話說 嗰個 博士 馬鈞 呢 就 遵照 曹睿 嘅 命令 ，帶住 一萬 人 就 趕去 長安 。
佢 喺 柏梁台 嘅 周圍 搭起 木架 ，唔 使 幾耐 ，搭好 喇 ，噉 五千 人 呢 就 帶齊 繩索 就 上去 咯 喎 。
呢座 柏梁台 呀 ，二十丈 高 ，啲 銅柱 啊 十 圍 咁 粗 嘅 。
馬鈞 就 吩咐 大家 拆 個 銅人 先 。
噉嗰啲民工 就 嘿喲桑 啊 ，嘿喲桑就 逳手嘞喎 。
咦喂 ，睇下睇下 ，咩事啊 ？
個 銅人 雙眼 吧吧聲 流起 眼淚 嚟 喎 ，嘩 ！嚇到 大家 驚晒 。
正 喺 呢 個 時候 ，呼 噉 突然 間 喺 柏梁台 邊 啊 吹起 一浸 狂風 ，飛沙走石 噼里啪啦 好似 落雨 噉 。
跟住 冧 一聲 巨響 ，直情 就 好似 天崩地裂 一樣 啊 ，成個 台 冧咗 。
銅柱 又 湴低 ，當堂 砸死 千幾 人 。
但係 終歸 呢 ，馬鈞 噉 就 攞到 個 銅人 同 金盤 ，就 運 咗 返 去 洛陽 ，獻 畀 魏主 曹睿 嘞 。
曹睿 就 見到 得 兩樣 嘢 唧 ，就 問 嘞 ：銅柱 呢 ，喺 邊度 啊 ？
啟奏陛下 ，銅柱 成 一百幾十萬斤 重 ，運唔返嚟㗎 。
運唔返嚟呀 ？
曹睿一 於 化整為零 ，就 下令 打碎 條 銅柱 ，運 啲 銅 返到嚟 洛陽 ，開爐 熔咗 佢 ，愛嚟 鑄成 兩個 銅人 ，就 叫做 翁仲 ，安 喺 司馬 門外 便 。
又鑄咗 銅龍 銅鳳 啊 ，條 銅龍呢 四丈 高 ，銅鳳啊 三丈幾 高 就 安喺 金殿 前 便 。
曹睿噉 都 仲 未 心足 啊 ，佢 又 要 喺 上林苑 裏 便 ，種咗 好多好多 奇花異草 ，養咗 好多好多 珍禽怪獸 。
少傅 楊阜 啊 ， 見到 曹睿 噉 樣 驕奢淫逸 貪圖 享樂 ， 忍 唔 住 就 上表 勸諫 曹睿 啦 。
楊阜 喺 表章 裏 便 首先 就 舉出 古代 嘅 好 皇帝 啊 ，都 係 非常 儉樸 嘅 ，而 天下 嘅 人民 就 安居樂業 。
噉啊 總之 古代 嗰啲 英明 嘅 君主 呢 ，從來 都 冇 話 為咗 建築 富麗堂皇 嘅 宮殿 而 使到 老百姓 民窮財盡 嘅 。
噉 啊 接住 呢 又 舉出 歷代 嗰 啲 荒淫無道 嘅 瘟 君 啊 做 例子 ，說明 佢 哋 都 係 因為 窮 奢 極 恀 啊 ，搏命 噉 建築 華麗 宮殿 ，最後 就 導致 國家 敗亡 。
楊阜仲 明明白白 噉 指出 ，凡係 唔顧及 老百姓 嘅 財力物力 ，一味 噉 放縱 自己 嘅 慾望 ，追求 享受 ，就 冇 話 唔 亡國 嘅 。
楊阜 最後 話 ，陛下 你 而家 耽於 逸樂 ，淨係 顧住 起 咁多 宮殿 樓台 ，必定 會 有 危亡 嘅 禍患 㗎 噉 。
曹睿 一 睇 表章 ，哼 ！督口督鼻 ，啪噉 掉咗 落地 ，唔 睇 。
噉啊 反而 加緊 催促 馬鈞 啊 ，建築 一座 高台 嚟到 安裝 銅人 同 承露盤 。
曹睿 又 落 咗 一道 聖旨 ，派 人 到處 咁 去 選 美女 啊 ，選中 嘅 ，就 收 咗 入 嚟 芳林園 裏 便 。
