而家 講 下 施恩 啊 ，佢 喺 衙門 就 上上下下 打點 好 ，託 人情 ，送 厚禮 ，要 減輕 武松 嘅 案情 。
噉嗰一日 ，施恩 就 準備咗 好多 靚嘅 酒菜 ，樣樣齊備 ；
嚟𠼮 阿康 節級 帶 佢 一直 入到去 大牢 裏 便 探望 武松 ，見面 送 飯 喇 。
呢陣時 ，武松 啊 已經 得到 康節級 嘅 關照 ，將 啲 刑禁 都 放鬆 晒 喇 ，唔使 擔枷 唔使 鎖手 唔使 鎖腳 ，舒服得多 㗎 啦 。
施恩 又 攞咗 三二十 兩 銀 ，分派 畀 嗰 班 小獄卒 。
噉就攞酒菜畀武松食 。
施恩 伏 喺 佢 耳仔 邊 細細聲 噉 話 ：
阿哥 ，呢場 官司 ，明明 係 張 都監 同 蔣 門神 報仇 ，陷害 阿哥 你 。
你 放心 啦 ，唔使 憂愁 㗎 。
我 已經 求 人 ，去 同 葉孔目 講 通晒 喇 ，佢 係 好意 想 幫 你 忙 嘅 。
而家 呢 ，就 等 限期 一 滿 ，就 判咗 你 出去 ，到時 我哋 再 算 係 啦 。
當時 武松 呢 ，就 已經 得到 佢哋 放鬆 咗 啦 嘛 ，監禁 得 冇 咁 嚴 啦 嘛 ，已經 想 越獄 㗎 喇 ；
之而家聽到施恩噉講咯 ，就放棄咗越獄呢個念頭 。
施恩 喺 監牢 裏 便 安慰 咗 武松 一番 ，就 返 扯嘞 。
過咗 兩日 ，施恩 再次 準備 啲 酒食 錢財 ，又 試 嚟 𠼮 康節 級 ，帶 佢 入 監牢 探望 武松 。
見到面 ，又 將 啲 酒食 嚟 款待 佢 。
又 分派 啲 零碎 銀兩 畀 嗰 啲 獄卒 啊 做 酒錢 。
返到屋企 ，佢 又 試 搵人 上上下下 去 使 錢 ，催促 快啲 辦理 呢件案 。
過咗幾日 ，施恩 又 試準備咗 酒肉 ，做咗 幾件 新衫 ，就 請求 康節級 幫忙 ，帶佢 入去 大牢 ，請 啲 獄卒 飲酒 ，請 佢哋 關照 武松 ；
又叫 武松 換咗 新衫 ，食咗 啲 酒菜 。
就係噉樣 ，一連幾日 啊 ，施恩 就嚟咗 大牢 裏 便 三 次 。
哈 ，點知 一下 冇 提防 就 畀 張 團練 屋企 嘅 心腹 家人 見到 ，梗係 返去 報告 定 啦 。
嗰個 張 團練 知道咗 ，就 去 搵 張 都 監 講 呢件事 咯 喎 。
張都監 即刻 又再 派人 ，攞啲 錢 送畀 知府 ，就 話畀佢聽 施恩 如何如何 武松 又 如何如何 噉樣 。
嗰個 知府 係 個 贓官 嚟 ，收咗 啲 賄賂 咯 ，就 派 人 經常 落去 牢房 ，監視住 。
但凡 見到 有 閒人 嚟 呢 就 要 捉住 嚟 審問 嘅 。
施恩 一 知道 噉樣 就 唔敢 再 去 探監 啦 。
不過噉噃 ，雖然 係 施恩 唔嚟得喇 ，但 武松 呢 ，佢 又 得到 康節級 同 班 獄卒 照顧 佢 咯 。
從此之後啊 ，施恩 亦 只有 ，去 康節 級 屋企 攞 消息 嘞 。
眨下眼 ，前前後後 上下 兩個月 。
因為 有 呢個 辦案 嘅 葉孔目 一力主張 ，對 個 知府 呢 講明 究竟 。
噉嗰個 知府 噉 先至 知道 張都監 接受 咗 蔣門神 嘅 黑錢 ，同 張 團練 打 同 通 ，設計 嚟 陷害 武松 。
