前 文 再續 啊 書 接上 一回 啊 。
話説 韋小寶 捱 多 大半個 時辰 ，諗住 可以 逃走 喇 ，就 拈手拈腳 行到 去 門邊 。
誰 不知 海老公 又 嗌 ：小桂子 ，你 去 邊處 啊 ？
韋小寶 話 ：我 ，我去 小便 啊 。
誒 ， 誒 ， 點解 唔 喺 房 小便 吖 ？
哦 ，哦 。
韋小寶 行去 內室 。
呢處 係 佢 從來 未 到過 嘅 地方 ，啱啱 入門 ，只係 行 咗 兩 步 唧 就 嘭 一 聲 ，膝頭 哥 撞 落 枱腳 處 。
海 老公 喺 外便 問 ：
哼 ，小桂子 ，你 ，你做乜嘢啊 ？
韋小寶 話 ：冇 ，冇乜嘢 啊 。
咪 伸手 去 摸 ，喺 枱面 一 摸 就 摸到 火刀 火石 ，就 連忙 𡃈着 火 ，點着 紙媒 。
見到 枱面 放住 十幾 支 蠟燭 ，咪 即刻 點着 一支 ，插 喺 燭台 上 便 。
有光 就 睇到 嘢 嘞 ，只見 房 裏 便 有 一 張 大 床 一 張 細 床 ，估計 係 海 老公 同 小 桂子 瞓 㗎 喇 。
房裏 便 有 幾個 籠 ，一張 枱 ，一個 櫃 ，除此之外 就 冇 咩 其他 物件 。
左便呢 ，有 個 大水缸 顯得 好 突兀 ，地下 瀄到 濕咗 一 大笪 。
佢 正在 觀察 下 睇下 呢處 係咪 可以 由 窗口 逃走 出去 ，點知 海老公 又 喺 外 便 嗌 嘞 ：
你 點解 仲 唔 小便 啊 ？
韋小寶 嚇咗 一驚 ：佢 點解 一直 不停 咁 叫我 呢 ？唔通 佢 聽見 我 把 聲 唔對路 起咗 疑心 ？
否則 我 小便 唔 小便 關 佢 屁事 咩 。
就即刻應佢話 ：係 ，我屙喇 。
噉喺 細床 底下 摸到 個 尿壺 ，一便 小便 一便 睇下 個 窗 。
見個窗 啊 閂到 實一實 ，每條 窗罅 都 用 棉紙 貼住 嘅 。
睇嚟 實係 海老公 咳得 厲害 喇 ，怕冷 親 ，所以 連 一啲 冷風 都 唔 畀 佢 吹入嚟 。
你 話 而家 要 出力 打開 個 窗 ，海老公 一定 聽到 嘅 ，怕 都 未曾 出得 窗 啊 ，九成九 畀 佢 捉住 咯 。
佢 喺 房 裏 便 到處 咁 睺 下 ，想 搵 下 有 咩 地方 可以 逃走 嘅 ，但係 房 裏 便 連 狗 洞 貓 洞 都 冇 一 個 。
如果 話 喺 外房 逃走 ，必定 會 畀 海老公 發覺 。
佢 一擸眼 ，見到 小桂子 鋪 床腳 就 放咗 一套 新衫 。
心念一動 ，連忙 除咗 自己 身上 嘅 衣服 ，着咗 嗰套 新衫 。
海老公 又 喺 外便 叫 喇 ：小桂子 ，你 ，你 喺度 做 乜嘢 啊 ？
韋小寶 應 佢 話 ：嚟喇嚟喇 。
一便 扣紐 就 一面 行 出去 ，執起 小桂子 頂 帽 就 戴 喺 頭上 ，佢 話 ：
蠟燭 熄 咗 我 去 點支 啊 。
返去 內室 ，攞咗 兩支 蠟燭 點着 出嚟 。
海老公 長長噉 歎 一口氣 ，佢 細細聲 話 ：
你 真係 已經 點着咗 蠟燭 喇 ？
韋小寶 話 ：係啊 ，乜 你 冇 見到 咩 ？
海 老公 好耐 都 唔 出聲 ，咳咗 幾 下 先至 話 ：
我 明知 啲 藥 唔 能夠 多食 㗎 喇 ，只不過 咳 得 實在 。
唉 ，實在 太 辛苦 ，唉 。
