前文 再續 書 接 上 一回 啊 。
話説 茅十八 同 韋小寶 啊 嚟到 一個 小市鎮 ，喺 一間 飯店 打尖 。
韋小寶 喺 妓院 裏 便 食飯 呢 向嚟 都 係 坐 喺 廚房 門檻 上 便 ，捧住 一隻 青花 大碗 ，裝 碗飯 ，上面 就 堆滿 嫖客 食剩 嗰啲 雞 鴨 魚 肉 。
餸菜 雖然 係 唔少 ，但係 從來 都 未曾 同人 一拍噉 坐 喺 飯台 上 便 ，正正經經 食過 一餐飯 嘅 。
呢陣時 見 茅十八 當 佢 係 平起平坐 嘅 朋友 ，而家 雖然 只係 幾碗 粗麵 ，一碟 炒蛋 ，個 心 呢 亦 歡喜 到 不得了 。
佢 食咗 半碗 麵 ，就 聽見 門外 人 喊 馬 嘶 ，有 十七八 個 人 湧入嚟 ，睇 啲 樣 呢 係 官差 嚟 。
韋小寶 心驚 喇 佢 細細聲 話 ：
喂 ，係 官兵 啊 ，怕 係 嚟 捉 你 㗎 ，我哋 快啲 趯嘞 。
茅十八 哼咗 一 聲 ，放落 筷子 用 手 撳住 刀柄 。
不過 呢班 人 對 佢 呢 都 冇 理 嘅 ，只係 猛咁 催 店小二 快啲 炒 餸 。
小鎮 上面 嘅 飯店仔 啊 冇 咩嘢 好 菜式 ，就係 不過 啲 醬肉 啊 熏魚 啊 鹵水豆腐乾 啊 炒蛋 啊 噉唧 。
呢班人 當中 嗰個 阿頭 就 吩咐 攞 自己 帶嚟 嘅 火腿 ，同 風雞 嚟 送飯 。
有個人 話 ：
我哋 喺 雲南 呢 一向 都 聽講 話 江南 係 好 地方 ，着嘅 係 綾羅 綢緞 食嘅 係 山珍 海味 。
我 睇 啊 ， 只 係 講 食 嘅 呢 ， 都 未必 比得上 我 哋 昆明 啊 。
另外 有個人 就 話 ：你 老哥 喺 平西王府 享福 享慣 咗 ，食 嘅 飲 嘅 梗係 大 不相同 啦 。
不過噉呢 就 唔係 話 江南 比 唔上 雲南 噃 ，雖知 世間上 及得上 平西王府 嘅 就 好少 好少 㗎嘛 。
大家 都 話 ：係啊 係啊噉 。
茅十八 諗 ：唔通 呢班 狗腿 係 大漢奸 吳三桂 嘅 部下 ？
噉又 有 個 面色 焦黃 嘅 漢子 問 ：
黃大人啊 ，你 呢趟 上京 能唔能夠 見到 皇上 呢 ？
有個 肥肥白白 嘅 人 就 話 ：以 我 嘅 官職 嚟 講 ，本來 係 見唔到 皇上 嘅 ，不過 靠 我哋 王爺 嘅 面子 ，講唔定 能夠 陛見 嘅 。
朝廷上 嗰啲 粗嘢 對 我哋 西選 嘅 官員 總係 另眼相看 幾分 嘅 。
另外 有 個人 話 ：噉 啊 梗係 啦 ，而家 世間 上 除咗 皇上 ，就 輪到 我哋 王爺 為 大 㗎 啦 嘛 。
茅十八 忍唔住 喇 ，佢 大聲 話 ：
喂 ，小寶 啊 ，你 知唔知道 世間上 最 唔要面 嘅 係 邊個 啊 ？
韋小寶 話 ：我 梗知 啦 ，就係 啲 烏龜 王八蛋 咯 。
佢啊 其實 唔知 嘅 ，呢句 説話 講咗 等於 冇 講 。
啪 一 聲 茅 十八 喺 枱 面 出力 一 拍 ，佢 話 ：冇 錯 喇 ，烏龜 王八蛋 又 係 邊個 呢 ？
韋小寶話 ：佢 阿爺 吖 ，烏龜 王八蛋 就 豈有此理 佢 都 唔係 好嘢 。
講完 ，亦 出力 拍咗 一下 枱面 。
