話說 劉禪 呢 收到 楊儀 嘅 奏章 ，報告 魏延 啊 圖謀 不軌 。
吳太后 聽咗 就 問 啲 大臣 嘞 ：眾位 愛卿 ，你哋 嘅 睇法 點樣 啊 ？
蔣琬 就 稟奏 話 喇 ：
以臣嘅意見 ，覺得 楊儀嘅為人啊 ，雖然 稟性 過急 ，胸襟 亦 比較 狹窄 ，但係 佢 籌劃 糧草 、參贊 軍機 ，係 有能力嘅 。
佢 跟隨 丞相 辦事 好 長 時間 喇 ， 而家 丞相 臨終 ， 將 大事 委託 畀 佢 ， 噉 佢 決 唔 係 個 反叛 嘅 人 啊 。
至於 魏延 ，平日 佢 居功 驕傲 ，人人 都 要 讓 佢 三分 。
唯獨 楊儀 從來 都 唔肯 賣佢賬 ，故此 魏延 對 佢 係 心懷 憤恨 嘅 。
臣 認為 魏延 係 見到 楊儀 總管 兵權 ，個 心 就 唔 服 ，故此 燒 斷 棧道 切斷 佢 嘅 歸路 。
同時又捏造罪名 ，嚟 誣陷 楊儀唧 。
臣 願意 以 全家 一門 良賤 嘅 性命 ，嚟 擔保 楊儀 唔係 做 反 ，但係 ，魏延 就 唔敢 擔保 喇 。
董允亦 跟住 稟奏 話 喇 ：
魏延 恃住 功勞 大 ，平常 個 心 ，好唔服 ，時時 都 口出 怨言 嘅 。
以往 之所以 唔敢 作反 呢 ，係 怕 丞相 啫 。
而家 丞相 死咗 嘞 ，佢 就 乘機 作亂 啦 ，係 勢所必然 㗎 喇 。
至於 楊儀 佢 才幹 敏達 ，係 丞相 所 任用 嘅 ，佢 實 唔會 作反 嘅 。
劉禪 話 喇 ：嗯 ，兩位 愛卿 所 講 係 有道理 。
誒 如果 魏延 真係 作反 ，噉 用 咩 計策 防禦 佢 呢 ？
蔣琬話 ：丞相 一向 都 懷疑 此人 嘅 ，就 必定 會 有 計策 教落 楊儀 。
若果 楊儀 心中 無數 又 點 能夠 退得 入 谷口 呢 ？
魏延 實中計 都 得喇 ，請 陛下 寬心 啦 。
過咗冇幾耐 ，魏延 又 有 表章 送到 ，告 楊儀 背叛 。
劉禪 正在 睇緊 表章 ，哈哈 楊儀 嘅 表章 又 送到 ，稟奏 話 魏延 作 反 。
噉 兩個人 就 連 二 接 三 噉 派 人 飛馬 送 呈 表章 就 各 講 各 是非 。
啊 ，情況 認真 夠晒 複雜 咯 。
古時 就 唔同 而家 噃 ，交通 困難 ，通訊 聯絡 又 唔方便 ，遇到 啲 噉 嘅 事 真係 頭赤 㗎 。
正喺呢個時候 ，好彩 費禕 返到嚟喇 。
劉禪 就 即刻 召佢 入嚟 ，費禕 就 詳詳細細 噉 將 魏延 作 反 嘅 經過 情形 啊 ，報告 畀 劉禪 知 。
劉禪 聽咗 就 話 喇 ：如果 係噉 ，就 派 董允 帶住 節 去 見 魏延 ，好好地 勸 下 佢 ，安撫 佢 先 啦 。
噉 董允 就 奉旨 去咗 喇 。
而家返 轉頭 嚟 講下 魏延 啊 ， 自從 魏延 放火燒 斷 咗 棧道 ， 將 人馬 就 駐 扎 喺 南 谷 ， 把守 住 隘口 就 自 以 為 得 計 嘞 喎 。
點知道 畀 楊儀 、姜維 ，漏夜 帶兵 迂迴 去到 南谷 嘅 背後 。