佢 個 心 又 諗 喇 ：哈 ，你 就 賺咗 錢 喇 ，誒 叫 我 嚟 同 你 害人 啦 。
因此呢 ，佢 就 冇 心機 咯喎 ，唔嚟 管 咁多 喇 。
捱咗 六十日 限期 滿喇 ，喺 監牢 裏 便 提咗 武松 出嚟 ，喺 公堂 上面 開咗 面枷 。
辦案嘅 葉孔目 呢 讀咗 招狀 ，就 擬咗 罪名 ：
打 二十 棍 ，刺 配 恩州 牢城 ；
原來 偷 嘅 贓物 ，就 還返 畀 本主 。
張都監 冇 修 啦 ，就只好 派 個 家人 嚟 衙門 啊 領返 啲 贓物 。
喺 公堂 上 ， 將 武松 打 咗 二十 棍 ， 刺 咗 金印 就 攞 一面 七斤 半重 嘅 鐵葉盤 頭枷釘 咗 ；
簽發 一 張 公文 ，派 兩 個 壯健 嘅 差人 押送 武松 ，限 咗 時日 就 要 起程 喇 。
嗰 兩個 差人 領咗 文書 ，就 押解 住 武松 出 孟州 衙門 就 行 咯 喎 。
原來 武松 捱打 嗰陣 呢 ，因為 老管營 使 錢 買通 晒 㗎 喇 ，葉孔目 呢 又 關照 佢 ，知府 亦 知道 佢 係 被 陷害 嘅 ，所以 打起上嚟 就 唔係 好重 嘅 啫 。
武松 啊 忍住 嗰啖氣 ，戴咗 面枷 ，出咗 城 ，兩個 差人 就 喺 後便 押住 。
約莫 行咗 里 零路 啦 ，只見 喺 路邊 一 間 酒店 啊 ，施恩 又 行 出嚟 。
佢 對 武松 話 ：小弟 ，喺 呢處 等候 好耐 喇 。
武松 一 睇 下 施恩 ，嘿 ，又係 包住 個 頭 ，吊住 隻 手 。
武松 就 問 啦 ：我 好耐 冇見 你 喇 ，點解 又 搞成 噉樣 啊 ？
唔怕 同 阿哥 講 ，小弟 自從 喺 監牢 裏 便 ，同 你 三次 見面 之後 ，知府 知道咗 ，就 經常 派 人 嚟 監視 ；
個張 都 監 又 派 人 喺 監牢 門口 附近 ，巡來巡去 。
所以 小弟 就 唔能夠 再 入去 大牢 裏 便 探望 兄長 ，只能夠 去 康節級 屋企 攞 消息 啦 。
半個月 之前 ，小弟 正 喺 快活林 間店 裏 便 ，只見 蔣門神 嗰個 傢伙 又 帶住 一班 軍佬 嚟 打嘞 。
小弟 又 試 畀 佢 痛打 一餐 ，佢 一樣 要 小弟 去 𠼮 人 嚟 賠禮 ；
又畀佢 再次 搶咗 間 店 去 ，依舊 交還 晒 所有 嘅 架 生雜物 。
小弟 而 家 喺 屋企 養傷 都 未曾 好 啊 。
今日 聽講 阿哥 要 充軍 去 恩州 ，特登 做咗 兩件 衫 ，送 畀 阿哥 喺 路 上 着 。
又煮咗 兩隻 鵝 喺度 ，請 阿哥 你 食 兩件 至 行 啦 。
施恩 又 請 嗰 兩個 差人 入去 酒店 ，嗰 兩個 差人 唔肯 去 啊 ，仲 吟吟沉沉 噉 話 ：
武松 呢個 傢伙 係 個 賊佬 嚟 㗎 嘛 ，聽下 食咗 你 嘅 酒菜 ，聽日 去 官府 上面 就 惹事 惹非 喇 。
喂 ，你 如果 怕 打 就 快啲 行開 吓 。
施恩 見到 唔係 路 喇 ，就 攞 十零 兩 銀 嚟 送 畀 呢 兩 個 差人 咯 喎 ；哈哈 嗰 兩 個 嘢 唔 肯 接 噃 ，嬲爆爆 噉 一味 催促 武松 要 起程 。
