喺 講 呢 一部 水滸 之前 啊 ，我 讀 一首 詩 畀 大家 聽下 先 。
呢 首詩 係 噉 嘅 ：
紛紛 五代 亂離 間 ，一旦 雲 開 復 見 天 。草木 百年 新 雨露 ，車 書 萬里 舊 江山 。尋常 巷陌 陳 羅綺 ，幾處 樓台 奏 管弦 。人 樂 太平 無 事 日 ，鶯 花 無限 日 高 眠 。
呢 首詩 ，你哋 估 係 邊個 寫 嘅 嗱 ？
係 我 寫 嘅 ？唔 係 ，我 寫 唔 出 。
呢 八句 詩啊 ，係 宋朝 神宗皇帝 嘅 朝代 ，一個 出名 嘅 學者 ，叫做 邵堯夫 作 嘅 。
呢 首 詩 嘅 意思 ，係 講 五代 殘唐 嘅 時候 ，天下 大亂 ，成日 咁 打仗 。
嗰 陣 呀 ，真 係 朝屬 梁 就 暮屬 晉 噃 。
正 所謂 ：朱 李 石 劉 郭 ，梁 唐 晉 漢 周 ，都 來 十五 帝 ，播亂 五十 秋 。
收尾 ，感動 得 天道 循環 ，生落 一個 太祖 武德 皇帝 。
係 邊個 啊 ？就 係 趙匡胤 ，宋朝 嘅 第一個 皇帝 。
佢 出世 嗰 朝 ，嘩 嗨 ，紅光 滿天 ，啲 香氣 呀 ，成日 都 唔 散 嘅 。
原來 佢 係 上天 霹靂 大仙 下凡 投胎 ，噉 就 唔 怪得 咁 威 啦 。
佢 為 人 啊 英雄 勇猛 ，智量 寬洪 。
一條 齊眉棍 ，打出 個 天下 四百座 軍州 都 姓 趙 ，你 話 叻 唔 叻 吖 嗱 ？
呢 個 皇帝 ，掃清 寰宇 ，蕩淨 中原 ，改 個 國名 叫做 宋 ，就 係 宋朝 嘞 。
京城 呢 ，就 設 喺 汴梁 嚟 ，即 係 今日 嘅 河南省 開封 嘅 地方 ，當時 呢 就 稱 之 為 東京 嘅 。
所以 嗰 句 詩啊 ，一旦 雲開 復 見 天 呢 ，即係 話 啲 老百姓 ，經歷 過 大亂 之後 有 太平 安樂 嘅 日子 ，就 好似 再見 天日 一樣 喇 噉 。
嗰 陣 時 ，西嶽 華山 ，有 個人 叫做 陳 摶 。
呢 個人 呀 有 好 高 道行 嘅 ，能夠 分辨 風雲 氣息 。
有 一日 ，佢 騎住 隻 驢 仔 落山 ，行行下 ，聽見 路上 有人 講 新聞 ，話 而家 東京 柴世宗 就 讓 咗 個 帝位 畀 趙匡胤 登基 做 皇帝 喇 噉 。
嗰 個 陳 摶 先生 聽 咗 ，個心 非常 之 歡喜 哈哈大笑 ，點知 高興 過頭 喺 隻 驢 仔 上 便 就 扽 咗 落地 。
過路人 客 見到 噉 唄 ，就 問 佢 為咩 事 幹 歡喜 得 咁 交關 啊 ？
陳 摶 先生 就 話 喇 ：哎呀 ，天下 從今 之後 ，就 安定 晒 喇 ！
正一 係 上合 天心 ，下合 地理 ，中合 人 和 啊 。
自從 庚申 年間 ，接受 咗 皇帝 位 之後 做 咗 十七年 皇帝 ，天下 太平 ，就 傳位 畀 細佬 太宗 嘞 。
太宗皇帝 在位 二十二年 ，傳位 畀 真宗皇帝 ，真宗 呢 又 傳位 畀 仁宗 ，呢啲 皇帝 啊 就 係 噉 一代 傳 一代 㗎 喇 。
呢 個 仁 宗皇帝 ，又 係 有 名堂 嘅 喎 。
據說 ，佢 係 上界 赤腳大仙 下凡 投胎 ，出世 嘅 時候 呀 ，日夜 咁 喊 ，冇 時 停 。