楊儀 就 怕 漢中 失手 就 唔得掂 ，就 派咗 先鋒 何平 ，帶 三千 兵 行 先 。
佢 自己 呢 ，就 同埋 姜維 一班人 帶兵 保護住 靈柩 慢慢 行 。
何平 帶領 人馬 ，一 出 到 南谷 背後 就 擂鼓 吶喊 。
探馬 飛報 魏延 話 ，楊儀 派 咗 先鋒 何平 ，帶 兵 由 槎山 小路 嚟到 挑戰 噉 。
嘩 ！魏延嬲 啊 ，急忙 披掛 上馬 ，提起 大刀 帶兵 出去 迎敵 。
兩陣 對 圓 ，何平 就 出馬 大喝 一聲 ：反賊 魏延 喺 邊處 ！
魏延 又 鬧 返 佢 轉頭 啊 ：你 幫 楊儀 造反 ，仲 敢 鬧 我 豈 有 此 理 ！
吖吖呸 ！丞相 剛剛 逝世 ，骨肉 未寒 ，魏延 你 就 作反 咁 斗膽 ！
眾軍士 聽住 ，你哋 都係 西川人 ，你哋嘅 父母 妻子 ，兄弟 親朋 ，都 喺 西川 。
丞相 在 生嘅 時候 ，從來 冇 待薄過 你哋 。
今日 ，你哋 就 唔好 幫助 反賊 喇 ，你哋 快快 返 嚟 家鄉 聽候 賞賜 啦 。
魏延 部下 嘅 軍士 一 聽 何平 噉樣 講 ，即時 大叫 一 聲 我哋 返去 咯 走啊 ！當堂 散去 咗 大半 。
哈 ，激死 魏延 啊 ，佢 揮刀 縱馬 直取 何平 。
何平 挺槍 迎上去 ，同 魏延 打起上嚟 。
打咗 唔到 幾個 回合 ，何平 就 詐敗 逃跑 。
魏延 咪 跟住 後 便 追過去 咯 。
何平 部下 嘅 兵士 啡啡聲 亂箭齊發 。
魏延 就 唔敢 追 ，勒馬 返轉頭 啦 ，嘿 見到 自己 部下 啲 兵士 呀 ，都 紛紛 開小差 趯佬 喇 。
佢 發起 火嚟 ，拍馬 追上去 殺咗 幾個 要 返鄉 嘅 兵卒 ，唉 但係 點 都 鎮壓 唔住 喇 。
哈咁多人 都 走散晒 ，就 唯獨 馬岱 所 帶領 嗰 三百 人 啊 逳 都 唔 逳 。
魏延 非常之 感激啊 ，佢 對 馬岱 話喇 ：
將軍 你 真心 幫 我 ，第日 大事 成功 之後 ，我 決 唔會 對唔住 你 嘅 ！
噉 魏延 就 同 馬岱 一齊 去 追殺 何平 。
但係 呢陣時 何平 已經 帶兵 飛奔而走 追唔到 嘞 。
魏延 就 聚集 起 殘剩 嘅 兵馬 ，佢 又 同 馬岱 商量 話 ：
我哋 去 投奔 魏國 咯 ，點啊 ？
魏將軍 ，你 噉樣 講 就 太過 唔夠 聰明 喇 。
大丈夫 點解 自己 唔去 建立 霸王之業 ，反而 要 向 別人 屈膝 投降 呢 ？
計 我 話 ，魏將軍 你 智勇兼備 ，兩川 嘅 人士 邊個 敢 抵敵 啊 。
我 誓死 同 魏將軍 先 取 漢中 ，隨後 ，進攻 西川 ！
好極喇 ！馬將軍 ，你 真係 我 嘅 知己 啊 ！
魏延 滿心 歡喜 ，就 同 馬岱 帶 兵 直取 南鄭 喇 。
當時 姜維 、楊儀 佢哋 呢 已經 去到 南鄭 。
佢 喺 城樓 上 望見 魏延 、馬岱 ，耀武揚威 蜂擁而嚟 ，就 急忙 下令 閂實 城門 ，扯起 吊橋 。