雖然 每次 只 係 食 啲 啲 啫 ， 不過 日積月累 ， 毒性 太 過重 ， 終於 ， 終於 雙眼 唔 掂 喇 。
韋小寶 個 心 當堂 鬆 一鬆 。
佢 諗 呢個 老嘢 唔 知道 我 喺 佢 啲 酒 裏 便 加 咗 藥粉 ，仲 以為 係 食 藥 食得 耐 嘞 ，積積埋埋 噉 先至 發作 。
海老公 又 話 ：小桂子 ，公公 平日 待 你 點 啊 ？
韋小寶 啊啲 多 都 唔 知道 海老公 平日 對待 小桂子 點 嘅 ，係唔係 都 噏住 先 啦 就 連忙 話 ：
好 ，好好啊 。
嗯 ，公公 而家 ，雙眼 盲咗咯 ，世間上 ，就 只有 你 一個人 照顧 我 咯 。
你 會唔會 離開 公公 ，唔 ，唔理 我 呢 ？
我 ，我梗係唔會啦 。
真唔真啊 ？
梗係真㗎啦 ，啲多 都 冇 假 。
韋小寶 回答得 毫不猶疑 而且 語氣 好 誠懇 ，佢 事 必要 海老公 非 大為 感動 不可 ，佢 又 話 ：
公公 ，你 又 冇 人 陪 嘅 ，如果 我 唔 陪 你 噉 邊個 嚟 陪 你 呢 ？
不過 我 睇 你 嘅 眼病 呢 ，過 幾日 就 會 好 㗎 喇 ，唔使 擔心 嘅 公公 。
嗯 ，唉 ，唔好得㗎喇 。
嗰個 姓 茅 嗰個 人 ，已經 逃走 咗 喇 ？
係啊 。
佢 帶嚟 嗰個 細路 ，你 殺咗 係唔係 ？
韋小寶 個 心 嘭嘭聲 猛 咁 跳 ：係 ，佢 ，佢嘅 屍體 點算 啊 ？
海老公 沉吟 咗 一下 就 話 ：
喺 我哋 間 屋 裏 便 殺咗 人 ，畀 人 知道咗 ，查問 起嚟 ，就 好 啰嗦 嘅 。
你 ， 你 去 攞 我 個 藥箱 嚟 啦 。
韋小寶 應咗 聲 ，係噉 就 行咗 入去 內室 。
唔見藥箱 ，咪 拉開 個 櫃 啲 櫃桶 嚟到 搵 。
海老公 突然 間 好 嬲 噉 話 ： 你 喺 度 做 乜嘢 啊 ？
邊 ，邊個 叫 你 亂開 櫃桶 㗎 ？
韋小寶 嚇 咗 一 跳個 心 諗 ： 啊 ， 原來 呢 處 幾個 櫃桶 係 唔 開 得 嘅 。 噉 就 話 ：
我 搵 藥箱 啊 ，唔知 擠咗 喺 邊處 呢 ？
豈有此理 你 ，藥箱 擠 喺 邊處 你 都 唔知 ？
哦我 ，我 ，我殺咗人 ，誒 個心 ，個心好驚啊 。
你 ， 嗯 嗯 ， 阿 公公 你 ， 你 又 盲 咗 眼 ， 我 都 ， 我 都 完全 糊塗 晒 咯 。
講到 收尾 佢 嘩 一聲 喊起上嚟 添 。
佢 唔 知道 藥箱 喺 邊處 啊 ，怕 就係 呢件 嘢 就 穿 咗 佢 煲 ，話 喊 就 喊 一啲 都 唔 難 㗎 。
海老公話 ：哎 你 呢個 細路 ，殺個人 又 有 乜嘢 咁 緊要 呢 ？
藥箱 係 喺 第一個 籠 裏 便 吖嘛 。
韋小寶 抽抽噎噎噉 話 ：啊係啊 ，嗯係啊 ，嗯 ，我 ，我好驚啊 。
佢 見 兩個 籠 都係 用 銅 鎖 鎖住 嘅 ，又 唔 知道 鎖匙 放 喺 咩 地方 ，隨手 喺 鎖釦 上面 一 推 ，吖 ，把 鎖 應手 而 開 ，原來 並 冇 鎖實 嘅 。
個 心 諗 ：真 好彩 喇 ，呢 把 鎖 裏 便 啲 古怪 嘢 我 如果 又 唔 知道 ，老 烏龜 呢 必定 會 起 疑心 㗎 喇 。
佢 除咗 把 鎖 ，打開 個 籠 ，見到 裏 便 多數 都係 衣服 嚟 。