因此 朝廷 就 出 咗 張 黃榜 ， 公開 請 人 嚟 醫 個 太子 嘞 噃 。 啊 係 喇 ， 咩 叫做 黃榜 呢 ？
黃榜 就 係 皇帝 出 嘅 公告 ，因為 係 用 黃紙 嚟 寫 嘅 ，所以 就 叫做 黃榜 。
呢 件 事 ， 感動 咗 上天 喎 ， 就 派 咗 個 太白金星 下凡 ， 變 咗 做 個 伯父 ， 走 嚟 揭 咗 張 黃榜 ， 話 佢 有 本事 能夠 止得 住 太子 啼哭 嘅 噉 話 。
看 榜 嘅 官員 就 帶 佢 上 殿 朝見 真宗 皇帝 嘞 。
皇帝 聽講 梗 係 高興 定 啦 ，即刻 叫 啲 太監 帶 佢 入去 皇宮 裏 便 同 太子 醫病 。
嗰 個 伯父 ，入到 去 皇宮 ，抱住 太子 ，喺 佢 耳仔邊 細細 聲 噉 講 咗 八個 字 ，哈 真 係 係 乜 都 冇 咁 快 ，太子 當堂 就 收聲 唔 喊 嘞 喎 。
嗰 個 伯父 亦 冇 講 佢 自己 係 姓 乜 名 乜 嘅 ，呼 噉 一 聲 ，化 咗 一浸 清風 就 唔 見 咗 嘞 。
佢 喺 太子 嘅 耳仔 邊 講 咗 邊 八個 字 呢 ？佢 話 ：文 有 文曲 ，武 有 武曲 。
噉 又 係 咩 意思 啊 ？
原來 玉皇大帝 啊 ，應承 派 紫微宮 兩座 星辰 下凡 嚟 輔助 呢 一朝 嘅 天子 。
文曲星 ， 乃 係 南衙 開封府 主 ，龍圖閣 大學士 包拯 ， 就 係 我 哋 周時 講 嗰 個 包公 嘞 。
武曲星 呢 ， 乃 係 大元帥 狄青 。
有 呢 一 文 一 武 嘅 忠臣 ， 出 嚟 輔助 呢 朝 仁宗 皇帝 ，佢 係 總共 在位 四十二 年 ，改 咗 九 個 年號 。
開始 嗰 廿七 年 ，天下太平 啊 五谷 豐登 ，百姓 安居樂業 ，真 係 路不拾遺 就 夜不閉戶 啊 。
點 知道 樂極生悲 喎 ，到 咗 嘉 祐 三年 嘅 春天 ，嚟 咗 一場 大 瘟疫 ，由 江南 一直 到 京師 ，冇 一處 啲 人民 唔 染 呢個 症 嘅 。
天下 各個 州 各個 府 ，嗰 啲 奏章 報告 就 好似 雪片 噉 飛去 朝廷 定 㗎 啦 。
當時 東京城 ，就 係 首都 汴梁 喇 ，城裏 城外 啲 軍民 呀 死 咗 成 大半 。
開封府 嘅 包公 ，親自 出錢 買 咗 藥 ，攞 嚟 醫治 病人 ，點知 仲 係 醫唔好 ，瘟疫 就 越嚟越 厲害 。
於是 文武百官 ，就 一齊 商量 咗 個 辦法 ，都 話 要 祈禱 上天 消除 瘟疫 至 得 㗎 喇 ，就 準備 第 朝 早 啊 ，稟奏 畀 皇帝 知 。
呢 一日 ，係 嘉祐 三年 三月 三日 ，朝頭 早 五更 三點 ，仁宗 天子 喺 紫宸殿 接受 百官 朝賀 。
行禮 之後 ，殿頭 官 就 話 喇 ：有事 出班 啟奏 ，無事 捲簾 退朝 。
只見 宰相 趙 哲 、參政 文彥博 出班 稟奏 話 ：
當前 京師 瘟疫 盛行 ，傷損 軍民 甚 多 。
伏望 陛下 釋罪 寬恩 ，省刑 薄稅 ，祈 禳 天災 ，救濟 萬民 啊 。
天子 聽 咗 稟奏 ，急急 命令 翰林院 起草 詔書 ，即 係 報告 嘞 。
一便 呢 就 下 一道 聖旨 ，大赦天下 嘅 罪犯 ，所有 嘅 民間 稅收 全部 免晒 。
