同我一齊救公主

阿大今年十歲。佢屋企人係漁民。

阿大今日放學返到屋企，見到床上有一張紙。張紙濕晒，紙上寫咗幾隻字，話「求救，夜晚八點，一個人嚟長洲海邊，救我哋公主！」。阿大好驚，又好想知發生咩事，所以佢夜晚八點就一個人靜雞雞去咗海邊。

佢坐咗喺度，等咗好耐。阿大正想返屋企嗰陣，突然有條魚跳出水面。

條魚突然好緊張噉講：「阿大，我叫魚仔，求你救下我哋嘅公主吖！唔該你吖！」

阿大好迷茫，唔知魚仔喺度講緊咩。

魚仔就話：「你望上天空吖。我哋嘅月亮公主俾壞人捉走咗，我想你同我一齊救佢返嚟。」

阿大雖然唔知發生咩事，但係見佢哋咁驚，佢覺得應該好大件事，所以就諗住跟住魚仔出發。

阿大帶住潛水鏡，就噉游咗落海入面。

因為太黑喇，所以阿大要捉住魚仔游。

突然，阿大見到前面有一大班魚。

阿大細細聲問魚仔：「佢哋係邊個嚟㗎？」

魚仔話：「係我哋嘅守衛隊，係保護我哋海洋世界㗎。之前有仲多魚嘅，不過 ...」

阿大唔知魚仔點解噉講，只好點點頭。

游多一陣，佢哋又撞見一個發光嘅物體，阿大叫咗一聲。

魚仔笑笑口講：「佢係我哋守衛隊隊長，阿六，佢今日特登嚟幫我哋。」

因為阿六識得發光，同埋游得快，所以阿大捉住阿六游。

「嗚，嗚，嗚」，有啲怪聲喎！

嘩！阿大唔敢相信啊！佢撞到好大隻怪物啊。呢隻怪物啲牙好尖，個樣好得人驚。

阿大驚到即刻游走。

呢條好得人驚嘅魚細細聲話：「你 ⋯你哋好啊，我係阿光，我知道你哋揾緊公主，我係嚟幫手㗎。」

估唔到，阿光係一隻好內向嘅魚仔。

游多咗一陣，終於見到公主喇！佢俾一班人捉住咗。

阿大好嬲，大聲嗌：「你哋放咗公主啊！」

公主答佢：「冇事佢哋係好人嚟㗎！我諗住而家休漁期，唔會有漁船捉魚，所以想用海水洗面。點知有一架漁船行過，仲放網落海捉魚，我唔小心俾個魚網卡住咗。好彩佢哋救返我出嚟咋。」

公主喊住咁講：「依家過度捕魚好嚴重，好多魚仔都 ⋯」

因為阿大嘅屋企人都係漁民，所以對海洋嘅事會更加關心。

佢依家得閒嗰陣會去海邊執垃圾，希望可以令身邊嘅人關注多啲海洋生態。

Hambaanglaang - Level 4, 同 我 一齊 救 公主