而家 唔 講 宋江 喺 閻婆惜 屋企 飲緊 酒 ，先 講下 鄆城縣 ，有 一 個 賣 鹹酸 嘅 唐二哥 ，佢 個 名 叫做 唐牛兒 。
冇事呢 ，佢 就 喺 街上 幫 閒 掹 下 衫尾 ，時時 都 得到 宋江 周 濟 佢 嘅 。
你話 如果 有 啲 咩嘢 線索 去 講畀 宋江 聽 ，亦 會 撈到 幾貫 錢 使下 。
只要 宋江 用到 佢 嘅 時候 啊 ，佢 就 死命 向前 嘅 。
呢一日 嘅 晚上 ，佢 同 人哋 賭錢 就 輸 到 光 捋捋 ，噉 佢 又 想 去 搵 宋江 咯 喎 。
點知 去到 縣衙門 ，搵 來 搵去 搵唔到 ，去到 住宿 個 地方 呢 亦 唔見 人 。
啲 街坊 見 佢 咁 頻撲 咪 都 問 佢 咯 ：喂 ，唐二哥 啊 ，你 搵 邊個 啊 ？乜 緊張 得 咁 交關 啊 ？
哎呀 ，乾晒塘啊 ，趕住 要撲水啊 ，我 想 搵 我契爺 到處 都 搵佢 唔到 。
哼 你 契爺 係 邊個 啊 ？
唔係 就係 縣衙門 裏頭 嘅 宋押司 咯 。
誒 ，我 啱先 見 佢 同埋 閻婆 一齊 行過 喎 。
唐牛兒 就 話 喇 ：啊 冇 錯 喇 ！
閻婆惜 呢個 賤人 豈有此理 ，同 張三 打得 火熱 ，就係 瞞住 宋押司 一個 人 嘅 啫 。
佢 又 怕 係 聽到 啲 風聲 ，好 耐 冇 去 㗎 喇 。
今晚 梗係 畀 嗰個 老虔婆 假情假意 纏咗 佢 去 定 啦 。
啱 晒 ， 我 正 係 輸到 眼 都 凸 晒 喇 ， 一個 錢 都 冇 。
唔理 咁多 喇 ，等我 走去 佢 嗰度 搵返 幾貫 錢 使下 先 ，順便 去 飲 返 兩 碗 酒 至得 ，誒 。
於是 唐牛兒 呢 ，就 一直 趯 去 閻婆 屋企 嘞 。
佢 去到 ，見到 裏 便 燈光 火猛 ，之 又 冇 閂到 門 喎 。
噉佢就行咗入去 ，去到樓梯口 ，就聽見 閻婆 喺樓上 騎騎聲笑 。
唐牛兒 就 捻手捻脚 行上樓 ，伏 喺 板杖 嚹處 裝下 啦 ，嘻嘻 ，見到 宋江 同 婆惜 兩個 人 都 耷低頭 ，坐響處 唔出聲 。
嗰個 伯爺 婆 呢 ，坐 喺 張 枱 旁邊 ，口水 花 噴噴噉 喺度 亂噏 一通 。
唐牛兒 㗾聲 行入去 ，對住 閻婆 、宋江 同 婆惜 ，行咗 三個 禮 就 企 喺 旁邊 。
宋江 個 心 諗 ：嘿呀 ，佢 嚟得 真係 啱喇 。
就 將 個 嘴 向住 下 便 努一努 。
唐牛兒 就 認真 係 撈家仔 又 好 醒目 嘅 ，一睇就明嘞 ，佢 就 問 宋江 話 ：
哎啊 ，小人 真係 度度 都 搵過 晒 你 喇 唔見 你 咋 。
原來 匿埋 喺 呢度 飲酒 咁快活 喎 ，你 又 真係 開心 嘞 。
宋江話 ：係唔係 縣 裏頭 有 咩 緊要 嘅 事 啊 ？
嘿 呀 押司 啊 ， 乜 你 唔 記得 嘞 咩 ？ 就 係 今朝 早 嗰 件 公事 啊 ， 係 ， 今朝 嗰 件 呢 。
知縣 相公 呀 ， 而 家 喺 大堂 發緊 火 啊 。
連 氣派 咗 四五次 人 ， 去 你 住 嗰 處 搵 你 啊 ， 搵 極都 見 唔 到 ， 激到 相公 呀 ，𨅝𨅝 跳 ， 押司 你 快 啲 去 啦 。
乜咁緊要呀 ？噉就去啦 。
宋江 講完 就 企起身 要 落樓 嘞 。
閻婆 一手 攔住 佢 話 ：押司 你 唔好 做戲 喇 。