一便 呢 ，又 命令 喺 京城 嘅 宮觀 寺院 ，打齋 打醮 嚟 消災 。
估唔到 ，呢 一年 嘅 瘟疫 呀 仲 厲害 咗 添 。
仁 宗天子 知道 咗 ，個心 就 好 唔 安樂 啦 ，又 再次 召集 百官 嚟 商量 咯 喎 。
有 一位 大臣 出班 啟奏 ，天子 一 睇 ，原來 係 參知政事 范 仲淹 。
佢 行完 禮 就 稟奏 話 ：目前 天災 盛行 ，軍民 塗炭 ，日夕 不能 聊生 啊 。
微臣 覺得 想 消除 呢 個 災害 ，就要 通知 嗣漢 天師 星夜 趕 嚟 ，喺 京師 之內 ，修設 三千六百 份 羅 天大 醮 ，奏聞 上帝 ，噉 就 可以 消除 民間 瘟疫 啊 。
好啊！ 仁宗天子 批准 咗 佢 呢個 建議 。
即刻 就 叫 翰林院 ，起草 一封 詔書 ，天子 御筆 親自 書寫 ，並且 賜 咗 御香 一 炷 ，任命 內外 提點 、殿前 太尉 洪信 做 天使 ，前去 江西 信州 龍虎山 ，請 呢 個 嗣漢 天師 張 真人 啊 ，星夜 趕 嚟 朝廷 ，祈禱 上天 消除 瘟疫 。
就 喺 金殿 之上 ，點着 咗 御香 ，親手 將 詔書 交 畀 洪太尉 ，叫 佢 馬上 起程 。
呢 個 洪太尉 就 孭 起 詔書 ，帶住 幾十個 隨從 騎住 快馬 ，一路 就 向住 信州 貴溪 縣 而 去 嘞 。
行 咗 唔 少 日子 ，嚟 到 江西 信州 。
當地 啲 大小 官員 ，出去 城郊 迎接 ；
同時 呢 又 派 人 通知 龍虎山 上 清宮 嘅 住持 道士 ，準備 接 詔書 。
第二日 ，眾位 官員 一齊 送 洪太尉 就 去 到 龍虎山 下 。
只見 上 清宮 眾多 嘅 道士 ，鳴鐘 擊鼓 ，打起 羅傘 齊奏 仙樂 ，捧住 香花 燈燭 ，落山 嚟 迎接 皇帝 嘅 詔書 。
洪太尉 嚟 到 上 清宮 門前 就 落 咗 馬 ， 啲 道士 前呼後擁 ， 接 咗 佢 去 三清殿 ， 請 佢 將 詔書 呢 就 供 喺 殿堂 當中 。
洪太尉 就 問 嘞 ：天師 而家 喺 邊度 啊 ？
住持 真人 上前 稟報 話 ：回稟 太尉 ，呢 一代 祖師 道 號 叫做 虛靖 天師 ，性情 非常 清高 ，唔 喜歡 送往迎來 嘅 。
自己 喺 龍虎山 頂 搭 咗 一間 茅寮 ，修真 養性 ，所以 唔 住 喺 本 宮 㗎 。
哦 ，噉 呀 。而家 天子 宣召 ，點至 見到 佢 呢 ？
太尉 ，皇上 嘅 詔書 就 供 喺 廟堂 住 先 ，貧道 等 亦 唔 敢 開讀 。
請 太尉 去 方丈 休息 飲茶 ，再 嚟 商量 。
洪太尉 見 住持 道士 噉 講唄 ，就 將 詔書 供奉 喺 三清殿 嚟 ，同埋 眾位 官員 就 嚟 到 方丈 嘞 。
太尉 居中 坐落 ，飲過 茶 ，食齋 咯 喎 。
食完 之後 呢 ，太尉 就 同 真人 話 ：
既然 天師 住 喺 山頂 嘅 茅寮 嚟 ，點解 唔 派 人 請 佢 落 嚟 見面 宣讀 詔書 呢 ？
祖師 雖然 喺 山頂 ，不過 佢 嘅 道行 好 高 ，能夠 騰雲 駕霧 蹤跡 不定 㗎 。
貧道 等 平常 亦 難得 見面 ，點樣 請 得 落 嚟 呢 ？
