而家 講 下 朱貴 呀 帶住 林沖 ，就 一直 嚟到 聚義廳 。
只見 中間 有 把 交椅 ，坐住 一個 好漢 ，呢個 就係 白衣 秀士 王倫 嘞 。
坐喺 左便 嗰 把 交椅 嘅 呢 ，係 摸着 天杜遷 。
坐喺 右便 嗰 把 交椅 嘅 ，係 雲裏 金剛 宋萬 。
朱貴 同 林沖 上前 行咗 禮 。
林沖 就 企 喺 朱 貴 側 跟 ， 朱貴 就 介紹 話 ：
呢位 就係 東京 八十萬 禁軍 教頭 ，姓 林 名 沖 ，綽號 豹子頭 啊 。
因為 畀 高太尉 陷害 ，刺配 滄州 ，喺 嗰度 又 畀 火 燒咗 大軍 草料場 ，忍唔住 就 殺咗 三個 仇人 ，趯咗 去 柴大官人 屋企 ，好 得到 敬重 嘅 。
所以 柴大官人 特登 寫咗 封信 嚟 ，舉薦 林沖 入夥 啊 。
林沖 聽 朱貴 介紹完 啊 ，就 攞 封信 出嚟 遞畀 王倫 。
王倫接 咗 信 拆開 嚟 睇 咗 ， 就 請 林沖 坐 第四位 交椅 ， 朱貴 就 坐 喺 第五位 嚟 。
王倫 叫 小 嘍 啰 攞 酒 嚟 ， 飲過 三巡 ， 王倫 就 問起 柴大官人 嘅 近況 。
林沖 就 回答 話 ：佢 每日 都 係 去 郊外 打獵 玩 下 啫噉 。
王倫 同 林沖 講講下 ，嘿 忽然間 諗起 ：
我係 個 不及第 考唔取 嘅 秀才 ，因為 鬥氣 ，就 夾埋 杜遷 嚟 呢度 落草 ；
跟住 就 宋萬 嚟 ，聚集 咗 咁 多人馬 。
我 又 冇 好叻 嘅 本事 ，杜遷 、宋萬 嘅 武藝 亦都係 平常 嘅 啫 。
而家 多咗 呢個 人 ，嗯 ，佢 係 京師 嘅 禁軍 教頭 ，必定 係 好 武藝 㗎 嘞 。
噉 第日 如果 畀 佢 睇穿咗 我哋 個 底 ，佢 掗拃 起 上嚟 噉 我哋 點 對付 佢 好 啊 ？
唔 係 咯 ， 至多 係 怪 我 一次 係 啦 ， 搵 啲 理由 推 咗 佢 ， 打發 佢 落山 返扯 好過 喇 ， 免留 後患 啊 。
不過 就係 太過 唔畀面 柴進 就係 咯 ，好似 忘記咗 佢 以前 嘅 恩德 噉 。
哼 ，不過 事到如今 ，亦 唔顧得 咁多 喇 。
當時 王倫 諗定咗 主意 ，就 吩咐 小嘍啰 安排 酒席 ，請 林沖 赴宴 咯 喎 。
就嚟飲完嘅時候 ，王倫 叫 小嘍啰 用 個 托盤 裝住 五十 兩 白銀 ，兩匹 紵絲 攞出嚟 。
王倫 企起身 話 ：柴大官人 舉薦 教頭 嚟到 敝寨 入夥 ，我哋 好 高興 。
無奈 敝寨 糧食 缺少 啊 ，房屋 就 殘舊 ，人力 寡薄 ，恐怕 日後 誤咗 足下 就 唔好 喇 。
呢度 有 啲 薄禮 請 足下 笑納 。
另外 去 搵 個 大寨 安身 歇馬 ，誒 千萬 唔好 見怪 啊 。
三位 頭領 ，想 我 林沖 千里 投名 ，萬里 投主 ，得到 柴 大官人 畀 面 ，介紹 嚟 投奔 貴 寨 入夥 。
林沖 雖然 冇 咩 才學 ，切望 頭領 開恩 收錄 。
以後 定當 一死 向前 ，為 山寨 效力 ，呢個 至 係 我 林沖 平生 之 幸 ，而 並非 為咗 銀兩 禮物 而嚟 ，請 頭領 明察 啊 。
我呢度 係 個 小地頭 ，點 擺得落 你 㗎 ？
