前 文 再續 啊 書 接上 一回 啊 。
話説 吳之榮 啊 ，捧住 本 明書 輯略 企 喺 書鋪 ，成個人 定晒 。
過咗 一陣間 ，佢 大叫 一聲 ：冇錯喇 ！
佢 睇 見 呢 本書 啊 ， 書頁 同埋 封面 潔白 嶄新 ， 一問 書鋪 個 老闆 ， 果然 係 湖州 賣書 嘅 商人 新近 送 嚟 嘅 ， 到貨 不過 係 七八日 。
佢 心諗 ：呢個 莊允城 真係 犀利 啊 ，吖 ，錢 可 通 神 冇 錯 嘅 。
佢 收 返 晒 啲 舊書 ， 重新 刻版 ， 印過 啲 新書 ， 將原 書 裏 便 ， 所有 觸犯 禁忌 嘅 地方 冚𠾴唥 刪削 得 一乾二淨 。
哼哼 ，唔通 就噉 就算數 咩 ？
吳之榮 估計 得 果然 冇 錯 。
原來 杭州 將軍 松魁 呢 佢 就 唔識 漢字 。
幕府 師爺 見到 吳之榮 嘅 稟帖 ，當堂 嚇到 全身 飈 冷汗 。
佢 知道 呢件事 牽連 重大 到 極 ，揸住 稟帖 嗰 雙手 都有 啲 震 啊 。
呢個 幕客 ，叫做 程維藩 啊 ，乃係 浙江 紹興 人氏 。
佢 呢個人 有 良心 ，為人 忠厚 。
佢 就 信奉 公門 之 中 好 修行 呢句 名言 。
噉即係話 ，官府 就 手執 百姓 嘅 生殺 大權 。
師爺 擬稿 個 時候 幾個 字 稍為 重啲 ，就 能夠 令到 百姓 家破人亡 嘞 ；
稍為 幫佢 洗甩下 ，就 可以 使到 佢 死裏逃生 。
因此 喺 公門 之 中 救人 啊 ，比起 喺 寺廟 當中 修行 ，效力 啊 更 大 。
佢 見 呢個 明史 呢個 案 如果 搞成 一個 大 文字獄 呀 ，蘇 南 浙 西 都 唔 知 會 有 幾多 人妻 離 子 散 家破人亡 。
佢 即刻 向 將軍 告 咗 幾日 假 漏夜 坐 船 ，去到 湖州 南潯 鎮 ，將 呢件事 講 畀 莊允城 聽 。
莊允城 見到 大禍 臨頭 真係 嚇到 魂魄 都 唔齊 啊 ，全身 都 軟晒 口水 惦流 都 唔知 點 先至 好 。
過咗 好耐 ，先至 企起身 啪聲 跪喺 地 ，向 程維藩 叩謝 大恩 ，然後 問 佢 有 咩嘢 計 救得 自己 。
程維藩 喺 杭州 坐船 去 南潯 嘅 時候 ，反覆 推敲 ，已經 諗到 好 辦法 。
佢 心諗 ：呢部 明書 輯略 流傳 已經 好耐 ，想 隱瞞 呢 係 瞞唔了 嘅 ，就 唯有 用 一個 釜底抽薪之計 。
一方面 ，派人 去 各地 書鋪 ，將 呢部 書 冚𠾴唥 收購 返嚟 銷毀 ；
另一方面 呢 就 趕開 夜工 ，另外 刻 個 新版 ，刪除 所有 忌諱 嘅 地方 再 印 新書 攞 去 賣 。
噉 官府 追究 起嚟 喇 ，噉啊 將 新版 明史 攞嚟 一查 ，就 發覺 吳之榮 所 告發 嘅 都 唔係 真嘅 ，噉 就 可以 免咗 一場 橫禍 嘞 。
於是就 將 呢個 辦法 講咗出嚟 。
莊允城 又 驚 又 喜 ，咪 一味 叩頭 多謝 。
程維藩 又 教 佢 好多 應該 注意 嘅 關鍵 地方 ：
比如 某某 官府 嗰 處 應該 送禮 幾多 ， 某某 衙門 嗰 處 應該 點樣 疏通 等等 ， 莊允城 逐一 逐二 ， 就 記到 實一實 。
程維藩 返到去 杭州 ，隔 咗 半個幾月 ，先至 將 原書 同埋 吳之榮 嘅 稟帖 轉送 浙江 巡撫 朱昌祚 。
