前文 再續 就 書 接 上一回 啊 ，話説 韋小寶 偷懶 ，裝模作樣 磨 咗 一陣 刀 ，就 話 去 買 啲 油條 饅頭 翻嚟 食 。
茅十八 話 ：邊度 有 油條 饅頭 賣 啊 ？
呢 過去 嗰 便 冇 幾 遠 ，有 個 小 市鎮 ，係 喇茅 大哥 ，你 啲 銀 借 幾 兩 嚟 使 下 呢 ？
茅十八 笑咗笑 ，又 攞出 嗰 隻 元寶 話 ：
你嘅就係我嘅 ，我嘅就係你嘅 ，攞去使就係啦 ，講咩借唔借吖 ？
韋小寶 好 歡喜 ，個 心 諗 ：
呢個 好漢 真係 將 我 當做 朋友 看待 噃 ，噉 就算 有 一萬兩 銀 嘅 花紅 ，我 都 唔 能夠 去 報官 啦 。
噉 十萬 兩 呢 ？嗯 噉 有 啲 傷腦筋 嘞 噃 。
嘿 ，睇 佢 嗰 副 貓樣 ，值得 咁多 銀 咩 ，噉 我 亦 唔 使 傷腦筋 喇 。
佢 接咗 隻 元寶 就 問 ：要唔要 幫 你 買 啲 咩 傷藥 啊 ？
茅十八 話 ：唔使喇 ，我 自己 有 傷藥 。
好 ，噉 我 去 嘞 噃 ，茅大哥 你 放心 啦 ，如果 啲 公差 捉住 我 呢 ，就算 殺咗 我 個 頭 啊 ，我 亦 決 唔 話 你 就係 茅十八 嘅 。
茅十八句 見 佢 得 咁 真誠 就 岌 一岌頭 。
韋小寶 自言自語 噉 話 ：你 仲有 兩個 朋友 嚟 噃 ，最好 呢 再 去 買 多 壺 酒 ，整 幾 斤 熟 牛肉 添 。
有酒肉就最好喇 ，嗱 你 快去快返 ，食飽咗 肚 打交 就啱喇 。
咩嘢話 ？嗰啲 私鹽佬 知道 你 喺 呢處 ，佢哋 要 追嚟 啊 ？
唔係 ，我 約咗 第二啲 人 嚟 得勝山 打交 ，如果 唔係 呀 ，我 咁 遠 趕嚟 做 乜嘢 啊 ？
唉 ，你 身上 有 傷 ，點 能夠 再 打 㗎 ？呢場 交 呢 等 你啲 傷 好翻 再 打 都 唔 遲 吖 嘛 ，只不過 ，不過 就 怕 人哋 唔 肯 啫 。
哼 ！人哋 係 有名 嘅 英雄 好漢 ，點會 唔 肯 吖 ？係 我 唔 肯 。
今日 係 三月 廿九 係咪 ？
半年 之前 ，呢場 交 就 約好咗 㗎喇 ，收尾 ，我 畀 官府 捉咗 去 韞咗 喺 監牢 嚟 。
噉 我 啊 掛住 呢一場 約會 ，非嚟不可嘅 ，噉 就 唯有 越獄 趕嚟 咯 。
越獄嘅時候 殺咗 幾個 鷹爪孫 ，所以 楊州 呢 搞到 亂晒 龍 ，咪 出 花紅 嚟 捉 老子 。
佢 阿爺 吖 ，偏偏 前日 ，又 撞到 幾個 功夫 好硬 嘅 鷹爪 ，我 殺咗 佢哋 三個 ，我 都 仲 受咗 啲 傷 ，嗯 ，真係 衰到 貼地 喇 。
鷹爪孫 ，鷹爪 ，呢啲 江湖 黑話 ，而家 綠林 人馬 叫 啲 衙門 啲 官差 做 捕快 呢 做 鷹爪孫 或者 鷹爪 嘅 。
韋小寶 話 ：好 ，噉 我 快啲 去 買 啲 嘢 返嚟 ，等 你 食飽咗 好 打交 。
噉就即刻噔噔聲飛跑 ，噉啊轉過咗山坡跑咗六七里路 ，噉就係一個小市鎮 。