真係唔好見怪呢 ，吓 。
朱貴 見到 噉樣 就 勸 王倫 話 喇 ：大哥 ，請 你 唔好 怪 小弟 多嘴 。
我哋 山寨 嘅 糧食 雖然 係 少 ，之 近 村 遠 鎮 都 可以 去 借 ；
山場水泊 ，大把 樹木 ，就算 要 起 一千間 房屋 都 唔使 憂 ；
呢位 係 柴大官人 一力 舉薦 嚟 嘅 人 ，點好 話 叫佢 去 第處 呢 ？
況且 柴 大官人 一向 對 山寨 有 恩 ，以後 知道 我哋 唔收 佢 喎 ，噉 面子上 就 過唔去 啦 。
呢位 又係 個 有本事 嘅 人 ，佢 必定 會 為 山寨 出力 嘅 。
杜遷 亦 接住 話嘞 ：山寨 裏頭 邊度 爭 在 佢 一個 吖 ！
阿哥 你 如果 唔 收留 佢 ，柴大官人 知道咗 ，實會 怪 我哋 㗎嘛 ，顯得 我哋 呀 好 忘恩負義 噉 。
我哋 以前 好彩 多得 佢啫 ，噉 人哋 今日 舉薦 個人 嚟 ，唔通 就噉 推咗 人 ，打發 人哋 走 ？
宋萬 亦 都 勸 王倫 話 ：睇在 柴大官人 嘅 面子 ，留 佢 喺度 做 個 頭領 亦好 嘅 。
如果唔係 ，就 顯得 我哋 冇 啲 義氣 ，盞 畀 江湖 上 嘅 好漢 笑話 㗎啫 。
王倫 就 話 喇 ： 唉 各位 兄弟 你 哋 唔 知 啊 ， 佢 喺 滄州 雖然 係 犯 咗 彌天大罪 啫 ， 之 今日 佢 上山 ， 唔 知 佢 個 心 係 點 㗎 嘛 。
如果 佢 係 嚟 探聽 虛實 嘅 ，吖噉啊 點啊 ？
林沖 見 王倫 噉 講 就 話 喇 ：小人 犯 咗 死罪 所以 投奔 嚟 入夥 嘅 ，點解 會 疑心 我 呢 ？
既然 係噉 ，你 如果 真心 入夥 嘅 就 攞 個 投名狀 嚟 啦 ！
好 ，小人 都 仲 識 幾個 字 嘅 ，請 攞 紙筆 嚟 畀 小人 寫 啦 。
哈哈哈哈哈 ，教頭 你 會 錯意 喇 。
朱貴 就 笑住 話 喇 ：
但凡 好漢們 嚟 入夥 呢 ，都 要 交 投名狀 嘅 ，即係 叫 你 落山 去 殺 一個人 ，將 佢 個人頭 獻上嚟 ，噉 大家 就 唔 疑心 你 㗎 喇 。
呢個 就 叫做 投名狀 。
哦 ，噉啊 ，噉 亦唔難 。
小人 落山 去 等 就係 嘞 ，就係 怕 冇人 過 唧 。
王倫 話 ：我 畀 三 日期限 過 你 。
如果 三日 之內 有 投名狀 嚟 就 收 你 入夥 ；
如果 三日 內 都 冇 嘅 時候 ，噉 就 請 你 唔好 見怪 喇 。
當時 林沖 應承咗 就 返去 客房 休息 ，個心呀 ，愁悶 到 極 。
散咗席之後呢 ，朱貴 亦 辭別咗 幾位 頭領 ，就 落山 返去 看店 嘞 。
當晚 ，林沖 喺 客房 住咗 一 晚 。
第朝早 ，食咗啲飯 ，帶咗把腰刀 揸住把朴刀 ，叫個小嘍啰 帶路 落山 ，就 用隻艇 扒過去 ，喺 一條 僻靜 嘅 小路 處 等 人 過 咯 喎 。
啊點知 從朝到晚 ，等咗 一日 ，都冇 一個 單身客 經過 。
林沖 悶悶不樂 ， 只有 同個 小 嘍 啰 過返島 ， 返到 去 山寨 係 啦 。
王倫 就 問 佢 話 ：投名狀 喺 邊度 嚟 啊 ？
今日 都 冇 個人 過 ，所以 攞唔到 啊 。