魏延 、馬岱 兩個 嚟到 城下 ，大聲 高叫 話 快啲 投降 噉 。
姜維 叫人 請 楊儀 嚟 商量 話 ：魏延 咁 勇猛 ，更兼 有 馬岱 幫 佢 添 。
雖然 佢 嘅 兵 少 啊 ， 都 係 好 難 打 㗎 噃 。
有咩嘢 辦法 去 打退 佢哋 呢 ？
楊儀 話 喇 ：丞相 臨終 交 落 一個 錦囊 。
佢 囑咐 話 ，若果 魏延 造反 呢 ，喺 臨陣 對敵 嘅 時候 就 拆開 佢 ，錦囊 裏頭 就 有 斬 魏延 嘅 妙計 㗎 喇 噉 。
我哋 而家 攞出嚟 睇 就 啱喇 。
於是即刻攞出個錦囊 ，開咗封 ，裏便有張紙 寫住 ：
等到 同 魏延 對 敵 ，喺 戰場 上 先至 好 打開 。
姜維 高興 喇 佢 話 ：既然 丞相 有 規定 ，楊大人 ，你 揸住 佢 先 。
我而家 帶兵 出城 ，擺好 陣勢 ，到時 楊大人 你 就 嚟 啦 。
商量妥當之後 ，姜維 披掛上馬 ，提槍在手 ，帶 三千兵 ，打開 城門 ，放落 吊橋 ，沊沊聲 擂響 戰鼓 ，一齊 衝出去 ，排成 陣勢 。
姜維 挺槍 勒馬 ，企 喺 門旗 之下 高聲 大罵 ：
魏延 反賊 ！ 丞相 未曾 虧待 過你 ， 你 點解 要作 反 ！
魏延 橫刀 勒馬 話 ：伯約 ，唔關 你 事 ，去 叫 楊儀 嚟 啦 ！
楊 儀 喺 門旗影 下 就 拆開 錦囊 一睇 ， 哦 如此 如此 ， 得 喇 ！ 楊儀 放晒心 。
𠽤 哩 𡃈𠽤 哩 𡃈𠽤 哩 𡃈 ，輕輕 快快 縱馬 跑出去 ，一勒定 馬 企 喺 處 ，用 手指 住 魏延 笑 住 話 ：
哼哼 哼哼 哼哼 ， 丞相 在 生 嘅 時候 ， 就 知道 你 日後 必定 作反 嘅 ， 吩咐 我 提防 你 。
今日 ，果然 應晒 丞相 嘅 說話 。
魏延 ，你 如果 有 膽量 ，你 膽敢 喺 馬上 連 叫 三聲 邊個 敢 殺 我 ，就算 你 係 個 真 大丈夫 。
我 就 服 咗 你 ， 我 就 將 漢中 城池 嚟 獻 畀 你 係 啦 。
哈哈 ， 哈哈 ， 嗯 哈哈哈哈 哈哈哈 哈哈哈 ， 楊儀 匹夫 你 聽 住 ：
如果 孔明 在生 ，我 仲 話 怕 佢 三分 。
而家 孔明 死咗 喇 ，天下 間 ，邊個 敢 嚟 同我 對敵 ！
咪話 連叫 三聲 啊 ，就係 叫 三萬 聲 又 有 乜嘢 為難 ！
於是 魏延 一手 執住 馬韁 ，一手 提住 大刀 ，喺 馬上 高聲 大叫 ：邊個 敢 殺 我 ！
一聲未完 ，突然 喺 佢 腦後 有 個人 高聲 應 佢 話 ：我 敢 殺 你 ！
手隨聲起 ，手起刀落 ，當堂 就 將 魏延 斬死 跌咗落馬 。
嘩 ！兩便 嘅 人 見到 啊 ，一時 都 嚇到 窒晒 。
斬魏 延 嘅 係 邊個 啊 ？ 係 馬岱 啊 ！
原來 孔明 臨終 之時 ，就 向 馬岱 交帶咗 一個 秘密 命令 ：
就係要佢 等到 魏延 嗌 嘅 時候 啊 出其不意 噉 斬佢 。
