上次 係 講到 趙能 、趙得 ，就 帶住 一班 土兵 入去 間 廟 追 宋江 吖 ，畀 一浸 怪風 ，吹到 毛骨悚然 ，嚇到 一仆一碌 走都走唔切 。
啱啱趯出間廟門啫 ，又聽見 廟裏頭 有人 喺度 嗌話 哎呀 唔關我事啊 ，唔關我事啊 。
趙能 再 返入去 睇下 ，嗨 ，原來 係 兩三個 土兵 跌倒 喺 地 嚟 ，畀 樹根 勾住 啲 衣服 死都 掹唔甩 ，仲 以為 係 畀 鬼神 捉住 添 ，就 掉咗 朴刀 ，拉住 件 衫 猛 嗌 救命 。
宋江 就 匿喺 神廚 裏 便 聽咗 呀 爭啲 忍唔住 笑 。
趙能 將 土兵 嘅 衣服 解 返 開 ，帶 返 佢哋 出 門口 。
有幾個 喺前便 嘅 土兵 就 話 喇 ：哎呀 ，我 都 話咗 喇嘛 ，呢處 菩薩 係 最 靈 㗎 嘛 。
你哋 一味 喺 裏頭 嚟 搞三搞四 ，又 撩開 嚟 睇 啊噉 ，撩到 啲 小鬼 都 嬲 起 上嚟 喇 。
好喇好喇 ，我哋 去 守住 村口 等 佢 ，怕 佢 飛去 咩 ？
趙 能 、 趙 得 都 話 喇 ： 冇 錯 喇 冇 錯 喇 ， 就 喺 村口 四周圍 守住 就 得 喇 。
於是 大家 都 行 去 村口 咯噃 。
噉 講下 宋江 喇 ，佢 就 伏 喺 神廚 裏 便 諗 啦 ：
唉 ， 雖然 冇 畀 呢 班 傢伙 捉 到 ， 之而家點 能夠 出去 村口 呢 ？
宋江 正喺度 猛諗 ，冇晒計喇 。
咦 ，忽然間 聽見 後面 廊下 有人 出嚟 喎 。
宋江 又 諗 ：哎呀 ，噉 就 死喇 ，早啲 出去 咪 就 好咯 。
只見 兩個 青衣 童子 ，一直 嚟到 神廚 旁邊 話 ：
小童 奉 娘娘 法旨 ，請 星主 去 有 說話 講 啊 。
宋江 唔敢 出聲 應喇 。
外便 嗰個 童子 又 話 喇 ：娘娘 有 請 ，星主 請 行 啦 。
宋江 仲 係 唔 敢 答應 。
外便嘅 童子 又 話 喇 ：宋星主 唔好 遲疑 喇 ，娘娘 等 咗 好 耐 喇 。
宋江 聽見 啲 聲 係 鶯 聲 燕 語 ，唔係 男人 聲 喎 ，就 喺 神櫃 底 鑽 出嚟 啦 ，一 睇 ，原來 係 兩 個 青衣 女童 好 恭敬 噉 企 喺 旁邊 嚟 。
宋江 吃咗 一驚 ，吖 再 睇 下 ，啊 ，原來 係 兩個 泥菩薩 。
咦 ？聽到 外便 有人 講 咯喎 ：
宋星主 ，娘娘 有請啊 。
宋江 而家 先至 撥開 帳幔 ，鑽 出去 。
哦 ，原來 真係 有 兩個 青衣 螺髻 女童 ，齊齊 彎腰 企 喺 處 ，向 佢 行咗 個 禮 。
宋江 就 問 喇 ：兩位 仙童 ，喺 邊處 嚟 啊 ？
青衣 就 話 喇 ：奉 娘娘 法旨 ，請 星主 入 宮 啊 。
仙童 你 錯 喇 ，我 係 姓 宋 名 江 ，唔係 咩嘢 星主 。
點 會 錯 呢 ？請 星主 行 啦 ，娘娘 等 咗 好 耐 喇 。
咩嘢 娘娘 啊 ？我 又 唔識 佢 ，點 敢 去 啊 。
星主 到咗 嗰處 就 知喇 ，唔使 問 咁多 。
娘娘 喺 邊度 嚟 啊 ？
就喺 後便 宮 裏頭 啫 。
噉青衣 就 前面 帶路 ，宋江 跟住 佢 就 行咗 出去 ，轉過 後殿 側 跟 ，就 見到 有 個 角門 。
青衣 就 話 ：宋星主 喺 呢處 入嚟 啦 。