你 聽日 如果 仲 冇 投名狀 個 時候 ，嘿嘿 ，亦 好 難 留 喺 呢處 咯 。
林沖 唔敢 出聲 ，個心啊 ，翳到 不得了 。
返到 客房 ，求其 攞 啲 飯 食咗 就 瞓 ，噉 又 過咗 一 晚 。
第日 一 早 就 起身 ，同 小嘍啰 食咗 早飯 ，攞起 把 朴刀 又 試 落 山 嘞 。
小嘍啰 話 ：我哋 今日 去 南山 嗰 條 路 等 啦 。
兩個人 去到 一座 樹林 裏 便 ，潛伏 喺度 等 嘞 。
哈 ，又係 一個 都 唔見過 噃 。
伏到午牌嘅時候 ，即係 中午 嘞 ，有人 過 喇 。
幾多 人 呢 ？ 哈 ， 一大 班人 ， 約莫 三百 零人 左右 啦 ， 成群 結隊 噉 一齊 行過 嚟 。
林沖 就 梗係 唔敢 逳手 定 㗎 啦 只有 眼白白 睇住 佢哋 行過 就 算嘞 。
又等咗一輪 ，睇下 個 天色 已經 好 晏 喇 ，又係 一個 都 唔見 有 客人 過 。
林沖 就 對 小嘍啰 話 ：點解 我 咁 晦氣 㗎 ，等咗 兩日 喇 ，都 唔見 有 一個 孤單 客人 過 ，噉 點 好 呢 ？
大哥 你 放開 心事 啦 ，聽日 仲有 一 日期限 啦嘛 ，我 同 大哥 你 去 東山 嗰 便 路 等 。
當晚 ，林沖 照舊 兩手 空空 返上山 。
王倫 問 佢 話 ：今日 投名狀 點 啊 ？
唉！
嘿嘿 ，睇嚟 今日 又 冇 喇嚱 ？
我 同 你 講過 三日 為限 ，今日 已經 兩日 喇喎 。
如果 聽日 仲係冇 ，噉 就 不必 再見面 喇 ，就 請 你 落山 去 投奔 第處 啦 。
林沖 返到 入 房 ，個 心 啊 確實 係 愁悶 到 極 。
佢 不覺 仰天 長歎 話 ：
唉 ，想唔到 我 畀 高俅 嗰個 惡賊 陷害 ，流落 到 嚟 呢處 ，連 天地 都 唔 能夠 容納 我 。
唉 ，乜 真係 咁 時乖命蹇 吖 我 ！
過咗 一晚 ，第日 天光 起身 ，攞 啲 飯 食咗 ，打好 個 包裹 就 放 喺 間 房 嚟 。
掛起 把 腰刀 ，揸住 把 朴刀 ，又 同 小嘍啰 落山 過渡 去 東山 嗰 條 路 嘞 。
林沖話 ：我 今日 如果 仲 攞唔到 投名狀 ，只有 去 第處 安身立命 咯 。
兩個人 嚟到 東路 一座 樹林 裏 便 潛伏 喺度 等候 。
等下等下 ，眼睇住 日頭 到咗 頭殼頂 ，仲係 一個人 都冇見 。
當時 正係 殘雪 初晴 啊 ，天色 好 明朗 ，林沖 揸住 把 朴刀 對 個 小嘍啰 話 ：
睇嚟 又 冇 聲氣 ，不如 趁早 返去 攞咗 行李 ，去 第處 搵 個 地方 罷啦 。
哈 ，話口未完 ，小嘍啰 用 手指 住 前面 話 ：好喇好喇好喇 ，嗱 ，嗰 便 唔係 有 個人 嚟 嘞 咩 ？
林沖 一 睇 ，嗌咗 一 聲 話 ：嘿 ！好彩啊 ！
只見 有 個人 擔住 擔嘢 ，喺 山坡 下 便 行緊 過嚟 。
等嗰個人 行得 比較 近 喇 ，林沖 將 把 朴刀 瀡噉 揮 一下 突然 啪聲 喺 樹林 裏 便 跳出嚟 。
嚟緊 嗰個人 見到 林沖 衝出嚟 唄 ，哎呀 一聲 掉低 擔嘢 轉身 就 走 。