哎呀 ，噉 點至 見到 面 啊 ？
當前 京師 瘟疫 盛行 ，天子 特登 派遣 下官 帶住 皇上 親筆 寫 嘅 詔書 ，帶住 龍香 嚟 請 天師 ，要 做 三千六百 份 羅 天大 醮 嚟 消除 天災 救濟 萬民 。
而家 見 天師 唔 到 ，點算 呢 ？
天子 要 救 萬民 ，除非 噉 啦 ，太尉 你 確實 帶住 一片 誠心 ，齋戒 沐浴 ，換 一套 布草 衣裳 ，唔好 帶 跟班 ，自己 孭住 詔書 ，點着 御香 ，行路 上山 禮拜 ，叩請 天師 ，噉 就 或者 見得到 都 唔定 。
如果 唔 夠 誠心 ，就 會 空行 一趟 難以 見面 㗎 。
太尉 聽 佢 噉 講 就 話 喇 ：我 由 京師 嚟 到 呢 度 ，一路 都 係 食齋 嘅 ，噉 仲 唔 一片 誠心 咩 ？
既然 係 噉 ，聽朝 一 早 就 上山 。
第二日 ，五更 時分 ，啲 道士 就 起身 ，準備好 熱水 ，請 太尉 起床 洗過 身 ，換咗 一套 新淨 嘅 布衫 ，雙腳 就 着咗 一對 草鞋 。
食 完齋 嘞 ，將 皇上 嘅 詔書 ，用 黃 羅 包袱 包好 就 孭 喺 背脊 嚟 ，隻 手 就 挽住 個 銀 香爐 ，點着 御香 ，起 行 喇 。
成班 道士 送 佢 去 到 後山 ，指 條 路 畀 佢 。
真人 又 同 佢 話 ：太尉 要 救 萬民 ，千祈 唔 好 有 後悔 退縮 之 心 啊 ，要 一片 誠心 上去 至 好 啊 。
太尉 同 大家 分別 之後 ，個 口 念住 天尊 寶號 一路 上山 。
左盤右 轉 ，拉草 攀藤 ，約莫 過 咗 幾個 山頭 ，行 咗 兩三 里 路度 啦 ，就 行到 佢 雙腳 又 酸 又 軟 。
個口 雖然 冇 講出 聲 啊 ，之 個心 就 喺 度 咕 嘞 喎 ：
我 係 個 朝廷 貴官 ，喺 京師 嘅 時候 ，瞓覺 又 鋪 到 成尺 厚 嘅 墊褥 ，食飯 又 擺 到 成 枱 都 係 山珍海味 ，噉 都 仲 覺得 唔 夠 舒服 嘅 ，又 幾時 着過 草鞋 行 啲 噉 嘅 山路 吖 ？
點知 佢 個 天師 喺 邊度 嚟 啊 ？唉 叫 下官 捱 噉 嘅 鹹 苦 。
佢 又 行 咗 三 幾十步 ，猛 咁 索氣 。
忽然間 ，只見 山凹 嗰 處 呼 噉 起 咗 浸風 ，風 一 過 ，喺 嗰 樖 松樹 後 便 ，行 雷 噉 嗷 嗚 噉 一聲 ，啪 聲下 ，跳出 一隻 吊睛 白額 錦毛 大 老虎 。
洪太尉 大吃一驚 ，嗌 咗 聲 哎呀 噉 ，嚇 到 佢 成個 跌 喺 地 嚟 。
嗰 隻 老虎 望住 洪太尉 ，沊沊𡃈 轉 咗 幾 轉 ，呼呼 聲 噉 咆哮 咗 一陣 ，啪 聲 向住 後 山坡 跳 咗 落 去 ，嘿嘿 走 咗 喇 。
洪太尉 跌 喺 樖 樹 腳底 ，嚇 到 佢 三十六 隻 牙 及及 聲 牙齒 打卦 。
個心 呀 ，好似 十五個 吊桶 七上八落 噉 忑 耷忑耷忑耷 ，噉 啊 周身 揗揗 震 ，雙腳 好似 打輸 咗 個 雞公 ，好似 一味 叫苦 係 啦 。
等 隻 老虎 走 咗 一陣 ，洪太尉 先至 爬 返 起身 執返 起 個 銀 香爐 ，點返 着 啲 龍香 ，繼續 上山 ，務必 要 搵 到 天師 。
