 銀票 塞 喺 個 袋 處 噉 啊 開門 出去 ；
反鎖 翻道門 ，咪 高高興興 跟埋 內監 去 康親王府 嘞 。
一到咗 康親王府 門口 ，只見 大門 外 便 企住 兩排 侍衞 ，都 係 一身 鮮明 錦衣 ，腰 配 刀劍 ，器宇 軒昂 。
比起 韋小寶 第一次 嚟 嘅 時候 啊 戒備 森嚴 得多 嘞 。
韋小寶 啱啱 入 大門 唧 ，康親王 就 親自 出 嚟 迎接 ，一手 攬住 韋小寶 條腰 笑住 話 ：
桂兄弟 ，咁多日 冇見 ，你 生得 越嚟越高 越嚟越靚仔 啊 。
韋小寶 亦 笑住 話 ：王爺 你好 。
好咩嘢啊 好 你 又 唔 多 啲 嚟 我 屋企 玩 ，我 見 你 多 啲 就 好 ，見 你 少 啲 就 唔 好 喇 。
王爺 吩咐 我 多 啲 嚟 ，真 係 求 之 不 得 啦 。
嗱 ，你 講過 個 説話 要 算數 啊吓 。
幾時 我 同 皇上 攞 個 人情 ，准 你 假 ，我哋 飲酒 睇戲 ，大鬧 佢 十 日 八 日 ，呵 ，就 怕 皇上 一日 都 唔 少得 你 唧 。
噉啊 拖住 韋小寶 隻 手 ，一 拍 噉 行入去 ，眾 侍衛 一齊 躬身 行禮 。
啊 ，韋小寶 歡喜 喇 。
佢 喺 皇宮 裏 便 啊 雖然 得 人 奉承 ，但係 到底 只係 個 太監 ，邊 有 而家 同 王爺 拖住 手 行 噉 嘅 風光 吖 ？
行到去 中門 ，兩個 清廷 大官 迎出嚟 。
一個 係 新任 領內侍衞大臣 多隆 ，噉啊 通常 稱之為 侍衞總管 嘅 ；
另外一個 就係 韋小寶 嘅 結拜 哥哥 索額圖 嘞 。
索額圖 一步 跳 上前 ， 攬住 韋小寶 哈哈大笑 話 ：
哈哈哈哈 ，聽講 王爺 今日 請 你 ，我 就 自告奮勇 要 嚟 喇 ，今日啊 ，我哋 熱鬧 下 。
侍衞總管 多隆 亦 行前 嚟 巴結 。
噉 啊 四個 人 一 踏入 大廳 唧 ， 廊 下 嘅 吹打 手 就 奏起 樂 喇 。
韋小寶 從來 冇 受過 人 咁 隆重 接待 嘅 ，梗係 眉飛色舞 定啦 。
到咗 二廳 ，廳 上面 二十幾 名 官員 都 已經 企 喺 天井 迎接 ，都係 尚書 、侍郎 、將軍 、御營親軍統領 等等 嘅 大官 。
索額圖 呢 逐一 逐二 幫 佢 引見 。
有 一 名 內監 急急 走入嚟 ，打咗 個 千 佢 話 ：王爺 ，平西王 世子 駕到 。
康親王 笑住 話 ：好 ！桂兄弟 ，你 喺度 坐下 先 ，我 出去 迎客 。噉啊 轉身 行咗 出去 嘞 。
韋小寶 個 心 諗 ：平西王 世子 ？噉 唔係 吳三桂 個 仔 ？
佢 嚟 呢處 做 乜嘢 呢 ？
嗱 各位 ，欲知 後事 如何 ，且 聽 下回 分解 。