林沖 就 猛追 過去 啦 ，仲 邊度 追得到 吖 。
林沖 就 話 ：你 睇 ，我 條命 苦唔苦 呢 ？
嚟咗 三日 啱啱 等到 一個人 嚟唧 ，又 畀 佢 走咗 。
教頭 ，雖然 殺唔到 人 啫 ，不過 有 呢一擔 財物 就 可以 頂得當 啦嘛 。
你 擔 上 山 先 ，我 喺度 再 等 一下 。
於是 小嘍啰 就 將 擔嘢 擔 返 上山 先 。
喺 呢個 時候 ，喺 山坡 下 便 有 個人 行 出嚟 嘞 。
林沖 一見 ，佢 就 話 ：嘿 ！真係 天賜 其便 啊 呢趟 。
嗰個人 ，揸住 把 朴刀 ，行 雷噉 聲 喺度 大叫 話 ：
潑賊 ！你 呢班 殺唔盡 嘅 賊佬 ，搶咗 我 嘅 行李 去 邊度 啊 ？
我 正係 要 嚟 捉 你哋 呢班 傢伙 呢 ，居然 走嚟 拔 老虎鬚 ？
佢 一便 嗌 一便 飛噉 跑過嚟 。
林沖 睇下 嗰個人 ，只見 佢 頭戴 一頂 范陽氈笠 ，上面 插住 一執 紅纓 嘅 ；
身穿 一領 白緞 征衫 ，束 一條 縱線 腰帶 ，打住 青白相間 嘅 腳繃 ，着 一對 獐皮 襪 ，牛皮 靴 ；
掛住 把 腰刀 ，揸住 把 朴刀 ；
生 得 七尺 五六 身材 ， 喺 個 面 處 ， 有 一沓 青色 嘅 好 大 嘅 痔 ， 腮邊 呢 稍 為 有 啲 赤色 嘅 鬍鬚 。
佢 一嚟到 ，就 將 頂 范陽氈 笠 一 掀 ，就噉 掛 喺 背脊 處 ，打開 胸 ，挺住 嗰 把 朴刀 ，大聲 噉 喝 林沖 話 ：
你 呢 個 潑 賊 ！ 將 我 嘅 行李 財物 攞 咗 去 邊 啊 ？
林沖 早就 唂 到 成肚氣 㗎 喇 ， 講多句 都 唔 想 啊 。
佢 碌 大 雙眼 ，鬍鬚 都 豎起晒 ，挺住 把 朴刀 衝 上嚟 鬥 嗰個 大漢 咯 喎 。
一來一往 ，鬥咗 三十幾個 回合 仲係 不分勝負 。
兩個 又 鬥咗 十幾個 回合 ，只 聽見 喺 個 山 上面 有人 嗌話 ：兩位 好漢 唔好 打 喇 ！
林沖 一 聽見 就 啪聲 一下 跳出 圈外 。
兩個人 都 收咗 刀 ，睇下 個 山 上 便 ，哦 ，原來 白衣 秀士 王倫 、杜遷 、宋萬 ，同埋 好多 嘍啰 落 緊 山 嚟 。
佢哋 坐 船 過咗 河 ，王倫 就 話 ：
兩位 好漢 ，你哋 把 刀 使得 真係 好 ，神出鬼沒 啊 ！
呢個 係 我 嘅 兄弟 豹子頭 林沖 。
喂 ，青面漢 ，你 係 咩嘢 人 ？叫做 咩嘢 名 啊 ？
我係 三代 將門 嘅 後代 ，五侯 楊令公 嘅 孫 ，姓 楊 名 志 。
流落 喺 呢度 關西 嚟 。
年輕 嘅 時候 我 考過 武舉 ，官職 做到 殿司制使官 。
道君皇帝 因為 要 起座 萬歲山 ，派咗 十個 制使 去 太湖 邊 ，搬運 花石綱 ，要 運返 去 東京 交納 。
點知 我 行咗 衰運 ，押住 嗰啲 花石綱 嚟到 黃河 ，遇到 風 沉咗 船 ，啲 花石綱 全部 冇晒 。
我 又 唔 敢 返去 東京 啦 ，就 趯咗 去 第二處 避難 。
而家 赦免咗 我哋 嘅 罪 嘞 ，我 就 帶咗 一擔 積蓄 返嚟 嘅 財物 ，準備 搦 到去 東京 喺 樞密院 嚟 做 使用 ，再 搞返 我 原來 嘅 官職 。