呢隻噉嘅唐牛兒吖 ，喺度 整蠱整怪 ，你嘅 賊仔 都 想 嚟 呃 我 老娘 ？
正一 係 魯班 門前 耍 斧頭 喇 你 。
呢個 時候 ，知縣 相公 呀 早就 返咗 去 屋企 ，同埋 夫人 飲酒 取樂 啦 。
有咩嘢 公事 急到 要 發火 咁 巴閉 得㗎 ？
你 呢幾籠 嘢 呀 ，去 呃鬼 就 得 ，想 呃 我 老娘 就 咪 指意 喇 你 。
唐牛兒 就 話 喇 ：真係 知縣 相公 有 啲 公事 等住 要 佢 返去 辦 㗎 。
我 呢份 人 唔 會 車 大炮 㗎 嘛 。
放 你 阿媽 嘅 狗屁 ，老娘 呢一雙 呀 係 金睛火眼 嚟 。
先頭 睇住 押司 對住 你 努 下個 嘴 ，叫 你 整蠱 整怪 㗎喇 。
你唔勸下押司嚟我屋企不特止 ，仲掉轉頭要掹佢扯添呀 ，我啋瘟啋扽你啊 ！
開講 都有話 ：殺人 可恕 ，情理 難容 噃 。
閻婆 就 越鬧㷫 ，一下 跳起身 ，伸開 隻手 叉住 唐牛兒 條 頸 ，㧬到 佢 舂下舂下 ，由 間房 一直 㧬到 佢 落 樓 。
唐牛兒 就 話 你 你 你 你 ， 你 叉住 我條 頸 ， 你 冇 㧬 我 做 乜嘢 你 ！
你唔知呀 ，打爛 人 隻 飯碗 ，就 好似 殺人 嘅 父母 妻子 一樣 㗎噃 ，你 仲 大聲 嘈 吖嗱 ，你 嘈 我 就 摑死 你 ！
唐牛兒 衝埋去 話 喇 你 摑 吖 ，你 摑 吖 嗱 ！
閻婆 一啲 都 唔 手軟 ，佢 趁住 幾分 酒意 ，撒開 五隻 手指 ，對住 唐牛兒 塊 面 ，啪 ！啪噉 兩 巴掌 。
跟住 就 㧬咗 佢 出門口 ，咦 咚咣 噉 就 閂埋 道 大門 ，落咗 門戌 。
唐牛兒 捱咗 呢 兩 巴 ，哎呀 ，抵力咯 ，嗰 塊 面 呀 火辣辣 咁 㷫 。
佢 企 喺 門口 大聲 咁 嗌話 ：
你 個 死老虔婆 嘩 ，你 唔好 懶叻 啊吓 。
我唔係 睇在 宋押司 嘅 面子 呀 ，我 就 將 你 間 臭屋 呀 抌到 融融爛爛 㗎 喇 。
你 因住嚟啦 ，我 唔 做低 你 呢 我 就 唔 姓 唐 ！
佢 一便 拍住 心口 ，一便 破口大罵 噉 就 扯咗 咯 。
閻婆 再 返 上樓 ，佢 同 宋江 話 ：
押司 ，你 理 嗰個 乞兒仔 做 乜嘢 吖 ！
嗰個嘢呀 ，一味 識得 呃 酒 飲 ，到處 講是講非 。
呢啲 呀 正一 係 不得 好死 嘅 衰神 啊 ，居然 仲 上到 門 嚟 欺負 人 添 喎 ！
宋江 係 個 老實人 ，畀 閻婆 一番 說話 呢 督 穿 咗 佢 個 心事 ，弊 喇 ，噉 又 想 走 都 唔 走得 喇 呢 勻 。
閻婆 又 話 喇 ：押司 ，你 唔好 嬲 喇吓 ，我 先頭 呀 真係 忍唔住 喇 。
阿女啊 ，你 同 押司 飲埋 呢杯 啦 。
我諗 你哋 兩個 都 好耐 冇見 咯 ，不如 早啲 瞓罷 啦 吓 。
個 伯爺 婆 又 勸 宋江 飲咗 兩杯 ，就 執好啲 碗碟 落 樓 ，自己 就 趯咗 去 廚房 咯 。
宋江 就 諗嘞 ：
話佢 個 女 同 張三 有 路 ，我 個 心 就 半信半疑 嘅 ，又 冇 親眼 見到 。
你 話 而家 要 扯 喎 ，聽下 仲 話 我 個人 戇居 啦 。
況且又咁夜咯 ，我不如就喺度瞓 ，又睇下呢個女人點吖 ，睇下今晚同我個情份點至得 。
過咗一陣 ，嗰個 閻婆 又 上樓 咯喎 ，佢 話 ：
