楊志 同埋 索超 兩個 比武 ，打咗 五十個 回合 ，打到 不分 勝負 。
兩個 都 非常 好 武藝 嘅 睇到 大家 眼 都 定晒 不停 口 咁 讚好 。
聞達 個 心 怕 兩個 之中 傷 親 一個 都係 唔好 嘅 ，就 急急 通知 旗牌官 ，攞住 令字旗 ，就去 將 佢哋 兩個 分開 。
將台上便 ，忽然 砰噉 一聲 鑼 響 ，就 即係 叫停 嘞 。
之 楊志同 索超 正在 鬥得 興起 ，大家 都 要 爭功 邊度 肯 回馬 呢 ？
一直 等到 旗牌官 飛馬 嚟到 大叫 話 ：兩個 好漢 停手 ，相公 有 令 ！
楊志 、索超 噉 先至 收住 手裏頭 嘅 兵器 ，勒住 馬 ，就 各自 跑返去 本陣 。
勒馬 喺 門 旗下 便 ，望住 梁中書 等候 將 令 。
李成 、聞達 落咗 將台 ，行到 去 月台 下 便 就 稟告 梁中書 話 ：
相公 ， 根據 呢 兩個 人 嘅 武藝 都 可以 重用 啊 。
梁中書 好 高興 ，就 傳令 叫 楊志 、索超 上嚟 。
佢 兩個 嚟到 演武廳 前 便 落咗 馬 ，將軍器 交 畀 小校 接住 ，就 上到去 演武廳 ，躬身 聽候 命令 。
梁中書 叫 人 攞咗 兩 錠 白銀 ，兩幅 衣料 嚟 ，賞賜 畀 佢哋 兩個 。
同時 叫 軍政 司 ， 將 兩個 都 升 做 管軍 提轄 使 ， 備 咗 案 報告 朝廷 從 當日 起 就職 。
索超 、楊志 都 拜謝咗 梁中書 ，捧住 啲 賞賜 就 落咗 演武廳 ，解低咗 啲 槍刀弓箭 ，卸咗 頭盔 衣甲 ，換咗 衣服 。
又 重新 上去 演武廳 ，再 拜謝咗 各位 軍官 。
梁中書 又 叫 索超 同 楊志 互相 敬咗 禮 ，就 入 班 做咗 提轄 嘞 。
嗰班 兵卒 ，就 打起 得勝鼓 ，舉起 金鼓旗 就 散咗 先 。
梁中書 同埋 啲 大小 軍官 ，都 喺 演武廳 嚟 宴會 。
一直到 紅日 西沉 喇 ，宴會 結束 ，梁中書 上咗 馬 ，所有 個 官員 都 送 佢 返去 官府 。
喺佢嘅馬前 ，係 楊志 、索超 呢 兩個 新 就職 嘅 提轄 ，一左一右 ，亦都 係 騎住 馬 ，頭上 亦都 戴住 紅花 ，一路 行 入咗 東郭門 。
嘿 呀 ， 街道 兩便 呀 ， 男男女女 老 老 嫩嫩 都 出 晒 嚟 睇 ， 個個 都 喜笑顏開 啊 。
梁中書 就 喺 馬上 問 佢哋 話 ：你哋 啲 老百姓 為 咩事 咁 歡喜 啊 ？
嗰班 伯爺 公 都 跪低 話 喇 ：
我哋 生 在 北京 長 在 大名府 ，從來 都 未 見過 好似 今日 兩位 好漢 將軍 比武 咁 好睇 嘅 。
今日呀 ，喺 教場 睇見 噉樣 嘅 對手 ，個 心 點 話 唔 歡喜 吖 。
梁中書 聽咗 ，個心 就 更加 高興 喇 。
返到 梁府 啲 官員 就 散 啦 。
索超啊畀 一班 弟兄 請咗 去 飲酒 慶祝 。
楊志 係 新嚟 嘅 ，未曾 有 朋友 相識 ，就 梗係 冇 人 請 飲 啦 ，噉啊 就 喺 梁府 裏 便 住宿 嘞 。
從此之後呢 ，楊志 就 日日 喺 梁府 嚟 殷殷勤勤 聽候 差遣 ，呢啲 都 不在話下 。
自從 東郭 教場 比武 之後 啊 ，梁中書 就 非常 喜歡 楊志 ，日日 都 同埋 佢 喺 一齊 。