佢 輕描淡寫 噉 批 咗 幾個 字 ，話 呈遞 稟帖 嘅 人 啊 ，係 因為 貪污 革職 嘅 知縣 ，似乎 有 挟嫌 吹毛求疵 嘅 嫌疑 ，請 撫台 大人 詳查 噉 。
當 吳之榮 喺 杭州 客店 裏 便 猛咁 等 消息 嘅 時候 ，莊允城 嗰 啲 銀 呢 正 係 好似 倒水 咁 倒 猛 使 喇 。
莊允城 嘅 大量 賄賂 ，已經 送到 去 將軍衙門 、巡撫衙門 同埋 學政衙門 。
朱昌祚 接咗 公事 認為 呢啲噉 嘅 印書 嚟 賣 嘅 事 就 屬於 學政 管 嘅 ，壓咗 十幾日 之後 ，先至 將 公文 轉咗 去 學政 胡尚衡 。
學政衙門 嘅 師爺 呢 將 佢 放落 櫃桶 半個月 先 ，然後 又 告 咗 一個月 嘅 病假 ，噉 先至 慢吞吞 擬稿 發文 ，將 公事 送去 湖州府 。
湖州 府學 官 又 耽擱 咗 廿幾 日 ，先至 送 公文 去 歸安 縣 同埋 烏程 縣 嘅 學官 ，要 佢哋 兩 個 人 申報 回覆 。
嗰 兩個 學官 ，亦 早就 得到 莊允城 嘅 大筆 賄賂 喇 。
當其時 新版 明史 亦 已經 印好 ，噉 兩個 學官 就 將 兩部 新版 書 繳上去 ，回覆 話 ：
該書 平庸 粗疏 ，無 裨 世道 人心 ，然 細查 全書 ，尚 無 諱禁 犯 例 之 處 噉 。
層層 申報 回覆 ，就 噉樣 就 不了了之 。
吳之榮 直到 喺 書鋪 裏 便 發現咗 新版 明史 ，噉 啊 估計到 其中 嘅 巧妙 嘞 ，個 心 諗 ：
唯有 搞到 一部 原版 明史 ，先至 再 能夠 揭發 呢件 案 。
杭州 各家 書鋪 裏 便 呢 ，原版 書 早就 畀 莊家 買晒 。
噉 佢 即刻 就 走 去 浙東 偏僻 嘅 州 縣 搜 購 啦 ， 點 知道 仍然 一部 都 搵 唔 到 。
佢 已經 冇晒 錢 喇 ，只有 衰衰噉 啊 返鄉下 啦 。
哈 ， 真 係 有 咁 啱 得 咁 巧 。
喺 旅途 之中 ，就 喺 一間 客店 裏 便 見到 個 店主 啊 ，喺度 搖頭晃腦 讀書 ，一睇 ，佢 所 讀 嘅 就係 呢部 明書 輯略 。
借嚟 掀下 睇下 ，竟然 係 原版 ，啊 ，歡喜 到 佢 乜噉喇 。
個心諗 ：如果 問 店主 買 呢 ，一來 佢 又 未必 肯 賣 ，二來 自己 亦 冇 銀 買 ，咪 唯有 偷 嘞 。
當晚 三更半夜 靜靜 起身 ，偷咗 書 就 即刻 鬆人 。
個心諗 ：浙江 全省 有關 官員 都 已經 受咗 莊允城 嘅 賄賂 ，一不做二不休 ，索性 去 北京 告狀 。
吳之榮 去到 北京 ，噉 就 寫咗 稟帖 ，告到 去 禮部 、都察院 、通政司 三處 衙門 ，説明 莊家 如何 賄賂 官員 ，改刻 新版 。
點 知道 喺 北京 等 咗 唔 到 一個月 ， 三處 衙門 先後 就 駁 復 落 嚟 ， 都 話 查過 莊廷 鑨 所 著 嘅 明書輯 略 呢 部書 ， 內容 呢 ， 並 冇 違禁 犯例 。
該 革職 知 縣 吳 之 榮 所 告 啊 ，並非 實情 ，顯 係 挟 嫌 誣告 ；
至於 賄賂 官員 雲雲 ，更係 捕風捉影 之 辭噉 。
通政司 嘅 批駁 啊 更加 嚴厲 喇 話 ：該 吳之榮 以 貪贓 被 革 ，遂 以 天下 清官 皆 如 彼 之 貪 。
