咖啡 、 奶茶 同 鴛鴦

今日 係 星期日 ， 爹 哋 、 媽咪 帶 咗 我 去 茶餐廳 一齊 食晏 。

爹 哋 舉起 手 ， 同 侍應 哥哥 講 ：「 唔 該 ， 我 要 一 個 常餐 、 一 杯 凍 鴛鴦 。」

我 問 爹 哋 ：「『 凍 鴛鴦 』 係 咩 嚟 ？」

爹 哋 話 ：「 鴛鴦 即 係 咖啡 加 奶茶 ， 係 一般 茶餐廳 常見 嘅 嘢 飲 。」

我 問 ：「 噉 點解 唔 係 叫做 咖茶 ， 或者 奶啡 ， 而 係 鴛鴦 呢 ？」

爹 哋 話 ：「 鴛鴦 本身 係 一 種 生活 喺 水上 嘅 鳥類 。 佢 哋 有 個 特別 嘅 地方 ， 就 係 男仔 同 女仔 個 樣 完全 唔 同 ， 男 嘅 五顏六色 ， 女 嘅 灰 灰暗 暗 ， 睇 落 去 冇 挐 冇 褦 ， 但 係 佢 哋 又 會 成日 一雙 一對 噉 生活 。 就 好似 咖啡 同 奶茶 ， 佢 哋 顏色 、 味道 完全 唔 同 ， 但 係 加埋 一齊 就 會 變成 好 好味 嘅 嘢 飲 。 有 啲 人 仲 話 ， 鴛鴦 係 香港 人 發明 嘅 嘢 飲 嚟 ！」

我 話 ： 「 我 明白 啦 。 噉 我 同 坐 隔籬 位 嘅 同學 都 係 鴛鴦 ！」

我 見到 媽咪 喺 度 偷笑 。 佢 細細 聲 噉 問 我 ：「 你 隔籬 個 同學 係 點樣 㗎 ？」

我 話 ：「 佢 係 今 個 學期 轉校 過 嚟 嘅 插班 生 。 佢 頭髮 攣攣 哋 ， 五官 同 我 哋 好 唔 同 ， 膚色 都 同 我 哋 大部份 同學 唔 一樣 ， 好似 外國人 。」

「 雖然 我 哋 兩 個 嘅 外表 好 唔 同 ， 但 我 哋 每 日 喺 學校 都 會 一齊 好 開心 噉 上堂 、 一齊 放 小息 、 一齊 玩 。 好多 老師 見到 我 哋 兩個 ， 都 話 我 哋 係 『 孖 公仔 』。 但 係 我 而家 可以 話 返 畀 老師 知 ， 我 哋 唔 止 係 孖 公仔 ， 我 哋 仲 係 一 杯 鴛鴦 ！」

媽咪 聽到 我 噉 講 ， 就 嗌 侍應 哥哥 過 嚟 ， 點 咗 一 杯 熱 「 兒童 鴛鴦 」。

媽咪 又 話 ：「 鴛鴦 本身 有 咖啡因 ， 唔 啱 小朋友 飲 。 但 係 兒童 鴛鴦 就 冇 嘅 。 下次 約 埋 你 隔籬 位 同學 一齊 嚟 茶餐廳 食 嘢 ， 等 我 請 佢 飲 杯 兒童 鴛鴦 啦 ！」