楊志 每個月 又 有 一份 薪水 嘅 ，噉 自然 慢慢 就 有人 嚟 結識 佢 㗎 啦 。
嗰個 索超 呢 ，睇見 楊志 本領 高強 ，個 心 亦 都 好 佩服 佢 ，所以 大家 相處 得 係 幾 融洽 嘅 。
時間 就 過得 好 快 ， 春 去夏 來 ， 不知不覺 呢 就 到 咗 五月 五日 端陽 佳節 。
嗰日 梁中書 同 佢 老婆 蔡夫人 啊 ，喺 後堂 舉行 家宴 喎 ，嚟 慶賀 端陽 。
飲咗 幾杯 食咗 兩味 之後 ，蔡夫人 就 話嘞 ：
相公 自從 出身 之後 ，今日 做到 一位 統帥 ，掌握 國家 重任 ，呢啲 功名 富貴 ，係 喺 邊度 嚟 嘅 呢嚱 ？
夫人 ，世傑 自幼 讀書 頗 知 經史 ，人 非 草木 ，點會 話 唔知道 呢啲 都 係 泰山 對 我 嘅 恩德 ？
提攜之力 呢 ，嘿嘿嘿 ，世傑 真係 感激不盡 㗎 。
相公 既然 知道 我 父親 嘅 恩德 咯 ，點解 唔 記得 咗 佢 嘅 生日 啊 ？
點 會唔記得㗎 ，泰山 係 六月 十五 生日 吖嘛 。
我 已經 派人 攞咗 十萬貫 去 買 金珠寶貝 ，準備 送 去 京師 賀壽 㗎 喇 。
一個月 以前 ，去 辦事 啲 人 都 領咗 錢 去 買 㗎 喇 。
而家 已經 買到 九成 有多 喇 ，再 等 幾日 添 ，等 樣樣 都 準備 妥當 晒 ，就 派 人 起程 送 去 。
之 有 件事 仲 喺度 躊躇緊 啊 夫人 。
舊年 我哋 買咗 咁多 金銀珠寶 派 人 送去 ，都 未到 半路 就 畀 啲 賊 劫 咗 咯 。
白白嘥咗咁多錢 ，到而家啲賊都未曾捉到 。
噉 今年 叫 邊個 送去 好 呢 ？
你 手下 有 咁多 軍校 ，選 個 心腹 嘅 去 就 得 啦 。
嗯 ，仲有 四五十日 ，過幾日 等 禮物 齊備 咯 ，到時 再 選 個 合適 嘅 人 去 都 未 遲 。
夫人 你 就 唔使 掛心 喇 ，世傑 會 辦 㗎 喇 。
噉梁中書 今日 呢一餐 家宴 啊 ，由 中午 啊 一直 到 夜晚 二更 先至 散席 ，呢啲 就 唔 講 佢 咁多 喇 。
而家 講 下 山東 濟州 鄆城 縣 ，有 個 知縣 即係 縣官 ，係 姓 時 叫做 文彬 ，呢個 人 就 好 精明 能幹 。
呢一日 ，佢 升堂 辦公 ，左右 兩便 就 排住 一班 官吏 差役 。
佢 坐定 之後 就 叫 尉司 捕盜官員 ，同埋 兩個 巡捕 都 頭 嚟 。
呢 兩個 巡捕 都頭 ， 一個 係 步兵 都頭 ， 一個 係 馬 兵都頭 。
馬 兵都頭 呢 管轄 二十個 騎馬 嘅 弓箭手 ， 二十個 土兵 ；
步兵 都頭 呢 ，就 管轄 二十 個 使槍 嘅 頭目 ，二十 個 土兵 。
呢個 馬兵 都 頭 ，姓 朱 名 仝 ，身長 八尺四五 ，有 一把 長鬚 ，一尺五寸 長 嘅 ，面 如 重棗 ，眼 若 朗星 ，十足 個 關公 噉樣 嘅 。
成個 鄆城縣 啲 人 呀 都 稱呼 佢 做 美髯公 嘅 。
佢 係 本地 嘅 有錢人家 嚟 ，但係 佢 個人 仗義 疏財 ，專門 鍾意 結識 江湖 上 嘅 好漢 ，學得 一身 好 武藝 。