嘩真係 越嚟越 荒淫 呀 越嚟越 弊傢伙 喇 。
嗰班 大臣 都 紛紛 上表 勸諫 。
曹睿 就 塞住 耳仔 一於 唔聽 啊 。
而家 講下 曹睿 嘅 老婆 啊 即係 皇后 嘞 ，佢 姓 毛 ，毛皇后 。
當年 曹睿 做 平原王 嗰陣 呢 ，兩夫妻 就 非常 恩愛 。
及至 曹睿 登上 皇帝位 之後 啊 ，就 立咗 佢 做 皇后 啦 。
但係 收尾 ，曹睿 就 寵愛 咗 另外 一個 皇妃 郭夫人 ，噉 毛皇后 就 失寵 啦 。
呢個 郭夫人 呀 又 靚 又 聰明 。
曹睿 又 鍾意 佢 鍾意到 不得了 ，日日 都 同埋 佢 一齊 尋歡作樂 。
有時 呀 ， 連氣 成個 幾月 唔 離開 郭夫人 嘅 宮室 嘅 。
呢 一年 嘅 春天 ，芳林園 裏 便 就 百花 盛開 。
曹睿 同埋 郭夫人 就嚟到 花園 飲酒 ，賞花 遊玩 。
郭夫人 話 喇 ：不如 請埋 皇后 嚟 ，一齊 快樂 下 都 好吖 。
曹睿 話 喇 ：誒 千祈 唔 好 啊 ，如果 佢 喺 度 呀 ，朕 連 一滴 酒 都 飲 唔 落 啊 。
講完 就 吩咐 所有 嘅 宮娥 ，唔准 畀 毛皇后 知道 。
毛皇后 見到 曹睿 成個 幾月 都 冇 入嚟 正宮 ，噉 梗係 寂寞 非常 定 啦 。
咁啱得咁巧 ，呢一日呢 ，佢 又 帶住 十幾個 宮娥 太監 嚟到 翠花樓 上面 消遣 下 。
佢 一 上到 樓 ，就 聽見 啲 音樂 聲 呢 傳過嚟 極之 嘹亮 ，就 問 身邊 啲 人 係 邊處 玩 音樂 啦 。
有個 太監 就 話 佢 聽 ，係 皇上 同 郭夫人 喺 御花園 賞花 飲酒 噉 。
毛皇后 唔 知道 就 由自可 ，一 知道咗 呀 個 心 當堂 悶晒 都 唔 想 玩 咯 ，索性 就 返去 正宮 休息 。
第日 ，毛皇后 坐住 架 小車 ，想 出去 皇宮 外 便 遊耍 一下 散下心 。
佢 啱啱 行到 九曲迴廊 嗰處 就 遇見 曹睿 嚟緊 嘞 。
毛皇后 笑瞇瞇 噉 話 ：陛下 昨日 遊 花園 ，實係 好快樂 定喇 。
曹睿 聽 毛皇后 噉樣 講 就 嬲 啊 ，即刻 就 發起 脾氣 上嚟 ，命令 將 尋日 喺 花園 侍奉 嘅 宮娥 太監 ，拉晒 嚟 。
曹睿 鬧 佢 哋 話 喇 ： 昨日 遊 花園 ， 朕 已經 吩咐 過 唔 准 話 畀 毛皇后 知道 㗎 ， 點解 又 洩露 咗 出去 啊 ！
曹睿越 講越 嬲 ，就 喝 武士 將 嗰 班 宮娥 太監 冚𠾴唥 殺 晒 。
毛皇后 嚇到 面無人色 啊喇喇聲 坐車 返去 。
點知道 毛皇后 一 返到 皇宮 門口 唧 ，曹睿 就 派 咗 天使 送 聖旨 到 喇 ：原來 係 賜 毛皇后 死 。
毛皇后 死咗 就 冇 皇后 嘞 喎 ，嘿嘿 唔使 擔心 ，郭夫人 梗係 頂上 皇后 呢個 位 嘅 啦 嘛 。
哎 朝廷 上 嘅 文官 武將 呀 粒聲 都 唔 敢 出 喇 。
又 過咗 一排 ，有 一日 ，幽州 刺史 毋丘儉 送嚟 表章 。