茅十八 話 ：我 話 你 聽 啦 嗱 。
呢個 烏龜 王八蛋 呢 ，係 一個 認賊作父 嘅 大 漢奸 ，將 我哋 大好 江山 ，花花世界 ，雙手 送咗 畀 清兵 。
佢 講到 呢處 ，嗰 十幾 名 官府 嘅 人 都 睩大 雙眼 望住 佢 ，有 啲 呢 已經 係 滿面 怒容 嘞 。
茅十八 話 ：呢個 大漢奸 姓 吳 。
一隻 烏龜 係 吳一龜 ， 兩隻 烏龜 係 吳二龜 ， 噉 三隻 烏龜 呢 ？
韋小寶 啊 大聲 接住 話 ：吳三龜 ！
茅十八哈哈大笑 ：哈哈哈哈 ，冇錯 ，就係 吳三桂 呢個 大 。
漢奸 兩個 字 都 未曾 講 出口 ，倾鈴 撐啷 七八 個 人 手 執 兵器 ，一齊 向住 茅十八 打過嚟 。
韋小寶 連忙 蜎 落 枱 底 ，只 聽見 乒乒乓乓 ，茅十八 手 揮 單刀 已經 同 人哋 鬥 起 上嚟 嘞 。
韋小寶 見到 佢 坐 喺 橋凳 上面 唔逳 ，知道 佢 大髀 受咗 傷 ，行動 唔方便 ，個心 好 着急 。
過咗 一陣間 ，嘭 一聲 ，一把 單刀 跌咗 喺 地 ，噉 跟住 有 個人 大聲 慘叫 𢴈咗 開去 。
但係 對方 人多 啊 ，韋小寶 見到 張枱 四周圍 隻隻 腳 喺 處 係 咁 逳 係 咁 逳 。
呢 啲 腳 着 嘅 呢 都 係 布鞋 或者 係 皮靴 ， 噉 自 不然 都 係 敵人 嘞 ， 因為 茅十八 着 嘅 係 草鞋 。
只聽見 茅十八 一便 打 一便 鬧 ：吳三桂 係 大漢奸 ，你哋 呢批 小漢奸 ，老子 唔 將 你 一個 二個 殺到 乾乾淨淨 ，哎呀 ！大叫 一聲 ，睇起嚟 係 身上 受咗 傷 。
跟住 ，只見 有 個人 打 仰跌倒 ，心口 噗噗聲 噉 流血 。
韋小寶 偷偷 哋 伸 隻 手 出去 ， 執起 跌 喺 地下 嗰 把 鋼刀 ， 對準 一隻 着 住 布鞋 嘅 腳 ， 一刀 向 住 腳背 剁 落 去 ， 咔 一聲 。
嗰個人 半隻腳板 啊 當堂 畀 佢 斬斷 ，嗰個人 哇噉 一聲 大叫 啊 ，即刻 就 𢴈低 嘞 。
枱底啊黑𠵼𠵼 ，嗰啲人啊 打到亂晒籠 ，邊個都唔知道 嗰個人 因咩事 幹受傷 ，估話 係畀茅十八打傷嘅啫 。
韋小寶 見到 呢 籠 嘢 使得 唄 ，好食 就 返 尋味 喇 ，攞起 單刀 又 將 有 個 人 嘅 腳掌 斬斷 。
嗰個人 啊 冇𢴈到 噃 ，佢 大聲 嗌 ：枱底 ，底下 ！
正話 想 彎腰 去 睇 ，就 畀 茅十八 一刀 背打 正 後腦 ，當堂 暈咗 。
噉 就 喺 呢 個 時候 ， 韋小寶 又試 一刀斬 喺 一個 人 嘅 小腿 上 便 。
嗰個人 大叫 一聲 ，左手 一抽 張枱 ，噉 成張枱 就 連埋 碗筷 湯麵 就 飛起嚟 。
嗰個人 跟住 舉刀 向住 韋小寶 兜頭 斬落去 。
茅十八 揮刀 隔開 佢 ，韋小寶 連 爬 帶 滾 喺 人叢 之中 就 蜎咗出嚟 。
嗰個 小腿 被 斬 嘅 人 嬲 到 極 啊 ，挺 刀 追殺 過去 。
韋小寶 大叫 一聲 又 蜎入 另外 一張 枱 底 。
嗰個人 話 ：衰仔 ，你 出嚟 啦 。