冇辦法啦 ，施恩 只好 攞 兩碗 酒 ，畀 武松 飲咗 ，就 將 個 包袱 扎 喺 武松 條 腰 處 ；
嗰 兩 隻 熟 鵝 呢 ，就 噉 掛 喺 武松 面枷 上 便 。
施恩 哄住 武松 耳仔 細細聲 噉 話 ：
阿哥 ，包袱 裏 便 ，有 兩件 衣服 ，一包 碎銀 ，喺 路 上 要 嚟 做 使用 啦 ；
仲有 兩隻 八搭麻鞋 喺 裏 便 添 。
阿哥啊 ，你 喺 路上 一定 要 仔細 提防啊 。
呢 兩個 衰公 呀 不懷好意 㗎 。
你 唔使 講 咁多 ，我 知道 。
再畀 多 兩個 嚟 我 都 唔怕 佢 。
你 返去 休養 下 啦 。
你 放心 啦 ，我 有 辦法 㗎 喇 。
施恩 當時 就 拜別咗 武松 ，喊住 返 扯 呢啲 不在話下 喇 。
噉 武松 同 嗰 兩個 差人 就 起程 啦 。
行咗 幾里 路 ，嗰 兩個 差人 就 靜雞雞 噉 商量 咯 喎 ：
咦喂 ，仲唔見 嗰 兩個 嚟 嘅 ？
係咯 ，仲未嚟 嘅 呢喂 。
武松 聽咗 ，個心 就 諗嘞 ：
哼哼 ，想嚟 整 鬼老爺 係嘛 ？我 冇 你 咁好氣 。
武松 隻 右手 呢 ，係 鎖住 喺 面枷 上 便 ，但係 左手 係 空住 冇 鎖 個 喎 。
佢 用 隻 左手 喺 枷 上 便 攞 咗 嗰 隻 熟 鵝 ，就 只顧 自己 食 ，睬 都 唔 睬 嗰 兩 個 差人 。
又行咗 四五里 路 ，又攞 第二隻 嚟 ，右手 撳住 ，左手 就 撕 ，自己 猛咁 食 。
行咗唔到 五里 路 ，哈 ，將 呢 兩 隻 熟 鵝 冚𠾴 唥 食光 。
行下行下 ，約莫 離開 城 呢 亦 有 八九里 喇 ，只見 前便 嘅 路邊 啊 ，有 兩 個 人 ，揸住 朴刀 ，又 掛住 口腰刀 添 嘅 ，喺 嗰處 等緊 喇 。
嗰 兩個 嘢 見到 差人 嚟 喇 ，就 傍住 一路 行 咯 喎 。
武松 見到 呢 兩個 差人 ，同 嗰 兩個 揸住 朴刀 嘅 眨眉眨眼 喺度 打 暗號 。
武松 見到 噉呀 ，已經 睇出 有 八成 鬼怪 㗎喇 ，之 佢 擠 個 肚 處 詐 假意 唔知 。
又行咗 幾里路 ，前便 就嚟到 一處 浩浩蕩蕩 嘅 河浦 ，四面 都係 野港河 湧嘅 。
噉 五個人 行到嚟 河湧 旁邊 一條 闊板橋 嗰處 ，呢度 有 一座 牌樓 ，上面 有 個 橫額 寫住 飛雲浦 三個 字 。
武松 見到 就 詐 假意 問 咯喎 ：吖 呢處 叫做 咩嘢 地方 啊吓 ？
嗰 兩個 差人 就 應 佢 話 喇 ：
唓 ！你 雙眼 又 唔係 盲 嘅 ，明明 牌樓 上面 咪 寫住 咯 ，飛雲浦 吖 嘛 。
武松 企住 腳 話 喇 ：我要 去 小便 啊 。
嗰 兩個 揸住 朴刀 嘅 人 呢 行 近咗 一步 ，點知 畀 武松 喝 一 聲 話 落去 ！
一腳 飛起 踢中 佢 ，打個 關斗 落咗 水 喇 。
另外嗰個呢 急急 轉身 想 趯 咯 喎 ，武松 隻 右腳 已經 飛起 喇 ，乒嘣 一聲 亦 踢埋 落水 。
嗰 兩個 差人 就 驚啦 ，哎呀 衰仔 走得 摩咯 呢趟 ，向住 橋底 就 趯咯 喎 。