宋江 跟 佢 入咗 角門 一 睇 ，只見 星月 滿天 ，香風 拂拂 ，四周圍 都 係 茂林 修竹 。
宋江 諗喇 ：啊 ，乜 原來 呢間 廟 後 便 有 噉嘅 地方 㗎 。
早知 如此 ，我 就 走嚟 呢處 匿 啦 ，唔使 先頭 嚇得 我 咁 淒涼 啦 。
宋江 一路行 ， 覺得 兩便 都 種住 啲 大 松樹 嘅 ， 都 係 攬 唔 埋 咁 粗 嘅 松樹 ， 中間 平 平坦坦 ， 一條 龜背 大街 。
宋江 睇咗 就 諗喇 ：
我 真係 唔 知道 間 古廟 後便 有 條 咁靚 嘅 路 㗎噃 。
佢 跟住 青衣 ，行咗 一里 路度 ，聽見 沙沙聲 嘅 溪水 響 ，睇下 前便 ，有座 青石橋 ，兩邊 兩便 都 係 朱紅 欄杆 ；
岸上 種 嘅 都係 奇花異草 ，蒼松 茂竹 ，翠柳 夭桃 ；
橋下 嗰啲 清水 呀 ，真係 如 銀 似 雪 啊 ，喺 石洞 流出去 。
過咗橋 ，只見 兩行 奇樹 ，中間 一道 大紅門 。
宋江 入咗 門 ，又 見到 有 座 宮殿 。
宋江 諗 ：我 生長 喺 鄆城縣 嚟 ，咁耐 都 冇 聽過 有 噉 嘅 地方 㗎 噃 。
個 心 有 啲 驚 ，唔 敢 起腳 。
青衣 就 催促 佢 話 請 星主 行 快啲 啦 噉 。
一帶就帶咗入門裏頭 ，有個龍墀 ，兩廊下 都係 朱紅亭柱 ，都掛住 繡簾嘅 。
正中 一座 大殿 ，殿 上面 燈燭 輝煌 。
青衣 喺 龍墀 裏 便 一步步 噉 帶 佢 上到去 月台 ，就 聽見 殿 上 石階 前 便 ，又 有 幾個 青衣 話 喇 ：
娘娘 有請 星主 入嚟 啊 。
宋江 到 到 大殿 上 便 呀 ， 哎呀 ， 成 個人 都 震 晒 ， 真 係 毛管眼 都 豎起 噃。
佢 耷 低頭 睇 下 ， 下 便 都 係 龍鳳 階磚 都 唔 知 幾 靚 嘅 。
青衣 入到 珠簾 裏 便 稟奏 話 ：宋星主 已經 請到 喇 。
宋江 嚟到 簾前 御階 之下 ，護低 條 腰 再拜 然後 就 伏 喺 地下 嚟 佢 話 ：
臣 乃 下 濁 庶民 ，不識 聖上 ，伏望 天慈 ，俯賜 憐憫 。
御簾 裏 便 傳 旨 話 喇 ：請 星主 坐 噉 。
宋江 唔敢 擔 高頭 啊 。
四個 青衣 扶佢 去 錦墩 嗰度 坐 ，宋江 就 唯有 勉強 坐低 係啦 。
殿上面 喝 一聲 話 捲簾噉 ，就 幾個 青衣 就 將 珠簾 捲起 ，搭 喺 金鉤 上 便 。
娘娘 開聲 問 喇 ：星主 別 來 無恙 吖 嘛 ？
宋江 企起身 再拜 話 ：臣 乃 庶民 ，不敢 面見 聖容 啊 。
星主 既然 嚟到 呢處 ，不必 多禮 。
宋江 噉 先至 擔 高頭 睜開 雙眼 ，睇見 殿 上 呀 金碧 交輝 ，點住 龍燈 鳳燭 ；
兩便 都係 青衣 嘅 女童 ，捧住 玉笏 玉圭 ，揸住 旌旗 羽扇 喺度 侍從 ；
正中 嗰座 七寶九龍床上 便 ，坐住 嗰位 娘娘 。
宋江 睇下 ，嘩 ，呢個 娘娘 呀 ，又 靚 又 威嚴 。
嗰個 娘娘 話 喇 ：賜酒 。
就 叫 個 童子 獻 酒 。
兩便嘅 青衣 女童 攞住 個 奇花寶瓶 ，捧 啲 酒 過嚟 ，斟 喺 玉杯 裏 便 。
有 一個 為首 嘅 女童 呢 ，捧住 玉杯 嚟 敬畀 宋江 。