韋小寶 話 ：衰佬 ，你 入嚟 啦 。
嗰個人 嬲到 極 ，伸手 又 想 去 抽 張 枱 。
突然之間 啪 一聲 ，心口 中咗 一拳 ，成個人 飛咗 出去 。
原來 係 坐 喺 枱邊 嘅 一個 人 打咗 佢 一拳 啊 。
出拳嘅人 ，跟住 喺 枱面 嘅 筷子筒 裏 便就 攞起 一紮 竹筷子 ，一隻隻 噉 掟出去 ，只 聽見 一串 哎吖哎吖 嘅 慘叫聲 。
圍攻 茅十八 嗰 班人 啊 紛紛 畀 筷子 插中 嘞 。
有 啲 係 中眼 ， 有 啲 係 中面 珠 ， 都 係 打傷 緊要 嘅 地方 。
有 個人 大聲 叫 ：啲 強盜 厲害 啊 ，大家 走人 喇 。
噉就 扶起 啲 傷員 奪門 而 出 ，跟住 聽見 馬蹄 聲 響嘞 ，一行人 上馬 飛奔 而去 。
韋小寶 咔咔聲 噉 笑啊 ，喺 枱底 蜎 翻出嚟 ，隻手 呢 ，仲 揸住 一把 帶血 嘅 鋼刀 。
茅十八 趷下趷下 噉 行過去 ，向 坐 喺 枱 邊 嘅 人 抱拳 行禮 話 ：
多謝 尊駕 出手 助拳 ，否則 茅十八 寡 不敵 眾 ，今日 嘅 事 就 好 惡搞 。
韋小寶 捩轉頭 睇下 ，咦 ，原來 坐喺度 嗰個人 啊 ，就係 先頭 喺路上 拉住 佢 隻馬 個 漢子 ，自己 曾經 鬧過 佢 幾句 嘅 。
嗰個 漢子 企起身 嚟 還禮 話 ：
茅兄 身上 早就 負咗 傷 ，仍然 係 激於 義憤 ，痛斥 漢奸 ，真係 令人 十分 尊敬 。
茅十八 笑嘞 ：我 生平 最痛恨 嘅 人 ，就係 大漢奸 吳三桂 ，只係 可惜 呢個 惡賊 喺 雲南 咁 遠 ，冇法子 去 搵 佢 晦氣 唧 。
今日 打咗 佢 手下 嘅 小漢奸 ，真係 痛快 。
哎 請教 閣下 尊姓 大名 。
嗰個 漢子 話 ：呢處 人 多 講起嚟 唔 方便 ，茅兄 ，我哋 走 嘞 ，後會 有期 。
講完 ，轉身 去 扶 枱邊 嘅 一個 女客 。
嗰個 女客 啊 始終 耷低 個 頭 ，見唔到 佢 個 樣 。
茅十八 唔高興 嘞 ：你 姓名 都 唔肯 講 ，你 太過 睇唔起 人 嘞 。
嗰個人 並冇 出聲 ，只係 扶住 嗰個 女客 行出去 。
當 佢 經過 茅十八 身邊 嘅 時候 ，細細聲 講咗 句 説話 。
茅十八 周身 一震 ，即刻 非常之 恭敬噉 話 ：
係 嘅 ， 係 嘅 ， 茅十八 今日 見到 英雄 ， 真 係 ， 真 係 三生有幸 。
嗰個人 亦 冇 回答 ，扶住 嗰個 女客 出咗 門口 ，上 車 騎馬 走咗 。
韋小寶 見到 茅十八 嘅 神情 前倨後恭 ，覺得 好奇怪 就 問 佢 ：
呢個 嘢 係 咩 來頭 啊 ？睇 你 ，嚇 成 噉 嘅 樣 。
茅十八 話 ：咩嘢嘢聲 ，你 把 嘴 乾淨啲 吓 。
見到 飯店 嘅 老闆 同埋 夥記 探頭探腦 ，大堂 呢 搞到 一塌糊塗 滿地 鮮血 就 話 ：走喇 。
噉就 扶住 枱 行到 門邊 ，攞起 一條 門戌 做 枴杖 ，噉啊 行到 外 便 。
喺 馬樁 上面 解開 馬韁 話 ：嗱 ，你 摱住 馬鞍 ，用 左腳 先 踩 馬踏凳 ，然後 上馬 。