左便 呢 有 一個 江湖醫生 用 嘅 藥箱 ，就 攞起嚟 行 出去 外房 。
海老公話 ：挑啲 化屍粉 ，化咗 個 屍首 啦 。
韋小寶 應咗 ，就 拉開 藥箱 嗰啲 一個個 嘅 櫃桶仔 嚟 搵 。
噉啊 見到 櫃筒 裏 便 呢 ，冚𠾴唥 都係 形狀 顏色 各 不相同 嘅 樽仔 ，都 唔知 邊 一 樽 係 化尸粉 ，就 問 ：
係邊個樽啊 ？
海老公 就 話 喇 ：你 呢個 細佬 吖 ，點解 今日 樣樣 都 咁 糊塗 嘅 ？唔通 真係 嚇傻 咗 你 啊 ？
係啊 ，我 ，我好驚啊 ，公公 ，你 雙眼 ，會 ，會唔會 好翻 㗎 ？
佢 語氣 之中 呢 對 佢 個 眼病 嗰種 關心法 啊 ，確實 係 熱切 無比 。
海老公 似乎 頗為 感動 ，用 手 輕輕 摸 下 佢 個 頭 ，就 話 ：
嗰個 三角形 嘅 ，青色 有 白點 嘅 樽 就係 喇 。
呢啲 藥粉 極之 珍貴 㗎 ，就係 挑 啲啲 咁多 就夠 㗎喇 。
韋小寶 應咗 一聲 ，就 攞起 嗰個 青色 白點 嘅 三角樽 ，打開 個 樽枳 。
又 喺 藥箱 裏 便 攞 咗 一張白紙 ， 倒 咗 些 少藥 末 出 嚟 ， 跟 住 就 糝 喺 小桂子 嘅 屍體 上 便 。
乜 過咗 好耐 ，一啲 動靜 都 冇 。
海老公 就 話 ：點啊 ？
韋小寶 話 ：冇 見到 乜嘢 噃 。
你 係 唔係 糝 喺 佢 啲 血 裏 便 吖 ？
吖 ，我 唔 記得 咗 喇 。
佢 又 倒 啲 藥末 糝 喺 屍體 嘅 傷口 嗰度 。
你 今日 呢 ，真係 有啲 古古怪怪 啊 ，連 講 說話 把聲 都 唔同 晒 嘅 。
就喺呢個時候 ，只聽見 小桂子 屍體 嘅 傷口 吱吱聲 ，升起 一啲 煙霧 ，跟住 喺 傷口 裏 便 猛咁 流 啲 黃水 出嚟 ；
嗰啲 煙霧 漸漸 濃 嘞 ，黃水 亦 越 流 越 多 ，發出 又 酸 又 燶 嘅 臭氣 。
噉睇住 屍體 嘅 傷口 越 爛 越 大 ，屍體 啲 肌肉 遇到 黃水 ，即刻 就 發出 煙霧 ，慢慢 亦 化成為 水 ，連 衣服 都係 噉 。
韋小寶 啊 睇到 擘大 個 口 唔 合得翻埋 啊 ，靜靜 攞咗 自己 換出嚟 嘅 長衫 掉 喺 屍體 上 便 。
又見到 自己 着住 嗰對 鞋 呢 ，已經 踢穿咗 頭 㗎 喇 ，連忙 除咗 小桂子 嘅 鞋 ，自己 着起嚟 ，將 對 爛 鞋 就 掉咗 入 啲 黃水 處 。
約莫 過咗 個 幾 時辰 ，小桂子 嘅 屍體 連埋 衣服 鞋物 ，冚𠾴 唥 化晒 去 ，只係 剩低 一 灘 黃水 。
韋小寶 個 心 諗 ：老烏龜 如果 喺 呢個 時候 暈咗 呢 就 真係 好 到 冇得 彈 喇 。
我 將 佢 推 入去 毒水 裏 便 ，一陣間 呢 就 將 佢 化 到 屍骨無存 。
不過 海老公 雖然 不停 咁 咳 ，不斷 咁 唉聲嘆氣 ，之 總係 唔 暈 噃 。
啲 窗紙 漸漸 明亮 ，就嚟 天光 ，韋小寶 個 心 諗 ：
我 已經 換咗 呢一身 衣服 ，堂而皇之 噉 出去 都 冇人 認得 我 喇 ，噉 我 就 唔使 憂 嘞 噃 。
海老公 忽然間 話 ：小桂子 ，就快 天光 喇 係唔係 ？
韋小寶 話 ：係啊 。
你 𢳂啲 水 ，將 地下 沖 乾淨 佢 啦 ，嗰浸 𡃴 唔係 點 好聞 㗎 。