報告話 遼東 公孫淵 作反 ，自己 號稱 燕王 ，改咗 個 年號 叫做 紹漢元年 。
一方面 建築 宮殿 ，大封 官職 ，興兵 入寇 進犯 北方 噉 。
嚇到 曹睿 驚晒 啊 ，即刻 就 召集 文武 官員 嚟 商量 ，睇下 用 乜嘢 好辦法 去 打退 公孫淵 。
公孫淵 係 邊個 呢 ？佢 乃 係 遼東 公孫度 嘅 孫 ，公孫康 嘅 仔 嚟 。
公孫康 呢個人 各位 仲 記得 嘛 ？
就係 喺 建安 十二 年 啊 ，即係 已經 離開 而家 講 嘅 廿幾 年 前 嘞 ，曹操 就 打敗 咗 袁尚 同 袁熙 吖 。
袁尚 同 袁熙 就 趯咗 去 遼東 ，投靠 呢個 公孫康 嘞 。
收尾 公孫康 同 佢 兩個 發生 矛盾 ，就 殺咗 佢 兩個 ，將 佢 兩個 嘅 首級 ，獻咗 畀 曹操 。
所以 曹操 就 封 公孫康 做 襄平侯 。
嗱噉樣再講一下 ，各位 就 記得返喇 係嘛 ？
噉啊 收尾 公孫康 死咗 喇 ，佢 有 兩個 仔 ：大仔 叫做 阿晃 ，二仔 叫做 阿淵 。
公孫康 死 嗰 陣 呢 佢 兩 兄弟 仲 係 好 細個 ，所以 就 由 公孫康 嘅 細 佬 公孫 恭 呀 繼職 。
當時 曹操 啊 亦 已經 逝世 嘞 ，就 曹丕 繼位 。
曹丕 就 封 公孫恭 做 車騎將軍 、襄平侯 。
到 咗 太和 二年 ，即係 公元 二二八 年 啊 ，噉 呢 個 時候 呢 曹丕 亦 死咗 嘞 ，曹睿 嚟 做 魏國 皇帝 。
而 公孫淵 呢 亦 長大 成人 。
公孫淵 嘅 為人 啊 ，文武兼備 就 剛強 好鬥 ，佢 長大成人 之後 就 奪咗 叔父 公孫恭 嘅 爵位 。
於是 曹睿 呢 就 封 公孫淵 做 揚烈將軍 、遼東 太守 。
又 過咗 幾 年 ，東吳 孫權 呢 ，想 拉攏 公孫淵 。
特意 派咗 兩個 大臣 做 使者 ，帶住 好多 金銀珠寶 做 禮物 去 遼東 ，要 封 公孫淵 做 燕王 啊 。
但係 公孫淵 就 怕 魏國 喎 ，魏國 勢力 大 吖 嘛 ，就 殺 咗 東吳 兩個 使者 ，將 佢哋 嘅 首級 送 去 畀 曹睿 。
曹睿 就 封 公孫淵 做 大司馬 、樂浪 公 。
乜得 個 公爵 咋 ？公孫淵 唔 心足 喇 。
你 睇 ，人哋 孫權 都 要 封 我 做 燕王 啊 我 唔 接受 ，殺咗 佢 嘅 使者 嚟 向 你 魏國 表示 忠心 。
而 你 曹睿 竟然 咁 小氣 ，只係 封 我 做 個 樂浪公 喎 ，噉 我 又 何必 噉 做 啊 又 。
哼 ！你 唔 封 我 ，唔通 我 自己 立 自己 做 王 就 唔得 咩 ！
於是 公孫淵 就 搵齊 佢 嗰班 文武官員 嚟到 商量 ，要 自號 為 燕王 ，自己 定 過 一個 年號 ，叫做 紹漢元年 噉 。
當時 副將 賈范 就 勸 佢 話 喇 ：魏國 以上 公 嘅 爵位 嚟 對待 主公 你 ，都 不 為 卑賤 啊 。
而家 如果 要 背叛 佢 ，實在 講唔過去 嘅 。