宋江 即刻 企起身 ，佢 唔敢 推辭 喇 ，接過 玉杯 ，對住 娘娘 跪低 飲咗 一杯 。
一飲落去呀 ，宋江 覺得 呢啲 酒 真係 馨香馥郁 ，好似 醍醐灌頂 甘露 灑 心 ，喺 個 嘴 處 呀 一路 香 到 落 肚 。
又 有 個 青衣 ，捧住 一碟 仙棗 過嚟 敬畀 宋江 。
宋江 戰戰兢兢 ，怕 失咗 體統 啊 ，尖起 手指尖 ，攞咗 一粒 就 食喇 。
食完 就 唔敢 掉粒核 ，就 揸住 喺 手嚟 。
青衣 又 斟 咗 一 杯酒 嚟 敬 畀 宋江 ， 宋江 又 一飲而盡 。
娘娘 話 ：再敬 一杯 噉 。
青衣 又 再 斟 咗 一 杯酒 過 嚟 敬 畀 宋江 ， 宋江 又 飲 咗 喇 。
仙女 呢 又 捧 啲 仙棗 嚟 ，佢 又 食咗 兩粒 。
總共 就 飲咗 三杯 仙酒 就 食咗 三粒 仙棗 。
宋江 呢 個 時候 覺得 微微 有 啲 醉 咯 喎 ， 佢 怕 酒醉 之後 有失體統 啊 ， 噉 啊 再拜 話 ： 臣 不勝 酒量 ， 望 乞 娘娘 免賜 啊 。
娘娘 就 話 喇 ：既然 星主 唔能夠 飲酒 喇 ，就 唔 飲 啦 ；
攞 嗰 三 卷 天書 嚟 賜畀 星主 。
青衣 就 去 屏風 後 便 ，用 個 玉盤 托住 一個 黃羅包袱 ，包住 三卷 天書 賜畀 宋江 。
宋江 攞過嚟 睇下 ，呢 三 本 天書 係 長 五 寸 闊 三 寸 厚 三 寸 。
佢 唔敢 打開 嚟 睇 ，佢 再 拜 接受咗 ，收埋 喺 衫袖 籠 裏 便 。
娘娘 話 喇 ：宋星主 ，傳畀 你 三卷 天書 ，你要 替 天 行道 ，全忠 仗義 ，輔國 安民 ，去邪 歸正 。
我 有 四句 天言 ，你 要 記住 終身 佩受 ，勿忘勿洩 。
宋江 跪 喺度 領受 天言 。
娘娘 話 喇 ：
遇宿重重喜 ，逢高不是凶 。外夷 及 內寇 ，幾處 見 奇功 。
宋江 聽咗 ，再拜 接受咗 。
娘娘 又 話 喇 ：
玉帝 因為 星主 ，魔心 未斷 ，道行 未完 ，暫時 罰 你 落下方 ，不久 就 重登 仙界 㗎喇 ，千祈 唔好 有 分毫 懈怠 啊 。
如果 你 他日 罪 下 酆都 ，我 亦 唔 能夠 救 你 。
呢 三 卷 天書 ，你 要 認真 熟讀 ，你 只能夠 同 天機星 一齊 睇 ，其他 嘅 人 都 唔 能夠 睇 㗎 。
功成之後 ，就 燒咗佢 ，唔好 留喺 人世 。
所囑咐 你 嘅 說話 ，你 要 好好 記住 。
目前 天凡 相隔 ，難以 久留 ，你 快啲 返去 啦 ，第日 瓊樓 金闕 ，我哋 再 相會 。
講完 ，就 叫 童子 快啲 送 星主 返去 。
宋江 多謝 過 娘娘 ，跟隨住 青衣 女童 就 行 落 殿庭 ，出咗 大紅門 一直 嚟到 石橋 邊 。
青衣 就 話 ：啱先 星主 你 遇難 ，如果 唔係 我哋 娘娘 保佑 呀 ，已經 畀 人 捉咗 去 喇 。
不過 唔怕 ，天光 嘅 時候 ，你 自然 就 脫險 㗎 喇 。
啊 ，星主呀 ，你 睇下 ，石橋下 便 ，喺 水 裏頭 兩條龍 喺度 玩緊 啊 ，幾好睇啊 。
宋江 憑住 欄杆 睇下 ，果然 見到 係 二龍 戲水 。
嗰 兩個 青衣 將 佢 向 下 一 推 ，宋江 大叫 一 聲 哎呀 弊喇 。
點知 撞正 喺 個 神廚 裏 便 ，呵呵 ，一覺 醒來 ，原來 係 南柯 一夢 。