好夜喇 ，我 嚟 叫 押司 你哋 兩個 早啲 唞 啊 。
婆惜 就 話 啦 ：又 唔 關 你 事 ，你自己 去 瞓 啦 ！
閻婆 𠽤𠽤 聲噉 笑住 落樓 ，佢 話 ：
押司 早唞喇 ，今晚 歡歡喜喜 ，聽朝 瞓晏啲 起身 都唔遲㗎 。
閻婆 落咗 樓 ，執拾 好 廚房 啲 嘢 洗咗 手腳 ，吹熄 眼燈 就 瞓覺 。
噉 宋江 就 坐 喺 張 馬杌 處 ，佢 仲 指意 嗰個 女人 呀 仲 好似 從前 噉 ，行過嚟 同 佢 煙韌下 ，講返 幾句 好話 ，哎 噉 就 求求 其其 啦 ，當 冇事 將就下 就 算喇 。
宋江 就 諗 錯格 咯 呢次 。
婆 惜 佢 係 點 諗 嘅 呢 ？
我 只係 等住 張三 嚟 嘅 啫 ，哼 ，今晚 畀 扠𢰸檔 添 ，真係 眼中釘 啊 。
嗰 個 嘢 吖 ， 仲指意 我 好似 從前 噉 ， 咁 下氣 呀 ， 老娘 而家 真 係 唔 騷 你 啊 。
只有 話 撐船 就 岸 嘅 啫 ，幾時 見過 撐岸 就 船 㗎 ？
你唔嚟睬我呀 ，老娘 啱晒 。
當晚 ，兩個 就 喺 燈 下面對面 坐 喺 處 ，都 唔 出聲 ，各 懷 心事 。
宋江 坐 喺 張 馬杌 處 望 下 婆惜 ，歎 咗 口氣 ，哈 又 歎口氣 。
約莫 過咗 二更 ，嗰個 女人 又 冇 除 衣服 ，就 噉 就 上床 ，挨住 個 枕頭 擰轉身 ，將 塊 面 對住 裏便 埲墻 ，自己 有 自己 瞓嘞 喎 。
宋江 見到 乜噉㗎 ，佢 諗 ：
吖 豈有此理 呢 個 賤人 吖 ， 吖 睬 都 唔 睬 我 噉 就 一個 人 瞓 㗎 喇 ， 哈 。
我 今日 畀 嗰個 伯爺 婆 吟 咗 成晚 ，又 畀 佢 勸 咗 幾 杯 酒 ，哎呀 頂唔住 ，又 咁 夜 咯 ，仲 係 瞓 罷 啦 。
於是 佢 就 除咗 頭巾 ，放 喺 張 枱 處 ，除咗 件 面衫 ，搭 喺 衣架 上 便 ，又 解低 條 腰帶 ；
腰帶 上面 係 掛住 一把 匕首 同 一個 招文袋 ，又 將嚟 掛 喺 床 拼處 ；
然後 除咗 鞋襪 上床 ，同 婆 惜 啊 尖頭 對 腳 瞓 低 嘞 。
過咗 半個 更 ，宋江 就 聽見 婆惜 喺度 冷笑 喎 。
宋江 嘅 心 啊 梗係 翳定 啦 仲 點 瞓得着 吖 。
自古 都有 話 ：歡娛 就 嫌 夜短 啊 ，寂寞 恨 更 長 吖 嘛 。
到咗 三更 ，已經 係 半夜 喇 ，呢個 時候 ，宋江 啲 酒 亦 已經 醒 。
夾硬捱到五更 ，宋江 就 起身 ，喺 面盆 就噉 用 冷水 洗咗 面 ，着返 面衫 ，戴好 頭巾 ，鬧咗 一聲 話 ：哼 ！你 呢個 賊賤人 ，真係 無禮 ！
哈 ，婆 惜 原來 又 係 冇 瞓着 嘅 ，聽到 宋江 鬧 佢 就 擰轉身 嚟 應 咗 佢 一句話 ：
你 都 唔知 醜 嘅 。
頂心頂肺 ，宋江 就 忍住 啖氣 落樓 。
閻婆 聽見 腳步 響 ，就 喺 鋪床處 話 喇 ：
押司 瞓 下 添 啦 ，等 天光 至 去 啦 ，無情 白事 ，五更 咁 早 就 起身 做 乜嘢 喎 。
宋江 亦 唔 應 佢 ，只係 顧住 開門 。
閻婆 又 話 喇 ：押司 你 出咗 去 ，同 我 閂 返 道門 至好 噃吓 。
宋江 出咗 門口 跟手 就 同佢 㧬返 埋 道門 。
佢 忍住 成肚氣 ，就 一直 行返去 自己 住 嘅 地方 。