武松 喝 一聲 話 你 仲 想 走 ！
將 嗰面 枷 一扭 ，啪聲 拗開 兩邊 ，就 向住 橋底 追過去 嘞 。
嗰 兩個 人 ，有 一個 已經 嚇到 跌咗 喺 地 嚟 。
武松 唔理 佢 住 ，就 追上去 對住 走緊 嗰個 嘅 背枚 啊 一拳 就 打低 佢 。
喺 水邊 ，執起 把 朴刀 ，趕上去 插咗 幾刀 ，當堂 死 喺 地下 嚟 。
武松 行返轉頭 ，將 嗰個 先頭 驚到 跌 喺 地下 嗰個 呢 亦 插 咗 幾 刀 。
噉踢咗落水嗰兩個呢 ，啱啱 掙扎返起身 ，正話 想走 ，武松 猛追過去 又斬倒咗個 。
趕上 一步 劈頭劈腦 揪住 佢 就 喝 佢 話 ：你 呢個 傢伙 老實 講 ！你 老實 講 我 就 放生 你 。
嗰 個人 就 話 喇 ： 誒 ， 誒 ， 誒 小人 兩個 誒 係 係 蔣門神 嘅 徒弟 。
誒嗯 ，我 師父 同 張 團練 夾定 計 喇 ，誒誒 要要 我哋 兩個 嚟 幫 嗰 兩位 差人 手 ，一齊 嚟 害 阿好漢 你 啊 。
你 師父 蔣 門神 而家 喺 邊處 啊 ？
誒 ， 誒 小人 臨 嚟 嘅 時候 ， 誒 ， 同 張團練 都 喺 張都監 屋企 嘅 ， 誒 鴛鴦 樓上 便 飲酒 啊 ， 誒 聽候 小人 返去 報告 嘅 。
原來噉啊 ，噉就唔饒得你喇 ！手起刀落 ，亦將呢個人殺咗 。
解咗 佢 把 腰刀 落嚟 ，揀 把 好 嘅 自己 帶咗 一把 ，又 將 嗰 兩個 屍首 都 掉 喺 河埔 裏 便 。
佢 又 怕 先頭 嗰 兩個 冇 死 喎 ，攞起 把 朴刀 ，喺 每個人 嘅 身上 又 插 咗 幾 刀 添 。
武松 企喺 橋 上面 睇咗 一陣 ，佢 諗 ：
雖然 而家 殺 咗 四個 衰公 ， 但 係 殺 唔 到 張都監 、 張團練 同 蔣門神 我 點出 得 呢 一 啖 氣 呢 ！
佢 揸住 把 朴刀 ，躊躇 咗 一陣 ：唔得 ，返去 ！
佢 諗掂 喇 ，即刻 就 棱棱聲 跑返去 孟州城 。
當 武松 趕到 入城 嘅 時候 已經 係 黃昏 時候 嘞 ，只見 家家 閉戶 就 處處 關門 。
佢 好快趣 就 走到 去 張 都 監 嘅 後花園 圍牆 外便 ，呢度 呢 ，係 一個 馬棚 嚟 。
武松 就 喺 馬棚 邊處 伏住 ，聽見 嗰個 馬夫 仲 喺 屋 裏 便 嚟 ，都 未曾 出嚟 。
佢 正 喺度 睺緊 ，只見 咿噉 道角門 打開咗 ，個 馬夫 挽住 個 燈籠 出嚟 ，裏便 就 有人 關返 道角門 喇 。
武松 匿 喺 黑影 裏 便 ，聽見 更鼓 ，咚 ，噹噹噹噹 ，打一更 四點 。
嗰個 馬夫 上咗 草料 ，掛起 個 燈籠 打開 鋪蓋 ，除咗 衣服 就 上床 瞓喇 喎 。
好喇 ，武松 嚟喇 ，佢 喺度 㧬 道門 㧬到 咿咿聲 。
個馬夫 就 喝 佢 話 喇 喂 ，老爺 啱啱 至 瞓 咋 喎 ，你 又 嚟 偷 我 啲 衣服 ，嘿 ，早啲 啩 你 ？
武松 將 把 朴刀 憑 喺 門 邊 ，掹咗 把 腰刀 出嚟 揸 喺 手 ，又 試 咿咿聲 噉 推 門 。