宋江 起身 行 出去 睇 下 ， 個 月 正 喺 天心 嚟 ， 大概 係 三 更 咁 上下 啦 。
宋江 扲 下 衫袖 裏 便 ，咦 ，覺得 手 裏頭 有 三粒 棗核 ，衫袖籠 呢 ，有 條 手巾 包住 一包 書 噃 。
摸出嚟 打開 一 睇 ，果然 係 三卷 天書 ，又 覺得 口裏 便 呀 一陣 酒香 。
宋江 諗嘞 ：啊 ，呢個 夢 真係 奇怪 喇 ，此 夢 非 夢 噃 。
你話 真係 發夢 ，噉 點解 又 有 三卷 天書 喺 袖籠 裏頭 ，個口 又 有 酒香 ，棗核 又 喺 手裏 便 ；
講 我 聽 嗰啲 說話 ，我冚𠾴唥 都 記得 ，一句 都 冇 忘記到 。
之 你 話 唔係 發夢 咩 ，我 自己 明明 喺 神廚 裏 便 先 係 一跤 跌入嚟 嘅 。
啊 ，係啊係啊 ，我 明白 喇 ，實係 呢處 神聖 顯靈 ，現形 畀 我 睇 啊 。
不過 唔知 係 乜嘢 神明 呢吓 ？
佢 揭起 帳幔 嚟 睇下 ，九龍 椅 上面 坐住 一個 極之 美麗 嘅 娘娘 ，同埋 夢中 嗰個 呀 一模一樣 嘅 。
宋江 諗嘞 ：呢個 娘娘 叫 我 做 星主 ，嗯 ，諗嚟 ，我 前生 都 唔係 個 等閒之人 噃 。
呢 三 卷 天書 ，梗 有用 嘅 。
吩咐 我 嗰 四句 天言 ，一定 要 記實至好啊 。
係喇 ，個 青衣 女童話 ，天光 我 就 會 脫險 㗎 喇噉 講 。
而家個 天 都 就 嚟 光 喇 ， 我 出去 都 啱 㗎 喇 嚱。
佢 伸 隻 手 喺 神廚 裏 便 ，摸返 嗰 條 短棍 ，拍乾淨啲 衣服 ，一步步 喺 宮殿 行 落嚟 ，混左便 嘅 走廊 轉咗 出 廟 外 便 ；
仰高頭睇下 ，舊牌額 上面 刻住 四個 金字 ：玄女之廟 。
宋江 用 隻手 放喺 額頭 ，行咗 個 禮 ，多謝 噉 話 ：好彩 啊 。
原來 係 九天 玄女 娘娘 將 三卷 天書 傳授 畀 我 ，又 救咗 我 嘅 性命 。
如果能夠再見天日 ，必定 嚟 呢處 重修 廟宇 再建 殿庭 。
伏望聖慈俯垂護佑啊 ！
佢 多謝 完喇 ，就 靜悄悄 行 出去 村口 。
點知 行 離間 廟 冇 幾 遠 ，就 聽見 前面 遠遠 叫喊 連天 嘞 。
宋江 諗喇 ：弊喇 呢趟 又 弊喇 ，我 不如 企定 腳 ，唔好 出去 住 。
如果 畀佢哋 見到 呀 ，實 畀佢哋 捉咗 去 嘅 。
嗯 ，我 不如 就 喺 呢處 路邊 大樹 後 便 匿 一陣 先 喇 。
啱啱 縮埋 喺 大樹 後便 ，只見 幾個 土兵 急急 走過嚟 ，走到 上氣唔接下氣 ；
有 啲 用 刀槍 做 拐杖 ， 走到 趷 下 趷 下 ， 口口聲聲 猛 咁 嗌： 神聖 救命 啊 ， 神聖 救命 啊 ！
宋江 喺 樹 後 便 睇咗 就 諗 咯噃 ：哈 ，古怪 呢 又 。
佢哋 守住 村口 ，等 我 出嚟 捉 我 㗎嘛 ，點解 又 撞入嚟 呢 ？
再睇下 ，趙能 亦 趯埋入嚟 ，個口 一味 喺度 嗌 ：實死咯 呢趟 ，實死咯 ！
宋江 諗 ：嗰個 傢伙 點解 咁 慌 啊吓 ？
哦 ，原來 喺 佢 後便 呀 有 條 大漢 追緊 佢 。
嗰個 大漢 ，上半橛 打晒 赤肋 ，成身 肉 黑古勒倔 ，手裏 便 揸住 兩把 夾鋼板 斧 喺度 喝佢 話 ：衰公 你 咪 走 ！