原來 莊允城 得到 程維藩 嘅 指點 ，早就 將 新版 明史 送到 去 禮部 、都察院 、通政司 三處 衙門 ；
噉 有關 嘅 官吏 師爺 啊 ，亦 早就 送咗 厚禮 打點 咯 。
吳之榮 又 碰咗 成 鼻灰 ，眼見 返 屋企 已經 冇晒 旅費 嘞 ，噉 啊 勢必 流落 異鄉 。
當其時 清廷 對待 漢人 、讀書人 係 極為 嚴峻 嘅 ，文字 之中 稍有 犯禁 呢 即時 處死 。
吳之榮 告嘅 如果 係 平常 讀書人 早就 得手 喇 ；
偏偏 遇着 嘅 對手 係 富豪之家 ，噉 先至 阻滯 重重 啫 。
而家 吳之榮 已經 冇 退路 喇 ，佢 心諗 ：拼住 坐監 ，都 要 將 呢件案 搞到底 。
於是 佢 又 寫咗 四張 稟帖 ，就 分呈 四位 顧命 大臣 。
同時又 喺 客店 裏 便 寫咗 幾百 張 揭露 呢件事 嘅 招紙 ，喺 北京 城 內 到處 張貼 。
佢 呢一着 呢 ，其實 係 非常之 冒險 。
你話 如果 官府 追究 起嚟 ，話 佢 危言聳聽 、擾亂 人心 ，就 有 殺頭 嘅 大罪 㗎 。
嗰 四個 顧命 大臣 ，叫做 索尼 、蘇克薩哈 、遏必隆 ，同 鳌拜 ，都 係 滿洲 嘅 開國 功臣 喇 。
順治皇帝 逝世 嘅 時候 ，遺詔 命令 呢 四位 大臣 輔政 。
其中 鰲拜 就 最 兇橫 ，喺 朝廷 之中 啊 黨羽 極 多 嘅 ，清廷 嘅 大權 就 幾乎 係 佢 一個人 擸晒 。
佢 慌怕 敵黨 對 佢 不利 啊 ，所以 日日 派出 無數 咁多 探子 ，喺 京城 內外 就 探聽 動靜 。
呢 一日 得到 密報 ， 話 北京城 內 出現 好多 招貼 ， 揭發 有個 姓 莊 嘅 人 啊 ， 著書 謀反 ， 大逆不道 ； 浙江 官員 受賄 、 置之不理 等等 噉 。
鰲拜一知 ，即刻 就 下令 查究 ，當 同 雷厲風行 噉 辦起嚟 。
就喺呢個時候 ，吳之榮 嘅 稟帖 ，亦 已經 遞入 鰲拜 府中 。
佢 即刻 召見 吳之榮 ，問 佢 呢件事 。
噉 啊 再 命令 手下 漢人 幕客 仔細 噉 睇 吳之榮 所 呈繳 嘅 嗰 部 原版 明史 ， 噉 證實 佢 所講 嘅 呢 ， 果然 係 實情 。
鰲拜啊 ，係 以 軍功 封 為 公爵 ，做 大官 ，噉 佢 向來 都 歧視 漢官 同埋 讀書人 。
掌握 大權 之後 就 想 辦 幾件 大案 嚟 震懾 人心 ，要 使到 漢人 唔 敢 有 反叛 嘅 念頭 。
同時 呢 ， 要 使 到 朝 中 敵黨 唔 敢 有 咩 嘢 異動 。
啊 而家 啱晒 嘞 ，即刻 派出 欽差 ，去 浙江 查究 。
噉 樣 一 嚟 啊 ， 莊家 全家 固之然 係 捉起 嚟 押解 去 北京 啦 ；
連 杭州 將軍 松魁 、浙江 巡撫 朱昌祚 以下 所有 大小 官員 啊 都 革職 查辦 。
喺 明史 上面 列名 嘅 文人學者 ，噉 啊 個個 都 拉晒去 坐監 。
話説顧炎武 、黃宗羲 兩個人 喺 呂留良 屋企 啊 ，咪 將 呢件案 嘅 來龍去脈 ，詳詳細細 噉 講晒 畀 呂留良 聽 。
當晚 ，三個人 傾咗 成晚 ，喺度 議論 世事 。
講到 明末 魏忠賢 等 太監 啊 陷害 忠良 把持 朝政 ，種種 倒行逆施 ，終於 搞到 明朝 覆亡 。
噉到咗 清朝 之後 ，漢人 又 慘遭 屠殺 ，禍難 深重 。