又行 咗 三 幾十步 ， 唞 咗 幾 啖 大氣 ， 佢 又 怨 喇 ：
唉 ，皇帝 限 期限 刻 ，派 我 嚟 呢 處 ，嚇 咗 我 一 大 餐 添 。
嘿話口 未 完 ，只 覺得 嗰 便 呼 噉 又 起 一浸 風 ，一浸 毒氣 衝 過 嚟 。
太尉 定睛 一睇 ，咦 ，喺 山邊 嗰 啲 竹藤 裏 便 沙沙聲 響 ，𠻘 聲 ，飆出 一條 水桶 咁 粗 嘅 雪花 蛇 出 嚟 。
太尉 見到 大吃一驚 ，擗 咗 個 香爐 ，嗌 咗 一聲 話 哎呀 我 呢 趟 實死 咯 。成個 打仰 就 跌倒 喺 嚿 大石 旁邊 。
嗰 條 大 蛇 ，嘶 哩 瀡 略 ，飆到 嚟 嚿 大石 旁邊 ，對住 洪太尉 盤成 一堆 ，擺起 個 陣 ，兩隻 眼 閃住 金光 ，擘開 個 口 ，啡啡 聲 噉 吐出 條 脷 ，對住 洪太尉 塊 面 噴 啲 毒氣 出 嚟 。
驚到 洪太尉 就 三魂 蕩蕩 七魄 悠悠 。
嗰 條 蛇 望 咗 洪太尉 一輪 ，向 住 山下 一遊 瀡 聲 唔 見 咗 嘞 。
太尉 見 冇 事 喇 ，噉 先至 躝 返 起身 話 哎呀 ，好彩 啊 ，嚇死 下官 咯 。
佢 睇 睇 自己 ， 周身 起晒 雞皮 ， 忍 唔 住 就 鬧 喇 ：
你 嗰 班 道士 撚 化 我 咁 可惡 吖 嗱 ，累到 我 嚇成 噉 樣 ，如果 上 到 山 搵 唔 到 天師 呢 ，我 落 嚟 先至 同 你 班 人 講 ！
佢 執返 起 個 銀 香爐 ，孭 返 好 封 詔書 ，將 衣帽 整理 好 ，正 話 想 繼續 上山 ，啱啱 起腳 唧 ，只 聽見 松樹 後 便 隱隱約約 有 啲 笛聲 ，誒 漸漸 近 嘞 。
太尉 定眼 睇 下 ，只見 有 個 道童 ，打倒 嚟 騎住 隻 黃牛 ，吹住 支 笛仔 ，喺 山凹 嗰 便 轉出 嚟 。
嗰 個 細路 ，頭上 梳 兩隻 丫角 髻 ，穿 一件 青色 嘅 衫 ，條 腰 蓄住 一條 草繩 ，雙 腳 着 一對 草鞋 ，眼仔 晶晶 ，牙齒 白白 ，非常 俊秀 毫無 俗氣 嘅 。
洪太尉 就 嗌 嗰 個 道童 話 喇 ：喂 ，喂喂 ，你 喺 邊度 嚟 㗎 ？識 唔 識得 我 啊 ？
道童 冇 睬 佢 ，一味 顧住 吹笛 。
太尉 又 連氣 問 咗 幾聲 ，個 道童 哈哈 大笑 ，用 支 笛仔 指住 洪 太尉 話 ：
哦 你 嚟 呢 度 ， 係 唔 係 想見 天師 呢 ？
太尉 好奇 喇 ：你 係 個 看 牛仔 ，點 會 知道 㗎 ？
道童 就 笑住 話 喇 ：今朝 早 ，我 喺 茅寮 服侍 天師 ，聽見 天師 話 ，當今 皇帝 派 咗 個 洪太尉 帶住 詔書 、御香 嚟 到 山上 ，要 我 去 東京 做 三千六百 份 羅 天大 醮 嚟 消除 天下 瘟疫 ，我 而家 就 坐 隻 白鶴 飛去 喇 噉 啊 。
呢 個 時候 ，都 怕 去 咗 咯 ，唔 喺 茅寮 嚟 嘅 咯 。
你 唔好 上去 喇 ，山裏 頭 啲 毒蛇 猛獸 好多 㗎 ，聽下 咬 死 你 添 啊 。
細路 你 唔好 講 大話 噃 。
個 道童 笑 咗 一 聲 ， 亦 冇 講 說話 ， 吹住 支 笛仔 轉 咗 過 山坡 嗰 便 走 咗 喇 。