冇 錯 喇 ， 冇 錯 喇 ， 就 係 噉 樣 。
韋小寶話 ：我 本來 會 騎馬 㗎 不過 好耐 冇 騎 就 唔記得 咗 啫 嘛 ，有 咩 咁 稀奇 唧 ？
茅十八 笑咗 一笑 ，噉 就 跳 上 另外 一匹 馬 ，左手 牽住 韋小寶 坐 嗰隻 馬 嘅 韁繩 ，就 向住 北方 行 ，佢 話 ：
我負 咗 傷 ， 如果 遇上 鷹爪 就 對付 唔 了 嘅 ， 我 哋 唔 好 再行 官道 喇 ， 要 搵 笪 隱蔽 啲 嘅 地方 養好 傷先 再講 。
韋小寶 話 ：先頭 嗰個人 嘅 武功 都 幾 使得 㗎噃 ，一隻隻 竹筷子 啊 掟 出去 ，就 將 啲 人 打走 咗 喇 。
茅大哥啊 ，我 睇 你 又 唔 及 佢 喇 。
噉啊梗係啦 ，佢 係 雲南 沐王府 嘅 英雄 ，點會 話 唔使得 㗎 ？
佢 係 雲南 沐王府 嘅 咩 ？我 仲 以為 係 天地會 嗰個 咩 陳 總舵主 添 。
睇 你 嚇 成 嗰個 衰樣 。
我嚇 咩 嘢 嚇 ， 死 僆 仔 你 亂 噏 無為 ， 我 係 尊敬 沐 王府 ， 對 佢 應該 客氣 三分 嘅 。
人哋 又 冇 同 你 客氣 噃 又 ，你 問 佢 尊姓大名 佢 理 都 唔 理 ，只係 話 ，我哋 走 喇 後 會 有 期 噉 。
噉佢 收尾 唔係 同我 講 咗 嘞 咩 ？如果 唔係 我 點知 佢 係 沐王府 㗎 ？
佢 喺 你 耳仔 邊 噏咗 句 咩嘢 説話 唧 ？
佢 話 ：在下 係 雲南 沐王府 嘅 ，姓 白 。
哦 ，姓 白 ，原來 係 個 專食 白食 嘅 。
細路仔 唔好 亂講 嘢 吓 。
你 見到 沐王府 啲 人 就 嚇到 魂不附體 ，老子 啊 當 佢 冇 嚟 噃 。
茅大哥 ，你 唔怕 鰲拜 ，又 唔怕 大漢奸 吳三桂 ，咪 走去 怕 咩 雲南 沐王府 ，唔通 佢哋 真係 有 三頭六臂 咩 ？
啊 ， 我知 喇 我 知 喇 ， 你 怕 佢 用 兩隻 筷子 督盲 你 呢 雙眼 ， 茅十八 啊 變成 茅盲公 。
我 亦 唔係 怕 佢哋 ，只不過 江湖 上 嘅 好漢 ，如果 得罪 咗 雲南 沐王府 ，冇 咗 條 命 唔 緊要 啊 ，至 衰 又 惹到 萬人 唾罵 畀 人哋 睇唔起 唧 。
雲南 沐王府 到底 係 咩 東東 唧 ？咁 厲害 嘅 。
你唔係 武林 人士 同 你 講咗 你 亦 唔明 㗎 喇 。
你 睇 你 叻得 咁 交關 ，你 唔 講 就 罷啦 我 一啲 都 唔 稀罕 啊 。
我哋 喺 江湖 上 行走 ，如果 見到 雲南 沐王府 嘅 人 ，本來 就 極之 唔 容易 ，要 同 佢哋 結交 噉 就 更加 係 難上加難 。
今日 啱啱 撞正 老子 同 吳三桂 嘅 手下 嚟 逳手 ，沐王府 同 吳三桂 係 死對頭 嚟 ，佢哋 自不然 要 幫 我 啦 。
偏偏 你 呢個 衰仔 唔學好 ，一味 使埋 嗰啲 下九流 嘅 手段 ，搞到 老子 都 畀 人哋 睇唔起 。
講下講下 ，茅十八 不由得 滿面 怒容 。
韋小寶 話 ：哎吖 ，嘖嘖嘖嘖嘖嘖 ，人哋 擺起 個 臭架子 唔肯 同 你 做 朋友 ，做咩事 要 怪起 我 嚟 啫 ？