噉 三個人 越 講 就 越 悲憤 。
第朝一早 ，呂留良 全家 同埋 顧 、黃 兩個人 就 坐船 起程 去 揚州 。
第一站 ，去到 杭州 ，然後 由 運河 就 向北 便 行 。
呢一晚 喺 杭州 城外 就 聽到 消息 ，清廷 已經 因為 呢件案 啊 處決咗 唔少 官員 百姓 。
莊廷鑨 已經 死咗 㗎啦 ，要 開棺 戮尸 ，即係 將 個 屍體 搦出嚟 斬頭 啊 。
莊允城 喺 監獄 裏 便 受唔住 虐待 死咗 嘞 。
莊家 全家 幾十人 ，十五歲 以上 嘅 ，冚𠾴唥 處斬 ；
妻女 就 充軍 去 沈陽 ，同 滿州 騎兵 做 奴僕 。
前禮部侍郎李令晰 ，為 呢部書 作序 就 凌遲 處死 ，四個仔 處斬 。
李令晰 嘅 幼子 就 啱啱 十六歲 ，法司 見 殺人 殺得 多 咯 ，心軟 ，叫佢 改口供 ，供認 小 一歲 。
因為 按照 清朝 法律 啊 ，十五歲 以下 嘅 呢 可以 免死 ，改為 充軍 嘅 。
嗰個 少年 話 ：我 阿爹 阿哥 都 死咗 咯 ，我 一個人 ，亦 唔 願 獨生 。
終於 呢唔肯 改換 口供 ，咪 一齊 處斬 。
松魁 、朱昌祚 就 韞 喺 監 裏 便 候審 ，幕客 程維藩 就 凌遲 處死 。
歸安 、烏程 嗰 兩名 學官 處 斬 。
因為 呢 件 案 牽連 啊 ， 冤枉 而 死 嘅 人 呢 亦 不計其數 。
湖州 府 知府 譚希閔 到任 啊 不過 半個月 ，朝廷 話 佢 知情 不報 ，受賄 隱匿 ，噉 啊 同埋 推官 李煥 、訓導 王兆禎 都 處 絞刑 。
吳之榮 對 南潯 嘅 富室 朱佑明 啊 就 最 嬲 嘞 ，事關 嗰日 去 打 秋風 ，畀 佢 譏笑 咗 一場 ，噉 啊 趕 出 門口 。
所以 佢 向 辦理 呢件案 嘅 法司 報告 話 ：呢本書 註明 係 依據 朱氏 原稿 增刪潤飾 而 成 。
呢個 朱氏 就係 朱佑明 喇 ；
噉又話佢個名朱佑明啊 ，顯然係懷念明朝 ，咒罵本朝 。
噉樣 一嚟 ，朱佑明 同 佢 五個 仔 ，一齊 被 處斬首 。
朱家 嗰 十幾萬 財產 啊 ，清廷 就 下令 賞畀 吳之榮 。
最慘嘅 呢 就係 所有 刻版 嘅 刻工 、印書 嘅 印工 、裝釘 嘅 釘工 ；
與及 書商 、書鋪 嘅 主人 、賣書 嘅 店員 、買書 嘅 讀者 ，查明 之後 啊冚𠾴唥 處斬 。
根據 史書 記載 ，當 其時 蘇州 滸墅關 有 一個 守關 嘅 官吏 ，叫做 李尚白 ，平日 係 鐘意 讀 史書 。
聽講 蘇州 閶門 書坊 裏 便 有 一部 新刊 嘅 明史 ，內容 好好 ，又 派 個 差役 去 買 嘞 噃 。
差役 去到 嘅 時候 ，書店 主人 出咗 去 。
噉嗰個差役 就 喺 書鋪 隔籬 一 間 姓 朱 嘅 老人 屋企 坐 喺度 等 ，噉啊 等到 店主 返嚟 買 咗 部 書 。
李尚白 讀咗 幾卷 ，亦 不以為意 。
過咗 幾個月 ，呢件 案發作嘞 ，一直 查究 到 各地方 賣書 買書 嘅 人 。
當時 李尚白 喺 北京 公幹 ，就 以 購買 逆書 嘅 罪名 ，喺 北京 立即 斬決 。
書店 嘅 主人 ，同埋 奉命 去 買 書 嘅 差役 都 殺頭 ，連 隔籬 嗰個 姓 朱 嘅 老人 亦 受到 牽連 喇 。
話佢 既然 知道 嗰個人 嚟 買 逆書 ，點解 唔 即時 舉報 啊 ？吖 仲 畀 佢 喺 屋企 坐 啊噉 。