韋小寶 應咗 就 行翻 入去 內室 ，喺 水缸 嗰處 𢳂 咗 幾 殼 水 ，將 地下 啲 黃水 沖咗 去 。
海老公 又 話 ：等陣 食完 早飯 ，就 同 佢哋 去 賭錢 啦 。
韋小寶 覺得 好奇怪 ，估計 啊 實係 反話 啫 ，佢 就 話 ：
賭錢啊 ，我 真係 唔去 啊 ，你 雙眼 又 唔好 嘞噃 ，我 點 能夠 自己 去 玩 呢 ？
邊個 話 係 去玩 啊 ？我 教咗 你 幾個 月 ，幾百 兩 銀 都 輸晒 咯 。
為嚟為去 ，就係 為咗 呢一件 大事 ，你 唔聽 我 吩咐 喇 係唔係 ？
韋小寶 唔明白 佢 嘅 用意 ，就 唯有 含糊其詞 噉 回答 話 ：唔係 ，唔係唔聽 你 吩咐 啊 。
不過 你 身子 唔好 ，咳得 又 厲害 ，我 去 ，去 ，去 做 呢件事 冇人 照顧 你 吖 嘛 。
你 同 我 辦妥咗 呢件事 ，就 乜嘢 都 冇 咁好 。
你 再 擲 一手 試下 。
擲 一手 啊 ， 擲 ， 擲 ， 誒 ， 擲 邊手 啊 ？
快啲 攞 骰仔 嚟 ，推 三 推 四 做 乜嘢 。
你就係唔肯下苦功去練 ，練咗咁耐嘞 ，仲係冇啲進步嘅 。
韋小寶 喺 揚州 ，除咗 聽 古仔 ，大多數 時候 呢 ，就 同 人哋 擲 骰仔 賭錢 。
年紀 雖然 係 細小 啊 ，但係 喺 揚州 街巷 之間 呢 已經 算得 係 一把 好手 。
而家 一 聽話 係 擲骰仔 啊 當堂 成個人 精神晒 。
只係唔知道 啲 骰仔 擠 喺 咩 地方 唧佢 就 話 ：
唉 今日 搞到 我 頭昏腦漲 ，嗰 幾粒 骰仔 都 唔知 擠咗 喺 邊處 地方 咯 。
你 真係 冇 中用 啊 你 ，一聽講 擲骰仔 就 嚇破膽 ，輸咗 啲 錢 又 唔係 輸 你 嘅 。
嗰啲 骰仔 ，唔係 好地地 喺 個 籠 處 咯 。
都唔知 係唔係 啊 。
韋小寶 行 入 內室 打開 個 籠 ，抄 得 幾 抄 ，喺 一 個 錦緞盒 裏 便 果然 見到 有 隻 瓷碗 。
碗裏便 ，有 六粒 骰仔 ，唉 ，真係 他鄉 遇 故知 咯 ，忍唔住 歡呼 一聲 好嘢 。
等到 攞起 六粒 骰仔 喺 手 ，又 是 一聲 歡呼 。
原來 遇到 嘅 不但係 老朋友 啊 ，而且 係 最最最 親密 嘅 老朋友 添 。
呢 六粒 骰仔 一 入手 ，就 知道 係 灌咗 水銀 嘅 老千 骰仔 。
佢 將 瓷碗 同埋 骰仔 攞 到 海老公 身邊 話 ：你 真係 要 我 去 賭錢 啊 ？噉 你 一個人 喺 呢處 冇 人 服侍 你 嘅 噃 得唔得 啊 ？
海老公 話 ：你 咪 咁 啰嗦 啦 。
限 你 喺 十手 之內 ，擲 一隻 天 出嚟 。
當時 擲骰仔 賭錢 ，骰仔 一係 用 四粒 ，或者 係 用 六粒 。
如果 用 六粒 骰 呢 ，就 要 擲 成 四粒 係 相同 嘅 ，其餘 兩粒 ，就 成為 一隻 天九牌 。
兩粒 六點 就係 天 ，兩粒 一點 係 地 。
噉 用 噉樣 嚟到 鬥 大小 。
韋小寶 個 心 諗 ：呢啲 骰仔 係 灌咗 水銀 嘅 ，要 我 十手 先至 擲 成 一隻 天啊 ，嘿 你 太過 睇小 老子 嘞 。
但係 用 灌咗 水銀 嘅 骰仔 作弊 ，就 難過 用 灌 鉛 骰仔 好多 。