佢 心諗 ：
茅大哥 傷到 連 路 都 行唔逳 ，點能夠 同人哋 打交 㗎 ？
佢 話 對方 係 有名 嘅 英雄 好漢 ，噉 武功 梗係 好使得 㗎啦 。
吖 我 點樣 幫 下 佢 忙 至 好 呢 ？
韋小寶 隻手 捧住 個 元寶 真係 周身 痕 ，一生 之中 隻手 從來 未 攞過 咁多 銀 嘅 ，而家 大花大捹 佢 一輪 先至 過癮 。
佢 行到 間 熟肉鋪 買咗 兩斤 熟牛肉 ，一隻 醬鴨 ，噉 再 去 買咗 兩樽 黃酒 。
噉 剩翻 嘅 銀 仲 係 唔 少 ，又 買咗 十幾個 饅頭 ，八 條 油條 ，噉 只不過 用多咗 廿零 文 錢 啫 。
佢 忽然間 一諗 ：我 走去 買 啲 繩 ，喺 地下 綁 條 絆馬索 ，噉 打交 嗰 陣 呢 對方 一下 唔 小心 ，喺 繩索 上面 一𠽤𢴈 咗 喺 地 ，茅大哥 就 可以 一刀 將 佢 殺死 喇 。
因為 佢 諗起 講古 先生 講古仔 啊 ，大將 上陣 交鋒 ，隻 戰馬 就 畀 絆馬索 一𠽤 ，個人 就 𢴈 落馬 下 ，敵將 手 起 刀 落 就 將 佢 斬 為 兩段 。
於是 嗱嗱聲 就 走去 搵 繩 買 。
去到 一間 雜貨鋪 ，只見 鋪頭 一排 擺住 四個 大缸 ，一缸 米 ，一缸 黃豆 ，一缸 鹽 ，另一 缸 呢 係 石灰粉 ，佢 即刻 就 諗起 喇 ：
啊 ，舊年 喺 仙女橋 邊 ，啲 私鹽 幫 同 人哋 打交 ，畀 人哋 用 石灰 糝 親 雙眼 ，就 當堂 反勝 為 敗 喇 ，我 點解 諗唔到 呢條 計 呢 ？
繩 都 唔 買 喇 ，就 買咗 一 袋 石灰 ，孭 起嚟 行 翻 去 茅十八 身邊 。
茅十八 喺 樹腳 瞓緊 覺 ，聽見 佢 腳步聲 就 醒嘞 。
打開 樽酒 飲咗 兩啖 大聲 贊好 ，噉 就 問 韋小寶 ：你 飲唔飲 啊 ？
韋小寶 其實 係 從來 唔 飲酒 嘅 ，呢個 時候 佢 要 充 英雄好漢 嘞 ，就 接過 酒樽 飲咗 一大啖 。
哇 ，一飲落去 ，只覺得 一股 熱氣 啊 直通入 肚 ，當堂 猛咁 咳 。
茅十八啊哈哈大笑話 ：哈哈哈哈哈哈 ，我哋 小英雄 飲酒 個 功夫 呀 ，都 仲 未曾 學會 ，哈哈哈哈 。
突然間 聽見 遠遠 有人 高聲 噉 話 ：十八兄 ，別後 好吖 嘛 ？
茅十八 話 ： 吳兄 ， 王兄 ， 你 兩位 亦 好 清健 啊 。
韋小寶 個心 當堂 砰砰 聲 跳 ， 噉 跟 住 聲音 嘅 方向 睇 過去 ， 只見 大 路上 兩個 人 快步 行緊 嚟 ， 好 快脆 就 嚟 到 面前 嘞 。
一個人呢 ，係 個 老人家 ，一把 白鬍鬚 垂到 胸前 ，但係 面色 紅潤 有 光 ，半條 皺紋 都 冇 嘅 。
另外一個 呢 ，係 個 四十零歲 嘅 中年人 ，生得 肥肥矮矮 係 個 光頭佬 ，後枕 有 條 辮仔 ，前腦 就 光捋捋 ，好似 剝殼 雞 春 噉 。
