而家 講 下 楊志 啊 ，畀 嗰 個 爛仔 牛二 就 攬到 實 ，佢 就 大聲 噉 嗌 喇 ：
各位 街坊 ，你哋 都係 見證人 喇 。
想 我 楊志 為 因 冇咗 旅費 使用 ，要 出嚟 賣 呢把 刀 ，呢個 爛仔 監 硬 要 搶 我 把 刀 ，仲 打 我 添 。
嗱 大家 都 見到 㗎 啦 。
但係 啲 街坊 呢 ，都 係 怕 呢個 牛二 嘅 ，冇人 敢 過嚟 勸 。
牛二 就 越發 猖狂 定 啦 ，佢 就 話 喇 ：
哈 ，你話 我 打 你 係嘛 ，吖 我 就係 打死 你 又 算得 乜嘢 得㗎 ？
個口 一便噏 ，一便 就 真係 舉起 右手 一拳 就 揈過嚟 嘞 喎 。
楊志霎 一聲 一下 閃開 ，揸住 把 刀 上前 一步 ，一時 火起 ，對正 牛二 嘅 喉嚨 就 一刀 鋸落去 啪聲 下 ，牛二啊 成個 碌 低 。
楊志 趕上去 喺 牛二 嘅 心口 處 ，又 連氣 插咗 兩刀 ，當堂 呀 血流 滿地 ，嚱 係 咁 大 喇 。
楊志 就 話 ：我 殺死咗 呢個 爛仔 ，我 唔會 連累 大家 嘅 ，你哋 都 嚟 同埋 我 去 官府 自首 啦 。
嗰班 街坊 見 楊志 噉樣 講咯 ，即刻 就 行埋嚟 ，跟住 楊志 一直 行 去 開封府 自首 。
去到 ，府尹 正 喺 衙門 辦公 。
楊志 就 攞住 把 刀 ，同埋 啲 街坊 就 嚟到 大堂 一齊 跪低 ，將 把 刀 放 喺 面前 。
楊志 就 稟告 話 ：
小人 ，本來 係 殿司 制使 ，為因 失咗 花石綱 ，削去 本身 職務 ，冇咗 旅費 使用 ，就 將 呢把刀 攞到去 大街 出賣 。
點知 有 個 爛仔 牛二 ，強搶 小人 嘅 刀 ，又 用 拳頭 嚟 打 小人 。
小人 一時 火起 將 牛 二 殺死咗 。
咁多 街坊 都係 見證 。
嗰班 街坊 ，都係 幫住 楊志 ，都 同 佢 作證 。
府尹 就 話 ： 既然 係 自首 ， 就免 打 啦 。
跟住 府尹 就 叫 人 攞咗 一面 長枷 嚟 ，同 楊志 戴起 。
派 兩名 辦案官員 帶埋 啲 仵作佬 ，押住 楊志 同埋 一班 街坊 ，去到 天漢州 橋邊 驗咗 屍 ，立 咗 案 。
噉嗰班街坊呢 ，都 錄好咗 口供 ，交 保釋放 啊 隨傳隨到 。
楊志 呢 ，就 韞咗 喺 死牢 嚟 。
楊志押 到 去 死牢 之後 啊 ， 監獄 裏頭 嗰 啲 獄卒 啊 獄官 啊 ， 喺 宋朝 嘅 時候 呢 就 叫做 禁子 、 節級 咯 。
聽講 楊志 殺死咗 個 冇毛 老虎 牛二 唄 ，都 可憐 佢 係 個 好漢 ，冇嚟 問 佢 攞 錢 不特止 ，仲 好好 噉 照顧 佢 添 。
噉天 漢州 橋 嗰 一帶 嗰啲 街坊 啊 ，因為 楊志 為 當地 除咗 個 害人蟲 ，都 非常之 感激 佢 。
大家 就 夾咗 啲 錢 ，嚟 送飯 畀 楊志 ，上上下下 又 幫 佢 使 錢 買通 晒 。