今日 喺 呢處 經過 ，我 請咗 個 莊客 同 我 擔 嗰 擔 財物 ，點知 啊 畀 你哋 搶咗 。
唔該 還返畀 我 呢 ，點啊 ？
王倫話 ：你個綽號 係唔係 叫做 青面獸 ？
冇錯 ，就係 我 。
既然 係 楊制使 ，噉 請 去 我哋 山寨 飲 三杯 水酒 ，然後 送還 行李 好唔好 吖 ？
好漢 ， 你 既然 認得 我 咯 ， 就 唔 該 你將 啲 行李 還返 畀 我 ， 噉 仲好過 請 飲酒 啦 。
楊制使 ，幾年 之前 小可 去 東京 考 武舉 嘅 時候 ，就 聽聞過 制使 你 嘅 大名 。
今日 咁好彩 能夠 見到面 ，點 能夠 叫 你 空手 去 呢 ？
誒就係 請上去 山寨 聚會 一下 ，並冇 其他 意思 。
楊志 聽 佢 噉 講 ，只有 跟埋 王倫 一班人 過咗 河 ，上去 山寨 啦 。
同時 呢 ，王倫 又 吩咐 人 去 請埋 朱貴 一齊 上山 相會 。
各位 ， 楊志 先頭 講啊 ， 話 道 君 皇帝 要 起座 萬歲 山 ， 楊 志 佢 又 去 運 花石綱 等等 。
噉啊究竟係一回咩嘢事呢噉 ？
原來啊 ，嗰個 道君皇帝 ，即係 宋徽宗 咯 。
佢 喺 公元 一千一百 一 十七年 嘅 時候 ， 即 係 離開 而家 八百 六十多年 ， 佢 啊 抽調 咗 無數 咁 多 民工 ， 喺 東京 ， 即 係 而家 河南 開封 ， 要 冧 一座 大山 ， 改個 名叫 萬歲 山 。
要堆 一座 山 ，淨係 搵 啲 泥 嚟 堆 就 唔夠 靚 㗎 ，梗係 仲要 搵 好多 奇花異石 嚟 裝飾 佢 噉至 好睇 㗎 。
所以 皇帝 呢 就 落 命令 ，要 向 南方 嚟 搜刮 咯 喎 ，刮到 就 搬運 返 去 東京 。
當時呀 ，都唔知 害到 幾多人 家破人亡 。
噉喺 宋朝 嘅 時候 ，成幫 結隊 噉 嚟到 運輸 貨物 就 叫做 綱噃 。
當時 都 係 屬於 官差 性質 。
比如 講 運鹽 ，就 叫做 鹽綱 。
運茶葉 呢 就 叫做 茶綱 ，等等 。
花石綱 ，就 即係 運送 花石 咯 。
因為 道 君 皇帝 ， 喺 南方 搜集 啲 奇 花異石 ， 運去 東京 嚟 裝飾 萬歲 山 啦 嘛 ， 因此 呢 又 就 叫做 花石綱 嘞 。
呢 ，仲有 一種 生辰綱 添噃 ，呢啲 就係 同 皇帝 運輸 壽禮 。
噉呢啲 以後 呢 就 會 講到 㗎喇 ，而家 就 唔 講 佢 住 。
好 ，而家 講返 楊志 跟埋 王倫 佢哋 上山 。
佢哋 嚟到 聚義廳 ，左便 一迾 四張 交椅 ，係 王倫 、杜遷 、宋萬 、朱貴 。
右便 就 兩把 交椅 ，上首 係 楊志 下首 係 林沖 。
大家 坐落 之後 ，王倫 就 吩咐 劏羊 擺 酒 安排 宴會 就 款待 楊志 啦 。
飲咗 幾杯 之後 ，王倫 個 心 就 諗嘞 ：
如果 留林沖 喺 山寨 嚟 ，實映出 我哋 冇 料 㗎 。
嗯不如 我 做 個人情 ，留埋 楊志 喺 處 ，等 楊志 嚟 做 佢 嘅 敵手 頂住 佢 至 得 。
於是 王倫 就 指住 林沖 對 楊志 話 ：