茅十八 拱手 行禮 話 ：兄弟 隻腳 唔方便 ，唔能夠 起身 行禮 喇 。
嗰 光頭佬 眉頭 微微 一皺 。
個 老人 就 笑住 話 ：何必 客氣 呢 ？
韋小寶 個 心 諗 ：茅大哥 做人 真係 老實 過頭 嘅 ，自己 隻 腳 有 傷 點 能夠 講畀 人哋 聽 嘅 呢 ？
茅十八 話 ：呢處 有 酒 有肉 ，兩位 食 一啲 嘛 ？
嗰個 老人 話 ：好啊 ，多謝晒 。
就坐喺茅十八身邊 ，接過樽酒 。
韋小寶 歡喜 喇 ，吖 ，原來 呢 兩個 人 係 茅大哥 啲 朋友 ，唔係 嚟 同 佢 打交 嘅 ，噉 就 妥喇 ，等陣 敵人 嚟到 呢 兩個 人 亦 可以 幫手 打 嘅 。
嗰個 老人 將 酒樽 擠到 口邊 ，正 話 想 飲 ，嗰個 光頭佬 話 ：
吳大哥 ，啲 酒 唔 飲 就算 喇 。
個 老人 一窒 ，跟住 哈哈大笑話 ：嘿嘿嘿 ，十八兄 係 個 鐵錚錚 嘅 好漢 ，啲 酒 裏 便 唔 通 仲 會 有 毒 咩 ？
咕咕嘟咕嘟 飲咗 兩啖 ，就 將 個 酒樽 遞畀 光頭佬 話 ：
你 唔 飲 呀 ，就 睇唔起 好朋友 咯 。
個 光頭佬 有 啲 猶猶豫豫 ，但係 對 個 老人 嘅 説話 似乎 唔 聽 又 唔好 ，就 接咗 個 酒樽 啱啱 放 到 口邊 ，茅十八 就 一手 搶咗 話 ：
酒 唔夠 喇 ，王兄 又 唔 鐘意 飲酒 嘅 ，慳翻 幾啖 畀 我 好過 啦 。
一仰條頸 ，飲咗 兩大啖 。
個 光頭佬 塊 面 一 紅 ，咪 坐低 揦起 牛肉 就 食 。
茅十八 話 ：我 同 兩位 引見 一位 好 朋友 。
就 指住 老人 話 ：呢位 吳大爺 ，大號 叫做 大鵬 ，江湖 上 人 稱 摩雲手 ，拳腳 功夫 ，武林 中 非常 有名 㗎 。
嗰 老人家 就 笑住 話 ：嘿嘿嘿 ，茅 兄 喺 我 面 上 貼 金 咯 。
講完 ，佢 左右 望 下 唔見 有 另外 咩 嘢 人 啊 ，噉 覺得 好奇怪 。
茅十八 就 指住 嗰個 光頭佬 話 ：
呢位 王師傅 單名 一個 潭字 ，外號 雙筆 開山 ，一對 判官 筆 使起上嚟 ，真係 出神入化 嘅 。
個 光頭佬 話 ：茅兄 唔好 取笑 喇 ，在下 係 你 嘅 手下 敗將 ，好 慚愧 啊 。
茅十八 話 ：唔敢當 。
然後 佢 指住 韋小寶 話 ：
呢位 小朋友 ，係 我 新交 嘅 好 兄弟 。
佢 講到 呢處 ，吳王 兩個 愕然 噉 互相 望 一望 ，跟住 一齊 定眼 望實 韋小寶 。
真係 實在 睇唔出 呢個 又 乾 又 瘦 嘅 十二三歲 細路仔 係 咩 嘢 來頭 噃 。
只 聽見 茅十八 繼續 話 ： 呢 位 小朋友 姓 韋 ， 叫做 小寶 ， 江湖 上 人稱 ， 人稱 誒 係 佢 嘅 外號 就 叫做 ， 叫做 ， 叫做 小白龍 。
水上 功夫 最 使得 喇 ，喺 水 裏 便 呀 游 三日 三夜 ，生食 魚蝦 ，面 不 改色 㗎 。