先頭 ，楊儀 睇完 錦囊妙計 嘅 時候 ，就 已經 知道 埋伏 咗 馬岱 喺 魏延 處 㗎 喇 ，所以 依計 行事 果然 殺 咗 魏延 。
董允 係 奉咗 劉禪 嘅 命令 嚟 安撫 魏延 㗎 ，之 佢 都 仲 未 嚟到 唧 ，馬岱 就 已經 斬咗 魏延 嘞 。
噉馬岱 就 同 姜維 將 兵馬 合埋 一齊 。
楊儀 立即 寫好 一份 表章 ，派人 飛馬 送去 稟奏 後主 劉禪 。
劉禪 接到 表章 之後 呢 ，就 下一道 聖旨 ，認為 對 魏延 啊 ，已經 名正其罪 咯 ，乃 念 佢 以前 嘅 功勞 ，仲 係 賜 副 棺材 嚟 安葬 佢 啦噉 。
呢啲 呢 就 唔多 講 喇 。
噉啊當 楊儀 佢哋 護送 孔明 嘅 靈柩 返到 成都 嘅 時候 啊 ，後主 劉禪 率領 文武百官 ，人人 掛孝 出到 城外 二十里 嚟 迎接 。
一見到靈柩 ，劉禪 放聲痛哭 。
唉 ，當其時呀 ，上至 公卿大夫 下至 黎民百姓 ，男女老幼 就 冇 個 唔 喊 嘅 ，真係 淒涼 啊 。
劉禪 就 命令 護送 靈柩 入 城 ，停放 喺 丞相府 裏 便 。
孔明 嘅 仔 諸葛 瞻 呢 ，就 在 家 守 孝 居 喪 。
噉劉禪 返到 朝廷 ，楊儀 將 自己 綁住 ，上殿 拜見 後主 請罪 。
劉禪 即刻 叫 侍臣 解開 佢 啲 繩 ， 劉禪 就 話 喇 ：
呢次 若果 唔係 愛卿 依照 丞相 遺教 ，靈柩 就 唔知 幾時 返得嚟 ，魏延 又 點 能夠 消滅 呢 ？
辦妥 呢啲 大事 都 係 愛卿 之 力 啊 。
於是 劉禪 就 晉升 楊儀 做 中軍師 。
馬岱 因為 殺賊 有功 ，就 將 魏延 原來 嘅 爵位 就 封咗 畀 佢 。
跟住 楊儀 就 將 孔明 嘅 遺表 呈上去 畀 劉禪 。
劉禪 睇完 唉 ，忍唔住 又 痛哭 一場 。
然後 呢 就 落道 聖旨 ，為 孔明 擇地 安葬 。
費禕 就 出班 啟奏 話 ：
啟稟陛下 ，丞相 臨終 吩咐 落 將 佢 安葬 喺 定軍山 ，唔用 磚石 嚟 築 墳 ，一切 祭品 都 唔要 。
劉禪 好 尊重 孔明 嘅 遺言 ，就 一一 照辦 。
擇定 喺 本年 十月 吉日 ，噉 劉禪 就 親自 送 靈柩 去到 定軍山 安葬 。
然後 就 頒發 詔書 致 祭 ，追贈 孔明 為 忠武侯 ；
又 命令 喺 沔陽 啊 ，為 孔明 建立 廟宇 ，四時 拜祭 。
後 嚟 ， 大 詩人 杜甫 ， 就 寫 咗 首詩 懷念 孔明 ， 首詩 係 噉 嘅 ：
丞相 祠堂 何處 尋 ，錦官城 外 柏 森森 。
映階碧草自春色 ，隔葉黃鸝空好音 。
三顧 頻煩 天下 計 ，兩朝 開濟 老臣 心 。
出師未捷 身先死 ，長使 英雄 淚滿襟 ！
噉 安葬完 孔明 ，後主 劉禪 就 返到 成都 。
有一日 ，侍臣 嚟到 稟奏 話 ：陛下 ，邊境 有 報告 嚟 ，話 東吳 派 咗 大將 全琮 ，率領 幾萬 人馬 駐扎 喺 巴丘 界口 ，唔知 咩嘢 意思 喎 。