嗰個 推事官 呢 ，亦都 見到 楊志 係 一個 好漢 ，呢次 又 係 為咗 東京 街道 上 除咗 一 害 ；
牛二 屋企 又 冇 晒 人 㗎 喇 ，冇 苦主 嘅 ，所以 就 將 楊志 嘅 罪狀 改輕 咗 。
三推六問 ，判咗 個 一時 鬥毆 殺傷 ，誤傷 人命 唧 。
等到 六十日 期限 滿 咗 喇 ， 嗰 個 經辦 嘅 推 事 官 呢 ， 稟告 過 府尹 ， 就將 楊志帶 出 嚟 大堂 ， 除 咗 面長 枷 ， 打 咗 佢 二十大 板 ；
又嗌咗 個 文墨匠人 嚟 ，喺 楊志 塊 面 處 呢 ，刺咗 兩 行 金印 ，發配 去 北京 大名府 留守司 充軍 。
嗰把 寶刀 呢 ，嚱嚱 對唔住 喇 就 沒收 充公 嘞 。
當堂 簽署 咗 公文 ， 派 兩個 押解 差 人 ， 無非 係 張龍 、 趙 虎 啦 。
同 楊志 釘 上一面 七斤半 重 嘅 鐵葉 盤頭 護身 枷 ，於是 就 起程 上路 嘞 。
天漢州 橋 附近 嗰 一帶 就 有 幾戶 有錢 人家 ， 佢 哋 夾 咗 啲 錢 ， 等 楊志 經過 嘅 時候 ， 就 請 佢 同 兩個 差人 啊 ， 一齊 去 酒店 飲酒 食飯 ， 又 攞 啲 銀兩 出 嚟 送 畀 兩個 差 人 。
嗰班 有錢佬 話 ：唔該 兩位 念在 楊志 係 個 好漢 ，佢 為 民 除害 ，而家 要 去 北京 咯 ，噉 一路上 請 兩位 多多 關照 啦 。
張龍 、趙虎 就 話 ：得喇 ，我哋 兩個 亦都 知道 佢 係 個 好漢 ，唔使 各位 吩咐 咯 ，即管 放心 啦 。
大家 將 多餘 嘅 銀兩 送 晒 畀 楊志 。
楊志 多謝 過啲 街坊 ，告辭 咗 ，就 同 兩個 差人 又 去到 原來 住 嗰 間 客店 啊 ，計 清晒 啲 房租 ，攞返 寄存 喺度 嘅 衣服 行李 ，買 咗 啲 酒菜 請 兩位 差人 食飯 ；
又 去 搵 個 醫生 ，買咗 幾 貼 膏藥 敷 咗 傷口 ，就 同 兩個 差人 起程 嘞 。
三個人 向住 北京 出發 ，五里 一程 就 十里 一站 ，穿州過縣 。
一路上 楊志 都 不時 買啲 酒菜 請 張龍 、趙虎 一齊 食 嘅 。
就噉樣 ，三個人 ，一路 曉行 夜宿 ，冇幾耐 就 嚟到 北京 。
入咗城 ，就 搵 間 客店 落腳 。
原來 北京 大名府 留守司 啊 ，上馬 管 軍 就 下馬 管 民 最 有 權勢 。
嗰個 留守 叫做 梁中書 ，個 名 係 世傑 ，佢 係 東京 當朝 太師 ，蔡京 個 女婿 嚟 。
嗰日 ，係 二月初九 ，留守 升廳 辦公 。
兩個 差人 ，就 將 楊志 解到 去 留守司 大堂 ，呈上咗 開封府 嘅 公文 。
原來 喺 東京 嘅 時候 啊 ，梁中書 亦都 識得 楊志 。
佢 見咗 面 睇咗 公文 ，就 詳細 噉 問 楊志 呢件事 嘅 經過 。
楊志 就 將 高太尉 唔准 佢 復職 ，自己 啊 使盡晒 錢 嘞 ，當街 出賣 寶刀 殺死 咗 牛二 嘅 實情 一五一十 噉 ，稟告 畀 梁中書 聽 。