佢 連 氣 擲 咗 四五 手 都 擲唔出 點子 。
噉啊擲到第六手 ，兩粒六點 ，三粒三點 一粒四點 。
如果 呢粒 骰 唔係 四點 而 係 三點 呢 ，噉 呢隻 天 就 擲出嚟 喇 。
佢 用 手指 尾 輕輕 一撥 ，將 呢粒 四點 撥 成 三點 就 拍手 大叫 話 ：好嘢 好嘢 ，呢隻 唔係 就係 天 咯 。
海老公話 ：你唔好 蝦 我 睇唔見 ，攞過嚟 畀 我 摸下 。
噉啊 伸手 喺 瓷碗 處 一摸 ，果然 六粒 骰仔 之中 四粒 三點 兩粒 六點 。
海老公 話 ：今日 咁好 手氣 呢 ，擲個 梅花 出嚟 睇下 。
韋小寶 攞起 骰仔 ，正 話 想 擲 嘅 時候 心念 一動 ：
聽佢嘅口氣 ，小桂子 呢隻 小烏龜 擲骰仔 嘅 本事 係 好 水皮 嘅 。
我 如果 擲 乜嘢 有 乜嘢 ，乜實 會 引起 老烏龜 疑心 㗎 。
手勁 一轉 ，連 擲 咗 七八 手 都係 唔成 ，再 擲 一手 之後 就 歎 一口氣 。
海老公 問 ：擲 成 乜嘢 啊 ？
韋小寶 話 ：係 ，係誒 。
海老公 哼咗 一聲 ，噉啊 伸手 落 碗 去 摸 ，摸到 係 四粒 兩點 ，一粒 四點 啊 一粒 五點 ，係 個 九點 。
海老公話 ：手勁 就 差咗 呢啲啲 咁多 ，梅花 變成咗 九點 ，不過 九點 都 唔 細 喇 ，你 再 試下 。
韋小寶 試咗 十七八手 ，擲出咗 一隻 長三 ，噉啊 比 梅花 只係 差 一級 。
海老公 摸 清楚 之後 都 幾 高興 。
都有啲長進喇 ，去 試下 手氣 啦 ，今日 帶 五十 ，五十兩銀 去 。
韋小寶 啱先 喺 個 籠 處 抄 骰仔 嘅 時候 就 已經 見到 十幾隻 元寶 。
講到 賭錢 呢 本來 係 佢 平生 最 鐘意 嘅 嘢 。
不過 一來 就 冇 本錢 ，二來 呢 太過 鐘意 出 老千 。
揚州市井之間 人人 都 知道 有個 老千仔 ，噉 除咗 外來 嘅 羊牯 之外 啊 ，邊個 都 唔 上 佢 當 。
而家 啱啱 個 心 定翻啲 ，忽然間 話 能夠 去 賭錢 喎 ，何況 賭本 竟然 有 五十 兩 銀 咁多 ，嘿 真係 連 發 夢 都 發唔到 咁 威 㗎 。
更何況 有 老千 骰仔 帶埋 去 添 嗨 真係 啱啱 行出 地獄 啊 即刻 上 天堂 ，就算 賭完 要 殺頭 啊 都 唔肯 逃走 住 喇 。
只係 唔知道 對手 係 邊個 ，去 邊度 賭 啫 。
如果 樣樣 都 要 問 ，即刻 就 會 穿煲 㗎 嘞 噃 死喇 ，唉 真係 天大 嘅 難題 啊 。
佢 打開 個 籠 ，攞咗 兩 隻 元寶 每隻 都係 廿五 兩 重 嘅 。
正 喺 度 諗 緊 睇 下 有 乜 法子 就 可以 氹 到 海老公 嘅 説 話 呢 噉 ， 忽間 聽見 門外 有人 嗌： 小桂子 ， 小桂子 。
韋小寶 行 出去 外堂 應咗 一 聲 。
海老公 細細聲 話 ：嚟 叫 你 喇 ，快啲 去 啦 。
韋小寶 歡天喜地 正話 想 出門口 ，猛然間 諗起 弊傢伙 喇 。
嗰啲 賭鬼 唔係 盲公 噃 ，佢哋 一眼 就 知道 我 唔係 小桂子 啦 ，噉 點算好 呢 ？
只聽見 門外 嗰個人 又 嗌 喇 ：
小桂子 你 出嚟 啦 ，有 説話 同 你 講 啊 。