嗰個 步兵 都 頭 呢 ，姓 雷 名 橫 ，身長 七尺五寸 ，紫棠色 面皮 ，長咗 一把 扇圈鬍鬚 。
因為 佢 個人 好 大力 嘅 ，而且 跳得 好 遠 嘅 噃 ，兩三 丈 闊 嘅 山澗 呀 佢 一步 就 跳過去 㗎 喇 ，所以 成 縣 啲 人 都 叫 佢 做 插翅虎 。
佢 係 本縣 打鐵佬 出身 ，收尾 又 開 咗 間 舂米 嘅 碓房 ，又 殺牛 開 賭 。
佢 呢個 人 呢 ，雖然 都係 講義氣 啊 ，之 個 心地 呢 就 有 啲 狹窄 。
佢 亦 係 學得 一身 好 武藝 嘅 。
朱仝 同 雷橫 呢 兩 個 人 ，喺 縣 裏 便 係 專管 擒拿 盜賊 嘅 。
當日 ，知縣 時文彬 就 叫 佢哋 兩個 嚟 ，吩咐 佢哋 話 ：
我 自從 到任 以嚟 ，就 聽講 本府 濟州 所屬 嘅 水鄉 梁山泊 ，有 一班 盜賊 ，聚眾 打劫 ，抗拒 官軍 。
恐怕 各個 鄉村 啲 盜賊 ，亦 係 好 猖狂 ，小人 甚多 。
今日 叫 你哋 兩個 嚟 ，你哋 要 不辭辛苦 ，帶埋 啲 土兵 ，一個 就 出 西門 一個 出 東門 ，分開 兩條 路 去 巡查 。
見到賊就要捉 ，但係 要注意 ，唔好 騷擾 嗰啲 鄉民 。
我 知道 喺 東溪村 個 山 上 便 啊 有 一 樖 大 紅葉樹 ，第二 處 都 冇 嘅 。
你 哋 大家 去 到 嗰 處 就 摘 幾片 樹葉 返 嚟 ， 交 畀 本縣 ， 噉 就 即 係 表示 你 哋 確實 係 巡 到 嗰 處 嘞 。
如果 冇 紅葉 帶 返嚟 ，就 講明 你哋 冇 去到 ，要 嚴加 責罰 。
兩個 都頭 接受 咗 命令 ， 就 各自 返去 點齊 自己 嘅 人馬 ， 一人 就 去 一 便 出發 去 巡查 嘞 。
朱仝 就 帶住 人 出咗 西門 去 巡查 ，呢處 就唔 講 佢 住 。
只係 講下 雷橫 ，當晚 佢 帶住 二十 個 土兵 出咗 東門 ，繞住 條 村 到處 咁 巡查 咗 一遍 。
去到 東溪村 個 山上 便 嘞 ，人人 都 摘咗 啲 紅葉 ，然後 就 入去 村 啦 。
行咗 兩三里 路 ，嚟到 一間 廟 ，就 叫做 靈官廟 。
一見到廟門 都冇閂埋 ，雷橫 就 話喇 ：
呢間 廟 裏頭 又 冇 廟祝公 嘅 ，廟門 又 唔閂 ，唔通 有 壞人 喺 裏頭 ？入去 睇下 。
噉 大家 就 攞住 火把 一齊 照住 入去 睇下 喇喎 ，咦 ？噉就 見到 喺 神台 上 便 ，有 個 大漢 赤條條 噉 瞓 喺度 。
今晚 個 天 係 好 熱 嘅 ，嗰 條 大漢 將 啲 爛 衫 鋸 埋 一嚿 做 枕頭 ，噘噘聲 瞓 到 淰晒 。
雷橫 一見 就 話 喇 ：你 話 古怪 唔 古怪 呢 ？
知縣 相公 真係 英明 ，原來 東溪村 呢處 真係 有 賊 ！
喂 ！雷橫 大喝 一 聲 。
嗰條 大漢 一下 嚇醒咗 ，正話 想 掙扎 ，就 已經 畀 嗰 二十 個 土兵 一齊 上前嚟 撳住 佢 ，用 條 繩 嚟 綁實 ，拉咗 出去 靈官廟 。
呢個 時候 天色 仲 係 好早 ，不過 係 五更唧 。
雷橫 就 話 喇 ：我哋 不如 將 呢個 傢伙 押咗 去 晁保正 間 莊處 先 ，喺 佢 處 攞 啲 點心 食下 ，然後 再 押 佢 返 去 縣 裏頭 審問 啦 。