佢 經過 縣衙 門前 便 嘅 時候 ， 見到 有 一眼 燈光 光猛 猛 噉 掛 喺 度 。
望下過去 ，呵呵 ，原來 係 賣 滋補湯藥 嘅 王公 ，嚟 呢處 趕 早市 啊 。
個 伯父 見 係 宋江 嚟 就 話 喇 ：咦 ，誒 押司 乜 今朝 咁早 出嚟 啊 ？
宋江 話 喇 ：尋晚 飲 醉咗 酒 ，聽 錯咗 打更 。
押司 尋晚 飲醉酒 咩 ？嗱 ，飲返 碗 醒酒 二陳湯 呢 。
好啊 ，好啊 。
宋江 噉 就 喺 張 凳 處 坐落 ，個 伯父 呢 𢳂咗 一 碗 融融 嘅 二陳 湯 畀 宋江 。
宋江 飲完 就 突然間 諗起 嘞 ，自己 時時 飲 佢 嘅 湯水 ，佢 都 未曾 問 自己 要過 錢 嘅 。
以前 係 曾經 應承過 送 副 棺材 畀佢 ，一直 都 未曾 畀 。
而家 啱喇 ，尋日 晁蓋 送 啲 金 嚟 ，受 咗 佢 一 條 放 喺 招文 袋 裏 便 嚟 ，不如 送 咗 畀 佢 做 棺材本 ，等 佢 歡喜 下 都 好 吖噉 。
於是 宋江 就 話 喇 ：王公 呀 ，早 嗰排 我 應承 送 啲 錢 畀 你 做 棺材本 ，一直 都 未曾 畀過 你 。
而家 我 呢 度 有條 金條 愛 嚟 送 畀 你 ， 噉 你 就 去 陳 三 郎 嗰 處 買 返 副 棺材 ， 擠 定 喺 屋企 嚟 啦 。
到 你 百年 歸壽 咯 ，我 到時 再 畀 啲 錢 你 送終 啦 。
哈哈哈哈哈哈 ，哎呀 恩主 啊 ，你 時時 都 咁 關照 我 呢個 伯爺公 ，又 多得 你 送 終身 壽具 畀 我 ；
唉 ，我 呢世 人 呀 ，唔能夠 報答 你 啊 ，等 來世 做 驢 做 馬 ，再 嚟 報答 押司 你 係 啦 。
唔好噉講 。
宋江 掀起 衫襟 就 想 去 攞 個 招文袋 出嚟 ，咦 ？弊喇 ，唔喺度 ！
佢 諗 ：呢趟 苦喇 ，尋晚 賴低咗 喺 個 賤人 張 床 拼 上面 添 。
今朝早 一時 嬲起 上嚟 ，顧住 快啲 扯 就 唔記得 攞返嚟 掛 喺 條 腰 處 。
唉 ，嗰 幾 兩 黃金 唔 算得 乜嘢 啊 ，弊在 我 係 用 晁蓋 寄嚟 嗰封 信 包住 啲 金 㗎 嘛 。
我 本來 想 喺 酒樓 嗰陣時 當堂 就 燒咗 封 信 㗎 喇 。
不過 當 住 劉唐 面 一 燒 ，又 怕 佢 返去 講起 嘅 時候 ，以為 我 唔 將 佢哋 放 喺 心 嚟 ，噉 就 冇 燒到 。
當時 想 話 返到 屋企 先至 燒 啦 ，吖 點知 又 畀 閻婆 纏 咗 我 去 。
尋晚黑 ，本來 就 想 喺 眼燈 處 燒咗 佢 嘅 ，之又 怕 畀 嗰個 賤人 見到 ，故此 又 冇 燒到 。
今朝早 ，走得 匆匆忙忙 ，估唔到 噉 就 賴低咗 。
哎呀 係噃 ，我 平時 見到 婆惜 都 睇下 啲 曲本 ，識得 幾個 字 嘅 ，如果 畀 佢 攞到 就 惡搞 咯 。
宋江 諗咗 呢度 ，坐唔落喇 ，佢 企起身 話 ：
阿公 ，真係 唔好意思 喇 ，唔係 我 講 大話 ，啲 金條 呢 ，係 放 喺 個 招文袋 處 。
點知 出嚟 出得 匆匆忙忙 ，賴低咗 喺 屋企 添 ，我 而家 返去 攞嚟 畀 你 吓 。
唔好 去攞 咯 押司 ，哈哈哈 ，聽日 慢慢 至 畀 我 唔遲 吖 。