韋小寶 應住 佢 話 ：嚟喇 。
咪即刻返去內室攞咗塊白布纏住塊面 ，只係露出一隻眼同個嘴 ，咪對海老公話 ：我去喇 。
快快脆脆 行出 房門 。
只見 門外 有 一名 三十幾歲 嘅 漢子 企 響 處 細細聲 問 ：你 做咩 啊 ？
韋小寶 話 ：輸咗 錢 ，畀 公公 打 到 眼青面腫 咯 。
嗰個人 笑咗 一笑 ，咪 一啲 都 冇 懷疑 又 細細聲 問 ：
你 敢唔敢 再 去 翻本 吖 ？
韋小寶 拉住 佢 衫袖 行開 幾步 細細聲 話 ：
唔好 畀 公公 聽見 啊 ，梗係 要 翻本 啦 。
嗰個人 戙起 手指公 ：叻仔 ，有種 ，走喇 。
噉啊韋小寶 同佢 一拍 噉行 ，見到 呢個 人 頭 細 額 窄 ，面色 青白 。
行咗 幾丈 之後 嗰個人 話 ：
温家 兩 兄弟 、平威 佢哋 都 已經 去咗 先 喇 。
今日 你 嘅 手氣 要 好啲 至 得 。
韋小寶話 ：今日 如果 再 唔 贏 呢 ，噉 ，噉就 弊傢伙 咯 。
一路上行嘅 都係 迴廊 ，噉啊 穿過 一處處 嘅 庭院 花園 。
韋小寶 個 心 諗 ：佢 阿爺 吖 呢 個 財主 真係 有錢 噃 ，起 咁 大 間 屋 喎 。
噉啊只見飛簷繪彩 ，樑柱雕花 。
佢 一生之中 啊 ，邊度 見過 咁 富麗豪華 嘅 大屋 呢 ？佢 心諗 ：
我哋 麗春院 喺 揚州 ，亦都 算得上 係 數一數二 嘅 靚屋 㗎 啦 ，吖 比起 呢處 嚟 真係 爭得遠 喇 。
喺 呢處 啊 開 間 院子 ，嗰班 嫖客 就 有得 開心 喇 。
不過 咁 大 嘅 院子 裏 便 如果 唔 坐 滿百 零個 姑娘 呢 亦 太過 唔 似 樣 嘅 。
韋小寶 跟住 嗰個 人 行咗 好耐 下 ，就 行 入 一 間 偏屋 。
穿過咗 兩間 房間 ，嗰個人 就 敲 門 喇 。
篤 、 篤 、 篤 ， 三下 ， 篤 、 篤 ， 兩下 ， 又 試篤 、 篤 、 篤 三下 ， 噉 嗰 道門 呢 咦 一聲 開 咗 。
只聽見 叮叮鈴 叮叮鈴噉樣 骰仔 落 碗 嘅 聲音 ，哎呀 ，聽起上嚟 真係 好聽過 乜 啊 。
房間 裏 便 已經 有 五六個 人 喺 處 呢 ，都 係 一樣 噉 嘅 打扮 ，正在 聚精會神 噉 喺度 擲緊 骰仔 。
一個 二十零歲 嘅 漢子 就 問 ：小桂子 你 做咩 啊 喂 ？
噉 帶 佢 入嚟 嗰 個 人 笑住 話 ：輸咗 錢 ，畀 海老公 打 嘅 。
嗰個人 笑咗 一笑 ，跟住 就 嘖嘖嘖 咁 嘖 幾聲 。
韋小寶啊 企 喺 啲 人 後 便 ，見到 各人 正 就 落注 ，有 啲 一兩 有啲 五錢 ，都 係 竹籤 籌碼 。
佢 又 攞出 一隻 元寶 就 買咗 五十 支 五 錢 銀 嘅 籌碼 。
有個人 話 ：小桂子 ，今日 偷咗 幾多 錢 出嚟 輸 啊 ？
韋小寶 話 ：呸 ！咩 偷唔偷 輸唔輸 嘅 啫 ，咁 難聽 嘅 。
佢 本來 想 烏龜 王八蛋 噉 亂鬧 一輪 㗎 喇 ，只係 發覺 自己 講説話 嘅 腔調 同 佢哋 太過 唔似 ，一 鬧人 就 更加 容易 露出 馬腳 嘞 。
個 心 諗 ：都係 少 開口 為妙 喇 。
一方面 呢 ，就 留心 學 佢哋 嘅 説話 。
嗱 各位 ，欲知 後事 如何 ，且 聽 下回 分解 。