佢 要 幫 呢個 新交 嘅 小朋友 攞翻 個 面子 ，等 佢 喺 外人 面前 威 下 ，噉 有心 要 吹噓 幾句 。
但係 韋小寶 就 完全 唔識 武功 嘅 ，吳王 兩個人 都 係 行家 ，一出手 就 知道 你 有料 冇料 ，呃 佢 係 呃唔到 嘅 。
佢 諗 一諗 ，就 話 佢 水上功夫 十分 厲害 。
事關 吳王 兩個人 係 北方 嘅 豪傑 ，唔識 水性 ，噉 就 冇法子 知道 真假 喇 。
茅十八 跟住 話 ：你哋 三位 都係 好朋友 ，多啲 親近 下 。
吳王 兩個人 抱拳 行禮 話 ：久仰 ，久仰 。
韋小寶 啊 有樣學樣 ，亦 抱拳 行禮 話 ：久仰 ，久仰 ，
哇 ，個 心 呢 真係 又 驚 又 喜 ：
茅大哥 幫 我 吹牛 ，嘿嘿 ，其實 我係 咩 江湖 好漢 唧 ，哎呀 不過 呢個 西洋鏡 唔 拆穿 得 㗎 。
噉 四個人 過咗 冇幾耐 ，就 將 啲 酒肉饅頭 食 到 乾乾淨淨 。
嗰個 光頭佬 王潭 啊 食量 極大 啊 ，初初 食 嗰陣 呢 仲 有 啲 顧忌 ，到 咗 收尾 ，放開 肚皮 就 猛嚼 。
佢 一個人 所食 嘅 牛肉 ，饅頭 同 油條 ，比 三個人 加起上嚟 仲要 多 。
茅十八 用 衫袖 抹 一抹 個 嘴 佢 話 ：
吳大爺 ，呢位 小朋友 嘅 水性 固之然 係 極好 ，之 陸上 嘅 功夫 都 仲 未曾 學 嘅 ，在下 就 只有 一對 二 嘞 ，不過 噉 唔係 睇唔起 兩位 噃 。
吳大鵬 話 ：我哋 呢個 約會 ，我 睇 仲係 再 推遲 半年 罷啦 。
茅十八 話 ：噉 點解 啊 ？
吳大鵬 話 ：茅兄 身上 有 傷 ，顯唔出 真 功夫 ，老朽 打贏 咗 固然 冇 咩 光彩 ，打輸 咗 ，更加 係 冇 面 見 人 嘞 。
茅十八哈哈一笑話 ：有傷冇傷 ，冇幾多分別嘅啫 ，再等半年 ，豈不是牽腸掛肚 ？
佢 左手 扶住 樖樹 慢慢 企起身 ，右手 已經 揸住 把 單刀 嘞 。
吳大爺 向來 赤手空拳 嘅 ，王兄 ，你 亮兵刃 啦 。
王潭話 ：好 ！一伸手 撐 一聲 ，喺 懷內 攞出 一對 判官筆 。
吳大鵬 話 ：
既然 係噉 ，王賢弟 ，你 同 愚兄 掠陣 ，愚兄 如果 唔得嘞 ，你 再 上 都 唔遲 吖 。
王潭 應咗 聲話 ：係 ！就 退開 三步 。
吳大鵬 左掌 向上 翻 ，右手 兜咗 個圈 ，輕飄飄 噉 ，揮掌 向 茅十八 拍過嚟 。
茅十八 單刀 斜劈 斬佢 左臂 。
吳大鵬 一 低頭 ，喺 佢 刀鋒 之下 搶上 一步 ，左手 向 佢 右手 手踭 拍過去 。
茅十八 一 側身 ，轉 喺 樖樹 旁邊 。
啪一聲 ，吳大鵬 嗰 掌 擊 喺 樹幹 之上 。
呢樖大樹 成 五六丈 高 嘅 ，樹身 粗壯 ，畀 吳大鵬 噉樣 一拍 啊 ，樹 上面 啲 黃葉 就 好似 雨點 噉樣 撒落嚟 。
茅十八 話 ：好 掌力 ！單刀 攔腰 揮過去 。
吳大鵬 突然間 飛身而起 ，喺 半空中 撲落嚟 。