嗰班 土兵 聽見 話 有 嘢食 呀 梗係 贊成 啦 。
於是 雷橫 帶住 成班人 ，就 走去 晁保正 間 莊 咯 喎 。
原來 東溪村 嘅 保正 ，係 姓 晁 嘅 ，單名 一個 蓋 字 ，晁蓋 。
祖先啊 ，係 本縣 本鄉 嘅 有錢人家 。
佢 嘅 為 人 仗義疏財 ， 專門 鍾 意 結識 天下 嘅 好漢 。
但凡 有人 嚟 投奔 佢 嘅 ，唔理 好醜 ，都 留 喺 莊處 住 。
要扯喇 ，又 送埋 錢 過佢 ，資助 佢 起程 。
佢 又 最 喜歡 刺槍使棒 ，本人 又 生得 身強力壯 ，冇 娶 老婆 ，終之 無日 都 喺度 鍛煉 筋骨 嘅 啫 。
鄆城縣 嘅 東門 外 有 兩 條 村 ，一 條 係 東溪村 一 條 係 西溪村 ，兩 條 村 就 隔住 一 條 溪水 。
當初呢 ，呢條 西溪村 就 時時 話 有 鬼 嘅 。
呢天光白日啊 ，都會話出嚟 迷人落水 ，喺條溪處 浸死嘅噉話 ，治都治佢唔掂 。
有一日 ，有個 和尚 經過 ，噉 西溪村 啲 人 呢 就 將 呢處 有 鬼 嘅 事 講畀 佢 聽 啦 。
嗰個 和尚 呢 就 指咗 一笪 地方 ，叫 啲 人 呀 ，用 青石 鑿 咗 個 寶塔 安 喺 嗰度 嚟 就 鎮住 溪邊 。
哈 就 真係 靈噃 ，西溪村 就 冇 鬼 嘞 ，噉 啲 鬼 去 晒 邊 呢 ？哈 走晒 過 東溪村 。
呢件事 畀 晁蓋 知道 ，就 可惱 啦 。
唥唥聲 就 走過去 西溪村 ，一個人 就 搶咗 個 青石塔 ，捧咗 過嚟 東溪村 呢便 放低 。
從此呢 ，人人 都 叫佢 做 托塔天王 嘞 。
喺 呢條 村 處 呀 ，冇 人 敢 惹 佢 嘅 ，江湖 上 都 識得 佢 個 名 。
而家 講返 雷橫 帶住 嗰班 土兵 ，押住 嗰條 大漢 就 嚟到 晁蓋 間 莊 處 拍門 。
莊客 聽見 就 去 報畀 晁蓋 知 呢 ，咁 早晨 晁蓋 都 仲 未曾 起身 ，聽見 話 係 雷 都 頭 嚟到 唄 ，即刻 叫 開門 。
莊客 開咗 門 ，嗰班 土兵 就 將 嗰條 大漢 ，吊喺 門房 裏 便 。
雷橫 帶住 十幾個 頭頭 呢 ，就 入到去 草堂 裏 便 坐落 。
晁蓋 起咗 身 出嚟 接待 佢哋 話 ：都頭 嚟 呢處 有 咩 公幹 啊 ？
雷橫 就 話 喇 ：奉咗 知 縣 相公 嘅 命令 ，叫 我 同 朱仝 兩個 ，帶住 部下 啲 土兵 ，分頭 落嚟 各 條 村 到處 巡捕 盜賊 。
嘿 ，巡咗 成晚 ，攰喇 ，想 休息一下 ，所以 就 走嚟 貴莊 唞一唞 ，嗨 嘈醒 保正 你 瞓覺 喎 。
哦乜 說話乜說話 。晁蓋 即刻 叫 莊客 安排 酒菜 嚟 款待 。
晁蓋 又 問 ：都頭 ，喺 敝村 有冇 捉到 個 把 賊仔 啊 ？
嘿 ，啱先 喺 前便 間 靈官廟 裏頭 ，有 個 大漢 喺度 瞓覺 喎 。
我 睇 嗰個 傢伙 都 唔係 個 善良 君子 嚟 㗎 喇 ，一定 係 飲醉 咗 喺度 瞓 。
我哋 就 捉住 佢 用 繩 嚟 綁實 ，本來 想 即刻 解返 去 縣 裏頭 審 佢 嘅 ，不過 一 來 個 天 仲 係 早得啲 ；
二來呢 ，亦要 講聲 畀 保正 你 知道 下 ，如果 日後 知 縣 相公 問起嚟 嘅 時候 ，噉 保正 要 有得 講 至 得㗎 ，係咪呢 ？