梁中書 好鍾意 楊志 呢個人 ，聽佢 講完 經過 ，當堂 同佢 開咗 枷 ，留佢 喺 堂前 聽候 差遣 。
同時呢 ，批復咗 公文 交畀 張龍 、趙虎 ，噉 佢 兩個 就 返去 東京 銷差 咯 。
而家 淨係 講 下 楊志 ，佢 喺 梁中書 嗰度 ，每 日 殷勤 侍候 ，聽候 差遣 啦 。
梁中書 見 佢 咁 勤懇 嘅 ，就 有心 要 抬舉 佢 ，提升 佢 喺 軍隊 裏 便 做 個 副牌軍 ，每 個月 支 返 一 份 薪水 嘞 。
不過 呢 ，又 有 啲 怕 大家 個 心 唔 服 啊 。
於是 下咗 一道 命令 ，叫 軍政司 通知 大小 將校 ，聽日 ，都 要 去 東郭門 教場 ，參加 武藝 演習 。
當晚 ，梁中書 就 叫咗 楊志 嚟到 大堂 同 佢 講 ：
我 有心 要 抬舉 你 做 個 副牌軍 ，每個月 支返 一份 薪水 ，唔知 你 嘅 武藝 點 呢 ？
小人 係 武舉 出身 ，曾經 做過 殿司府 制使 職務 。
呢 十八般武藝 都係 自細 就 學 㗎喇 。
今日 多蒙恩 相抬舉 ，就 好似 撥開 雲霧 見 青天 一樣 啊 。
楊志 如果 能夠 有 一啲 長進 ，一定 為 恩相 誓死 效力 。
梁中書 好 歡喜 ，就 賞賜咗 一副 盔甲 畀 佢 。
第日一早 ，當時 正係 二月中旬 ，風和日暖 ，天氣啊 非常之好 。
梁中書 食完 早飯 ，帶住 楊志 上咗 馬 ，前呼後擁 ，一直就 去到 東郭門 教場 ，受到 大小 官員 軍卒 嘅 迎接 。
梁中書 去到 演武廳 前面 落咗 馬 ，上咗 廳 ，喺 正面 擺住 嗰 張 渾銀 交椅 上面 坐落 。
喺佢嘅 兩便 呢 ，齊齊整整 噉 排住 兩行 官員 ：指揮使 、團練使 、正統使 、統領使 、牙將 、校尉 、正牌軍 、副牌軍 。
另外 喺 前後 周圍 ，精精神神 噉 排列住 成百個 將校 。
喺 正將台 上 便 呢 ，就 企住 兩位 都 監 ：一個 叫做 李天王 李成 ，一個 叫做 聞大刀 聞達 。
呢 兩個 人 呀 ，都 有 萬夫不當之勇 嘅 。
佢哋 所 統領 嘅 眾多 兵馬 ，一齊 都 嚟 朝住 梁中書 高呼 三聲 敬禮 。
呢個 時候 ，喺 將台上 便 ，豎起咗 一面 黃旗 。
將台 左右 兩便 就 排列住 嗰 四五十 對 金鼓手 ，沊沊沊沊沊 一齊 擂起 上嚟 。
吹咗 三通號角 ，擂咗 三通鼓 ，教場上 便 呀 ，邊個 仲 敢 出聲 啊嗰陣 。
然後 將 台上 便 呢 ，豎起 一面 淨平 旗 嘞 ，前後 五軍 ，一齊 整肅 。
跟住 將 台上 便 ，揮舞起 一面 引軍 紅旗 ，只 聽見 鼓聲 響處 ，五百 軍 排列 成 兩個 陣 ，啲 軍士 嘅 手上 都 執住 器械 。
接住 將 台上 又 揮動 起 一面 白旗 ，兩陣 嘅 馬軍 ，都 齊齊整整 噉 ，企 喺 面前 ，將 馬 勒 定 。