劉禪 吃咗 一驚 啊 佢 話 ：哎呀 ！丞相 剛剛 逝世 ，東吳 就 違背 盟約 ，要嚟 侵犯 邊界 喇 ，如之奈何 呢 ？
蔣琬 出班 稟奏 話 ：臣 舉薦 王平 、張嶷 ，帶 幾萬 兵馬 去 永安 駐扎 ，以 防 不測 。
請陛下再派一個人去東吳報喪 ，探下佢哋動靜啦 。
劉禪 話 喇 ：噉 啊 需要 搵 一個 能言善辯 嘅 人 做 使者 至 得 噃 。
當時 ，有 個人 應聲而出 話 微臣 願 去 ！
大家 一 睇 ，原來 係 參軍 、右中郎將 宗預 啊 。
好啊 ！劉禪 好滿意 ，即時 就 派 宗預 做 使者 去 東吳 報喪 ，同時 就 去 探聽 虛實 。
宗預 領 咗 旨 ，就 直 去 金陵 拜見 吳主 孫權 。
行過禮 ，宗預 擔 高頭 放眼 一睇 ，咦 ？只見 朝廷 之上 啊 ，人人 都 着住 白色 嘅 衣服 。
孫權 好 唔 高興 啊 ，佢 話 ：吳 、蜀 係 一家人 ，卿 嘅 君主 點解 要 喺 永安 增加 兵力 啊 ？
宗預 就 回答 話 喇 ：
臣 以為 陛下 喺 東 便 增加 巴丘 嘅 兵力 ， 而 敝國 天子 增加 永安 嘅 兵力 ， 都 係 時勢 嘅 需要 ， 都 係 冇 乜嘢 好 問 嘅 。
吓 ？哈哈哈哈哈哈哈 ，宗卿 你 真係 不亞於 鄧芝 啊 ，哈哈哈哈哈哈 。
朕 聽聞 諸葛丞相 歸天 ，每日 都 極之 傷心 ，命令 文武官員 人人 掛孝 。
朕 恐怕 魏兵 會 趁住 丞相 嘅 喪事 ，侵犯 貴國 ，故此 增加 一萬 人馬 去 守衛 巴丘 作為 支援 唧 ，除此之外 再 冇 其他 意思 嘅 。
多謝 陛下 ！
朕 既然 同 貴國 訂立 咗 同盟 ，點會 背信棄義 嘅 呢 ？冇 噉 嘅 道理 嘅 。
係 ，天子 因為 丞相 最近 逝世 ，特意 命令 微臣 前嚟 報喪 。
孫權 即刻 叫人 攞咗 一支 金鈚箭 嚟 ，雙手 揸住 ，出力 一拗 ，啪聲下 ，將 支 金鈚箭 拗斷 。
孫權 發誓 話 ：朕 若果 背約 負盟 ，就 子孫 絕滅 ！
跟 住 孫權 委派 一名 使者 ，帶住 香帛 奠儀 入 川 去 拜祭 諸葛 丞相 。
噉宗預 就 完成咗 使命 啦 ，辭別 孫權 ，同 吳國 嘅 使者 一齊 返去 成都 。
呢一日 ，返到去喇 ，就 去 拜見 後主 劉禪 ，將 出使 吳國 嘅 經過 ，詳細 噉 向 劉禪 稟奏 。
話 吳 主 孫權 啊 折箭 發誓 ，永不 背盟 噉 。
劉禪 梗係 非常 高興 啦 ，重重噉 賞賜 宗預 。
同時啊 ，好好噉款待 吳國 使者 一番 ，然後 就 打發佢 返去 。
呢啲 呢 就 唔多 講 喇 。
噉啊劉禪誒依照孔明嘅遺言啊 ，升任 蔣琬 做 丞相 、大將軍 ，錄尚書事 ；
升任 費禕 做 尚書令 ，同理 丞相 事 ；
升任 吳懿 做 車騎將軍 ，全權 鎮守 漢中 ；
姜維 做 輔漢將軍 、平襄侯 ，總督 各路 兵馬 ，同 吳懿 一齊 去 漢中 駐扎 ，防範 魏兵 。