嗰個人 而家 誒 吊 喺 貴莊 嘅 門房 嗰度 嚟 。
多得 都頭 嚟 通知 啊 。
過咗一陣 ，酒席 擺好喇 ，晁蓋 就 話 ：
喺 呢度 想 傾句偈 都 唔方便 ，不如 請 入去 後廳 罷啦 。
於是就叫莊客喺裏便點起蠟燭 ，請雷橫入去飲酒嘞 。
晁蓋 就 坐 喺 主位 ，雷橫 就 坐 喺 客席 。
兩個 坐定 ，莊客 就 上菜 斟酒 。
晁蓋 又 吩咐 買 酒 嚟 畀 啲 土兵 飲 。
莊客 就 帶咗 嗰班人 去 廊下 客位 嗰處 款待 ，大碗酒 大塊肉 ，猛 叫 佢哋 食 。
晁蓋 一便 陪 雷橫 飲酒 ，一便 個 心 就 諗 嘞 ：
村 裏頭 有 邊個 賊仔 畀 佢 捉住 啊 ，等 我 去 睇 下 係 邊個 至 得 。
陪雷橫 飲咗 六七杯 酒 ，就 嗌咗 屋企 一個 主管 出嚟 ，話 自己 要 去 小便 ，叫 佢 陪 都頭 飲住 酒 先 ，噉 就 行開咗 咯 。
佢 入去 裏 便 攞起 個 燈籠 ，一直 嚟到 門樓 嗰度 睇下 。
嗰班 土兵 冚𠾴唥 都 去晒 飲酒 啦 ，所以 冇 個人 喺 外便 嚟 。
晁蓋 就 問 看門口 嘅 莊客 話 ：都頭 捉嚟 嘅 賊 吊 喺 邊處 嚟 啊 ？
喺 門房 裏 便 嚟 啊 。
晁蓋 㧬 開 道門 入去 ，攞 個 燈籠 照住 一睇 ， 見到 嗰 條 大漢 高高 噉 吊 住 喺 度 ， 打出 一身 黑肉 ， 兩隻 黑 𠵼𠵼 毛 鬙 鬙 嘅 腳 呀 畀 人 哋 扎 實 ， 打大 赤腳 。
晁蓋 又 照 下 佢 塊 面 ，見 佢 面口 闊闊 ，紫黑色 面皮 ，喺 鬢邊 呢 ，有 一 笪 硃砂痣 ，上 便 仲 長住 一 片 黑黃毛 添 。
晁蓋 就 問 佢 話 ：喂 ，你 係 邊處 人 ？我 條 村 未曾 見過 你 噃 。
小人 ， 喺 好 遠 嚟 嘅 ， 要 嚟 呢 度 投奔 一個 人 。
點知 佢哋 將 我 當做 賊 捉起 上嚟 ，我 要 搵 地方 ，講明白 至 得 。
你 嚟 我 條村 想 投奔 邊個 呢 ？
我 嚟 呢條村 ，投奔 一個 好漢 。
呢個 好漢 叫做 咩嘢 名 啊 ？
佢 叫做 晁保正 。
你 要 搵 佢 做咩 啊 ？
佢 係 個 天下 聞名 嘅 義士 好漢 ，我 而家 ，有 一單 富貴 要 講 畀 佢 聽 ，所以 我 先至 嚟 嘅 啫 。
你唔好講住 ，我 就係 晁保正 。
如果 你 想 我 救 你 ， 你 就 認 我 係 你 親戚 。
等一陣 ，我 送 雷都頭 出嚟 嘅 時候 ，你 就 嗌 我 係 舅父 ，我 就 認 你 做 外甥 。
你話 四五歲 就 離開咗 呢處 ，而家 嚟 搵 舅父 唔 認得 喇噉 。
得義士 你 搭救 我 真係 非常 感激 ，唔該晒 你喇 。
晁蓋 揸住 個 燈籠 ，行返 出 房 閂 返 好 道 門 ，快快趣趣 返返 入 去 後廳 。
雷都頭 ，怠慢晒 真 對唔住 喎 。
滾攪晒保正就真 。
兩個人 又 飲咗 幾杯 ，窗口 已經 有 日光 射入嚟 喇 。
雷橫 就 話 ：吖 ，出 日頭 ，小人 要 扯 ，要 返 去 縣 裏頭 簽到 啊 。
都頭 有 公事 在身 ，唔敢 留 你 ，幾時 再嚟 敝村 公幹 千祈 要 請嚟 啊 。