梁中書 傳 下 命令 ：叫 副牌軍 周謹 上前 聽令 。
喺 右陣 裏 便 ，周謹 聽聞 叫 佢 唄 ，就 策馬 嚟到 演武廳 前 便 ，跳落馬 ，插好 支 槍 ，打雷噉聲 敬咗 個 禮 。
梁中書話喇 ：命令 副牌軍 ，施展 本身 武藝 。
周謹得咗將令 ，揸住槍上馬 ，喺演武廳前便 ，左盤右旋就右盤左旋 ，將支槍呀使咗幾路 ，大家都喝彩 。
梁中書 又 話 ：叫 東京 對撥 嚟 嘅 軍健 楊志 。
楊志行 上嚟 演武廳 ，敬咗 禮 。
梁中書話 ：楊志 ，我 知道 你 原本 係 東京 殿司府 制使 軍官 ，因為 犯罪 刺配 嚟到 呢處 。
目前盜賊猖狂 ，國家正係用人嘅時候 ，你敢唔敢 同周謹比一比武藝嘅高低啊 ？
你 如果 贏咗 ，就 升 你 做 佢 嘅 職務 。
楊志話 ：承蒙 恩相 差遣 ，不敢 違抗 。
好！
於是 梁中書 就 叫 人 牽咗 一匹 戰馬 嚟 ，又 叫 甲仗庫 嘅 隨行 官吏 ，配備 軍器 ，等 楊志 披掛 上馬 同 周謹 比武 。
楊志 去到 演武廳 後便 ，領咗 衣甲 穿着 好 ，扎好晒 喇 ，戴上咗 頭盔 ，攞齊 弓箭 腰刀 ，手執 長槍 上咗 馬 ，喺 演武廳 後便 跑出嚟 。
梁中書 見 佢 裝束 好嘞 ，就 話 ：
命令 楊志 同 周謹 先 比 槍 。
周謹 就 睇 楊志 唔起 喎 ，佢 好 嬲 噉 話 ：
呢個 賊 配 軍 ，竟然 膽敢 同 我 比 槍 ？
周謹 、 楊志 兩個 都 勒住 馬 ， 企 定 喺 軍旗 下 便 都 準備 出戰 交鋒 嘞 。
只見 兵馬 都 監 聞達 ，大喝 一 聲 話 ：咪住 ！
佢 上嚟 演武廳 稟告 梁中書 話 ：
恩相 呀 ， 佢 哋 兩個 比試 武藝 ， 當然 要 見 個 本領 高低 ， 不過 槍刀 乃 係 無情 之物 啊 ， 只 係 宜於 用 嚟 殺 賊 剿匪 。
今日 ，乃係 軍內 自己 比武 ，你 話 有啲 損傷 ，輕則 殘廢 ，重則 致命 ，噉 就 於 軍 不利 咯 。
不如 除咗 兩支 槍 嘅 槍尖 ，用 氈片 包住 蘸咗 石灰 ，佢哋 兩人 都 着 件 黑衫 。
就係 用槍桿 嚟 打 ，身上 白點 多 嘅 就 為 輸 。
講得啱 ，講得啱 。
跟住 梁中書 就 傳令 落去 。
佢哋 兩個人 接到 命令 ，就 走去 演武廳 後便 ，除咗 槍頭 ，都 用 氈片 嚟 包住 ，扎成 一嚿 罌噉 。
着上 一件 黑衫 ，將 支 槍 喺 個 石灰桶 處 蘸 一蘸 石灰 ，再 上返 馬 ，出到 嚟 陣前 。
令旗一揮 ，周謹 同 楊志 都 躍馬 挺槍 ，廝殺 起嚟 。
佢哋 喺 陣前 呀 來來往往 反反覆覆 ，打成 一 團 。
真係 鞍上 就 人 鬥 人 ，座下 就 馬 鬥 馬 ，兩個 人 鬥咗 四五十 個 回合 。
睇下 嗰個 周謹 呢 ，嗨呀 好似 成板 豆腐 跌落 地 噉 ，個 身上 呀 一擗二擗 白木木 ，約莫 有 三幾十 笪 。