其餘嘅 將校 呢 ，職務 都 冇 變動 。
噉 而家 講下 楊儀 喇 ，佢 自以為 做官 嘅 資歷 同埋 才幹 啊 都 叻過 蔣琬 嘅 ，但係 而家 自己 嘅 地位 呢 ，就 反而 低過 佢 。
而且啊又認為自己功勞大 ，得唔到重賞 。
所以 越 諗 呢個 心 就 越 唔 忿 ，口出 怨言 。
有一日 ，佢 同 費禕 話 ：
想當初 ，丞相 啱啱 逝世 嗰陣 ，我 如果 率領 全軍 去 投降 魏國 呀 ，哎 又 點 會 搞到 今日 咁 冇意思 吖 ！
佢 以為 發下 牢騷 唔 緊要 喎 ，誰知 費禕 靜靜 寫咗 份 奏章 將 楊儀 講 啲 說話 向 劉禪 報告 。
劉禪 知道咗 可惱到 極啊 ，立即 下令 ，捉咗 楊儀 韞 佢 入 監 審問 要 斬 佢 。
蔣琬 就 覺得 噉樣 唔妥 ，就 勸 劉禪 話 ：
陛下 ，楊儀 雖然 有罪 ，但係 往日 佢 跟隨 丞相 ，立下 唔少 功勞 ，唔應該 斬 佢 㗎 。
仲係 削咗 佢 嘅 官職 ，貶 佢 去 做 個 平民百姓 ，噉樣 處分 就 較為 適宜 啊 。
劉禪 諗下 亦係嘅 ，就 聽 蔣琬 嘅 說話 ，將 楊儀 貶咗 去 漢嘉郡 做 平民 。
唉 楊儀 自己 覺得 太過 慚愧 喇 ，醜 啊 ，結果 就 自殺 死咗 。
噉啊喺 蜀漢 建興 十三 年 ，魏主 曹睿 青龍 三 年 ，吳主 孫權 嘉禾 四 年 ，亦即係 公元 二 三 五 年 啊 ，就係 孔明 逝世 之後 嗰 一年 喇 ，三國 都 各 不 興兵 ，就 過 咗 一年 太平 日子 。
而家 呢 就 唔 講 蜀漢 同 東吳 ，只係 講下 魏主 曹睿 唧 。
佢 又 封 司馬懿 做 太尉 ，總督 軍馬 就 鎮守 邊疆 。
噉 司馬懿 謝恩 之後 呢 就 返咗 去 洛陽 喇 。
曹睿 覺得 而家 天下 升平 喇 ，要 享 下 福 嘞 喎 。
於是 佢 喺 許昌 就 大興土木 ，建築 新 嘅 宮殿 。
又 喺 洛陽 建築 朝陽 殿 、太極 殿 ，仲 起 一間 總章 觀 ，都 係 成 十丈 咁 高 嘅 。
啊噉 都 仲唔止 ，仲要 起 崇華殿 、青霄閣 、鳳凰樓 、九龍池 ，嗨 ！
曹睿 就 任命 一個 博士 叫做 馬鈞 啊 ，嚟 監理 呢啲 工程 。
嘩 ！ 呢 啲 宮殿 樓台 呀 極之 華麗 啊 ： 都 係 雕樑 畫棟 ， 碧瓦 金磚 ， 光輝 耀日 。
當時啊 ，挑選咗 國內 巧手 嘅 工匠 三萬幾人 ，民夫 就 三十幾萬人 ，不分日夜 噉 施工 ，搞到 民力 疲困 就 怨聲 不絕 。
但係 曹睿 好少 理 啊 ，佢 仲 下咗 一道 聖旨 ，要 興建 芳林園 。
嘿 呢次 呢 ，就 唔淨止 要 啲 民夫 逳手 咯 喎 。
佢 仲 命令 所有 嘅 官員 啊 ，一律 都 要 去 擔 泥 種 樹 添 。
有 一位 司徒 叫做 董尋 ，睇見 個 皇帝 搞得 太過 唔成樣子 喇 ，就 上表 嚟 勸諫 曹睿 啦 。