呢個 兄弟 ，係 東京 八十萬 禁軍 教頭 ，叫做 豹子頭 林沖 。
因為 高太尉 呢 個 傢伙 都 唔 容得 落個 好人 嘅 ， 監硬 捏造 啲 罪名 嚟 冤 戾 佢 ， 將 佢 刺配 去 滄州 ， 喺 滄州 又 出 咗 事 ， 而家 ， 係 新 新 嚟 到 呢 處 。
先頭 聽制 使 你 講話 要 去 東京 搵 事 做 ，嗱 ，唔係 話 小可 有意 嚟 拉制 使 你 ，小可 尚且 要 棄 文 就 武 ，嚟 呢處 落草 。
何況 制使 仲 係 一個 有罪 之 人 添 ，雖然 話 已經 赦免 咗 喇 ，之 想 官復原職 就 好 難 好難 咯 。
而且 高俅 嗰個 傢伙 ，而家 掌握 軍權 ，佢 點 容得 落 你 㗎 。
不如 就 喺 小寨 歇馬 ，大秤 分 金銀 ，大碗 吃 酒肉 ，一齊 做好漢 ，唔知 制使 意下 如何 呢 ？
多謝 各位 頭領 咁 帶協 ，不過 我 有 個 親眷 ，佢 又 喺 東京 住 。
以前 因為 啲 公事 連累 咗 佢 ，一直 未曾 報答 。
而家 我要 去 佢 嗰處 一趟 ，希望 各位 頭領 將 啲 行李 還返 畀 我 。
如果 唔肯 還 ，噉 我 空手 亦都 要 去 。
哈哈哈哈哈 ，既然 制使 唔肯 留喺度 ，唔通 我哋 咁大膽 ，敢 逼 制使 入夥 咩 ？
哈哈哈 ， 請 你 放心 啦 ， 喺 度 住 一 晚 先 ， 聽朝 一早 起行 啦 。
楊志噉 就 好 歡喜 嘞 。
當晚 飲酒 飲到 一更 先至 散席 休息 。
第日 朝頭早 起身 ，又 擺 酒 同 楊志 送行 。
食咗早飯 ，幾位 頭領 叫 個 小嘍啰 ，同 楊志 擔起 擔 行李 一齊 送 楊志 落山 ，送到 去 路口 先至 分別 。
就叫 小嘍啰 呢 ，擔 行李 同 佢 過 河 送 佢 出 大路 。
王倫 佢哋 返到 山寨 之後 ，噉 先至 肯 收留 林沖 坐 第四 位 ，朱貴 就 坐 第五 位 。
從此之後呢 ，五個 好漢 喺 梁山泊 打家劫舍 ，呢啲 就 暫時 唔 講住 。
而家 只係 講返 楊志 啊 ，佢 出咗 大路 呢 ，就 搵到 個 莊客 嚟 擔 行李 ，打發咗 個 小嘍啰 返去 山寨 。
行咗 幾日 ，就 嚟到 東京 咯喎 。
入咗城 ，搵 間 客店 住落 ，畀 咗 工錢 個 莊客 就 打發 佢 走 。
過咗 幾日 ，佢 請咗 人 去 樞密院 同 佢 打點 。
佢 將 帶嚟 嗰啲 金銀財物 呀 ，買上買下 就 想 做返 殿司府 制使 職務 。
唉 ，將 帶嚟 咁多 嘢 ，都 用到盡 嘞 ，先至 同佢 整到 份 報告 帶 佢 去 見 殿帥 高太尉 。
嚟到 殿帥府 大堂 ，高俅 將 以前 整個 嘅 經過 報告 都 睇咗 ，發起 火 嚟 鬧 楊志 ：
既然 你哋 十個 制使 去 運 花石綱 ，九個 都 返到 京師 嚟 交納 喇 ，偏偏 係 你 呢個 傢伙 ，將 花石綱 失咗 。
又唔嚟自首報告 ，反而 逃跑咗 添 。
咁耐 都 捉 你 唔到 ，今日 仲 想 返嚟 做事 呀 ？哼 ！
雖然 你 嘅 罪 係 赦免咗 喇 ，但係 唔能夠 再 用 你 喇 ！