更兼 司馬懿 善能 用兵 ，連 孔明 都 尚且 唔 能夠 取勝 ，何況 主公 你 呢 ？
嘩 ！可惱啊 公孫淵 發起火嚟 ，喝啲 武士 綁起 賈范 ，要 斬咗 佢 ！
有個 參軍 叫做 倫直 ，佢 仲 係 出嚟 勸 公孫淵 喎 佢 話 ：主公 啊 ，賈范 所 講 嘅 冇 錯 㗎 。
聖人 有話 ：國家 將 亡 就 必 有 妖孽 吖嘛 。
係㗎 ，近日 啊 我哋 遼東 ，就 屢屢 出現 啲 古怪 嘅 事 。
呢 ，最近 有 隻 狗 啊 ，戴住 件 頭巾 着住 件 紅 衫 ，上 咗 屋頂 學 似 人 噉 行路 。
誒喺 城南 ，有 個 鄉民 煮飯 ，煮熟喇 ，掀起 個 煲蓋 一 睇 ，哎呀 有 個 細佬哥 煮熟咗 喺 個 飯煲 裏頭 嚟 啊 。
仲有 ，就 喺 襄平 北 市 裏 便 ，有 一日 ，笪地 忽然 塌咗 個 大氹 ，湧咗 一嚿 肉 出嚟 好 大嚿 嘅 。
周圍 有 幾尺 咁大 ，頭 、面 、眼 、耳 、口 、鼻 就樣樣 都 齊 ，唯獨 就 冇 手 冇 腳 ，刀 啊 斬 唔入 箭 又 射 唔穿 都 唔知 佢 係 乜 。
占卦 先生 問過 卦 ，話 有形 不成 有口無聲 ；
國家 亡滅 就 故 現 其 形 噉 。
主公 ，呢 三件事 都係 不祥之兆 嚟㗎 ，主公 應該 趨吉避兇 ，唔好 輕舉妄動 啊 ！
豈有此理 亂講 ！
公孫淵 嬲 到 極 ，喝 左右 武士 將 倫 直 綁 起嚟 ，同埋 賈范 一齊 ，拉 出去 街市 殺頭 。
跟住 呢佢 任命 大將軍 卑衍 做 元帥 ，楊祚 做 先鋒 ，點起 遼兵 一 十 五 萬 啊 ，就 殺奔 中原 而去 就 一於 作反 。
而家 講 下 魏主 曹睿 ，佢 收到 邊疆 嚟 嘅 告急 文書 就 吃咗 一 驚 ，即刻 召 司馬懿 入 朝 嚟 商量 對策 嘞 。
司馬懿話 ：陛下 唔使 擔心 ，臣 出動 部下 馬步官軍 四萬 ，就 足以 擊敗 賊兵 嘞 。
四萬人 呀 ， 兵 少 路 遠 ， 恐怕 難以 取勝 噃 。
兵 不在多 ，取勝 ，全在於 能夠 設謀 用計 唧 。
臣 託 陛下 洪福 ，必定 要 生擒 公孫淵 嚟 獻畀 陛下 ！
噉就好極喇 ，係咯 ，愛卿 你 估計 公孫淵 會 點樣 呢 ？
公孫淵 ，若果 佢 及早 棄城 而 走 ，呢個 ，係 上計 ；
守遼東 嚟 抵抗 我軍 ，乃係 中計 ；
如果 佢 坐守 襄平 ，誒 ，就係 下計 ，實畀 臣 生擒 㗎喇 。
哦 ，噉 呢 次 出去 一來一去 要 幾 長時間 呢 ？
四千里 咁 遠 ， 去 一百日 ， 攻 一百日 ， 返 一百日 ， 休息 六十日 ， 大約 一年 就 足夠 嘞 。
誒倘若 東吳 、西蜀 喺 呢個 時候 興兵 嚟 侵犯 ，噉 又 如之奈何 呢 ？
臣 已經 制定咗 防禦 嘅 計策 ，請 陛下 唔使 憂心 。
哦 ，噉 朕 就 放心 。
曹睿 好 歡喜 ，就 命令 司馬懿 起兵 去 討伐 公孫淵 嘞 。