阿公 ，你 唔知嘞 ，我 仲有 啲 嘢 擠 喺 處 㗎 ，我 要 去 攞 至得 。
講完 宋江 就 慌慌忙忙 趯 返去 閻婆 屋企 。
而家 返轉頭 講下 嗰個 閻婆惜 ，佢 聽住 宋江 出咗 門口 嘞 ，就 爬起身 自言自語 噉 話 ：
哼嗰個嘢吖 ，運桔 咗 老娘 成晚 搞到 我 瞓唔着 。
嗰個嘢 真係 唔知 衰 啊 ，想 老娘 同 你 低聲下氣 呀 ，發夢 啦 你 ！
老娘 呀 就 係 鍾 意張 三 嘅 啫 ， 鬼睬 你 啊 ， 你 唔 上門 就 最 啱 。
佢 個 口 一便 噏 ，一便 就 鋪開 張 被 ，除咗 衫裙 ，想 瞓返 一 覺 。
床前盞燈 就好光 ，照見 床拼 上面 搭住 宋江 嗰條 紫羅腰帶 。
婆 惜 一眼 擸到 就 笑住 話 ：黑三 嗰個 嘢 咁 論盡 ，賴 低 咗 條 腰帶 喺 度 添 啊 ，好 ，等 老娘 攞起 佢 ，愛嚟 送 畀 張 三 攬 至 得 。
噉佢 順手 就 攞起 條 腰帶 咯 喎 ，佢 用 手 一搦 ，就 連 招文袋 同 把 匕首 都 搦起 嚟 。
嗯 ？個 袋 有 啲 墜手 㗎 噃 ，就 攞到 張 枱 處 一扽 ，好喇 ，扽 咗 啲 金 同 封 信 出嚟 。
婆 惜 搦 起 手 嚟 ，喺 燈 下 照住 一 睇 ，嘩嗨 ，黃棖棖 一條 金條 。
婆 惜 歡喜 嘞 ，佢 笑住 話 ：哎呀 ，真係 天 跌落嚟 畀 我 同 張三 買 嘢食 嘅 。
呢幾日呀 ，我 見到 張三 ，瘦咗 咁多 ，正係 想 買 啲 嘢 返嚟 補下 佢 㗎喇 。
佢 放低 條 金條 ，又 攞起 封 信 ，喺 燈 下 打開 嚟 睇 。
哦 ，原來 寫住 晁蓋 佢哋 好多 嘢 嘅 。
婆 惜 睇完 封信 就 話 喇 ：好啊 ，我 即 估 話 只有 水桶 跌落 井 嘅 啫 ，原來 亦 會 有 個 井 跌落 水桶 嘅 。
我 正係 要 同 張三 兩個 做 夫妻 ，就係 多 你 個 宋江 喺度 掗掗拃拃 。
今日 呀 你 都 撞正 喺 我 隻 手 嚟 啊 呢 。
哼 ！原來 你 同 梁山泊 啲 大賊 通 同 來往 ，佢哋 送 一百 兩 金 畀 你 。
好 ，你 死喇 你 ，等 老娘 慢慢 嚟 整頓 下 你 至 得 。
於是 佢 又 將 封信 照 原樣 包好 條 金條 ，放返 落 個 招文袋 裏 便 。
哼 ！我 唔怕 你 叫 神仙 嚟 攝咗 佢 去 。
婆惜 正 喺 樓上 自言自語 ， 只 聽見 樓下 咿 噉 開門 聲 。
伯爺婆 就 問嘞 ：邊個 啊 ？
宋江 話 我 啊噉 。
伯爺婆 又 話 喇 ：我 都 話 仲 早 咯 ，押司 你 又 唔 信 ，係 要 去 ，早過 頭 返嚟 係 呢 。
快啲 去 同 阿女 瞓 下 添 ，天光 至 扯 啦 。
宋江 亦 唔 答 佢 ，一直 就 走 上 樓 嘞 。
嗰個 婆 惜 一 聽見 係 宋江 返嚟 唄 ，喇喇聲 將 腰帶 、匕首 、招文袋 捲埋 一齊 ，收埋 喺 被竇 裏 便 。
自己 就 即刻 上床 𢫏冚 張 被 ，緊緊 噉 貼住 床裏 便 噘噘聲 詐瞓 嘞 喎 。
宋江 撞到 入 房 ，直情 就 行埋 去 床 拼處 想 攞 腰帶 啦 ，弊 ，唔見 咗 喇 。
宋江 嘅 心慌 ，冇辦法 啦 ，只有 忍住 尋晚 嗰啖氣 用 隻 手 去 㧬 下 閻婆 惜話 ：