講完 ，將 份 報告 大筆一勾 ，唔批准 ，叫 左右 將 楊志 趕出 殿帥府 。
噉就冇行啦 ，楊志 啊 悶悶不樂 就 返到去 客店 。
佢 諗 ：王倫 勸 我 啲 說話 睇嚟 都係 啱 。
我 見到 自己 身家 清白 ，覺得 無謂 玷污 佢 吖 。
指意 將 一身 嘅 本事 ，一刀一槍 喺 邊疆 上 立功 ，博 個 封 妻 蔭 子 光宗耀祖 都 好吖 ，冇 想到 又 畀 佢 噉樣 𠽤死咗 。
嘿 ， 高太尉 啊 高太尉 ， 你 真 係 狠毒 ， 真 係 刻薄 啊 ！
楊志 個 心 呀 ，嬲 死 嚟 咯 。
噉佢 喺 客店 住咗 幾日 ，弊喇 ，連 旅費 都 使 乾使淨 添 。
佢 諗 ：呢趟 點好呢 ？
嗯 ，而家 只係 剩返 呢 一把 祖先 留落嚟 嘅 寶刀 咯 ，咁 耐 都 係 跟住 我 嘅 ，唉 ，而家 生借 無門 ，冇晒 辦法 喇 。
好 ，攞 出去 喺 大街 上 賣 咗 佢 ，賣返 一千 幾百 貫 錢 嚟 做 使用 ，去 投奔 第處 安身 係 啦 。
楊志 狠一狠心 ，當日 就 攞起 把 寶刀 插咗 個 草標 ，搦去 街 賣 咯 喎 。
佢 去到 馬行街 ，喺 嗰度 企咗 兩個 時辰 都 冇 人 嚟 問 。
企到晏晝 ，又轉咗去 天漢州橋 熱鬧 嗰啲 地方 賣 。
楊志正 話 企 喺 處 冇 幾 耐 ，只見 街上 啲 行人 㗾㗾 聲 都 趯晒 入去 啲 橫巷 裏頭 匿埋 喎 。
楊志 見到 啲 行人 趯 得 咁 慌張 ， 一味 嗌 話 ： 快 啲 匿 埋 啊 ， 快 啲 匿 埋 ！ 老虎 嚟 啊 ， 老虎 嚟 啊 ！
楊志 就 諗 喇 ：吖 奇怪 ？係 東京 呢個 咁 繁華 嘅 城市 裏頭 ，邊處 嚟 嘅 老虎 啊 又 ？
佢 冇 跟 埋 大家 走 ， 佢 企 定 腳 ， 四圍 望下 。
咦 ，只見 前面 有 一個 大漢 ，黑古嘞𡃈 ，飲到 醉昏昏 行 一步 佊 一佊噉 行緊 過嚟 。
嘿 呢個 傢伙 呀 ，哎 真係 三分 似 人 就 七分 似 鬼 。
兼之污糟邋遢 ，一頭攣毛 。
周身 就 長滿 鯊魚皮 ，十分 醜怪 。
呢個 傢伙 ，原來 係 京師 出咗名 嘅 爛仔 叫做 冇毛老虎牛二 ，就 專門 喺 街上 耍無賴 ，行兇 鬧事 。
呢 試過 有 幾場 官司 啊 ，搞到 連 開封府 都 治 佢 唔掂 。
故此呢 ，滿城人 見到 佢 嚟親 呀哎呀 怕晒 佢 咯 都 匿埋 避開 佢 。
牛二 撞到過嚟 ，見到 楊志 仲 捧住 把 刀 企 喺 處 ，就 行到嚟 楊志 面前 一手 就 攞起 嗰把 寶刀 就 問 楊志 話 喇 ：
喂 ，你 呢一 把 刀 要 賣 幾多 錢 啊 ？
呢把 係 祖先 留落嚟 嘅 寶刀 ，要 賣 三千 貫 錢 。
嘩乜鬼嘢刀啊賣咁多錢嘅 ？
嚱嚱 ，我 三十 個 銅錢 咋 就 買到 一把 喇 ，唔係 一樣 切得 肉 ，切得 豆腐 ？
哼 ， 喂 ， 你 呢 把 噉 嘅 鬼 刀 有 咩 好處 啊 ， 啊 ， 啊 ？ 叫做 寶刀 添 呀 。
我 呢 把 唔係 舖頭 賣 嗰啲 白鐵 刀 喎 ，係 把 寶刀 嚟 。
噉點 為之 寶刀 啊 ？吓 ！