睇下 楊志 呢 ，僅僅 喺 左膊下 便 有 一點 白唧 。
梁中書 好高興 ，叫咗 周謹 上嚟 演武廳 ，睇咗 佢 身上 嘅 石灰 痕 就 話 ：
前任 推薦 你 做 個 副牌 軍 ， 但 係 睇 你 噉 樣 嘅 武藝 ， 點樣 去 南征北戰 啊 ？ 又點 做 得 個 名副其實 嘅 副牌 軍 呢 ？
於是呢 ，就 叫 楊志 去 頂替 佢 嘅 職務 咯 喎 。
點知 兵馬 都 監 李成 上嚟 演武廳 稟告 話 ：
周謹 係 槍法 生疏 ，不過 弓馬 熟練 ，如果 就噉樣 免咗 佢 嘅 職務 ，恐怕 影響 軍心 。
好唔好 叫 周謹 再 同 楊志 比 下 箭 呢 ？
好 ，有道理 。
梁中書 再次 下 命令 ，叫佢哋 兩個 比 箭 。
兩個人 接到 命令 ，都 放低 支槍 ，領咗 弓箭 。
楊志 啊 攞 起 張 弓 ， 開 咗 幾下 ， 啱 用 喇 ， 就 跳 上馬 跑 到 演武廳 前 便 ， 喺 馬 踏 凳 處 企 起身 ， 欠身 稟告 話 ：
恩相 ， 弓箭 一發 ， 事 不 容情 ， 恐怕 會 有 損傷 ， 請恩相 指示 。
軍人 比武 ，怕 咩嘢 傷殘 呢 ？
只要 有 本事 ，射死 勿論 。
楊志 得咗 命令 就 返到 去 陣前 。
兵馬都監李成呢 ，就 叫人 攞咗 擋箭牌 嚟 ，每人 畀 一面 ，愛 嚟 防護 身體 。
兩個人 領咗 擋箭牌 ，就 箍住 喺 個 手臂 上面 嚟 。
楊志 話 喇 ：你 射 我 三箭 先 ，然後 到 我 射返 你 三箭 。
周謹 聽咗 ，啱晒咯 ，佢 真係 恨不得 一箭 就 將 楊志 射穿 個 大窿 。
之 楊志 畢竟 係 個 軍官 出身 啊 ，本領 高強 ，睇穿 佢 嘅 手段 ，根本 就 冇 當 佢 係 嘢 。
呢個 時候 ，將 台上 便 ，將 一面 青旗 揮動 ，開始 嘞 。
楊志 拍馬 向住 南 便 跑過去 ，周謹 策馬 趕過嚟 。
佢 將 條 韁繩 搭 喺 馬鞍 鞽 上 便 ，左手 拿 弓 ，右手 搭 箭 ，拉到 滿滿噉 ，對住 楊志 後心 ，𠻘噉 一箭 。
楊志 聽到 背後 弓弦 響 ，輯噉 一閃 ，嚟 一個 鐙 裏 藏身 ，嗰支 箭 就 射咗 個 空 。
周謹 見 一箭 射唔中 ，個心 就 慌嘞 ，急急 再 喺 箭壺 掹出 第二支箭 ，搭上 弓弦 ，睺準 楊志 ，向住 後心 再 射 一箭 。
楊志 聽到 第二 支 箭 嚟 ，呢次 就 唔係 鐙 裏 藏身 嘞 ，嗰 支 箭 好似 風 咁 快 飛緊嚟 㗎 嘛 。
楊志 亦 攞起 張 弓 ，用 弓梢 輕輕 一撥 ，嗰支 箭 就 𠻘𠻘𠻘𠻘𠻘𠻘𠻘 ，噉 就 撥咗 去 草地 。
周謹 見 第二 支 箭 又 射唔中 ，個 心 就 更 慌 啦 。
呢個 時候 ，楊志 匹馬 呢 ，早就 跑到 去 教場 盡頭 嘞 。
佢 喇 一下 ，將 隻 馬 一兜 ，嗰 隻 馬 就 轉身 向住 正廳 嗰便 跑返去 。