佢 喺 表章 裏頭 話 ， 多少年來 ， 征戰 不止 ， 死 咗 好多 人 ； 幸而 生存 嘅 呢 ， 都 係 老弱 嘅 居多 。
如果 話 宮室 太過 細 要 擴大 啲 ，噉 都 仲 要 睇 下 季節 ，要唔好 妨礙 農田 工作 先至 好 做 ，何況 而家 要 起埋 咁多 無益 嘅 宮殿 呢 ？
仲有 ，陛下 對於 所有 嘅 官員 平時 都 好 尊重 ，之而家 又 要 啲 官員 擔 泥 種 樹 搞到 周身 污糟 邋遢 。
噉又 同 啲 小人 有 乜嘢 分別 啊 ，係 極之 無謂 啊 。
臣 知道 講咗 呢啲 說話 出嚟 實死 㗎喇 ，但係 諗到 自己 不過 係 牛身上 嘅 一條 毛 ，生 既然 冇 益處 ，死 亦 唔算 損失 啦 。
臣 有 八個 仔 ，噉 啊 死咗 之後 ，要 馱 累 陛下 撫養 佢哋 咯噉 。
曹睿 睇完 呢張 表章 嬲 啊 ：豈有此理 ！董 尋 佢 唔 怕 死 係 嘛 ？
噉啲侍臣 就 煮米 喇 ：陛下 ，董尋 咁 可惡 譏笑 陛下 喎 ，斬咗 佢 就 啱喇 。
唔 殺得 嘅 ，此人 素來 忠義 啊 。
而家 就 將 佢 貶做 平民 啦 ，以後 再 有人 膽敢 亂講 嘅 ，必 斬 ！
哈 確係 有 唔 怕死 嘅 人 嘅 喎 吓 ，噉 有 個 張茂 係 太子 舍人 ，佢 亦 上表 嚟 勸諫 曹睿 ，結果 就 畀 曹睿 下令 殺 咗 。
噉啊曹睿 起 咁多 巍峨 宮殿 做乜 啊 ？
佢 係 有 目的 嘅 ，唔 係 想 住 得 架勢 啲 咁 簡單 嘅 。
俗語 有 話 嘞 人心 就 冇 厭足 ，做咗 皇帝 又 想 升仙 。
曹睿 真 係 想 做 神仙 㗎 ， 呢 ， 呢 一日 啊 ， 佢 就 召見 監理 工程 嘅 馬 鈞 嘞 ， 佢 問 ：
朕 興建 呢啲 高大 嘅 樓台 ，就係 想 同 神仙 來往 ，求 個 長生不老 之 方 啊 ，卿 有 何 妙法 呢吓 ？
啟稟陛下 ，漢朝 二十四位 皇帝 ，就係 武帝 在位 嘅 時間 最為 長久 ，壽命 就 極高 。
點解呢 ？皆因 佢 服食 天上 日月 精華 之 氣 吖嘛 。
噉 武帝 又 點樣 攞到 天上 日月 精華 之氣 嘅 呢 ？
噉嘅 ，佢 喺 長安 嘅 宮殿 裏頭 ，起咗 一座 柏梁台 。
台上 便 安 咗 個 銅 人 ， 銅 人 雙手 捧住 個盤 叫做 承露盤 ， 晚晚 都 喺 度 接 住 三 更 北斗 降落 嚟 嘅 露水 ， 就 叫做 天漿 ， 又 叫做 甘露 。
又 用 啲 最靚 最 靚 嘅 玉 碾成 粉末 ，就 用 呢 啲 甘露 啊 ，開 咗 啲 玉粉 嚟 飲 ，就 可以 返老還童 㗎 喇 。
好極 喇 好極 喇 ， 哈哈哈哈 ， 誒 卿家 。
陛下 。
你即刻 帶啲 民夫 ，有 咁快 得 咁快 趕去 長安 ，將 嗰個 銅人 拆返嚟 ，安 喺 芳林園 裏 便 啦吓 。
臣 領旨 。噉 馬鈞 遵照 曹睿 嘅 命令 ，帶住 一萬人 就 趕去 長安 拆 個 銅人 喇 。