就 本應 係 斬頭 嘅 ，姑 念 年逾 七十 ，免死 ，同埋 老婆 一齊 充軍 去 邊遠 嘅 地方 。
至於 江南 名士 啊 ， 因為 莊廷 鑨 仰慕 佢 哋 嘅 名聲 ， 喺 書 裏 便 列名 參加 校閱 嘅 呢 ， 同一 日 凌遲 處死 ， 總計有 茅元錫 等 十四 人 。
各位 ，所謂 凌遲處死 啊 ，乃係 一刀一刀 ，將 佢 全身 嘅 肌肉 慢慢 噉 割落嚟 ，直到 犯人 受盡 痛苦 嘞 先至 處死 。
因為 呢部 書 搞到 家破人亡 嘅 真係 難以 計數 。
呂留良 佢哋 三個人 得到 消息 ，憤恨 到 極 。
黃宗羲 話 ：伊璜 先生 都有 份 列名 ，呢次 都 怕 難逃 此劫 咯 。
因 為 佢 哋 三個 人同 查伊璜 向來 交情 極之好 所以 都 十分 掛念 。
呢一日 ，隻船 去到 嘉興 。
顧炎武 喺 城內 就 買 咗 一份 邸報 ， 上面 登晒 明史 案 裏 便 有罪 嘅 人 嘅 姓名 。
點知 見到 上諭 之中 有 一句 噉 講 嘅 ：
查繼佐 、范骧 、陸圻 三人 ，雖 列名 參校 ，然 事先 未見 其 書 ，免罪 不究 。
顧炎武 將 份 邸 報 攞 返 落 船 ，同 黃宗羲 、呂留良 三 個 人 一齊 睇 ，都 覺得 十分 奇怪 。
黃宗羲 話 ：呢件事 ，必定 係 大力 將軍 做 㗎喇 。
呂留良話 ：大力將軍 係 邊個 啊 ？
黃宗羲 話 ：
兩年 之前 ，兄弟 去 伊璜 先生 屋企 作客 ，見到 佢 府第 煥然 一新 ，庭園 寬大 ，陳設 富麗 ，同 以前 大 不 相同 。
噉啊 府中 仲 養咗 一班 昆曲 戲班 ，聲色 曲藝 真係 江南 少見 。
兄弟 同 伊璜 先生 向來 都 交情 極好 嘅 ，講得上 係 互託肝膽 ，噉 就 問 佢 原因 啦 。
伊璜 先生 就 講咗 一番 説話 ，哈 ，確實 係 風塵 之中 嘅 奇遇 啊 。
噉 跟住 呢 ，黃宗羲 就 將 呢段 故事 講返出嚟 。
查伊璜 就 即係 查繼佐 ，係 浙江 海寧 嘅 孝廉 。
呢一日 ，正係 年晚 喇 ，佢 一個人 喺 屋企 飲酒 。
冇 幾耐 落起 雪 ，咪 越 落 越 大 。
查伊璜 一個人 飲酒 冇乜 癮 ，噉 就 行 出去 門外 觀賞 雪景 。
見到 有 個 乞兒 ，企 喺 屋檐 下 便 避 雪 。
呢個 乞兒 身材 魁梧 ，骨格 雄奇 。
只係 着 一件 爛 衫 啫 ，一啲 都 好似 唔覺 冷 噉 ，只係 啲 表情 呢 就 有 啲 悲憤 。
查伊璜 個 心 覺得 奇怪 就 話 ：
呢場 雪 都 冇 咁快 停 ，入嚟 飲 返 杯 呢 好嘛 ？
個乞兒 話 ：好極 。
噉查伊璜 就 請 佢 入屋 ，叫 書童 攞 杯 筷 嚟 ，噉 斟 咗 杯 酒 話 ：請 ！
個乞兒 舉杯 就 飲 勝話 ：好酒啊 ！
查伊璜 連 氣 斟咗 三杯 畀佢 ，嗰乞兒 飲得 極之 爽快 。
查伊璜 最 鐘意 啲 人 係 爽快 㗎 ，個 心 好 歡喜 就 話 ：
兄台 酒量 極好 ，唔知 能夠 飲 幾多 呢 ？
個乞兒 話 ：酒逢知己 千杯少 ，話不投機 ，半句 多 。
呢 兩句 雖然 係 一般 嘅 成語 ，但係 喺 一個 乞兒 嘅 口 裏 便 講出嚟 ，查伊璜 聽到 都 覺得 奇怪 。