到時 一定 嚟 拜候 ，保正 唔好 送 喇 唔好 送 喇 。
哈哈哈 ， 好好 好 ， 唔 送 就 唔 送 ， 我 送到 莊 門口 啦 。
兩個 一齊 行出去 。
嗰班 土兵 呀 個個 都 食得飽飽 ，攞 返 啲 槍棒 ，就 去 門房 嗰度 解 咗 嗰條 大漢 落地 ，倒 綁住 手 ，帶 佢 出 門口 嘞 。
晁蓋 見到 就 話 ：嘩嗨 ，好 一條 大漢 ！
雷橫話 ：呢 ，呢個 傢伙 ，就係 喺 靈官廟 捉到 嗰個 賊 喇 。
話猶未了 ，嗰個 大漢 大叫 一聲 話 ：舅父 ，快啲 救 我 啊 ！
晁蓋 詐 假意 睇睇 佢 ：誒 ，乜 你 唔係 王小三 咩 ？
係啊 ，我 是 小三 啊 舅父 救 我 啊 ！
大家 聽到 都 嚇咗 一跳 喎 。
雷橫 就 問 晁蓋 話 ：呢個 人 係 邊個 啊 ？點解 認得 保正 呢 ？
佢 係 我 嘅 外甥 王 小三 ，呢個 嘢 點解 會 走 去 間 廟 處 瞓 呢 ？
佢 係 我家姐 個 仔 ，自細 喺 呢處 住 嘅 。
四五歲嘅時候 ，姐夫 同 家姐 就 搬咗 去 南京 住 ，一去 就 去咗 十幾年 。
呢個 衰仔 十四五歲 嘅 時候 ，又 返嚟 過 一趟 ，跟住 一個人 ，話 嚟 學 做 生意 ，以後 就 一直 冇 見面 咯 。
舊時 聽人 講話 呢個 衰仔 唔生性 ，冇出息 ，點解 會 趯 返嚟 呢度 呢 ？
我 本來 都 唔 認得 佢 㗎 喇 ，不過 佢 嘅 鬢邊 呢 ，係 有 一 笪 朱砂痣 嘅 ，所以 我 約約莫莫 都 仲 認得 。
小三 ，點解 你 唔 一直 返嚟 見 我 吓 ，走咗 去 村 做 賊 呀 ？
舅父 我 冇 做 賊 噃 。
你 冇 做賊 ，點解 又 會 畀 人 捉住 你 喺度 呢 ？
晁蓋 一手 喺 土兵 處 攞咗 條 棍 ，兜頭兜面 就 打過去 。
雷橫同 大家 就 勸住 佢 話 ： 唔 好 打 唔 好 打 ， 聽 佢 講 。
舅父 ，你 唔好 嬲 ，你 聽 我 講 。
自從 我 十四五歲 嗰陣 返過嚟 一趟 之後 ，到 而家 唔係 成 十年 嘞 咩 ？
尋晚 我 喺 路上 飲多咗 杯酒 ，唔敢 返嚟 見 舅父 你 ，就 趯咗 去 間 廟 處 瞓 一 晚 先 ，等 起身 先至 嚟 搵 舅父 你 啦 。
點 知 佢 哋 不問 情由 ， 夾硬 捉住 我 ， 我 冇 做 賊 啊 。
畜生 ！你 唔 直情 嚟 見 我 ，喺 路 上 就 貪 飲 嗰啖 黃湯 ，屋企 冇 得 畀 你 飲 咩 ？
醜死人啊你 ，唔打過你 都唔得嘅 。
雷橫 就 勸 佢 話 喇 ： 啊 保正 唔 好 打 佢 喇 唔 好 打 佢 喇 ， 亦 唔 使 嬲 。
你 外甥 並冇 做 賊 ，我哋 不過 見 佢 咁 大隻 一條 大漢 ，喺 間 廟 處 瞓覺 咁 奇怪 。
而且又 面生 ，唔認得 佢 ，所以 就 懷疑 佢 ，捉咗 佢 嚟 呢處 啫 。
如果 一早 知道 佢 係 保正 嘅 外甥 ，噉 啊 梗 唔會 話 捉 佢 嘅 。
人 嚟 ，快啲 解開 佢 。
係 ，係 。
保正 ，唔好 見怪 喎 ，早知 係 你 外甥 就 不至於 噉嘅 ，真係 得罪 晒 喇 ，好喇 好喇 ，我哋 走 。