嗰個 馬夫 呢趟 忍唔住 喇 ，喺 床上面 赤條條 噉 跳起身 ，攞住 條 攪草棍 ，拉開 門閂 ，想 開 門 啦 。
點知 畀 武松 趁勢 一推 開道門 一步 搶入去 ，將 嗰個 馬夫 劈頭 揪住 。
嗰個 馬夫 正 話 想 嗌 救命 ，咦 喺 燈影 下 便 見到 閃閃亮 一把 刀 ，嗚 已經 嚇到 軟咗 八成 。
誒 ，誒饒命啊 。
你 認唔認得 我 啊 ？
啊 ，哎呀 ，哎 ，誒 武都頭 啊 ，誒 大哥 ，誒 ，誒 唔關我事 㗎 ，你 ，你 饒咗 我 啦 。
你 老實 講 ，張 都 監 而家 喺 邊處 ？
誒 ， 誒 今日 同 阿 張團練 、 蔣門神 佢 三個 飲 咗 一日 酒 㗎 喇 ， 而家 仲 喺 鴛鴦樓 上面 飲緊 呢 。
真唔真㗎 ？
誒 ， 誒 如 如果 係 小人 講 ， 講 大話 ， 誒 ， 叫 我 頭殼 生個 大瘡 。
噉就唔饒得你喇 ！
手起一刀 ，將 呢個 馬夫 殺咗 先 。
一腳踢開咗屍首 ，插好把刀 ；
自己 呢 喺 條 腰處 啊 ，解開 個 包袱 ，將 施恩 送 畀 佢 個 衣服 攞 出嚟 ，除咗 身上 嘅 舊 衫 ，着起 嗰 兩 套 新 衫 ；
裝束妥當喇 ，將 把 腰刀 掛 返 喺 腰處 ；
又 將 馬夫 嗰 張 被單 啊 ，攞 出嚟 包住 啲 散碎銀兩 ，放咗 入 個 錢袋 處 ，然後 呢 ，將 個 錢袋 掛 喺 門邊 ；
跟住 ，武松 又 將 兩 扇 門板 ，打斜噉 憑 喺 牆 邊 嚟 。
吹熄咗燈火 ，一下 閃返出去 ，攞住 朴刀 ，喺 門板 上 一步步 就 擒上 牆頭 喇 。
呢個 時候 有 啲 月光 ，武松 喺 牆頭 上 便 啪噉 一 跳 ，跳咗 入去 裏 便 。
就 走嚟 開咗 道 角門 先 ，搬開咗 門板 ，再 返返入去 ，虛掩 返 道 角門 ，將 個 門戌 都 拉開 。
入咗 去 喇 ，武松 就 向住 有 燈光 嗰 處 行 咯 喎 ，原來 呢次 係 廚房 嚟 。
只見 兩個 丫鬟 喺 個 水煲 旁邊 就 埋怨 喇 ：
哼 ，都 服侍 咗 成日 嘞 仲 唔 肯 去 瞓 喎 ，一味 要 飲茶 。
嗰 兩個 客人 都 唔識 醜 嘅 ，飲到 咁 醉 喇 仲 唔肯 落 樓 休息 。
傾啊傾啊傾到冇完冇了真係衰嘅啫 。
嗰 兩個 妹仔 ， 正 喺 度 咿 咿 吟 吟 喺 度 埋怨 啦 。
武松 憑 好把 朴刀 ，掹出 嗰 把 帶血 嘅 腰刀 嚟 ，將 道門 咦噉 一 推開 一步 檻 入去 。
一手 就 將 個 妹仔 嘅 丫角髻 揪住 ，一刀 就 殺咗 佢 。
另外嗰個 想 行 啦 ，點知 嗰 兩隻 腳 呀 好似 釘住 噉 ；
想出聲嗌 ，把口 就好似 啞咗 噉 喎 嘿真係 嚇到 傻晒 。
咪 講話 兩個 丫鬟 啊 ， 就 係 我 而家 呢 個 講古 嘅 見 咗 呀 ， 我 都 嚇到條 脷 唔 會 逳 啊 。
武松 手起 一刀 落去 亦 殺埋 佢 。
噉 將 呢 兩個 屍首 拉 到 喺 灶頭 ，吹熄咗 廚房 眼燈 ，趁住 窗外 嘅 月光 啊 一步步 閃入去 裏便 。