喂 ，喂喂喂 ，唔該 你 喇 ，睇在 我 往日 嘅 情份 ，畀 返 個 招文袋 我 呢 。
婆惜 就 話 ：老娘 正 喺度 瞓緊 啊 ，邊個 喺度 搞 我 啫 ！
你 明知 係 我 㗎啦 ，仲 詐 咩 嘢 諦 呢 ？
婆 惜霎聲 擰轉身 嚟 話 ：黑三 ，你 講 咩 嘩 ？
還返 個 招文袋 畀 我 啦 。
你 喺 邊度 交畀 我 手 㗎 ？吓 ？吖 走嚟 問 我 攞 喎 。
我 賴低 喺 床 拼上 便 ，呢處 又 冇 人 嚟過 ，係 你 搦起 咗 個 啫 。
啋 ！撞鬼 你 咩 ！
尋晚 係 我 唔啱 咯 ，聽日 我 同 你 賠禮 係 啦 ，你 還返 畀 我 呢 ，唔好 玩 喇 。
哈邊個 同 你 玩啫 ，我 係 冇 搦過 啊 。
你 先頭 都 冇 除 衫 瞓 嘅 ，而家 你 係 冚住 張 被 ，梗係 起身 嚟 攞 被 冚 嘅 時候 搦 嘅 。
好 喇 ， 閻婆惜 發惡 喇 ， 只見 佢 豎起 堂 眼眉 ， 碌 大 雙眼 話 ： 搦 就 係 老娘 搦 咗 喇 ， 就 係 唔 還返 畀 你 。
你 去 嗌 官府 嘅 人 嚟 啦 ，嚟 拉 我 當 賊 辦 啦 。
我 冇 冤戾 你 做 賊 噃 。
噉 你 知 老娘 唔係 賊 啊 呢 ？
宋江 聽 佢 噉 講 ，個 心 就 越發 慌 嘞 。
佢 話 ：我 待 你 兩 母女 都 冇 咩 對唔住 㗎 ，唔該 你 還返 畀 我 啦 ，我 要 去 辦公 㗎 喇 。
哼 ，平日 就 怪 我 同 張三 有 窿路 。
係啊 ，佢 係 有啲 唔及 你 啊 ，不過 亦 唔係 要 捱 一刀 嘅 罪犯 嚟 噃 。
點都叻過 你 同 啲 攔路打劫 嘅 大賊 打 同 通 啊 。
哎呀 好 姐姐 啊 ，唔好 嗌 啊 唔好 嗌 ，畀 隔籬 聽到 ，唔係 講 玩 㗎 。
你 怕 畀 人 聽到 ， 你 就 唔 好 做 啦 。
呢封信呢 ，老娘 要 收到 佢 密密 。
如果 你 想 我 放過 你 ， 你 應承 我 三件 事 啦 。
哦 ，咪 講話 三件事 吖 ，就算 係 三十件 我 都 應承 你 。
至怕 你 唔肯 應承 噃 。
該做就做 ，邊 三件事 呢 ？
嗱 ，你 聽住 喇 ，第一件 ，從 今日 起 ，你 將 我 押咗 畀 你 嗰 張 文書 還返 畀 我 ；
然後 另外 寫過 一張 文書 畀 我 ，任 從 我 改嫁 畀 張三 ，以後 永不 爭執 。
得 ，呢件 我 應承 你 。
第二件 ，我 頭上 戴嘅 ，身上 着嘅 ，房間 裏 便 使用嘅 ，雖然 都係 你 買嘅 ，噉 你 亦都 要 寫 一張 文書 ，唔准 你 日後 嚟 攞返 嘅 。
好 ，呢件 亦 應承 你 。
噉 ，第三件 就 怕 你 唔肯 應承 嘞噃 。
兩件 都 應承咗 你 咯 ，點解 呢件 又 唔 應承得 呢 ？
嗱 ，梁山泊 嗰個 晁蓋 ，唔係 送咗 一百兩 黃金 畀 你 嘅 ？
你 快 啲 攞 嚟 交 畀 老娘 啦 ， 噉 老娘 就 放過 你 呢場 天字第一號 嘅 官司 ， 還返 個 招文袋 畀 你 係 啦 。
乜 ，唉 ，嗰 頭 兩件 我 應承 你 。
之 呢 一百 兩 黃金 ，冇 錯 係 佢 送嚟 畀 我 ，之 我 冇 要 佢 嘅 ，都 要 佢 帶 返 扯 嘞 。
如果 真係 有咯 ，我 雙手 送畀 你 。