洪太尉 就 諗 ：呢 個 細路 點解 冚𠾴唥 都 知道 晒 啲 事 嘅 呢 ？
啊 ， 實 係 天師 吩咐 落 㗎 喇 。
佢 本來 想 話 再 上山 嘅 ，哎呀 咪 䎺 喇 ，先頭 已經 嚇得 咁 慘 ，爭啲 連 條 命 都 冇 埋 ，嚱 不如 落山 罷喇 。
於是 佢 又 挽住 個 香爐 ，尋 返 條 舊 路 趯 返 落 山 。
啲 道士 出 嚟 迎接 佢 就 請 佢 去 方丈 坐落 ，真人 就 問 太尉 有 冇 見到 天師 啊 噉 。
太尉 就 話 嗨 你 仲好 講添 ，我 係 朝 上 嘅 貴 官 ，乜 你 叫 我 行 啲 噉 嘅 山路 捱 噉 嘅 苦 啊 ，爭 啲 連 命 都 冇 埋 添 啊 ！
起初 ， 我 行到 半山 ， 跳出 一隻 吊睛 白額 大 老虎 ， 哎呀 嚇 到 下官 魂魄 都 唔 齊 。
又行 咗 唔 到 一個 山咀 ，喺 堆 竹藤 處 ，飆 咗 條 大 雪花 蛇 出 嚟 ，盤 成 一堆 攔住 條 去路 。
如果 唔係 我 福分 大 呀 ，點得 返 條命 返去 東京 吖 ？都 係 你 哋 呢 班 道士 戲弄 我 ！
貧道 等 點敢 話 戲弄 大臣 吖 ，呢啲 都 係 祖師 試探 太尉 嘅 誠心 嘅 啫 。
呢 個 山 雖然 有 蛇 有 老虎 ，不過 都 唔 傷人 嘅 。
太尉 又 話 ：收尾 ，我 正 話 想 再 上山 啦 ，見到 有 個 道童 騎住 隻 黃牛 ，吹住 支 笛仔 過 緊 嚟 ，我 就 問 佢 喺 邊處 嚟 㗎 噉 ，識 唔 識 我 啊 噉 。
佢 話 都 已經 知道 晒 咯 ，話 天師 吩咐 落 ，今朝 坐 白鶴 飛 咗 去 東京 喇 噉 ，所以 我 就 返 嚟 嘞 。
哎呀 ！太尉 啊 ，你 可惜 錯過 咗 喇 ，呢 個 看 牛仔 呀 就 係 天師 嚟 㗎 ！
咩 話 ？乜 佢 就 係 天師 呀 ？乜 噉 樣 嘅 ？
太尉 你 有所不知 ，呢 一代 天師 非同小可 啊 ，雖然 年紀 細 ，其實 係 道行 非常 㗎 ！佢 唔 係 個 凡人 吖 嘛 ，四方 顯化 ，好 靈 㗎 ，世人 都 稱 佢 做 道通 祖師 。
哦 ，我 真 係 有 眼 不識 真師 ，當面 錯過 咯 。
太尉 ， 噉 你 放心 得 喇 ， 既然 祖師 話 去 咗 咯 ， 噉 等到 太尉 返到 京師 嘅 時候 ， 打醮 嘅 事 祖師 已經 做 完 喇 。
太尉 見到 噉 講 ，就 放晒心 嘞 ，於是 就 將 詔書 留 喺 上 清宮 ，龍香 呢 ，就 喺 三清殿 點 咗 。
當日 ，喺 方丈 大排 筵席 ，請 太尉 飲酒 食齋 ，又 過 咗 一 晚 。
第二日 ，食完 早飯 以後 ，真人 、道士 同埋 啲 提點 執事 等等 ，請 太尉 去 遊山 。
太尉 就 好 歡喜 啦 ，成班人 跟住 ，前 便 兩個 道童 引路 ，就 出去 行 咯 喎 。
行勻 晒 宮前 宮 後 ，欣賞 咗 好多 景致 。
呢 座 三清殿 呀 ，嗰 種 富貴 輝煌 法 真 係 講極 都 講唔 盡 啊 。
左廊 下 ， 有 九天 殿 ， 紫微 殿 ， 北極 殿 ； 右廊 下 呢 ， 有 太乙 殿 ， 三官 殿 ， 驅邪 殿 。