茅十八 一招 西風 倒卷 ，單刀 由下 拖上 ，
吳大鵬 喺 半空中 一個 倒翻關斗 ，飛咗 出去 ，茅十八 呢 一刀 同 佢 嘅 小腹 距離 都 唔到 半尺 。
韋小寶 咁大個仔 ，打交 就 見得 多 喇 ，但係 見親 嘅 呢 都 係 市井 流氓 攬 腳 拉 辮 ，箍 頸 撞 頭 嗰啲 爛 打 。
除咗 尋日 喺 麗春院 ，茅十八 惡鬥 鹽梟 之外 啊 ，從來 都 未 見過 高手 咁 兇險 比武 嘅 。
只見 吳大鵬 忽 進 忽退 ，雙掌 翻飛 ，茅十八 就 將 單刀 舞 到 一片 銀光 ，擋住 前便 。
吳大鵬 幾次 想 埋身 啊 都 畀 刀光 逼翻 出嚟 。
正話 打到 㷫 嘅 時候 ，忽然間 聽見 馬蹄聲 ，有 十幾 人 騎馬 跑緊 嚟 ，都 係 清廷 官兵 嘅 打扮 。
十幾 騎馬 跑到 近 喇 ，就 散開 將 四個人 圍 喺 中心 。
為 首 嘅 軍官 大聲 喝 ： 停手 ！ 我 哋 奉命 捉拿 江洋大盜 茅十八 ， 同 旁人 並 冇 關係 嘅 ， 你 哋 都 退開 。
吳大鵬 一 聽 ，即刻 停手 跳開 嘞 。
茅十八 話 ：吳大爺 ，啲 鷹爪 又 搵到嚟 喇 ，佢哋 係 衝住 我 嚟 嘅 啫 ，你 唔使 理 佢哋 㗎 ，再 上 ！
吳大鵬 就 對 啲 官兵 話 ：呢位 兄台 係 安分良民 ，點會 係 江洋大盜 啊 ？你哋 認錯 人 嘞 啩 ？
為首個 軍官 冷笑話 ：哼 ，佢 係 安分良民 ？噉 天下 嘅 安分良民 就 未免 太多 喇 。
茅朋友 ，你 喺 揚州城 作咗 天大 嘅 案 ，好漢 一人 做事 一人 當 ，乖乖地 跟 我哋 去 啦 。
茅十八 話 ：你哋 等 一 等 ，睇 我 同 呢 兩位 朋友 分咗 勝敗 再 講 。
佢 轉頭 對 吳大鵬 同 王潭 話 ：
吳大爺 ，王兄 ，我哋 今日 非分 個 勝敗 不可 ，再 等多 半年 呀 ，亦 唔知 我 姓 茅 嘅 仲 有冇 命 啊 ，爽爽快快 你哋 兩位 一齊 上 啦 。
嗰個 軍官 話 ：你哋 兩個 如果 唔係 同 茅十八 一夥 嘅 ，就 快啲 離開 呢 笪 是非 之地 唔好 惹 屎 上身 啊 。
茅十八 就 鬧 佢 話 ：你 阿爺 吖 ，大呼小叫 做咩 啊 ？
個 軍官 話 ：茅十八 ，你 越獄 殺人 ，嗰啲 係 揚州 地方 官 嘅 事 ，本來 唔使 我哋 理 嘅 。
不過 聽講 你 喺 妓院 裏 便 猛咁 話 天地會 作亂 做 反 個 叛賊 ，都 係 英雄 好漢 。
呢啲 説話 你 有冇 講過 啊 ？
茅十八大聲話 ：天地會 嘅 朋友 ，當然 係 英雄好漢 啦 ，唔通 你 呢啲 漢奸 反而 係 英雄好漢 咩 ？
個 軍官 話 ：鰲 少保 派 我哋 由 北京 嚟到 南方 ，就要 捉拿 天地會 嘅 反賊 。茅 十八 ，你 跟 我哋 走 ！