行前嚟一睇 ，原來 呢個人 就係 黑旋風李逵 。
宋江 諗喇 ：哎 ，唔通 我 又 係 發夢 ？
所以 佢 仲 係 唔 敢 行出去 。
嗰個 趙 能 啱啱 行 到 廟 前 ，畀 松樹 根 一𠽤 ，一跤 跌 喺 地下 嚟 。
李逵 大步 趕上去 ，趁勢 一腳 踩住 佢 背脊 。
呢 個 時候 ， 後 便 又 有 兩名 好漢 趕到 嚟 喇 ， 一個 係 歐鵬 ， 一個 係 陶宗旺 ， 每個 人 都 揸 住 一把 朴刀 。
李逵 見 佢 兩個 都 趕到嚟 ，怕 佢哋 爭功 就 有 傷 義氣 冇 癮 啦 ，舉起 手 ，一 斧頭 劈落去 ，將 趙能 呀 斬 做 兩邊 ，連 心口 都 斬開 咗 。
佢 跳起身嚟 ，追住 班 土兵 嚟 殺 ，趕走晒 佢哋 。
宋江 呢個 時候 仲係 唔敢 行出嚟 。
背後 又 見到 有 三名 好漢 ，又 追殺 緊 過嚟 喇 。
前面 係 赤髮鬼 劉唐 ，第二個 係 石將軍 石勇 ，第三個 呢 係 催命判官 李立 。
呢 六 名 好漢 都 話 喇 ：嗰 班 傢伙 殺散 晒 就 係 唔見 阿哥 噃 ，點算 好 呢 ？
石勇 就 話 喇 ：咦 ，嗰樖 松樹 後 便 有 個人 企 喺 嗰度 啊 。
宋江 而家 先至 敢 行出嚟 佢 話 ：感謝 各位 兄弟 又 嚟 救 我 嘅 性命 ，我 點樣 報答 各位 嘅 恩情 啊 ？
六位 好漢 見到 宋江 ，非常之 歡喜 喇 。
啊 ，阿哥 你 喺度 喇 ，快啲 報畀 晁頭領 知道 。
石勇 、李立 就 即刻 分頭 去 報告 。
宋江 就 問 劉唐 話 ：你哋 點 知道 嚟 呢處 救 我 啊 ？
劉唐 就 話 喇 ：阿哥 啊 ，你 前腳 落 咗 山 ，晁頭領 同 吳軍師 就 放心 唔 落 ，就 叫 戴院長 跟住 落 山 探聽 阿哥 你 嘅 下落 。
晁頭領 佢 自己 仲 係 唔 放心 ，又 派咗 我哋 幾個 人 ，前嚟 接應 ，就 怕 阿哥 你 有 咩 嘢 風險 。
喺 半路 撞見 戴宗 話 ，有 兩 隻 狗 追住 要 捉 阿哥 你 啊噉 。
晁頭領 聽咗 就 即刻 吩咐 戴宗 返去 山寨 ，叫 淨係 留低 吳軍師 、公孫勝 、阮家 三兄弟 、呂方 、郭盛 、朱貴 同 白勝 看守 山寨 ，其餘 嘅 兄弟 ，都 叫 晒 嚟 呢處 搵 阿哥 你 。
聽人講 ，話 趕咗 宋江 入去 還道村 喇噉 ，我哋 將 村口 把守 嘅 呢班 傢伙 冚𠾴 唥 殺晒 ，就 得 呢 幾個 趯咗 入嚟 村裏 便 。
跟住 李大哥 追 入嚟 ，我哋 亦都 追住 入嚟 喇 ，哈 ，想唔到 阿哥 你 就 喺 呢處 。
話猶未了 ，石勇 啊 帶住 晁蓋 、花榮 、秦明 、黃信 、薛永 、蔣敬 、馬麟 嚟到 ；
李立 呢 就 帶住 李俊 、穆弘 、張橫 、張順 、穆春 、侯健 、蕭讓 、金大堅 噉 佢哋 嚟到 。
噉 一行 眾多 好漢 都 見到 面 喇 。
宋江 多謝 眾位 頭領 啦 。
晁蓋 就 話 喇 ：我 叫 賢弟 唔使 親自 落山 ，你 唔 聽 愚兄 嘅 說話 ，爭啲 又 撞咗板 喇 。
宋江話 ：小弟 就係 為咗 父親 嘅 事情 ，牽腸掛肚 坐臥不安 ，唔到 小弟 唔嚟 嘅 。
