豬仔 藏 寶圖
自從 豬仔 輸 咗 上 一 屆 大胃 王 比賽 之後 ， 佢 就 變 到 冇 晒 心機 ， 做 咩 都 好似 冇 乜 力 噉 ， 連 佢 嘅 好 朋友 羊仔 約 佢 去 食 嘢 都 唔 想 去 。 有 一 日 ， 豬媽 叫 豬仔 去 地下室 攞 箱 唔 要 嘅 廢紙 出 嚟 等 佢 拎 去 回收 。 箱 入面 咩 都 有 —— 除 咗 以前 啲 信 、 帳單 同 宣傳 單張 ， 竟然 仲 收埋 咗 張 藏寶圖 ！ 藏寶圖 上面 仲 有 一 行 好 細 嘅 字 ， 應該 係 藏寶圖 作者 個 名 嚟 ， 但 係 因為 放 得 太 耐 ， 啲 字 已經 甩 晒 色 睇 唔 清楚 。
豬仔 好 好奇 ： 到底 呢 張 藏寶圖 係 邊個 畫 嘅 呢 ？ 收埋 嘅 又 係 啲 咩 寶藏 嚟 呢 ？ 雖然 豬仔 心 裏面 充滿 疑惑 ， 不過 佢 都 照樣 收 返 佢 入 紙箱 ， 交 畀 豬媽 拎 去 回收 。
到 咗 夜晚 ， 豬仔 個 心 開始 囉 囉 攣 。 張 藏寶圖 一直 喺 佢 腦海 盤旋 ， 搞 到 佢 失眠 不特 只 ， 第二 日 返學 仲 差 啲 遲到 。 羊仔 見到 豬仔 嘅 黑眼圈 ， 就 問 佢 ：「 豬仔 你 對 眼 搞 咩 ？」
豬仔 就 答 ：「 係 噉 嘅 ， 我 喺 屋企 地下室 揾 到 張 藏寶圖 ， 唔 知 邊個 留低 嘅 ——」
「 藏寶圖 ？ 所以 你 漏夜 去 尋寶 呀 ？」 羊仔 聽 完 即刻 興奮 到 雙眼 發光 。
「 冇 呀 ……」 豬仔 就 冇 羊仔 咁 好 興致 ， 淨 係 回 咗 句 ：「 算 啦 ， 我 咩 都 唔 想 做 ……」
羊仔 鼓勵 佢 ：「 你 唔 好 咁 冇 心機 啦 ， 最 多 我 陪 你 去 喇 ！」
豬仔 聽 到 之後 ， 覺得 好 感動 ， 好 感激 羊仔 喺 佢 比賽 失意 嘅 時候 鼓勵 佢 振作 ， 於是 決定 去 尋寶 —— 之 但 係 張 藏寶圖 已經 俾 佢 揼 返 入 紙箱 ， 豬媽 可能 今日 就 會 拎 去 回收 ， 於是 佢 哋 兩 個 一 放學 就 跑 返 屋企 想 拎 返 ， 可惜 左 揾 右 揾 都 揾 唔 返 個 紙箱 ！
豬仔 揾 到 好 沮喪 ， 就 同 羊仔 講 ：「 算 啦 ， 可能 都 唔 係 啲 咩 特別 嘅 寶藏 嚟 ……」
羊仔 拍 一 拍 豬仔 膊 頭 安慰 佢 ：「 唔 好 咁 容易 就 放棄 啦 ， 我 哋 都 仲未 見 到 個 箱 ， 證明 仲有 機會 ！」
豬仔 諗 諗 下 ， 覺得 好似 有 啲 道理 ， 都 好 欣賞 羊仔 嗰 種 樂觀 態度 ， 於是 重新 提起 精神 ， 同 羊仔 繼續 翻箱 倒 籠 噉 揾 …… 喺 佢 哋 鍥而不捨 嘅 努力 下 ， 佢 哋 終於 揾 到 個 箱 ， 張 藏寶圖 仲 喺 入面 ！ 佢 哋 終於 可以 出發 尋寶 喇 ！
豬仔 同 羊仔 順住 藏寶圖 嘅 指示 ， 穿過 幾 條 街 ， 去 到 一 個 公園 。 呢 個 公園 係 豬 爸爸 成日 帶 豬仔 嚟 玩 嘅 地方 。 佢 哋 根據 藏寶 顯示 嘅 位置 ， 喺 公園 草地 度 不停 噉 掘 ， 結果 真 係 俾 佢 哋 揾 到 一 個 寶盒 ！ 佢 哋 即刻 開心 到 攬 埋 一 舊 ， 然後 小心翼翼 噉 打開 個 盒 —— 然後 豬仔 呆 咗 。
羊仔 見到 豬仔 嘅 反應 ， 好 心急 噉 問 ：「 裏面 放 咗 啲 咩 呀 ？」
豬仔 慢慢 喺 寶盒 入面 拎 咗 一 對 手套 同 一 張 相 出 嚟 。 相中 人 係 豬 爸爸 ， 睇 返 張 相 嘅 日期 ， 係 豬 爸爸 第 一 次 參加 搶 包山 比賽 影 嘅 。 豬仔 記得 豬 爸爸 同 佢 講 過 ， 佢 輸 咗 嗰
場 比賽 ， 但 係 點解 相 入面 嘅 佢 笑 得 咁 開心 嘅 ？ 豬仔 反轉 張 相 ， 背面 寫 住 「 跌低 係 為 咗 學習 點樣 企 返 起身 。」 豬仔 呢 個 時候 先 醒起 ， 豬 爸爸 雖然 輸 咗 嗰 次 比賽 ， 但 係 佢 冇 被 打沉 ， 之後 仲 不停 練習 同 參賽 ， 而家 已經 係 豬村 出 晒 名 嘅 「 包 山王 」 ！
豬仔 拎 張 相 畀 羊仔 睇 ， 話 ：「 原來 張 藏寶圖 係 爸爸 㗎 ！ 相信 嗰 次 嘅 失敗 經歷 對 爸爸 嚟 講 係 好 珍貴 嘅 回憶 ，所以 佢 先 珍而重之 噉 收埋 呢 張 相 ……」
豬仔 喺 呢 一刻 終於 明白 ， 原來 失敗 並唔 可怕 ， 最 重要 係 學 識 接受 失敗 ， 從中 學習 ； 失敗 亦 唔 需要 一 個 人 面對 ， 因為 人 身邊 總 會 有 啲 好似 羊仔 噉 嘅 好 朋友 陪 住 你 。 經過 今 次 之後 ， 豬仔 唔 再 自暴自棄 ， 仲 決定 好好 準備 下 一 屆 大胃 王 比賽 添 ！