都頭唔好走住 ，請入去裏便我仲有幾句說話 。
雷橫 放咗 條 大漢 就 跟住 晁蓋 一齊 再 行返 入去 草堂 。
晁蓋 攞咗 十兩 花銀 送畀 雷橫 ，佢 話 ：都頭 唔好 嫌 少 ，請 收起 佢 啦 。
哎呀噉點係啊 ，點敢當啊 。
如果 都 頭 唔 收 ，噉 啊 即係 怪 我 喇 。
呵呵呵 ，好啦好啦 ，既然 保正 咁 有心 ，我 就 收起 佢 先 ，第日 再 嚟 報答 ！
晁蓋 叫 嗰條 大漢 拜謝 過 雷橫 ，同時 ，又 攞咗 啲 銀兩 ，打賞 畀 嗰啲 土兵 ，然後 再 送到 出去 莊門 外 便 。
雷橫 帶住 嗰班 土兵 噉 就 走咗 咯 。
晁蓋 同 嗰個 大漢 返到 入去 後廳 ，攞 幾件 衣服 畀 佢 換過 ，攞咗 頂 頭巾 畀 佢 戴返 ，就 問 佢 姓 乜 名 乜 係 邊處 人士 。
嗰個 大漢 就 話 ：小人 姓 劉 名 唐 ，係 東潞州 人氏 ，因為 喺 鬢邊 有 呢 笪 硃砂痣 ，人人 都 叫 小人 叫 赤髮鬼 。
專誠嚟呢處 ，送 一單 富貴 畀 保正大哥 。
尋晚 ，因為 飲醉咗 瞓 喺 間 廟 嚟 。
點知 畀 嗰班 傢伙 捉住 ，綁咗 嚟 呢度 ，嗨 真係 有緣 千里 來 相會 ，無緣 對面 不 相逢 ，咁 好彩 今日 喺 呢度 遇到 大哥 。
大哥 坐好 ，受 我 劉唐 四拜 啊 ！
拜完 ，晁蓋 就 話喇 ：
你話 要 送 一單 富貴 畀 我 ，而家 喺 邊度 嚟 啊 ？
小弟 自細 飄蕩 江湖 ，去過 好多 地方 ，專好 結識 好漢 嘅 ，時時 都 聽聞 阿哥 你 嘅 大名 ，估唔到 今日 有緣 相遇 。
以前 ，見到 山東 、河北 嗰啲 做 私商 嘅 ，好多 都 嚟 投奔 過 大哥 你 ，故此 小弟 敢 講 呢 一句 說話 。
不過 ，不過 要 呢處 冇 第 個人 ，先至 可以 推心置腹 噉 講畀 大哥 你 聽 。
喺 呢處 嘅 都係 我 嘅 心腹 ，即管 講啦 ，唔緊要嘅 。
係噉嘅 ，小弟 探聽到 個 消息 ，話 北京 大名府 梁中書 ，買咗 十萬貫 金珠寶貝 ，準備 送去 東京 ，同 佢 外父 蔡太師 拜壽 。
舊年 ，佢 亦都 送過 十萬 貫金珠寶貝 ，未到 半路 ，唔知 畀 邊個 劫咗 去 ，到而家 仲 捉唔到 人 。
今年 ，佢 又 試 買 咗 十萬 貫 金 珠寶貝 ，日內 就 安排 起程 ，為因 要 趕住 六月 十五 嗰 日 生日 。
小弟 諗 ：呢一單 係 不義之財 攞咗 佢 冇乜嘢 唔妥 。
你話 商量到 個 辦法 ，喺 半路 鑿咗 佢 ，個 天 知道 亦都 唔會 怪罪 。
一向 聽聞 阿哥 個 大名 ，係 個 大丈夫 ，武藝 出眾 。
小弟 衰衰地 ，亦 學過 啲 本事 ，咪 講話 三五個人 啊 ，就算 係 對住 一兩千兵馬 ，揸住 條 槍 亦 唔怕 佢 。
如果 大哥 你 唔 嫌棄 ，小弟 就 專誠 獻 呢一單 富貴 畀 大哥 。
唔知 大哥 意下 如何 呢 ？
好 ，使得 ！
你 嚟到 呢處 ，一路 梗係 好 辛苦 嘞 ，請 去 客房 休息 下 先 。
等我 認真 考慮 下 ，聽日 再 傾 。
晁蓋 就 叫 個 莊客 ，帶咗 劉唐 去 客房 休息 。