茅十八 發火 鬧 佢 ： 你 蜎 喺 枱 底 用 刀 去 剁 人 哋 腳背 ， 豈有此理 ， 噉 算 係 咩 武功 啊 ？
人哋 英雄好漢 睇到 晒喇 ，仲 點 會 當 我哋 係 朋友 吖 ？
哈 ，你 阿爺 吖 ，如果 唔係 老子 剁咗 人哋 幾隻 腳背 呀 ，怕 你 條 命 早 就 冇 咯 ，而家 反轉頭 嚟 怪 我 喎 。
茅十八 就 想起 畀 雲南 沐王府 啲 人 睇唔起 越 想 就 越 嬲 ，佢 話 ：
我 叫 你 唔好 跟埋嚟 㗎 嘞 ，你 偏要 跟嚟 。
你 用 石灰 糝 人 雙眼 ，呢啲 噉 嘅 下九流 嘅 行為 ，喺 江湖 上 係 最 畀 人哋 睇唔起 嘅 ，比起 落 蒙汗藥 燒 悶香 ，仲 要 賤格 三等 。
我 寧可 畀 嗰 個 黑 龍 鞭 史 松 殺 咗 ， 亦 唔 願 畀 你 用 呢 啲 噉 嘅 卑鄙無恥 嘅 下流 手段 嚟 救 翻 條命 啊 。
豈有此理 你個 死僆仔 ，我 越 睇 你 越 嬲 ！
韋小寶 噉 先至 明白 ，原來 用 石灰 糝 人 雙眼 喺 江湖 上 係 極其 下流 嘅 事 ，自己 竟然 係 犯咗 武林 中 嘅 大忌 。
至於 蜎喺 枱底 啊 斬 人哋 腳板 ，顯然 亦 唔係 咩嘢 光彩 武功 。
但係 而家 畀 茅十八 啊 鬧 到 惱羞成怒 就 惡死 揗揗噉 話 ：
唓 ，用刀 殺人 係 殺 ，用石灰 殺人 亦 係 殺啫 嘛 ，又 有 咩 上流 下流 啊 ？
如果 唔係 我 呢個 死僆仔 用 下流 手段 救 你 啊 ，你 呢個 死僆佬 早 就 做 咗 上流鬼 喇 。
你 嘅 大 髀 唔 係 受 咗 傷 咩 ？ 人 哋 用 刀 斬 你 大 髀 ， 我用 刀 斬 人 哋 腳板 ， 大 髀 同埋 腳板 都 係 下 橛 嘅 嘢 嚟 啫 嘛 有 咩 分別 唧 ？
你唔願 我 跟 你 去 北京 ，噉 就 你 行 你嘅 我 行 我嘅 ，以後 大家 各 不 相識 就係 喇 。
茅十八 見到 佢 周身 又係 泥塵 又係 血跡 ，個心 諗 呢個 細佬哥 所以 受傷 ，都係 因為 自己 而起 嘅 。
呢處 離開 揚州 已經 好 遠 喇 ，你 話 將 呢個 細路 撇 低 喺 荒野 之中 噉 實在 係 講唔過去 。
何況 呢個 細佬哥 對於 自己 有 兩次 救命 之恩 ，又 點 能夠 忘恩負義 呢 ？於是 話 ：
好啦 ，我 帶 你 去 北京 係 可以 嘅 ，不過 你 要 聽 我 三件事 至 得 。
韋小寶 噉 就 歡喜 喇 佢 話 ：聽 你 三件事 啫 嘛 有 乜 緊要 啫 ？大丈夫 一言既出 咩 馬 難 追 。
佢 曾經 聽 啲 講古 先生 講過 駟馬 難追 ，但 呢個 駟 字 呢 佢 硬係 記唔起 嘅 。
茅十八 話 ：第一件 ，唔准 惹 是生非 。
唔准 用 啲 污糟邋遢 嘅 説話 嚟 鬧人 ，把口 講 嘢 要 乾淨啲 。
韋小寶 話 ：噉 容 乜 易啫 ，唔鬧 咪 就 唔鬧 ，不過 噉噃 ，如果 人哋 蝦 到 我 頭上 呢 ？
好地地 人哋 為咩事 要 蝦 你 吖 ？