即刻 叫 書童 捧咗 一大埕 紹興 女兒紅 出嚟 話 ：
在下 酒量 有限 ，啱先 又 已經 飲過 喇 ，唔能夠 陪 老兄 暢飲 。
老兄 飲 一 大碗 ，我 就 陪 一 杯仔 啦 。
個乞兒 話 ：噉 亦 可以 。
噉 個 書童 啊 將 啲 酒 坐熱 ，噉 啊 斟 咗 酒 。
查伊璜 飲 一杯 ，個 乞兒 就 飲 一大碗 。
嗰個 乞兒 飲到 二十幾 碗 嘅 時候 ，仍然 好似 冇乜 酒意 噉 ，查伊璜 呢 已經 醉 嘞 。
書童 扶 查伊璜 返 入去 內堂 瞓覺 ，個 乞兒 自己 就 返返去 屋檐下 便 。
到 第 朝早 ，查伊璜 起身 就 連忙 去 睇 下 個 乞兒 。
只見佢 繑住 手 喺 後便 企 響處 ，喺度 欣賞 雪景 噃 。
一陣 北風 吹嚟 ，查伊璜 只 覺到 冷到 入骨 啊 。
但係 嗰個 乞兒 呢 ，仲 好似 若無其事 噉 。
查伊璜話 ：天寒地凍 ，老兄 嘅 衣衫 未免 過於 單薄 咯 。
即刻 就 除咗 自己 着住 嘅 羊皮袍 ，褸 喺 佢 身上 ，又 攞咗 十 兩 銀 送 畀 佢 話 ：
些少 買酒錢 ，請 老兄 收咗佢 ，幾時 有興致 就 請 再嚟 飲酒 啦 。
尋晚 兄弟 醉咗 ，唔能夠 留 老兄 過夜 ，請 你 唔好 見怪 。
嗰個 乞兒 接咗 啲 銀話 ：好話喇 。
多謝 都冇聲 就 揚長而去 。
到咗 第年 春天 ，查伊璜 去 杭州 遊玩 。
有一日 喺 一間 破廟 之中 ，見到 有個 極大 嘅 古鐘 ，噉啊 至少 都 怕 有成 四百幾 斤 重 。
噉佢 正 喺度 鑒賞 鐘 上面 所 刻 嘅 文字 花紋 ，忽然間 有 一 個 乞兒 大 踏步 噉 行 入嚟 佛殿 。
左手 揸住 鐘耳 向上 一扚 ，噉啊 成個 大鐘 啊 竟然 離地 幾尺 。
個乞兒 喺 鐘 下 便 攞 咗 一大碗 肉 ，一大缽 酒 出嚟 就 放 喺 一便 ，再 將 個古鐘 放返 喺 原來 嘅 地方 。
查伊璜 見到 佢 咁 大力 不禁 一驚 啊 。
仔細 一睇 ，竟然 就係 舊年 冬天 一齊 飲過 酒 嗰個 乞兒 ，噉 就 笑住 問 ：
老兄 仲 認得 我 嘛 ？
個乞兒 望咗 佢 一眼 就 笑住 話 ：呵呵 ，原來 係 你 。
今日 我 嚟 作東 ，大家 再 飲 個 痛快 ，嚟嚟嚟嚟 ，飲酒 。
講完 就 將 個 缽頭 遞過去 。
查伊璜 接過 缽頭 飲咗 一大啖 笑住 話 ：呢啲 酒 認真 唔錯 啊 。
嗰個 乞兒 喺 個 爛碗 裏 便 揦起 一大嚿 肉 話 ：呢啲 係 狗肉 你 食唔食 吖 ？
查伊璜 雖然 覺得 污糟 ，但係 佢 諗 ：
我 既然 當佢 係 酒友 ，如果 推辭 就 未免 睇佢 唔起 嘞 。
佢 即刻 伸手 接過嚟 咬咗 一啖 ，噍咗 幾噍 ，哈 都 幾 好味 噃 。
噉 兩個人 喺 爛廟 之中 就 坐 喺 地 嚟 ，將 缽頭 就 遞 嚟 遞 去 ，你 飲 一啖 啊 我 飲 一啖 。
食狗肉 個 時候 呢 ，就 用 手 揦 。
冇 幾耐啫 ，酒 同埋 肉 都 冇晒 。
個 乞兒 哈哈大笑 話 ： 哼 哈哈哈 哈哈 ， 可惜 酒少 啲 吖 ， 飲 唔 醉 孝廉 公 啊 。
各位 ，欲知 後事 如何 ，且 聽 下回 分解 。