晁蓋 又 話 喇 ：有 件事 我 講出嚟 ，等 賢弟 你 歡喜 下 。
令尊 同埋 令弟 家眷 ，我 已經 叫 戴宗 同埋 杜遷 、宋萬 、王矮虎 、鄭天壽 、童威 、童猛 佢哋 接咗 去 喇 ，已經 送 到 山寨 喇 。
宋江 聽咗 呀 歡喜 到 極點 咯 ，佢 多謝 晁蓋 話 ：
哎 ，得仁兄 噉樣 施恩 ，宋江 死而無怨喇 。
呢件事噉 就 搞掂晒 。
晁蓋 、宋江 ，同埋 眾 頭領 各各 上馬 就 離開咗 還道村口 。
宋江 喺 馬上 便 ，向住 個 天 行咗 個 禮 ，多謝 神明 庇佑 。
噉 呢 一行人馬 ，返到 梁山泊 。
吳學究 就 帶住 守山 嘅 頭領 ，一直 嚟到 金沙灘 迎接 。
佢哋 返到 上 聚義廳 ，宋江 心急 就 問 喇 ：我 父親 喺 邊處 啊 ？
晁蓋 就 叫 人 請 宋太公 出嚟 。
冇幾耐 ，鐵扇子 宋清 ，帶住 一頂 山轎 ，抬住 宋太公 嚟到 。
宋江 見咗 啊 ，喜從天降 ，笑逐顏開 咯 。
宋江 跪低 叩 咗 幾個 頭話 ：
父親大人 ，你 受驚喇 ，孩兒 做咗 不孝之子 ，連累 父親 擔驚受怕 。
宋太公 就 話 喇 ：啊 趙 能 嗰 兩 兄弟 呀 真係 抵死 啊 ，日日 都 派 人 嚟 看實 我哋 ，一 等 到 江州 有 公文 嚟 ，就 要 捉 我哋 兩 父子 去 坐 監 。
當時 ，你 喺 莊後 便 敲門 ，嗰陣 已經 有 八九個 土兵 ，喺 前面 大廳 㗎 喇 ，收尾 又 唔見咗 ，唔知 點樣 又 追咗 出去 噃 。
到到 三更 時候 ，又 有 二百幾人 打開咗 莊門 ，就 將 我 扶咗 上 轎 抬起 我 就 行 喇 ，又 叫 你 細佬 啊 執拾 好啲 箱籠 ，放 火 燒 咗 莊院 。
嘿 ，嗰陣 都 唔到 我 問清楚 ，一直 就 抬 到 嚟 呢處 。
宋江 話 ： 今日 我 哋 父子 團圓 相會 ， 都 係 多 得 各位 兄弟 幫手 啊 。
於是 佢 叫 宋清 拜謝咗 眾 頭領 。
晁蓋 佢哋 呢 都 嚟 參拜 咗 宋太公 ，就 吩咐 殺 牛 劏 馬 ，安排 慶喜 筵席 ，嚟 慶賀 宋公明 父子 團圓 啊 。
當日 ，盡醉 先至 散席 。
第日 呢 ，又 試 大排筵席 嚟 賀喜 ，大小 頭領 啊 個個 都 歡天喜地 。
到 第三日 ，晁蓋 又 自己 擺酒 ，慶賀 宋江 父子 完聚 。
飲酒嘅時候 ，觸動起 公孫勝 有個 諗頭 喎 ，佢 又 諗起 佢老母 喺 薊州 ，自己啊 離家 日久 喇 都 唔知 屋企 點 。
於是 佢 就 起身 同 大家 話 ：
好多得眾位豪傑 帶 協貧道 咁耐 ，真係 恩同骨肉 ；
不過 小道 自從 跟 晁頭領 上咗 山 ，日日 都 飲宴 歡樂 ，冇 返過去 鄉下 探下 老母 ；
同時亦 恐怕 我 個 師父 掛念住 我 ，所以 好 想 返鄉下 探望下 ，暫時 同 各位 分別 三五個月 ，以後 先至 再 返嚟 。
希望 各位 滿足 下 小道 嘅 心願 ，免致 我 老母 掛念 啦 。
晁蓋 就 話 喇 ： 往日 已經 聽 先生 講過 㗎 喇 ， 話 令堂 喺 北方 冇 人 侍奉 ， 而家 既然 係 噉 樣講 喇 ， 就 好 難 阻擋 你 嘅 ， 就 係 唔 願同 先生 分別 就 係 喇 。