武松 原來 喺 衙門 出入 過 㗎 ，已經 認得 啲 路 㗎喇 。
佢 一直 行到 鴛鴦樓 嘅 樓梯 旁邊 ，輕手輕腳 就 摸上 樓 咯噃 。
呢個 時候 佢哋 嗰啲 親隨 嘅 僕人 呢 ，都 服侍 到 厭煩 晒 喇 ，匿埋 晒 遠遠 賭錢 嘅 賭錢 飲酒 嘅 飲酒 ，唔見 晒 人 。
只係 聽見 嗰個 張都監 、張團練 同埋 蔣門神 三個 嘢 喺 上面 傾偈 。
武松 就 伏 喺 樓梯口 一聽 ，只 聽見 蔣 門神 猛 咁 稱讚 話 ：
多得 相公 同 小人 報 咗 冤仇 ， 小人 呀 ， 一定 重重 噉 報答 恩相 啊 。
張都監 話 喇 ：唔係 睇 在 我 兄弟 張團 練 嘅 面 上 ，邊個 肯 做 噉 嘅 事 吖 ？
你雖然 使咗 多少 錢 ，不過 噉就 搞掂晒 嗰單 嘢 啦嘛 ，係嘛 ？
呢個 時候 都 怕 喺 嗰處 逳手 咯 ，嗰個 傢伙 實冇命 㗎 喇 。
我 吩咐 落 ，叫佢哋 喺 飛雲浦 攞 佢 條命 嘅 。
等 嗰 四個 人 聽朝早 返嚟 就 知道 喇 。
張團練 又 話 ：四個人 對付 佢 一個 有 乜嘢 做唔嚟 㗎 ，仲 多 幾條命 都 冇 啦 。
蔣門神 又 話 ：
小人 亦都 吩咐過 徒弟 喇 ，就係 叫 佢哋 喺 嗰處 逳手 ，做 瓜 佢 就 返嚟 回報 ，哈哈哈哈哈 。
武松 聽咗 ，嘿呀 真係 無名火 起 三千丈 啊 ，右手 揸 刀 ，左手 扠開 五 隻 手指 伸 喺 前 便 ，嘣嘣嘣嘣 衝 上 樓 。
只見 樓上 燈光 火猛 ，仲有 啲 月光 射入嚟 添 ，樓上 便 非常之 明朗 。
面前啲 金銀酒器 都 未曾 收 。
蔣門神 就 坐 喺 張 交椅 上 便 ，一 見到 係 武松 嚟 ，嘩 嚇咗 一 驚 。
呢個 時候 呀 真係 心肝五臟 一下 都 好似 搦到 去 九霄雲上 噉 。
說時遲就那時快 ，蔣門神 就 急急 想 掙扎 。
武松 飛快 噉 一刀 ，兜口兜面 就 劈落去 ，連埋 嗰 張 交椅 一齊 斬倒咗 。
武松 擰 轉身 回過 刀 。
嗰個 張 都 監 啱啱 先至 逳得 雙腳 唧 ，畀 武松 一刀 就 喺 耳仔 腳 連 條 頸 斬 到 正 ，啪噉 就 跌 喺 地板 上面 嚟 。
嗰 兩個 嘢 仲 喺度 掙扎 噃 。
嗰 個 張團練 到底 係 個 武官 出身 吖 ， 雖然 飲醉 咗 酒 ， 仲有 啲 力 啊 。
見到 斬低咗 兩個 佢 都 估話 走唔甩 喇 ，就 扚起 一把 交椅 捹過嚟 咯噃 。
武松 手急眼快 一 接接 實 ， 趁勢 一推 。
嘿嘿 ，咪 講話 張 團 練 飲 醉酒 啦 ，就算 佢 清醒 嗰陣 啊 ，都 頂唔住 武松 神力 㗎 嘛 ，所以 就 景轟 一聲 打 仰後 跌倒 咗 。
武松 一趕 入去 一刀 就 斬咗 佢 個 頭 。
蔣門神 有力啊 ，掙扎 返 起身 。
武松 左腳 飛 起 ， 踢 到 佢 成 個 打 嗰 關 斗 ， 跟 住 武松 撲 過去 割 咗 佢 個頭 。
轉過身 ，又 割埋 張 都監 個 頭 。
好 ，冇人 喇 。