講完 擰轉頭 對 吳大鵬 同 王潭 話 ：兩位 正在 同 呢個 逆賊 打緊 ，睇嚟 唔係 同 佢 一路 嘅 ，兩位 就 請便 喇 。
吳大鵬 話 ：請教 閣下 尊姓大名 。
嗰個 軍官 拍 一拍 纏住 喺 腰 嚟 嘅 一條 黑油油 嘅 軟鞭 ，佢 話 ：
在下 黑龍鞭 史松 ，奉咗 鰲少保 將令 擒拿 天地會 反賊 。
吳大鵬 岌一岌頭 對 茅十八 話 ：茅兄 ，天父 地母 。
茅十八 睜大 雙眼 ：你 講 咩 話 ？
吳大鵬 微微 一笑話 ：哦 冇乜嘢 ，茅兄 ，你好似 並唔係 天地會 內 嘅 兄弟 ，之 點解 要 大講 天地會 嘅 好話 呢 ？
茅十八 話 ： 天地會 保 百姓 ， 殺 賊人 ， 做 嘅 係 英雄好漢 嘅 勾當 ， 當然 係 英雄好漢 咯 。
江湖上 有 句 説話 噉 講 嘅 ：為人 不識 陳近南 ，就 稱 英雄 也 枉然 。
陳近南陳總舵主 就係 天地會 嘅 頭腦 ，天地會啲 朋友 都 係 陳總舵主 嘅 手下 ，點 會 唔係 英雄好漢 呢 ？
吳大鵬 話 ：茅兄 識唔識 陳 總舵主 啊 ？
茅十八噉就發火喇 ：咩話 ？你譏笑我唔係英雄啊 ？
佢 因為 噉 而 發火 呢 ，當然 係 唔識 陳近南 嘞 。
吳大鵬 微微 笑話 ：不敢 ，不敢 。
茅十八 又 話 ：唔通 你 又 識得 陳 總舵主 咩 ？
吳大鵬 擰擰頭 。
史松問 吳王 兩個 人 ： 你 哋 兩個 識得 天地會 啲 人馬 咩 ？
如果 有 咩 消息 就 講出嚟 ，我哋 捉到 咗 天地會 嘅 頭目 ，好似 嗰個 咩 陳近南 啊 噉 ，鰲少保 必定 重重 有賞 嘅 。
吳大鵬 同 王潭 都 未 回答 唧 ，茅十八 就 仰天 大笑 話 ：哈哈哈哈哈哈 ，發 你 阿爺 嘅 夢 啦 ，指意 你 呢 塊 料 都 想 去 捉拿 天地會 嘅 陳 總舵主 ？
哼 ， 你 開口 埋口 都 話 鰲 少 保鰲 少保 ， 呢 個 鰲拜 自稱 係 滿洲 第一 勇士 ， 佢 武功 到 底點 㗎 ？
史松話 ：鰲少保 天生神勇 ，武功蓋世 ，呢 ，佢 曾經 喺 北京 嘅 大街 一拳 打死 一隻 癲牛 ，你 呢個 反賊 知唔知 吖 ？
茅十八 話 ：佢 阿爺 吖 ，我 就 唔 信 鰲拜 有 咁 厲害 ，我 正 係 要 去 北京 鬥 佢 一 鬥 ！
史松 冷笑話 ：嘿嘿嘿嘿 ，好似 你 噉 都 配 同 鰲少保 逳手 ？佢 老人家 用 一 隻 手指尾 咋 就 壓死 你 喇 。
茅十八 ，閒話 唔使 講 咁多 喇 ，跟 我哋 走 罷啦 。
茅十八 話 ：有 咁 容易 ，跟 你哋 走 ？
你哋 呢處 總共 十三 個 人 ，老子 以 一 敵 十三 ，明知 打唔過 ，亦 要 打一打 。
吳大鵬 微微笑話 ：茅兄 點解 咁 見外 啊 ？我哋 係 以 三 敵 十三 ，一個 打 四個 未必 就 輸 嘅 。
史松同 茅十八 都 吃 咗 一驚 ， 史松話 ：