先生 要 返去 探親 ， 噉 就 聽 日 送行 啦 。
公孫勝 好 感謝 。
當日 ，盡歡而散 ，各自 就 返去 房 休息 啦 。
第日 朝頭早 ，就 喺 關下 安排 筵席 同 公孫勝 餞行 。
噉 公孫勝 呢 ，就 依舊 做返 個 雲遊道士 噉 打扮 ，腰裹腰包 、肚包 ，孭住 一對 雌雄 寶劍 ，膊頭 上面 掛住 棕笠 ，手裏頭 揸住 把 扇 就 落山 。
眾位 頭領 就 喺 關下 安排 筵席 ，各人 都 向 佢 敬咗 酒 就 送別 。
餞行完喇 ，晁蓋 就 話 ：一清先生 ，你 呢次 返鄉 去 探親 好 難 留 你喇 ，之 你 唔好 失信 喎 。
本來 係 唔想 畀 先生 去 嘅 ，因為 令 壽堂 在 上 就 唔 敢 阻擋 咯 。
百日之後 ，專望 你 鶴駕 降臨 ，切不可 爽約 。
公孫勝 話 ：多蒙 列位 頭領 睇得起 ，照顧 咗 咁耐 ，小道 點 敢 失信 呢 ？
我 返鄉下 參拜過 師父 ，安頓咗 老母 ，我 就 返嚟 山寨 喇 。
宋江 又 話 ： 先生 你 不如 帶 幾個 人去 ， 索性 接 咗 令 壽堂 上山 ， 就 可以 早晚 侍奉 佢 老人家 唔 使 掛住 啦 。
公孫勝話 ：我老母 平生 係 鍾意 清靜 ，唔受得 驚嚇 ，因此 就 唔敢 接嚟 。
屋企 亦 有 田產 山莊 ，我 老母 能夠 料理 。
小道 呢次 只係 返去 探望 一下 ，就 再 嚟 聚義 喇 。
宋江 就 話 ：既然 係噉樣 你 話 點 就 點 啦 ，就係 望 早早 返嚟 。
晁蓋 叫 人 攞咗 一盆 金銀 送畀 佢 。
公孫勝 話 ：唔使 咁多 ，夠 旅費 就 得嘞 。
晁蓋 扤嚟扤去 ，佢 只係 收咗 一半 ，收埋 喺 腰包 裏 便 ，行咗 個 禮 同 大家 分別 咗 ，過 金沙灘 就 一路 去 薊州 。
當時 散咗席 ，大家 正 話 要 返 上山 ，只見 黑旋風 李逵 喺 關下 放聲 大哭 喎 。
宋江 連忙 問 佢 話 喇 ：兄弟 ，因 乜事 咁 煩惱 啊 ？
李逵 就 話 喇 ：哼 ，哈哈哈 ，嗯 ，梗係啦 。
呢 個 又 去 接 老豆 ， 嗰 個 又 去 探 老母 ， 唔 通 我 鐵牛 ， 係 喺 泥 氹 處 鑽出 嚟 嘅 咩 ？ 啊啊啊 啊 ， 啊啊啊 。
晁蓋 就 問 佢 喇 ：噉 你 而家 想 點 吖 ？
我 只有 一個 老母 喺 屋企 。
我嘅 阿哥 ，又 喺 人哋 處 做 長工 ，指意 佢 嚟 養 喎 ，我 阿媽 點 能夠 快樂 㗎 ？
等我 接佢 嚟 呢處 ，快樂 下 都 好吖嘛 。
晁蓋 就 話 喇 ：兄弟 你 講得 啱 。
我 派 幾個人 同 你 一齊 去 ，接 佢 上山 亦係 一件 好事 吖 。
宋江話 ：誒唔得㗎唔得 。
李家 兄弟 脾氣 唔好 ，返去 鄉下 梗 會 撞板 嘅 。
如果 搵人 同埋 佢 去 亦 係 唔得 。
況且 佢 性 如 烈火 ，喺 路 上 必定 會 同 人哋 衝撞 ；
佢 又 喺 江州 殺過 咁 多人 ，邊個 唔 認得 佢 黑旋風 吖 ？
呢一排 ，官府 一定 會 有 公文 發落嚟 ，命令 原籍 要 捉住 佢 嘅 。