枱上面 有 酒 有 肉 喎 ，啱晒 ，武松 就 攞起 酒杯 ，一飲而盡 ，連氣 飲咗 三四杯 。
又喺 死尸 身上 割咗 一片 衣襟 落嚟 ，蘸住 啲 血 ，喺 白粉牆 上面 ，寫咗 八個 大字 ：殺人者 ，打虎 武松 也 。
嘿 ，英雄 啊 ！明人 不 做 暗事 吖 嘛 。
然後 ，將 枱 上 嗰啲 金銀酒器 啊 踩扁 咗 佢 ，塞 咗 幾 件 喺 個 身處 。
佢 正 話 想 落 樓 ，忽然間 聽見 樓下 夫人 把 聲 喺度 嗌 喎 ：
樓上 官人 都 醉 喇 ，你哋 兩個 快啲 上去 扶 下 佢哋 啦 。
話猶未了 ，已經 有 兩個 人 上樓 嘞 。
武松 一 閃閃 喺 樓梯 旁邊 ， 佢 一 睇 ， 原來 係 兩個 親隨 僕人 ， 就 係 前 嗰 排 捉 武松 嗰 兩個 。
武松 喺 黑頂 嚟 ，畀 佢哋 過咗 去 ，一攔 就 攔住 佢哋 嘅 退路 。
嗰 兩個 人 上咗 樓 入咗 廳 ，見到 三 個 屍首 癱 喺 血泊 裏 便 哎呀 嚇到 唔會 出聲 ，成個 身 都 冷晒 。
急急 想 轉身 走 啦 ，點知 武松 跟住 喺 後 便 嚟 ，手 起 刀 落 就 斬低 一個 。
嗰個 跪喺 處 求饒 咯 喎 ，武松 話 我 攞 你 條命 ！揪住 斬埋 頭 。
嘿 真係 殺得 血濺 畫樓 ，屍 橫 燈影 啊 。
武松 話 喇 ：一 不做 ，二 不休 ！殺 一百個 我 亦 係 死 一次 嘅 啫 ！揸住 把 刀 就 落 樓 嘞 。
夫人 就問 啦 ： 哎呀 ， 樓上 點解 乒乒乓乓 做 乜嘢 啊 ？
武松 衝到 入 房間 ，個 夫人 見到 條 大漢 入嚟 佢 仲 喺度 問 喎 你 邊個 啊 噉 。
武松 把 刀 已經 飛起 嘞 ，向住 面門 劈過去 ，當堂 𢴈 喺 地下 嚟 呀呀聲 噉 嗌 。
武松 上前 一撳撳住佢 ，想去 割 佢個頭 啦 ，哈 ，乜 切 唔入去 喎 。
武松 奇怪 喇 ，喺 月光 下 便 睇 下 嗰 把 刀 ，哦 原來 都 斬到 卷晒 口 咯 。
武松 就 話 ：唔怪得 割唔甩 個 頭 啦 。
就即刻 去 後門 外 便 攞 朴刀 ，掉咗 嗰把 卷口刀 ，再次 返入 去 樓下 咯 喎 。
只見 前次 唱曲 嗰個 歌女 玉蘭 揸住 眼燈 ，帶住 兩個 細 嘅 行嚟 。
佢 用 眼燈 一 照 只見 夫人 畀 人 殺死 咗 喺 地下 嚟 ，啱啱 先至 嗌 咗 一 聲 話 哎呀 陰公 喇 噉 。
武松 揸住 把 朴刀 ，對住 玉蘭 嘅 心口 一刀 捅過 就 捅死 佢 。
嗰 兩個 細 嘅 呢 ，亦都 畀 武松 捅 死 ，一刀 一個 就 殺死咗 。
佢 行出 中堂 閂住 道 前門 ，又 返入嚟 ，就 搵到 幾個 婦女 ，亦都 將 佢哋 殺死 埋 。
武松話 ：哼 ，我而家 先至 心滿意足 啊 ，走 ！
揸住 朴刀 出到 角門 外便 ，喺 馬棚 嗰度 攞返 個 錢袋 ；
將 先頭 踏扁咗 嘅 金銀酒器 啊 ，入晒 喺 裏 便 嚟 ，綁緊 喺 條 腰處 ，放開 腳步 ，倒提 把 朴刀 就 走 。
行到 城邊 ，佢 諗 ：