有 三件 ，第一件 ，斬銅斬鐵 刀口 唔 捲 ；
第二件 ，吹毛得過 ；
第三件 ，殺人 把 刀 上面 冇 血 。
你 敢唔敢 斬 啲 銅錢 我 睇下 ？
你 攞嚟 啦 我 斬畀 你 睇 。
牛二 走去 州橋 腳 嗰 間 雜貨舖 ，攞咗 人哋 二十 個 銅錢 嚟 ，一戙 噉 放 喺 州橋 嘅 欄杆 上 便 。
嚟吖 ，你 斬得 佢 開 ，我 就 畀 三千 貫 畀 你 。
呢個 時候 呀 ，先頭 匿埋 咗 嗰啲 行人 又 出返嚟 咯 喎 。
雖然 話 唔 敢 行近 ，之 大家 都 遠遠 噉 圍住 睇嘢 。
楊志 話 喇 ：斬 呢 戙 銅錢 咋嘛 ，噉 有 咩 嘢 啫 。
佢 擸起 衫袖 舉起 把 刀 ，睇準 喇 ，一刀 落去 ，撐 ！一戙 銅錢 當堂 斬開 兩邊 。
嘩乜 真係 咁 厲害 㗎 喂 ，睇 嗰啲 人 呀 都 喝起彩 嚟 咯 喎 。
牛二 就 話 喇 ： 誒 做做 咩 啊 做 做做 咩 啊 ！ 喝 咩 彩 啊 你 哋 ！
喂 ，你 先頭 話 第二件 係 咩 話 ？
吹毛得過 ，即係噉 ，如果 將 幾條 頭髮 向住 刀口 一 吹 ，啲 頭髮 都 會 斷 。
我唔信 ，嗯 ！牛二 喺 自己 嘅 頭殼 處 掹咗 一紮 頭髮 出嚟 遞畀 楊志 。
嗱 ，你 吹 畀 我 睇 吖 。
楊志 左手 接過 牛二 啲 頭髮 ，對住 刀口 ，噗噉 出盡力 一 吹 。
嘿嗰啲頭髮 ，齊輯輯 當堂 斷開 兩橛 ，飄晒 落地 。
嗰啲人 見到 就 更加 喝彩 啦 ，而且 嚟 睇 嘅 人 就 越嚟越 多 嘞 。
噉仲有呢 ？你 第三件 係 咩話 ？
殺人 ，把 刀 上面 冇 血 嘅 。
咦 ，點解 殺人 把 刀 上面 會 冇 血 嘅 ？
將 個人 一刀 斬過去 ，刀 上面 唔見 血跡 ，把 刀 硬係 利唧 。
我唔信 ，嗯 你 用 把 刀 嚟 斬 個人 我 睇下 啦 。
噉 都 得嘅 咩 ？喺 京師 裏 便 無緣無故 點 能夠 殺人 㗎 。
你 如果 唔信 你就 捉 隻 狗 嚟 我 殺 畀 你 睇 。
唓， 你 話 殺人 咋 嘛 又 冇 話 殺 狗 啊 。
你 買 就 買 唔 買 就罷 ， 一味 喺 度 纏住 我 做 咩 啊 ？
你 攞 把 刀 嚟 我 睇下 吖 。
喂 ， 你 唔 好 冇 完 冇 了 喎 ， 我 唔 係 咁 腍 善 任 你 蝦 㗎 吓 。
哼 你 敢 殺 我 吖嗱 。
我 同 你 往日 無冤 今日 無仇 ，無情 白事 我 殺 你 做 乜 啊 。
牛二 死 蛇 爛 鱔 一手 揦 實 楊志 死 咁 略話 ：我 偏要 買 你 呢 把 刀 。
你 要 買 就 攞 錢 嚟 啦 。
我 冇 錢 啊 。
你 冇 錢 你 拉住 我 做咩 啊 ？
哦我我係要你呢把刀啊 。
我 唔 畀 你 。
你 咁叻 你就 斬 我 一刀 啦 。
真係 佛 都 激出 火 ，何況 楊志 又 唔係 好 老脾 㗎 嘛 。
楊志嬲起上嚟 ，一掌 就 將 牛二 推到 成個 扽 低 。
吖牛二啊爛仔即係爛仔 ，佢躝返起身 ，一下就僂埋嚟出力咁攬實楊志 。
究竟 楊志 賣刀 點樣 收科 呢 ？下次 再 講 嘞 。