噉司馬懿 辭別咗 曹睿 ，點 起兵馬 ，任命 胡遵 做 先鋒 ，率領 前部 兵馬 先 到 遼東 扎落 營寨 。
公孫淵 得到 探馬 嘅 報告 ，就 命令 卑衍 、楊祚 分出 八萬 兵 ，駐扎 喺 遼隧 。
噉 啊 駐地 周圍 就 掘 咗 壕塹 二十幾 里 ，沊沊𡃈 就 安晒 鹿角 等等 嘅 障礙物 ，防守 得 啊 非常 之 嚴密 。
先鋒 胡遵 探聽到 呢個 情形 ，就 派人 去 報告 司馬懿 。
司馬懿 知道咗 就 笑喇 ，佢 同 大家 話 ：
賊人 唔同 我軍 交戰 ，不外 想 拖到 我軍 鬆懈 疲沓 嘅 啫 ，嘿嘿嘿嘿 。
我 估計 賊人 嘅 大部分 人馬 必定 喺 呢處 嚟 ，佢哋 嘅 巢穴 ，實係 防守 空虛 嘅 。
我 如果 放棄 呢度 ，直奔 襄平 ，噉 賊人 必定 去 救 ，我 就 喺 中途 截擊 ，必獲 全勝 啊 ！
司馬懿 於是 指揮 軍隊 ，由 小路 就 向 住 襄平 進發 。
襄平 ，係 遼東 郡 嘅 郡城 ，舊址 就 喺 今日 遼寧省 遼陽市 。
而家 又 講下 遼東 嗰 便 嘅 元帥 卑衍 ，佢 同 先鋒 楊祚 就 喺度 商量 話 ：
若果 魏兵 嚟 進攻 ，就 唔好 同 佢哋 交戰 。
佢哋 千里 咁 遠 嚟到 ，糧草 供應 困難 ，就 難以 持久 嘅 。
糧盡就要退兵 ，等佢退嘅時候呢 ，然後 ，出奇兵打佢 ，司馬懿 就走唔甩㗎喇 。
係 ，元帥 高見 ！
往日 ，司馬懿 同 蜀兵 交戰 ，堅守 渭南 ，使到 孔明 冇晒 辦法 ，終歸 死於 軍中 。
今日 呀 ，正係 同 呢個 情形 一模一樣 啊 。
佢 兩個 正喺度 打響 個 如意算盤 商量 得 頭頭是道 。
忽然間 探子 嚟 報告 話 ：啟 稟 元帥 ，魏兵 向 住 南方 去 咗 。
吓 ？哎呀呀呀 ，佢 知道 我哋 襄平 嘅 兵 少 ，去 偷襲 我哋 嘅 老營 啊 ！
嗯 若果 襄平 失守 ，我哋 守住 呢度 就 毫無意義 喇 。
卑衍 立即 下令 拔寨 ，全軍 趕返 去 救 襄平 。
司馬懿 探聽到 呢個 消息 呀 ，得意 喇 ：
哈哈哈哈 哈哈哈哈 ， 中 我 嘅 計 咯 ！
就 命令 夏侯霸 、夏侯威 ，各 帶 一支 軍隊 ，喺 遼水 岸邊 埋伏 好 。
吩咐佢哋 ，等 遼兵 一到 就 兩便 一齊 出擊 。
夏侯霸 、夏侯威 ，接受 咗 命令 就 帶兵 去 喇 。
果然 ，卑衍 、楊祚 個人 馬 嚟 喇 。
一聲 炮響 ，兩便 搖旗 吶喊 。
夏侯霸 就 夏侯威 一 左 一 右 一齊 殺出嚟 。
卑衍 同 楊祚 兩個 都 無心 戀戰 啊 ，奪路而走 。
走到半路 ，遇着 公孫淵 嘅 大軍 嚟到 ，就 夾埋一齊 又 回馬 再 同 魏兵 交戰 咯喎 。
卑衍 呢 趟 就 威風 喇 ，佢 出馬 罵戰 啊 ，佢 大喝一聲 話 ：
嗨 ！逆將 你 咪 使 詭計 喇 ，你 敢 唔敢 打過 吖 ！
夏侯霸 真係 唔怕 你 喎 ，佢 縱馬 揮刀 迎上嚟 就 打 。
打咗 幾個 回合 ，夏侯霸 一刀 就 將 卑衍 斬死 跌咗 落 馬 。