你 又 相貌 兇惡 ，人哋 一 認 就 認出嚟 㗎 喇 ，有 乜 三長兩短 ，路程 遙遠 我哋 點 知道 啊 ？
不如噉啦 ，你 過下 先 ，等 事情 平靜 返 落去 咯 ，嗰陣時 先至 返去 接 都 唔 遲 吖 。
李逵 急喇 ，佢 話 ：
阿哥 ， 你 做人 ， 都 係 唔 公道 嘅 。
你嘅老豆 就 接上山嚟 快活 ，我個老母 就 由得 佢 喺 鄉下 受苦 啊 。
你噉唔係激爆我鐵牛個肚 ？
宋江 就 話 喇 ：兄弟 你 唔好 急 。
你 要 返去 接 你老母 吖 嘛 ，得 ，你 聽 我 三件事 啦 我 就 放 你 返去 。
阿哥 ， 你講 啦 ， 邊 三件 事 啦 。
嗱 ，你 返去 沂州 沂水縣 接 你 母親 ，第一件 ，唔准 你 飲酒 ；
第二件 ，因為 你 脾氣 唔好 ，冇人 肯 同 你 去 嘅 ，你 只係 自己 靜靜地 接咗 阿媽 就 返嚟 ；
第三件 ，你 使開 嗰 兩把 板斧 就 唔好 帶去 喇 ，一路上 小心 在意 ，早去 早歸 。
哦 ，就 呢 三件事 咋嘛 ，我 都 聽 你 嘅 。
阿哥 你 放心 ，我 而家 就 起程 喇 。
當時 李逵 裝束 好 ，只係 掛 一口 腰刀 ，提 一把 朴刀 ，帶住 一錠 大銀 ，四五個 細銀錠 ；
飲 咗 幾杯酒 行 咗 個禮 ， 辭別 咗 大家 ， 落山 過 金沙灘 返鄉 下 喇 。
晁蓋 、 宋江 同埋 眾 頭領 送 咗 李逵 落山 ， 返到 去 山寨 裏頭 聚義廳 坐落 。
宋江 唔 放心 ，佢 同 大家 話 ：
李逵 呢個 兄弟 呢次 返去 實會 撞板 嘅 。
唔知 各位 兄弟 邊個 同佢 同鄉 呢吓 ？
係唔係 跟住 去 探聽 下 消息 啊 ？
杜遷 就話喇 ：就係 得 朱貴 係 沂州 沂水 縣 人 ，同 佢 係 鄉里 。
啊 ，我 都 唔記得咗 添 。
嗰日 喺 白龍廟 聚會 嘅 時候 ，李逵 已經 同 朱貴 認咗 鄉里 嘅 呢嚱 。
於是 宋江 就 搵人 去 請 朱貴 。
小嘍啰 就 飛報 落山 一直 去到 酒店 ，請 朱貴 上山 。
宋江話 ：李逵 兄弟 返咗 去 鄉下 接 佢 老母 。
因為 佢 脾氣 唔好 又 鍾意 飲酒 ，所以 冇人 願意 同 佢 一齊 去 ，我 又 怕 佢 喺 路上 會 撞板 。
賢弟 係 佢 鄉里 ，係咪 請 你 跟住 去 佢 嗰處 探聽 下 消息 行 一 趟 呢 ？
朱貴 就 回答 話 ：
小弟 係 沂州 沂水 縣 人 ，有 個 兄弟 叫做 朱富 ，喺 縣城 西門 外 便 開咗 間 酒店 。
李逵 佢 又 喺 我哋 縣 百丈村 董店 東 住 。
佢 有 個 大佬 叫做 李達 ，同 人哋 做 長工 。
李逵啊 自細 凶頑 ，因為 打死咗人 ，逃走咗出嚟 ，一直都冇 返鄉下 。
而家 叫 小弟 去 嗰處 探聽 下 消息 可以 ，就係 怕 酒店 冇 人 看管 啫 。
小弟 亦 都 好 耐 冇 返鄉 下 喇 ， 亦 好 想 返去 探望 下 兄弟 呢 。
宋江 就 話 ：間 酒店 唔使 你 憂心 ，我 會 叫 侯健 、石勇 替 你 暫時 管住 下 先 。
朱貴噉 就 應承咗 宋江 ，辭別咗 眾 頭領 落山 ，就 返去 酒店 執好 個 包袱 ，將 舖面 同 石勇 、侯健 交割 清楚 ，就 返去 沂州 喇 。