周謹 亦 都 將 隻 馬 一勒 ，跑 返 轉頭 ，趁勢 就 追 過去 。
哎呀 喺 教場 嗰 片 綠茸茸 嘅 草地上 呀 ， 八隻 馬蹄 ，𠽤 哩 𡃈𠽤 哩 𡃈𠽤 哩 𡃈𠽤 哩 𡃈𠽤 哩 𡃈𠽤 哩 𡃈 跑 到 飛 咁 快 。
周謹 再 攞 第三 支 箭 ，搭 喺 弓弦 上 便 就 拉到 滿一滿 ，出盡 平生 嘅 氣力 ，眼 甘甘噉 望 實 楊志 嘅 背枚 ，一箭 射 個 去 。
楊志 聽到 弓弦 響 ，一擰轉身 ，就 坐 喺 馬鞍 上 將 嗰支 箭 一撈 就 撈住 喺 手 嚟 ，就 縱馬 跑到 演武廳 前面 擗低 周謹 嗰支 箭 。
梁中書 見到 大為 高興 啦 ，即刻 就 落 命令 ，叫 楊志 亦都 射 周謹 三 箭 。
將台上 ，又 將 嗰面 青旗 揮動 嘞 。
周謹 掉低咗 弓箭 ，攞起 個 擋箭牌 ，一拍 隻 馬 ，向住 南 便 就 跑過去 。
楊志 喺 馬上 ，將 條 腰 一 縱 ，稍為 將 對 腳 一 拍 ，嗰 隻 馬 就 𡃈𡃈 聲 就 追 上去 。
楊志 先 將 把 弓 噠噉 虛 拉 一拉 。
周謹 聽到 腦後 弓弦 響唄 ，即刻 就 扭轉 身 ，舉起 個 擋箭牌 就嚟 擋 咯 喎 哈哈 點知 擋 個 空 。
周謹 就 諗喇 ：哼哼 ，嗰個 傢伙 淨係 會 使 槍 嘅 啫 ，唔識 射箭 嘅 。
等佢 第二 支 箭 再 裝 假狗 個 時候 呢 我 就 喝住 佢 ，噉 就算 我 贏 啦 嘛 。
一於 係 噉啦 。
周謹 諗得嚟 ，佢 隻 馬 已經 跑到 教場 南便 嘅 盡頭 嘞 。
周謹 就 策馬 跑 返去 演武廳 。
楊志 見 周謹 跑 返轉頭 唄 ，佢 亦都 策馬 返轉頭 追過去 。
佢 掹出 一支箭 ，搭 喺 弓弦 上便 ，佢 諗 ：
如果 射中咗 佢 嘅 後心 ，必定 會 攞 佢 條命 嘅 。
之佢 同 我 又 無 冤 無 仇 㗎 ，唔好 喇 ，我 射 佢 唔 致命 嘅 地方 就係 喇 。
嘿 ，你 睇 楊志 ，左手 如 托 泰山 啊 右手 如 抱 嬰孩 ，弓開 如 滿月 就 箭 去 似 流星 。
真係 說時遲那時快喎 ，一箭 就 正正 射中 周謹 嘅 左膊 。
周謹 措手不及 ，哎吖 一聲 就 翻身 落馬 。
嗰 匹 空 馬 就 一直 跑 返 去 演武廳 後 便 啦 。
見到 周謹 中咗 箭 落馬 ，好多 兵卒 趕過去 救護 佢 。
梁中書見 楊志 比箭 又贏 咗 就 滿心 高興 ， 即刻 叫 軍政 司立 個案 ， 命令 楊志 代替 周 謹 嘅 職務 。
楊志 喜氣洋洋 ，落咗 馬 ，就 行嚟 演武廳 前面 拜謝 恩相 ，準備 接 周謹 嘅 職位 嘞 喎 。
點知道 台階下 便 ，左手邊 ，有 一個 人 行出嚟 大聲 噉 話 ：
唔好就職住 ，我 同 你 兩個 比 下 武 先 ！