遼兵 就 當堂 大亂 啦 。
夏侯霸 大刀 一揮 ，殺啊噉 就 驅兵 掩殺 過去 。
公孫淵 頂唔住 喇 ，帶住 敗兵 退咗 入去 襄平 城 ，閂實 城門 就 堅守 不出 。
魏兵 就 四面八方 ，圍 實 襄平城 嘞 。
當時 就 已經 到咗 秋天 ，秋雨 連綿 ，足足 落咗 成個月 都 唔 停噃 。
平地 水深 三尺 ，哈啲 運糧 船 呢 ，可以 由 遼河口 一直 撐 到 襄平 城下 嘅 。
噉啊 魏兵 啲 兵營 呢 都 捱 水浸 啊 ，噉 梗係 辛苦 啦 。
左 都督 裴 景 啊 入去 中軍 帳 見 司馬懿 ，佢 話 ：
稟告 太尉 ， 雨水 唔 停 ， 兵營 裏 便 泥濘不堪 ， 軍隊 喺 度 好 難住 得落 ， 請 太尉 下令 將 兵 營 移 去 前面 山上 啦 。
哼 ！捉 公孫淵 就 喺 旦夕 之間 ，點 能夠 遷移 兵營 啊 ！
以後 如果 有人 仲 講 要 遷移 兵營 嘅 ，斬 ！
係 ， 末將 不敢 ， 末將 不敢 。 裴景 走 都 走 唔 切 啊 。
吖過咗冇幾耐 ，右都督 仇連 又 嚟 見 司馬懿 喇 佢 話 ：
啟稟太尉 ，啲兵士 畀 水浸 得 太過 辛苦 喇 ，請 太尉 將 兵營 搬去 高 一啲 嘅 地方 啦 。
吖吖呸 ！我 軍令 已經 發出 ，你 敢 違抗 咁 大膽 ！
人 嚟 ！
有 ！
將 仇連 推出去 ，斬 ！
司馬懿 喝 刀斧手 斬咗 仇連 ，將 佢 個 首級 ，懸掛 喺 轅門 上面 示眾 。
嘩 ！唔係 斬 個 偏將 末將 噃 ，係 斬咗 個 右都督 噃 。
全軍 震動 晒 再冇 人 敢 呻 辛苦 喇 。
又過咗幾日 ，司馬懿 忽然 下令 南寨 嘅 人馬 暫退 二十里 ，由得 襄平 城 內 嘅 軍民 ，出城 嚟 斬柴 割草 ，放 牛 牧馬 。
司馬懿啊 有 個 部下 官員 叫做 陳群 ，佢 唔明白 就 問 喇 ：
請問 太尉 ， 以前 太尉 你 攻打 上庸 嘅 時候 兵 分 八路 ， 八日 唧 就 趕到 去 上庸 城下 ， 生擒 孟達 ， 大功 告成 。
而 呢次 呢 ，太尉 率領 四萬 大軍 ，行咗 幾千里 路程 嚟到 襄平 。
又唔下令攻打城池 ，就反而等軍隊 喺泥濘之中住咗咁耐 ，又由得敵人 出城去斬柴放牧 。
嘿嘿 ，誒下官 實在 唔明白 太尉 噉樣 做 係 咩嘢 主意 呢 ？
呵呵哈哈哈哈 ，陳公 你 都 識得 兵法 㗎 。
往日 ，孟達 佢 係 糧多 兵少 ，我 就 糧少 兵多 ，故此 不可 不速戰 。
事關 要 出其不意 ，突然 攻佢 ，噉 先至 可以 取勝 㗎嘛 。
但係 今日 就 唔同喇 ，遼兵 多 ，我兵 少 ，佢哋 餓 ，我哋 飽 ，哼噉 何必 拼命 去 攻 佢 呢 ？
應該 任佢 自己 走 ，然後 乘機 打佢 就 啱喇 。
我而家 放開 一條路 ，等 佢哋 可以 斬柴 放牧 ，係 等 佢哋 自己 走 吖嘛 。
啊太尉 高見 ！陳群 噉 就 服晒 喇 。