係唔係呢 ？開講 有話 ，差人 見 錢 就 好似 烏蠅 見 血 。
嘿嘿 ， 佢 使 人 送 金 畀 你 ， 你 推返 轉頭 唔 要 都 有 嘅 ， 講 啲 噉 嘅 說話 出 嚟 ， 唔 係 放屁 。
做差人嘅 ，有 邊隻 貓衣 唔食 魚腥 嘅 ？你 想 呃 邊個 吖 ？
畀咗 呢 一百 兩 黃金 過 我 ，算得 乜嘢 吖 你 ？
嗱 ，如果 你 怕 人哋 認得 係 賊贓 ，噉 你咪 將 啲 金 熔過 嚟 畀 我 咯 。
你 都 知道 我 係 個 老實人 ，唔會 講 大話 㗎啦 。
你 如果 唔 信 ， 唉 噉 啦 ， 你限 我 三日 ， 我 賣 咗 啲 家產 攞 一百兩 黃金 嚟 畀 你 係 啦 ， 噉 得 嘞 掛 ？
好喇好喇 ，唔該 你 還返 個 招文袋 畀 我 啦 。
哼哼 哼 ， 你 呢 個 黑三真 係 精 啊 ， 噉 樣 氹 我 ， 你當 我 係 細佬哥 啊 ？
哦 ，我 還咗 個 招文袋 同 嗰封 信 畀 你 先 ，過咗 三日 先至 去 問 你 攞 一百 兩 黃金 係嘛 ？
嗰陣 你 過咗 海 都係 神仙 喇 ，仲 理 我 咩 ？
哼哼 ，我 係 一手交錢 一手交貨 。
你 快啲 攞嚟 兩 相交割 啦 。
我 真係 冇 呢 一百兩金 嘅 呢 。
哦 ？ 噉 聽 日 去 到 公堂 上 便 ， 你 亦 係 講話 冇 呢 一百兩 金咯 喎 ？
宋江 唔聽見 公堂 呢 兩 個 字 由 自可 ，一 聽見 公堂 兩 個 字 呀 ，即刻 怒氣沖天 ，點 都 忍唔住 喇 。
佢 瞪 大 雙眼 話 ： 你還 唔 還啊 ？
你 咁 惡 咩 ？哎呀 我 真係 要 快啲 還畀 你 呢 嚱 ？
你 真係 唔 還係 嘛 ？
唔 還唔 還唔 還唔 還 ， 一百個 唔 還 ， 一千個 唔 還 ！
你 想 我 還 呀 ？喺 鄆城 縣府 還畀 你 啦 。
婆惜唔肯還 ，宋江 就嚟 掹 婆惜 冚 嘅 嗰 張 被 咯 喎 。
婆 惜 因為 啲 嘢 喺 身邊 嚟 嘅 嘛 ，唔顧得 張 被 咁多 喇 ，兩 隻 手 ，將 嗰啲 嘢 緊緊 噉 喺 胸前 攬 到 實 。
宋江 一下 掹 開 咗 張 被 ， 見到 條 腰帶 頭 喺 婆 惜 嘅 胸前 髧 咗 落 嚟 。
原來 係 喺 呢度 嚟 ！
一不做二不休 ，就用 兩隻手 嚟 搶喇 。
婆惜 啊 梗係 唔 放手 啦 ，宋江 喺 床邊 唔 要命 咁 搶 ，婆惜 呢 就 死 都 唔 放 。
宋江 出死力 一擢 ， 誒 ， 就 將 嗰 把 匕首 擢 咗 出 嚟 喎 ， 宋江 即刻 執 起 喺 手 嚟 。
嗰個 婆 惜 見到 宋江 搶 咗 把 劍仔 揸住 喺 手 就 大嗌 話 ：
黑三郎 殺人 喇 噉 咯 喎 。
唔嗌 殺人 冇事 ，一聲 嗌 就 提醒咗 宋江 呢個 念頭 添 。
宋江 嗰 一肚氣 呀 正係 冇埞出 呢 。
婆惜 正 嗌得 第二聲 ，宋江 左手 就 撳住 閻婆惜 ，右手 把 刀 就 插落去 ，喺 正 婆惜 嘅 喉嚨 處 一邋 ，啪啲 血 就 飚出嚟 。
嗰個 女人 仲 喺度 呀呀聲噉 喺度 嗌 喎 。
宋江 怕 佢 唔死 再 加 一刀 ，個人頭 就 跌咗 落 枕頭 嘞 。
宋江 殺咗 閻婆惜 ，攞返 個 招文袋 ，扲咗 嗰 封 信 出嚟 就 喺 盞 燈 處 燒咗 佢 。
攬返 條 腰帶 就 落 樓 。