楊志 睇下 呢個人 ，只見 佢 嘅 身材 係 七尺 以上 咁 高矮 ，面 圓 耳 大 ，唇 闊 口 方 ，腮邊 一把 連 腮鬍鬚 ，真係 威風凜凜 ，相貌 堂堂 啊 。
佢 一直 行到 梁中書 面前 行咗 個 禮 就 稟告 話 ：
周謹 因為 有病 ，未好得晒 ，精神唔好 ，所以 ，一時 誤輸 咗 畀 楊志 。
小將 不才 ，願意 同 楊志 比武 。
如果 小將 有 半點 輸蝕咗 畀 楊志 ，咪話 叫佢 接替 周謹 ，就係 叫佢 接替咗 小將 嘅 職務 ，我 死而無怨 ！
梁中書 一 睇 ，唔係 邊個 ，原來 係 大名府 留守司 正牌 軍 索超 。
為因佢嘅為人性急啊 ，好似 揦鹽落火噉 。
佢 為咗 國家 嘅 面子 ，一味 要 爭啖氣 嘅 ，打起 仗 嚟 總係 一馬當先 ，所以 人人 都 叫 佢 做 急先鋒 。
李成 聽見 索超 噉 講 ，就 喺 將台 落嚟 一直 行到 演武廳 前 便 稟告 話 ：
相公 ，楊志 既然 係 殿司制使 ，梗係 好武藝 嘅 ，周謹 當然 唔係 佢 嘅 對手 ；
同索超比武 就啱嘞 ，一比就分得出 優劣 喇 。
梁 中書 聽咗 個 心 就 想 ：
我 指望 一力 抬舉 楊志 ，點知 咁多 將官 唔服 。
好啦 ，一於 等 佢 贏埋 索超 ，噉 佢哋 就 死 而 無 怨 再冇 話 講 喇 。
於是 梁中書 就 嗌 楊志 上嚟 演武廳 問 佢 話 ：
你 同索超 較量 下 武藝 呢 ， 好 唔 好 啊 ？
恩相 有 令 ，不敢 違抗 。
既然 噉 樣 ， 你 去 後 便 換個 裝束 ， 好好 噉 披掛 ， 叫甲仗 庫 嘅 隨行 官吏 攞 應用 嘅 軍器 畀 你 ， 同時 就 叫 牽 我 個 戰馬 ， 畀 你 嚟 騎 。
要 小心 在意 ，唔好 睇得 隨隨便便 喇 。
係 ，多謝 恩相 。
楊志 就 走去 裝束 嘞 。
呢頭呢 ，李成 就 吩咐 索超 話 ：
你唔同第個人啊 ，周謹 係 你嘅 徒弟 已經 輸咗 在先 嘞 。
你 如果 有 咩 疏忽 ，就會 畀 佢 將 大名府 嘅 軍官 都 睇輕 晒 㗎 喇 。
我 有 一匹 上慣 戰陣 嘅 戰馬 ，仲有 一副 披掛 都 借畀 你 ，小心 在意 ，千祈 唔好 輸 啊 。
索超多謝過李成之後 ，就 走去 裝束 。
梁中書 就 嫌 坐 喺 廳 裏頭 都 睇得 唔係 好 清楚 ，佢 企 起身 行 到 台階 前 便 。
啲隨從 就 搬咗 嗰張 銀交椅 出嚟 擺 喺 月台 嘅 欄杆 旁邊 。
梁中書 坐返落 ，啲 隨從 分 兩 行 企 定 喺度 侍候 。
嗰個 打羅傘 嘅 ，撐開 嗰 頂 大 羅傘 喺 梁中書 嘅 背後 遮住 陰 。
跟住 將 台上面 傳落 命令 ，揮動 紅旗 。
兩邊 當堂 金鼓 齊鳴 啊 ，就 擂起 第一 通 戰鼓 。
噉喺 教場 上 便 兩陣 之內 呢 ，轟 ，轟 ，就 各 放 一炮 。
炮 聲響 處 ， 索超同 楊志 分別 跑馬 入陣 ， 藏 喺 門 旗下 便 。