而家 講 下 司馬懿 ，佢 啊 派 人 返 去 洛陽 ，催促 快啲 送 糧草 嚟 前線 。
當日 ，魏主 曹睿 登殿 臨朝 。
文武百官 都 向 佢 稟奏 ，話 近來 秋雨 連綿 啊 ，一直 落咗 個 幾月 都 仲 唔 停 ，人馬 太過 疲勞 喇 。
請 曹睿 召 司馬懿 班師 回朝 ，暫時 收兵 先噉 。
但係 曹睿 認為 司馬懿 極善於 用兵 嘅 ，臨危應變 好 有 辦法 ，好快 就 會 捉到 公孫淵 㗎 喇 。
所以 就 冇 聽 啲 大臣 意見 ，立即 派 人 運送 糧草 去 前線 。
噉啊 司馬懿 喺 營寨 嚟 吖 。
又過咗 好幾日 ，好喇 ，雨過 天晴喇 。
呢一晚 司馬懿 行 出去 帳外 睇 下 天文 。
忽然 見到 有 一粒 星 ，好似 個 斗 咁 大 嘅 ，𠻘噉 拖住 一道 幾丈 長 嘅 光芒 ，由 首山 嘅 東北方 ，跌咗去 襄平 嘅 東南便 。
各個 營 嘅 將士 見到 都 好 驚奇 。
司馬懿 一 睇 ，高興 到 極 喇 ，佢 對 啲 將官 講 喇 ：
五日之後 ，喺 粒星 跌落嚟 嘅 地方 ，必定 斬 公孫淵 嘅 ！
好 ！聽日 ，大家 全力 攻城 啦 ！
眾將官 接受 咗 命令 ，由 第日 一早 開始 都 帶齊 兵馬 四 便包圍 。
築土山 ，掘地道 ，立炮架 ，裝雲梯 就 日夜 不停 噉 猛攻 。
啲 箭 呀 ， 好似 落 大 雨 噉 啊 啡 啡 聲 噉 射 入去 城 內 啊 。
噉 呢 趟 公孫淵 就 弊晒 喇 ， 佢 困 喺 襄平 城 裏 便 糧食 就 冇 喇 ， 就 唯有 劏 牛 劏 馬 嚟 食 啦 。
結果 就 搞到 人人 怨恨 ，都 唔 止 話 冇 心 守城 打仗 啊 ，仲 想 殺 咗 公孫淵 獻城 投降 添 啊 。
公孫淵 知道 啲 部下 都 變心 嘞 ，驚到 佢 喼喼聲 ，慌忙 派 個 相國 王建 、御史大夫 柳甫 ，就 去 魏軍 營寨 請求 投降 咯 喎 。
佢 兩個 點 出城 嘅 呢 ？唔係 大開 城門 ，放落 吊橋 騎住 馬 ，𠽤𠽤𠽤𠽤 噉 出城 嘅 喎 。
係由 城頭 上 用 條 繩 吊落去 㗎 咋 。
乜噉 搞㗎 ？
梗係啦 ，大開城門 ，聽下 魏兵 唔理 三七廿一 湧晒入嚟 唔係 弊傢伙 ，噉 就 唔係 投降 嘅嘞喎 。
噉佢 兩個 去到 魏軍 營寨 就 拜見 司馬懿 ，佢哋 話 ：
請太尉 將 人馬 退後 二十里 ，我哋 君臣 就 出城 嚟 投降 㗎喇 。
嗯 ！公孫淵 點解 自己 唔嚟 啊 ！豈有此理 ！
司馬懿 勃然 大怒 ，喝 武士 將 王建 同 柳甫 兩個 拉 出去 斬首 。
然後 將 佢哋 嘅 首級 ，交畀 跟住嚟 嘅 隨員 帶返去 。
隨員 返入 城 見到 公孫淵 ，就 將 經過 情形 報告 一番 ，嚇到 公孫淵 魂飛魄散 ，面青 口唇 白啊 。
噉佢 又 派過 個 大臣 叫做 衛演 ，去 魏軍 營寨 再次 請求 投降 。
噉啊究竟 後事 如何啊 ，就且 聽下回 分解 。