第二件 ，如果 同人哋 打交 就 唔准 用口 咬人 ，更加 唔准 糝 石灰 整壞 人 雙眼 。
至於 喺 地下 轆 ，匿埋 喺 枱 底 剁 人哋 腳板 ，蜎 人哋 褲𧚅 ，捻 人哋 陰囊 ，打 輸 咗 就 喊 ，或者 典 喺 地 詐死 噉 呢啲 噉嘅 勾當 一件 都 唔 准 做 。
呢啲 行為 呀 ，都係 使到 人哋 睇唔起 嘅 ，唔係 英雄 好漢 嘅 所為 ，知唔知 ？
我 打唔過 人哋 唔通 一味 捱打 都 唔 還手 嘞噃 ？
還手 要 靠 真 武功 ， 好似 你 呢 啲 噉 嘅 無賴 流氓 手段 ， 畀 人 哋 見到 呀 笑 歪 人 嘅 嘴 啊 。
你 喺 妓院 嗰處 鬼混 噉 就 乜 都 唔緊要 啦 ，不過 跟住 我 行走 江湖 ，就 趁早 唔好 搞 呢一套 嘢 。
韋小寶 個 心 諗 ：你 話 打交 要 靠 真實 武功 ，我 個 細路仔 有 咩 真實 武功 啫 ？
噉又唔准 噉又唔准 ，咪 即 叫 我 捱打 唔 還手 。
茅十八 又 話 ：武功 都 係 學 翻嚟 嘅 啫 ，邊個 喺 阿媽 個 肚 處 將 武功 帶 出 嚟 嘅 唧 ？
你 年紀 仲 細 ，呢個 時候 開始 練武 仲 嚟得切 嘅 。
嗱 ，你 叩頭 拜 我 為 師 ，我 收咗 你 呢個 徒弟 。
我 一生 浪蕩 江湖 ，從來 冇 幾多 日 能夠 安靜 落嚟 好好地 收翻 個 徒弟 。
算 你好彩數 ，只要 你 肯 聽話 ，勤學苦練 ，將來 都 未嘗 唔 可以 練成 一身 好 武藝 嘅 。
茅十八 講 呢番 説話 都係 好 真心 嘅 。
點知道韋小寶猛咁擰頭話 ：唔得 ，我 同 你 係 平輩 朋友 啫嘛 ，如果 拜 你 為 師 ，豈唔係 矮咗 成輩 ？
哈 ，你 阿爺 吖 ，你 不懷好意 想 攞 我 便宜 。
茅十八 真係 嬲 啊 ，喺 江湖 上 都 唔知 有 幾 多人 曾經 想 拜 佢 為 師 ，學 佢 江湖 上 赫赫 有名 嘅 五虎 斷門 刀法 。
只係 呢啲 人 呢 唔係 心術不正 就係 資質 唔好 ，又或者 係 機緣 唔啱 ，自己 有 要事 在身 唔得閒 收 徒弟 。
今日 感激 韋小寶 救過 自己 條 命 ，想 教 佢 武功 ，哈 ，誰不知 佢 一口 拒絕 。
佢 嬲 起上嚟 就 想 一掌 打過去 ，噉 啊 手 已經 遞起 㗎 嘞 ，佢 終於 忍住 冇 打 佢 話 ：
我 同 你 講吓 ，而家 我 係 心血來潮 ，先 肯 收 你 做 徒弟 嘅 啫 。
以後 啊 ， 你 就算 叩 一百個 響頭 求 我 ， 我 都 唔 收 啊 。
韋小寶 話 ：哎 你 估 我 好 稀罕 啊 ，以後 你 就算 叩 三百個 響頭 求 我 ，哀求 我 拜 你 為 師 我 都 仲 唔 肯 啊 。
做咗 你 徒弟 乜嘢 事 都 聽 你 吩咐 ，仲有 咩 癮頭 唧 ？我 唔 想 學 你 啲 武功 。
好 ，唔學 就 唔學 。
將來 你 畀 敵人 捉住 ，死 又 唔 死得 生 又 唔 生得 ，你 就 唔 好 後悔 。
有咩 好後悔唧 ，哼 ，就算 學到 同你一樣 噉嘅 武功 ，又 有咩 好啊 ？