嗰個 伯爺 婆 喺 樓下 瞓 㗎 ，初初 聽見 佢哋 兩個 喺度 嗌交 ，都 唔係 點 在意 嘅 。
收尾 聽見 個 女 嗌咗 一 聲 話 黑三郎 殺人 喇 噉 ，咦 ，咩嘢 事 啊 喂 ？
連隨 跳起 身着 返件 衫 ，棱棱 聲 趯 上樓 睇下 啦 ，啱啱 同 宋江 撞到 應 。
閻婆 就 問 佢 話 喇 ：你哋 兩個 嘈 乜嘢 唧 ？
你個女 好無禮 ，畀我 殺咗 喇 。
吓 ？ 嘿嘿 ， 嘿嘿嘿 ， 嘿嘿 睇 你講 啲 乜嘢 吖 ， 係 咯 喎 ， 押司 你 好惡 啊 ， 酒品 又 唔 好 啊 ， 專門 要 殺人 啊 ， 嘿嘿 嘿嘿 ， 哎呀 押司 ， 唔 好 同 我伯爺 婆講 笑 喇 。
你唔信呀 ，你 入去 房 睇下 喇 ，我 真係 殺咗佢 。
我唔信 。
閻婆 推開 房門 入去 一 睇 ，誒呀 ，啲 血淋淋 成個 死屍 攤 喺度 。
閻婆 就 話 喇 ： 唉 ， 唉 陰公咯 ， 點做 算啦 ？
宋江話 ：我 係 個 好漢 ，我一世 都 唔 走 ，隨 你 話 點 都 好啦 。
哎呀 ，呢個 衰鬼 ，確係 唔好嘅 ，押司 你 冇 殺錯 ，之 可憐 我 呢個 伯爺婆 ，冇人 贍養 啫 。
呢層 唔緊要 ，既然 你 係 噉 講 ，噉 你 就 唔使 憂心 嘅 。
我 都 有 啲 錢 嘅 ，總之 等 你 豐衣足食 ，快快活活 ，過 呢 下半世 就 係 嘞 。
誒 ，誒噉 就 好咯 ，真係 ，多謝 押司 你 喇 ，誒之 我 個 女 而家 死 喺 鋪床 嚟 ，噉 點樣 做埋 啲 後事 好 呢 ？
呢層 就 容易啫 ，等 我 去 陳三郎 嗰處 買 副 棺材 畀 你 啦 。
等陣啲仵作嚟同佢入殮嘅時候 ，我 會 吩咐 佢哋 㗎喇 ，然後 我 畀 十兩銀 過 你 做 使用 啦 。
噉 欸 ， 多謝 晒 喇 ， 吖 押司 呀 ， 最好 啊 ， 趁個 天未光 ， 搵 副 棺材 嚟 殮 咗 佢 先 好 噃， 唔 好 畀 啲 街坊 睇 到 乜嘢 影頭 啊 。
噉亦好 ，你 攞 紙筆 嚟 ，等 我 寫 張 字條 你 去 攞 啦 。
哎呀 ，寫 張 字條 都 係 唔得 嘅 ，要 押司 你 親自 去 攞 噉 至 快 㗎 。
噉亦係 ，我 同埋 你 而家 去啦 。
兩個人 落咗 樓 ，閻婆 入去 房 攞咗 鎖匙 ，出咗 大門口 就 鎖好 道 街門 ，袋返 起 鎖匙 。
宋江 同閻婆 一路行 ， 行到 縣衙 門前 便 ， 呢 個 時候 個 天仲 係 好 早 未曾 光 ， 縣衙門 啊 啱 啱 開門 。
嗰個 閻婆 行到 衙門口 左便 嘅 時候 ，突然間 一手 揦住 宋江 ，大聲 噉 嗌話 ：呢度 有 個 殺人賊 啊 ！
嚇到 宋江 啊 滴滴 震 ，即刻 揞住 佢 嘅 嘴 話 ：唔好 嗌 啊 ！
嘿 ，仲邊度 揞得住 吖 ！
衙門 前 便 有 幾個 差人 ，聽見 閻婆 喺度 嗌 就 行埋嚟 睇下 。
見到 原來 係 宋江 ，就 勸 閻婆 話 喇 ：
你 個伯爺婆 你 嘈 乜嘢 啊 ， 押司 唔 係 啲 噉 嘅 人 嚟 ， 有事 慢慢 講 。
閻婆 就 話 喇 ：佢 正係 兇手 嚟 㗎 ，快啲 同 我 捉住 佢 啦 ，拉 佢 去 衙門 啦 ！
究竟 宋江 有冇 畀人 捉到 呢 ？噉 就 下次 先至 講 喇 。