如果 等 開門 就 梗畀 人 捉 㗎 噃 ，不如 漏夜 擒牆 走 喇 。
佢 就 喺 城邊 行 上 城牆 上便 啦 。
呢個 孟州城 啊 係 一個 小 地頭 ，嗰座 土城 就 唔係 點 高 嘅 。
佢 喺 牆 上 便 望 一 望 下面 ，然後 將 把 朴刀 輕輕 扤 一扤 ；
刀尖 在 上 刀柄 向下 ， 啪 噉 一 跳 ， 一跳 到 落地 將 刀柄 一 戙， 就 企 定 喺 壕塹 旁邊 嚟 喇 。
喺 月光 之下 一 睇 ，嗰啲 水 呢 就 唔係 點 深 ，尺 零 兩 尺 噉 啦 。
呢個 時候 正係 十月 天時 ，各處 啲 水 都 乾 㗎 喇 。
武松 就 喺 壕塹 旁邊 除咗 鞋襪 ，解低 腳繃護膝 ，擸起 衣服 ，就 喺 城河 嗰處 浭水浭過去 對岸 喇 。
過咗去 ，佢 一諗 諗起 施恩 送畀 佢 個 包袱 裏頭 ，有 雙 八搭 麻鞋 㗎 ，啱晒 攞出嚟 着 喺 腳 上 便 咯 喎 。
呢個 時候 ，聽見 城 裏 便 打更 已經 係 四更 三點 。
武松話 ：呢一啖氣 ，今日 我 先至 出得 舒服 。
呢勻 可以 走 喇 ！
提起 把 朴刀 ，向住 東 便 小路 就 行 。
行到 五更 ，個 天色 仲係 朦朦朧朧 仲未曾 光 。
武松 啊 成晚 辛苦 ， 好 攰 啊 。
捱打嘅棍傷 又 痛起上嚟 ，頂唔順 喇 。
誒 ，望見 前面 有 一座 樹林 ，有間 小小個 古廟 噃 。
武松 就 趯 入去 裏頭 ，將 把 朴刀 憑 好 ，除 低 個 包袱 愛 嚟 做 枕頭 ，碌 低 就 瞓 。
啱啱 合眼唧 ，只見 廟外 便 伸咗 兩把 撓鉤 入嚟 ，將 武松 一下 就 搭住 。
有 兩個 人 就 衝 入嚟 ，將 武松 撳 實用 條 繩 將 佢 綁住 。
跟手 ，又 有 兩個 人 入嚟 嘞 。
佢哋 話 喇 ：咦喂 ，呢個 嘢 好 肥 個 喎 送畀 大哥 啦 。
武松 呢個 時候 邊度 掙扎 得甩 吖 ，就 畀 呢 四個 人 搶咗 佢 個 包袱 同 朴刀 ，就 好似 牽 羊 噉 ，腳 不 踮地 就 拉 佢 入 村 。
呢 四個 人 喺 路 上面 自言自語 噉 話 喇 ：
嘩嗨 你 睇 呢個 嘢 喂 ，佢 成身 血跡 都 唔知 邊處 嚟 嘅 ，唔通 做咗 賊 得手 ？
武松 一味 唔出聲 ，由得 佢哋 噏嘞 。
行咗 幾里 路 嚟到 一間 草屋 ，就 將 武松 推咗 入去 。
喺 側跟 有 道門仔 裏 便 呢 ，仲 點 住 眼燈 ，嗰 四個 人 將 武松 剝 咗 衫 ，綁 喺 條 柱 上 便 。
武松 一 睇 ，见到 喺 灶头 個 樑 上面 掛咗 兩 隻 人髀 喎 。
武松 就 諗嘞 ：唉 ，真係 撞正 喺 橫死神 隻 手裏 便 啊 ，死得 不明不白 。
早知噉樣 我 不如 去 孟州府 裏 便 自首 ，就算 捱 佢 一刀一剮 都 留返 個 清名 於 世 吖 。
正是 殺盡 奸邪 恨 始 平 啊 ，英雄 逃難 不 逃 名 。千秋 意氣 生 無愧 ，七尺 身軀 死 不 輕 。
噉究竟 武松 嘅 性命 如何 呢 ？就 下回 分解 喇 。