將台上便跟住揮動黃旗 ，擂起 第二通 戰鼓 ，兩軍 一齊 喎嗬噉 吶喊 一聲 。
教場上便 ，再冇人 敢 出聲 ，靜嚶嚶噉 ，真係 跌眼針落地 都 聽得見 。
再 一聲 鑼 響 ，扯起 淨 平白 旗 。
兩便 所有 嘅 將官 冇 一個 敢 走動 冇 一個 敢 講 說話 ，靜靜 噉 企 喺度 。
將台上便 ，又 將 青旗 揮動 喇 ，擂起 第三 通 戰鼓 ，左邊 陣 內 嘅 門旗 一 分 。
只見 掛喺 馬頸 上 嘅 銀鈴 一 響 ，正牌 軍索 超 ，策馬 就 直到 陣前 。
只見佢 頭戴 一頂 熟鐵 獅子盔 ，腦後 就 斗咁大 一朵 紅纓 ，身披 一副 鐵葉 穿成 嘅 鎧甲 ；
腰扎 一條 鍍金 獸面 束帶 ，前後 兩面 青銅 護心鏡 ；
罩住 一 領 緋紅 團花 袍 ，髧住 兩 條 綠 絨 縷 頷帶 ；
下穿 一雙 斜皮 氣跨靴 ，左 帶 一張 弓 右 懸 一壺 箭 ；
手 拿 一 柄 金 蘸 斧 ，坐下 李 都監 嗰 匹 慣 戰 能 征 嘅 雪白 馬 。
佢 兜住 隻 馬 ，企定 喺 陣前 。
嘩 ！果然 係 英雄豪傑 啊 ！
喺 右邊 陣 內 ，門 旗 一 分開 ，銀鈴 響 處 ，楊志 就 躍馬 嚟到 陣前 。
只見 佢 頭戴 一頂 鑌鐵 盔 ， 上 便 插住 一朵 青纓 ；
身穿 一副 鉤嵌 梅花 榆葉 甲 ，束 一條 紅絨 腰帶 ，前後 獸面 掩 心 ；
上罩 一領 白羅 生色 花袍 ，髧住 條 紫絨 飛帶 ；
腳 穿 一 雙 黃皮 襯底 靴 ；
一張 皮靶弓 ，幾支 鑿子箭 ；
手上 ，挺住 渾鐵 點 鋼槍 ；
騎嘅係 梁中書 嗰 匹 ，火塊 赤千里 嘶 風馬 。
兩便嘅 軍將 ，見到 索超 同 楊志 各自 勒馬 陣前 ，都 暗暗 喝彩 。
有個 旗牌官 ，喺 正南方 啊 揸住 一支 銷金令字旗 ，飛馬 噉 嚟到 陣前 大聲 宣佈話 ：
奉 相公 命令 ，叫 你哋 兩個 都 要 用心 ，如 有 錯誤 定 行 責罰 。
如果 贏咗 ，重重 有賞 。
兩個人 一 接到 命令 ，就 縱馬 出陣 ，跑到 教場 中心 。
只見 兩 馬 相交 ，兩件 兵器 咣聲 就 打起 上嚟 。
哎呀 呢個 啊 一斧 劈落 頭殼 ，嗰個 啊 一槍 直插 心窩 。
呢個 嘅 斧刃 閃 幾道 寒光 ，嗰個 嘅 槍尖 吐 一條 火焰 。
一來一往 啊 一去 一回 ， 四條 手臂 縱橫 就 八隻 馬蹄 繚亂 啊 。
兩個 鬥 到 五十幾個 回合 都 不分 勝敗 。
梁中書 坐 喺 月台 上 便 就 睇到 眼 都 定晒 。
兩邊 兩便 嘅 軍官 一字 睇 ，一字 就 猛咁 喝彩 。
陣上 嗰啲 軍士 呀 大家 都 話 喇 ：
我哋 當咗 咁多年 兵 ，亦都 出過 幾次 征 打過 幾次 仗 ，幾時 見過 咁 犀利 嘅 一對 好漢 廝殺 吖 ！
李成 、聞達 兩個 喺 將台 上 便 ，亦 不停口 噉 讚 ：好厲害呀 ，好厲害啊 ！