各 間 宮殿 睇 勻 嘞 ，行到 去 右 廊 後 便 一 笪 地方 ，呢 度 就 另外 有 一 間 宮殿 。
一 迾 都 係 舂 實 嘅 紅泥 牆 ，正面 係 兩 扇 朱 紅色 嘅 大門 。
門上 用 手瓜 咁 粗 嘅 大鎖 鎖實 ，喺 上面 ，仲 交叉 貼住 十幾道 封條 。
封條 上 便 呢 ，又 係 重重疊疊 扱 住 朱 紅色 嘅 大印 。
簷 口 有 一面 硃紅 漆金 嘅 牌額 ，寫住 四個 金字 ：伏 魔 之 殿 。
太尉 指住 道門 問 嘞 ：呢 間 殿 係 咩 地方 嚟 啊 ？
呢 間 係 前代 老祖 天師 ，鎮壓住 魔王 嘅 殿 嚟 啊 。
噉 為 咩 上面 重重疊疊 ，貼住 咁 多 封條 嘅 吓 ？
呢 個 係 老祖 大唐 洞玄 國師 ，封鎖 住 魔王 喺 裏 便 。
每 傳 一 代 天師 就 親手 貼 一道 封條 ，使到 子子孫孫 唔 敢 亂開 。
因為 畀 魔王 走 咗 出 嚟 呀 ， 就 不得了 㗎 喇 。
到 而家 經過 八九 代 祖師 咯 ，發誓 唔 敢 打開 。
把 鎖 係 用 銅 汁 鑄成 嘅 ，邊個 知道 裏頭 嘅 事 吖 。
小道 自從 住持 本 宮 已經 三十幾年 咯 ，亦 只 係 聽講 㗎 咋 ，哈哈哈哈 。
洪太尉 聽 咗 個 心 就 好 驚奇 ：哼 ，等 我 睇 下 個 魔王 至 得 。
於是 佢 就 同 個 真人 話 喇 ：你 打開 道門 佢 ，我 要 睇 下 個 魔王 係 點樣 嘅 。
太尉 呀 ，誒 呢 間 殿 點 都 唔 開得 㗎 ，先祖 天師 叮嚀 告誡 過 ，今後 人人 都 唔 准 擅自 開 門 㗎 。
哈哈 ，亂 咁 噏 ，你 哋 整古 整怪 嚟 呃 人 ，特登 安排 笪 噉 嘅 地方 ，詐家 意話 鎖住 個 魔王 喺 裏 便 ，嚟 顯耀 你 哋 嘅 法術 使得 咋 嘛 。
我 飽讀 詩書 幾時 見過 有 咩 嘢 鎖魔 之 法 㗎 ？
我 唔 信 有 魔王 喺 裏 便 ，快 啲 將 道門 打開 佢 ，我 要 入去 睇下 。
太尉 ， 呢 間 殿 真 係 唔 開 得 嘅 呢 。 打開 咗 ， 有 咩 三長兩短 就 害人 害物 㗎 喇 。
洪太尉 嬲 嘞 ，佢 指住 班 道士 話 ：
你哋 唔 開 畀 我 睇 係 嘛 ，好 ，我 返到 去 朝廷 ，喺 天子 面前 就 先 告 你哋 阻擋 我 宣讀 詔書 違抗 聖旨 ，唔 畀 我 見 天師 嘅 罪 。
再告 你 哋 私設 呢 間 殿 ，假稱 鎖鎮 魔王 煽惑 軍民 百姓 。
將 你 哋 一個個 嘅 度牒 沒收 晒 ，將 你 哋 充軍 ，有 咁 遠 充 到 咁 遠 ，等 你 哋 捱 下 至 得 。
呢 班 道士 都 怕 太尉 嘅 權勢 嘅 。
冇 辦法 啦 ， 只好 叫 幾個 做 火頭 嘅 道士 嚟 ， 揭 咗 啲 封條 先 ， 然後 就 用 大鐵 鎚 就 𢱕 開把鎖 嘞 噃。
開 咗 道門 ，大家 一齊 入去 裏 便 ，裏便 呀 ，黑 𠵼𠵼 ，冷冰冰 嘅 。
太尉 叫 人 攞 咗 十幾 支 火把 嚟 ，點着 一 照 ，你 估 照到 裏 便 有 乜嘢 吖 嗱 ？