劉 唐 喺 間 客房 裏頭 諗 下 諗 下 ：
哎 你 話 我 撞咗 乜嘢 鬼 呢 ，辛苦 咗 成晚 ，好彩 多得 晁蓋 救咗 我 唧 。
豈有此理 雷橫 嗰個 衰公 ，白白 呃咗 晁保正 十兩銀 ，又 吊 咗 我 一晚 。
啊 ， 嗰 個 嘢 怕 行 咗 冇 幾 遠 咋 噃， 我 不如 攞 條 棍 追上去 ， 掃低 晒 嗰 班 友 ， 搶 返 嗰 十兩 銀 ， 搦 嚟 送 返 畀 晁蓋 ， 出返 我 呢 啖 氣都 好 啊 。
冇錯 ，一於 噉話 。
劉唐行 出 房門 ，喺 槍架 上面 攞咗 把 朴刀 ，出咗 莊門 ，大踏步 向住 南便 追過去 。
呢個 時候 呢 ，已經 天光 大白 。
佢 追咗 五六里 路 ，追到 嘞 。
佢 隔遠 就 大聲 喝話 ：喂 ！嗰個 都 頭 唔好 行住 ！
雷橫 吃咗 一驚 ，擰轉頭 一睇 ，見到 係 劉唐 揸住 把 朴刀 追緊 過嚟 。
雷橫 即刻 喺 個 土兵 處 ，攞咗 一把 朴刀 喺 手 ，喝返轉頭 話 ：你 呢個 嘢 追嚟 做乜嘢 啊 ？
精精地 將 嗰 十兩 銀 還返 畀 我 ， 我 就 饒 咗 你 係 啦 。
唓 ！嗰 十兩 銀 係 你 舅父 送畀 我 嘅 ，關 你 咩 事 啊 ？
我 如果 唔係 睇在 你 舅父 嘅 份上 ，我 就 劏咗 你 喇 ，咁 大膽 仲 反而 嚟 問 我 攞 銀 ？
我 明明 唔係 賊 ，你 就 將 我 綁住 吊咗 一 晚 ，又 呃 咗 我 舅父 十 兩 銀 。
你 熟 性 嘅 就 攞 返 出 嚟 還 畀 我 ， 我 就 拔眼 相看 ；
你 如果 唔 還 ，我 就 叫 你 當堂 流血 ！
吓 ，你 呢個 敗壞 家門 嘅 賊仔 ，居然 咁 冇禮 係嘛 ！
你呢個 專門 蝦霸 老百姓 嘅 邋遢鬼 ，咁 大膽 敢 鬧 我 ？
你 ，你啊 正一 係 賊頭賊臉 賊骨頭 ，梗 連累 埋 晁蓋 㗎 喇 你 。
你噉嘅賊心賊肝 ，想恰我 ？咪指意啊你 。
劉唐 火滾喇 ，佢 話 ：我 唔 打到 你 趴低 你 都 唔知 死 ，嚟 ！同 你 見 個 輸贏 至 得 ！
舞起 把 朴刀 就 直取 雷橫 。
雷橫 呵呵 大笑 ，朴刀 一揮 就嚟 迎戰 嘞喎 。
兩個人 ，就 喺 條 大路 處 打起上嚟 ，鬥 咗 五十幾個 回合 不分勝敗 。
嗰班 土兵 見 雷橫 贏 唔到 劉唐 唄 ，就 想 一齊 湧 上去 同 佢 搏過 咯 喎 。
喺 呢個 時候 ，只見 路邊 嗰道 籬笆 門 一 打開 ，有 個人 揸住 兩條 銅鏈 大聲 噉 話 ：
你哋 兩個 好漢 唔好 打 喇 ，我 已經 睇咗 好耐 ，你哋 歇 一歇 先 ，我 有 說話 講 啊 。
講完 ，用 條 銅鏈 喺 當中 一格 ，噉 兩個人 都 收住 把 朴刀 跳 出去 圈外 企定 腳 。
睇下 嗰個人 ，只見 佢 嘅 打扮 好似 一個 秀才 噉 ，戴 一頂 桶子樣 嘅 抹眉梁 嘅 頭巾 ，着 一件 黑綑邊 嘅 麻布 寬衫 ，束住 一條 茶褐色 嘅 腰帶 ；
雙腳 着住 絲鞋 淨襪 ，個樣子 呀 生得 眉清目秀 ，面白 鬚長 。
呢個人 係 邊個 呢 ？
呢個人呀 ，喺 梁山泊 一百零八 個 好漢 聚義 起咗 好大 作用 。