兩位 唔好 打錯 主意 噃 吓 ，造反 助 逆 唔係 好玩 㗎 噃 。
吳大鵬 笑嘞 ：嘿嘿嘿嘿 ，助逆 都 冇 乜嘢 ，造反 就 唔敢 。
史松話 ：助逆 即係 造反 ，嗱 你哋 兩個 諗清諗楚 ，係唔係 幫 梗 呢個 反賊 ？
吳大鵬 話 ：半年 之前 ，茅兄 同 呢位 王兄弟 約定 今日 喺 呢處 以 武 會友 ，並且 將 在 下 拉埋入嚟 。
想 唔 到 官府 唔 通氣 ， 拉 咗 茅兄 去 坐監 ， 茅兄 係 言而有信 嘅 好漢 ， 今日 如果 唔 踐約 ， 以後 喺 江湖 上點 做人 呢 ？
所以 佢 越獄 殺人 ，都係 畀 官府 逼 出嚟 嘅 ，呢個 就 叫做 官逼民反 不得不 反 。
史大人 ，你 如果 畀 個 面 過 老漢 ，噉 就 收隊 返去 ，等 老漢 同 茅兄 較量 一下 功夫 先 ，聽日 你 捉唔捉 佢 ，老漢 同 王兄弟 就 唔 理 咁多 喇 。
史松話 ：唔得 ！
喺啲 官兵 隊伍 裏 便 忽然間 有 個人 大聲 喝 ：死老坑 ，乜 你 咁 多 口水 㗎 ！
講完 拔出 鋼刀 ，雙腳 一挾 ，縱馬 就 衝過嚟 ，舉起 把 刀 對住 吳大鵬 頭頂 就 斬 。
吳大鵬 斜身 一閃 ，避過咗 佢 呢一刀 ，跟住 飛身 跳起 ，一手 揦住 佢 背心 順手 一揈 ，將 佢 成個 𢴈開 。
嗰班 軍官 大聲 嗌 ：作反 啊 你哋 ！就 紛紛 跳落 馬 ，向住 吳 大鵬 佢哋 三個 人 圍上去 。
茅十八大髀 受咗 傷 ，挨住 樖樹 企響處 ，手起刀落 就 劈死 咗 一名 軍官 嘞 。
打橫 一削 ，又 攔腰 斬死 一名 軍官 。
其餘啲人 見 佢 咁 勇 ，一時之間 就 唔敢 逼近 。
史松 雙手 叉腰 ，騎 喺 馬 上 掠陣 。
韋小寶 本來 呢 亦都 畀 啲 軍官 圍住 喺 中間 嚟 ，噉 啊 當 史松 同 茅十八 、吳大鵬 兩個 人 講嘢 嘅 時候 ，佢 一步一步 噉 縮 出去 。
班 軍官 亦 唔 知道 呢個 奀仔 喺 呢處 做 乜嘢 嘅 ，所以 邊個 都 冇 理 佢 。
等到 大家 都 逳手 嘅 時候 ，佢 就 已經 匿埋 喺 幾丈 之外 一樖 樹 後 便 嘞 ，佢 心諗 ：
我 快啲 鬆人 呢 ？定係 喺 呢處 睇住 呢 ？
茅大哥 佢哋 只有 三個 人 ，實畀 呢班 官兵 殺 嘅 ，呢啲 軍佬 會 唔會 又 嚟 殺埋 我 啊 ？
佢 轉念 又 諗 ： 茅大哥 當我 係 好 朋友 ， 講過 有難同當 有福 共享 㗎 ， 我 如果 靜 雞雞 逃走 就 太過 唔 講義 氣咯 。
過咗一陣 ，吳大鵬 揮掌 劈低 一名 軍官 ，王潭 使開 雙筆 ，同 三名 軍官 鬥 。
呢陣時 茅十八 又 將 一名 軍官 右腳 斬斷 ，呢個 軍官 跌倒 喺 血泊 之中 大聲 慘叫 。
史松 一聲 呼嘯 黑龍 鞭 出手 ，跟住 飛身 落馬 嘞 ，嗱 各位 ，欲知 後事 如何 ，且 聽 下回 分解 。