你 畀 黑龍鞭 纏實 ，逳 都 唔 逳得 ；
見到 雲南 沐家 一個 食白食 嘅 傢伙 ，恭恭敬敬 噉 一味 想 拍馬屁 托大腳 同 人哋 交朋友 ，人哋 偏偏 唔 騷 你 。
我 武功 雖然 唔及 你 唧 ，不過 ……
茅十八 就 越 聽 越 嬲 ，點 都 忍唔住 喇 ，啪 一聲 ，出力 摑 咗 佢 一巴 。
韋小寶 估到 佢 實要 打 嘅 嘞 ，竟然 唔 喊 噃 ，忽然間 哈哈 大笑 話 ：
嘿嘿嘿嘿嘿 ，你 畀 我 講 中 咗 心事 噉 先 大發脾氣 啫 嘛 。
我問 你 ， 係 咪 你 想 同人 哋 交朋友 人 哋 唔 騷 你 ， 你 就 將成 肚氣 出 喺 老子 身上 吖 ？
茅十八 對 呢 個 細路 真 係 冇 佢 收 咯 ， 打 亦 唔 係 鬧 亦 唔 係 ， 撇 低 佢 唔 理 又 唔 係 。
佢 本來 係 霹靂火爆 嘅 脾氣 ，而家 就 唯有 夾硬 忍耐 哼咗 一聲 ，唂 起 泡腮 鬆手 放開 韁繩 大聲 叫話 ：
馬 ，快啲 打個 後抽 ，將 呢個 僆仔 𢴈到 佢 半死 。
佢 本來 要 韋小寶 聽 佢 三件事 嘅 ，但係 講到 第二件 呢 就 講唔埋 喇 ，第三件事 係 乜嘢 呢 佢 都 想唔起 咯 。
韋小寶 自己 拉住 馬韁 ，嗰 匹 馬 就 好 聽話 噃 ，乖乖 噉 行 ，並 冇 同 佢 為難 。
韋小寶 好 高興 個 心 諗 ：
你 唔 教 我 騎馬 老子 噉 咪 自己 會 騎 嘞 咩 ？
佢 又 諗 ：以後 我 跟住 你 行走 江湖 ，總係 會 時時 見到 你 同 人哋 逳手 打交 嘅 ，你 唔 教 我 ，唔通 我 冇 生眼 㗎 我 唔會 睇 㗎 ？
我 不但 會 學 你 嘅 武功 啊 ，連 你 對頭 嘅 武功 一齊 學埋 。
噉幾個人嘅武功 加埋一齊 ，自不然 就 叻過 你 ，呸 ，好稀罕啊 。
吖 不過 個 食白食 嗰 個 嘢 掟 筷子 嘅 本事 就 好好使 㗎 噃 ，如果 佢 叩頭 畀 老子 ，𠼮 我 學 佢 呢 門 功夫 噉 老子 倒 不妨 應承 佢 噃 。
哈佢阿爺吖 ，佢 為咩 要 叩頭 畀 我 ，𠼮 我 學 佢 嗰 門 功夫 啫 ？
諗到 呢處 不禁 咭 一聲 笑咗 出聲 。
茅十八 就 擰轉頭 問 佢 ：有 咩 事 咁 好笑 ？
韋小寶 話 ：我 諗 沐王府 食 白食 嗰個 嘢 。
邊個 食 白食 嗰個 嘢 啊 ？
佢 唔係 姓 白 嘅 咩 ？
姓白 還姓 白 ， 乜姓 白 嘅 就 食 白食 嘅 咩 ？
佢 哋 姓 白 嘅 ， 喺 雲南 沐 王府 啊 認真 了不起 啊 。
劉 、白 、方 、蘇 ，係 雲南 沐王府 嘅 四 大家將 。
咩 三大家將 四大家將 唧 ，沐王府 究竟 係 乜嘢 鬼嘢 嚟 啊 ？
喂 你 把 口 乾淨 啲 得 唔 得 啊 ？
喺 江湖 上 提起 沐 王府 ， 冇 個 唔 佩服 到 五體投地 嘅 ， 咩 鬼 嘢 鬼 嘢 。
韋小寶 就 哦噉 應咗 一聲 。
嗱 各位 ，欲知 後事 如何 ，且 聽 下回 分解 。
